پاک کلام چ ایس بارے کجھ نئیں دَسیا گیا۔ پر ایہدے چ کجھ ایہو جہیاں گلاں ضرور دَسیاں گئیاں نئیں جنہاں توں اَسی سمجھ سکنے آں کہ اوہناں نے ایہہ فیصلہ کیوں کیتا ہوئے گا۔‏

اِک فرشتے نے مریم نُوں دسیا کہ اوہ حاملہ ہوئے گی تے اوہدا اِک پُتر ہوئے گا۔ جدوں فرشتہ ایہہ پیغام سُنا رہیا سی، اوس ویلے یوسف تے مریم گلیل دے شہر ناصرت چ رہ رہے سن۔ یوسف اوتھوں دا ہی رہن والا سی۔ (‏لُوقا 1:‏26-‏31؛‏ 2:‏4‏)‏ بعد چوں جدوں اوہ مصر توں واپس آئے تے اوہ ناصرت چ ای رہن لگ پئے۔ یسوع ایتھے ای وڈا ہویا تے اوہنوں ناصری کہیا جان لگ پیا۔ (‏متی 2:‏19-‏23‏)‏ ایس لئی جدوں یسوع، یوسف تے مریم دا ذکر ہوند‌ا اے تے ساڈے ذہن چ شہر ناصرت آند‌ا اے۔‏

مریم دی اِک رشتےدار جدا ناں الیشبع سی، اوہ یہوداہ چ رہندی سی۔ اوہ زکر‌یاہ کاہن دی بیوی تے یوحنا بپتسمہ دین والے دی ماں سی۔ (‏لُوقا 1:‏5،‏ 9،‏ 13،‏ 36‏)‏ مریم الیشبع نُوں مِلن یہوداہ گئی تے تِن مہینے تک اوہدے کول ای رہی۔ فیر اوہ ناصرت واپس آ گئی۔ (‏لُوقا 1:‏39، 40،‏ 56‏)‏ ایس لئی اوہ یہوداہ دے علاقے بارے تھوڑا بوہت جان‌دی سی۔‏

جدوں رومی حکومت نے ایہہ حکم دِتا کہ سارے لوک اپنا ناں لکھوان لئی اپنے اپنے شہر جان تے یوسف ناصرت توں داؤد دے شہر بیت‌لحم گیا۔ بیت‌لحم اوہی شہر سی جدے بارے پیشین‌گو‌ئی کیتی گئی سی کہ مسیح اوتھے پیدا ہوئے گا۔ (‏لُوقا 2:‏3، 4؛‏ 1-‏سموئیل 17:‏15؛‏ 20:‏6؛‏ میکاہ 5:‏2‏)‏ بیت‌لحم چ یسوع دے پیدا ہون توں بعد یوسف ایہہ نئیں چاہندا سی کہ مریم چھوٹے جہے بچے دے نال ایناں لما سفر کر کے ناصرت جائے۔ ایس لئی اوہ بیت‌لحم چ ای رُک گئے جیہڑا یروشلیم توں کوئی 9 کلومیٹر (‏تقریباً 6 میل)‏ ای دُور سی۔ ایس وجہ توں اوہناں لئی اپنے چھوٹے بچے نُوں ہیکل لے کے جانا تے شریعت دے مطابق قربانی چڑھانا زیادہ اسان سی۔—‏احبار 12:‏2،‏ 6-‏8؛‏ لُوقا 2:‏22-‏24‏۔‏

خدا دے فرشتے نے مریم نُوں دَسیا سی کہ اوہدے پُتر نُوں داؤد دا تخت ملے گا تے اوہ بادشاہ دے طور تے حکمرانی کر‌ے گا۔ شاید یوسف تے مریم نے ایہہ سوچیا ہوئے کہ یسوع دا داؤد دے شہر چ پیدا ہونا ضروری سی۔ (‏لُوقا 1:‏32، 33؛‏ 2:‏11،‏ 17‏)‏ یاں فیر ہو سکدا اے کہ اوہناں نے ایہہ سوچیا ہوئے کہ جدوں تک اوہناں نُوں خدا وَلّوں نوِیں ہدیت نئیں مِلدی، اوتھے ای رُکنا سمجھ‌داری دی گل اے۔‏

اَسی نئیں جان‌دے کہ جدوں کجھ نجومی بیت‌لحم پہنچے سن تے یوسف تے مریم نُوں اوتھے رہندیاں ہوئیاں کِنّاں چِر ہو گیا سی۔ پر جدوں نجومی اوتھے پہنچے سن، اوہدوں تک یوسف تے مریم اِک گھر چ رہ رہے سن تے اوہناں دا پُتر تھوڑا وڈا ہو چُکیا سی۔ (‏متی 2:‏11‏)‏ اِنج لگدا اے کہ اوہ واپس ناصرت جان دی بجائے بیت‌لحم چ ایناں عرصہ رہے سن کہ اوہناں نے اوتھے اپنا اِک گھر بنا لیا سی۔‏

ہیرودیس نے ایہہ حکم دِتا سی کہ بیت‌لحم چ ’‏اوہناں سارے مُنڈیاں نُوں مروا دِتا جائے جنہاں دی عمر دو سال یاں ایس توں گھٹ اے۔‘‏ (‏متی 2:‏16‏)‏ اِک فرشتے نے پہلاں توں یوسف نُوں ایس بارے خبردار کر دِتا۔ ایس لئی یوسف تے مریم یسوع نُوں لے کے مصر بھج گئے تے ہیرودیس دے مرن تک اوتھے ای رہے۔ بعد چوں یوسف اوہناں نُوں لے کے ناصرت چلا گیا۔ اوہ بیت‌لحم واپس کیوں نئیں گئے؟ کیونکہ اوس ویلے ہیرودیس دا پُتر ارخلاؤس یہودیہ تے حکومت کر رہیا سی جیہڑا بڑا ای ظالم سی۔ ایہدے علاوہ خدا دے اِک فرشتے نے یوسف نُوں بیت‌لحم جان توں منع کیتا سی۔ پر ناصرت چ اوہ بغیر کسے خطرے توں خدا دی مرضی دے مطابق یسوع دی پرورش کر سکدا سی۔—‏متی 2:‏19-‏22؛‏ 13:‏55؛‏ لُوقا 2:‏39،‏ 52‏۔‏

اِنج لگدا اے کہ یوسف اوس ویلے توں پہلے ای فوت ہو چُکیا سی جدوں یسوع نے اسمان تے جان دی راہ کھولی۔ ایس لئی یوسف نُوں زمین تے زند‌ہ کیتا جائے گا۔ فیر ساڈے چوں بوہت سارے اوہنوں مل سکن گے تے اوہدے کولوں پچھ سکن گے کہ اوہنے تے مریم نے یسوع دے پیدا ہون توں بعد بیت‌لحم چ رہن دا فیصلہ کیوں کیتا۔‏