1.‏ ابراہام نُوں ایس گل دی پوری امید کیوں سی کہ اوہدا پُتر پیدا ہوئے گا؟‏

 یہوواہ نے اپنے دوست ابراہام نال وعدہ کیتا سی کہ اوہدے ذریعے زمین دِیاں ساریاں قوماں برکت پان گیاں۔ (‏پیدایش 15:‏5؛‏ 22:‏18‏)‏ کیونکہ ابراہام خدا تے مضبوط ایمان رکھدا سی ایس لئی اوہنوں پورا یقین سی کہ ایہہ وعدہ ضرور پورا ہوئے گا۔ پر جدوں ابراہام تقریباً 100 سال دا سی تے اوہدی بیوی 90 سال دی سی، اوہدوں تک وی اوہناں دا پُتر پیدا نئیں ہویا سی۔ (‏پیدایش 21:‏1-‏7‏)‏ پر بائبل چ دَسیا گیا اے کہ اپنی امید دی بنیاد تے ابراہام نُوں پکا یقین سی کہ اوہ بوہت ساریاں قوماں دا باپ ہووے گا کیونکہ اوہنوں کہیا گیا سی کہ تیری اولاد بے‌شمار ہوئے گی۔ (‏رومیوں 4:‏18‏)‏ اَسی جاننے آں کہ ابراہام دی ایہہ امید پوری ہوئی۔ اوہدا پُتر اِضحاق پیدا ہویا جدے پیدا ہون دی اوہنوں بڑے لمے چِر توں امید سی۔ پر ابراہام نُوں یہوواہ دے وعدیاں تے ایناں پکا یقین کیوں سی؟‏

2.‏ ابراہام نُوں پکا یقین کیوں سی کہ یہوواہ دا وعدہ ضرور پورا ہوئے گا؟‏

² ابراہام دی یہوواہ نال گُوڑھی دوستی سی ایس لئی اوہنوں پکا یقین سی کہ خدا نے جو وعدہ کیتا اے، اوہ ضرور پورا ہوئے گا۔ (‏رومیوں 4:‏21‏)‏ ابراہام دے ایمان دی وجہ توں یہوواہ اوہدے توں خوش سی تے اوہنے اوہنوں نیک ٹھہرایا۔ (‏یعقوب 2:‏23‏)‏ رومیوں 4:‏18 توں پتہ چلدا اے کہ ابراہام دے ایمان دا تعلق اوہدی امید نال سی۔ آؤ ویکھنے آں کہ رومیوں 5 باب چ پولُس نے امید بارے کیہہ کہیا۔‏

3.‏ پولُس رسول نے امید بارے کیہہ دَسیا؟‏

³ پولُس رسول نے کہیا کہ ایہہ ہو نئیں سکدا کہ ساڈی امید پوری نہ ہوئے تے اوہنے ایہدی وجہ وی دَسی۔ (‏رومیوں 5:‏5‏)‏ اوہنے ایہہ سمجھن چ وی مدد کیتی کہ مسیحیاں دی امید کیویں مضبوط ہو  سکدی اے۔ ہُن جدوں اَسی رومیوں 5:‏1-‏5 تے غور کراں گے تے اِنج کردے ویلے سوچو کہ وقت دے نال نال تواڈی امید کیویں مضبوط ہوئی اے۔ ایہناں ایتاں تے غور کردے ویلے تُسی ایہہ وی جان سکو گے کہ تُسی اپنی امید نُوں ہور زیادہ مضبوط کیویں کر سکدے او۔ آؤ، پہلے اوس امید تے گل کرنے آں جدے بارے پولُس نے کہیا کہ ایہہ ضرور پوری ہوئے گی۔‏

4.‏ رومیوں 5:‏1، 2 چ کیس بارے گل کیتی گئی اے؟‏

⁴ رومیوں 5:‏1، 2 نُوں پڑھو۔‏ پولُس نے ایہہ گل روم دی کلیسیا دے ناں اپنے خط چ لکھی۔ اوتھوں دے بھین بھراواں نے یہوواہ تے یسوع بارے سکھیا سی تے اوہناں تے ایمان لیا کے مسیحی بن گئے سن۔ ایس لئی خدا نے اوہناں دے ایمان دی وجہ توں اوہناں نُوں نیک قرار دِتا تے اوہناں نُوں پاک روح نال مسح کیتا۔ ہُن اوہناں نُوں اِک شاندار امید مل گئی سی۔‏

5.‏ مسح‌شُدہ مسیحی کیہہ امید رکھدے نیں؟‏

⁵ پولُس نے بعد چوں اِفسس چ رہن والے مسح‌شُدہ مسیحیاں نُوں جیہڑا خط لکھیا، اوہدے چ اوہنے اوس امید بارے گل کیتی جیہڑی اوہناں نُوں دِتی گئی سی۔ ایس امید چ ایہہ شامل سی کہ اوہناں نُوں قیمتی وراثت ملے گی۔ (‏اِفسیوں 1:‏18‏)‏ ایہدے علاوہ پولُس نے کُلسّے چ رہن والے مسیحیاں نُوں دَسیا کہ ایہہ وراثت کتھے ملے گی۔ اوہنے کہیا:‏ تواڈے لئی ایہہ امید اسمان تے رکھی گئی اے۔ (‏کُلسّیوں 1:‏4، 5‏)‏ ایس لئی اَسی کہہ سکنے آں کہ مسح‌شُدہ مسیحیاں کول ایہہ امید اے کہ اوہناں نُوں اسمان تے ہمیشاں دی زندگی ملے گی جتھے اوہ مسیح دے نال مل کے حکمرانی کرن گے۔—‏1-‏تھسلُنیکیوں 4:‏13-‏17؛‏ مکاشفہ 20:‏6‏۔‏

6.‏ اِک مسح‌شُدہ بھرا نے اپنی امید بارے کیہہ کہیا؟‏

⁶ مسح‌شُدہ مسیحی اوس امید دی بڑی قدر کردے نیں جیہڑی یہوواہ نے اوہناں نُوں دِتی اے۔ اوہناں چوں اِک بھرا فریڈرک فرینز سن۔ اوہناں نے اپنی امید بارے کہیا:‏ ”‏ساڈی امید ضرور پوری ہوئے گی تے یہوواہ نے 1 لکھ 44 ہزار لوکاں نُوں جیہڑا انعام دین دا وعدہ کیتا اے اوہ اوہناں نُوں ضرور ملے گا۔ ساڈا انعام ساڈی سوچ توں وی ودھ کے ہوئے گا۔“‏ کئی سالاں تک وفاداری نال یہوواہ دی خدمت کرن توں بعد 1991 چ بھرا نے کہیا:‏ ”‏ساڈی امید ہُن وی ساڈے لئی بوہت قیمتی اے۔ جِنّاں زیادہ اَسی ایہدے پورے ہون دا اِنتظار کرنے آں اونی زیادہ  ساڈے دل چ ایہدے لئی شکرگزاری ودھدی اے۔ اَسی ایہدے پورے ہون دا اِنتظار کردے رہواں گے، فیر بھانویں ایہہ اِنتظار کِنّاں ای لما کیوں نہ ہووے۔ مَیں اپنی امید دی پہلے نالوں زیادہ قدر کرنا واں۔“‏

7، 8.‏ زیادہ‌تر مسیحیاں کول کیہڑی امید اے؟ (‏رومیوں 8:‏20، 21‏)‏

⁷ زیادہ‌تر مسیحیاں کول فرق امید اے۔ اوہناں نُوں یہوواہ نے اوہی امید دِتی اے جیہڑی اوہنے ابراہام نُوں دِتی سی یعنی زمین تے خدا دی بادشاہی چ ہمیشاں تک زندہ رہن دی امید۔ (‏عبرانیوں 11:‏8-‏10،‏ 13‏)‏ پولُس رسول نے دَسیا کہ جنہاں لوکاں کول ایہہ امید اے، اوہناں نُوں اوتھے کیہڑیاں شاندار برکتاں مِلن گیاں۔ ‏(‏رومیوں 8:‏20، 21 نُوں پڑھو۔)‏ یاد کرو کہ جدوں توانوں پہلی وار مستقبل بارے خدا دے وعدیاں دا پتہ چلیا سی تے توانوں کیہڑی گل سب توں چنگی لگی سی؟ کیہہ توانوں ایہہ چنگا لگیا سی کہ اِک دن آئے گا کہ تُسی بے‌عیب ہو جاؤ گے؟ یاں کیہہ ایہہ جان کے تواڈا دل خوشی نال بھر گیا سی کہ نوِیں دُنیا چ تواڈے عزیز زندہ ہو جان گے؟ ایس امید دی وجہ توں تُسی ضرور مستقبل چ ہون والیاں شاندار چیزاں دا بڑی شدت نال اِنتظار کر رہے ہووو گے۔‏

⁸ بھانویں ساڈے کول اسمان تے ہمیشاں دی زندگی دی امید ہووے یاں فیر زمین تے، ایس امید دی وجہ توں اَسی خوش رہ پانے آں تے ایہہ امید ہور مضبوط ہو سکدی اے۔ پولُس رسول نے اَگے جیہڑی گل کہی، اوہدے توں پتہ چلدا اے کہ ساڈی امید ہور مضبوط کیویں ہو سکدی اے۔ آؤ اوہدی ایس گل تے غور کریئے۔ اِنج کرن نال اَسی پکا یقین رکھ سکاں گے کہ ساڈی امید مضبوط ہوندی رہوے گی تے ایہہ ضرور پوری ہوئے گی۔‏

9، 10.‏ جیویں کہ پولُس رسول دی مثال توں وی پتہ چلدا اے، جدوں ساڈے اُتے مشکلاں آندیاں نیں تے اَسی کیس گل دی توقع کر سکنے آں؟ (‏رومیوں 5:‏3‏)‏ (‏تصویراں نُوں وی ویکھو۔)‏

⁹ رومیوں 5:‏3 نُوں پڑھو۔‏ پولُس رسول نے دَسیا کہ جدوں ساڈے تے مصیبتاں آندیاں نیں تے ساڈی امید ہور مضبوط ہو جاندی اے۔ شاید ایہہ گل سانوں تھوڑی عجیب لگے۔ پر سانوں یاد رکھنا چاہی دا اے کہ مسیح دے کسے وی پیروکار نُوں مصیبتاں دا سامنا ہو سکدا اے۔ ذرا پولُس دی مثال تے غور کرو۔ اوہنے تھسلُنیکے دے مسیحیاں نُوں کہیا:‏ جدوں اَسی تواڈے نال ساں تے اَسی توانوں دَسنے ہُنے ساں کہ سانوں اَذیتاں  چکنیاں پین گیاں تے اِنج ہویا وی اے۔ (‏1-‏تھسلُنیکیوں 3:‏4‏)‏ اوہنے کُرنتھس چ رہن والے مسیحیاں نُوں کہیا:‏ اَسی چاہنے آں کہ تُسی اوہناں مشکلاں بارے جانو جیہڑیاں اَسی برداشت کیتیاں نیں، ایتھوں تک کہ سانوں اپنی جان دا خطرہ سی۔—‏2-‏کُرنتھیوں 1:‏8؛‏ 11:‏23-‏27‏۔‏

¹⁰ اَج وی مسیحیاں نُوں فرق فرق مصیبتاں دا سامنا کرنا پے سکدا اے۔ (‏2-‏تیمُتھیُس 3:‏12‏)‏ ذرا اپنے بارے سوچو۔ جدوں تُسی یسوع تے ایمان لیائے تے اوہدی راہ تے چلنا شروع کیتا تے کیہہ توانوں وی مصیبتاں دا سامنا کرنا پیا؟ شاید تواڈے رشتے‌داراں تے گھر والیاں نے تواڈا مذاق اُڈایا۔ ہو سکدا اے کہ اوہناں نے تواڈے نال بوہت بُرا سلوک کیتا ہووے۔ کیہہ ایمانداری نال کم کرن دی وجہ توں تواڈے کم دی تھاں تے تواڈے لئی مسئلے کھڑے ہو گئے؟ (‏عبرانیوں 13:‏18‏)‏ کیہہ دُوجیاں نُوں اپنی امید بارے دَسن دی وجہ توں توانوں حکومت وَلّوں مخالفت دا سامنا کرنا پیا؟ بھانویں سانوں جیہڑیاں وی مشکلاں دا سامنا کرنا پووے، پولُس رسول نے کہیا کہ اَسی خوش رہ سکنے آں۔ پر کیوں؟‏

11.‏ سانوں ایہہ عزم کیوں کرنا چاہی دا اے کہ اَسی مشکلاں چ ثابت‌قدم رہواں گے؟‏

¹¹ اَسی مشکلاں دے باوجود خوش رہ سکنے آں کیونکہ جدوں اَسی مشکلاں نُوں برداشت کرنے آں تے ساڈے اندر اِک بڑی خاص خوبی پیدا ہوندی اے۔ ایہہ کیہڑی خوبی اے؟ ایہدے بارے رومیوں 5:‏3 چ دَسیا گیا اے کہ مصیبت توں ثابت‌قدمی پیدا ہوندی اے۔ سارے مسیحیاں نُوں مصیبتاں دا سامنا کرنا پووے گا ایس لئی ساریاں نُوں ثابت‌قدمی دی لوڑ اے۔ سانوں ایہہ عزم کرنا چاہی دا اے کہ بھانویں ساڈے اُتے کوئی وی مشکل آ جاوے، اَسی ثابت‌قدم رہواں گے۔ جے اَسی اِنج کراں گے تے فیر ای اَسی اپنی امید نُوں پورا ہوندیاں ویکھ سکاں گے۔ اَسی اوہناں لوکاں وانگوں نئیں بننا چاہندے جنہاں نُوں یسوع نے پتھریلی زمین تے ڈِگن والے بیہہ وانگوں کہیا۔ شروع چ تے اوہناں نے خوشی نال خدا دے کلام نُوں قبول کیتا پر جدوں اوہناں نُوں ”‏مصیبتاں تے ظلم“‏ دا سامنا کرنا پیا تے اوہناں نے فوراً ایس کلام نُوں چھڈ دِتا۔ (‏متی 13:‏5، 6،‏ 20، 21‏)‏ سچ اے کہ مصیبتاں تے ظلم سہنا اسان نئیں ہوندا پر جدوں اَسی ایہناں چ ثابت‌قدم رہنے آں تے ایہدے بڑے فائدے ہوندے نیں۔ پر کیس لحاظ نال؟‏

12.‏ جدوں اَسی مصیبتاں چ ثابت‌قدم رہنے آں تے سانوں کیہہ فائدہ ہوندا اے؟‏

¹² یعقوب نے دَسیا کہ مصیبتاں چ ثابت‌قدم رہن نال کیہڑے فائدے ہوندے نیں۔ اوہنے کہیا:‏ ثابت قدمی نُوں اپنا کم پورا کر لین دَوو تاکہ تُسی ہر گل چ کامل تے بے‌داغ ہووو یعنی تواڈے چ کوئی کمی نہ ہووے۔ (‏یعقوب 1:‏2-‏4‏)‏ یعقوب دَس رہیا سی کہ ثابت‌قدمی اِک بڑا خاص کم کردی اے۔ اوہ کیہڑا کم اے؟ ایہہ تواڈی مدد کردی اے تاکہ تُسی اپنے اندر ہور صبر پیدا کر سکو، اپنے ایمان نُوں مضبوط کر سکو تے خدا اُتے ہور زیادہ بھروسا رکھ سکو۔ پر مصیبتاں چ ثابت‌قدم رہن دا اِک ہور فائدہ وی اے۔‏

13، 14.‏ ثابت‌قدم رہن دا اِک ہور فائدہ کیہہ اے تے ایہدے توں ساڈی امید تے کیہہ اثر پیندا اے؟ (‏رومیوں 5:‏4‏)‏

¹³ رومیوں 5:‏4 نُوں پڑھو۔‏ پولُس نے دَسیا کہ ثابت‌قدمی توں خدا دی خوشنودی حاصل ہوندی اے۔ یہوواہ تواڈی ثابت‌قدمی نُوں ویکھ کے خوش ہوندا اے۔ ایہدا مطلب ایہہ نئیں اے کہ یہوواہ ایس گلوں خوش ہوندا اے کہ توانوں مصیبتاں تے مشکلاں دا سامنا کرنا پے رہیا اے۔ اصل چ اوہ تواڈے توں خوش ہوندا اے۔ ثابت‌قدم رہن دی وجہ توں توانوں اوہدی خوشنودی حاصل ہوندی اے۔ ایہہ کِنّی وڈی برکت اے۔—‏زبور 5:‏12‏۔‏

¹⁴ توانوں یاد ہوئے گا کہ ابراہام نے ثابت‌قدمی نال مشکلاں نُوں برداشت کیتا تے ایس وجہ توں یہوواہ اوہدے توں خوش ہویا۔ یہوواہ نے اوہنوں اپنا دوست کہیا تے اوہنوں نیک خیال کیتا۔ (‏پیدایش 15:‏6؛‏ رومیوں 4:‏13،‏ 22‏)‏ ایہہ گل ساڈے بارے وی سچ ہو سکدی اے۔ خدا دی خوشنودی سانوں ایس وجہ توں نئیں مِلدی کہ اَسی اوہدی خدمت چ بوہت کجھ کر رہے آں یاں ساڈے کول بوہت ساریاں ذمے‌داریاں نیں۔ اصل چ سانوں اوہدی خوشنودی اوہدوں مِلدی اے جدوں اَسی مشکلاں چ وی ثابت‌قدم رہنے آں۔ بھانویں ساڈی عمر تے طاقت جِنّی وی ہووے یاں ساڈے حالات جیہو جہے وی ہون، اَسی سارے ثابت‌قدم  رہ سکنے آں۔ کیہہ تُسی ہُن کسے مشکل دا ثابت‌قدمی نال سامنا کر رہے او؟ جے ہاں تے ایس گل دا یقین رکھو کہ خدا تواڈے توں بوہت خوش اے۔ جدوں اَسی ایہہ جان جانے آں کہ خدا ساڈے توں خوش اے تے ایہدا ساڈے تے بڑا گُوڑھا اثر پیندا اے۔ ایہدی وجہ توں ساڈی امید ہور مضبوط ہو جاندی اے۔‏

15.‏ رومیوں 5:‏4، 5 چ پولُس نے اَگے کیہہ کہیا تے ایہہ گل شاید کجھ لوکاں نُوں سمجھ کیوں نہ آوے؟‏

¹⁵ جیویں کہ پولُس رسول نے دَسیا جدوں اَسی ثابت‌قدمی نال اپنیاں مشکلاں نُوں برداشت کرنے آں تے سانوں یہوواہ دی خوشنودی مِلدی اے۔ غور کرو کہ اوہنے اَگے کیہہ کہیا:‏ خدا دی خوشنودی توں امید مِلدی اے تے ہو نئیں سکدا کہ ایہہ امید پوری نہ ہووے۔ (‏رومیوں 5:‏4، 5‏)‏ شاید ایہہ گل کجھ لوکاں نُوں سمجھ نہ آوے۔ پر کیوں؟ کیونکہ رومیوں 5:‏2 چ پولُس نے کہیا کہ روم چ رہن والے مسیحیاں کول پہلے ای اِک شاندار رُتبے دی امید سی۔ ایس وجہ توں شاید کجھ لوک کہن کہ ”‏جے اوہناں مسیحیاں کول پہلاں توں ای اِک امید ہے سی تے پولُس نے امید دا ذکر دُبارہ کیوں کیتا؟“‏

16.‏ اِک بندے دی امید وقت دے نال نال کیویں مضبوط ہوندی جاندی اے؟ (‏تصویراں نُوں وی ویکھو۔)‏

¹⁶ پولُس دی گل دا مطلب سمجھن لئی سانوں ایس گل تے غور کرنا چاہی دا اے کہ ساڈی امید وقت دے نال نال مضبوط ہوندی جاندی اے۔ ذرا ایس مثال تے غور کرو۔ کیہہ توانوں اوہ وقت یاد اے جدوں تُسی خدا دے کلام چ لکھی امید بارے پہلی واری سنیا سی۔ شاید اوس ویلے توانوں زمین تے ہمیشاں دی زندگی دا خیال تے بڑا چنگا لگیا ہووے۔ پر شاید تُسی سوچیا ہووے کہ کیہہ ایہہ امید واقعی پوری ہووے گی۔ پر جدوں تُسی یہوواہ تے اوہدے وعدیاں بارے ہور زیادہ جان گئے تے توانوں ایس گل دا پکا یقین ہو گیا کہ ایہہ امید ضرور پوری ہوئے گی۔‏

17.‏ بپتسمہ لین توں بعد تواڈی امید کیویں مضبوط ہوندی گئی؟‏

¹⁷ بپتسمہ لین توں بعد وی جدوں تُسی یہوواہ بارے ہور زیادہ سکھدے گئے تے اوہنوں ہور زیادہ پیار کرن لگ پئے تے تواڈی امید وی مضبوط ہوندی گئی۔ (‏عبرانیوں 5:‏13–‏6:‏1‏)‏ شاید تُسی اوہناں گلاں دا تجربہ کیتا  جیہڑیاں رومیوں 5:‏2-‏4 چ لکھیاں نیں۔ تواڈے سامنے بوہت ساریاں مشکلاں آئیاں پر تُسی اوہناں نُوں ثابت‌قدمی نال برداشت کیتا تے اِنج توانوں محسوس ہویا کہ یہوواہ تواڈے توں خوش اے۔ ایس گل دی وجہ توں تواڈی ایہہ امید ہور زیادہ مضبوط ہو گئی کہ خدا اپنے وعدے ضرور پورے کرے گا۔ ہُن تواڈی امید تواڈے لئی کوئی خواب نئیں رہی۔ ہُن ایہہ تواڈے دل تے ہور وی گُوڑھا اثر پاندی اے۔ اِک لحاظ نال ایہہ تواڈی زندگی دی ہر چیز تے اثر پاندی اے۔ ایہہ تواڈی مدد کردی اے کہ تُسی اپنے گھر والیاں نال چنگی طرحاں پیش آؤ، چنگے فیصلے کرو تے اپنے وقت نُوں چنگی طرحاں استمال کرو۔‏

18.‏ یہوواہ نے سانوں کیس گل دا یقین دَوایا اے؟‏

¹⁸ خدا دی خوشنودی نُوں حاصل کرن توں بعد سانوں جیہڑی امید مِلدی اے اوہدے بارے پولُس نے بڑی خاص گل دَسی۔ اوہنے دَسیا کہ ساڈی امید ضرور پوری ہوئے گی۔‏ اَسی ایس گل تے ایناں پکا یقین کیوں رکھ سکنے آں؟ ایس بارے پولُس رسول نے دَسیا:‏ ہو نئیں سکدا کہ ایہہ امید پوری نہ ہووے؛ ایس لئی خوش ہووو کیونکہ جیہڑی پاک روح توانوں دِتی گئی اے اوہدے ذریعے ساڈے دل خدا دی محبت نال بھر گئے نیں۔ (‏رومیوں 5:‏5‏)‏ ایس لئی تُسی ایس گل تے پورا یقین رکھ سکدے او کہ یہوواہ نے توانوں جیہڑی امید دِتی اے، اوہ ضرور پوری ہوئے گی۔‏

19.‏ تُسی اپنی امید بارے کیس گل دا پکا یقین رکھ سکدے او؟‏

¹⁹ ایس گل تے سوچ وچار کرو کہ یہوواہ نے ابراہام نال کیہڑا وعدہ کیتا، اوہ اوہدے توں خوش کیوں سی تے اوہنے اوہنوں اپنا دوست کیوں کہیا۔ ابراہام دی امید پوری ہوئی سی۔ بائبل چ لکھیا اے:‏ ابراہام نے صبر کیتا تے فیر اوہدے نال ایہہ وعدہ کیتا گیا۔ (‏عبرانیوں 6:‏15؛‏ 11:‏9،‏ 18؛‏ رومیوں 4:‏20-‏22‏)‏ ابراہام مایوس نئیں ہویا۔ تُسی وی ایس گل دا پکا یقین رکھ سکدے او کہ جے تُسی یہوواہ دے وفادار رہوو گے تے تواڈی امید ضرور پوری ہوئے گی۔ تواڈی امید کوئی خواب نئیں اے۔ ایہہ توانوں خوشی دیندی اے، مایوسی نئیں۔ (‏رومیوں 12:‏12‏)‏ پولُس رسول نے کہیا:‏ خدا جیہڑا سانوں امید دیندا اے، توانوں خوشی تے اِطمینان دَوے تاکہ پاک روح دی طاقت نال تواڈی امید ہور مضبوط ہو جائے کیونکہ تُسی اوہدے تے بھروسا کردے او۔—‏رومیوں 15:‏13‏۔‏