ایہدے چ کوئی شک نئیں کہ تُسی اوہناں نعمتاں دی بڑی قدر کردے او جیہڑیاں یہوواہ نے دِتیاں نیں۔ اِک نعمت ایہہ وے کہ اَسی اپنی مرضی نال فیصلہ کر سکنے آں کہ اَسی ایہناں نعمتاں نُوں کیویں استمال کراں گے۔ بائبل دے مطابق مے یہوواہ وَلّوں اِک نعمت اے۔ ایہدے چ لکھیا اے:‏ ہسن لئی لوک دعوت کردے نیں تے مے جان نُوں خوش کردی اے۔ (‏واعظ 10:‏19؛‏ زبور 104:‏15‏)‏ پر شاید تُسی ویکھیا ہوئے گا کہ حدوں ودھ شراب پین دی وجہ توں لوکاں نُوں مسئلیاں دا سامنا کرنا پیندا اے۔ ایہدے علاوہ پوری دُنیا چ شراب پین بارے لوکاں دی فرق فرق رائے وے۔ پر کیہڑی چیز مسیحیاں دی مدد کر سکدی اے تاکہ اوہ شراب پین بارے سمجھ‌داری نال فیصلے کر سکن؟‏

فیصلے لیندے ویلے سانوں خدا دی سوچ نُوں ذہن چ رکھنا چاہی دا اے نہ کہ اپنے آلے دوالے دے لوکاں دی سوچ نُوں۔ اِنج کرن نال سانوں بوہت فائدہ ہوئے گا تے اَسی خوش رہواں گے۔‏

شاید تُسی ویکھیا ہوئے کہ دُنیا چ لوک اکثر بوہت زیادہ شراب پیندے نیں۔ کجھ لوک شاید سکون حاصل کرن لئی شراب پیندے نیں۔ کجھ اپنے مسئلیاں نُوں بُھلن لئی پیندے نیں تے کجھ ایس لئی پیندے نیں کیونکہ اوہناں دے علاقے چ زیادہ شراب پین والیاں نُوں مضبوط سمجھیا جاندا اے۔‏

پر مسیحی اپنے خالق وَلّوں مِلن والے چنگے مشوریاں تے عمل کردے نیں۔ مثال لئی، اوہنے سانوں آگاہ کیتا اے کہ حدوں ودھ شراب پین دے بھیڑے نتیجے نکلدے نیں۔ شاید اَسی امثال 23:‏29-‏35 چ اِک شرابی بارے پڑھیا ہووے جنہوں بڑے مسئلیاں دا سامنا کرنا پیا۔‏ a یورپ چ رہن والے ڈینئل ناں دے اِک بزرگ نے دَسیا کہ یہوواہ دا گواہ بنن توں پہلاں اوہدی زندگی کیہو جہی سی۔ اوہنے کہیا:‏ ”‏حدوں ودھ شراب پین دی وجہ توں مَیں بوہت بھیڑے فیصلے کیتے تے اوہناں دا مینوں نتیجہ وی بھگتنا پیا۔ اوہناں گلاں بارے سوچ کے مینوں اَج وی بڑی تکلیف محسوس ہوندی اے۔“‏

مسیحی شراب پین بارے صحی فیصلے کیویں کر سکدے نیں تے اوہناں مسئلیاں توں کیویں بچ سکدے نیں جیہڑے حدوں ودھ شراب پین دی وجہ توں ہوندے نیں؟ ایہدے لئی ضروری اے کہ اَسی اپنی سوچ تے کماں نُوں خدا دی سوچ مطابق ڈھالئے۔‏

آؤ ویکھنے آں کہ بائبل چ شراب پین بارے کیہہ دَسیا گیا اے نالے ایس گل تے وی غور کرنے آں کہ کجھ لوک شراب کیوں پیندے نیں۔‏

بائبل حد چ رہ کے شراب پین توں منع نئیں کردی۔ سگوں ایہدے چ لکھیا اے کہ مے پین نال انسان نُوں خوشی مِلدی اے۔ بائبل چ لکھیا اے:‏ اپنی روٹی دا مزہ لے تے مے پی کے اپنا دل خوش کر۔ (‏واعظ 9:‏7‏)‏ کجھ موقعیاں تے یسوع نے تے یہوواہ دے کجھ ہور بندیاں نے وی مے پیتی۔—‏متی 26:‏27-‏29؛‏ لُوقا 7:‏34؛‏ 1-‏تیمُتھیُس 5:‏23‏۔‏

پر بائبل چ صاف صاف دَسیا گیا اے کہ تھوڑی بوہت شراب پین تے حدوں ودھ شراب پین چ فرق اے۔ ایہدے چ لکھیا اے:‏ شراب چ متوالے نہ ہوو۔ (‏اِفسیوں 5:‏18‏)‏ ایہدے چ ایہہ وی دَسیا گیا اے کہ شرابی خدا دی بادشاہی دے وارث نئیں ہون گے۔ (‏1-‏کُرنتھیوں 6:‏10‏)‏ یہوواہ خدا نے حدوں ودھ شراب پین تے شراب دے نشے چ ٹن ہون توں منع کیتا اے۔ شراب پین بارے فیصلہ لیندے ویلے سانوں اپنے علاقے دے رواج بارے نئیں سوچنا چاہی دا سگوں یہوواہ دی سوچ نُوں اہمیت دینی چاہی دی اے۔‏

کجھ لوکاں نُوں لگدا اے کہ بھانویں اوہ جِنّی مرضی شراب پی لین، اوہناں نُوں نشہ نئیں چڑھدا۔ پر ایہہ سوچ خطرناک ہو سکدی اے۔ بائبل چ صاف صاف دَسیا گیا اے کہ جیس بندے نُوں مے پین دی عادت پے جاندی اے، اوہ گُناہ کرن دے خطرے چ پے جاندا اے تے یہوواہ نال اوہدی دوستی ٹُٹ سکدی اے۔ (‏طِطُس 2:‏3؛‏ امثال 20:‏1‏)‏ یسوع نے آگاہ کیتا سی کہ جیہڑے لوک حدوں ودھ شراب پیندے نیں، اوہ نوِیں دُنیا چ نئیں جان گے۔ (‏لُوقا 21:‏34-‏36‏)‏ اِک مسیحی اوہناں مسئلیاں توں کیویں بچ سکدا اے جیہڑے حدوں ودھ شراب پین دی وجہ توں پیدا ہوندے نیں؟‏

جے اِک بندہ شراب پین دا فیصلہ ایس لئی کردا اے کیونکہ شراب پینا اوہدے علاقے دا رواج اے تے ایہہ بوہت خطرناک ہو سکدا اے۔ پر مسیحیاں نُوں کھان پین بارے ایہو جہے فیصلے کرنے چاہی دے نیں جنہاں توں یہوواہ خوش ہووے۔ بائبل چ کہیا گیا اے:‏ بھانویں اَسی کھائیے یاں پیئے یاں جو کجھ وی کریئے، سب کجھ خدا دی وڈیائی لئی کریئے۔ (‏1-‏کُرنتھیوں 10:‏31‏)‏ ذرا ایہناں سوالاں تے بائبل دے اصولاں تے غور کرو:‏

کیہہ مَیں ایس لئی شراب پینا واں تاکہ دُوجے لوک مینوں پسند کرن؟‏ خروج 23:‏2 چ لکھیا اے:‏ بھیڑ دے پچھے نہ ٹُر۔ ایس ایت چ یہوواہ اِسرائیلیاں نُوں کہہ رہیا سی کہ اوہ اوہناں لوکاں دی نقل نہ کرن جیہڑے اوہنوں ناراض کردے نیں۔ ایہہ نصیحت اَج مسیحیاں دے وی کم آندی اے۔ جے اَسی شراب پین بارے اپنی سوچ تے فیصلیاں اُتے دُوجیاں دا اثر ہون دَواں گے تے اَسی یہوواہ توں دُور ہو جاواں گے تے اوہدے معیاراں مطابق زندگی گزارنا چھڈ دَواں گے۔—‏رومیوں 12:‏2‏۔‏

کیہہ مَیں ایس لئی شراب پینا واں تاکہ لوکاں نُوں لگے کہ مَیں بوہت مضبوط آں؟‏ کجھ مُلکاں چ لوک اکثر شراب پیندے نیں تے حدوں ودھ پیندے نیں۔ (‏1-‏پطرس 4:‏3‏)‏ پر غور کرو کہ 1-‏کُرنتھیوں 16:‏13 چ لکھیا اے:‏ چوکس رہوو۔ایمان دی راہ تے قائم رہوو دلیر تے مضبوط بنو۔ کیہہ شراب پین دی وجہ توں اِک بندہ مضبوط بن‌دا اے؟ جی نئیں۔ سگوں حدوں ودھ شراب پین دی وجہ توں اوہ صحی تے غلط دا فرق بُھل جاندا اے۔ ایس لئی بوہتی شراب پینا اِک بندے دے مضبوط ہون دی نشانی نئیں اے سگوں ایہدے توں ظاہر ہوندا اے کہ اوہ کِنّاں کمزور تے بے‌وقوف اے۔ یسعیاہ 28:‏7 توں پتہ چلدا اے کہ جیہڑا بندہ مے دے نشے چ ٹن ہوندا اے، اوہ ڈولن لگ پیندا اے تے ڈِگ پیندا اے۔‏

اصل چ مضبوطی سانوں یہوواہ دیندا اے تے مضبوط ہون دا مطلب اے کہ اَسی چوکس رہیے تے ایمان تے قائم رہیے۔ (‏زبور 18:‏32‏)‏ ایہدے لئی ضروری اے کہ اِک مسیحی خطریاں توں خبردار رہوے تے ایہو جہے فیصلے کرے جنہاں دی وجہ توں یہوواہ نال اوہدی دوستی نُوں نقصان نہ ہووے۔ جدوں یسوع زمین تے سی تے اوہنے اِنج ای کیتا۔اوہ بوہت دلیر سی تے اوہنے ہمیشاں اوہ کم کیتے جیہڑے یہوواہ دی نظر چ صحی نیں۔ایسے لئی بوہت سارے لوک اوہدی عزت کردےسن۔‏

کیہہ مَیں اپنیاں پریشانیاں نُوں بُھلان لئی شراب پینا واں؟‏ زبور لکھن والے اِک بندے نے یہوواہ بارے کہیا:‏ جدوں میرا دل فکراں نال بھر جاندا اے تے تیری تسلی میری جان نُوں خوش کردی اے۔ (‏زبور 94:‏19‏)‏  جے توانوں پریشانیاں دا سامنا کرنا پیندا ا ے تے یہوواہ تے آس لاؤ، شراب تے نئیں۔ ایہدا اِک طریقہ ایہہ وے کہ تُسی وار وار یہوواہ کولوں دُعا کرو۔ ایہدے علاوہ تُسی کلیسیا دے کسے پُختہ مسیحی کولوں مدد لے سکدے او۔ اِنج کرن نال کئی بھین بھراواں نُوں فائدہ ہویا اے۔ جے اِک بندہ پریشانیاں نُوں بُھلن لئی شراب پیندا اے تے صحی کم کرن دا اوہدا ارادہ کمزور پے جاندا اے۔ (‏ہوسیع 4:‏11‏)‏ بھرا ڈینئل جدا پہلاں وی ذکر ہویا اے، اوہ وی ایہہ گل من‌دا اے۔ اوہنے کہیا:‏ ”‏مَیں پریشانیاں تے شرمندگی توں بچن لئی شراب پینا ساں۔ پر ایہدی وجہ توں مینوں ہور وی کئی پریشانیاں دا سامنا کرنا پے رہیا سی۔ میرے کئی دوستاں نے مینوں چھڈ دِتا تے مینوں محسوس ہون لگ پیا کہ مَیں کسے کم دا نئیں آں۔“‏ ایس معاملے چ کیہڑی چیز نے بھرا ڈینئل دی مدد کیتی؟ اوہنے دَسیا:‏ ”‏مَیں سمجھ گیا کہ مینوں یہوواہ دی ضرورت اے، شراب دی نئیں۔یہوواہ دی مدد دی وجہ توں مَیں اپنیاں پریشانیاں نال نبڑ سکیا۔“‏ ساڈی مدد کرن لئی یہوواہ ہمیشاں تیار رہندا اے، اوہدوں وی جدوں اَسی ہمت ہار جانے آں۔—‏فِلپّیوں 4:‏6، 7؛‏ 1-‏پطرس 5:‏7‏۔‏

جے تُسی شراب پیندے او تے ایہناں سوالاں تے غور کر کے ویکھو کہ کِتے توانوں ایس معاملے چ کوئی تبدیلی کرن دی لوڑ تے نئیں:‏ ‏”‏کیہہ میرے گھر دے کسے جی یاں میرے کسے دوست نے ایہہ کہیا اے کہ اوہ شراب پین دی میری عادت دی وجہ توں پریشان اے؟“‏ ایہہ اصل چ ایس گل دی نشانی اے کہ تُسی اِک ایہو جہی عادت یاں مسئلے چ پے رہے او جیہڑا توانوں نظر نئیں آ رہیا۔ ‏”‏کیہہ مَیں پہلاں توں زیادہ پین لگ پیا واں؟“‏ ایہہ کسے وی ایہو جہے بندے نال ہو سکدا اے جنہوں حالے شراب پین دی اینی عادت تے نئیں اے پر ایہہ عادت پے سکدی اے۔ ‏”‏جے مینوں کجھ دن یاں کجھ ہفتیاں تک شراب نہ ملے تے کیہہ مَیں بے چین ہو جانا واں؟“‏ جے ایہہ گل اے تے ایہدا مطلب اے کہ شراب پین دی عادت نے تواڈے چ جڑ پھڑ لئی اے یاں توانوں ایہدی لت لگ گئی اے۔ ایس عادت تے قابو پان لئی شاید توانوں ڈاکٹر توں مدد لینی پووے۔‏

شراب پین دی وجہ توں بوہت سارے مسئلے پیدا ہو سکدے نیں۔ ایس لئی کجھ مسیحیاں نے فیصلہ کیتا اے کہ اوہ شراب نئیں پین گے۔ کجھ شاید ایس لئی نہ پین کیونکہ اوہناں نُوں ایہدا سواد نئیں پسند۔ جے تواڈے گھر دے کسے جی یاں دوست نے ایہو جیہا فیصلہ کیتا اے تے اوہدے تے اِعتراض کرن دی بجائے اوہدے فیصلے لئی عزت وکھاؤ۔‏

 شاید اِک مسیحی فیصلہ کرے کہ اوہ حد چ رہ کے شراب پیئے گا۔ ہو سکدا اے کہ اوہ ایہہ اصول بنائے کہ اوہ ہفتے چ اِک وار یاں کھانے دے دوران تھوڑی بوہت پیوے گا۔ کجھ شاید ایہہ فیصلہ کرن کہ اوہ حد چ رہ کے مے یاں بیئر پین گے پر کوئی ایہو جہی شراب نئیں پین گے جدے توں بوہت زیادہ نشہ ہو جائے، ایتھوں تک کہ ایہنوں کسے جوس چ ملا کے وی نئیں پین گے۔ جدوں اِک بندہ اپنے لئی پہلاں توں اصول بناندا اے تے اوہناں تے عمل کرنا اوہدے لئی آسان ہوندا اے۔ جے اِک مسیحی اپنے لئی کجھ حداں مقرر کردا اے تے اوہنوں ایہہ سوچ کے پریشان نئیں ہونا چاہی دا کہ دُوجے اوہدے بارے کیہہ سوچن گے۔‏

جدوں اَسی شراب پین یاں نہ پین بارے فیصلہ کر رہے ہُنے آں تے سانوں دُوجیاں لئی لحاظ وکھانا چاہی دا اے۔ رومیوں 14:‏21 چ لکھیا اے:‏ چنگا ہوئے گا کہ توں گوشت نہ کھائیں تے نہ شراب پیویں تے نہ ای کوئی ایہو جیہا کم کریں جدی وجہ توں تیرے بھرا نُوں ٹھوکر لگے۔ تُسی ایس نصیحت تے کیویں عمل کر سکدے او؟ دُوجیاں لئی محبت وکھا کے۔ جے توانوں لگدا اے کہ تواڈے شراب پین دی وجہ توں کسے بھین یاں بھرا نُوں بُرا لگ سکدا اے تے محبت دی وجہ توں ہو سکدا اے کہ تُسی اوس موقعے تے فیصلہ کرو کہ تُسی شراب نئیں پیو گے۔ اِنج کرن نال تُسی ثابت کرو گے کہ توانوں دُوجیاں دی فکر اے تے تُسی اوہناں نُوں پیار کردے او تے اپنے نالوں بوہتا اوہناں بارے سوچدے او۔—‏1-‏کُرنتھیوں 10:‏24‏۔‏

ایہدے علاوہ شراب بارے حکومت دے وی کجھ قانون ہوندے نیں۔ اِک مسیحی نُوں اوہ قانون مننے چاہی دے نیں۔ ہو سکدا اے کہ حکومت وَلّوں ایہہ قانون ہووے کہ لوک کسے خاص عمر توں ای شراب پینا شروع کر سکدے نیں یاں فیر ایہہ کہ جے تُسی پیتی ہوئی اے تے تُسی گڈی نہ چلاؤ یاں کوئی مشین نہ چلاؤ۔—‏رومیوں 13:‏1-‏5‏۔‏

سانوں اپنی مرضی نال فیصلے کرن دی آزادی دے کے یہوواہ نے سانوں عزت دِتی اے۔ ایہدے چ ایہہ فیصلہ کرن دی آزادی وی شامل اے کہ اَسی کیہہ کھاواں گے یاں کیہہ پیواں گے۔ دُعا اے کہ ساڈے فیصلیاں توں ثابت ہوئے کہ اَسی اپنی مرضی نال فیصلے کرن دی ایس نعمت دی قدر کرنے آں۔‏