1.‏ 1-‏پطرس 5:‏2 دے مطابق یہوواہ نے بزرگاں نُوں کیہڑا اعزاز دِتا اے؟‏

 یہوواہ نے کلیسیا دے بزرگاں نُوں ایہہ ذمےداری دِتی اے کہ اوہ اوہدیاں پیاریاں بھیڈاں دی دیکھ‌بھال کر‌ن۔ بزرگ اپنے بھین بھراواں دی خدمت کر‌ن دے اعزاز دی بڑی قدر کر‌دے نیں تے اوہ سخت محنت کر‌دے نیں تاکہ اوہ ایہو جہے چرواہے بنن جیہڑے چنگے طریقے نال گلہ‌بانی کر‌دے نیں۔ (‏یرمیاہ 23:‏4؛‏ 1‏-‏پطرس 5:‏2 نُوں پڑھو۔‏‏)‏ اَسی یہوواہ دے بڑے شکرگزار آں کہ اوہنے کلیسیا چ سانوں ایہو جہے بھرا دِتے نیں۔‏

2.‏ کجھ بزرگاں نُوں کیہڑے مسئلیاں دا سامنا ہو سکدا اے؟‏

² بزرگاں نُوں اپنیاں ذمےداریاں نُوں پورا کر‌دے ویلے بوہت سارے مسئلیاں دا سامنا کر‌نا پے سکد ا اے۔ اِک گل ایہہ وے کہ کلیسیا دی دیکھ‌بھال کر‌دے ویلے اوہناں نُوں بوہت سارا کم کر‌نا پیندا اے۔ امریکہ چ رہن والا اِک بزرگ جدا ناں ٹونی اے،اوہنوں ایہہ سمجھنا پیا کہ اوہ اپنے ذمے اوناں ای کم لوَے جِنّاں اوہ کر سکدا اے۔ اوہنے دَسیا:‏ ”‏جدوں کورونا دی وبا شروع ہوئی تے مَیں عبادتاں تے مُنادی دا اِنتظام کر‌ن چ ہور زیادہ مصروف ہو گیا۔ مَیں کافی کم کر‌نا ساں پر کم ختم ہون دا ناں ای نئیں لیندا سی۔ مَیں ایناں مصروف رہن لگ پیا کہ میرے کول بائبل پڑھن، ذاتی مطالعیا کر‌ن تے دُعا کر‌ن لئی وقت ای نئیں بچ‌دا سی۔“‏ کوسووو چ رہن والا اِک بزرگ جدا ناں اِلر اے، اوہنوں اِک فرق مسئلے دا سامنا سی۔ جدوں اوہ اِک ایہو جہے علاقے چ رہ رہیا سی جتھے جنگ لگی ہوئی سی تے اوہنوں تنظیم دِیاں ہدیتاں نُوں مننا مشکل لگ رہیا سی۔ اوہنے کہیا:‏ ”‏جدوں برانچ نے مینوں ایہہ ذمےداری دِتی کہ مَیں اِک خطرناک علاقے چ بھین بھراواں دی مدد کر‌اں تے میری دلیری دا اِمتحان ہویا تے مینوں نئیں لگ رہیا سی کہ ایس ہدیت نُوں مننا سمجھ‌داری اے۔“‏ ایشیا چ خدمت کر‌ن والے اِک مشنری نُوں اپنے ہر روز دے کماں نُوں پورا کر‌نا مشکل لگ رہیا سی۔ اوہنے کہیا:‏ ”‏کدی کدار مَیں ذہنی طور تے ایناں تھک جانا ساں کہ میرے اند‌ر بھین بھراواں دی مدد کر‌ن دی ہمت ای نئیں رہندی سی۔“‏ جیہڑے بزرگ ایس طرحاں دے مسئلیاں دا سامنا کر رہے نیں، کیہڑی چیز اوہناں دی مدد کر سکدی اے؟‏

3.‏ سانوں ساریاں نُوں جدعون دی مثال تے غور کر‌ن نال کیہہ فائدہ ہوئے گا؟‏

 ³ بزرگ جدعون دی مثال توں بوہت کجھ سکھ سکدے نیں۔ (‏عبرانیوں 6:‏12؛‏ 11:‏32‏)‏ جدعون یہوواہ دے بندیاں دی حفاظت کر‌ن دے نال نال اوہناں دی گلہ‌بانی وی کر رہیا سی۔ (‏قضاۃ 2:‏16؛‏ 1-‏تواریخ 17:‏6‏)‏ جدعون وانگوں اَج وی یہوواہ نے بزرگاں نُوں مقرر کیتا اے تاکہ اوہ ایس مشکل دَور چ اوہدے بندیاں دا خیال رکھ سکن۔ (‏اعمال 20:‏28؛‏ 2-‏تیمُتھیُس 3:‏1‏)‏ اَسی جدعون توں یہوواہ دے فرمانبردار رہنا تے خاکسار بننا سکھنے آں۔ جدوں جدعون اپنیاں ذمےداریاں نُوں پورا کر رہیا سی تے اوہدی ثابت‌قدمی دا اِمتحان ہویا۔ شاید اَسی کلیسیا چ بزرگ تے نئیں آں پر اَسی سارے ای اپنے دل چ بزرگاں لئی قدر نُوں ودھا سکنے آں۔ اَسی اپنے ایہناں محنتی بھراواں دا ساتھ دے سکنے آں جیہڑے کلیسیا چ ساڈی دیکھ‌بھال کر رہے نیں۔—‏عبرانیوں 13:‏17‏۔‏

4.‏ جدعون نے کیویں ثابت کیتا کہ اوہ خاکسار اے؟‏

⁴ جدعون بڑا خاکسار سی۔‏ b جدوں یہوواہ دے اِک فرشتے نے جدعون نُوں دَسیا کہ یہوواہ نے بنی‌اِسرائیل نُوں مِدیانیاں توں چھڈان لئی اوہنوں چُنیا اے تے جدعون نے بڑی خاکساری نال ایہہ جواب دِتا:‏ میرا خاند‌ان منسّی دے قبیلے چ سب توں غریب اے تے مَیں اپنے باپ دے گھر چ سب توں معمولی بندہ واں۔ (‏قضاۃ 6:‏15‏)‏ جدعون نُوں لگ رہیا سی کہ اوہ ایس ذمےداری نُوں پورا کر‌ن دے لائق نئیں اے۔ پر یہوواہ جان‌دا سی کہ اوہ ایہہ کم کر سکدا اے۔ تے یہوواہ دی مدد نال جدعون نے بڑی چنگی طرحاں اپنی ذمےداری نُوں پورا کیتا۔‏

5.‏ کیہڑی صورتحال چ اِک بزرگ لئی خاکسار رہنا مشکل ہو سکدا اے؟‏

⁵ بزرگ ہر طرحاں دی صورتحال چ خاکسار رہن دی پوری کوشش کر‌دے نیں۔ (‏میکاہ 6:‏8؛‏ اعمال 20:‏18، 19‏)‏ اوہ اپنیاں صلاحیتاں یاں کامیابیاں تے شیخی نئیں ماردے تے نہ ای اپنیاں غلطیاں دی وجہ توں اپنے آپ نُوں بےکار سمجھدے نیں۔ پر فیر وی کدی کدار اِک بزرگ دی خاکساری دا اِمتحان ہو سکدا اے۔ مثال لئی، ہو سکدا اے کہ اوہ بوہت ساریاں ذمےداریاں لے لوَے پر اوہناں نُوں پورا کر‌نا اوہنوں مشکل لگ رہیا ہووے۔ یاں فیر اوس ویلے وی اوہدی خاکساری دا اِمتحان ہو سکدا اے جدوں کسے ذمےداری نُوں پورا کر‌ن دی وجہ توں اوہدی تعریف ہوند‌ی اے یاں اوہدے چ نُقص کڈھیا جاند‌ا اے۔ ایہو جہی صورتحال چ بزرگ جدعون دی مثال توں کیہہ سکھدے نیں؟‏

6.‏ بزرگ خاکساری بارے جدعون دی مثال توں کیہہ سکھ سکدے نیں؟ (‏تصویر نُوں وی ویکھو۔)‏

⁶ دُوجیاں کولوں مدد لَوو۔‏ اِک خاکسار بندہ جان‌دا اے کہ اوہ کیہڑا کم کر سکدا اے تے کہ کیہڑا نئیں۔ جدعون وی ایس گل نُوں سمجھدا  سی۔ ایس لئی اوہنے دُوجیاں کولوں مدد منگی۔ (‏قضاۃ 6:‏27،‏ 35؛‏ 7:‏24‏)‏ بزرگ وی اِنج کر‌ن نال سمجھ‌داری ظاہر کر‌دے نیں۔ ذرا غور کر‌و کہ ایس بارے بھرا ٹونی نے کیہہ کہیا۔ اوہنے کہیا:‏ ”‏بچپن چ جیس طرحاں میری تربیت ہوئی، اوہدی وجہ توں مَیں اوہناں ذمےداریاں نُوں وی قبول کر لینا ساں جنہاں نُوں پورا کر‌نا میرے لئی اسان نئیں ہوند‌ا سی۔ ایس لئی مَیں سوچیا کہ اَسی اپنی خاند‌انی عبادت چ ایس موضوع تے گل بات کر‌اں گے۔ مَیں اپنی بیوی کولوں پچھیا کہ مینوں کتھے بہتری لیان دی لوڑ اے۔ مَیں ساڈی ویب‌سائٹ jw.org تے اُردو زبان چ ویڈیو ‏”‏تربیت دینے،‏ بھروسا کرنے اور ذمےداریاں سونپنے کے سلسلے میں مسیح کی طرح بنیں‏“‏ نُوں وی ویکھیا۔“‏ فیر بھرا ٹونی نے اپنیاں کجھ ذمےداریاں نُوں پورا کر‌ن لئی دوجیاں کولوں مدد لینی شروع کر دِتی۔ ایہدا کیہہ نتیجہ نکلیا؟ بھرا ٹونی نے دَسیا:‏ ”‏ہُن کلیسیا دے سارے کم بڑے چنگے طریقے نال ہو رہے نیں تے میرے کول یہوواہ نال اپنی دوستی نُوں مضبوط کر‌ن لئی زیادہ وقت اے۔“‏

7.‏ بزرگ اوس ویلے جدعون دی مثال تے کیویں عمل کر سکدے نیں جدوں کوئی اوہناں چ نُقص کڈھدا اے؟ (‏یعقوب 3:‏13‏)‏

⁷ جدوں کوئی تواڈے چ نُقص کڈھدا اے تے غصے چ نہ آؤ۔‏ بزرگاں دی خاکساری دا اِمتحان اوس ویلے وی ہوند‌ا اے جدوں کوئی اوہناں چ نُقص کڈھدا اے۔ ایس معاملے چ وی جدعون نے بڑی چنگی مثال قائم کیتی۔ جدعون جان‌دا سی کہ اوہدے کولوں غلطیاں ہو سکدیاں نیں۔ ایس لئی جدوں اِفرائیم دے لوکاں نے اوہدے چ نقص کڈھے تے اوہ غصے چ نئیں آیا۔ (‏قضاۃ 8:‏1-‏3‏)‏ ایہدی بجائے اوہنے بڑے دھیان نال اوہناں دی گل سُنی تے نرمی نال اوہناں نُوں جواب دِتا۔ اِنج اوہناں لوکاں دا غصہ ٹھنڈا ہو گیا۔ بزرگ وی جدعون وانگوں دھیان نال اوہناں لوکاں دی گل سُن‌دے نیں جیہڑے اوہناں چ نقص کڈھدے نیں تے فیر اوہناں نُوں نرمی نال جواب دیندے نیں۔ ‏(‏یعقوب 3:‏13 نُوں پڑھو۔)‏ اِنج اوہ کلیسیا چ امن نُوں قائم رکھدے نیں۔‏

8.‏ جدوں بزرگاں دی تعریف کیتی جاند‌ی اے تے اوہناں نُوں کیہہ کر‌نا چاہی دا اے؟ اِک مثال دَوو۔‏

⁸ جدوں تواڈی تعریف کیتی جاندی اے تے یہوواہ دی وڈیائی کرو۔‏ جدوں جدعون نے مِدیانیاں نُوں جنگ چ ہرا دِتا تے لوکاں نے اوہدی بڑی تعریف کیتی پر اوہنے ایس کامیابی لئی یہوواہ دی وڈیائی کیتی۔ (‏قضاۃ 8:‏22، 23‏)‏ بزرگ جدعون وانگوں کیویں بن سکدے نیں؟ جدوں اوہناں دی تعریف کیتی جاند‌ی اے تے اوہ اوہدے لئی یہوواہ دی وڈیائی کر سکدے نیں۔ (‏1-‏کُرنتھیوں 4:‏6، 7‏)‏ مثال لئی، جدوں اِک بزرگ دی ایس لئی تعریف کیتی جاند‌ی اے کہ اوہ بڑی چنگی طرحاں تلیم دیندا اے تے اوہ دُوجیاں دا دھیان خدا دے کلام یاں اوہدی تنظیم وَلّوں مِلن والی تربیت تے دَوا سکدا اے۔ بزرگاں نُوں سوچنا چاہی دا اے کہ کیہہ اوہ ایس طرحاں تلیم تے نئیں دے رہے کہ لوکاں دا دھیان یہوواہ دی بجائے اوہناں تے آ رہیا اے۔ ذرا اِک بزرگ دے تجربے تے غور کر‌و جدا ناں ٹیموتھی اے۔ جدوں اوہ نواں نواں بزرگ بنیا سی تے اوہنوں عوامی تقریراں دینا بوہت پسند سی۔ اوہ دَسدا اے:‏ ”‏مَیں تقریر دے شروع چ بڑا لما چوڑا تعارف کر‌انا ساں تے وڈیاں وڈیاں مثالاں دینا ساں۔ ایس وجہ توں بھین بھرا میری تعریف تے بوہت کر‌دے سن پر اِنج اوہناں دی توجہ بائبل تے یہوواہ توں ہٹ کے میرے تے چلی جاند‌ی سی۔“‏ وقت دے نال نال بھرا ٹیموتھی ایہہ سمجھ گیا کہ اوہنوں اپنے تلیم دین دے طریقے نُوں بدلن دی لوڑ اے تاکہ بھین بھرا اوہدے تے حد توں زیادہ توجہ نہ دین۔ (‏امثال 27:‏21‏)‏ ایہدا کیہہ نتیجہ نکلیا؟ بھرا دَسدا اے:‏ ”‏ہُن بھین بھرا آ کے مینوں دَسدے نیں کہ میری تقریر دی وجہ توں اوہناں نُوں کسے مشکل نال نبڑن یاں یہوواہ دے ہور نیڑے جان چ کیویں مدد ملی اے۔ بھین بھراواں دی ایہہ گل سُن کے مینوں جِنّی خوشی مِلدی اے اونی اوہدوں نئیں مِلدی سی جدوں اوہ میری تعریف کر‌دے سن۔“‏

9.‏ جدعون دی فرمانبرداری تے دلیری دا اِمتحان کیویں ہویا؟ (‏پہلے صفحے دی تصویر نُوں ویکھو۔)‏

⁹ جدوں یہوواہ نے جدعون نُوں قاضی مقرر کیتا تے اوہدی فرمانبرداری تے دلیری دا اِمتحان ہویا۔ اوہنوں ایہہ خطرناک ذمےداری ملی کہ اوہ بعل دی اوس قربان‌گاہ نُوں ڈھا دَوے جیہڑی اوہدے پیو نے بنائی سی۔ (‏قضاۃ 6:‏25، 26‏)‏ ایہدے بعد اوہنے اِک فوج تیار کیتی۔ پر یہوواہ نے دو واری اوہنوں کہیا کہ اوہ فوجیاں دی تعداد نُوں گھٹائے۔ (‏قضاۃ 7:‏2-‏7‏)‏ ایس توں بعد یہوواہ نے اوہنوں کہیا کہ اوہ ادھی رات نُوں دُشمن تے حملہ کر‌ے۔—‏قضاۃ 7:‏9-‏11‏۔‏

10.‏ اِک بزرگ دی فرمانبرداری دا اِمتحان کیویں ہو سکدا اے؟‏

 ¹⁰ بزرگاں نُوں فرمانبردار رہنا چاہی دا اے۔ (‏یعقوب 3:‏17‏)‏ اِک فرمانبردار بزرگ پاک کلام چ لکھیاں گلاں تے تنظیم وَلّوں مِلن والیاں ہدیتاں تے فوراً عمل کر‌دا اے۔ اِنج اوہ دُوجیاں لئی بڑی چنگی مثال قائم کر‌دا اے۔ پر فیر وی ہو سکدا اے کہ اوہدی فرمانبرداری دا اِمتحان ہووے۔ مثال لئی ہو سکدا اے کہ تنظیم وَلّوں بوہت ساریاں ہدیتاں مل رہیاں ہون یاں فیر ہدیتاں اِک دم بدل رہیاں ہون تے ایس وجہ توں اوہنوں ایہناں ہدیتاں تے عمل کر‌نا مشکل لگ رہیا ہوئے۔ شاید کدی کدار اوہدے ذہن چ ایہہ خیال آئے کہ کیہہ تنظیم دی فلانی ہدیت تے عمل کر‌ن نال فائدہ ہوئے گا یاں نئیں۔ یاں فیر ایہہ وی ہو سکدا اے کہ اوہنوں کوئی ایہو جہی ذمےداری ملے جدی وجہ توں اوہنوں گِرفتار کیتا جا سکدا اے۔ ایہو جہی صورتحال چ بزرگ جدعون وانگوں یہوواہ دے فرمانبردار کیویں رہ سکدے نیں؟‏

11.‏ کیہڑی چیز یہوواہ دے فرمانبردار رہن چ بزرگاں دی مدد کر سکدی اے؟‏

¹¹ یہوواہ دِیاں ہدیتاں نُوں دھیان نال سُنو تے اوہناں تے عمل کرو۔‏ یہوواہ نے جدعون نُوں دَسیا کہ اوہنے اپنے باپ دی بنائی ہوئی قربان‌گاہ نُوں کیویں ڈھانا اے، یہوواہ لئی اِک نوِیں قربان‌گاہ کتھے بنانی اے تے کیہڑے جانور نُوں قربان کر‌نا اے۔ جدعون نے یہوواہ وَلّوں مِلن والیاں ہدیتاں تے اِعتراض نئیں کیتا۔ سگوں یہوواہ نے جو جو کہیا، جدعون نے بالکل اُنج ای کیتا۔ اَج بزرگاں نُوں یہوواہ دی تنظیم وَلّوں خطاں تے اعلاناں دے ذریعے ہدیتاں مِلدیاں نیں۔ ایہناں چ ایہو جہیاں ہدیتاں شامل ہوند‌یاں نیں جنہاں دے ذریعے اَسی محفوظ تے یہوواہ دے نیڑے رہ سکنے آں۔ اَسی بزرگاں دی بڑی قدر کر‌نے آں کیونکہ اوہ ایہناں ہدیتاں تے عمل کر‌دے نیں تے اِنج پوری کلیسیا نُوں بڑا فائدہ ہوند‌ا اے۔—‏زبور 119:‏112‏۔‏

12.‏ جدوں تنظیم دی کوئی ہدیت بدل‌دی اے تے بزرگ عبرانیوں 13:‏17 تے کیویں عمل کر سکدے نیں؟‏

¹² تبدیلیاں دے مطابق ڈھلن لئی تیار رہوو۔‏ یہوواہ دے کہن تے جدعون نے تقریباً اپنے سارے فوجیاں نُوں واپس گھل دِتا سی تے اوہدے کول صرف تھوڑے جہے فوجی رہ گئے سن۔ (‏قضاۃ 7:‏8‏)‏ شاید جدعون دے دل چ آیا ہوئے:‏ ”‏کیہہ ایس تبدیلی دی واقعی ضرورت سی؟ کیہہ اِنج کر‌ن دا کوئی فائدہ ہوئے گا؟“‏ سانوں نئیں پتہ کہ اوہنے اِنج سوچیا سی یاں نئیں، پر فیر وی اوہنے یہوواہ دی ہدیت تے عمل کیتا۔ اَج وی جدوں یہوواہ دی تنظیم کسے ہدیت نُوں بدل‌دی اے تے بزرگ جدعون وانگوں اوس ہدیت تے عمل کر‌دے نیں۔ ‏(‏عبرانیوں 13:‏17 نُوں پڑھو۔)‏ مثال لئی 2014 چ گو‌رننگ باڈی نے عبادت‌گاہواں تے اجتماعواں لئی ہالاں نُوں بنان بارے ہدیتاں نُوں بدلیا۔ (‏2-‏کُرنتھیوں 8:‏12-‏14‏)‏ 2014 توں پہلاں جدوں تنظیم کسے کلیسیا نُوں عبادت‌گاہ بنان لئی پیسے دیندی سی تے عبادت‌گاہ بنن توں بعد اوس کلیسیا نُوں اوہ پیسے تنظیم نُوں واپس کر‌نے ہوند‌ے سن۔ پر ہُن اِنج نئیں ہوند‌ا۔ سگوں نوِیں ہدیت دے مطابق بھانویں اِک کلیسیا زیادہ عطیات نہ وی دے سکے پر فیر وی پوری دُنیا چ کلیسیاواں توں مِلن والے عطیات دے ذریعے اوتھے عبادت‌گاہ بنائی جاند‌ی اے۔ ایس طریقے نُوں پوری دُنیا چ عبادت‌گاہواں نُوں بنان لئی استمال کیتا جاند‌ا اے۔ جدوں بھرا حوسے نُوں ایس تبدیلی بارے پتہ چلیا تے اوہنے سوچیا:‏ ”‏پتہ نئیں ایس ہدیت دے مطابق کدی عبادت‌گاہواں بن وی سکن گیا‌ں یاں نئیں۔ ساڈے ملک چ ایس طریقے نال کم نئیں ہوند‌ا۔“‏ پر کیہڑی چیز نے بھرا حوسے دی مدد کیتی تاکہ اوہ تنظیم دی ہدیت دے مطابق چل سکے؟ اوہنے  کہیا:‏ ”‏امثال 3:‏5، 6 دے مطابق مَیں سمجھ گیا کہ مینوں یہوواہ تے بھروسا کر‌نا چاہی دا اے۔ اِنج کر‌ن نال بڑے چنگے نتیجے نکلے نیں۔ اَسی نہ صرف بوہت ساریاں عبادت‌گاہواں بنا رہے آں سگوں اَسی فرق فرق طریقیاں نال عطیات دینا وی سکھیا اے تاکہ جے اِک علاقے چ عطیات زیادہ نیں تے ایہناں دے ذریعے دُوجے علاقیاں چ عطیات دی کمی نُوں پورا کیتا جا سکے۔“‏

13.‏ (‏الف)‏ جدعون نُوں کیہڑی گل دا یقین سی؟ (‏ب)‏ بزرگ جدعون دی مثال تے کیویں عمل کر سکدے نیں؟ (‏تصویر نُوں وی ویکھو۔)‏

¹³ دلیری نال یہوواہ دی گل منو۔‏ جدعون نے اوس ویلے وی یہوواہ دی گل منی جدوں اوہ بوہت ڈریا ہویا سی تے اوہنوں اِک خطرناک ذمےداری نُوں پورا کر‌نا سی۔ (‏قضاۃ 9:‏17‏)‏ جدوں یہوواہ نے جدعون نُوں دَسیا کہ اوہ اوہدا ساتھ دَوے گا تے جدعون نُوں ایس گل دا پکا یقین ہو گیا کہ یہوواہ دی مدد نال اوہ اوہدے بندیاں نُوں بچا لوَے گا۔ جیہڑے بزرگ ایہو جہے مُلکاں چ رہندے نیں جتھے ساڈے کم تے پابندی لگی ہوئی اے، اوہ جدعون دی مثال تے عمل کر‌دے نیں۔ اوہ جان‌دے نیں کہ اوہناں نُوں گِرفتار کیتا جا سکدا اے، اوہناں کولوں پچھ گچھ ہو سکدی اے، اوہناں دی نوکر‌ی جا سکدی اے تے اوہناں نُوں ماریا کُٹیا جا سکدا اے۔ پر فیر وی اوہ دلیری نال عبادتاں تے مُنادی چ بھین بھراواں دی پیشوائی کر‌دے نیں۔‏ c وڈی مصیبت دے دوران بزرگاں نُوں ایس لئی دلیری دی لوڑ ہوئے گی تاکہ اوہ خطریاں دے باوجود یہوواہ دِیاں ہدیتاں تے عمل کر سکن۔ ایہناں ہدیتاں چ شاید ایس بارے وی ہدیتاں ہون کہ سانوں لوکاں نُوں اولیاں ورگا پیغام کیویں سُنانا اے تے ماجوج دے جوج وَلّوں ہون والے حملے دا سامنا کیویں کر‌نا اے۔—‏حِزقی‌ایل 38:‏18؛‏ مکاشفہ 16:‏21‏۔‏

14.‏ جدعون دی ثابت‌قدمی دا اِمتحان کیویں ہویا؟‏

¹⁴ اِک قاضی دے طور تے جدعون نے بڑی محنت نال کم کر‌نا سی۔ جدوں اوہنے اَدھی رات نُوں مِدیانیاں تے حملہ کیتا تے مِدیانی اپنی جان بچان لئی بھج گئے۔ جدعون نے یزرعیل دی وادی توں لے کے دریائے یردن تک اوہناں دا پچھا کیتا۔ دریائے یردن دے آلے دوالے شاید بوہت ساریاں جھاڑیاں سن۔ (‏قضاۃ 7:‏22‏)‏ کیہہ جدعون نے اوتھے پونچ کے مِدیانیاں دا پچھا کر‌نا چھڈ دِتا؟ نئیں۔ بھانویں کہ جدعون تے اوہدے 300 ساتھی بوہت تھک گئے سن پر ایہدے باوجود اوہناں نے دریائے یردن نُوں  پار کیتا تے مِدیانیاں دا پچھا کر‌دے رہے۔ اخیر اوہناں نے مِدیانیاں نُوں پھڑ لیا تے اوہناں نُوں ہرا دِتا۔—‏قضاۃ 8:‏4-‏12‏۔‏

15.‏ اِک بزرگ دی ثابت‌قدمی دا اِمتحان کدوں ہو سکدا اے؟‏

¹⁵ کدی کدار ہو سکدا اے کہ اِک بزرگ کلیسیا تے اپنے خاند‌ان دِیاں ذمےداریاں دی وجہ توں جسمانی تے ذہنی طور تے بوہت تھک جائے۔ ایہو جہی صورتحال چ اوہ جدعون دی مثال تے کیویں عمل کر سکدا اے؟‏

16، 17.‏ کیہڑی چیز نے ثابت‌قدم رہن چ جدعون دی مدد کیتی تے بزرگ کیہڑی گل دا بھروسا رکھ سکدے نیں؟ (‏یسعیاہ 40:‏28-‏31‏)‏ (‏تصویر نُوں وی ویکھو۔)‏

¹⁶ بھروسا رکھو کہ یہوواہ توانوں ہمت دَوے گا۔‏ جدعون نُوں ایس گل تے بھروسا سی کہ یہوواہ اوہنوں ہمت دَوے گا تے یہوواہ نے اوہدا بھروسا ٹُٹن نئیں دِتا۔ (‏قضاۃ 6:‏14،‏ 34‏)‏ اِک واری جدعون تے اوہدے ساتھی پیدل دو مِدیانی بادشاہواں دا پچھا کر رہے سن جیہڑے اونٹاں تے سوار سن۔ (‏قضاۃ 8:‏12،‏ 21‏)‏ پر فیر وی یہوواہ دی مدد نال اوہناں نے مِدیانی بادشاہواں نُوں پھڑ لیا تے جنگ جت گئے۔ جدعون وانگوں بزرگ وی یہوواہ تے بھروسا رکھ سکدے نیں جیہڑا کدی وی نئیں تھک‌دا۔ اوہ اوہناں نُوں ہمت تے طاقت ضرور دَوے گا۔‏‏—‏یسعیاہ 40:‏28-‏31 نُوں پڑھو۔‏

¹⁷ ذرا بھرا میتھیو دے تجربے تے غور کر‌و جیہڑا اِک ہسپتال رابطہ کمیٹی دا ممبر اے۔ کیہڑی چیز نے ثابت‌قدم رہن چ اوہدی مدد کیتی؟ اوہ کہندا اے:‏ ”‏مَیں فِلپّیوں 4:‏13 نُوں پورا ہوند‌ے ویکھیا اے۔ کدی کدار اِنج ہویا کہ مَیں بوہت زیادہ تھک گیا۔ ایہو جہے ویلے چ مَیں یہوواہ کولوں دُعا کیتی کہ اوہ مینوں ہمت دَوے تاکہ مَیں اپنے بھین بھراواں دی مدد کر سکاں۔ مَیں ویکھیا کہ کیویں یہوواہ دی پاک روح نے میرے اند‌ر طاقت بھر دِتی تاکہ مَیں ثابت‌قدم رہ سکاں۔“‏ جدعون وانگوں کلیسیا دے بزرگ وی یہوواہ دِیاں بھیڈاں دا خیال رکھن لئی سخت محنت کر‌دے نیں، بھانویں کہ اکثر اِنج کر‌نا اسان نئیں ہوند‌ا۔ بزرگاں نُوں یاد رکھنا چاہی دا اے کہ اوہ ہمیشاں اوہ سارے کم نئیں کر سکدے جیہڑے اوہ کر‌نا چاہندے نیں۔ پر اوہ ایس گل دا یقین رکھ سکدے نیں کہ جدوں وی اوہ مدد لئی یہوواہ نُوں پکارن گے، اوہ اوہناں دی ضرور سُنے گا تے ثابت‌قدم رہن لئی اوہناں نُوں ہمت تے طاقت دَوے گا۔—‏زبور 116:‏1؛‏ فِلپّیوں 2:‏13‏۔‏

18.‏ بزرگ کیہڑے کیہڑے طریقیاں نال جدعون دی مثال تے عمل کر سکدے نیں؟‏

¹⁸ بزرگ جدعون دی مثال توں بوہت کجھ سکھ سکدے نیں۔ اوہناں نُوں خاکساری نال فیصلہ کر‌نا چاہی دا اے کہ اوہ کِنّیاں ذمےداریاں چُک سکدے نیں۔ نالے جدوں اوہناں دی تعریف ہوند‌ی اے یاں اوہناں چ نُقص کڈھیا جاند‌ا اے تے اوہدوں وی اوہناں نُوں خاکسار رہنا چاہی دا اے۔ اوہناں نُوں یہوواہ دے فرمانبردار تے دلیر بننا چاہی دا اے، خاص طور تے ایس لئی کیونکہ ایس دُنیا دا خاتمہ نیڑے وے۔ ایہدے علاوہ اوہناں نُوں بھروسا رکھنا چاہی دا اے کہ بھانویں اوہناں نُوں کسے وی مشکل دا سامنا ہووے، یہوواہ اوہناں نُوں ہمت تے طاقت دَوے گا۔ ایہدے چ کوئی شک نئیں کہ اَسی ایہناں محنتی چرواہیاں دی دلوں قدر کر‌نے آں۔—‏فِلپّیوں 2:‏29‏۔‏