1.‏ زبور 18:‏46 چ داؤد نے یہوواہ بارے کیہہ کہیا؟‏

 اَج سانوں اچانک ایہو جہیاں مشکلاں دا سامنا کرنا پے سکدا اے جیہڑیاں شاید ساڈی زندگی نُوں بوہت مشکل بنا دین یاں فیر ایہنوں بدل کے رکھ دین۔ پر شکر اے کہ اَسی یہوواہ کولوں مدد منگ سکنے آں۔ پچھلے مضمون چ دَسیا گیا سی کہ یہوواہ زندہ خدا اے تے اوہ ساڈی مدد کرن لئی ہمیشاں تیار رہندا اے۔ جدوں اَسی مشکل ویلے چ یہوواہ دی مدد نُوں محسوس کرنے آں تے سانوں پکا یقین ہو جاندا اے کہ اوہ واقعی زندہ خدا اے۔ ‏(‏زبور 18:‏46 نُوں پڑھو۔)‏ داؤد نے یہوواہ نُوں زندہ خدا کہن دے بعد کہیا کہ اوہ میری چٹان اے۔ پر داؤد نے یہوواہ نُوں چٹان کیوں کہیا جیہڑی اِک بے‌جان چیز اے؟‏

2.‏ ایس مضمون چ اَسی کیہڑی گل تے غور کراں گے؟‏

² ایس مضمون چ اَسی ویکھاں گے کہ یہوواہ نُوں اِک چٹان کیوں کہیا گیا اے تے ایس گل توں اَسی اوہدے بار ے کیہہ سکھ سکنے آں۔ اَسی ایہہ وی ویکھاں گے کہ اَسی یہوواہ نُوں اپنی چٹان کیویں بنا سکنے آں۔آخر چ اَسی کجھ طریقیاں تے غور کراں گے کہ اَسی اپنے اندر اوہ خوبیاں کیویں پیدا کر سکنے آں جیہڑیاں یہوواہ نُوں اِک چٹان وانگوں مضبوط بناندیاں نیں۔‏

یہوواہ کیس لحاظ نال اِک چٹان وانگوں اے؟‏

3.‏ بائبل چ لفظ چٹان اکثر کدوں استمال ہویا اے؟ (‏تصویر نُوں ویکھو۔)‏

³ بائبل چ یہوواہ نُوں چٹان ایس لئی کہیا گیا اے تاکہ اَسی اوہدیاں خوبیاں نُوں چنگی طرحاں سمجھ سکئے۔ کئی وار یہوواہ دے بندیاں نے اوہدیاں شاندار خوبیاں لئی اوہدی تعریف کردے ہوئے اوہنوں چٹان کہیا۔ بائبل چ اِستثنا 32:‏4 چ پہلی وار یہوواہ نُوں اِک چٹان کہیا گیا۔ ایہدے علاوہ حنّہ نے یہوواہ کولوں دُعا کردے ویلے اوہدے بارے کہیا:‏ ساڈے خدا ورگی چٹان کوئی ہور نئیں۔ (‏1-‏سموئیل 2:‏2‏)‏ حبقّوق نبی نے وی یہوواہ نُوں اپنی چٹان کہیا۔ (‏حبقّوق 1:‏12‏)‏ زبور 73 نُوں لکھن والے نے وی یہوواہ بارے کہیا:‏ خدا میری چٹان اے جیہڑا میرے دل نُوں مضبوط کردا اے۔ (‏زبور 73:‏26‏)‏ ایتھوں تک کہ یہوواہ نے وی اپنے آپ نُوں اِک چٹان کہیا۔ (‏یسعیاہ 44:‏8‏)‏ آؤ یہوواہ دِیاں تِن ایہو جہیاں خوبیاں تے غور کرنے آں جنہاں توں پتہ چلدا اے کہ اوہ اِک چٹان وانگوں اے تے ویکھنے آں کہ اَسی یہوواہ نُوں اپنی چٹان کیویں بنا سکنے آں۔—‏اِستثنا 32:‏31‏۔‏

4.‏ یہوواہ کیس لحاظ نال اِک پناہ‌گاہ وانگوں اے؟ (‏زبور 94:‏22‏)‏

⁴ یہوواہ اِک پناہ‌گاہ وانگوں اے۔‏ کسے خطرناک طوفان توں بچن لئی کوئی بندہ کسے چٹان دی غار چ پناہ لے سکدا اے۔ ایسے طرحاں جدوں سانوں زندگی چ طوفان ورگیاں مشکلاں دا سامنا ہوندا اے تے اَسی یہوواہ کول پناہ لے سکنے آں۔ ‏(‏زبور 94:‏22 نُوں پڑھو۔)‏ اوہ ساڈی مدد کردا اے تاکہ اَسی اوہدے نال اپنی دوستی نُوں مضبوط رکھ سکئے۔ اوہ سانوں یقین دَواندا اے کہ اَج ساڈی کوئی وی مشکل سانوں ایہو جیہا نقصان نئیں پونچا سکدی جدا اثر ہمیشاں تک رہوے گا۔ اوہنے تے ایہہ وعدہ وی کیتا اے کہ اوہ مستقبل چ ہر پریشانی تے تکلیف نُوں مٹا دَوے گا۔—‏حِزقی‌ایل 34:‏25، 26‏۔‏

5.‏ یہوواہ ساڈے لئی چٹان ورگی پناہ‌گاہ کیویں بن سکدا اے؟‏

⁵ ساڈی چٹان یہوواہ چ پناہ لین دا اِک طریقہ ایہہ وے کہ اَسی اوہدے کولوں دُعا کرئیے۔ جدوں اَسی اوہدے کولوں دُعا کرنے آں تے اوہ سانوں ایہو جیہا ”‏اِطمینان“‏ دیندا اے جیہڑا ساڈے دل تے سوچ دی حفاظت کردا اے۔ (‏فِلپّیوں 4:‏6، 7‏)‏ ایس سلسلے چ ذرا بھرا آرٹم دی مثال تے غور کرو جنہوں اوہدے ایمان دی وجہ توں جیل چ پا دِتا گیا سی۔ اوتھے اِک ظالم افسر وار وار اوہدے کولوں پچھ گچھ کردا سی، اوہدے نال بُرا سلوک کردا سی تے اوہدی بے‌عزتی کردا سی۔ بھرا نے دَسیا:‏ ”‏جدوں وی اوہ افسر مینوں بلا‌ندا سی تے مینوں بڑی گھبراہٹ ہوندی سی۔ پر مَیں ہمیشاں یہوواہ کولوں دُعا کرنا ساں تے اوہنوں کہنا ساں کہ اوہ مینوں سمجھ‌داری تے میرے دل نُوں سکون دَوے۔“‏ بھرا نے ایہہ وی کہیا:‏ ”‏اوس افسر نے میرا عزم توڑن دی بڑی کوشش کیتی پر اوہ کامیاب نئیں ہویا۔ یہوواہ نے میری بڑی مدد کیتی۔ مینوں اِنج لگیا جیویں مَیں اِک مضبوط دیوار دے پچھے محفوظ آں۔“‏

6.‏ اَسی ہمیشاں یہوواہ تے بھروسا کیوں کر سکنے آں؟ (‏یسعیاہ 26:‏3، 4‏)‏

⁶ یہوواہ بھروسے دے لائق اے۔‏ جیویں اِک وڈی تے مضبوط چٹان اپنی جگہ تے ٹکی رہندی اے اونویں ای یہوواہ ہمیشاں ساڈی مدد کرن لئی تیار رہندا اے۔ اَسی اوہدے تے پورا بھروسا کر سکنے آں کیونکہ اوہ ابدی چٹان اے۔ ‏(‏یسعیاہ 26:‏3، 4 نُوں پڑھو۔)‏ اوہ اپنے وعدیاں نُوں پورا کرن، ساڈیاں دُعاواں نُوں سنن تے مشکل ویلے چ سانوں سہارا دین لئی ہمیشاں کھڑا رہندا اے۔ اَسی یہوواہ تے ایس لئی وی بھروسا کر سکنے آں کیونکہ اوہ اوہناں لوکاں نال وفاداری نبھاندا اے جیہڑے وفاداری نال اوہدی خدمت کردے نیں۔ (‏2-‏سموئیل 22:‏26‏)‏ اَسی اوہدے لئی جو کجھ وی کرنے آں، اوہ اوہنوں کدی نئیں بُھلے گا تے سانوں ایہدا اجر ضرور دَوے گا۔—‏عبرانیوں 6:‏10؛‏ 11:‏6‏۔‏

7.‏ یہوواہ تے بھروسا کر کے اَسی کیہڑی گل دا تجربہ کر سکاں گے؟ (‏تصویر نُوں وی ویکھو۔)‏

⁷ جدوں اَسی یہوواہ تے پورا بھروسا کرنے آں تے اَسی اوہنوں اپنی چٹان بنا رہے ہُنے آں۔ اَسی ایس گل تے بھروسا کرنے آں کہ جے اَسی مشکل ویلے چ وی یہوواہ دے فرمانبردار رہواں گے تے ایہدے توں سانوں فائدہ ہوئے گا۔ (‏یسعیاہ 48:‏17، 18‏)‏ جدوں اَسی ہر مشکل چ یہوواہ تے بھروسا کراں گے تے اوہدے تے ساڈا یقین ہور ودھ جائے گا۔ فیر اَسی ایہو جہیاں مشکلاں دا سامنا کرن لئی وی چنگی طرحاں تیار ہو جاواں گے جنہاں دا مقابلہ کرن چ صرف یہوواہ ساڈی مدد کر سکدا اے۔ اکثر ایہو جہے حالات پیدا ہو جاندے نیں جنہاں چ کوئی انسان ساڈی مدد نئیں کر سکدا۔ ایہو جہے حالات چ سانوں اندازہ ہوندا اے کہ اَسی یہوواہ تے کِنّاں زیادہ بھروسا کر سکنے آں۔ ایس بارے بھرا ولادمیر نے کہیا:‏ ”‏جدوں مَیں جیل چ ساں تے مَیں یہوواہ دے ہور زیادہ نیڑے ہو گیا۔ اوتھے مَیں یہوواہ تے ہور زیادہ بھروسا کرنا سکھیا کیونکہ مَیں بالکل کلّا ساں تے حالات میرے وَسوں باہر سن۔“‏

8.‏ (‏الف)‏اَسی ایہہ کیوں کہہ سکنے آں کہ یہوواہ کدی نئیں بدلدا؟ (‏ب)‏یہوواہ نُوں اپنی چٹان سمجھن نال سانوں کیہہ فائدہ ہوندا اے؟ (‏زبور 62:‏6، 7‏)‏

⁸ یہوواہ کدی نئیں بدلدا۔‏ اِک وڈی تے مضبوط چٹان وانگوں  یہوواہ کدی نئیں بدلدا۔ اوہدی ذات تے اوہدا مقصد اَج وی اوہی اے جیہڑا شروع توں سی۔ (‏ملاکی 3:‏6‏)‏ جدوں عدن دے باغ چ آدم تے حوا نے یہوواہ دے خلاف بغاوت کیتی تے انساناں لئی اوہدا مقصد نئیں بدلیا۔ جیویں کہ پولُس رسول نے کہیا:‏ یہوواہ اپنا اِنکار نئیں کر سکدا۔ (‏2-‏تیمُتھیُس 2:‏13‏)‏ ایہدا مطلب اے کہ بھانویں کجھ وی ہو جائے؛ یہوواہ کدی وی اپنے آپ نُوں، اپنے مقصد نُوں تے اپنے معیاراں نُوں نئیں بدلدا۔ ایس لئی اَسی ایس گل دا پکا یقین رکھ سکنے آں کہ اوہ مشکل ویلے چ سانوں کدی نئیں ڈولن دَوے گا تے اپنے اوہناں وعدیاں نُوں ضرور پورا کرے گا جیہڑے اوہنے مستقبل بارے کیتے نیں۔‏‏—‏زبور 62:‏6، 7 نُوں پڑھو۔‏

9.‏ تُسی بھین تاتیانا دے تجربے توں کیہہ سکھیا اے؟‏

⁹ جدوں اَسی اپنا دھیان ایس گل تے رکھنے آں کہ یہوواہ کیہو جیہا خدا اے تے زمین تے انساناں لئی اوہدا کیہہ مقصد اے تے اَسی اوہنوں اپنی چٹان بنا رہے ہُنے آں۔ جدوں اَسی اِنج کراں گے تے اَسی مشکلاں دا سامنا کردے ویلے حدوں ودھ پریشان نئیں ہونواں گے سگوں مضبوط رہواں گے۔ (‏زبور 16:‏8‏)‏ ایہہ گل بھین تاتیانا بارے اوس ویلے سچ ثابت ہوئی جدوں اوہنوں اوہدے ایمان دی وجہ توں اوہدے گھر چ قید کر دِتا گیا۔اوہنے کہیا:‏ ”‏مَیں اپنے گھر چ بالکل کلّی ساں۔ شروع شروع چ مینوں ایس کلّے پن نُوں برداشت کرنا بڑا مشکل لگ رہیا سی۔ مَیں اکثر بڑی مایوس ہو جانی ساں۔“‏ پر جدوں بھین نے ایس گل تے غور کیتا کہ اوہدی مشکل یہوواہ تے اوہدے مقصد نال کیویں جُڑی ہوئی اے تے اوہ بالکل پُر سکون ہو گئی تے اوہنوں یہوواہ دا وفادار رہن دی طاقت مِلی۔ اوہنے کہیا:‏ ”‏جدوں مَیں سمجھ گئی کہ مَیں یہوواہ دی وفادار رہن دی وجہ توں ایس مشکل چ آں تے مَیں اپنا دھیان اپنے آپ توں ہٹا سکی۔“‏

10.‏ یہوواہ ہُن ساڈی چٹان کیویں بن سکدا اے؟‏

¹⁰ چھیتی ای سانوں ایہو جہیاں مشکلاں دا سامنا کرنا پووے گا جنہاں چ سانوں یہوواہ تے پہلے نالوں کِتے زیادہ بھروسا کرن دی لوڑ ہوئے گی۔ تے فیر ہُن وقت اے کہ اَسی اپنے ایس یقین نُوں مضبوط کرئیے کہ مشکل ویلے چ یہوواہ سانوں اوہ سب کجھ دَوے گا جو اوہدا وفادار رہن لئی ضروری ہوئے گا۔ اَسی اپنے ایس یقین نُوں کیویں مضبوط کر سکنے آں؟ بائبل چ دَسے گئے یہوواہ دے بندیاں بارے پڑھو تے اَج دے زمانے دے اوہدے بندیاں دی آپ بیتیاں وی پڑھو۔ ویکھو کہ مشکل ویلے چ یہوواہ اوہناں لئی چٹان کیویں ثابت ہویا۔ تے اوہنے اوہناں نُوں سہارا دین لئی کیہڑیاں خوبیاں ظاہر کیتیاں۔ جدوں تُسی یہوواہ دے وفادار بندیاں دِیاں مثالاں تے سوچ وچار کرو گے تے تُسی یہوواہ نُوں اپنی چٹان بنا سکو گے۔‏

یہوواہ ورگیاں خوبیاں پیدا کرو

11.‏ سانوں اپنے اندر یہوواہ ورگیاں خوبیاں کیوں پیدا کرنیاں چاہی دِیاں نیں؟ (‏ایس بکس نُوں وی ویکھو:‏ ‏”‏ نوجوان بھراواں لئی اِک منصوبہ۔‏‏“‏‏)‏

¹¹ اَسی یہوواہ دِیاں ایہو جہیاں خوبیاں تے غور کیتا اے جنہاں دی وجہ توں اوہ ساڈے لئی اِک چٹان ثابت ہو سکدا اے۔ آؤ ہُن ویکھنے آں کہ اَسی اوہناں خوبیاں نُوں کیویں پیدا کر سکنے آں۔ جدوں اَسی اِنج کراں گے تے اَسی کلیسیا دے بھین بھراواں نُوں مضبوط کر سکاں گے۔ مثال لئی، یسوع نے شمعون دا ناں کیفا (‏یونانی چ ”‏پطرس“‏)‏ رکھیا جدا مطلب اے ”‏پتھر یاں چٹان۔“‏ (‏یوحنا 1:‏42‏)‏ ایہہ کہن نال یسوع نے ظاہر کیتا کہ پطرس کلیسیا دے بھین بھراواں نُوں حوصلہ تے تسلی دَوے گا تے اوہناں دا ایمان مضبوط کرے گا۔ بائبل چ کہیا گیا اے کہ کلیسیا دے بزرگ اِک وڈی چٹان دے سائے وانگوں نیں۔ ایہدے توں پتہ چلدا اے کہ اوہ کلیسیا نُوں محفوظ رکھدے نیں۔ (‏یسعیاہ 32:‏2‏)‏ جدوں سارے بھین بھرا یہوواہ دِیاں اوہناں خوبیاں نُوں اپنے اندر پیدا کردے  نیں جیہڑیاں اوہنوں اِک چٹان وانگوں بناندیاں نیں تے پوری کلیسیا نُوں فائدہ ہوندا اے۔—‏اِفِسیوں 5:‏1‏۔‏

12.‏ کجھ ایہو جہے طریقے دَسو جنہاں دے ذریعے اَسی دُوجیاں لئی پناہ‌گاہ ثابت ہو سکنے آں۔‏

¹² پناہ‌گاہ بنو۔‏ کدی کدار اَسی اپنے بھین بھراواں نُوں اوس ویلے سچ‌مچ پناہ دینے آں جدوں کوئی قدرتی آفت آ جاندی اے یاں جنگ لگ جاندی اے۔ جیویں جیویں ایس آخری زمانے چ حالات وِگڑن گے، سانوں اپنے بھین بھراواں دی مدد کرن دے ہور زیادہ موقعے مِلن گے۔ (‏2-‏تیمُتھیُس 3:‏1‏)‏ ایہدے علاوہ اَسی مشکل ویلے چ اپنے بھین بھراواں نُوں تسلی تے مدد دے سکنے آں تے یہوواہ دے نیڑے رہن چ اوہناں دی مدد کر سکنے آں۔ اِنج کرن دا موقع سانوں ساڈیاں عبادت‌گاہواں چ مِل سکدا اے۔ اَسی اپنی کلیسیا نُوں اِک ایہو جہی جگہ بنانا چاہنے آں جتھے بھین بھراواں نُوں محبت تے اپنائیت محسوس ہوئے۔ ایس دُنیا چ ہر پاسے پریشانیاں ای پریشانیاں نیں تے ایہدے چ بوہت سارے لوک سخت‌دل تے ظالم نیں۔ ایس لئی اَسی چاہنے آں کہ عبادتاں تے آ کے بھین بھراواں دا حوصلہ ودھے، اوہ تازہ‌دم ہو جان تے محفوظ محسوس کرن۔‏

13.‏ کلیسیا دے بزرگ بھین بھراواں لئی پناہ‌گاہ کیویں ثابت ہو سکدے نیں؟ (‏تصویر نُوں وی ویکھو۔)‏

¹³ بھین بھراواں دِیاں مشکلاں چ بزرگ اوہناں لئی پناہ‌گاہ ثابت ہو سکدے نیں۔ جدوں کوئی قدرتی آفت آندی اے یاں اچانک کوئی بھین بھرا بیمار ہو جاندا اے تے بزرگ فوراً اوہناں دی مدد کرن لئی قدم چُک دے نیں۔ اوہ خدا دے کلام توں اوہناں دا حوصلہ وی ودھاندے نیں۔ بھین بھراواں نُوں ایہو جہے بزرگاں کول جانا اسان لگدا اے جیہڑے بڑے پیار کرن والے تے ہمدرد ہوندے نیں تے ہر ویلے گل سُنن لئی تیار رہندے نیں۔ جدوں بزرگ ایہو جہیاں خوبیاں ظاہر کردے نیں تے بھین بھراواں نُوں محسوس ہوندا اے کہ بزرگ اوہناں دی دِلوں فکر کردے نیں۔ تے فیر بزرگ جدوں اوہناں نُوں کوئی ہدیت دیندے نیں تے اوہناں لئی اوہدے تے عمل کرنا اسان ہو جاندا اے۔—‏1-‏تھسلُنیکیوں 2:‏7، 8،‏ 11‏۔‏

14.‏ اَسی ایہہ کیویں ثابت کرسکنے آں کہ اَسی بھروسے دے لائق آں؟‏

¹⁴ بھروسے دے لائق بنو۔‏ اَسی چاہنے آں کہ دُوجے ساڈے تے  بھروسا کرن۔ (‏اَمثال 17:‏17‏)‏ پر اَسی بھروسے دے لائق کیویں بن سکنے آں؟ اَسی ایہو جہیاں خوبیاں ظاہر کرن دی کوشش کر سکنے آں جیہڑیاں یہوواہ چ نیں، جیویں کہ اپنے وعدے پورے کرنا تے ہر کم اپنے وقت تے کرنا۔ (‏متی 5:‏37‏)‏ نالے اَسی فرق فرق طریقیاں نال دُوجیاں دی مدد کر سکنے آں۔ ایہدے علاوہ اَسی ایس گل دا وی خاص خیال رکھ سکنے آں کہ اَسی کلیسیا چ اپنیاں ذمے‌داریاں نُوں ہدیتاں مطابق پورا کرئیے۔‏

15.‏ جدوں بزرگ بھروسے دے لائق ہوندے نیں تے ایہدا کلیسیا نُوں کیہہ فائدہ ہوندا اے؟‏

¹⁵ کلیسیا دے بھین بھراواں نُوں ایہو جہے بزرگاں توں بڑا فائدہ ہوندا اے جیہڑے بھروسے دے لائق ہوندے نیں۔ مثال لئی، جے کسے بھین بھرا نُوں یقین اے کہ اوہ اِک بزرگ نُوں جیویں کہ اپنے مُنادی دے گروپ دے نگہبان نُوں مدد لئی کسے وی ویلے فون کر سکدا اے تے اوہدی پریشانی گھٹ ہو سکدی اے۔ بھین بھراواں نُوں اوس ویلے وی بزرگاں دی محبت محسوس ہوندی اے جدوں اوہ اوہناں دی مدد کرن لئی تیار رہندے نیں۔ جدوں بزرگ اپنی سوچ یاں رائے دی بجائے بائبل یاں تنظیم دِیاں کتاباں نُوں استمال کر کے کسے بھین بھرا دی درستی کردے نیں یاں اوہنوں مشورہ دیندے نیں تے بھین بھراواں دا اوہناں تے بھروسا ودھدا اے۔ ایہدے علاوہ جدوں بزرگ بھین بھراواں دے ذاتی معاملیاں نُوں راز چ رکھدے نیں تے اپنی زبان تے قائم رہندے نیں تے بھین بھراواں دا اوہناں تے بھروسا ہور ودھ جاندا اے۔‏

16.‏ جدوں اَسی یہوواہ دے معیاراں تے قائم رہنے آں تے ایہدا سانوں تے دُوجیاں نُوں کیہہ فائدہ ہوندا اے؟‏

¹⁶ ہمیشاں یہوواہ دے معیاراں تے قائم رہوو۔‏ جدوں اَسی یہوواہ دے حکماں تے عمل کرنے آں تے ہر معاملے چ بائبل دے اصولاں  دے مطابق فیصلے کرنے آں تے اَسی دُوجیاں لئی اِک چنگی مثال بننے آں۔ خدا دے کلام دا مطالعیا کرن نال ساڈا ایمان مضبوط ہوندا اے۔ اِنج اَسی اوہدے معیاراں تے قائم رہ سکاں گے۔ فیر اَسی نہ تے ڈانواں ڈول ہونواں گے تے نہ ای دُنیا دی جھوٹھی تلیم یاں ایہدی غلط سوچ دا اپنے اُتے اثر پین دَواں گے۔ (‏اِفِسیوں 4:‏14؛‏ یعقوب 1:‏6-‏8‏)‏ یہوواہ تے اوہدے وعدیاں تے ایمان رکھن نال اَسی اوس ویلے وی پُرسکون رہ سکاں گے جدوں سانوں کوئی بُری خبر سُنن نُوں ملے گی۔ (‏زبور 112:‏7، 8‏)‏ اَسی اوہناں لوکاں دی وی مدد کر سکاں گے جیہڑے شاید کسے مشکل دا سامنا کر رہے نیں۔—‏1-‏تھسلُنیکیوں 3:‏2، 3‏۔‏

17.‏ کیہڑی چیز بزرگاں دی مدد کردی اے کہ اوہ ایمان تے قائم رہن دی چنگی مثال بنن؟‏

¹⁷ اِک بزرگ نُوں چنگیاں عادتاں دا مالک، سمجھ‌دار، سلیقے نال کم کرن والا تے دُوجیاں دا لحاظ کرن والا ہونا چاہی دا اے۔ بزرگ خدا دے ”‏کلام دے عین مطابق تلیم“‏ دیندے نیں۔ (‏طِطُس 1:‏9؛‏ 1-‏تیمُتھیُس 3:‏1-‏3‏)‏ اِنج اوہ اپنے بھین بھراواں دی مدد کردے نیں تاکہ اوہ مشکل ویلے چ پُرسکون رہن تے یہوواہ تے اپنے ایمان نُوں مضبوط رکھن۔ بزرگ کلیسیا دے بھین بھراواں دی باقاعدگی نال عبادتاں تے جان، مُنادی کرن تے بائبل دا ذاتی مطالعیا کرن چ وی مدد کردے نیں۔ اوہ بھین بھراواں نُوں صرف اِنج کرن دا حوصلہ ای نئیں دیندے سگوں ایہہ کم کرن دی چنگی مثال وی قائم کردے نیں۔ جدوں کسے بھین یاں بھرا دی زندگی چ کوئی مسئلہ کھڑا ہو جاندا اے تے بزرگ اوہنوں ایہہ حوصلہ دیندے نیں کہ اوہ اپنا دھیان یہوواہ خدا تے اوہدے مقصد تے رکھے۔‏

18.‏ اَسی یہوواہ دی وڈیائی کیوں کرنا چاہنے آں تے اوہدے ہور نیڑے کیوں جانا چاہنے آں؟ (‏ایس بکس نُوں وی ویکھو:‏ ‏”‏ یہوواہ دے ہور نیڑے جان دا اِک طریقہ۔‏‏“‏‏)‏

¹⁸ یہوواہ دِیاں شاندار خوبیاں تے غور کرن توں بعد اَسی وی بادشاہ داؤد وانگوں ایہہ کیہہ سکنے آں:‏ یہوواہ دی وڈیائی ہوئے جیہڑا میری چٹان اے۔ (‏زبور 144:‏1‏)‏ یہوواہ اوہ خدا اے جیہڑا سانوں کدی مایوس نئیں کرے گا تے اَسی ہمیشاں اوہدے تے بھروسا کر سکنے آں۔ بھانویں اَسی وڈیرے ای کیوں نہ ہو جائیے یہوواہ ساڈی مدد کردا رہوے گا تاکہ اَسی ہمیشاں اوہدے نیڑے رہ سکئے۔ اَسی پورے یقین نال ایہہ کہہ سکنے آں کہ یہوواہ میری چٹان اے۔—‏زبور 92:‏14، 15‏۔‏