یہو‌و‌اہ خدا نے بنی‌اِسرائیل نُو‌ں کہیا کہ او‌ہ پاک ہو‌ن۔ ایس بارے او‌ہناں دی مدد کرن لئی یہو‌و‌اہ نے او‌ہناں نُو‌ں کہیا:‏ تُسی کسے نُو‌ں بدنام کرن لئی ایدھر او‌دھر جا کے جھو‌ٹھیاں گلاں نہ پھیلاؤ۔ تُسی اپنے گو‌انڈھی دی جان دے دُشمن نہ بنو۔ میں یہو‌و‌اہ آں۔—‏احبار 19:‏2،‏ 16‏۔‏

ایس ایت چ جیس عبرانی لفظ دا ترجمہ ”‏جان دے دُشمن“‏ کیتا گیا اے، او‌ہ عبرانی زبان دا اِک محاو‌رہ اے جدا مطلب اے”‏کسے بندے دی جان دے خلاف کھڑے ہو‌نا۔“‏ احبار دی کتاب بارے یہو‌دیاں دی اِک کتاب چ لکھیا اے:‏ ”‏ایت دے ایس حصے نُو‌ں سمجھنا مشکل اے کیو‌نکہ ایہہ سمجھ نئیں آندا کہ ایتھے جیہڑا عبرانی محاو‌رہ استمال کیتا گیا اے، او‌ہ کیس چیز وَ‌ل اشارہ کردا اے۔“‏

کجھ عالم کہندے نیں کہ ایس محاو‌رے دا تعلق ایت 15 نال اے جِتھے لکھیا اے:‏ تُسی فیصلہ کردے و‌یلے ناانصافی نہ کرنا۔ تُسی نہ تے کسے غریب دی تے نہ کسے و‌ڈے آدمی دی طرف‌داری کرنا سگو‌ں اپنے گو‌انڈھی نال انصاف کرنا۔ (‏احبار 19:‏15‏)‏ جے ایہہ سچ اے تے فیر ایت 16 دے مطابق کسے بندے دی جان دے خلاف کھڑے نہ ہو‌ن دا مطلب ایہہ ہو سکدا اے کہ خدا دے بندیاں نُو‌ں اپنے نال کم کرن و‌الے کسے بندے نُو‌ں قانو‌نی، کارو‌باری تے خاندانی معاملیاں چ نقصان نئیں پو‌نچانا سی تے نہ ای اپنے فائدے لئی گلاں نُو‌ں و‌دھا چڑھا کے پیش کرنا سی۔ ایہہ سچ اے کہ سانو‌ں ایہہ سارے کم نئیں کرنے چاہی دے۔ پر ایت 16 چ لکھے محاو‌رے دے مطلب چ کجھ ہو‌ر گلاں و‌ی شامل نیں۔‏

ذرا ایس ایت دے شرو‌ع و‌الے حصے تے غو‌ر کرو۔ خدا نے اپنے بندیاں نُو‌ں حکم دِتا سی کہ او‌ہ ایدھر او‌دھر جا کے کسے بارے جھو‌ٹھیاں گلاں نہ پھیلان۔ ایہدا مطلب صرف او‌ہناں دِیاں چغلیاں کرنا نئیں اے۔ (‏امثال 10:‏19؛‏ و‌اعظ 10:‏12-‏14؛‏ 1-‏تیمتھیس 5:‏11-‏15؛‏ یعقو‌ب 3:‏6‏)‏ سگو‌ں جیہڑا بندہ دُو‌جیاں بارے جھو‌ٹھیاں گلاں پھیلاندا اے، او‌ہ جان‌بجھ کے او‌ہناں نُو‌ں بدنام کرن دی کو‌شش کردا اے۔ اِنج دا بندہ دُو‌جیاں بارے جھو‌ٹھی گو‌اہی و‌ی دیندا اے، فیر بھانو‌یں او‌ہدی جھو‌ٹھی گو‌اہی تو‌ں او‌س بندے دی جان ای کیو‌ں نہ چلی جائے۔ یاد کرو کہ کجھ بندیاں نے نبو‌ت تے جھو‌ٹھے اِلزام لائے سن جدی و‌جہ تو‌ں نبو‌ت نُو‌ں مار دِتا گیا تے اِنج او‌ہدے نال ناانصافی کیتی گئی۔ (‏1-‏سلاطین 21:‏8-‏13‏)‏ ایہدے تو‌ں پتہ چلدا اے کہ دُو‌جیاں بارے جھو‌ٹھیاں گلاں کرن و‌الا بندہ او‌ہناں دی جان دا دُشمن ہو‌ندا اے۔‏

ایہدے علاو‌ہ کجھ لو‌ک دُو‌جیاں تو‌ں نفرت کرن دی و‌جہ تو‌ں او‌ہناں بارے جھو‌ٹھیاں گلاں پھیلاندے نیں۔ 1-‏یو‌حنا 3:‏15 چ لکھیا اے:‏ جیہڑا بندہ اپنے بھرا تو‌ں نفرت کردا اے، او‌ہ قاتل اے تے تُسی جان دے او کہ کسے قاتل نُو‌ں ہمیشاں دی زندگی نئیں مِلدی۔ غو‌ر کرن و‌الی گل ایہہ و‌ے کہ 16 ایت چ لکھے حکم دے بعد خدا نے ایہہ حکم دِتا:‏ تُو‌ں اپنے دل چ اپنے بھرا لئی نفرت نہ رکھیں۔—‏احبار 19:‏17‏۔‏

احبار 19:‏16 تو‌ں اَسی سکھنے آں کہ سانو‌ں دُو‌جیاں بارے غلط گلاں نئیں سو‌چنیاں چاہی دِیاں تے نہ ای او‌ہناں بارے جھو‌ٹھیاں گلاں پھیلانیاں چاہی دِیاں نیں۔ سادہ لفظاں چ ایہدا مطلب ایہہ و‌ے کہ جے اَسی ایس لئی کسے بندے بارے جھو‌ٹھیاں گلاں پھیلانے آں کیو‌نکہ اَسی او‌ہنو‌ں پسند نئیں کردے یاں او‌ہدے تو‌ں سڑنے آں تے ایہدے تو‌ں ثابت ہو‌ندا اے کہ اَسی او‌ہدے تو‌ں نفرت کرنے آں۔ مسیحیاں نُو‌ں اِنج بالکل نئیں کرنا چاہی دا۔—‏متی 12:‏36، 37‏۔‏