1.‏ نوجوان بھراواں نُوں پُختہ مسیحی بنن لئی کیہہ کرن دی لوڑ اے؟‏

 بادشاہ داؤد نے اپنے پُتر سلیمان نُوں ایہہ نصیحت کیتی:‏ تُوں مضبوط ہو تے مرد بن۔ (‏1-‏سلاطین 2:‏1-‏3‏)‏ اَج مسیحی بھراواں نُوں ایس نصیحت تے عمل کرن دی پوری کوشش کرنی چاہی دی اے۔ اِنج کرن لئی اوہناں نُوں سکھن دی لوڑ اے کہ اوہ خدا دے حکماں تے کیویں عمل کر سکدے نیں تے اپنی زندگی چ بائبل دے اصولاں نُوں کیویں لاگو کر سکدے نیں۔ (‏لُوقا 2:‏52‏)‏ پر ایہہ کیوں ضروری اے کہ نوجوان بھرا پُختہ مسیحی بنن؟‏

2، 3.‏ نوجوان بھراواں لئی ایہہ کیوں ضروری اے کہ اوہ پُختہ مسیحی بنن؟‏

² اِک مسیحی بھرا کول اپنے گھر تے کلیسیا چ بوہت ساریاں ذمے‌داریاں ہوندیاں نیں۔ نوجوان بھراوو، تُسی ضرور اوہناں ذمے‌داریاں بارے سوچیا ہوئے گا جیہڑیاں توانوں مستقبل چ چکنیاں پے سکدیاں نیں۔ ہو سکدا اے کہ تواڈا منصوبہ ہووے کہ تُسی کل وقتی طور تے یہوواہ دی خدمت کرو گے، کلیسیا چ خادم بنو گے تے بعد چوں بزرگ بنن دی کوشش کرو گے۔ ایہہ وی ہوسکدا اے کہ تُسی شادی کرن تے بچے پیدا کرن دی خواہش رکھدے ہووو۔ (‏اِفسیوں 6:‏4؛‏ 1-‏تیمُتھیُس 3:‏1‏)‏ توانوں ایہناں منصوبیاں نُوں پورا کرن تے ایہناں چ کامیاب ہون لئی پُختہ مسیحی بنن دی لوڑ اے۔‏ b

³ کیہڑی چیز پُختہ مسیحی بنن چ تواڈی مدد کر سکدی اے؟ اِنج کرن لئی توانوں اپنے اندر کجھ مہارتاں پیدا کرن دی لوڑ اے۔ پر تُسی ہُن کیہہ کر سکدے او تاکہ تُسی مستقبل چ ذمے‌داریاں چُکن لئی تیار ہو جاؤ؟‏

4.‏ توانوں ایہو جہیاں مثالاں کتھوں مل سکدیاں نیں جنہاں توں تُسی پختہ مسیحی بننا سکھ سکدے او؟ (‏تصویر نُوں وی ویکھو۔)‏

⁴ چنگیاں مثالاں تے غور کرو۔‏ بائبل چ ایہو جہے بوہت سارے جوان آدمیاں بارے دَسیا  گیا اے جنہاں دی مثال توں تُسی بوہت کجھ سکھ سکدے او۔ ایہہ آدمی خدا نال محبت کردے سن تے اوہدے بندیاں دی دیکھ‌بھال کرن لئی بوہت ساریاں ذمے‌داریاں نبھا رہے سن۔ توانوں اپنے گھر تے کلیسیا چ وی ایہو جہے پُختہ مسیحی مل سکدے نیں جنہاں دی مثال تے تُسی غور کر سکدے او۔ (‏عبرانیوں 13:‏7‏)‏ ساریاں نالوں ودھ کے تواڈے کول یسوع دی مثال اے۔ (‏1-‏پطرس 2:‏21‏)‏ ایہناں لوکاں دِیاں مثالاں تے سوچ وچار کردے ویلے ایہناں دِیاں خوبیاں تے غور کرو۔ (‏عبرانیوں 12:‏1، 2‏)‏ تے فیر ویکھو کہ تُسی ایہناں وانگوں کیویں بن سکدے او۔‏

5.‏ تُسی اپنی سوچن سمجھن دی صلاحیت نُوں کیویں ودھا سکدے او تے ایہہ ضروری کیوں اے؟ (‏زبور 119:‏9‏)‏

⁵ سوچن سمجھن دی صلاحیت دی حفاظت کرو تے ایہنوں ودھاؤ۔‏ (‏امثال 3:‏21‏)‏ جیس انسان چ سوچن سمجھن دی صلاحیت ہوندی اے، اوہ کوئی وی کم کرن توں پہلاں چنگی طرحاں سوچدا اے۔ ایس لئی اپنے اندر ایس صلاحیت نُوں ودھان تے ایہنوں قائم رکھن دی کوشش کرو۔ اِنج کرنا کیوں ضروری اے؟ کیونکہ اَج دُنیا چ زیادہ تر نوجوان صرف اپنی سوچ تے احساسات مطابق ای فیصلے کردے نیں۔ (‏امثال 7:‏7؛‏ 29:‏11‏)‏ ٹی‌وی، فلماں، اِنٹرنیٹ تے سوشل میڈیا دا وی تواڈی سوچ تے کماں اُتے بڑا گُوڑھا اثر پے سکدا اے۔ تُسی اپنی سوچن سمجھن دی صلاحیت نُوں کیویں ودھا سکدے او؟ بائبل چ دِتے گئے اصولاں نُوں سکھو تے سوچو کہ ایہناں تے چلن نال توانوں کیہہ فائدہ ہوئے گا تے فیر ایہناں تے عمل کر کے ایہو جہے فیصلے کرو جنہاں توں یہوواہ خوش ہوئے۔ ‏(‏زبور 119:‏9 نُوں پڑھو۔)‏ جے تُسی اپنی سوچن سمجھن دی صلاحیت نُوں ودھاؤ گے تے تُسی پُختہ مسیحی بنن وَل اِک اہم قدم ودھا رہے ہووو گے۔ (‏امثال 2:‏11، 12؛‏ عبرانیوں 5:‏14‏)‏ ذرا غور کرو کہ سوچن سمجھن دی صلاحیت ایہناں دو معاملیاں چ تواڈی مدد کیویں کر سکدی اے:‏ (‏1)‏بھیناں نال پیش آندے ویلے تے (‏2)‏اپنے کپڑیاں تے والاں دے سٹائل بارے فیصلہ کردے ویلے۔‏

6.‏ سوچن سمجھن دی صلاحیت اِک بھرا دی کیویں مدد کر سکدی اے کہ اوہ بھیناں لئی عزت ظاہر کرے؟‏

⁶ سوچن سمجھن دی صلاحیت تواڈی مدد کرے گی کہ تُسی بھیناں لئی عزت وکھاؤ۔ مثال لئی، اِک نوجوان بھرا نُوں کوئی بھین چنگی لگن لگ پیندی اے تے اوہ اوہنوں ہور جاننا چاہندا اے۔ ایہدے چ کوئی حرج نئیں اے پر جے اوہدا اوس بھین نال شادی کرن دا ارادہ نئیں اے تے اوہنوں اپنی سوچن سمجھن دی صلاحیت نُوں استمال کردے ہوئے نہ تے کوئی ایہو جہی گل کہنی چاہی دی اے تے نہ ای کوئی ایہو جیہا کم کرنا چاہی دا اے جدے توں اوس بھین نُوں کوئی غلط اشارہ ملے۔ (‏1-‏تیمُتھیُس 5:‏1، 2‏)‏ پر جے اوہ شادی دے ارادے نال اوہدے نال وقت گزار رہیا اے تے اوہنوں اِنج کردے  ویلے کسے تیجے بندے نُوں اپنے نال رکھنا چاہی دا اے تاکہ اوس بھین دی نیک نامی خراب نہ ہووے۔—‏1-‏کُرنتھیوں 6:‏18‏۔‏

7.‏ سوچن سمجھن دی صلاحیت اِک نوجوان بھرا دی کپڑیاں تے والاں دے فیشن بارے فیصلہ کردے ویلے کیویں مدد کر سکدی اے؟‏

⁷ نوجوان بھرا اپنے کپڑیاں تے والاں دے سٹائل دے معاملے چ وی اپنی سوچن سمجھن دی صلاحیت نُوں استمال کر سکدے نیں۔ اکثر کپڑیاں تے والاں دے فیشن ایہو جہے لوک شروع کردے نیں جیہڑے یہوواہ دے معیاراں دا احترام نئیں کردے تے بدچلن زندگی گزار رہے ہوندے نیں۔ اوہناں دی سوچ اوہناں دے فیشن توں صاف نظر آندی اے کیونکہ اوہناں دے بنائے کپڑے یاں تے بڑے تنگ ہوندے نیں یاں فیر ایہو جہے ہوندے نیں جدی وجہ توں مرد عورتاں وانگوں نظر آندے نیں۔ جیہڑے نوجوان بھرا پُختہ مسیحی بنن دی کوشش کر رہے نیں، اوہ کپڑیاں دے حوالے نال فیصلہ لیندے ویلے بائبل دے اصول تے پُختہ مسیحی بھراواں کولوں مدد لے سکدے نیں۔ اوہ اپنے آپ کولوں پچھ سکدے نیں:‏ ”‏کیہہ میرے کپڑیاں تے والاں دے سٹائل توں نظر آندا اے کہ مَیں سمجھ‌دار آں تے دُوجیاں دا لحاظ رکھنا واں؟ مَیں جیہو جہے کپڑے پانا واں کیہہ اوہناں توں ایہہ ظاہر ہوندا اے کہ مَیں دلوں یہوواہ دی عبادت کرنا واں؟“‏ (‏1-‏کُرنتھیوں 10:‏31-‏33؛‏ طِطُس 2:‏6‏)‏ جیہڑے نوجوان بھرا اپنی سوچن سمجھن دی صلاحیت نُوں استمال کردے نیں، اوہ نہ صرف اپنی کلیسیا دے بھین بھراواں دی نظر چ سگوں اپنے اسمانی باپ دی نظر چ وی عزت پاندے نیں۔‏

8.‏ اِک نوجوان بھرا بھروسے دے لائق کیویں بن سکدا اے؟‏

⁸ بھروسے دے لائق بنو۔‏ جیہڑا بھرا بھروسے دے لائق ہوندا اے، اوہ بڑی محنت نال اپنیاں ساریاں ذمے‌داریاں نُوں پورا کردا اے۔ (‏لُوقا 16:‏10‏)‏ ذرا یسوع دی مثال تے غور کرو۔ اوہ اپنیاں ذمے‌داریاں بارے لاپرواہ نئیں سی۔ ایہدی بجائے اوہنے جی جان نال اپنیاں اوہناں ذمے‌داریاں نُوں پورا کیتا جیہڑیاں یہوواہ نے اوہنوں دِتیاں سن، اوس ویلے وی جدوں اِنج کرنا اوہدے لئی اسان نئیں سی۔ اوہنوں لوکاں نال پیار سی، خاص کر اپنے شاگرداں نال۔ ایس لئی اوہنے اوہناں واسطے اپنی جان دے دِتی۔ (‏یوحنا 13:‏1‏)‏ یسوع دی مثال تے عمل کردے ہوئے تُسی وی اپنیاں ذمے‌داریاں نُوں جی جان نال پورا کرو۔ جے توانوں نئیں پتہ کہ کسے ذمے‌داری نُوں کیویں پورا کرنا اے تے خاکسار بنو تے کلیسیا دے پُختہ بھراواں کولوں مدد منگو۔ بس اوناں کُو کم نہ کرو جِنّاں کُو ضروری اے۔ (‏رومیوں 12:‏11‏)‏ سگوں اپنی ذمے‌داری نُوں ایہہ سوچ کے چنگی طرحاں پورا کرو کہ ایہہ کم تُسی یہوواہ لئی کر رہے او، انساناں لئی نئیں۔ (‏کُلسّیوں 3:‏23‏)‏ سچ اے کہ تُسی بے‌عیب نئیں او ایس لئی تواڈے کولوں غلطیاں ہون گیاں۔ پر جدوں اِنج ہوئے تے خاکسار رہوو تے اپنی غلطی نُوں منو۔—‏امثال 11:‏2‏۔‏

9.‏ اِک نوجوان بھرا لئی ایہہ کیوں ضروری اے کہ اوہ مہارتاں تے ہنر سکھے؟‏

⁹ جے تُسی اِک پُختہ مسیحی بننا چاہندے او تے توانوں ایہو جہے ہنر تے مہارتاں سکھن دی لوڑ اے جیہڑیاں زندگی چ تواڈے کم آن گیاں۔ ایہہ تواڈی مدد کرن گیاں کہ تُسی کلیسیا چ اپنیاں ذمے‌داریاں نبھا سکو، اپنی تے اپنے خاندان دِیاں ضرورتاں نُوں پورا کر سکو تے دُوجیاں نال چنگے تعلقات رکھ سکو۔ ذرا ایہناں وچوں کجھ مہارتاں تے غور کرو۔‏

10، 11.‏ جے اِک بھرا نُوں چنگی طرحاں پڑھنا لکھنا آندا ہوئے گا تے ایہدے توں اوہنوں تے کلیسیا نُوں کیہہ فائدہ ہوئے گا؟ (‏زبور 1:‏1-‏3‏)‏ (‏تصویر نُوں وی ویکھو۔)‏

¹⁰ چنگی طرحاں پڑھنا تے لکھنا سکھو۔‏ بائبل چ دَسیا گیا  اے کہ جیہڑا بندہ ہر روز خدا دے کلام نُوں پڑھدا اے تے ایہدے تے سوچ وچار کردا اے اوہ خوش رہندا اے تے کامیاب ہوندا اے۔ ‏(‏زبور 1:‏1-‏3 نُوں پڑھو۔)‏ جدوں اِک بندہ ہر روز بائبل پڑھدا اے تے اوہ یہوواہ دی سوچ نُوں جان پاندا اے۔ اِنج اوہدی سوچن سمجھن دی صلاحیت ودھدی اے تے اوہ ایہہ وی سکھ لیندا اے کہ اوہ اپنی زندگی چ بائبل دے اصولاں نُوں کیویں کم چ لیا سکدا اے۔ (‏امثال 1:‏3، 4‏)‏ کلیسیا چ ایہو جہے بھراواں دی بڑی لوڑ اے۔ پر کیوں؟‏

¹¹ ساڈے بھین بھراواں نُوں ایہو جہے بھراواں دی مدد چاہی دی ہوندی اے جیہڑے اوہناں نُوں بائبل چوں تلیم تے چنگے مشورے دے سکدے نیں۔ (‏طِطُس 1:‏9‏)‏ جے توانوں چنگی طرحاں پڑھنا تے لکھنا آندا ہوئے گا تے تُسی ایہو جہیاں تقریراں تے جواب تیار کر سکو گے جنہاں توں دُوجیاں نُوں بڑا فائدہ ہوئے گا تے اوہناں دا ایمان مضبوط ہوئے گا۔ تُسی بائبل دا ذاتی مطالعیا کر دے ویلے تے اجلاساں تے کنونشناں دِیاں تقریراں سُن‌دے ویلے ایہو جیہاں گلاں نوٹ کر کے لکھ سکو گے جیہڑیاں اَگے چل کے تواڈے بڑے کم آن گیاں۔ ایہہ گلاں تواڈی مدد کرن گیاں کہ تُسی اپنے ایمان نُوں مضبوط کر سکو تے دُوجیاں دا حوصلہ ودھا سکو۔‏

12.‏ لوکاں نال گل بات کرن دی مہارت نُوں نکھارن چ کیہڑی چیز تواڈی مدد کرے گی؟‏

¹² گل بات کرن دی مہارت نُوں نکھارو۔‏ اِک مسیحی بھرا نُوں دُوجیاں نال چنگی طرحاں گل بات کرنا آنا چاہی دا اے۔ جیہڑے بندے کول گل بات کرن دا ہنر ہوندا اے، اوہ دُوجیاں دی گل نُوں دھیان نال سُن‌دا اے تے اوہناں دی سوچ تے احساسات نُوں سمجھدا اے۔ (‏امثال 20:‏5‏)‏ اوہ دُوجیاں دے لہجے تے اوہناں دے چہرے دے تاثرات توں سمجھ جاندا اے کہ اوہ کیہو جیہا محسوس کر رہے نیں۔ پر جے تُسی لوکاں نال رابطے چ رہن لئی صرف اوہناں نُوں ای‌میل یاں میسج ای کرو گے تے تُسی اوہناں نال چنگی طرحاں گل بات نئیں کر سکو گے تے نہ ای اوہناں دے احساسات نُوں سمجھ سکو گے۔ ایس لئی ایہو جہے موقعے لبھدے رہوو جدے وچ تُسی لوکاں دے نال بہہ کے وقت گزارو۔—‏2-‏یوحنا 12‏۔‏

13.‏ نوجوان بھراواں نُوں ہور کیہہ سکھنا چاہی دا اے؟ (‏1-‏تیمُتھیُس 5:‏8‏)‏ (‏تصویر نُوں وی ویکھو۔)‏

¹³ کجھ ہنر سکھو۔‏ اِک پُختہ مسیحی بھرا نُوں ایس لائق ہونا چاہی دا اے کہ اوہ اپنیاں تے اپنے گھر والیاں دِیاں ضرورتاں نُوں پورا کر سکے۔ ‏(‏1-‏تیمُتھیُس 5:‏8 نُوں پڑھو۔)‏ کجھ مُلکاں چ جوان بھرا اپنے ابو یاں کسے ہور رشتے‌دار کولوں کوئی ہنر سکھدے نیں۔ پر کجھ مُلکاں چ نوجوان اپنے سکول توں یاں کسے اِدارے توں ہنر سکھدے نیں۔ بھانویں نوجوان کسے وی طرحاں ہنر سکھن، ایہہ اَ گے چل کے نوکری لبھن چ اوہناں دے بڑے کم آندے نیں۔ (‏اعمال 18:‏2، 3؛‏ 20:‏34؛‏ اِفسیوں 4:‏28‏)‏ محنت نال کم کرو تے جیہڑا کم شروع کردے او، اوہنوں مکمل وی کرو۔ جدوں دُوجے ایہہ ویکھن گے تے اوہ تواڈے کم دی بڑی قدر کرن گے تے توانوں نوکری ملنا وی زیادہ اسان ہو جائے گا۔ جے نوجوان بھرا اَج اوہناں خوبیاں نُوں پیدا  کرن گے تے اوہناں مہارتاں نُوں سکھن گے جنہاں دا ذکر ایس مضمون چ ہویا اے تے اوہ کل نُوں اپنیاں ذمے‌داریاں نُوں چنگی طرحاں نبھا سکن گے۔ آؤ، ایہناں وچوں کجھ ذمے‌داریاں تے غور کریئے۔‏

14.‏ اِک جوان بھرا کل وقتی طور تے یہوواہ دی خدمت کرن لئی اپنے آپ نُوں کیویں تیار کر سکدا اے؟‏

¹⁴ کل وقتی خادم۔‏ بوہت سارے پُختہ مسیحی بھراواں نے چھوٹی عمر چ ای یہوواہ دی خدمت کرنی شروع کیتی سی۔ پہل‌کار دے طور تے خدمت کرن نال اِک نوجوان بھرا ایہہ سکھ پاندا اے کہ اوہ فرق فرق لوکاں نال مل کے کیویں کم کر سکدا اے تے اوہ جیہڑے پیسے کماندا اے، اوہناں چ چنگی طرحاں گزارہ کیویں کر سکدا اے۔ (‏فِلپّیوں 4:‏11-‏13‏)‏ کل وقتی طور تے یہوواہ دی خدمت شروع کرن دا اِک چنگا طریقہ ایہہ وے کہ تُسی مددگار پہل‌کار بنو۔ بوہت سارے بھین بھراواں نے شروع چ مددگار پہل‌کار دے طور تے خدمت کیتی۔ اِنج اوہناں نُوں مدد ملی کہ اوہ پہل‌کار بن سکن۔ پہل‌کار بنن نال نوجوان بھراواں نُوں کل وقتی طور تے یہوواہ دی خدمت کرن دے ہور وی بوہت سارے موقعے مل سکدے نیں جیویں کہ تعمیر دے شعبے یاں بیت‌ایل چ خدمت کرن دا موقع۔‏

15، 16.‏ اِک نوجوان بھرا کلیسیا چ بزرگ یاں خادم بنن دے لائق کیویں بن سکدا اے؟‏

¹⁵ کلیسیا چ بزرگ یاں خادم۔‏ سارے بھراواں نُوں کوشش کرنی چاہی دی اے کہ اوہ کلیسیا چ بزرگ دے طور تے خدمت کرن دے لائق بنن تاکہ اوہ بھین بھراواں دی مدد کر سکن۔ بائبل چ دَسیا گیا اے کہ جیہڑے بھرا اِنج کرن بارے سوچدے نیں، اوہ اِک چنگے کم دی خواہش رکھدے نیں۔ (‏1-‏تیمُتھیُس 3:‏1‏)‏ پر اِک بھرا نُوں بزرگ بنن توں پہلاں خادم بنن دے لائق ہونا چاہی دا اے۔ خادم کلیسیا چ فرق فرق کماں چ بزرگاں دی مدد کردے نیں۔ بزرگ تے خادم بڑی خاکساری نال کلیسیا چ بھین بھراواں دی خدمت کردے نیں تے دل لا کے مُنادی کردے نیں۔ نوجوان بھرا وی کلیسیا چ خادم بنن دے لائق بن سکدے نیں۔ جے کوئی نوجوان بھرا بڑے چنگے طریقے نال خادم دے طور تے کم کر رہیا اے تے اوہ 25 سال دی عمر تک پونچن توں پہلاں ای بزرگ بن سکدا اے۔‏

¹⁶ تُسی ایہناں ذمے‌داریاں نُوں چُکن دے لائق کیویں بن سکدے او؟ بائبل چ ایہدا کوئی فارمولا تے نئیں دَسیا گیا پر ایہدے چ کجھ شرطاں ضرور دَسیاں گئیاں نیں جنہاں تے توانوں پورا اُترن دی لوڑ اے۔ ایہناں شرطاں دی بنیاد یہوواہ، اپنے خاندان تے کلیسیا لئی محبت اے۔ (‏1-‏تیمُتھیُس 3:‏1-‏13؛‏ طِطُس 1:‏6-‏9؛‏ 1-‏پطرس 5:‏2، 3‏)‏ ایہناں شرطاں نُوں چنگی طرحاں سمجھن دی کوشش کرو۔ فیر یہوواہ کولوں مدد منگو تاکہ تُسی ایہناں تے پورا اُتر سکو۔‏ c

17.‏ اِک نوجوان بھرا شوہر یاں گھر دا سربراہ بنن لئی اپنے آپ نُوں کیویں تیار کر سکدا اے؟ (‏تصویر نُوں وی ویکھو۔)‏

¹⁷ شوہر تے گھر دا سربراہ۔‏ جیویں کہ یسوع نے دَسیا، کجھ پُختہ مسیحی  بھرا ایہہ فیصلہ کردے نیں کہ اوہ شادی نئیں کرن گے۔ (‏متی 19:‏12‏)‏ پر جے تُسی شادی کرن دا فیصلہ کردے او تے تواڈے تے اِک شوہر تے گھر دے سربراہ دی ذمے‌داری آ جاندی اے۔ (‏1-‏کُرنتھیوں 11:‏3‏)‏ یہوواہ چاہندا اے کہ اِک شوہر اپنی بیوی نال پیار کرے، اوہدیاں ضرورتاں نُوں پورا کرے، اوہدا چنگا دوست بنے تے یہوواہ دے نیڑے رہن چ اوہدی مدد کرے۔ (‏اِفسیوں 5:‏28، 29‏)‏ ایس مضمون چ جیہڑیاں خوبیاں تے مہارتاں بارے دَسیا گیا اے، اوہ اِک چنگا شوہر بنن چ تواڈی مدد کرن گیاں، جیویں کہ سوچن سمجھن دی صلاحیت نُوں ودھانا، عورتاں دی عزت کرنا تے بھروسے دے لائق بننا۔ جے تُسی ایہناں خوبیاں تے مہارتاں نُوں پیدا کرو گے تے تُسی اِک شوہر تے گھر دے سربراہ دے طور تے ذمے‌داریاں چُکن لئی تیار ہو جاؤ گے۔‏

18.‏ اِک نوجوان بھرا ہُن توں ای اپنے آپ نُوں کیویں تیار کر سکدا اے تاکہ اوہ مستقبل چ اِک چنگا باپ ثابت ہوئے؟‏

¹⁸ باپ۔‏ ہو سکدا اے کہ شادی دے بعد تُسی باپ بنو۔ اِک چنگا باپ بنن بارے تُسی یہوواہ کولوں بوہت کجھ سکھ سکدے او۔ (‏اِفسیوں 6:‏4‏)‏ یہوواہ نے کُھل کے اپنے پُتر یسوع مسیح نُوں دَسیا کہ اوہ اوہنوں پیار کردا اے تے اوہدے توں خوش اے۔ (‏متی 3:‏17‏)‏ جے تُسی باپ بنو گے تے ایس گل دا خیال رکھنا کہ تُسی باقاعدگی نال اپنے بچیاں نُوں دَسو کہ تُسی اوہناں نُوں پیار کردے او۔ اوہناں دے چنگے کماں لئی اوہناں نُوں شاباش دَوو۔ جیہڑا باپ یہوواہ دی مثال تے عمل کردا اے، اوہ اپنے بچیاں دی پُختہ مسیحی بنن چ مدد کردا اے۔ تُسی ہُن توں ای اپنے آپ نُوں ایس ذمے‌داری لئی کیویں تیار کر سکدے او؟ تُسی اپنے گھر والیاں تے کلیسیا دے بھین بھراواں دا خیال رکھ سکدے او تے اوہناں نُوں کُھل کے دَس سکدے او کہ تُسی اوہناں نُوں پیار کردے او تے اوہناں دی بڑی قدر کردے او۔ (‏یوحنا 15:‏9‏)‏ اِنج کرن نال تُسی مستقبل چ اِک چنگا شوہر تے باپ بنن لئی اپنے آپ نُوں تیار کر سکو گے۔ پر جدوں تک اوہ ویلا نئیں آندا، دل لا کے یہوواہ لئی کم کردے رہوو تے اپنے گھر والیاں تے کلیسیا دے بھین بھراواں دی مدد کردے رہوو۔‏

19، 20.‏ نوجوان بھرا پُختہ مسیحی کیویں بن سکدے نیں؟ (‏پہلے صفحے دی تصویر نُوں ویکھو۔)‏

¹⁹ نوجوان بھراوو، تُسی اپنے آپ پُختہ مسیحی نئیں بن جاؤ گے سگوں توانوں ایہدے لئی کجھ کرنا پووے گا۔ توانوں چنگیاں مثالاں تے عمل کرنا پووے گا، اپنی سوچن سمجھن دی صلاحیت نُوں ودھانا پووے گا، ہنر تے مہارتاں سکھنیاں پین گیاں تے مستقبل چ آن والیاں ذمے‌داریاں لئی اپنے آپ نُوں تیار کرنا پووے گا۔‏

²⁰ شاید توانوں لگے کہ ایہہ سارے کم تے بڑے مشکل نیں پر تُسی کامیاب ہو سکدے او۔ یاد رکھو کہ یہوواہ تواڈی مدد کرن دی بڑی خواہش رکھدا اے۔ (‏یسعیاہ 41:‏10،‏ 13‏)‏ کلیسیا دے بھین بھرا وی تواڈی مدد کرن گے۔ جدوں تُسی اِک پُختہ مسیحی بن جاؤ گے تے تواڈی زندگی خوشیاں نال بھر جائے گی۔ نوجوان بھراوو، اَسی توانوں بوہت پیار کرنے آں۔ ساڈی دُعا اے کہ تُسی پُختہ مسیحی بنن لئی ہُن جیہڑیاں کوششاں کر رہے او، یہوواہ اوہناں چ برکت پاوے۔—‏امثال 22:‏4‏۔‏