1.‏ جدوں اَسی ابراہام دے ایمان بارے سوچنے آں تے ساڈے ذہن چ کیہڑا سوال آ سکدا اے؟‏

 بوہت سارے لوکاں نے ابراہام بارے سنیا تے ہے وے پر اوہ اوہدے بارے زیادہ کجھ نئیں جان‌دے۔ پر شاید تُسی ابراہام بارے بوہت کجھ جان‌دے او۔ مثال لئی، توانوں پتہ اے کہ بائبل چ ابراہام نُوں اوہناں سارے لوکاں دا پیو کہیا گیا اے جیہڑے ایمان رکھدے نیں۔ (‏رومیوں 4:‏11‏)‏ پر شاید تُسی سوچو:‏ ”‏کیہہ مَیں ابراہام وانگوں بن سکنا واں؟“‏ جی، تُسی ضرور بن سکدے او۔‏

2.‏ بائبل چوں ابراہام بارے جاننا ضروری کیوں اے؟ (‏یعقوب 2:‏22، 23‏)‏

² ابراہام ورگا ایمان رکھن دا اِک طریقہ ایہہ وے کہ اَسی بائبل چوں اوہدے بارے ہور زیادہ جانیے۔ اوہنے یہوواہ دی گل منی تے اِک دُور دے علاقے چ جا کے رہن لگ پیا۔ اوہ کئی سالاں تک تمبواں چ رہیا نالے اوہ اپنے پیارے پُتر اِضحاق نُوں وی قربان کرن لئی تیار ہو گیا۔ ایہہ سارے کم کرن لئی اوہنوں مضبوط ایمان دی لوڑ سی۔ ابراہام نے اپنے ایمان تے کماں توں یہوواہ نُوں خوش کیتا تے اوہدا دوست بن گیا۔ ‏(‏یعقوب 2:‏22، 23 نُوں پڑھو۔)‏ یہوواہ چاہندا اے کہ اَسی وی اوہنوں خوش کریئے تے اوہدے دوست بن جائیے۔ ایس لئی اوہنے پولُس تے یعقوب دے ذریعے بائبل چ ابراہام بارے لکھوایا۔ آؤ، رومیوں 4 باب تے یعقوب 2 باب چوں ابراہام دی مثال تے غور کریئے۔ ایہناں دونواں کتاباں چ ابراہام بارے بڑیاں خاص گلاں دَسیاں گئیاں نیں۔‏

3.‏ پولُس تے یعقوب نے ابراہام بارے گل کردے ہوئیاں کیہڑی خاص ایت استمال کیتی؟‏

³ پولُس تے یعقوب نے پیدایش 15:‏6 دا حوالہ دِتا جتھے لکھیا اے:‏ ابراہام نے یہوواہ تے ایمان رکھیا تے اوہنے ابراہام نُوں نیک ٹھہرایا۔ یہوواہ جیس بندے توں خوش ہوندا اے، اوہ اوہدی نظر چ نیک تے بے‌قصور ٹھہردا اے۔ ایہہ کِنّی ودھیا گل اے کہ گُناہ‌گار انسان وی یہوواہ دی نظر چ بے‌قصور  ٹھہر سکدے نیں۔ شاید تُسی وی ایہہ چاہندے ہووو کہ یہوواہ تواڈے بارے وی اِنج ای سوچے تے اِنج ہو وی سکدا اے۔ ایہہ جانن لئی کہ اَسی یہوواہ دی نظر چ نیک کیویں ٹھہر سکنے آں، آؤ سب توں پہلاں ایہہ ویکھئے کہ یہوواہ نے ابراہام بارے اِنج کیوں کہیا سی۔‏

4.‏ کیہڑی چیز دی وجہ توں انساناں لئی خدا دی نظر چ نیک ٹھہرنا مشکل ہو سکدا اے؟‏

⁴ پولُس نے روم دی کلیسیا دے ناں خط چ دَسیا کہ سارے انسان گُناہ‌گار نیں۔ (‏رومیوں 3:‏23‏)‏ تے فیر اِک گُناہ‌گار شخص یہوواہ دی نظر چ نیک یاں بے‌قصور کیویں ٹھہر سکدا اے۔ پولُس نے ایس سوال دا جواب دین لئی ابراہام دی مثال استمال کیتی۔‏

5.‏ یہوواہ نے ابراہام نُوں نیک کیوں ٹھہرایا؟ (‏رومیوں 4:‏2،‏ 4‏)‏

⁵ یہوواہ نے ابراہام نُوں اوس ویلے نیک کہیا جدوں اوہ ملک کنعان چ رہ رہیا سی۔ پر اوہنے ابراہام نُوں نیک کیوں کہیا؟ کیہہ ایس لئی کیونکہ ابراہام شریعت تے چنگی طرحاں عمل کر رہیا سی؟ جی نئیں۔ (‏رومیوں 4:‏13‏)‏ اوہدوں تک تے شریعت دِتی وی نئیں گئی سی۔ شریعت تے اوہدے تقریباً 400 سال بعد بنی‌اِسرائیل نُوں ملی سی۔ تے فیر یہوواہ نے ابراہام نُوں نیک کیوں ٹھہرایا؟ اوہنے ابراہام لئی اپنی عظیم رحمت وکھائی تے اوہدے ایمان دی وجہ توں اوہنوں نیک ٹھہرایا۔‏‏—‏رومیوں 4:‏2-‏4 نُوں پڑھو۔‏

6.‏ یہوواہ خدا اِک گُناہ‌گار شخص نُوں نیک کیویں ٹھہراندا اے؟‏

⁶ پولُس نے کہیا کہ جدوں اِک شخص یہوواہ تے ایمان رکھدا اے تے اوہ اپنے ایمان دی وجہ توں نیک ٹھہرایا جاندا اے۔ (‏رومیوں 4:‏5‏)‏ اوہنے ایہہ وی کہیا:‏ داؤد نے اوس بندے دی خوشی دا ذکر کیتا جنہوں کماں دے بغیر نیک ٹھہرایا جاندا اے۔ اوہنے کہیا:‏ اوہ بندہ خوش اے جدے بھیڑے کم معاف کر دِتے گئے نیں تے جدے گُناہ بخش دِتے گئے نیں؛ اوہ بندہ خوش اے جدا گُناہ یہوواہ بالکل حساب چ نئیں لیائے گا۔ (‏رومیوں 4:‏6-‏8؛‏ زبور 32:‏1، 2‏)‏ جیہڑے لوک یہوواہ تے ایمان رکھدے نیں، اوہ اوہناں دے گُناہ بخش دیندا اے یاں اوہناں نُوں ڈھک دیندا اے۔ اوہ اوہناں نُوں پوری طرحاں معاف کر دیندا اے تے اوہناں دے گُناہواں دا حساب نئیں رکھدا۔ جیہڑے لوک یہوواہ تے ایمان ظاہر کردے نیں، اوہ اوہدی نظر چ بے‌قصور تے نیک ہوندے نیں۔‏

7.‏ یہوواہ دے بندے کیس لحاظ نال اوہدی نظر چ نیک سن؟‏

⁷ یہوواہ نے ابراہام، داؤد تے اپنے دُوجے بندیاں نُوں نیک ٹھہرایا بھانویں کہ اوہ گُناہ‌گار سن۔ کیونکہ اوہ یہوواہ تے ایمان رکھدے سن ایس لئی اوہ یہوواہ دی نظر چ بے‌قصور سن۔ اوہ خاص طور تے اوہناں لوکاں دے مقابلے چ بے‌قصور سمجھے جاندے سن جیہڑے یہوواہ دی عبادت نئیں کردے سن۔ (‏اِفسیوں 2:‏12‏)‏ پولُس نے اپنے خط چ ایہہ گل صاف صاف دَسی کہ یہوواہ دا دوست بنن لئی اوہدے تے ایمان رکھنا ضروری اے۔ ابراہام تے داؤد نے بالکل اِنج ای کیتا تے جے اَسی وی یہوواہ دے دوست بننا چاہنے آں تے سانوں وی اوہدے تے ایمان رکھنا چاہی دا اے۔‏

8، 9.‏ پولُس تے یعقوب نے جو کجھ وی لکھیا، اوہدے بارے کجھ لوک کیہڑی غلط سوچ رکھدے نیں؟‏

⁸ اِک لمے عرصہ توں مذہبی رہنما ایس موضوع تے بحث کر رہے نیں کہ ساڈے ایمان دا ساڈے کماں نال کیہہ تعلق اے۔ کجھ مسیحی رہنما ایہہ تلیم دیندے نیں کہ نجات پان لئی صرف یسوع مسیح تے ایمان رکھنا کافی اے۔ شاید تُسی اوہناں دے مونہوں ایہہ گل سُنی ہووے:‏ ”‏یسوع نُوں قبول کرو تے نجات پاؤ۔“‏ کجھ مسیحی رہنما شاید ایس گل دا حوالہ وی دین کہ خدا لوکاں نُوں اوہناں دے کماں دے بغیر نیک ٹھہراندا اے۔ (‏رومیوں 4:‏6‏)‏ پر کجھ مسیحی رہنما شاید ایہہ کہن کہ جے تُسی نجات پانا چاہندے او تے توانوں اوہناں تھانواں تے جانا چاہی دا اے جنہاں نُوں چرچ نے پاک ٹھہرایا اے تے چنگے کم کرنے چاہی دے نیں۔ شاید اوہ یعقوب 2:‏24 چ لکھی ایس گل دا حوالہ دین کہ اِک بندے نُوں صرف ایمان دی وجہ توں نئیں سگوں اوہدے کماں دی وجہ توں نیک ٹھہرایا جاندا اے۔‏

⁹ لوکاں دی فرق فرق رائے دی وجہ توں بائبل دے کجھ عالم سوچدے نیں کہ پولُس تے یعقوب ایس گل تے اِک دُوجے نال متفق نئیں سن کہ اِک بندے نُوں خدا نُوں خوش کرن لئی کیہہ کرنا چاہی دا اے۔ کجھ مذہبی  رہنما شاید دعویٰ کرن کہ پولُس نُوں ایہہ لگدا سی کہ اِک بندہ اپنے ایمان دی وجہ توں ای نیک ٹھہر سکدا اے پر یعقوب ایہہ تلیم دے رہیا سی کہ خدا نُوں خوش کرن لئی صحی کم کرنا زیادہ ضروری اے۔ اِک پروفیسر نے کہیا:‏ ”‏یعقوب نُوں ایہہ سمجھ نئیں آ رہیا سی کہ پولُس ایس گل تے کیوں زور دے رہیا اے کہ خدا دی نظر چ نیک ٹھہرن لئی صرف ایمان رکھنا ای کافی اے تے کم اینے ضروری نئیں نیں۔“‏ پر اصل چ پولُس تے یعقوب نے جو کجھ لکھیا، اوہ یہوواہ دی پاک روح دی رہنمائی چ لکھیا۔ (‏2-‏تیمُتھیُس 3:‏16‏)‏ ایس لئی اوہناں دونواں نے جو کجھ وی لکھیا، اوہدے پچھے کوئی نہ کوئی وجہ ضرور ہوئے گی۔ آؤ اوس وجہ نُوں جانن لئی ایہناں ایتاں تے ذرا گہرائی نال غور کریئے۔‏

10.‏ پولُس رسول خاص طور تے کیہڑے کماں دا ذکر کر رہیا سی؟ (‏رومیوں 3:‏21،‏ 28‏)‏ (‏تصویر نُوں وی ویکھو۔)‏

¹⁰ رومیوں 3 تے 4 باب چ پولُس کیہڑے کماں دا ذکر کر رہیا سی؟ پولُس خاص طور تے شریعت تے عمل کرن بارے گل کر رہیا سی جیہڑی موسیٰ نُوں سینا دے پہاڑ تے ملی سی۔ ‏(‏رومیوں 3:‏21،‏ 28 نُوں پڑھو۔)‏ لگدا اے کہ پولُس دے زمانے چ کجھ یہودی مسیحیاں نُوں ایہہ قبول کرنا مشکل لگ رہیا سی کہ شریعت نُوں ختم کر دِتا گیا اے تے ایہدے چ دَسے کم کرنا ہُن ضروری نئیں رہیا۔ ایس لئی پولُس نے ابراہام دی مثال دے کے سمجھایا کہ خدا نُوں خوش کرن لئی شریعت تے عمل کرنا ضروری نئیں اے سگوں ایہدے لئی ایمان دی لوڑ اے۔ ایس گل توں سانوں بڑی تسلی مِلدی اے کیونکہ ایہدے توں پتہ چلدا اے کہ جے اَسی خدا تے مسیح اُتے ایمان رکھاں گے تے اَسی خدا نُوں خوش کر سکاں گے۔‏

11.‏ یعقوب کیہڑے کماں دی گل کر رہیا سی؟‏

¹¹ پر یعقوب نے اپنے خط دے دُوجے باب چ جیہڑے کماں دا ذکر کیتا، اوہ شریعت دے اوہ کم نئیں سن جنہاں دا حوالہ پولُس دے رہیا سی۔ اصل چ یعقوب اوہناں کماں دی گل کر رہیا سی جیہڑے کم اِک مسیحی ہر روز اپنی زندگی چ کردا اے۔ ایہناں کماں توں پتہ چلدا اے کہ اِک مسیحی  خدا تے پکا ایمان رکھدا اے یاں نئیں۔ ہُن آؤ اَسی اوہناں دو مثالاں تے غور کریئے جیہڑیاں یعقوب نے دِتیاں۔‏

12.‏ یعقوب نے کیویں واضح کیتا کہ ساڈے ایمان دا ساڈے کماں نال گُوڑھا تعلق اے؟ (‏تصویر نُوں وی ویکھو۔)‏

¹² یعقوب نے پہلی مثال چ ایس گل دا ذکر کیتا کہ مسیحیاں نُوں کسے نال فرق نئیں کرنا چاہی دا سگوں ساریاں نال اِکو جیہا سلوک کرنا چاہی دا اے۔ ایس مثال چ اوہنے اِک ایہو جہے بندے دا ذکر کیتا جیہڑا اِک امیر بندے نال تے بڑی چنگی طرحاں پیش آندا اے پر غریب آدمی نُوں گھٹیا سمجھدا اے۔ یعقوب نے دسیا کہ شاید ایہو جیہا بندہ ایہہ دعویٰ کرے کہ اوہ خدا تے ایمان رکھدا اے پر اوہدے کماں توں اوہدا ایمان ظاہر نئیں ہوندا۔ (‏یعقوب 2:‏1-‏5،‏ 9‏)‏ دُوجی مثال چ یعقوب نے اِک ایہو جہے بندے دا ذکر کیتا جیہڑا ایہہ ویکھدا اے کہ اوہدے بھین یاں بھرا کول کپڑے نئیں نیں یاں اوہدے کول کھان پین دِیاں چیزاں بوہت گھٹ نیں پر اوہ اوہدی کوئی مدد نئیں کردا۔ ایس لئی جے اوہ کہندا اے کہ اوہ خدا تے ایمان رکھدا اے تے اوہدا ایمان فضول اے کیونکہ اوہ اپنے کماں توں اپنے ایمان نُوں ظاہر نئیں کردا۔ ایس لئی یعقوب نے کہیا کہ ایمان بغیر کماں دے مُردہ اے۔—‏یعقوب 2:‏14-‏17‏۔‏

13.‏ یعقوب نے اِک مثال دے ذریعے ایہہ کیویں سمجھایا کہ ایمان کماں دے بغیر مُردہ اے؟ (‏یعقوب 2:‏25، 26‏)‏

¹³ یعقوب نے راحب دی مثال دے کے دسیا کہ جے اَسی یہوواہ تے ایمان رکھنے آں تے سانوں ایہنوں اپنے کماں توں ثابت وی کرنا چاہی دا اے۔ ‏(‏یعقوب 2:‏25، 26 نُوں پڑھو۔)‏ راحب نے یہوواہ بارے سنیا سی تے اوہ ایمان رکھدی سی کہ اوہ بنی‌اِسرائیل دے نال اے۔ (‏یشوع 2:‏9-‏11‏)‏ پر اوہنے اپنے ایمان نُوں اپنے کماں توں وی ثابت کیتا۔ جدوں دو اِسرائیلی جاسوساں دی جان خطرے چ سی تے راحب نے اوہناں نُوں پناہ دِتی۔ ایس وجہ توں ایہہ غیر اِسرائیلی عورت  گُناہ‌گار ہون دے باوجود وی یہوواہ دی نظر چ نیک ٹھہری، بالکل اوسے طرحاں جیویں ابراہام ٹھہریا سی۔ راحب دی مثال توں پتہ چلدا اے کہ جے اَسی یہوواہ تے پکا ایمان رکھنے آں تے سانوں ایہدے مطابق کم وی کرنے چاہی دے نیں۔‏

14.‏ اَسی ایہہ کیوں کہہ سکنے آں کہ پولُس تے یعقوب فرق فرق تلیم نئیں دے رہے سن؟‏

¹⁴ پولُس تے یعقوب ایمان تے کماں بارے فرق فرق نظریے نال گل کر رہے سن۔ پولُس یہودی مسیحیاں نُوں ایہہ دَس رہیا سی کہ خدا نُوں خوش کرن لئی صرف شریعت تے عمل کرنا ای کافی نئیں اے جد کہ یعقوب ایس گل تے زور دے رہیا سی کہ سارے مسیحیاں لئی ایہہ ضروری اے کہ اوہ دُوجیاں لئی چنگے کم کرن نال اپنے ایمان نُوں ثابت کرن۔‏

15.‏ ایمان نُوں کماں دے ذریعے ثابت کرن دے کجھ طریقے کیہڑے نیں؟ (‏تصویراں نُوں وی ویکھو۔)‏

¹⁵ یہوواہ ایہہ نئیں کہندا کہ جے اَسی اوہدیاں نظراں چ نیک ٹھہرنا چاہنے آں تے اَسی اوہی سارے کم کریئے جیہڑے ابراہام نے کیتے۔ سگوں اپنے ایمان نُوں اپنے کماں توں ثابت کرن دے ہور وی طریقے ہے نیں۔ مثال لئی، اَسی اوہناں لوکاں نُوں جی آیاں نُوں کہہ سکنے آں جیہڑے پہلی وار عبادت تے آندے نیں، اپنے ضرورت‌مند بھین بھراواں دی مدد کر سکنے آں تے اپنے گھر والیاں دی بہتری بارے سوچ سکنے آں۔ ایہہ سارے اوہ کم نیں جنہاں توں یہوواہ خوش ہوندا اے تے سانوں برکت دیندا اے۔ (‏رومیوں 15:‏7؛‏ 1-‏تیمُتھیُس 5:‏4،‏ 8؛‏ 1-‏یوحنا 3:‏18‏)‏ اپنے ایمان نُوں اپنے کماں توں ثابت کرن دا سب توں ودھیا طریقہ ایہہ وے کہ اَسی پوری لگن نال دُوجیاں نُوں بادشاہی دی خوش‌خبری سنائیے۔ (‏1-‏تیمُتھیُس 4:‏16‏)‏ اَسی سارے اپنے کماں توں ثابت کر سکنے آں کہ اَسی پکا ایمان رکھنے آں کہ یہوواہ دے وعدے پورے ہون گے تے اوہدا ہر کم بالکل صحی ہوندا اے۔ جے اَسی اپنے ایمان نُوں اپنے کماں توں ثابت کراں گے تے اَسی ایس گل دی پکی امید رکھ سکاں گے کہ یہوواہ سانوں وی نیک ٹھہرائے گا تے اپنا دوست بنا لوے گا۔‏

16.‏ ابراہام نُوں کیس گل دی امید سی تے اوہنے کیس گل تے ایمان رکھیا؟‏

¹⁶ رومیوں 4 باب چ اِک ہور بوہت ودھیا گل دَسی گئی اے جیہڑی اَسی ابراہام کولوں سکھ سکنے آں۔ ایس باب چ دَسیا گیا اے کہ سانوں اپنا دھیان اپنی امید تے رکھنا چاہی دا اے۔ یہوواہ نے وعدہ کیتا سی کہ ابراہام دے ذریعے بوہت ساریاں قوماں برکت پان گیاں۔ ذرا سوچو کہ ابراہام دی امید کِنّی زبردست سی۔ (‏پیدایش 12:‏3؛‏ 15:‏5؛‏ 17:‏4؛‏ رومیوں 4:‏17‏)‏ پر جدوں ابراہام 100 سال دا ہو گیا تے سارہ 90 سال دی ہو گئی تے فیر وی اوہناں دی کوئی اولاد نہ ہوئی۔ ویکھیا جائے تے ہُن ابراہام تے سارہ دی اولاد پیدا کرن دی عمر نئیں رہی سی۔ ایہہ ابراہام دے ایمان دا بوہت سخت اِمتحان سی۔ پر اپنی امید دی وجہ توں اوہنوں پکا یقین سی کہ اوہ بوہت ساریاں قوماں دا پیو بنے گا۔ (‏رومیوں 4:‏18، 19‏)‏ تے اوہدی ایہہ امید پوری وی ہوئی۔ اوہدا پُتر اِضحاق پیدا ہویا جدے پیدا ہون دی اوہ بڑے لمے چِر توں امید کر رہیا سی۔—‏رومیوں 4:‏20-‏22‏۔‏

17.‏ سانوں کیویں پتہ اے کہ اَسی خدا دے دوست بن کے اوہدی نظر چ نیک ٹھہر سکنے آں؟‏

¹⁷ اَسی وی ابراہام وانگوں خدا نُوں خوش کر سکنے آں تے اوہدی نظر چ نیک ٹھہر سکنے آں۔ پولُس نے ایس بارے کہیا:‏ ایہہ گل صرف ابراہام لئی نئیں لکھی گئی کہ اوہنوں نیک ٹھہرایا گیا سگوں ساڈے لئی وی لکھی گئی اے جنہاں نُوں نیک ٹھہرایا جائے گا کیونکہ اَسی اوہدے تے ایمان رکھنے آں جنہے ساڈے مالک یسوع نُوں مُردیاں چوں زندہ کیتا۔ (‏رومیوں 4:‏23، 24‏)‏ ابراہام وانگوں سانوں وی یہوواہ تے ایمان رکھنا چاہی دا اے، چنگے کم کرنے چاہی دے نیں تے ایس گل دی پکی امید رکھنی چاہی دی اے کہ یہوواہ دے وعدے پورے ہون گے۔ رومیوں 5 باب چ پولُس نے امید بارے اِک ہور گل وی کہی جدے تے اَسی اگلے مضمون تے غور کراں گے۔‏