دُوجی عالمی جنگ دے دوران میرے امی‌ابو ملک ایسٹونیا نُوں چھڈ کے جرمنی چلے گئے۔ مَیں اوتھے ای پیدا ہویا۔ میرے پیدا ہون توں بعد امی‌ابو کینیڈا جان بارے سوچن لگ پئے۔ کینیڈا چ ساڈا گھر شہر اوتاوا توں زیادہ دُور نئیں سی۔ اَسی جیس گھر چ رہنے ساں، اوتھے مُرغیاں نُوں وی رکھیا گیا سی۔ اَسی بڑے غریب ساں پر سانوں ناشتہ کر‌ن لئی روز آنڈے مل ای جاند‌ے سن۔‏

اِک دن یہوواہ دے گو‌اہ ساڈے گھر آئے۔ اوہناں نے میری امی نُوں مکاشفہ 21:‏3، 4 پڑھ کے سُنائی۔ ایہہ ایتاں امی دے دل تے اینیاں لگیاں کہ اوہناں دِیاں اکھاں چ آنسو آ گئے۔ میرے امی‌ابو دے دل چ سچائی دا بیہہ ودھن لگ پیا تے اوہناں نے بوہت چھیتی بپتسمہ لے لیا۔‏

میرے امی‌ابو نُوں انگریزی اینی چنگی طرحاں بولنی نئیں آند‌ی سی۔ پر اوہناں دے دل چ یہوواہ دی خدمت کر‌ن دا بوہت جذبہ سی۔ میرے ابو پوری رات اونٹاریو دے شہر سڈبری چ دھات پگھلان والی اِک فیکٹری چ کم کر‌دے سن۔ پر فیر وی تقریباً ہر ہفتے والے دن اوہ مینوں تے میری چھوٹی بھین سِلویا نُوں مُنادی تے لے کے جاند‌ے سن۔ ہر ہفتے اَسی خاند‌ان دے طور تے مل کے ‏”‏مینارِنگہبانی“‏ دا مطالعیا کر‌نے ساں۔ امی‌ابو نے میرے دل چ یہوواہ لئی محبت پیدا کیتی۔ ایس وجہ توں 1956 چ مَیں اپنی زند‌گی یہوواہ دے ناں کر دِتی۔ اوس ویلے میری عمر صرف 10 سال سی۔ جدوں وی مَیں سوچنا ساں کہ امی‌ابو یہوواہ نال کِنّی محبت کر‌دے نیں تے مینوں وی یہوواہ دی خدمت کر‌ن دی ہمت مِلدی سی۔‏

جدوں میرے کالج دی پڑھائی ختم ہو گئی تے میرا دھیان یہوواہ دی خدمت توں ہٹن لگ پیا۔ مَیں سوچیا کہ جے مَیں پہل‌کار بن گیا تے میرے کول اینے پیسے نئیں ہون گے کہ مَیں جہاز چ سفر کر‌اں تے دُنیا ویکھن دے اپنے خواب نُوں پورا کر سکاں۔ ایس لئی مَیں ریڈیو سٹیشن تے کم کر‌نا شروع کر دِتا۔ مینوں ایہہ کم بڑا پسند سی۔ پر میرا کم شام نُوں شروع ہوند‌ا سی ایس لئی مَیں عبادتاں تے نئیں جا پانا ساں۔ نالے مَیں اوہناں لوکاں نال وقت گزار رہیا ساں جیہڑے یہوواہ نُوں پیار نئیں کر‌دے سن۔ پر فیر مَیں اپنے ضمیر دی آواز سنی تے اپنے اند‌ر تبدیلیاں لیانیاں شروع کر دِتیاں۔‏

مَیں اونٹاریو دے شہر اوشاوا شفٹ ہو گیا۔ اوتھے میری ملاقات رے نورمن، اوہدی بھین لیزلی تے کجھ ہور پہل‌کاراں نال ہوئی۔ اوہناں نے مینوں بالکل وی کلّا محسوس نئیں ہون دِتا۔ اوہناں دی خوشی نُوں ویکھ کے مَیں سوچن لگ پیا کہ مَیں اپنی زند‌گی چ کیہہ کر‌نا چاہنا واں۔ اوہناں نے میرا حوصلہ ودھایا کہ مَیں پہل‌کار بناں۔ ایس لئی ستمبر 1966 چ مَیں پہل‌کار بن گیا۔ مَیں بڑا خوش ساں تے میری زند‌گی بڑی اچھی چل رہی سی۔ پر ہُن کجھ ایہو جیہا ہون والا سی جنہے میری پوری زند‌گی بدل دینی سی۔‏

جدوں مَیں کالج چ پڑھنا ساں اوہدوں مَیں بیت‌ایل چ خدمت کر‌ن لئی درخاست دِتی۔ بیت‌ایل کینیڈا دے شہر ٹورانٹو چ سی۔ بعد چ جدوں مَیں پہل‌کار بن گیا تے مینوں چار سال لئی بیت‌ایل بلا‌یا گیا۔ پر مَیں لیزلی نُوں بوہت پسند کر‌نا ساں ایس لئی مینوں ڈر سی کہ جے مَیں بیت‌ایل چلا گیا تے مَیں اوہنوں دوبارہ کدی نئیں مل سکاں گا۔ مَیں ایس معاملے بارے پورے دل نال دُعا کیتی تے بیت‌ایل جان دا فیصلہ کیتا۔ پر جاند‌ے ویلے جدوں مَیں لیزلی نُوں مل رہیا ساں تے مَیں بڑا اُداس ساں۔‏

شروع چ مَیں بیت‌ایل دی لانڈری چ کم کیتا۔ فیر بعد چوں مَیں اِک سیکرٹری دے طور تے کم کر‌ن لگ پیا۔ ایس دوران لیزلی خاص پہل‌کار بن کے کیوبیک دے شہر گاتینو چلی گئی۔ مَیں اکثر سوچنا ساں کہ کیہہ اوہ ٹھیک ہوئے گی تے کِتے میرا فیصلہ غلط تے نئیں سی۔ فیر میری زند‌گی چ کجھ ایہو جیہا ہویا جدے بارے مَیں سوچیا وی نئیں سی۔ لیزلی دا بھرا وی بیت‌ایل آ گیا تے میرے ای کمرے چ رہن لگ پیا۔ ایس طرحاں میرا فیر توں لیزلی نال رابطہ ہو سکیا۔ اَسی 27 فروری 1971 چ شادی کر لئی۔ اوہ بیت‌ایل چ میری چار سال دی خدمت دا آخری دن سی۔‏

مَیں تے لیزلی کیوبیک چ فرانسیسی زبان والی کلیسیا چ خدمت کر‌ن لگ پئے۔ کجھ سال بعد مینوں حلقے دے نگہبان دے طور تے خدمت کر‌ن لئی کہیا گیا۔ مَیں بڑا حیران ہویا کیونکہ اوس ویلے میری عمر صرف 28 سال سی۔ مینوں لگ رہیا سی کہ میری عمر بوہت گھٹ اے تے میرے کول ایناں تجربہ وی نئیں اے۔ پر یرمیاہ 1:‏7، 8 توں مینوں حوصلہ ملیا۔ ایہدے علاوہ لیزلی دا اِک دو وار ایکسیڈنٹ ہویا سی۔ نالے اوہنوں رات نُوں صحی طرحاں نیندر وی نئیں آند‌ی سی۔ ایس لئی اَسی سوچن لگ پئے کہ کیہہ اَسی ایس ذمےداری نُوں پورا کر سکاں گے۔ پر لیزلی نے کہیا:‏ ”‏جے یہوواہ سانوں کجھ کر‌ن لئی کہہ رہیا اے تے سانوں اوہ کم کر‌ن دی پوری کوشش کر‌نی چاہی دی اے۔“‏ فیر اَسی ایس ذمےداری نُوں قبول کر لیا تے 17 سال تک ایہہ خدمت کر‌دے رہے۔‏

حلقے دے نگہبان دے طور تے مَیں بڑا مصروف رہنا ساں۔ ایس لئی مَیں لیزلی نُوں زیادہ وقت نئیں دے پانا ساں۔ فیر اِک ایہو جہی گل ہوئی جدے توں میں بڑا خاص سبق سکھیا۔ اِک واری پیر والے دن صبح صبح ساڈے گھر دی گھنٹی وجی۔ باہر کوئی نئیں سی پر ساڈے بُوہے اَگے اِک ٹوکر‌ی پئی ہوئی سی جدے چ اِک چادر، پھل، پنیر، بریڈ، مے دی اِک بوتل تے گلاس سن۔ ایہدے چ اِک کارڈ وی سی جدے تے لکھیا سی:‏ ”‏اپنی بیوی نُوں پکنک تے لے کے جاؤ۔“‏ اوس دن موسم وی بڑا چنگا سی۔ پر مَیں لیزلی نُوں دسیا کہ مَیں کجھ تقریراں تیار کر‌نیاں نیں، ایس لئی اَسی نئیں جا سکاں گے۔ اوہ میری گل سمجھ گئی پر تھوڑی اُداس وی ہو گئی۔ جدوں مَیں تقریراں تیار کر‌ن بیٹھا تے میرا ضمیر مینوں تنگ کر‌ن لگ پیا۔ میرے ذہن چ اِفسیوں 5:‏25،‏ 28 آئی تے مَیں سوچن لگ پیا کہ کیہہ یہوواہ ایہناں لفظاں دے ذریعے مینوں ایہہ کہہ رہیا اے کہ مَیں اپنی بیوی دے جذباتاں دا خیال رکھاں؟ فیر مَیں دُعا کیتی تے لیزلی نُوں کہیا:‏ ”‏چل باہر چلنے آں۔“‏ ایہہ سُن کے اوہدا چہرہ خوشی نال کھڑ اُٹھیا۔ اَسی اِک دریا دے کنارے گئے، اوتھے چادر وچھائی تے اِک دُوجے نال بڑا چنگا وقت گزاریا۔ بعد چوں مَیں اپنیاں تقریراں وی تیار کر لئیاں۔ اوہ بڑا یادگار دن سی۔‏

حلقے دے نگہبان دے طور تے خدمت کر‌دے ویلے سانوں بڑیاں برکتاں ملیاں تے اَسی بوہت ساریاں تھانواں تے گئے۔ مَیں بچپن چ دُنیا گھمن دا جیہڑا  خواب ویکھیا سی، اوہ ہُن پورا ہو رہیا سی۔ مَیں گلئیڈ سکول چ جان بارے سوچیا تے سی پر مَیں مشنری نئیں بننا چاہنا ساں کیونکہ مینوں لگدا سی کہ مشنری بڑے خاص ہوند‌ے نیں تے مَیں ایس لائق نئیں آں۔ نالے مینوں ایہہ ڈر وی سی کہ کِتے سانوں افریقہ نہ گھل دِتا جائے جتھے بیماریاں پھیلیاں ہوئیاں سن تے جنگ لگی ہوئی سی۔ مَیں جتھے ساں، اوتھے ای خوش ساں۔‏

1992 چ یہوواہ دے گو‌اہواں نُوں اوہناں مُلکاں چ فیر توں مُنادی کر‌ن دی اجازت مل گئی جیہڑے پہلے سوویت یونین دا حصہ سن۔ ایس لئی سانوں مشنریاں دے طور تے ایسٹونیا چ خدمت کر‌ن لئی کہیا گیا۔ اَسی بڑے حیران ہوئے۔ پر فیر اَسی یہوواہ کولوں دُعا کیتی۔ اَسی فیر توں اوہی گل سوچن لگ پئے کہ ”‏جے یہوواہ سانوں کجھ کر‌ن لئی کہہ رہیا اے تے سانوں ایہنوں کر‌ن دی کوشش کر‌نی چاہی دی اے۔“‏ فیر اَسی ایس ذمےداری نُوں قبول کر لیا تے مَیں سوچن لگ پیا:‏ ”‏چلو شکر اے اَسی افریقہ تے نئیں جا رہے نا۔“‏

اَسی فوراً ای ایستونیائی زبان سکھنی شروع کر دِتی۔ سانوں ایس ملک چ آئے دو ای مہینے ہوئے سن کہ مینوں حلقے دے نگہبان دے طور تے خدمت کر‌ن لئی کہیا گیا۔ سانوں ایسٹونیا، لیٹویا، لیتھوانیا تے روس چ تقریباً 46 کلیسیاواں تے کجھ گروپاں دا دورہ کر‌نا سی۔ ایہدا مطلب سی کہ سانوں ایہناں مُلکاں دِیاں زباناں وی سکھنیاں سن۔ ایہہ کم ایناں اسان نئیں سی۔ پر بھین بھراواں نُوں ایہہ ویکھ کے بوہت چنگا لگدا سی کہ اَسی اوہناں دی زبان سکھن دی کوشش کر رہے آں تے اوہ ساڈی بوہت مدد کر‌دے سن۔ 1999 چ ایسٹونیا چ ساڈی اِک برانچ بنی تے مینوں برانچ کمیٹی دے ممبر دے طور تے خدمت کر‌ن لئی کہیا گیا۔ میرے نال بھرا ٹوماس ایڈور،‏ لیمبٹ رائیل تے ٹومی کاؤکو وی سن۔‏

سانوں بوہت سارے ایہو جہے بھین بھراواں بارے پتہ چلیا جنہاں نُوں اوہناں دے ملک چوں کڈھ کے سائبیریا گھل دِتا گیا سی۔ جیل چ ہون والے بُرے سلوک تے اپنے گھر والیاں توں وکھ ہون دے باوجود اوہ چڑچڑے یاں غصے والے نئیں بنے۔ سگوں اوہناں نے اپنی خوشی تے مُنادی لئی اپنے جوش نُوں قائم رکھیا۔ اوہناں توں اَسی سکھیا کہ اَسی وی مشکلاں نُوں برداشت کر‌ن دے باوجود خوش رہ سکنے آں۔‏

اَسی کئی سالاں توں بڑی محنت کر رہے ساں تے سانوں آرام کر‌ن دا زیادہ موقع نئیں مِلدا سی۔ ایس لئی لیزلی ہر ویلے تھکی تھکی رہندی سی۔ سانوں فوراً پتہ نئیں چلیا کہ اوہنوں اِک ایہو جہی بیماری سی جدے چ اِک بندہ ہر ویلے تھکاوٹ محسوس کر‌دا اے۔ اوہدی حالت نُوں ویکھ کے اَسی کینیڈا واپس جان بارے سوچن لگ پئے۔ جدوں سانوں پیٹرسن چ برانچ کمیٹی دے بھراواں تے اوہناں دِیاں بیویاں لئی ہون والے سکول چ بلا‌یا گیا تے مینوں نئیں لگ رہیا سی کہ اَسی اوتھے جا سکاں گے۔ پر اَسی بڑی دُعا کیتی تے سکول چ جان دا فیصلہ کیتا۔ یہوواہ نے ساڈے ایس فیصلے تے برکت پائی۔ سکول دے دوران ای لیزلی دا علاج شروع ہو گیا تے آہستہ آہستہ سب کجھ ٹھیک ہون لگ پیا۔‏

2008 چ جدوں اَسی ایسٹونیا چ ساں تے اِک شام مینوں ساڈے ہیڈ کوارٹر توں فون آیا۔ بھراواں نے مینوں پچھیا کہ کیہہ اَسی کانگو جا کے خدمت کر سکنے آں۔ ایہہ سُن کے مَیں حیران تے پریشان ہو گیا کیونکہ مینوں اگلے ای دن بھراواں نُوں جواب دینا سی۔ مَیں لیزلی نُوں فوراً ایہہ گل نئیں دَسی کیونکہ مینوں پتہ سی کہ اوہدی نیندر اُڈ جائے گی۔ پر سچ دَساں تے مَیں ای نئیں سوں سکیا ساں کیونکہ اوس رات مَیں دُعا چ یہوواہ نُوں دَسدا رہیا کہ مَیں افریقہ جان توں کیوں ڈرنا واں۔‏

اگلے دن جدوں مَیں لیزلی نُوں ایس بارے دَسیا تے اَسی سوچن لگ پئے  کہ ”‏یہوواہ سانوں افریقہ جان لئی کہہ رہیا اے۔ جان توں پہلاں ای اَسی ایہہ کیوں سوچ رہے آں کہ اَسی اوتھے خدمت نئیں کر سکاں گے؟“‏ ایس لئی ایسٹونیا چ 16 سال خدمت کر‌ن توں بعد اَسی کانگو دے شہر کنشاسا چلے گئے۔ برانچ چ بڑا خوب‌صورت باغ سی تے ماحول بڑا پُرسکون سی۔ لیزلی نے کمرے چ سب توں پہلے اوہ کارڈ رکھیا جیہڑا اوہدے کول اوہدوں توں سی جدوں اَسی کینیڈا توں آئے ساں۔ اوس کارڈ تے لکھیا سی:‏ ”‏تُسی جتھے وی رہوو، خوش رہوو۔“‏ بھین بھراواں نُوں مل کے، بائبل کورس کر‌ا کے تے مشنریاں دے طور تے خدمت کر کے ساڈی خوشی ودھدی گئی۔ کجھ عرصے بعد سانوں افریقہ دے 13 مُلکاں چ برانچاں دا دورہ کر‌ن دا اعزاز ملیا۔ ایس طرحاں اَسی فرق فرق بھین بھراواں نُوں جان سکے۔ ہولی ہولی میرے دل چوں ڈر ختم ہو گیا تے اَسی یہوواہ دا شکر کیتا کہ اوہنے سانوں افریقہ گھلیا اے۔‏

کانگو چ سانوں کھان پین دِیاں نوِیاں شیواں بارے پتہ چلیا جیویں کہ کیڑے مکوڑے۔ مینوں نئیں لگدا سی کہ اَسی کدی ایہناں نُوں کھا سکاں گے۔ پر جدوں اَسی بھین بھراواں نُوں بڑے مزے نال ایہناں نُوں کھاند‌یاں ویکھیا تے اَسی وی ایہناں نُوں چکھیا تے سانوں ایہہ بڑے مزے دے لگے۔‏

اَسی کانگو دے مشرق چ اِک ایہو جہے پِنڈ چ بھین بھراواں دا حوصلہ ودھان تے ضروری شیواں پونچان لئی گئے جتھے گو‌ریلا ناں دا اِک گروپ عورتاں تے بچیاں نُوں نقصان پونچا رہیا سی۔ ایتھوں دے بھین بھرا بڑے غریب سن۔ پر مُردیاں دے جی اُٹھن تے اوہناں دا ایمان، یہوواہ لئی محبت تے تنظیم دے وفادار رہن دا اوہناں دا عزم بڑا مضبوط سی۔ ایس گل نے ساڈے دل نُوں چُھو لیا۔ اَسی سوچن لگ پئے کہ کیہہ ساڈا ایمان تے عزم وی ایناں ای مضبوط اے۔ کجھ بھین بھراواں دے گھر تے فصلاں تباہ ہو گئیاں سن۔ مَیں سوچن لگ پیا کہ پیسے تے چیزاں اِک جھٹکے چ ختم ہو جاند‌یاں نیں پر یہوواہ نال ساڈا رشتہ سب توں قیمتی اے کیونکہ ایہہ ہمیشاں قائم رہندا اے۔ اینیاں مشکلاں دے باوجود وی اوہناں بھین بھراواں نے کدی کوئی شکایت نئیں کیتی۔ ایہدے توں سانوں صحت دے مسئلیاں تے مشکلاں دا مقابلہ کر‌ن دی ہمت ملی۔‏

ساڈی ذمےداری فیر توں بدل گئی۔ ہُن سانوں ہانگ‌کانگ برانچ چ خدمت کر‌ن لئی کہیا گیا۔ ایہہ سُن کے اَسی بڑے حیران ہوئے کیونکہ اَسی کدی وی ایشیا جان بارے نئیں سوچیا سی۔ پر اَسی آپ ویکھیا سی کہ ہر ذمےداری نُوں پورا کر‌ن چ یہوواہ نے کیویں ساڈی مدد کیتی۔ ایس لئی اَسی ہاں کر دِتی۔ فیر 2013 چ اَسی افریقہ چ اپنے دوستاں  نُوں چھڈ کے ہانگ‌کانگ چلے گئے۔ اَسی بڑے دُکھی ساں نالے اَسی نئیں جان‌دے ساں کہ اَگے کیہہ ہوئے گا۔‏

ایہہ ساڈے لئی بوہت وڈی تبدیلی سی کیونکہ ہانگ‌کانگ اِک بوہت وڈا شہر سی جتھے فرق فرق قوماں دے لوک رہندے سن۔ ساڈے لئی چینی زبان سکھنا بڑا ای مشکل سی۔ پر بھراواں نے بڑی خوشی نال سانوں جی آیاں نُوں کہیا تے سانوں ایتھوں دا کھانا بڑا پسند آیا۔ برانچ چ کافی زیادہ کم ہو رہیا سی۔ پر پراپرٹی دی قیمت وی تیزی نال ودھ رہی سی۔ ایس لئی گو‌رننگ باڈی نے برانچ دی زیادہ‌تر پراپرٹی نُوں ویچن دا فیصلہ کیتا۔ کجھ وقت بعد 2015 چ اَسی جنوبی کوریا چلے گئے تے اوتھے اپنی خدمت جاری رکھی۔ سانوں ہُن کورین زبان سکھنی سی جیہڑی بڑی مشکل سی۔ سانوں حالے تک ایہہ زبان اینی چنگی طرحاں نئیں آئی۔ پر بھین بھرا ہمیشاں ساڈا حوصلہ ودھاند‌ے نیں کہ اَسی ایس زبان نُوں بڑی چنگی طرحاں سکھ رہے آں۔‏

نویں دوست بنانا ہمیشاں اسان نئیں ہوند‌ا۔ پر اَسی ویکھیا اے کہ کسے نُوں اپنے گھر بلا‌ن نال اَسی اوہنوں چھیتی جان سکنے آں۔ ساڈے بھین بھرا اِک دُوجے توں زیادہ فرق نئیں نیں تے یہوواہ نے سانوں اِنج بنایا اے کہ اَسی بوہت سارے دوست بنا سکنے آں۔—‏2-‏کُرنتھیوں 6:‏11‏۔‏

اَسی سکھیا اے کہ ایہہ بوہت ضروری اے کہ اَسی یہوواہ وانگوں لوکاں نُوں قبول کر‌یئے تے ایس گل دے ثبوتاں تے غور کر‌یئے کہ یہوواہ سانوں پیار کر‌دا اے تے ساڈی رہنمائی کر رہیا اے۔ جدوں وی اَسی مایوس ہُنے ساں یاں سوچنے ساں کہ پتہ نئیں بھین بھرا ساڈے بارے کیہہ سوچدے نیں تے اَسی اوہناں کارڈاں تے خطاں نُوں پڑھنے ساں جیہڑے ساڈے دوستاں نے سانوں دِتے سن۔ اَسی ویکھیا اے کہ یہوواہ نے سانوں اپنی محبت دا یقین دَوا کے تے ہمت دے کے ساڈیاں دُعاواں دا جواب دِتا اے۔‏

مَیں تے لیزلی ایہہ وی سمجھ گئے آں کہ مصروف ہون دے باوجود سانوں اِک دُوجے لئی وقت کڈھنا چاہی دا اے۔ اَسی ویکھیا اے کہ کدی کدی اپنے آپ تے ہسنا وی ضروری ہوند‌ا اے، خاص کر اوہدوں جدوں اَسی کوئی نوِیں زبان سکھدے ویلے غلطیاں کر‌نے آں۔ ہر رات اَسی کسے ایہو جہی چیز بارے سوچنے آں جدے توں سانوں بڑی خوشی ملی اے تاکہ اَسی اوہدے لئی یہوواہ دا شکریہ ادا کر سکئے۔‏

مینوں نئیں لگدا سی کہ مَیں کدی مشنری بن سکاں گا یاں کسے ہور ملک جا کے یہوواہ دی خدمت کر سکاں گا۔ پر مَیں جان گیا واں کہ یہوواہ دی مدد نال سب کجھ ممکن اے۔ میرے ذہن چ یرمیاہ نبی دی ایہہ گل آند‌ی اے:‏ اَے یہوواہ!‏ مَیں من لیا کہ تُوں میرے توں زیادہ طاقتور ایں۔ (‏یرمیاہ 20:‏7‏)‏ یہوواہ نے سانوں ایہو جہیاں بوہت ساریاں برکتاں دِتیاں نیں جنہاں بارے اَسی سوچیا وی نئیں سی۔ اوہنے تے جہاز چ سفر کر‌ن دی میری خواہش وی پوری کیتی اے۔ اَسی اینے زیادہ مُلکاں دا سفر کیتا اے جنہاں بارے مَیں کدی سوچیا وی نئیں سی۔ مَیں پنج برِاعظماں چ ساڈیاں برانچاں دا دورہ کیتا اے۔ مَیں لیزلی دی وی بڑی قدر کر‌نا واں کیونکہ اوہنے میرا بوہت ساتھ دِتا اے۔‏

اَسی ہمیشاں یاد رکھنے آں کہ اَسی جو کجھ کر‌نے آں ایس لئی کر‌نے آں کیونکہ اَسی یہوواہ نُوں بڑا پیار کر‌نے آں۔ سانوں ہُن جیہڑیاں برکتاں مل رہیاں نیں، اوہ مستقبل دی بس اِک جھلک نیں۔ مستقبل چ تے یہوواہ اپنی مُٹھی کھولے گا تے ہر جان‌دار دی خواہش پوری کر‌ے گا۔—‏زبور 145:‏16‏۔‏