1.‏ کیہڑی گل یہوواہ دے بندیاں دی مدد کردی اے تاکہ اوہ مشکلاں دے باوجود اوہدی عبادت کردے رہن؟‏

 بائبل چ دَسیا گیا اے کہ اَسی اِک ایہو جہے دَور چ رہ رہے آں جدے چ سانوں مشکل وقت چوں لنگھنا پووے گا۔ (‏2-‏تیمُتھیُس 3:‏1‏)‏ یہوواہ دے بندیاں دے طور تے سانوں صرف اوہناں مشکلاں دا سامنا ای نئیں کرنا پیندا جنہاں دا سامنا دُوجیاں نُوں وی ہوندا اے سگوں یہوواہ دی عبادت کرن دی وجہ توں سانوں مخالفت تے ظلم دا وی سامنا کرنا پیندا اے۔ پر کیہڑی گل ساڈی مدد کردی اے تاکہ اَسی مشکلاں دے باوجود یہوواہ دی عبادت کردے رہیے؟ اوہ گل ایہہ وے کہ یہوواہ زندہ خدا اے تے اوہ ساڈی مدد کردا اے۔—‏یرمیاہ 10:‏10؛‏ 2-‏تیمُتھیُس 1:‏12‏۔‏

2.‏ یہوواہ کیس لحاظ نال زندہ خدا اے؟‏

² یہوواہ اِک حقیقی ہستی اے۔ اوہ ویکھ سکدا اے کہ اَسی کیہڑیاں مشکلاں چوں لنگھ رہے آں تے اوہ ساڈی مدد کرن دی دِلی خواہش رکھدا اے۔ (‏2-‏تواریخ 16:‏9؛‏ زبور 23:‏4‏)‏ جدوں اَسی ایہہ یاد رکھنے آں کہ ساڈا زندہ خدا ساڈی بڑی فکر کردا اے تے ساڈی مدد کرن لئی ہمیشاں تیار رہندا اے تے سانوں مشکلاں نُوں صبر نال برداشت کرن دی ہمت مِلدی اے۔ آؤ ویکھئے کہ بادشاہ داؤد دے معاملے چ ایہہ گل کیویں سچ ثابت ہوئی۔‏

3.‏ داؤد دی ایس گل دا کیہہ مطلب سی کہ یہوواہ زندہ خدا اے؟‏

³ داؤد یہوواہ نُوں چنگی طرحاں جان دا سی تے اوہدے تے پورا بھروسا کردا سی۔ جدوں داؤد دے دُشمن اوہدی جان لین تے تُلے ہوئے سن جنہاں چ بادشاہ ساؤل وی شامل سی تے داؤد نے مدد لئی یہوواہ کولوں دُعا کیتی۔ (‏زبور 18:‏6‏)‏ جدوں یہوواہ نے داؤد دی دُعا دا جواب دِتا تے اوہنوں اوہدے دُشمناں دے ہتھوں بچایا تے داؤد نے کہیا:‏ یہوواہ زندہ خدا اے۔ (‏زبور 18:‏46‏)‏ ایس گل دا کیہہ مطلب سی؟ داؤد صرف ایہہ نئیں کہہ رہیا سی کہ یہوواہ موجود اے۔ زبور دی کتاب تے تبصرہ کرن والی اِک کتاب چ دَسیا گیا اے کہ داؤد یہوواہ بارے ایہہ گل یقین نال کہہ رہیا سی کہ اوہ سچا خدا اے جیہڑا اپنے بندیاں دی مدد کرن لئی ہر ویلے تیار رہندا اے۔ واقعی داؤد نے اپنی اَکھیں ویکھیا سی کہ اوہدا زندہ خدا جان دا اے کہ اوہدے نال کیہہ ہو رہیا اے۔ ایس یقین دی وجہ توں داؤد دا ایہہ عزم ہور پکا ہو گیا کہ اوہ اپنے خدا دی عبادت تے وڈیائی کردا رہوے گا۔—‏زبور 18:‏28، 29،‏ 49‏۔‏

4.‏ جدوں اَسی ایہہ یاد رکھاں گے کہ یہوواہ زندہ خدا اے تے سانوں کیہہ فائدہ ہوئے گا؟‏

 ⁴ جدوں اَسی ایس گل تے پکا یقین رکھاں گے کہ یہوواہ زندہ خدا اے تے اَسی جوش نال اوہدی خدمت کر سکاں گے۔ ایہدے توں سانوں مشکلاں نُوں صبر نال برداشت کرن دی طاقت ملے گی تے جوش نال یہوواہ دی خدمت کرن دا حوصلہ ملے گا۔ ایہدے علاوہ یہوواہ دے نیڑے رہن دا ساڈا عزم وی ہور مضبوط ہو جائے گا۔‏

زندہ خدا توانوں ہمت تے طاقت دَوے گا

5.‏ کیہڑی چیز مشکلاں دا ڈٹ کے مقابلہ کرن چ ساڈی مدد کر سکدی اے؟ (‏فِلپّیوں 4:‏13‏)‏

⁵ جے اَسی یاد رکھاں گے کہ یہوواہ زندہ خدا اے تے اوہ ساڈی مدد کرن دی طاقت رکھدا اے تے اَسی ہر چھوٹی وڈی مشکل نُوں برداشت کر سکاں گے۔ دُنیا دی کوئی وی مشکل ساڈے خدا توں وڈی نئیں اے۔ ساڈے خدا چ بے‌اِنتہا طاقت اے تے اوہ سانوں وی طاقت دے سکدا اے تاکہ اَسی مشکلاں نُوں برداشت کر سکئے۔ ‏(‏فِلپّیوں 4:‏13 نُوں پڑھو۔)‏ ایس لئی اَسی ڈٹ کے مشکلاں دا مقابلہ کر سکنے آں۔ جدوں اَسی چھوٹیاں چھوٹیاں مشکلاں چ یہوواہ دی مدد نُوں محسوس کرنے آں تے ایس گل تے ساڈا یقین ہور ودھ جاندا اے کہ اوہ وڈیاں وڈیاں مشکلاں چ وی ساڈی مدد کرے گا۔‏

6.‏ جدوں داؤد نوجوان سی تے اوہدے نال کیہہ ہویا جدی وجہ توں یہوواہ تے اوہدا بھروسا ہور ودھ گیا؟‏

⁶ آؤ داؤد دی زندگی دے دو ایہو جہے واقعیاں تے غور کرئیے جنہاں دی وجہ توں یہوواہ تے اوہدا بھروسا ہور ودھ گیا۔ جدوں اوہ چھوٹا سی تے اوہ اپنے ابو دِیاں بھیڈاں دا خیال رکھدا سی۔ اِک واری اِک ریچھ تے اِک واری اِک شیر اوہدے ابو دی اِک بھیڈ نُوں چُک کے لے گیا۔ ایہناں دونواں موقعیاں تے داؤد ایہناں جنگلی جانوراں دے پچھے گیا تے بھیڈاں نُوں اوہناں دے مُونہوں چھڈا لیایا۔ پر اوہنے ایہہ نئیں سوچیا کہ اوہ اپنی طاقت نال اِنج کرن دے قابل ہویا اے سگوں اوہ جان دا سی کہ ایہدے پچھے یہوواہ دا ہتھ اے۔ (‏1-‏سموئیل 17:‏34-‏37‏)‏ داؤد ایہناں واقعیاں نُوں کدی نئیں بُھلیا۔ ایہناں واقعیاں تے غور کرن نال اوہدا اپنے زندہ خدا تے بھروسا ودھیا تے اوہنوں یقین ہو گیا کہ اوہ اَگے وی اوہدی مدد کرے گا۔‏

7.‏ داؤد نے کیہڑی گل تے دھیان دِتا تے ایس وجہ توں اوہ جولیت دا مقابلہ کیویں کر سکیا؟‏

⁷ داؤد شاید اوس ویلے نوجوان ای سی جدوں اوہ اوس جگہ گیا جتھے اِسرائیلی فِلسطینی فوج نال جنگ لڑن لئی جمع ہوئے سن۔ اوہنے ویکھیا کہ اِسرائیلی فوجی اِک فِلسطینی سورما توں بوہت ڈرے ہوئے سن جدا ناں جولیت سی۔ اوہ اِسرائیلی فوجیاں نُوں للکار رہیا سی۔ (‏1-‏سموئیل 17:‏10، 11‏)‏ اِسرائیلی فوجی ایس لئی ڈرے ہوئے سن کیونکہ اوہ جولیت دے قد کاٹھ تے طعنیاں تے دھیان دے رہے سن۔ (‏1-‏سموئیل 17:‏24، 25‏)‏ پر داؤد ایس صورتحال نُوں بالکل فرق طریقے نال ویکھ رہیا سی۔ داؤد دی نظر چ جولیت اِسرائیلی فوج نُوں نئیں سگوں زندہ خدا نُوں للکار رہیا سی۔ (‏1-‏سموئیل 17:‏26‏)‏ ایہدا مطلب اے کہ داؤد دا دھیان یہوواہ تے سی۔ داؤد جان دا سی کہ جیویں خدا نے اوہدیاں بھیڈاں نُوں جنگلی جانوراں توں چھڈان چ اوہدی مدد کیتی سی اونویں ای اوہ ہُن وی اوہدی مدد کرے گا۔ داؤد نُوں پورا یقین سی کہ یہوواہ اوہدے نال اے ایس لئی اوہنے جولیت دا مقابلہ کیتا تے جت گیا۔—‏1-‏سموئیل 17:‏45-‏51‏۔‏

8.‏ مشکلاں چوں لنگھدے ویلے اَسی اپنا دھیان یہوواہ تے کیویں رکھ سکنے آں؟ (‏تصویر نُوں وی ویکھو۔)‏

⁸ جے اَسی یاد رکھاں گے کہ زندہ خدا یہوواہ ساڈی مدد کرن لئی تیار اے تے اَسی مشکلاں دا کامیابی نال مقابلہ کر سکاں گے۔ (‏زبور 118:‏6‏)‏ ایس گل تے اپنے بھروسے نُوں ودھان لئی اَسی غور کر سکنے آں کہ یہوواہ نے ماضی چ اپنے بندیاں دی مدد کیویں کیتی۔ ایہدے لئی بائبل چوں ایہو جہے واقعے پڑھو جنہاں توں توانوں یاد رہوے کہ ماضی چ یہوواہ نے اپنے بندیاں دی مدد کیویں کیتی۔ (‏یسعیاہ 37:‏17،‏ 33-‏37‏)‏ ایہدے علاوہ ساڈی ویب‌سائٹ jw.org تے ایہو جہیاں رپورٹاں تے خبراں نُوں وی پڑھو جنہاں چ وکھایا جاندا اے کہ یہوواہ اَج ساڈے بھین بھراواں دی مدد کیویں کر رہیا اے۔ اوہناں موقعیاں نُوں یاد کرو جدوں یہوواہ نے تواڈی مدد کیتی سی۔ شاید تواڈے ذہن چ ایہو جیہا کوئی واقعہ نہ آئے جدے چ یہوواہ نے توانوں داؤد وانگوں شیر یاں ریچھ توں بچایا۔ جے ایہہ گل اے تے پریشان نہ ہووو اصل چ یہوواہ نے تواڈے لئی بوہت کجھ کیتا اے۔ ذرا سوچو کہ یہوواہ توانوں اپنے نیڑے لیایا اے تاکہ تُسی اوہدے نال دوستی کر سکو۔ (‏یوحنا 6:‏44‏)‏  ایہہ وی یہوواہ دا ای کرم اے کہ تُسی حالے وی وفاداری نال اوہدی خدمت کر رہے او۔ تے فیر کیوں نہ یہوواہ کولوں مدد منگو کہ اوہ توانوں اوہ وقت یاد دَوائے جدوں اوہنے تواڈیاں دُعاواں دا جواب دِتا تے اوس ویلے تواڈی مدد کیتی جدوں توانوں ایہدی واقعی بڑی لوڑ سی یاں مشکل وقت چ توانوں سہارا دِتا۔ ایہناں گلاں توں تواڈا ایہہ یقین ہور ودھ جائے گا کہ یہوواہ اَگے وی تواڈی مدد کردا رہوے گا۔‏

9.‏ مشکلاں چوں لنگھدے ویلے سانوں کیہہ یاد رکھنا چاہی دا اے؟ (‏اَمثال 27:‏11‏)‏

⁹ جے اَسی یہوواہ نُوں اِک زندہ خدا سمجھاں گے تے اَسی مشکلاں بارے صحی سوچ رکھ سکاں گے۔ اَسی یاد رکھ سکاں گے کہ شیطان نے دعویٰ کیتا سی کہ مشکلاں چ اَسی یہوواہ نُوں چھڈ دواں گے۔ ایس لئی ساڈیاں مشکلاں دا تعلق کائنات دے سب توں اہم معاملے نال اے۔ (‏ایوب 1:‏10، 11؛‏ اَمثال 27:‏11 نُوں پڑھو۔)‏ پر جدوں اَسی یہوواہ دے وفادار رہنے آں تے اَسی ثابت کرنے آں کہ اَسی یہوواہ نُوں بوہت پیار کرنے آں تے شیطان جھوٹھا اے۔ کیہہ توانوں ایہو جہیاں مشکلاں دا سامنا اے جیویں کہ حکومت وَلّوں مخالفت یاں پیسے دھیلے دی تنگی؟ کیہہ مُنادی دے دوران لوک تواڈی گل نئیں سُن دے؟ یاں کیہہ تُسی کسے ہور مشکل چوں لنگھ رہے او؟ جے ایہہ گل اے تے یاد رکھو کہ ایہناں حالاتاں چ تواڈے کول یہوواہ دے دل نُوں خوش کرن دا موقع اے۔ ایہہ وی یاد رکھو کہ یہوواہ توانوں کسے وی ایہو جہی ازمیش چ نئیں پین دَوے گا جیہڑی تواڈی برداشت توں باہر ہوئے۔ (‏1-‏کُرنتھیوں 10:‏13‏)‏ اوہ توانوں طاقت دَوے گا تاکہ تُسی صبر نال مشکلاں نُوں برداشت کر سکو۔‏

زندہ خدا توانوں اجر دَوے گا

10.‏ زندہ خدا اوہناں لوکاں لئی کیہہ کرے گا جیہڑے اوہدی عبادت کردے نیں؟‏

¹⁰ یہوواہ ہمیشاں اوہناں لوکاں نُوں اجر دیندا اے جیہڑے اوہدی عبادت کردے نیں۔ (‏عبرانیوں 11:‏6‏)‏ اوہ اَج سانوں دِلی سکون تے اِطمینان دیندا اے تے مستقبل چ سانوں ہمیشاں دی زندگی دَوے گا۔ اَسی یہوواہ تے امید لا سکنے آں تے ایس گل دا پکا یقین رکھ سکنے آں کہ اوہ سانوں اَجر دین دی خواہش وی رکھدا اے تے طاقت وی۔ ایس یقین دی وجہ توں ساڈے دل چ ماضی دے یہوواہ دے بندیاں وانگوں ایہہ جذبہ پیدا ہوئے گا کہ اَسی لگن نال یہوواہ دی خدمت کردے رہیے۔ ایہہ گل تیمُتھیُس دی گل توں صاف پتہ چلدی اے جیہڑا پہلی صدی چ رہندا سی۔—‏عبرانیوں 6:‏10-‏12‏۔‏

11.‏ تیمُتھیُس نے کلیسیا چ محنت نال کم کیوں کیتا؟ (‏1-‏تیمُتھیُس 4:‏10‏)‏

¹¹ 1-‏تیمُتھیُس 4:‏10 نُوں پڑھو۔‏ تیمُتھیُس ایس گل تے مضبوط ایمان رکھدا سی کہ زندہ خدا اوہنوں اَجر دَوے گا۔ ایسے وجہ توں اوہنے یہوواہ لئی سخت محنت کیتی تے دُوجیاں دی مدد کرن دی پوری کوشش کیتی۔ اوہنے اِنج کیہڑے طریقیاں نال کیتا؟ پولُس رسول نے اوہنوں ہلاشیری دِتی کہ اوہ اِک چنگا اُستاد بنے تاکہ اوہ کلیسیا چ تے مُنادی کردے ویلے دُوجیاں نُوں چنگی طرحاں تلیم دے سکے۔ پولُس رسول نے تیمُتھیُس نُوں ایہہ وی کہیا کہ اوہ اپنے ہم‌ایماناں لئی یعنی کہ جوان تے وڈیرے دونواں لئی چنگی مثال قائم کرے۔ تیمُتھیُس نُوں کجھ مشکل ذمے‌داریاں وی دِتیاں گئیاں سن جنہاں وچوں اِک بھین بھراواں دی درستی کرنا سی۔ اوہنوں صاف لفظاں چ پر پیار تے نرمی نال اِنج کرنا سی۔ (‏1-‏تیمُتھیُس 4:‏11-‏16؛‏ 2-‏تیمُتھیُس 4:‏1-‏5‏)‏ بھانویں کہ کدی کدار دُوجیاں نے نہ تے تیمُتھیُس دی محنت تے غور کیتا تے نہ ای ایہدی قدر کیتی پر تیمُتھیُس نُوں پکا یقین سی کہ یہوواہ اوہنوں اوہدی محنت دا اَجر ضرور دَوے گا۔—‏رومیوں 2:‏6، 7‏۔‏

12.‏ بزرگ سخت محنت نال کم کیوں کردے نیں؟ (‏تصویر نُوں وی ویکھو۔)‏

¹² اَج کلیسیا دے بزرگ وی ایس گل تے پکا یقین رکھ سکدے نیں کہ یہوواہ اوہناں دے چنگے کماں نُوں ویکھ رہیا اے تے ایہناں دی بوہت قدر کردا اے۔ بوہت سارے بزرگ بھین بھراواں دا حوصلہ ودھان، تلیم دین تے مُنادی کرن دے علاوہ تعمیر دے کم چ حصہ لیندے نیں تے آفت توں متاثر ہون والے بھین بھراواں دی مدد کردے نیں۔ کجھ بزرگ مریضاں نال ملاقات کرن والی یاں ہسپتال رابطہ کمیٹی دا حصہ نیں۔ جیہڑے بزرگ خوشی نال اپنے آپ نُوں ایہناں کماں لئی پیش کردے نیں، اوہ جان دے نیں کہ کلیسیا یہوواہ دی ملکیت اے، کسے انسان دی نئیں۔ ایسے وجہ توں اوہ لگن نال اپنیاں ذمے‌داریاں نُوں پورا کردے نیں۔ تے ایس گل تے بھروسا رکھدے نیں کہ یہوواہ اوہناں نُوں اوہناں سارے کماں دا اَجر دَوے گا جیہڑے اوہ اوہدے لئی کر رہے نیں۔—‏کُلسّیوں 3:‏23، 24‏۔‏

13.‏ اَسی یہوواہ لئی جو کجھ کرنے آں، اوہدے بارے اوہ کیہو جیہا محسوس کردا اے؟‏

¹³ سچ اے کہ اَسی سارے کلیسیا چ بزرگاں دے طور تے خدمت نئیں کر سکدے پر ساڈے ساریاں کول ای یہوواہ نُوں کجھ نہ کجھ دین لئی ضرور اے۔ جدوں اَسی لگن نال خدا دی خدمت کرنے آں تے اوہ ایہدی بڑی قدر کردا اے۔ جدوں اَسی پوری دُنیا چ ہون والے مُنادی دے کم لئی عطیات دینے آں تے یہوواہ ایہناں نُوں ویکھدا اے فیر بھانویں ایہہ گھٹ ای کیوں  نہ ہون۔ جدوں اوہ ویکھدا اے کہ اَسی شرمیلے ہون دے باوجود عبادت چ جواب دینے آں تے اوہ بڑا خوش ہوندا اے۔ تے جدوں اَسی دُوجیاں دِیاں غلطیاں نُوں درگزر کرنے آں تے اوہناں نُوں معاف کر دینے آں تے اوہدا دل خوشی نال بھرا جاندا اے۔ جے توانوں لگدا اے کہ تُسی یہوواہ لئی اوناں نئیں کر پا رہے جِنّاں تُسی کرنا چاہندے او تے فیر وی ایس گل تے بھروسا رکھو کہ تُسی پورے دل تے جان نال اوہدی خدمت کرن لئی جو کجھ کر رہے او، اوہ اوہدی بڑی قدر کردا اے۔ تے ایس وجہ توں اوہ توانوں بوہت پیار کردا اے تے ایہدے لئی توانوں اَجر دَوے گا۔—‏لُوقا 21:‏1-‏4‏۔‏

زندہ خدا دے نیڑے رہوو

14.‏ یہوواہ دے نیڑے رہن نال اَسی اوہدے وفادار کیویں رہ سکاں گے؟ (‏تصویر نُوں وی ویکھو۔)‏

¹⁴ جے اَسی یہوواہ نُوں اِک حقیقی ہستی سمجھاں گے تے ساڈے لئی اوہدا وفادار رہنا زیادہ اسان ہو جائے گا۔ ایہہ گل یوسف دی مثال توں صاف نظر آندی اے۔ یوسف یہوواہ نُوں اِک حقیقی ہستی سمجھدا سی تے کسے وی حال چ اوہنوں ناراض نئیں کرنا چاہندا سی۔ ایسے لئی اوہنے جنسی بدکاری کرن توں صاف اِنکار کر دِتا۔ (‏پیدائش 39:‏9‏)‏ جے اَسی وی چاہنے آں کہ یہوواہ ساڈے لئی حقیقی ہستی ہوئے تے سانوں اوہدے کولوں دُعا کرن، اوہدے کلام نُوں پڑھن تے اوہدے تے سوچ وچار کرن لئی وقت کڈھنا چاہی دا اے۔ اِنج اوہدے نال ساڈی دوستی ہور مضبوط ہو جائے گی۔ جے یوسف وانگوں ساڈی وی یہوواہ نال قریبی دوستی ہوئے گی تے اَسی کوئی وی ایہو جیہا کم نئیں کراں گے جدے توں یہوواہ دا دل دُکھی ہو سکدا اے۔—‏یعقوب 4:‏8‏۔‏

15.‏ بنی‌اِسرائیل نے ویرانے چ جو کجھ کیتا، اوہدے توں اَسی کیہہ سکھ سکنے آں؟ (‏عبرانیوں 3:‏12‏)‏

¹⁵ جیہڑے لوک ایہہ بُھل جاندے نیں کہ یہوواہ اِک زندہ خدا اے، اوہ بڑی اسانی نال اوہدے توں دُور ہو سکدے نیں۔ غور کرو کہ جدوں بنی‌اِسرائیل ویرانے چ سن تے اوہناں نال کیہہ ہویا۔ اوہ جان دے سن کہ یہوواہ موجود اے پر اوہ ایس گل تے شک کرن لگ پئے سن کہ کیہہ یہوواہ اوہناں دِیاں ضرورتاں نُوں پورا کرے گا۔ اوہ تے ایہہ وی کہن لگ پئے سن:‏ یہوواہ ساڈے وچ ہے وے یاں نئیں۔ (‏خروج 17:‏2،‏ 7‏)‏ ایس شک دی وجہ توں اوہناں نے یہوواہ نال بغاوت کیتی۔ سانوں اوہناں وانگوں نافرمان نئیں بننا چاہی دا سگوں اوہناں دی بھیڑی مثال توں سبق سکھنا چاہی دا اے۔‏‏—‏عبرانیوں 3:‏12 نُوں پڑھو۔‏

16.‏ ساڈے ایمان دا اِمتحان کیویں ہو سکدا اے؟‏

 ¹⁶ دُنیا دے بوہت سارے لوک کہندے نیں کہ کوئی خدا نئیں۔ نالے خدا دے حکماں نُوں توڑن والے لوک بڑی چنگی زندگی گزاردے ہوئے نظر آندے نیں۔ ایہناں لوکاں دی وجہ توں ساڈے لئی یہوواہ دے نیڑے رہنا مشکل ہو سکدا اے تے ساڈے ایمان دا اِمتحان ہو سکدا اے۔ سچ اے کہ شاید اَسی ایس گل توں تے اِنکار نہ کرئیے کہ خدا ہے وے پر ہو سکدا اے کہ اَسی ایس گل تے شک کرن لگ پئیے کہ اوہ ساڈی مدد کرے گا یاں نئیں۔ ایہو جہی سوچ زبور 73 لکھن والے دے ذہن چ وی آئی سی۔ اوہ ویکھ رہیا سی کہ اوہدے آلے دَوالے دے لوک خدا دے حکماں نُوں کوئی اہمیت نئیں دے رہے تے فیر وی بڑے مزے دی زندگی جی رہے نیں۔ ایس وجہ توں اوہ سوچن لگ پیا کہ کیہہ خدا دی خدمت کرن دا واقعی کوئی فائدہ ہے وے۔—‏زبور 73:‏11-‏13‏۔‏

17.‏ کیہڑی چیز یہوواہ دے نیڑے رہن چ ساڈی مدد کرے گی؟‏

¹⁷ کیہڑی چیز نے زبور 73 لکھن والے بندے دی مدد کیتی تاکہ اوہ اپنی سوچ نُوں بدل سکے؟ اوہنے ایس گل تے غور کیتا کہ اوہناں لوکاں دا کیہہ انجام ہوندا اے جیہڑے یہوواہ نُوں بُھل جاندے نیں۔ (‏زبور 73:‏18، 19،‏ 27‏)‏ اوہنے اوہناں فائدیاں بارے وی سوچیا جیہڑے یہوواہ دی خدمت کرن نال مِلدے نیں۔ (‏زبور 73:‏24‏)‏ اَسی وی اوہناں برکتاں بارے سوچ سکنے آں جیہڑیاں یہوواہ نے سانوں دِتیاں نیں۔ ذرا سوچو کہ جے اَسی یہوواہ دی خدمت نہ کر رہے ہوندے تے ساڈی زندگی کیہو جہی ہوندی۔ ایس گل تے سوچ وچار کرن نال سانوں مدد ملے گی کہ اَسی وفاداری نال یہوواہ دی خدمت کردے رہیے تے زبور 73 لکھن والے بندے وانگوں کہہ سکئے:‏ میرے لئی چنگا اے کہ مَیں خدا دے نیڑے جاواں۔—‏زبور 73:‏28‏۔‏

18.‏ اَسی مستقبل چ آن والیاں مشکلاں دا سامنا پورے اعتماد نال کیوں کر سکنے آں؟‏

¹⁸ ایس آخری زمانے چ اَسی کسے وی مشکل دا ڈٹ کے مقابلہ کر سکنے آں کیونکہ اَسی زندہ تے سچے خدا دے غلام آں۔ (‏1-‏تھسلُنیکیوں 1:‏9‏)‏ ساڈا خدا اِک حقیقی ہستی اے جیہڑا اپنے بندیاں دی مدد کرن لئی ہمیشاں تیار رہندا اے۔ اوہنے ثابت کیتا اے کہ اوہ ماضی چ وی اپنے بندیاں دے نال سی تے اوہ اَج ساڈے نال وی اے۔ بوہت چھیتی اَسی اِک ایہو جہی وڈی مصیبت دا سامنا کرن والے آں جیہڑی زمین تے پہلاں کدی نئیں آئی۔ ایہدا سامنا کردے ویلے وی یہوواہ ساڈے نال ہووے گا۔ (‏یسعیاہ 41:‏10‏)‏ دُعا اے کہ اَسی اعتماد نال ایہہ کہہ سکئے:‏ یہوواہ میرا مددگار اے، مَیں نئیں ڈراں گا۔—‏عبرانیوں 13:‏5، 6‏۔‏