1.‏ یہوواہ دے دن توں بچن لئی سانوں کیہہ کر‌ن دی لوڑ اے؟‏

 جدوں بائبل چ یہوواہ دے دن بارے گل کیتی جاند‌ی اے تے ایہہ اوس ویلے وَل اشارہ کر‌دا اے جدوں یہوواہ اپنے بندیاں نُوں نجات دَوائے گا تے اپنے دُشمناں نُوں ختم کر دَوے گا۔ ماضی چ وی یہوواہ نے کجھ قوماں نُوں سزا دِتی۔ (‏یسعیاہ 13:‏1،‏ 6؛‏ حِزقی‌ایل 13:‏5؛‏ صفنیاہ 1:‏8‏)‏ ساڈے زمانے چ یہوواہ دا دن وڈے بابل تے ہون والے حملے نال شروع ہوئے گا تے ہر مجدون دی جنگ تے ختم ہوئے گا۔ ایس دن توں بچن لئی سانوں ہُن توں ای تیاری کر‌ن دی لوڑ اے۔ یسوع نے دَسیا سی کہ سانوں وڈی مصیبت توں بچن لئی صرف اِک واری تیاری نئیں کر‌نی سگوں ہر ویلے تیار رہنا اے۔—‏متی 24:‏21؛‏ لُوقا 12:‏40‏۔‏

2.‏ 1-‏تھسلُنیکیوں تے غور کر‌ن نال سانوں کیہہ فائدہ ہو سکدا اے؟‏

² پولُس رسول نے پاک روح دی رہنمائی چ تھسلُنیکے دے مسیحیاں دے ناں اپنے خط چ کجھ مثالاں نُوں استمال کیتا۔ ایہناں مثالاں دی مدد نال اوہ مسیحی اپنے آپ نُوں یہوواہ دے دن لئی تیار کر سکدے سن۔ پولُس جان‌دا سی کہ یہوواہ دا دن اوسے ویلے نئیں آئے گا۔ (‏2-‏تھسلُنیکیوں 2:‏1-‏3‏)‏ پر فیر وی اوہنے اپنے بھین بھراواں دا حوصلہ ودھایا کہ اوہ ایس دن لئی اِنج ای تیار رہن جیویں ایہہ کل ای آ جائے گا۔ اَج اَسی وی اوہدی ایس نصیحت تے عمل کر سکنے آں۔ آؤ ویکھنے آں کہ اوہنے ایہناں تِن گلاں بارے کیہہ دَسیا:‏ (‏1)‏ یہوواہ دا دن کیویں آئے گا، (‏2)‏ کیہڑے لوک ایس دن توں نئیں بچن گے تے (‏3)‏ اَسی ایس دن توں بچن لئی کیویں تیار ہو سکنے آں۔‏

3.‏ یہوواہ دا دن کیس لحاظ نال رات نُوں آن والے چور وانگوں اے؟ (‏تصویر نُوں وی ویکھو۔)‏

³ جیویں رات نُوں چور آندا اے۔‏ (‏1-‏تھسلُنیکیوں 5:‏2‏)‏ ایہہ اوہ پہلی مثال اے جیہڑی پولُس نے یہوواہ دے دن بارے دِتی سی۔ چور اکثر بڑی تیزی نال کم کر‌دے نیں تے رات دے نھیرے چ آند‌ے نیں جدوں لوک بےفکر ہو کے سُتے ہوند‌ے نیں۔ یہوواہ دا دن وی ایسے طرحاں اچانک آ جائے گا تے بوہت سارے لوک حیران رہ جان گے۔ ہو سکدا اے کہ سچے مسیحی وی ایہہ ویکھ کے حیران ہو جان کہ ایہہ سب کجھ کِنّی چھیتی چھیتی ہو رہیا اے۔ پر اَسی بُرے لوکاں نال تباہ ہون توں بچ جاواں گے۔‏

4.‏ یہوواہ دا دن کیس لحاظ نال حاملہ عورت نُوں لگن والیاں درداں وانگوں اے؟‏

 ⁴ جیویں حاملہ عورت نُوں بچے دی پیدائش توں پہلاں درداں لگدیاں نیں۔‏ (‏1-‏تھسلُنیکیوں 5:‏3‏)‏ اِک حاملہ عورت نُوں پکا پتہ نئیں ہوند‌ا کہ اوہنوں درداں کدوں لگن گیا‌ں پر اوہنوں پورا یقین ہوند‌ا اے کہ اِنج ضرور ہوئے گا۔ نالے ایہہ اچانک تے بڑا تکلیف دہ ہوئے گا تے ایہنوں روکیا نئیں جا سکے گا۔ ایسے طرحاں اَسی وی اوس دن تے گھڑی بارے نئیں جان‌دے جدوں یہوواہ دا دن شروع ہوئے گا۔ پر سانوں پورا یقین اے کہ ایہہ ضرور آئے گا تے اچانک آئے گا تے بُرے لوک ایہدے توں بچ نئیں سکن گے۔‏

5.‏ وڈی مصیبت کیس لحاظ نال دن دی روشنی وانگوں اے؟‏

⁵ دن دی روشنی وانگوں‏۔‏ پولُس نے اپنی تیسری مثال چ فیر توں رات نُوں چوری کر‌ن والے چوراں دا ذکر کیتا۔ پر ایس واری اوہنے یہوواہ دے دن نُوں دن دی روشنی وانگوں کہیا۔ (‏1-‏تھسلُنیکیوں 5:‏4‏)‏ جیہڑے چور رات نُوں چوری کر‌دے نیں، شاید اوہ اپنے کم چ اینے مگن ہو جان کہ اوہناں نُوں وقت دا پتہ ای نہ چلے۔ پر دن دی روشنی چ اوہ پھڑے جا سکدے نیں تے اوہناں دا پردہ فاش ہوسکدا اے۔ ایسے طرحاں وڈی مصیبت چ وی اوہناں لوکاں دا پردہ فاش ہو جائے گا جیہڑے چوراں وانگوں نھیرے چ رہندے نیں یعنی اوہ اِنج دے کم کر‌دے نیں جنہاں نُوں خدا پسند نئیں کر‌دا۔ اَسی ایہو جہے لوکاں وانگوں نئیں بننا چاہندے۔ ایسے لئی اَسی یہوواہ دے دن لئی تیار رہنے آں تے اِنج دے کماں توں دور رہنے آں جنہاں توں اوہ نفرت کر‌دا اے۔ نالے اَسی ہر طرحاں دی اچھائی، نیکی تے سچائی دے مطابق چلنے آں۔ (‏اِفسیوں 5:‏8-‏12‏)‏ ایہدے بعد پولُس نے دو ہور مثالاں دے ذریعے ایہو جہے لوکاں بارے دَسیا جیہڑے یہوواہ دے دن توں نئیں بچ سکن گے۔‏

6.‏ بوہت سارے لوک کیس لحاظ نال سو رہے نیں؟ (‏1-‏تھسلُنیکیوں 5:‏6، 7‏)‏

⁶ جیہڑے لوک سوندے نیں۔‏ (‏1-‏تھسلُنیکیوں 5:‏6، 7 نُوں پڑھو۔)‏ جیہڑے لوک یہوواہ دے دن توں نئیں بچ سکن گے، پولُس نے اوہناں نُوں ایہو جہے لوکاں وانگوں کہیا جیہڑے سُتے ہوند‌ے نیں۔ اوہناں نُوں اپنے آلے دوالے دی کوئی ہوش نئیں ہوند‌ی تے ایہہ وی نئیں پتہ ہوند‌ا کہ کِنّاں وقت لنگھ گیا اے۔ ایس لئی اوہ نئیں جان‌دے کہ اوہناں دے آلے دوالے کیہڑے  اہم واقعے ہو رہے نیں تے نہ ای اوہ ایہناں دے حوالے نال کجھ کر سکدے نیں۔ بوہت سارے لوک اَج روحانی لحاظ نال سُتے ہوئے نیں۔ (‏رومیوں 11:‏8‏)‏ اوہ ایس گل دے ثبوتاں تے یقین نئیں رکھدے کہ اَسی آخری زمانے چ رہ رہے آں تے بوہت چھیتی وڈی مصیبت شروع ہون والی اے۔ جدوں دُنیا چ وڈیاں وڈیاں تبدیلیاں ہون گیا‌ں تے ہو سکدا اے کہ کجھ لوک روحانی لحاظ نال جاگ جان تے بادشاہی دے پیغام چ تھوڑی بوہتی دلچسپی لین لگ پین۔ پر فیر وی بوہت سارے لوک جاگدے رہن دی بجائے فیر توں سو جان گے، ایتھوں تک کہ کجھ ایہو جہے لوک جیہڑے عدالت دے دن تے یقین رکھدے نیں، ایہہ سوچن لگ پین گے کہ ایہہ تے حالے بڑا دُور اے۔ (‏2-‏پطرس 3:‏3، 4‏)‏ پر اَسی ایس گل نُوں سمجھنے آں کہ جیویں جیویں وقت گزر رہیا اے، ساڈے لئی جاگدے رہنا ہور وی ضروری ہوند‌ا جا رہیا اے۔‏

7.‏ جنہاں لوکاں نُوں خدا تباہ کر دے گا، اوہ کیس لحاظ نال ایہو جہے لوکاں وانگوں نیں جیہڑے نشے چ ٹن ہوند‌ے نیں؟‏

⁷ جیہڑے نشے چ ٹن ہوندے نیں‏۔‏ جیہڑے لوکاں نُوں خدا تباہ کر دے گا، پولُس نے اوہناں نُوں ایہو جہے لوکاں وانگوں کہیا جیہڑے نشے چ ٹن ہوند‌ے نیں۔ جیویں نشے چ ٹن لوکاں دے آلے دوالے بھانویں جو مرضی ہو رہیا ہووے اوہ اوہدے بارے چھیتی کجھ نئیں کر پاند‌ے تے بُرے فیصلے کر‌دے نیں، اونویں ای بُرے لوک وی خدا دِیاں آگاہیاں دے باوجود کجھ نئیں کر‌دے۔ اوہ ایہو جہی زند‌گی گزارن دا فیصلہ کر‌دے نیں جیہڑی اوہناں نُوں تباہی وَل لے جاند‌ی اے۔ پر مسیحیاں نُوں کہیا گیا اے کہ اوہ اپنے ہوش قائم رکھن تے اپنی سوچ نُوں صحی رکھن۔ (‏1-‏تھسلُنیکیوں 5:‏6‏)‏ اپنی سوچ نُوں صحی رکھن بارے بائبل دے اِک عالم نے کہیا:‏ ”‏جیہڑا بندہ اپنے ہوش قائم رکھدا اے، اوہ پُر سکون رہندا اے تے صحی طرحاں سوچدا اے تاکہ اوہ چنگے فیصلے کر سکے۔“‏ سانوں پرسکون کیوں رہنا چاہی دا اے تے اپنے ہوش کیوں قائم رکھنے چاہی دے نیں؟ سانوں اِنج ایس لئی کر‌نا چاہی دا اے تاکہ اَسی سیاسی تے سماجی معاملیاں چ نہ اُلجھئے۔ جیویں جیویں یہوواہ دا دن نیڑے آئے گا، اونویں اونویں ایہناں معاملیاں چ کسے دی طرف‌داری کر‌ن دا دباؤ ودھدا جائے گا۔ پر سانوں پریشان ہون دی لوڑ نئیں اے کہ اَسی ایہو جہی صورتحال چ کیہہ کر‌اں گے۔ خدا دی پاک روح پُر سکون رہن، اپنے ہوش قائم رکھن تے چنگے فیصلے کر‌ن چ ساڈی مدد کر‌ے گی۔—‏لُوقا 12:‏11، 12‏۔‏

8.‏ 1-‏تھسلُنیکیوں 5:‏8 چ اوہناں خوبیاں بارے کیہہ دَسیا گیا اے جیہڑیاں اپنے ہوش قائم رکھن تے جاگدے رہن چ ساڈی مدد کر‌ن گیا‌ں؟ (‏تصویر نُوں وی ویکھو۔)‏

⁸ سینہ بند تے ہیلمٹ پا لَوو۔‏ پولُس نے کہیا کہ سانوں اوہناں فوجیاں وانگوں بننا چاہی دا اے جیہڑے چوکس رہندے نیں تے اپنا جنگی لباس پا کے رکھدے نیں۔ ‏(‏1-‏تھسلُنیکیوں 5:‏8 نُوں پڑھو۔)‏ اِک فوجی کولوں ایہہ توقع کیتی جاند‌ی اے کہ اوہ جنگ لڑن لئی ہر ویلے تیار رہوے۔ ساڈے بارے وی ایہہ گل بالکل سچ اے۔ سانوں وی یہوواہ دے دن لئی تیار رہن واسطے ایمان تے محبت دا سینہ بند تے امید دا ہیلمٹ پا کے رکھنا چاہی دا اے۔ ایہناں خوبیاں توں سانوں بڑا فائدہ ہوئے گا۔‏

9.‏ ساڈا ایمان ساڈی حفاظت کیویں کر‌دا اے؟‏

⁹ جیویں اِک سینہ بند فوجی دے دل دی حفاظت کر‌دا سی اونویں ای ایمان تے محبت ساڈے علامتی دل یعنی ساڈے جذباتاں تے خواہشاں دی حفاظت کر‌دے نیں۔ ایہہ خوبیاں ساڈی مدد کر‌دیاں نیں تاکہ اَسی یہوواہ دی خدمت کر‌دے رہیے تے یسوع دی مثال تے عمل کر‌دے رہیے۔ ایمان سانوں ایس گل دا یقین دَواند‌ا اے کہ جے اَسی پورے دل نال یہوواہ دی خدمت کر‌اں گے تے اوہ سانوں ایہدا اجر ضرور دَوے گا۔ (‏عبرانیوں 11:‏6‏)‏ ایمان دی وجہ توں ساڈے دل چ ایہہ خواہش پیدا ہوند‌ی اے کہ اَسی اوہدوں وی اپنے رہنما یسوع دے وفادار رہیے جدوں سانوں مشکلاں دا سامنا کر‌نا پیندا اے۔ سانوں اپنے ایمان نُوں مضبوط کر‌ن دی لوڑ اے تاکہ اَسی مشکلاں چ ثابت‌قدم رہ سکئے۔ اِنج کر‌ن لئی اَسی اپنے زمانے دے ایہو جہے بھین بھراواں دی مثال تے غور کر سکنے آں جیہڑے اذیت تے پیسے دھیلے دی تنگی دے باوجود وی یہوواہ دے وفادار رہے۔ نالے اَسی پیسے تے چیزاں دے پچھے بھجن دے پھندے توں بچن لئی اِنج دے بھین بھراواں دی مثال تے عمل کر سکنے آں جنہاں نے خدا دی بادشاہی نُوں سب توں زیادہ اہمیت دین لئی اپنی زند‌گی نُوں سادہ بنایا۔‏ b

10.‏ خدا تے گو‌انڈھی نال محبت ساڈی مدد کیویں کر‌دی اے کہ اَسی مُنادی کر‌ن چ لگے رہیے؟‏

 ¹⁰ جاگدے رہن تے اپنے ہوش قائم رکھن لئی محبت دی خوبی وی بوہت ضروری اے۔ (‏متی 22:‏37-‏39‏)‏ خدا نال محبت ساڈی مدد کر‌دی اے کہ اَسی اوس ویلے وی مُنادی کر‌نا نہ چھڈیئے جدوں ایہدی وجہ توں سانوں کسے مشکل دا سامنا ہوند‌ا اے۔ (‏2-‏تیمُتھیُس 1:‏7، 8‏)‏ اَسی ایہو جہے لوکاں نال وی پیار کر‌نے آں جیہڑے یہوواہ دی عبادت نئیں کر‌دے۔ ایس لئی اَسی اپنے علاقے چ مُنادی کر‌دے رہنے آں، ایتھوں تک کہ اَسی فون تے خطاں دے ذریعے وی گو‌اہی دینے آں۔ اَسی ایہہ امید کدی نئیں چھڈدے کہ اِک دن لوک اپنے آپ نُوں بدل لین گے تے صحی کم کر‌نا شروع کر دین گے۔—‏حِزقی‌ایل 18:‏27، 28‏۔‏

11.‏ اپنے ہم ایماناں لئی محبت، یہوواہ دے دن لئی تیار رہن چ ساڈی مدد کیویں کر‌دی اے؟ (‏1-‏تھسلُنیکیوں 5:‏11‏)‏

¹¹ اَسی اپنے بھین بھراواں نال وی محبت کر‌نے آں۔ ایس محبت نُوں ظاہر کر‌ن لئی اَسی اِک دُوجے نُوں تسلی دینے آں تے اِک دُوجے دا حوصلہ ودھانے آں۔ ‏(‏1-‏تھسلُنیکیوں 5:‏11 نُوں پڑھو۔)‏ جیویں فوجی جنگ چ اِک دُوجے دا ساتھ دیندے نیں، اونویں ای اَسی وی اِک دُوجے دا حوصلہ ودھانے آں۔ ہو سکدا اے کہ جنگ دے دوران اِک فوجی غلطی نال اپنے ساتھی نُوں زخمی کر دَوے۔ پر اوہ کدی وی جان بجھ کے اِنج نئیں کر‌ے گا۔ ایسے طرحاں اَسی وی کدی جان بجھ کے اپنے بھین بھراواں نُوں تکلیف نئیں پونچاواں گے تے بُرائی دے بدلے بُرائی نئیں کر‌اں گے۔ (‏1-‏تھسلُنیکیوں 5:‏13،‏ 15‏)‏ محبت ظاہر کر‌ن دا اِک ہور طریقہ ایہہ وے کہ اَسی اوہناں بھراواں دی عزت کر‌یئے جیہڑے کلیسیا چ پیشوائی کر‌دے نیں۔ (‏1-‏تھسلُنیکیوں 5:‏12‏)‏ پولُس نے تھسلُنیکے دی کلیسیا دے ناں اپنے پہلے خط چ اوہناں مسیحیاں نُوں ایہہ نصیحت کیتی کہ اوہ پیشوائی کر‌ن والے بھراواں دے فرمانبردار رہن۔ اوس ویلے اوس کلیسیا نُوں بنے اِک سال توں وی گھٹ عرصہ ہویا سی۔ اوس کلیسیا چ جیہڑے بھرا پیشوائی کر رہے سن، شاید اوہ اینے تجربہ‌کار نئیں سن تے اوہناں کولوں غلطیاں ہوئیاں سن۔ پر فیر وی اوہ عزت دے لائق سن۔ جیویں جیویں وڈی مصیبت نیڑے آ رہی اے، شاید سانوں وی اپنی کلیسیا دے بزرگاں وَلّوں مِلن والیاں ہدیتاں تے اوس توں وی زیادہ بھروسا کر‌نا پووے جِنّاں اَسی ہُن کر‌نے آں۔ ہو سکدا اے کہ اوس ویلے ہیڈ کوارٹر یاں برانچ نال ساڈا رابطہ نہ ہو پائے۔ ایس لئی ایہہ بڑا ضروری اے کہ اَسی ہُن توں ای اپنی کلیسیا دے بزرگاں لئی اپنے دل چ محبت تے عزت نُوں ودھائیے۔ بھانویں جو وی ہو جائے، آؤ اَسی اپنے  ہوش قائم رکھئے تے کدی وی بزرگاں دِیاں خامیاں تے نئیں سگوں ایس گل تے اپنا دھیان رکھئے کہ یہوواہ یسوع مسیح دے ذریعے ایہناں وفادار بھراواں دی رہنمائی کر رہیا اے۔‏

12.‏ ساڈی امید ساڈی سوچ نُوں کیویں محفوظ رکھدی اے؟‏

¹² جیویں اِک ہیلمٹ فوجی دے سر دی حفاظت کر‌دا سی، ایسے طرحاں نجات دی امید ساڈی سوچ نُوں محفوظ رکھدی اے۔ جے ساڈی امید مضبوط ہوئے گی تے اَسی ایہہ سمجھ سکاں گے کہ ایہہ دُنیا سانوں جو کجھ وی دیندی اے، اوہ سب فضول اے۔ (‏فِلپّیوں 3:‏8‏)‏ ساڈی امید سانوں پُر سکون تے قائم رہن چ مدد کر‌دی اے۔ بھرا ویلس تے بھین لورینڈا نال وی کجھ اِنج ای ہویا جیہڑے افریقہ چ خدمت کر رہے نیں۔ بھرا ویلس دے ابو تے بھین لورینڈا دی امی تِن ہفتے دے اند‌ر اند‌ر فوت ہو گئے۔ کورونا دی وبا دی وجہ توں اوہ اپنے گھر والیاں نُوں مِلن نئیں جا سکے۔ بھرا ویلس نے کہیا:‏ ”‏مُردیاں دے جی اُٹھن دی امید دی وجہ توں مَیں اپنا دھیان ایس گل تے نئیں رکھدا کہ ایس دُنیا چ اوہناں دے آخری دن کیہو جہے سن سگوں مَیں ایہہ سوچنا واں کہ نوِیں دُنیا چ اوہناں دے شروع دے دن کیہو جہے ہون گے۔ ایس امید دی وجہ توں مَیں اوس ویلے پُر سکون ہو جانا واں جدوں میں بڑا دُکھی محسوس کر‌نا واں۔“‏

13.‏ اَسی کیہہ کر سکنے آں تاکہ یہوواہ سانوں اپنی پاک روح دَوے؟‏

¹³ پاک روح دی اَگ نُوں نہ بجھاؤ۔‏ (‏1-‏تھسلُنیکیوں 5:‏19‏)‏ پولُس رسول نے پاک روح نُوں اَگ وانگوں کہیا۔ جدوں یہوواہ سانوں اپنی پاک روح دیندا اے تے اَسی صحی کم کر‌ن تے اوہدی خدمت کر‌ن دے جوش نال بھر جانے آں۔ (‏رومیوں 12:‏11‏)‏ پر اَسی کیہہ کر سکنے آں تاکہ یہوواہ سانوں اپنی پاک روح دَوے؟ ایہدے لئی اَسی یہوواہ کولوں دُعا کر سکنے آں، اوہدا پاک کلام پڑھ سکنے آں تے اوہدی تنظیم نال جُڑے رہ سکنے آں جیہڑی اوہدی پاک روح دی رہنمائی چ چلدی اے۔ اِنج کر‌ن نال اَسی اپنے اند‌ر پاک روح دا پھل پیدا کر سکاں گے۔—‏گلتیوں 5:‏22، 23‏۔‏

14.‏ جے اَسی چاہنے آں کہ یہوواہ سانوں اپنی پاک روح دیندا رہوے تے سانوں کیہہ کر‌ن توں بچنا چاہی دا اے؟ (‏تصویر نُوں وی ویکھو۔)‏

¹⁴ جدوں یہوواہ سانوں اپنی پاک روح دیندا اے تے سانوں خیال رکھنا چاہی دا اے کہ کِتے اَسی پاک روح دی اَگ نُوں بجھا نہ دَئیے۔ یہوواہ اپنی پاک روح صرف اوہناں لوکاں نُوں دیندا اے جیہڑے اپنی سوچ تے چال‌چلن نُوں پاک رکھدے نیں۔ جے اَسی ناپاک چیزاں بارے سوچدے رہواں گے نالے ایہناں مطابق کم کر‌اں گے تے یہوواہ سانوں اپنی پاک روح دینا بند کر دَوے گا۔ (‏1-‏تھسلُنیکیوں 4:‏7، 8‏)‏ جے اَسی چاہنے آں  کہ یہوواہ سانوں اپنی پاک روح دیندا رہوے تے سانوں پیشین‌گو‌ئیاں نُوں جھوٹھ نئیں سمجھنا چاہی دا۔ (‏1-‏تھسلُنیکیوں 5:‏20‏)‏ ایس ایت چ پیشین‌گو‌ئیاں توں مُراد اوہ پیغام نیں جیہڑے یہوواہ سانوں اپنی پاک روح دے ذریعے دیندا اے۔ ایہدے چ یہوواہ دے دن تے ساڈے زمانے بارے وی پیغام شامل نیں۔ اَسی ایہہ نئیں سوچدے کہ یہوواہ دا دن یاں ہرمجدون ساڈے جیوند‌ے جی نئیں آن گے۔ ایہدی بجائے اَسی ایہہ ثابت کر‌نے آں کہ سانوں امید اے کہ ایہہ چھیتی آن گے۔ تے ایہنوں ذہن چ رکھدے ہوئیاں اَسی خدا دی بندگی کر‌ن چ مصروف رہنے آں تے اپنے چال‌چلن نُوں پاک رکھنے آں۔—‏2-‏پطرس 3:‏11، 12‏۔‏

15.‏ اَسی کیہہ کر سکنے آں تاکہ اَسی جھوٹھی معلومات تے بُرے فرشتیاں دِیاں پھیلائیاں ہوئیاں جھوٹھیاں گلاں دی وجہ توں گمراہ نہ ہوئیے؟ (‏1-‏تھسلُنیکیوں 5:‏21‏)‏

¹⁵ اوہ وقت دُور نئیں جدوں خدا دی مخالفت کر‌ن والے لوک اِک لحاظ نال امن تے سلامتی دا اعلان کر‌ن گے۔ (‏1-‏تھسلُنیکیوں 5:‏3‏)‏ بُرے فرشتیاں دِیاں جھوٹھیاں گلاں پوری زمین تے پھیل جان گیا‌ں جدی وجہ توں بوہت سارے لوک گمراہ ہو جان گے۔ (‏مکاشفہ 16:‏13، 14‏)‏ پر اَسی اوہدوں کیہہ کر‌اں گے؟ جے اَسی ساریاں گلاں نُوں پرکھاں گے تے اَسی ایویں ای ہر گل تے یقین نئیں کر لوَاں گے۔ ‏(‏1-‏تھسلُنیکیوں 5:‏21 نُوں پڑھو۔)‏ جیہڑے یونانی لفظ دا ترجمہ ”‏پرکھو“‏ کیتا گیا اے، اوہدا تعلق قیمتی دھاتاں نُوں پرکھن نال اے۔ ایس لئی جیہڑیاں گلاں اَسی پڑھدے یاں سننے آں، سانوں اوہناں نُوں پرکھنا چاہی دا اے کہ کیہہ ایہہ گلاں سچیاں وی ہے نیں یاں نئیں۔ تھسلُنیکے دے مسیحیاں لئی اِنج کر‌نا بوہت ضروری سی۔ پر ساڈے لئی اِنج کر‌نا ہور وی زیادہ ضروری اے کیونکہ اَسی وڈی مصیبت دے بوہت نیڑے آں۔ دوجیاں دی کہی ہر گل تے یقین کر‌ن دی بجائے اَسی اپنی سوچن سمجھن دی صلاحیت نُوں استمال کر کے ایہہ ویکھنے آں کہ اَسی جو کجھ پڑھدے یاں سننے آں کیہہ اوہ بائبل تے یہوواہ دی تنظیم دے مطابق ہے وے۔ اِنج کر‌ن نال اَسی بُرے فرشتیاں دِیاں پھیلائیاں ہوئیاں جھوٹھیاں گلاں چ نئیں آند‌ے تے اوہناں دِیاں چالاں چ نئیں پھس‌دے۔—‏امثال 14:‏15؛‏ 1-‏تیمُتھیُس 4:‏1‏۔‏

16.‏ سانوں کیہڑی گل دی پوری امید اے تے اَسی کیہہ کر‌ن دا عزم کیتا اے؟‏

¹⁶ اَسی جاننے آں کہ اِک گروہ دے طور تے خدا دے بندے وڈی مصیبت توں بچ جان گے۔ پر اَسی ایہہ نئیں جان‌دے کہ ساڈے وچوں ہر اِک دے نال کیہہ ہوئے گا۔ (‏یعقوب 4:‏14‏)‏ بھانویں اَسی وڈی مصیبت نُوں پار کر لئیے یاں ایہدے توں پہلاں ای فوت ہو جائیے، سانوں ایس گل دی پکی امید اے کہ جے اَسی یہوواہ دے وفادار رہواں گے تے سانوں ہمیشاں دی زند‌گی ملے گی۔ پاک روح نال مسح کیتے ہوئے مسیحیاں نُوں اسمان تے زند‌گی ملے گی جتھے اوہ یسوع دے نال ہون گے تے مسیح دِیاں ہور وی بھیڈاں زمین تے فردوس چ رہن گیا‌ں۔ دُعا اے کہ ساڈے ساریاں دا دھیان ایس شان‌دار امید تے رہوے تے اَسی یہوواہ دے دن لئی تیار رہیے۔‏