مطالعے دا مضمون نمبر 31
دُعا کرن دے اعزاز دی قدر کرو
میری دُعا تیرے حضور بخور وانگوں ہووے۔—زبور 141:2۔
گیت نمبر 42: خدا دے خادم دی دُعا
مضمون تے اِک نظر *
1. سانوں یہوواہ کولوں دُعا کرن نُوں کیہو جیہا خیال کرنا چاہی دا اے؟
سانوں ایہہ بوہت وڈا اعزاز ملیا اے کہ اَسی اسمان تے زمین دے خالق تے مالک کولوں دُعا کر سکنے آں۔ ذرا سوچو کہ اَسی یہوواہ نُوں کسے وی ویلے تے کسے وی زبان چ اپنے دل دا حال دَس سکنے آں تے ایہدے لئی سانوں اوہدے کولوں وقت لین دی وی ضرورت نئیں پیندی۔ بھانویں اَسی ہسپتال دے بستر تے دُعا کر رہے ہوئیے یاں جیل چ، اَسی ایس گل دا پورا یقین رکھ سکنے آں کہ ساڈا اسمانی باپ ساڈی دُعا ضرور سُنے گا۔ سانوں ایس اعزاز نُوں معمولی خیال نئیں کرنا چاہی دا۔
2. بادشاہ داؤد نے ایہہ کیویں ظاہر کیتا کہ اوہ دُعا کرن دے اعزاز دی قدر کردا سی؟
2 بادشاہ داؤد دُعا کرن دے اعزاز دی بڑی قدر کردا سی۔ اوہنے اِک گیت چ یہوواہ نُوں کہیا: میری دُعا تیرے حضور بخور وانگوں ہووے۔ (زبور 141:1، 2) داؤد دے زمانے چ کاہن یہوواہ دی عبادت کرن لئی جیہڑا بخور استمال کردے سن، اوہنوں بڑے دھیان نال تیار کیتا جاندا سی۔ (خروج 30:34، 35) بخور دا حوالہ دے کے داؤد نے ظاہر کیتا کہ اوہ چاہندا سی کہ دُعا کرن توں پہلاں اوہ چنگی طرحاں سوچے کہ اوہ دُعا چ یہوواہ نُوں کیہہ کجھ کہوے گا۔ ساڈی وی ایہی خواہش ہونی چاہی دی اے کہ ساڈیاں دُعاواں سن کے یہوواہ خوش ہووے۔
3. دُعا چ یہوواہ نال گل کر دے ویلے سانوں کیہہ کرنا چاہی دا اے تے کیوں؟
3 دُعا چ یہوواہ نال گل کردے ویلے سانوں اوہدے لئی احترام وکھانا چاہی دا اے۔ ذرا اوہناں رُویاں بارے سوچو جیہڑیاں یسعیاہ، حزقیایل، دانیایل تے یوحنا نے ویکھیاں سن۔ ایہہ ساریاں رُویاں اِک دُوجے توں فرق سن۔ پر ایہناں ساریاں رُویاں چ یہوواہ نُوں اِک عظیم بادشاہ دے طور تے وکھایا گیا سی۔ مثال لئی یسعیاہ نے یہوواہ نُوں بڑی بلندی تے اِک اُچے تخت تے بیٹھے ویکھیا۔ (یسعیاہ 6:1-3) حزقیایل نے ویکھیا کہ یہوواہ اپنے اسمانی رتھ تے بیٹھیا اے تے اوہدے آلے دوالے تیز روشنی اے جیہڑی اِنج نظر آعندی اے جیویں مینہ دے بعد بدلاں چ دھنک ہوندی اے۔ (حِزقیایل 1:26-28) دانیایل نے رُویا چ قدیمالایام یعنی یہوواہ نُوں ویکھیا جدے کپڑے برف وانگوں چٹے سن تے اوہدا تخت اَگ دے شعلے وانگوں سی۔ (دانیایل 7:9، 10) یوحنا نے یہوواہ نُوں اِک تخت تے بیٹھے ویکھیا جدے آلے دوالے اِک دھنک سی جیہڑی ویکھن چ زمُرد ورگی سی۔ (مکاشفہ 4:2-4) جدوں اَسی یہوواہ دی شان بارے سوچنے آں تے اَسی سمجھ جانے آں کہ یہوواہ نے سانوں دُعا کرن دا جیہڑا اعزاز دِتا اے، اوہ بوہت وڈا اے۔ ایس لئی دُعا کردے ویلے سانوں یہوواہ لئی احترام وکھانا چاہی دا اے۔ پر سانوں کیہڑیاں گلاں بارے دُعا کرنی چاہی دی اے؟
تُسی ایس طرحاں دُعا کرو
4. متی 6:9، 10 چ یسوع نے دُعا کرن دا جیہڑا طریقہ دَسیا اوہدے توں اَسی کیہہ سکھنے آں؟
4 متی 6:9، 10 نُوں پڑھو۔ یسوع مسیح نے پہاڑ تے جیہڑی تقریر دِتی اوہدے چ اوہنے اپنے پیروکاراں نُوں سکھایا کہ اوہ اُنج دُعا کیویں کر سکدے نیں جدے توں یہوواہ خوش ہووے۔ اپنے شاگرداں نُوں ایہہ کہن دے بعد کہ تُسی ایس طرحاں دُعا کرو، یسوع نے ایہناں خاص گلاں دا ذکر کیتا: یہوواہ دا ناں پاک منیا جائے تے اوہدی بادشاہی آئے جیہڑی اوہدے دُشمناں نُوں ختم کر دَوے گی۔ فیر اوہنے اوہناں چنگے کماں دا ذکر کیتا جیہڑے مستقبل چ یہوواہ زمین تے انساناں لئی کرے گا۔ جدوں اَسی وی ایہناں گلاں بارے دُعا کر نے آں تے اَسی ثابت کر نے آں کہ ساڈے لئی یہوواہ دی مرضی سب توں زیادہ اہم اے۔
5. اَسی ایہہ کیویں جاننے آں کہ اپنے ذاتی معاملیاں بارے خدا کولوں دُعا کرنا غلط نئیں اے؟
5 دُعا دے اگلے حصے چ یسوع نے سکھایا کہ اَسی اپنے ذاتی معاملیاں بارے وی دُعا کر سکنے آں۔ اَسی یہوواہ کولوں اِلتجا کر سکنے آں کہ اوہ سانوں اَج دی لوڑ دے مطابق روٹی دوے، ساڈے گناہ معاف کرے، سانوں ازمیش دے ویلے کمزور نہ پین دوے تے سانوں شیطان توں بچائے۔ (متی 6:11-13) جدوں اَسی ایہناں معاملیاں بارے دُعا کرنے آں تے اَسی ایہہ ثابت کرنے آں کہ سانوں یہوواہ دی مدد دی ضرورت اے تے اَسی اوہنوں خوش کرنا چاہنے آں۔
اِک شوہر اپنی بیوی دے نال مِل کے کیہڑیاں گلاں لئی دُعا کر سکدا اے؟ (پیراگراف نمبر 6 نُوں ویکھو۔) *
6. کیہہ سانوں صرف اوہناں گلاں بارے دُعا کرنی چاہی دی اے جنہاں دا ذکر یسوع نے دُعا دا طریقہ سکھاندے ویلے کیتا سی؟ وضاحت کرو۔
6 یسوع اپنے شاگرداں کولوں ایہہ توقع نئیں کر رہیا سی کہ اوہ دُعا کردے ویلے اوہی لفظ دہراندے رہن جیہڑے یسوع نے دُعا دا طریقہ دَسدے ویلے کہے سن۔ کجھ ہور موقعیاں تے دُعا کردے ویلے یسوع نے ایہو جہیاں گلاں دا ذکر کیتا جنہاں بارے دُعا کرنا اوس ویلے ضروری سی۔ (متی 26:39، 42؛ یوحنا 17:1-26) جے اَسی کسے وجہ توں پریشان آں تے اَسی اوس بارے دُعا کرسکنے آں۔ جدوں سانوں کوئی فیصلہ کرنا پیندا اے تے اَسی سمجھداری لئی یہوواہ کولوں دُعا کر سکنے آں۔ (زبور 119:33، 34) جدوں سانوں کوئی ایہو جہی ذمےداری مِلدی اے جنہوں پورا کرنا سانوں مشکل لگ رہیا اے تے اَسی یہوواہ کولوں دُعا کرسکنے آں کہ اوہ ساڈی مدد کرے۔ (امثال 2:6) ماں پیو اپنے بچیاں لئی تے بچے اپنے ماں پیو لئی دُعا کر سکدے نیں۔ تے سانوں ساریاں نُوں اوہناں لوکاں لئی وی دُعا کرنی چاہی دی اے جنہاں نُوں اَسی گواہی دینے آں تے بائبل کورس کرانے آں۔ پر سانوں دُعا چ یہوواہ کولوں صرف مدد ای نئیں منگنی چاہی دی سگوں کجھ ہور گلاں دا وی ذکر کرنا چاہی دا اے۔
اَسی دُعا چ کیہڑیاں چیزاں لئی یہوواہ دی تعریف کر سکنے آں تے اوہدا شکریہ کر سکنے آں؟ (پیراگراف نمبر 7-9 نُوں ویکھو۔) *
7. سانوں دُعا چ یہوواہ دی تعریف کیوں کرنی چاہی دی اے؟
7 سانوں دُعا چ یہوواہ دی تعریف کرنا کدی نئیں بھلنا چاہی دا۔ اوہدے توں زیادہ تعریف دے لائق ہور کوئی نئیں۔ اوہ بھلا اے تے معاف کرن لئی تیار رہندا اے، اوہ مہربان تے رحم دل اے، اوہ چھیتی غصہ نئیں کردا تے اوہدی اٹل محبت دی کوئی حد نئیں۔ (زبور 86:5، 15) یہوواہ دِیاں خوبیاں تے اوہدے کماں دی وجہ توں سانوں اوہدی تعریف ضرور کرنی چاہی دی اے۔
8. اَسی کیہڑیاں چیزاں لئی یہوواہ دا شکریہ کرسکنے آں؟ (زبور 104:12-15، 24)
8 اپنیاں دُعاواں چ یہوواہ دی تعریف کرن دے نال نال سانوں اوہناں چیزاں لئی اوہدا شکر وی کرنا چاہی دا اے جیہڑیاں اوہنے سانوں دِتیاں نیں۔ مثال لئی، اَسی رنگ برنگے پُھلاں تے طرحاں طرحاں دے مزے دار کھانیاں لئی یہوواہ دا شکریہ کر سکنے آں۔ اَسی ایس گل لئی وی اوہدا شکریہ کر سکنے آں کہ اوہنے سانوں چنگے دوست دِتے نیں۔ساڈے پیارے باپ یہوواہ نے سانوں ایہہ سب کجھ ایس لئی دِتا اے تاکہ اَسی خوش رہیے۔ (زبور 104:12-15، 24 نُوں پڑھو۔) سانوں اپنی شاندار امید تے اوہناں ہدیتاں لئی یہوواہ دا شکریہ کرنا چاہی دا اے جنہاں دی مدد نال اَسی اپنے ایمان نُوں مضبوط کر سکنے آں۔
9. کیہڑی چیز ساڈی مدد کر سکدی اے تاکہ اَسی یہوواہ دا شکریہ کرنا نہ بُھلئیے؟ (1-تھسلُنیکیوں 5:17، 18)
9 کدی کدار اَسی اوہناں کماں لئی یہوواہ دا شکریہ ادا کرنا بُھل جانے آں جیہڑے اوہ ساڈے لئی کردا اے۔ تے فیر کیہڑی چیز ساڈی مدد کر سکدی اے تاکہ اَسی یہوواہ دا شکریہ کرنا نہ بُھلئیے؟ اَسی اوہناں چیزاں دی اِک لسٹ بنا سکنے آں جنہاں بارے اَسی خاص طور تے دُعا کیتی سی تے اوہناں دے اَگے لکھ سکنے آں کہ یہوواہ نے ایہناں دُعاواں دا جواب کیویں دِتا اے۔ فیر اَسی ایہناں گلاں لئی دُعا چ یہوواہ دا شکریہ کر سکنے آں۔ (1-تھسلُنیکیوں 5:17، 18 نُوں پڑھو۔) ذرا سوچو کہ جدوں سانوں کوئی شکریہ کہندا اے تے سانوں کِنّی خوشی ہوندی اے۔ سانوں محسوس ہوندا اے کہ اوہ ساڈی قدر کردا اے۔ ایسے طرحاں جدوں اَسی یہوواہ نُوں ساڈیاں دُعاواں دا جواب دین لئی شکریہ کہنے آں تے اوہنوں بڑی خوشی ہوندی اے۔ (کُلسّیوں 3:15) پر یہوواہ دا شکریہ کرن دی اِک ہور خاص وجہ وی اے۔ آؤ ویکھئے کہ ایہہ وجہ کیہہ اے۔
یہوواہ دے پُتر لئی شکرگزار ہوو
10. 1-پطرس 2:21 دے مطابق سانوں ایس گل لئی یہوواہ دا شکریہ کیوں کرنا چاہی دا اے کہ اوہنے یسوع نُوں زمین تے گھلیا؟
10 1-پطرس 2:21 نُوں پڑھو۔ سانوں ایس گل لئی یہوواہ دا شکریہ کرنا چاہی دا اے کہ اوہنے اپنے پُتر نُوں زمین تے گھلیا۔ یسوع دی زندگی تے غور کرن نال اَسی یہوواہ بارے بوہت کجھ سکھنے آں نالے ایس بارے وی کہ اَسی اوہنوں خوش کیویں کر سکنے آں۔ یسوع دی قربانی تے ایمان ظاہر کرن نال اَسی یہوواہ دے دوست بن سکنے آں تے اوہدے نال صلح کر سکنے آں۔—رومیوں 5:1۔
11. سانوں یسوع دے وسیلے دُعا کیوں کرنی چاہی دی اے؟
11 اَسی یہوواہ دے بڑے شکرگزار آں کہ اَسی اوہدے کولوں دُعا کرسکنے آں۔ اوہ یسوع مسیح دے وسیلے ای ساڈیاں دُعاواں نُوں سُن دا اے تے سانوں اوہ سب کجھ دیندا اے جو اَسی یسوع دے ناں توں منگنے آں۔ یسوع نے کہیا: تُسی میرے ناں توں جو وی منگو گے، میں اوہ کراں گا تاکہ پُتر دے ذریعے باپ دی وڈیائی ہووے۔—یوحنا 14:13، 14۔
12. سانوں ہور کیس وجہ توں دُعا چ یسوع مسیح لئی یہوواہ دا شکر کرنا چاہی دا اے؟
12 یسوع مسیح دی قربانی دی وجہ توں ای یہوواہ ساڈے گناہواں نُوں معاف کردا اے۔ بائبل چ دَسیا گیا اے کہ یسوع ساڈا سب توں وڈا کاہن اے جیہڑا اسمان تے عظیم خدا دے تخت دے سجے پاسے بیٹھیا اے۔ (عبرانیوں 8:1) اوہ اسمانی باپ کول ساڈا مددگار اے۔ (1-یوحنا 2:1) اَسی یہوواہ دے بڑے شکرگزار آں کہ اوہنے سانوں ایہو جیہا وڈا کاہن دِتا اے جیہڑا ساڈیاں کمزوریاں نُوں سمجھدا اے تے ساڈے لئی اِلتجا کردا اے۔ (رومیوں 8:34؛ عبرانیوں 4:15) اَسی عیب دار آں، ایس لئی جے یسوع اپنی جان قربان نہ کردا تے اَسی کدی وی یہوواہ توں دُعا نہ منگ سکدے۔ اَسی یسوع مسیح لئی یہوواہ دے بڑے شکرگزار آں۔
اپنے ہمایماناں لئی دُعا کرو
13. اپنی موت توں پہلے والی رات یسوع نے اپنے شاگرداں لئی محبت کیوں ظاہر کیتی؟
13 اپنی موت توں پہلے والی رات یسوع کافی دیر تک اپنے شاگرداں لئی دُعا کردا رہیا۔ اوہنے دُعا چ یہوواہ نُوں کہیا کہ اوہ شیطان توں اوہناں دی حفاظت کرے۔ (یوحنا 17:15) اِنج کرن نال اوہنے ظاہر کیتا کہ اوہ اپنے شاگرداں نال بوہت پیار کردا سی۔ اوہ جان دا سی کہ بوہت چھیتی اوہدے تے اِک مشکل آن والی اے۔ پر فیر وی اوہ اپنے بارے نئیں سگوں اپنے شاگرداں بارے سوچ رہیا سی۔
اَسی اپنے ہمایماناں لئی دُعا کردے ویلے کیہڑیاں گلاں دا ذکر کر سکنے آں؟ (پیراگراف نمبر 14-16 نُوں ویکھو۔) *
14. اَسی کیویں ثابت کر سکنے آں کہ اَسی اپنے ہمایماناں نال محبت کرنے آں؟
14 یسوع مسیح وانگوں سانوں وی اپنے توں بوہتا دُوجیاں بارے سوچنا چاہی دا اے۔ سانوں باقاعدگی نال اپنے ہمایماناں لئی دُعا کرنی چاہی دی اے۔ اِنج کرن نال اَسی یسوع دے ایس حکم تے عمل کر رہے ہوواں گے کہ اِک دُوجے نال محبت کرو۔ تے یہوواہ وی ایہہ ویکھ رہیا ہوئے گا کہ سانوں اپنے بھین بھراواں نال کِنّی محبت اے۔ (یوحنا 13:34) جدوں اَسی اپنے ہمایماناں لئی دُعا کرنے آں تے ایہدے توں اوہناں نُوں بڑا فائدہ ہوندا اے۔ پاک کلام چ لکھیا اے کہ نیک بندے دی اِلتجا دا اثر بڑا زبردست ہوندا اے۔—یعقوب 5:16۔
15. سانوں اپنے ہم ایماناں لئی دُعا کیوں کرنی چاہی دی اے؟
15 سانوں ایس لئی اپنے ہمایماناں لئی دُعا کرنی چاہی دی اے کیونکہ اوہ بوہت ساریاں مشکلاں چوں لنگھ رہے نیں۔ اَسی یہوواہ خدا کولوں دُعا کرسکنے آں کہ اوہ ساڈے ہمایماناں دی مدد کرے تاکہ اوہ بیماری، قدرتی آفتاں، جنگاں، اذیت تے دُوجیاں مشکلاں دا سامنا کردے ویلے ہمت نہ ہارن۔ اَسی امدادی کماں چ حصہ لین والے بھین بھراواں لئی وی دُعا کر سکنے آں۔ ہو سکدا اے کہ تُسی کجھ ایہو جہے بھین بھراواں نُوں جان دے ہووو جیہڑے مشکلاں دا سامنا کر رہے نیں۔ تُسی اوہناں بھین بھراواں دا ناں لے کے اوہناں لئی دُعا کر سکدے او۔ جدوں اَسی یہوواہ کولوں دُعا کرنے آں کہ اوہ مشکلاں نُوں برداشت کرن چ ساڈے ہمایماناں دی مدد کرے تے اَسی ثابت کرنے آں کہ اَسی اوہناں نال سچی محبت کرنے آں۔
16. سانوں اوہناں بھراواں لئی دُعا کیوں کرنی چاہی دی اے جیہڑے ساڈی پیشوائی کردے نیں؟
16 کلیسیا چ پیشوائی کرن والے بھرا ایس گل دی بڑی قدر کردے نیں کہ دُوجے بھین بھرا اوہناں لئی دُعا کردے نیں تے ایہناں دُعاواں دا اوہناں نُوں بڑا فائدہ ہوندا اے۔ پولس رسول جان دا سی کہ اوہنوں دُوجیاں دی دُعاواں دی بڑی ضرورت اے۔ ایس لئی اوہنے کہیا: میرے لئی وی دُعا کرو کہ جدوں میں گل کراں تے میری زبان تے صحی لفظ آن تے میں دلیری نال خوش خبری دا مُقدس راز سُنا سکاں۔ (اِفسیوں 6:19) اَج وی بوہت سارے محنتی بھرا ساڈی پیشوائی کردے نیں۔ جدوں اَسی یہوواہ کولوں دُعا کرنے آں کہ اوہ ایہناں بھراواں دی مدد کرے تے اَسی ثابت کرنے آں کہ سانوں اوہناں نال محبت اے۔
دُوجیاں سامنے دُعا کردے ویلے
17، 18. سانوں کیہڑے موقعیاں تے دُعا کرن لئی کہیا جا سکدا اے تے اوہناں تے دُعا کردے ویلے سانوں کیہہ یاد رکھنا چاہی دا اے؟
17 کدی کدار سانوں دُوجیاں سامنے دُعا کرن لئی کہیا جا سکدا اے۔ مثال لئی شاید اِک بھین دُوجی بھین نُوں بائبل کورس دے شروع چ دُعا کرن لئی کہوے۔ ہو سکدا اے کہ اوہ دُوجی بھین بائبل کورس کرن والے نُوں اینی چنگی طرحاں نہ جاندی ہوئے۔ ایس لئی چنگا ہوئے گا کہ اوہ بائبل کورس دے آخر چ دُعا کرے۔ اِنج اوہنوں اندازہ ہوئے گا کہ اوہنوں دُعا چ طالبِعلم بارے کیہہ کہنا چاہی دا اے۔
18 شاید اِک بھرا نُوں عبادت چ یاں مُنادی دے گروپ چ دُعا کرن لئی کہیا جائے۔ جیہڑے بھراواں نُوں اِنج کرن لئی کہیا جاندا اے اوہناں نُوں یاد رکھنا چاہی دا اے کہ ایہناں موقعیاں دا مقصد کیہہ اے۔ اوہناں نُوں دُعا چ کوئی اعلان یاں کلیسیا دے بھین بھراواں دی درستی نئیں کرنی چاہی دی۔ عبادتاں چ گیت تے دُعا لئی عام طور تے 5 منٹ دِتے جاندے نیں۔ ایس لئی جیہڑے بھرا نُوں دُعا کرن لئی کہیا جاندا اے اوہنوں لمی دُعا نئیں کرنی چاہی دی خاص کر عبادت دے شروع چ۔—متی 6:7۔
دُعا نُوں اپنی زندگی چ اہمیت دَوو
19. کیہڑی چیز ساڈی مدد کرے گی تاکہ اَسی اوس دن لئی تیار رہیے جدوں یہوواہ عدالت کرے گا؟
19 اوہ دن نیڑے آ رہیا اے جدوں یہوواہ عدالت کرے گا۔ ایس لئی سانوں دُعا نُوں اپنی زندگی چ اہمیت دینی چاہی دی اے۔ ایس حوالے نال یسوع مسیح نے کہیا: ایس لئی چوکس رہوو تے ہر ویلے اِلتجا کردے رہوو تاکہ تُسی اوہناں ساریاں گلاں توں بچ سکو جیہڑیاں ضرور ہون گیاں۔ (لُوقا 21:36) جے اَسی دُعا کرن چ لگے رہواں گے تے ساڈا ایمان کمزور نئیں پوے گا تے اَسی عدالت دے دن لئی تیار رہواں گے۔
20. اَسی کیہہ کر سکنے آں تاکہ ساڈیاں دُعاواں خوشبو دار بخور وانگوں ہون؟
20 ایس مضمون چ اَسی سکھیا اے کہ سانوں دُعا کرن نُوں اِک بوہت وڈا اعزاز خیال کرنا چاہی دا اے۔ سانوں دُعا کردے ویلے سب توں پہلاں اوہناں گلاں دا ذکر کرنا چاہی دا اے جنہاں دا تعلق یہوواہ دے مقصد نال اے۔ سانوں دُعا چ یہوواہ دے پُتر تے اوہدی بادشاہی لئی شکرگزاری ظاہر کرن دے نال نال اپنے ہمایماناں لئی وی دُعا کرنی چاہی دی اے۔ اَسی دُعا چ یہوواہ کولوں ایہہ وی اِلتجا کرسکنے آں کہ اوہ ساڈیاں ضرورتاں نُوں پورا کرے تے ساڈی مدد کرے تاکہ اَسی اپنے ایمان نُوں مضبوط کر سکیے۔ جدوں اَسی ایس بارے پہلے توں سوچنے آں کہ اَسی دُعا چ کیہہ کہواں گے تے اَسی ثابت کرنے آں کہ اَسی دُعا کرن دے اعزاز دی بڑی قدر کرنے آں۔ اِنج ساڈیاں دُعاواں یہوواہ دے حضور خوشبودار بخور وانگوں ہون گیاں جنہاں توں اوہ خوش ہووے گا۔—امثال 15:8۔
گیت نمبر 46: یہوواہ تیرا شکر اے
^ اَسی ایس اعزاز لئی یہوواہ دے بڑے شکرگزار آں کہ اَسی اوہدے کولوں دُعا کر سکنے آں۔ اَسی چاہنے آں کہ ساڈیاں دُعاواں خوشبودار بخور وانگوں ہون یعنی کہ ایہناں توں یہوواہ خوش ہووے۔ ایس مضمون چ اَسی گل کراں گے کہ اَسی کیہڑیاں چیزاں لئی دُعا کر سکنے آں تے جدوں سانوں دُوجیاں سامنے دُعا کرن لئی کہیا جاندا اے تے سانوں کیہڑیاں گلاں دا خیال رکھنا چاہی دا اے۔
^ تصویراں دی وضاحت: اِک بھرا اپنی بیوی دے نال مِل کے اپنی دھی، اپنے وڈیرے ماں پیو دی صحت تے بائبل کورس کرن والی اِک عورت لئی دُعا کر رہیا اے۔
^ تصویراں دی وضاحت: اِک بھرا یسوع مسیح دی قربانی، خوبصورت زمین تے کھان پین دِیاں شیواں لئی یہوواہ دا شکریہ کر رہیا اے۔
^ تصویراں دی وضاحت: اِک بھین یہوواہ کولوں دُعا کر رہی اے کہ اوہ گورننگ باڈی دی تے اوہناں بھین بھراواں دی مدد کرے جیہڑے قدرتی آفتاں تے اذیت دا سامنا کر رہے نیں۔
