مطالعے دا مضمون نمبر 50
تُوں میرے نال فردوس چ ہوئیں گا
میں اَج تیرے نال وعدہ کرنا واں کہ توں میرے نال فردوس چ ہوئیں گا۔—لُوقا 23:43۔
گیت نمبر 145: نوِیں دُنیا دا وعدہ
مضمون تے اِک نظر a
1. اپنی موت توں کجھ دیر پہلاں یسوع نے اوس مُجرم نُوں کیہہ کہیا سی جنہوں اوہدے نال سُولی دِتی گئی سی؟ (لُوقا 23:39-43)
یسوع دے نال دو مُجرماں نُوں وی سُولی دِتی گئی سی۔ یسوع تے اوہ مُجرم بڑی تکلیف چ سن۔ (لُوقا 23:32، 33) اوہ دونویں مُجرم یسوع نُوں بُرا بھلا کہہ رہے سن جدے توں پتہ چلدا اے کہ اوہ اوہدے شاگرد نئیں سن۔ (متی 27:44؛ مرقس 15:32) پر فیر اوہناں وچوں اِک دی سوچ بدل گئی۔ اوہنے یسوع نُوں کہیا: یسوع، جدوں توں بادشاہ بن جائیں گا تے مینوں یاد کرِیں۔ یسوع نے اوہنوں کہیا: میں اَج تیرے نال وعدہ کرنا واں کہ توں میرے نال فردوس چ ہوئیں گا۔ (لُوقا 23:39-43 نُوں پڑھو۔) بائبل چ سانوں کِتے وی ایس گل دا ثبوت نئیں مِلدا کہ اوس مُجرم نے اسمان دی بادشاہی دے پیغام نُوں قبول کر لیا سی جدی یسوع مُنادی کردا سی۔ (متی 4:17) تے یسوع نے وی ایہہ کدی نئیں کہیا سی کہ اوہ آدمی اسمان دی بادشاہی چ ہوئے گا۔ یسوع مسیح اوہدے نال مستقبل چ زمین تے فردوس چ رہن دی گل کر رہیا سی۔ اَسی ایہہ کیوں کہہ سکنے آں؟
سُولی تے جیہڑے مُجرم نے یسوع نال گل کیتی، اوہ کیہڑیاں گلاں جان دا سی تے سانوں اوہدے بارے ہور کیہہ پتہ چلدا اے؟ (پیراگراف نمبر 2، 3 نُوں ویکھو۔)
2. کیہڑی گل توں پتہ چلدا اے کہ توبہ کرن والا مُجرم شاید یہودی سی؟
2 توبہ کرن والا مُجرم شاید اِک یہودی سی۔ اوس مُجرم نے دُوجے مُجرم نُوں کہیا: کیہہ تینوں خدا دا کوئی ڈر نئیں؟ جد کے تینوں وی اوہی سزا مِلی اے جیہڑی ایس بندے نُوں مِلی اے۔ (لُوقا 23:40) یہودی صرف اِک خدا دی عبادت کر دے سن۔ پر دُوجیاں قوماں دے لوک بوہت سارے خداواں نُوں من دے سن۔ (خروج 20:2، 3؛ 1-کُرنتھیوں 8:5، 6) جے ایہہ مُجرم دُوجیاں قوماں دے ہوندے تے توبہ کرن والا مُجرم ایہہ سوال پچھدا کیہہ تینوں خداواں دا کوئی ڈر نئیں؟ ایہدے علاوہ یسوع مسیح نُوں اِسرائیل دے گھرانے دِیاں گواچیاں ہوئیاں بھیڈاں دے کول بھیجیا گیا سی، دُوجیاں قوماں کول نئیں۔ (متی 15:24) خدا نے بنیاِسرائیل نُوں دَسیا سی کہ اوہ مُردیاں نُوں زندہ کر دے گا۔ توبہ کرن والا مُجرم یقیناً ایس گل بارے جان دا ہوئے گا۔ اوہدی گل توں ظاہر ہوندا اے کہ اوہنے سوچیا ہوئے گا کہ یہوواہ یسوع نُوں مُردیاں چوں زندہ کر دَوے گا تے اوہنوں اپنی بادشاہی دا بادشاہ بنائے گا۔ لگدا اے کہ اوہنوں ایہہ امید وی سی کہ خدا اوہنوں وی زندہ کر دَوے گا۔
3. جدوں یسوع نے فردوس دا ذکر کیتا تے توبہ کرن والے مُجرم دے ذہن چ شاید کیہڑی گل آئی ہوئے گی؟ (پیدایش 2:15)
3 یہودی ہون دی وجہ توں توبہ کرن والے مُجرم نُوں آدم تے حوا بارے پتہ ہوئے گا تے اوس فردوس بارے وی پتہ ہوئے گا جدے چ یہوواہ نے اوہناں نُوں رکھیا سی۔ ایس لئی جدوں یسوع نے فردوس دا ذکر کیتا تے شاید اوس مُجرم دے ذہن چ زمین تے اِک خوب صورت باغ دی تصویر آئی ہوئے گی۔—پیدایش 2:15 نُوں پڑھو۔
4. یسوع نے توبہ کرن والے مُجرم نُوں جو کجھ کہیا، اوہدے توں سانوں کیہہ سو چن دا موقع مِلدا اے؟
4 یسوع نے توبہ کرن والے مُجرم نُوں جو کجھ کہیا، اوہدے توں اَسی ایہہ سوچ سکنے آں کہ فردوس چ زندگی کیہو جہی ہوئے گی۔ اصل چ سانوں بادشاہ سلیمان دی حکومت توں وی فردوس بارے بوہت کجھ پتہ چل سکدا اے۔ اوہدی حکومت چ وی بڑا امن سی۔ یسوع تے سلیمان نالوں وی وڈا اے، ایس لئی اَسی توقع کر سکنے آں کہ یسوع اپنے نال حکمرانی کرن والیاں دے نال مِل کے ایس زمین نُوں اِک شاندار فردوس بنا دے گا۔ (متی 12:42) یقیناً یسوع دِیاں ہور بھیڈاں ایہہ جاننا چاہندیاں نیں کہ اوہناں نُوں ہُن کیہہ کرن دی لوڑ اے تاکہ اوہ فردوس چ ہمیشاں دی زندگی پان دے لائق بن سکن۔—یوحنا 10:16۔
فردوس چ زندگی کیہو جہی ہوئے گی؟
5. تواڈے خیال چ فردوس چ زندگی کیہو جہی ہوئے گی؟
5 جدوں تُسی سوچدے او کہ تُسی فردوس چ او تے تواڈے ذہن چ کیہڑیاں کیہڑیاں گلاں آندیاں نیں؟ شاید تواڈے ذہن چ اِک خوب صورت باغ آئے جیویں کہ باغ عدن سی۔ (پیدایش 2:7-9) شاید تواڈے ذہن چ میکاہ نبی دی اِک پیشینگوئی آئے کہ خدا دے بندے اپنی تاک تے اپنے اِنجیر دے درخت تھلے بیہن گے۔ (میکاہ 4:3، 4) شاید تُسی بائبل دِیاں اوہناں ایتاں نُوں یاد کرو جنہاں چ دَسیا گیا اے کہ اوتھے کھان پین دِیاں بوہت ساریاں شیواں ہون گیاں۔ (زبور 72:16؛ یسعیاہ 65:21، 22) جدوں تُسی فردوس چ زندگی بارے سوچ دے او تے شاید تُسی ایہہ سوچو کہ تُسی اِک خوب صورت باغ چ او تے اوتھے مزے مزے دِیاں چیزاں کھا رہے او۔ پُھلاں تے بوٹیاں دی خوشبو ہوا چ پھیلی ہوئی اے تے تواڈے گھر والے تے دوست جنہاں چ مُردیاں چوں زندہ ہون والے تواڈے عزیز وی شامل نیں، ہس کھیڈ رہے نیں تے خوشی نال اِک دُوجے نال وقت گزار رہے نیں۔ ایہہ سب کجھ کوئی خواب نئیں اے۔ زمین فردوس ضرور بنے گی تے ایہہ ساریاں گلاں وی ضرور ہون گیاں۔ پر فردوس چ اَسی اِک ہور کم وی کراں گے جنہوں کرن چ سانوں بڑا مزا آئے گا۔
نوِیں دُنیا چ ساڈے کول زندہ ہون والے لوکاں نُوں تلیم دین دا خاص کم ہوئے گا۔ (پیراگراف نمبر 6 نُوں ویکھو۔)
6. اَسی فردوس چ کیہہ کراں گے؟ (تصویر نُوں ویکھو۔)
6 یہوواہ نے سانوں بنایا ای اِنج اے کہ سانوں کم کرن توں خوشی ملے۔ (واعظ 2:24) اَسی خاص طور تے یسوع دی ہزار سالہ حکمرانی چ بڑے مصروف رہواں گے۔ وڈی مصیبت چوں بچن والیاں نُوں تے اوہناں لکھاں لوکاں نُوں جیہڑے مُردیاں چوں زندہ ہون گے، کپڑیاں تے کھان پین دِیاں چیزاں دی لوڑ ہوئے گی تے رہن لئی جگہ وی چاہی دی ہوئے گی۔ ایہناں ساریاں چیزاں دا اِنتظام کرن لئی سانوں بڑا کم کرنا پئے گا۔ جیویں آدم تے حوا نُوں ذمےداری دِتی گئی سی کہ اوہ پوری زمین نُوں فردوس بنا دین، اوسے طرحاں سانوں وی زمین نُوں فردوس بنان دا اعزاز ملے گا۔ ذرا ایہہ وی سوچو کہ سانوں زندہ ہون والے اوہناں لکھاں لوکاں نُوں تلیم دین دا کِنّاں مزا آئے گا جیہڑے یہوواہ تے اوہدے مقصد بارے کجھ نئیں جان دے۔ نالے سانوں یہوواہ دے اوہناں بندیاں نُوں وی ہور تلیم دے کے خوشی ملے گی جیہڑے یسوع دے زمانے توں پہلاں فوت ہو گئے سن۔
7. اَسی کیہڑی گل دا یقین رکھ سکنے آں تے کیوں؟
7 اَسی ایس گل دا یقین رکھ سکنے آں کہ فردوس چ ہر پاسے امن تے صلح ہوئے گی۔ ساڈے کول ضرورت دی ہر چیز ہوئے گی تے سارے کم بڑے سلیقے نال ہون گے۔ اَسی ایہہ کیوں کہہ سکنے آں؟ کیونکہ یہوواہ نے سانوں پہلاں توں ای ایہدی جھلک وکھا دِتی اے کہ اوہدے پُتر دی حکمرانی چ زندگی کیہو جہی ہوئے گی۔ ایہہ گل سانوں بائبل چ بادشاہ سلیمان دی حکمرانی بارے پڑھ کے پتہ چلدی اے۔
بادشاہ سلیمان دی حکمرانی—فردوس دی اِک جھلک
8. زبور 37:10، 11، 29 چ داؤد نے جیہڑی گل لکھی، اوہ بعد چ کیویں پوری ہوئی؟ (ایس شمارے چ مضمون ”اہم سوال“ نُوں وی ویکھو۔)
8 بادشاہ داؤد نے یہوواہ دی پاک روح دی رہنمائی چ دَسیا کہ اوس ویلے زندگی کیہو جہی ہوئے گی جدوں سمجھدار تے خدا دا وفادار بادشاہ تخت تے بیٹھے گا۔ (زبور 37:10، 11، 29 نُوں پڑھو۔) جدوں اَسی لوکاں نال فردوس بارے گل کرنے آں تے اَسی اکثر اوہناں نُوں زبور 37:11 پڑھ کے سُنانے آں تے اِنج کرنا صحی وی اے کیونکہ یسوع نے آپ دَسیا سی کہ ایہہ گل مستقبل چ پوری ہوئے گی۔ (متی 5:5) پر داؤد دی گل توں ایہہ وی پتہ چلدا اے کہ بادشاہ سلیمان دی حکومت چ زندگی کیہو جہی ہونی سی۔ جدوں بادشاہ سلیمان نے اِسرائیل یعنی اوس ملک چ حکمرانی شروع کیتی جدے چ دودھ تے شہد وگدا سی تے ہر پاسے امن تے خوشحالی رہی۔ خدا نے بنیاِسرائیل نُوں کہیا سی: جے تُسی میری شریعت تے چلو تے میں ملک چ امن بخشاں گا۔ تُسی آرام نال لیٹو گے کیونکہ توانوں کسے خطرے توں ڈرن دی لوڑ نئیں ہوئے گی۔ (احبار 20:24؛ 26:3، 6) خدا دے ایہہ وعدے سلیمان دی حکمرانی چ پورے ہوئے۔ (1-تواریخ 22:9؛ 29:26-28) خدا نے ایہہ وعدہ وی کیتا سی کہ بھیڑے لوک ختم ہو جان گے۔ (زبور 37:10) زبور 37:10، 11، 29 چ جیہڑی گل لکھی اے، اوہ پرانے زمانے چ وی پوری ہوئی تے مستقبل چ وی پوری ہوئے گی۔
9. سبا دی ملکہ نے بادشاہ سلیمان دی حکمرانی بارے کیہہ کہیا؟
9 بادشاہ سلیمان دی حکومت چ جیہڑا امن تے خوشحالی سی، اوہدے بارے خبراں سبا دی ملکہ تک پونچیاں۔ اوہ بڑی دُوروں یروشلیم آئی تاکہ اپنیاں اَکھاں نال اوہ گلاں ویکھ سکے جیہڑیاں اوہنے سُنیاں سن۔ (1-سلاطین 10:1) سلیمان دی بادشاہی نُوں اپنیاں اَکھاں نال ویکھن توں بعد اوہنے کہیا: مینوں تے تیرے بارے اَدھیاں گلاں وی نئیں دَسیاں گئیاں سن۔ خوش نیں تیرے لوک تے خوش نیں تیرے نوکر جیہڑے ہر ویلے تیرے سامنے کھلوتے رہندے نیں تے تیریاں حکمت دِیاں گلاں سُن دے نیں۔ (1-سلاطین 10:6-8) پر سلیمان دی حکومت چ جیہو جہے حالات سن، اوہ تے بس اوہناں کماں دی اِک جھلک نیں جیہڑے انساناں لئی یہوواہ اوس ویلے کرے گا جدوں زمین تے یسوع دی حکمرانی ہوئے گی۔
10. یسوع مسیح کیس لحاظ نال سلیمان توں وڈا اے؟
10 یسوع مسیح ہر لحاظ نال سلیمان توں وڈا اے۔ سلیمان اِک گُناہگار انسان سی جنہے وڈیاں وڈیاں غلطیاں کیتیاں تے جنہاں دی وجہ توں خدا دے بندیاں نُوں بڑیاں مشکلاں سہنیاں پئیاں۔ پر یسوع مسیح گناہ توں پاک حکمران اے تے اوہ غلطی کر ای نئیں سکدا۔ (لُوقا 1:32؛ عبرانیوں 4:14، 15) یسوع مسیح شیطان وَلّوں آن والیاں سخت ازمیشاں چ وی یہوواہ دا وفادار رہیا۔ اوہنے ثابت کیتا کہ اوہ کدی گُناہ یاں کوئی ایہو جیہا کم نئیں کر سکدا جدے توں اوہدی رعایا نُوں نقصان پونچے۔ ساڈے لئی یسوع مسیح توں بہتر بادشاہ کوئی ہور نئیں ہو سکدا تے ایہو جہے بادشاہ دی رعایا بننا ساڈے لئی بڑے مان دی گل اے۔
11. حکمرانی کرن چ یسوع دی مدد کون کرن گے؟
11 یسوع دے نال 1 لکھ 44 ہزار لوک مِل کے حکمرانی کرن گے تے اوہ انساناں دا خیال رکھن تے زمین لئی یہوواہ دا مقصد پورا کرن چ یسوع دا ساتھ دین گے۔ (مکاشفہ 14:1-3) ایہناں 1 لکھ 44 ہزار مرداں تے عورتاں نے زمین تے رہندے ہوئیاں بڑیاں مشکلاں برداشت کیتیاں نیں۔ ایس لئی اوہ ایہو جہے حکمران ثابت ہون گے جیہڑے ساڈے درد نُوں سمجھ سکن گے۔ پر مسیح دے نال حکمرانی کرن والے ایہہ لوک خاص طور تے کیہہ کرن گے؟
یہوواہ 1لکھ 44 ہزار لوکاں نُوں کیہڑا کم دَوے گا؟
12. یہوواہ 1لکھ 44 ہزار لوکاں نُوں کیہڑا کم دَوے گا؟
12 یسوع تے اوہدے نال حکمرانی کرن والے لوکاں نُوں جیہڑا کم دِتا جائے گا، اوہ اوس کم توں کِتے زیادہ وڈا ہوئے گا جیہڑا سلیمان نُوں دِتا گیا سی۔ بنیاِسرائیل دے اوس بادشاہ نے صرف اِک ای ملک دے لکھاں لوکاں دی دیکھبھال کرنی سی۔ پر خدا دی بادشاہی چ حکمرانی کرن والیاں نُوں پوری زمین تے کروڑاں لوکاں دی دیکھ بھال کرنی پووے گی۔ بےشک یہوواہ خدا نے 1لکھ 44 ہزار لوکاں نُوں بڑا ای وڈا اعزاز دِتا اے۔
13. یسوع دے نال حکمرانی کرن والیاں دی ذمےداری چ کیہڑا خاص کم شامل ہوئے گا؟
13 یسوع مسیح وانگوں 1لکھ 44 ہزار وی بادشاہ تے کاہن ہون گے۔ (مکاشفہ 5:10) شریعت چ کاہناں نُوں خاص طور تے ایہہ ذمےداری دِتی گئی سی کہ اوہ لوکاں نُوں جسمانی طور تے محفوظ رکھن دے نال نال ایس گل دا وی خیال رکھن کہ اوہ لوک یہوواہ دے نیڑے رہن۔ شریعت تے آن والیاں چیزاں دا پرچھانواں سی۔ ایس لئی اَسی کہہ سکنے آں کہ یسوع دے نال حکمرانی کرن والیاں نُوں ایہہ خاص ذ مےداری ملی اے کہ اوہ ایس گل دا خیال رکھن کہ خدا دے بندیاں دی صحت چنگی رہوے تے اوہ یہوواہ دے نیڑے رہن۔ (عبرانیوں 10:1) ایہہ تے سانوں اوس ویلے ای پتہ چلے گا کہ ایہہ کاہن تے بادشاہ زمین تے اپنی رعایا نال کیویں گل بات کرن گے۔ یہوواہ ایس بارے بھانویں کوئی وی بندوبست کرے، اَسی ایس گل تے یقین رکھ سکنے آں کہ فردوس چ رہن والیاں نُوں اوہ رہنمائی ضرور ملے گی جدی اوہناں نُوں ضرورت ہوئے گی۔—مکاشفہ 21:3، 4۔
مسیح دِیاں ہور وی بھیڈاں نُوں فردوس چ زندگی پان دے لائق بنن لئی کیہہ کرنا پووے گا؟
14. مسیح دِیاں ہور وی بھیڈاں تے مسیح دے بھراواں چ کیہہ رشتہ اے؟
14 یسوع نے اوہناں لوکاں نُوں چھوٹا گلہ کہیا جیہڑے اوہدے نال مِل کے حکمرانی کرن گے۔ (لُوقا 12:32) یسوع نے اِک ہور گروہ بارے وی دَسیا جنہوں اوہنے ہور وی بھیڈاں کہیا۔ چھوٹا گلہ تے ہور وی بھیڈاں مِل کے اِک گلہ بن جان گے۔ (یوحنا 10:16) ایہہ دونویں گروہ ہُن وی مِل کے کم کر رہے نیں تے ایہہ اوس ویلے وی مِل کے کم کردے رہن گے جدوں زمین فردوس بن جائے گی۔ پر ظاہری گل اے اوہدوں تک چھوٹا گلہ اسمان تے ہوئے گا تے ہور وی بھیڈاں چ شامل لوکاں کول زمین تے ہمیشاں تک زندہ رہن دی امید ہوئے گی۔ پر ہور وی بھیڈاں نُوں ہُن توں ای کیہڑے کم کرنے چاہی دے نیں جنہاں توں اوہ فردوس چ زندگی پان دے لائق بن سکن؟
اَسی ہُن توں ای ایہہ ثابت کر سکنے آں کہ اَسی فردوس چ رہن لئی تیار آں۔ (پیراگراف نمبر 15 نُوں ویکھو۔) b
15. (الف) ہور وی بھیڈاں مسیح دے بھراواں دا ساتھ کیویں دیندیاں نیں؟ (ب) تُسی اوس بھرا دی مثال تے کیویں عمل کر سکدے او جیہڑا میڈیکل سٹور چ کھلوتا ہویا اے؟ (تصویر نُوں ویکھو۔)
15 سُولی تے جیہڑے مُجرم نے اپنی سوچ نُوں بدل لیا سی، اوہ ایہہ ثابت کرن توں پہلاں ای فوت ہو گیا کہ اوہ یسوع دا بڑا شکرگزار اے۔ پر مسیح دِیاں ہور وی بھیڈاں دے طور تے ساڈے کول ایہہ ثابت کرن دے بوہت سارے موقعے نیں کہ اَسی یسوع دے کِنّے شکر گزار آں۔ مثال لئی، اَسی جیویں یسوع دے بھراواں نال پیش آنے آں اوہدے توں اَسی ایہہ ثابت کرنے آں کہ اَسی یسوع نال کِنّاں پیار کرنے آں۔ یسوع نے کہیا سی کہ اوہ ایس گل دی بنیاد تے بھیڈاں دی عدالت کرے گا۔ (متی 25:31-40) اَسی ودھچڑھ کے مُنادی کرن تے شاگرد بنان دے کم چ حصہ لین نال مسیح دے بھراواں دی حمایت کر سکنے آں۔ (متی 28:18-20) اِنج کرن لئی سانوں تلیم دین دے اوزاراں نُوں چنگی طرحاں استمال کرنا چاہی دا اے، جیویں کہ کتاب ”خوشیاں بھری زندگی پاؤ“۔ جے تُسی حالے تک کسے بندے نُوں بائبل کورس نئیں کرا رہے تے کیوں نہ ایہہ منصوبہ بناؤ کہ تُسی زیادہ توں زیادہ لوکاں نُوں بائبل کورس کرن دی دعوت دَوو گے۔
16. اَسی ہُن کیہہ کر سکنے آں تاکہ اَسی خدا دی بادشاہی دی رعایا چ شامل ہو سکئے؟
16 سانوں اِک ایہو جیہا انسان بننا چاہی دا اے جنہوں یہوواہ پسند کردا اے۔ ایہو جیہا انسان بنن لئی سانوں اوس ویلے دا اِنتظار کرن دی ضرورت نئیں اے جدوں اَسی فردوس چ ہوواں گے۔ اَسی ہُن توں اِک ایماندار انسان بنن دی کوشش کر سکنے آں۔ نالے اپنیاں گلاں تے کماں توں یہوواہ خدا، اپنے جیون ساتھی تے اپنے ہمایماناں لئی وفاداری ظاہر کر سکنے آں۔ اَسی ایس بھیڑی دُنیا چ رہندے ہوئیاں جِنّاں زیادہ یہوواہ دے معیاراں مطابق زندگی گزارن دی کوشش کراں گے، اوناں زیادہ ساڈے لئی فردوس چ ایہناں اصولاں تے عمل کرنا اسان ہوئے گا۔ ایہدے علاوہ اَسی کجھ ہنر سکھ سکنے آں تے اپنے اندر ہور خوبیاں پیدا کر سکنے آں تاکہ اَسی ثابت کر سکئے کہ اَسی فردوس چ رہن لئی تیار آں۔ ایس بارے ایس شمارے چ مضمون ”کیہہ تُسی زمین دے وارث بنن لئی تیار او؟“ نُوں ویکھو۔
17. کیہہ سانوں اپنے اوہناں گُناہواں دی وجہ توں بےحوصلہ ہو جانا چاہی دا اے جیہڑے اَسی ماضی چ کیتے سن؟ وضاحت کرو۔
17 سانوں پوری کوشش کرنی چاہی دی کہ اَسی اپنے آپ نُوں اوہناں گُناہواں دی وجہ توں کوس دے نہ رہیے جیہڑے اَسی ماضی چ کیتے سن۔ ایہہ گل سچ اے کہ سانوں مسیح دی قربانی نُوں وار وار جانبجھ کے گُناہ کرن دا بہانہ نئیں بنانا چاہی دا۔ (عبرانیوں 10:26-31) پر سانوں ایس گل تے پورا یقین اے کہ جے اَسی اپنے گُناہواں توں دلوں توبہ کر لئی اے، یہوواہ تے بزرگاں کولوں مدد لئی اے تے اپنے چال چلن نُوں بدل لیا اے تے فیر یہوواہ نے سانوں پوری طرحاں معاف کر دِتا اے۔ (یسعیاہ 55:7؛ اعمال 3:19) یاد کرو کہ یسوع نے اِک فریسی نُوں کہیا سی: میں نیک لوکاں نُوں نئیں سگوں گُناہگاراں نُوں بلان آیا واں۔ (متی 9:13) یسوع دے فدیے چ اینی طاقت اے کہ اوہ ساڈے سارے گُناہواں نُوں ڈھک سکدا اے۔
تُسی ہمیشاں تک فردوس چ زندہ رہ سکدے او
18. نوِیں دُنیا چ تُسی اوس مُجرم کولوں کیہڑیاں گلاں پچھنا چاہوو گے جنہوں یسوع دے نال سُولی دِتی گئی سی؟
18 ذرا تصور کرو کہ تُسی نوِیں دُنیا چ او تے اوس بندے نال گل کر رہے او جنہوں یسوع نال سُولی دِتی گئی سی۔ بے شک تُسی دونویں ای یسوع دی قربانی لئی بڑے شکرگزار او تے تُسی ایہدے بارے گل کر رہے او۔ شاید تُسی اوہنوں کہوو کہ اوہ یسوع دی زندگی دے آخری کجھ گھنٹیاں بارے توانوں دَسے۔ نالے ایہہ وی دَسے کہ اوہدوں اوہنوں کیہو جیہا لگیا جدوں یسوع نے اوہدی ایس گل دا جواب دِتا کہ اوہ اوہنوں اپنی بادشاہی چ یاد کرے۔ ہو سکدا اے کہ اوہ تواڈے کولوں پچھے کہ شیطان دی دُنیا دے آخری زمانے چ زندگی کیہو جہی سی۔ واقعی ایہو جہے لوکاں نُوں خدا دے کلام چوں تلیم دینا بڑے مان دی گل ہوئے گی۔—اِفسیوں 4:22-24۔
یسوع دی ہزار سالہ حکمرانی دے دوران اِک بھرا بڑی خوشی نال اپنی اوس صلاحیت نُوں نکھار رہیا اے جنہوں نکھارن بارے اوہنے سوچیا ہویا سی۔ (پیراگراف نمبر 19 نُوں ویکھو۔)
19. فردوس چ زندگی گزاردے ویلے اَسی بور کیوں نئیں ہوواں گے؟ (پہلے صفحے دی تصویر نُوں ویکھو۔)
19 فردوس چ اَسی بالکل وی بور نئیں ہوواں گے۔ اَسی ہمیشاں نویں نویں لوکاں نُوں مِلدے رہواں گے تے ساڈے کول بوہت سارا کم ہوئے گا۔ سب توں ودھیا گل تے ایہہ ہوئے گی کہ اَسی ہر دن اپنے اسمانی باپ نُوں ہور چنگی طرحاں جان سکاں گے تے اوہناں نعمتاں توں خوشی حاصل کر سکاں گے جیہڑیاں اوہ سانوں دَوے گا۔ اَسی ہمیشاں یہوواہ تے اوہدی تخلیق بارے نوِیاں نوِیاں گلاں سکھدے رہواں گے۔ جیویں جیویں وقت لنگھ دا جائے گا یہوواہ لئی ساڈی محبت ودھدی جائے گی۔ اَسی یہوواہ تے یسوع دے ایس وعدے لئی بڑے شکرگزار آں کہ اَسی فردوس چ ہمیشاں تک زندہ رہ سکنے آں۔
گیت نمبر 146: ”میں سب کجھ نواں بنا دَواں گا“
a کیہہ تواڈے ذہن چ اکثر ایہہ خیال آندا اے کہ فردوس چ زندگی کیہو جہی ہوئے گی؟ ایہدے بارے سوچن نال توانوں بڑا حوصلہ ملے گا۔ یہوواہ نے ساڈے لئی بوہت کجھ کرن دا سوچیا ہویا اے۔ جِنّاں زیادہ اَسی ایس گل بارے سوچنے آں اوناں ای زیادہ جوش نال اَسی دُوجیاں نُوں نوِیں دُنیا بارے تلیم دینے آں۔ ایس مضمون تے غور کرن نال یسوع دے اوس وعدے تے ساڈا ایمان مضبوط ہوئے گا جیہڑا اوہنے فردوس بارے کیتا سی۔
b تصویر دی وضاحت: اِک بھرا جیہڑا نوِیں دُنیا چ زندہ ہون والے لوکاں نُوں تلیم دینا چاہندا اے اوہ حالے توں ای لوکاں نُوں تلیم دے رہیا اے۔
