کیہہ تُسی زمین دے وارث بنن لئی تیار او؟
اَسی اوس ویلے دا بےصبری نال اِنتظار کر رہے آں جدوں یسوع دا ایہہ وعدہ پورا ہوئے گا: خوش نیں اوہ جیہڑے نرممزاج نیں کیونکہ اوہ زمین دے وارث ہون گے۔ (متی 5:5) مسحشُدہ مسیحی اوہدوں زمین دے وارث بنن گے جدوں اوہ بادشاہواں دے طور تے یسوع نال مل کے اسمان توں زمین تے حکومت کرن گے۔ (مکاشفہ 5:10؛ 20:6) پر زیادہتر مسیحی اوس ویلے زمین دے وارث ہون گے جدوں اوہ اِک بےعیب انسان دے طور تے ایہدے تے خوشیاں بھری زندگی گزارن گے۔ پر ایہہ اوہدوں ممکن ہوئے گا جدوں اَسی کجھ اہم کم کراں گے۔ ایہناں وچوں تِن کم ایہہ نیں: اَسی زمین نُوں فردوس بنان چ مدد کراں گے، اَسی مُردیاں چوں زندہ ہون والیاں دِیاں ضرورتاں دا خیال رکھاں گے تے اوہناں نُوں تلیم دَواں گے۔ سوچو کہ تُسی ہُن توں ای ایہہ کیویں ظاہر کر سکدے او کہ تُسی نوِیں دُنیا چ ایہہ سارے کم کرن دی خواہش رکھدے او۔
کیہہ تُسی زمین تے اِختیار رکھن لئی تیار او؟
جدوں یہوواہ نے انساناں نُوں حکم دِتا کہ اوہ زمین نُوں بھر دین تے ایہدے تے اِختیار رکھن تے ایہدا مطلب ایہہ سی کہ پوری زمین نے آخر کار فردوس بن جانا سی۔ (پیدائش 1:28) جیہڑے لوک زمین تے ہمیشاں دی زندگی حاصل کرن گے اوہ ایس حکم مطابق کم کرن دا اِنتظار کر رہے نیں۔ اوہناں نُوں فردوس بنیا بنایا نئیں مِل جائے گا کیونکہ زمین تے باغ عدن موجود نئیں اے۔ ہرمجِدّون دی جنگ توں بعد سانوں زمین نُوں صاف کرن لئی بوہت سارا کم کرنا ہوئے گا کیونکہ انساناں نیں ایہنوں بڑی حد تک تباہ کر دِتا اے۔ ایس لئی زمین نُوں فردوس بنانا کوئی سوکھا کم نئیں ہوئے گا۔
ایہدے توں سانوں اوہ کم یاد آندا اے جیہڑا بنیاِسرائیل نے اوس ویلے کیتا سی جدوں اوہ بابل توں اپنے ملک واپس آئے سن۔ اوہناں دا ملک 70 سالاں توں ویران تے اُجاڑ پیا ہویا سی۔ پر یسعیاہ نبی نے پیشینگوئی کیتی سی کہ یہوواہ دی مدد نال اوہ ایہنوں دُبارہ توں پہلاں ورگا بنا دین گے۔ اوہنے ایہہ پیشینگوئی کیتی سی:اوہ اوہدے اُجاڑ نُوں عدن ورگا تے اوہدے ریگستان نُوں یہوواہ دے باغ ورگا بنا دوے گا۔ (یسعیاہ 51:3) بنیاِسرائیل اِنج کرن چ کامیاب ہوئے۔ بنیاِسرائیل وانگوں یہوواہ اوہناں لوکاں دی وی مدد کرے گا جیہڑے زمین دے وارث ہون گے تے ایہدے تے اِختیار رکھن گے۔ تُسی ہن توں ای ایہہ ثابت کر سکدے او کہ تُسی ایس کم چ حصہ لینا چاہندے او۔
اِنج کرن دا اِک طریقہ ایہہ وے کہ تُسی پوری کوشش کرو کہ اپنے گھر نُوں تے آلے دوالے دی جگہ نُوں صاف رکھو۔ اوہدوں وی اِنج کرو جدوں تواڈے گوانڈھی اِنج نئیں کردے۔ ایہدے علاوہ تُسی اپنی عبادتگاہ تے کنونشن لئی استمال ہون والے ہال دی صفائی ستھرائی تے مرمت دے کم چ حصہ لے سکدے او۔ جے تواڈے لئی ممکن اے تے تُسی ایہہ درخاست وی دے سکدے او کہ تُسی اوہدوں امدادی کماں چ حصہ لینا چاہندے او جدوں تواڈے علاقے چ کوئی قدرتی آفت آندی اے۔ اِنج تُسی ثابت کرو گے کہ تُسی مشکل وقت چ اپنے بھین بھراواں دی مدد کرن لئی تیار او۔ اپنے آپ کولوں پچھو: ”کیہہ میں ہن ای کوئی ہنر سکھ سکنا واں جیہڑا اوس ویلے میرے کم آئے گا جدوں یہوواہ مینوں زمین تے ہمیشاں تک زندہ رہن دی اجازت دوے گا؟“
کیہہ تُسی اوہناں لوکاں دِیاں ضرورتاں دا خیال رکھن لئی تیار او جنہاں نُوں زندہ کیتا جائے گا؟
یائیر دی دھی نُوں زندہ کرن دے فوراً بعد یسوع نے کہیا: بچی نُوں کھان لئی کجھ دو۔ (مرقس 5:42، 43) 12 سال دی اوس بچی دی ایس ضرورت نُوں پورا کرنا ایہناں اوکھا نئیں رہیا ہوئے گا۔ پر سوچو کہ جدوں یسوع اپنا ایہہ وعدہ پورا کرے گا کہ سارے لوک جیہڑے قبراں وچ نیں اوہدی آواز سنن گے تے نکل آن گے تے اوس ویلے ایہہ ضرورت کیویں پوری کیتی جائے گی؟ (یوحنا 5:28، 29) بھانویں کہ ایہدے بارے بائبل چ زیادہ نئیں دَسیا گیا پر اَسی سوچ سکنے آں کے جنہاں لوکاں نُوں زندہ کیتا جائے گا اوہناں نُوں کھان پین دِیاں شیواں، کپڑیاں تے رہن دی جگہ دی ضرورت ہوئے گی۔ کیہہ تُسی ہن توں ای ایہہ ثابت کر سکدے او کہ تُسی اوس ویلے مدد کرن لئی تیار ہووو گے۔ ایہدے لئی ایہناں سوالاں تے غور کرو۔
تُسی ہُن کیہہ کر سکدے او جدے توں ایہہ ثابت ہوئے کہ تُسی زمین دے وارث بنن لئی تیار او؟
جدوں تواڈی کلیسیا چ حلقے دے نگہبان دے دورے دا اعلان کیتا جاندا اے تے کیہہ تُسی اوہنوں اپنے گھر کھانے تے بلا سکدے او؟ جدوں بیت ایل چ کسے بھین یاں بھرا نُوں پہلکار بنا دِتا جاندا اے یاں حلقے دے نگہبان دی خدمت دی مدّت ختم ہو جاندی اے تے کیہہ تُسی رہائش لبھن لئی اوہناں دی مدد کر سکدے او؟ جے تواڈے علاقے چ کنونشن ہوندی اے تے کیہہ تُسی ایہدے توں پہلاں یاں ایہدے توں بعد ہون والے کماں چ حصہ لے سکدے او؟ یاں کیہہ تُسی اوہناں بھین بھراواں دی مدد کر سکدے او جیہڑے دُوجے علاقیاں توں آندے نیں؟
کیہہ تُسی مُردیاں چوں زندہ ہون والیاں نُوں تلیم دین لئی تیار او؟
اعمال 24:15 چ لکھی گل توں سانوں پتہ لگدے اے کہ زمین تے کروڑاں لوکاں نُوں زندہ کیتا جائے گا۔ ایہناں چوں بوہت سارے ایہو جہے لوک ہون گے جنہاں نُوں اپنی موت توں پہلاں یہوواہ بارے سکھن دا موقع نئیں ملیا سی۔ پر جدوں اوہناں نُوں زندہ کیتا جائے گا تے اوہناں نُوں ایہہ موقع ملے گا۔ اوہناں نُوں یہوواہ بارے کون تلیم دَوے گا؟ a اوہدے وفادار تے تجربہ کار بندے۔ (یسعیاہ 11:9) بھین شارلٹ جنہے یورپ،جنوبی امریکہ تے افریقہ چ مُنادی کیتی اے، اوہ اوس وقت دا اِنتظار کر رہی اے۔ اوہنے کہیا: ”مینوں اوس وقت دا بےصبری نال اِنتظار اے جدوں میں نوِیں دُنیا چ زندہ ہون والے لوکاں نُوں یہوواہ بارے سکھانواں گی۔ جدوں میں ماضی چ رہن والے کسے بندے بارے پڑھنی آں تے میں سوچنی آں جے ایس بندے نے یہوواہ بارے سکھیا ہوندا تے ایہدی زندگی کِنّی فرق ہو سکدی سی۔ میں اوس وقت دا بڑی بےصبری نال اِنتظار کر رہی آں جدوں میں اوہناں لوکاں نُوں دَساں گی کہ یہوواہ دی عبادت کرن نال اوہناں دی زندگی کِنّی بہتر ہو سکدی اے۔“
صرف اوہناں لوکاں نُوں ای نئیں سگوں یہوواہ دے اوہناں بندیاں نُوں وی بوہت کجھ سکھنا ہوئے گا جیہڑے یسوع دے زمین تے آن توں پہلاں ای فوت ہو گئے سن۔ ذرا سوچو کہ سانوں دانیایل نُوں ایہہ دَس کے کِنّی خوشی ہوئے گی کہ اوہ پیشینگوئیاں کیویں پوریاں ہویاں جیہڑیاں اوہنےلکھیاں سن پر سمجھ نئیں پایا سی۔ (دانیایل 12:8) نالے ایہہ وی سوچو کہ سانوں رُوت تے نعومی نُوں ایہہ دَس کے کِنّی خوشی ہوئے گی کہ مسیح اوہناں دے خاندان چوں آیا سی۔ جدوں نوِیں دُنیا چ تلیم دین دا ایہہ بندوبست ہوئے گا تے اَسی ایہدے چ حصہ لواں گے تے ایہہ ساڈے لئی کِنّی خوشی تے مان دی گل ہوئے گی۔ اوس ویلے اَسی بغیر کسے رکاوٹ توں ایہہ کم کراں گے۔
تُسی ہن توں ای ایہہ کیویں ثابت کر سکدے او کہ تُسی مُردیاں چوں زندہ ہو جان والیاں نُوں تلیم دین لئی تیار او؟ ایہدا اِک طریقہ ایہہ وے کہ تُسی ہن اپنی تلیم دین دِیاں مہارتاں نُوں نکھارن دی پوری کوشش کرو تے دُنیا بھر چ ہون والے مُنادی دے کم چ ودھ چڑھ کے حصہ لوو۔ (متی 24:14) تُسی اپنی عمر یاں حالاتاں مطابق ایہناں کماں چ حصہ لین لئی جیہڑیاں وی کوششاں کرو گے اوہناں توں ایہہ ثابت ہوئے گا کہ تُسی نوِیں دُنیا چ زندہ ہون والیاں نُوں تلیم دین لئی تیار او۔
ایہہ بڑا ضروری اے کہ اَسی ہن توں ای ایہناں اہم سوالاں بارے سوچئے: ”کیہہ میں واقعی زمین دا وارث بنن دا بےصبری نال اِنتظار کر رہیا واں؟ کیہہ ایہہ سوچ کے میرا دل خوشی نال بھر جاندا اے کہ میں زمین نُوں فردوس بنان چ مدد کراں گا، زندہ ہو جان والیاں دِیاں ضرورتاں دا خیال رکھاں گا تے اوہناں نُوں یہوواہ بارے سکھانواں گا؟“ ایہہ ثابت کرن لئی کہ تُسی زمین تے ہمیشاں دی زندگی پان لئی تیار او ہُن توں ای ایہو جہے کماں چ حصہ لوو جیہڑے اوہناں کماں وانگوں نیں جیہڑے تُسی زمین دا وارث بنن دے بعد کرو گے۔
a ستمبر 2022 دے ”مینارِنگہبانی“ چ مضمون ”اوہ بوہت سارے لوکاں نُوں نیکی دی راہ تے لیان گے“ نُوں ویکھو۔
