یہوواہ نُوں خوش کرن لئی ساڈے چ ایمان دی خوبی ہونی چاہی دی اے۔ پر بائبل چ دَسیا گیا اے کہ سارے لوک ایمان نئیں رکھدے۔ (‏2-‏تھسلُنیکیوں 3:‏2‏)‏ پولُس رسول نے ایہہ گل اوہناں بھیڑے تے غلط لوکاں بارے کہی جیہڑے اوہدی مخالفت کر رہے سن۔ پر پولُس دی ایہہ گل ہور لوکاں بارے وی سچ اے۔ کجھ لوک خدا تے ایمان نئیں رکھدے بھانویں کہ قدرت چ ایہدے صاف ثبوت نظر آندے نیں۔ (‏رومیوں 1:‏20‏)‏ پر کجھ لوک شاید ایہہ کہن کہ اوہ ایمان رکھدے نیں کہ اِک طاقت‌ور ہستی نے ایہہ کائنات بنائی اے۔ پر یہوواہ نُوں خوش کرن لئی صرف ایس گل نُوں مننا ای کافی نئیں اے۔‏

سانوں ایس گل تے پکا ایمان وی رکھنا چاہی دا اے کہ یہوواہ ہے وے تے اوہ اوہناں لوکاں نُوں اجر دیندا اے جیہڑے اوہدے تے پکا ایمان رکھدے نیں۔ (‏عبرانیوں 11:‏6‏)‏ ایمان یہوواہ دی پاک روح دے پھل دا اِک حصہ اے۔ ایس لئی ایہنوں حاصل کرن لئی سانوں یہوواہ کولوں دُعا کرنی چاہی دی اے۔ (‏لُوقا 11:‏9، 10،‏ 13‏)‏ یہوواہ نے بائبل نُوں اپنی پاک روح نال لکھوایا اے۔ ایس لئی جدوں اَسی ایہنوں پڑھنے آں تے ایہدے تے سوچ وچار کرنے آں تے سانوں پاک روح مِلدی اے۔ فیر جدوں اَسی ایہدے چ لکھیاں گلاں تے عمل کرنے آں تے یہوواہ دی پاک روح ساڈی مدد کردی اے تاکہ اَسی ایس طرحاں زندگی گزارئیے جدے توں نظر آئے کہ اَسی اوہو جیہا ایمان رکھنے آں جیہو جیہا یہوواہ نُوں پسند اے۔‏