1.‏ اِک پُختہ مسیحی بنن لئی کیہہ کرنا ضروری اے؟‏

 سانوں ایہہ ویکھ کے بڑی حیرانی ہوندی اے کہ اِک بچہ کِنّی چھیتی وڈا ہو جاندا اے۔ پر اِک مسیحی وقت دے نال نال آپ پُختہ نئیں ہوندا سگوں ایہدے لئی اوہنوں کوشش کرنی پیندی اے۔‏ b (‏1-‏کُرنتھیوں 13:‏11؛‏ عبرانیوں 6:‏1‏)‏ پختہ مسیحی بنن لئی سانوں یہوواہ نال اپنی دوستی نُوں مضبوط کرن دی لوڑ اے۔ ایہدے نال نال سانوں اوہدی پاک روح دی وی لوڑ اے تاکہ اَسی اپنے اندر ایہو جہیاں خوبیاں پیدا کر سکئے جیہڑیاں اوہنوں پسند نیں۔ ایہدے علاوہ اَسی کجھ ہنر سکھ سکنے آں تے اپنے آپ نُوں مستقبل چ آن والیاں ذمے‌داریاں لئی تیار کر سکنے آں۔—‏امثال 1:‏5‏۔‏

2.‏ (‏الف)‏پیدایش 1:‏27 توں اَسی کیہہ سکھنے آں؟ (‏ب)‏ایس مضمون چ اَسی کیہڑیاں گلاں تے غور کراں گے؟‏

² یہوواہ نے انساناں نُوں مرد تے عورت بنایا اے۔ ‏(‏پیدایش 1:‏27 نُوں پڑھو۔)‏ اِک مرد تے عورت صرف جسمانی لحاظ نال ای نئیں سگوں ہور معاملیاں چ وی فرق ہوندے نیں۔ مثال لئی، یہوواہ خدا نے مرد تے عورت نُوں فرق فرق ذمے‌داریاں دِتیاں نیں تے اپنیاں ذمے‌داریاں نُوں پورا کرن لئی اوہناں نُوں اپنے اندر فرق فرق خوبیاں پیدا کرن تے کجھ ہنر سکھن دی لوڑ اے۔ (‏پیدایش 2:‏18‏)‏ ایس مضمون چ اَسی ویکھاں گے کہ اِک جوان بھین پُختہ مسیحی بنن لئی کیہہ کر سکدی اے۔ ایس توں اگلے مضمون چ دَسیا جائے گا کہ نوجوان بھرا پُختہ مسیحی بنن لئی کیہہ کر سکدے نیں۔‏

3، 4.‏ جوان بھیناں نُوں اوہ چنگیاں مثالاں کتھے مل سکدیاں نیں جنہاں تے عمل کر کے اوہ پُختہ مسیحی بن سکدیاں نیں؟ (‏تصویر نُوں وی ویکھو۔)‏

³ بائبل چ ایہو جہیاں کئی عورتاں دِیاں مثالاں نیں جیہڑیاں یہوواہ نال پیار کردیاں سن تے اوہدی  خدمت کردیاں سن۔ (‏ویب‌سائٹ jw.org تے ایس مضمون نُوں ویکھو:‏ ”‏اوہ عورتاں جنہاں دا پاک کلام چ ذکر اے—‏اَسی اوہناں توں کیہہ سکھنے آں؟‏‏“‏)‏ اوہناں عورتاں چ اوہ خوبیاں سن جنہاں دا ذکر ایس مضمون دی مرکزی ایت چ کیتا گیا اے یعنی اوہناں چ چنگیاں عادتاں سن تے اوہ ہر معاملے چ وفادار سن۔ ایہدے علاوہ جوان بھیناں نُوں اپنی کلیسیا چ ایہو جہیاں پُختہ بھیناں مل سکدیاں نیں جنہاں توں اوہ بوہت کجھ سکھ سکدیاں نیں۔‏

⁴ نوجوان بھینو، کیہہ تُسی اپنی کلیسیا چ ایہو جہیاں پُختہ بھیناں نُوں جان‌دِیاں او جنہاں توں تُسی بوہت کجھ سکھ سکدیاں او؟ اوہناں دِیاں خوبیاں تے غور کرو تے فیر سوچو کہ تُسی اوہناں خوبیاں نُوں اپنے اندر کیویں پیدا کر سکدیاں او۔ اگلے پیراگرافاں چ اَسی دو ایہو جہیاں خوبیاں تے غور کراں گے جیہڑیاں اِک پُختہ مسیحی بھین چ ہونیاں چاہی دِیاں نیں۔‏

5.‏ اِک پُختہ مسیحی بھین نُوں خاکسار کیوں ہونا چاہی دا اے؟‏

⁵ خاکساری۔‏ اِک پُختہ مسیحی خاکسار ہوندا اے۔ جے اِک بھین خاکسار ہوئے گی تے اوہدا یہوواہ نال رشتہ مضبوط ہوئے گا نالے دُوجیاں نال وی اوہدے تعلقات چنگے رہن گے۔ (‏یعقوب 4:‏6‏)‏ مثال لئی، یہوواہ نُوں پیار کرن والی عورت خاکساری نال اپنے گھر تے کلیسیا چ سربراہی دے اوس اِنتظام لئی عزت وکھاندی اے جیہڑا یہوواہ نے بنایا اے۔—‏1-‏کُرنتھیوں 11:‏3‏۔‏ c

6.‏ نوجوان بھیناں خاکساری بارے رِبقہ توں کیہہ سکھ سکدیاں نیں؟‏

⁶ ذرا رِبقہ دی مثال تے غور کرو۔ اوہ بوہت سمجھ‌دار سی تے اوہنے اپنی زندگی چ چنگے فیصلے کیتے۔ اوہنوں پتہ ہوندا سی کہ اوہنوں کدوں کیہہ کرنا چاہی دا اے۔ (‏پیدایش 24:‏58؛‏ 27:‏5-‏17‏)‏ پر اوہ دُوجیاں لئی عزت وی وکھاندی سی تے ہدیتاں نُوں منن لئی تیار رہندی سی۔ (‏پیدایش 24:‏17، 18،‏ 65‏)‏ جے رِبقہ وانگوں تُسی وی یہوواہ دے بنائے بندوبست لئی احترام وکھاؤ گیاں تے تُسی اپنے گھر والیاں تے کلیسیا دے بھین بھراواں لئی چنگی مثال قائم کرو گیاں۔‏

7.‏ نوجوان بھیناں خاکساری بارے آستر توں کیہہ سکھ سکدیاں نیں؟‏

⁷ بائبل چ لکھیا اے:‏ خاکساراں نال حکمت اے۔ (‏امثال 11:‏2‏)‏ ذرا آستر دی مثال تے غور کرو۔ اوہ بڑی خاکسار تے یہوواہ دی وفادار سی۔  جدوں اوہنوں ملکہ بنایا گیا تے اوہدوں وی اوہدے چ غرور نئیں آیا سگوں اوہ خاکسار ای رہی۔ اوہنے اپنے تائے دے پُتر مردکی دے مشوریاں نُوں سُنیا تے اوہناں تے عمل کیتا۔ (‏آستر 2:‏10،‏ 20،‏ 22‏)‏ آستر وانگوں تُسی وی پُختہ مسیحیاں کولوں چنگے مشورے لے سکدیاں او تے اوہناں تے عمل کر سکدیاں او۔—‏طِطُس 2:‏3-‏5‏۔‏

8.‏ 1-‏تیمُتھیُس 2:‏9، 10 دے مطابق جے اِک بھین خاکسار ہوئے گی تے اوہ اپنے کپڑیاں تے سجن سنورن دے معاملے چ کیہو جہے فیصلے کرے گی؟‏

⁸ آستر نے اِک ہور معاملے چ وی خاکساری وکھائی۔ اوہ بوہت خوب‌صورت سی پر اوہنے کدی وی دُوجیاں دی توجہ اپنے وَل کِھچن دی کوشش نئیں کیتی۔ (‏آستر 2:‏7،‏ 15‏)‏ اِک مسیحی عورت آستر دی مثال تے کیویں عمل کر سکدی اے؟ ایہدا اِک طریقہ 1-‏تیمُتھیُس 2:‏9، 10 چ دَسیا گیا اے۔ ‏(‏ایہناں ایتاں نُوں پڑھو۔)‏ ایہدے چ پولُس رسول نے مسیحی عورتاں نُوں کہیا کہ اوہ سجن سنورن دے معاملے چ حیاداری تے سمجھ‌داری نال کم لین۔ ایس ایت چ حیاداری تے سمجھ‌داری لئی جیہڑے یونانی لفظ استمال کیتے گئے نیں، اوہناں توں پتہ چلدا اے کہ اِک مسیحی عورت نُوں ایہو جہے کپڑے پانے چاہی دے نیں جنہاں توں ظاہر ہوئے کہ اوہ دُوجیاں دا لحاظ کردی اے۔ اَسی ایس گل دی بڑی قدر کرنے آں کہ ساڈیاں پُختہ مسیحی بھیناں کپڑیاں تے سجن سنورن دے معاملے چ پولُس دی ہدیت تے عمل کردیاں نیں۔‏

9.‏ اَسی ابیجیل دی مثال توں کیہہ سکھ سکنے آں؟‏

⁹ سمجھ‌داری۔‏ سمجھ‌داری وی اِک ایہو جہی خوبی اے جیہڑی ہر پُختہ مسیحی بھین چ ہونی چاہی دی اے۔ سمجھ‌داری کیہہ اے؟ اِک سمجھ‌دار انسان صحی تے غلط چ فرق کرنا جان‌دا اے ایس لئی اوہ صورتحال دے مطابق صحی فیصلہ کردا اے۔ ذرا ابیجیل دی مثال تے غور کرو۔ اوہدے شوہر دے غلط فیصلے دی وجہ توں اوہدے پورے گھرانے تے مصیبت آن والی سی۔ پر ابیجیل نے فوراً قدم چُکیا تے اوہدی سمجھ‌داری دی وجہ توں کئی جاناں بچ گئیاں۔ (‏1-‏سموئیل 25:‏14-‏23،‏ 32-‏35‏)‏ سمجھ‌داری ایہہ فیصلہ کرن چ وی ساڈی مدد کردی اے کہ سانوں کدوں بولنا چاہی دا اے تے کدوں چپ رہنا چاہی دا اے۔ نالے ایہہ خوبی ساڈی مدد کردی اے کہ اَسی دُوجیاں لئی فکر وکھاندے ویلے ایس گل دا خیال رکھیئے کہ اَسی اوہناں دے ذاتی معاملیاں چ دخل نہ دَئیے۔—‏1-‏تھسلُنیکیوں 4:‏11‏۔‏

10، 11.‏ جے تُسی چنگی طرحاں پڑھنا تے لکھنا سکھو گے تے ایہدے توں توانوں تے دُوجے بھین بھراواں نُوں کیہہ فائدہ ہوئے گا؟ (‏تصویر نُوں وی ویکھو۔)‏

¹⁰ اِک مسیحی عورت نُوں اپنے اندر ایہو جہیاں مہارتاں پیدا کرنیاں چاہی دِیاں نیں جیہڑیاں روزمرہ زندگی چ اوہدے کم آن۔ اِک کُڑی بچپن توں جیہڑیاں مہارتاں سکھدی اے، اوہ پوری زندگی اوہدے کم آندیاں نیں۔ ذرا ایہدیاں کجھ مثالاں تے غور کرو۔‏

¹¹ چنگی طرحاں پڑھنا تے لکھنا سکھو۔‏ کجھ ثقافتاں چ عورتاں دی پڑھائی لکھائی نُوں اینی اہمیت نئیں دِتی جاندی۔ پر سچ تے ایہہ وے کہ ہر مسیحی نُوں پڑھنا لکھنا آنا چاہی دا اے فیر بھانویں اوہ مرد ہوئے یاں عورت۔ (‏1-‏تیمُتھیُس 4:‏13‏)‏ ایس لئی نوجوان بھینو، بھانویں جیہڑی وی مشکل ہوئے تُسی پڑھنا لکھنا ضرور سکھو۔ جے تُسی ایس مہارت نُوں اپنے اندر پیدا کرو گیاں تے توانوں کیہہ فائدہ ہوئے گا؟ اِک فائدہ توانوں  ایہہ ہوئے گا کہ توانوں کوئی نوکری مل سکے گی۔ ایہدے علاوہ، تُسی خدا دے کلام دا آپ وی چنگی طرحاں مطالعیا کر سکو گیاں تے دُوجیاں نُوں وی ایہنوں چنگی طرحاں سکھا سکو گیاں۔ سب توں وڈا فائدہ توانوں ایہہ ہوئے گا کہ تُسی بائبل نُوں پڑھن تے ایہدے تے سوچ وچار کرن نال یہوواہ دے نیڑے ہوندیاں جاؤ گیاں۔—‏یشوع 1:‏8؛‏ 1-‏تیمُتھیُس 4:‏15‏۔‏

12.‏ دُوجیاں دی گل دھیان نال سُنن تے اوہناں نال چنگی طرحاں گل بات کرن چ امثال 31:‏26 تواڈی مدد کیویں کر سکدی اے؟‏

¹² گل بات کرن دی مہارت نُوں نکھارو۔‏ سارے مسیحیاں نُوں دُوجیاں دی گل دھیان نال سننی چاہی دی اے تے اوہناں نال چنگے انداز چ گل کرنی چاہی دی اے۔ ایس حوالے نال یعقوب نے بوہت چنگا مشورہ دِتا۔ اوہنے کہیا:‏ ہر کوئی سُنن چ جلدی کرے پر بولن چ جلدی نہ کرے۔ (‏یعقوب 1:‏19‏)‏ جدوں تُسی دُوجیاں دی گل دھیان نال سُن‌دے او تے اِنج تُسی اوہناں دے دُکھ سُکھ چ شامل ہو رہے ہوندے او۔ (‏1-‏پطرس 3:‏8‏)‏ جے کدی کدار توانوں سمجھ نئیں آ رہیا ہوندا کہ اگلا بندہ کیہہ کہہ رہیا اے یاں کیہو جیہا محسوس کر رہیا اے تے سمجھ‌داری نال اوہدے کولوں سوال پچھو۔ فیر کجھ وی کہن توں پہلاں سوچو۔ (‏امثال 15:‏28‏)‏ تُسی اپنے آپ کولوں پچھ سکدے او کہ ”‏ہُن مَیں جیہڑی گل کہن والی آں، کیہہ اوہ سچی اے تے کیہہ اوہدے توں دُوجیاں دا حوصلہ ودھے گا؟ کیہہ اوہدے توں دُوجیاں لئی احترام تے مہربانی ظاہر ہوئے گی؟“‏ کلیسیا دِیاں اوہناں پُختہ بھیناں کولوں سکھو جیہڑیاں دُوجیاں نال بڑی چنگی طرحاں گل کردیاں نیں۔ ‏(‏امثال 31:‏26 نُوں پڑھو۔)‏ ویکھو کہ اوہ دُوجیاں نال کیہو جہیاں گلاں کردیاں نیں تے کیہو جہے لہجے چ کردیاں نیں۔ جِنّی چنگی طرحاں تُسی ایس مہارت نُوں سکھو گے، دُوجیاں نال تواڈے تعلقات اونے ای چنگے ہون گے۔‏

13.‏ تُسی گھر بار نُوں سنبھالنا کیویں سکھ سکدے او تے تواڈا دھیان کیس گل تے ہونا چاہی دا اے؟ (‏تصویر نُوں وی ویکھو۔)‏

¹³ گھر بار سنبھالنا سکھو۔‏ بوہت سارے مُلکاں چ گھر دے زیادہ‌تر کم عورتاں ای کردیاں نیں۔ تواڈی امی یاں کلیسیا دی کوئی بھین ایس مہارت نُوں نکھارن چ تواڈی مدد کر سکدی اے۔ اِک بھین کہندی اے:‏ ”‏میری امی نے مینوں جیہڑی گل سب توں چنگی سکھائی اوہ ایہہ سی کہ محنت نال بڑی خوشی مِلدی اے۔ مَیں کھانا بنانا، صفائی ستھرائی کرنا، کپڑے سینا تے سمجھ‌داری نال چیزاں نُوں خریدنا سکھیا۔ ایس طرحاں مینوں زندگی چ بڑی اسانی ہوئی تے مَیں یہوواہ دی خدمت چ وی بوہت کجھ کر سکی۔ میری امی نے مینوں ایہہ وی سکھایا کہ مَیں مہمان‌نواز بناں تے ایس وجہ توں مَیں ایہو جہے بوہت سارے بھین بھراواں نُوں مل سکی جنہاں دی مثال توں مَیں بوہت کجھ سکھ سکی۔“‏ (‏امثال 31:‏15،‏ 21، 22‏)‏ اِک محنتی، سگھڑ تے مہمان‌نواز عورت اپنے گھر والیاں تے کلیسیا لئی برکت ہوندی اے۔—‏امثال 31:‏13،‏ 17،‏ 27؛‏ اعمال 16:‏15‏۔‏

14.‏ تُسی بھین کرسٹل توں کیہہ سکھیا اے تے تواڈا دھیان کیس گل تے ہونا چاہی دا اے؟‏

¹⁴ کجھ ہنر سکھو۔‏ سارے مسیحیاں نُوں اپنیاں ضرورتاں نُوں پورا کرنا آنا چاہی دا اے تے ہر حال چ مطمئن رہنا چاہی دا اے۔ (‏فِلپّیوں 4:‏11‏)‏ کرسٹل ناں دی اِک بھین نے کہیا:‏ ”‏میرے امی‌ابو نے مینوں کہیا کہ مَیں سکول چ ایہو جہیاں مہارتاں سکھاں جیہڑیاں اَگے چل کے میرے کم آن۔ ایس لئی مَیں سکول چ اِک ہنر سکھیا تے ایہہ واقعی میرے بڑے کم آیا۔“‏ پیسے کمان لئی صرف مہارتاں سکھنا کافی نئیں اے۔ ایس لئی ایہہ وی سکھن دی کوشش کرو کہ تُسی کمائے ہوئے پیسیاں نُوں سمجھ‌داری نال  کیویں استمال کر سکدے او تاکہ تُسی فضول خرچی توں بچ سکو۔ (‏امثال 31:‏16،‏ 18‏)‏ اپنا دھیان اوہناں منصوبیاں تے رکھو جیہڑے تُسی یہوواہ دی خدمت چ بناندے او۔ اِنج کرن لئی ضروری اے کہ تُسی قرضہ لین توں بچو تے تواڈے کول گزارہ کرن لئی جو کجھ وی اے، اوہدے چ خوش رہنا سکھو۔—‏1-‏تیمُتھیُس 6:‏8‏۔‏

15، 16.‏ غیرشادی‌شُدہ بھیناں کلیسیا لئی اِک نعمت کیوں نیں؟ (‏مرقس 10:‏29، 30‏)‏

¹⁵ جدوں تُسی اپنے اندر خوبیاں پیدا کردیاں او تے مہارتاں سکھدیاں او تے تُسی اپنے آپ نُوں مستقبل چ آن والیاں ذمے‌داریاں لئی تیار کر رہیاں ہوندیاں او۔ آؤ کجھ مثالاں تے غور کر کے ویکھنے آں کہ تُسی کیہہ کجھ کر سکدیاں او۔‏

¹⁶ تُسی کجھ وقت لئی کنوارے رہن دا فیصلہ کر سکدیاں او۔‏ یسوع دی گل تے عمل کردے ہوئے بوہت ساریاں بھیناں نے ایہہ فیصلہ کیتا اے کہ اوہ شادی نئیں کرن گیاں، بھانویں کہ اوہناں دی ثقافت چ ایس گل نُوں بوہت غلط سمجھیا جاندا اے۔ (‏متی 19:‏10-‏12‏)‏ کجھ بھیناں کسے ہور وجہ توں شادی نئیں کردیاں۔ ایس گل دا یقین رکھو کہ یہوواہ تے یسوع غیرشادی‌شُدہ بھیناں نُوں کمتر خیال نئیں کردے۔ پوری دُنیا چ غیرشادی‌شُدہ بھیناں اپنی کلیسیا لئی بوہت چنگی مثال قائم کر رہیاں نیں۔ اوہ دُوجیاں نال محبت کردیاں نیں تے اوہناں لئی فکر رکھدیاں نیں۔ ایس لئی اوہ کلیسیا چ بوہت ساریاں لئی ماواں تے بھیناں وانگوں نیں۔‏‏—‏مرقس 10:‏29، 30 نُوں پڑھو؛‏ 1-‏تیمُتھیُس 5:‏2‏۔‏

17.‏ اِک بھین کل وقتی خدمت کرن لئی اپنے آپ نُوں کیویں تیار کر سکدی اے؟‏

¹⁷ تُسی کل وقتی خدمت کر سکدیاں او۔‏ پوری دُنیا چ ساڈیاں بھیناں بڑی لگن نال مُنادی کردیاں نیں۔ (‏زبور 68:‏11‏)‏ بھینو، کیہہ تُسی کل وقتی طور تے یہوواہ دی خدمت کرن دا منصوبہ بنا سکدیاں او؟ شاید تُسی پہل‌کار بنن، تعمیر دے کم چ حصہ لین یاں بیت‌ایل جان بارے سوچ سکدیاں او۔ اپنے منصوبے بارے یہوواہ کولوں دُعا کرو۔ ایہو جہے بھین بھراواں نال گل کرو جنہاں نے اپنا منصوبہ پورا کر لیا اے تے ویکھو کہ اپنے منصوبے نُوں پورا کرن لئی توانوں کیہہ کرن دی لوڑ اے۔ فیر اِنج کرن لئی ضروری قدم چکو۔ جدوں تُسی کل وقتی خدمت کرن دے اپنے منصوبے نُوں پورا کر لوو گیاں تے توانوں یہوواہ دی خدمت چ ہور بوہت کجھ کرن دا موقع ملے گا۔‏

18.‏ اِک بھین نُوں سوچ سمجھ کے ایہہ فیصلہ کیوں کرنا چاہی دا اے کہ اوہ کدے نال شادی کرے گی؟ (‏تصویر نُوں وی ویکھو۔)‏

¹⁸ تُسی شادی کرن دا فیصلہ کر سکدیاں او۔‏ ایس مضمون چ اَسی جیہڑیاں خوبیاں تے مہارتاں بارے گل کیتی اے، اوہ اِک چنگی بیوی بنن چ تواڈی بوہت مدد کرن گیاں۔ جے تُسی شادی کرن بارے سوچ رہیاں او تے توانوں اپنا جیون ساتھی سوچ سمجھ کے چُننا چاہی دا اے۔ ایہہ تواڈی زندگی دا اِک بڑا وڈا فیصلہ اے۔ یاد رکھو کہ جیہڑے بندے نال تُسی شادی کرو  گے، اوہ تواڈا سربراہ ہوئے گا۔ (‏رومیوں 7:‏2؛‏ اِفسیوں 5:‏23،‏ 33‏)‏ ایس لئی اپنے آپ کولوں پچھو:‏ ”‏کیہہ اوہ اِک پُختہ مسیحی اے؟ کیہہ اوہ اپنی زندگی چ یہوواہ نُوں سب توں زیادہ اہمیت دیندا اے؟ کیہہ اوہ سوچ سمجھ کے فیصلے کردا اے؟ کیہہ اوہ اپنی غلطی من‌دا اے؟ کیہہ اوہ عورتاں دی عزت کردا اے؟ کیہہ اوہ یہوواہ دے نیڑے رہن چ میری مدد کر سکدا اے؟ کیہہ اوہ میریاں ضرورتاں نُوں پورا کر سکدا اے تے میرا چنگا دوست بن سکدا اے؟ کیہہ اوہ اپنیاں ذمے‌داریاں نُوں چنگی طرحاں نبھاندا اے؟ مثال لئی، کلیسیا چ اوہدے کول جیہڑیاں ذمے‌داریاں نیں کیہہ اوہ اوہناں نُوں چنگی طرحاں نبھاندا اے؟“‏ (‏لُوقا 16:‏10؛‏ 1-‏تیمُتھیُس 5:‏8‏)‏ جے تُسی چاہندے او کہ توانوں اِک چنگا شوہر ملے تے توانوں اِک چنگی بیوی بنن لئی اپنے آپ نُوں تیار کرنا پووے گا۔‏

19.‏ اِک بیوی ایس گل توں خوش کیوں ہو سکدی اے کہ اوہ اپنے شوہر دی مددگار اے؟‏

¹⁹ بائبل چ دَسیا گیا اے کہ اِک چنگی بیوی اپنے شوہر دی مددگار تے ساتھی ہوندی اے۔ (‏پیدایش 2:‏18‏)‏ کیہہ ایہدا مطلب ایہہ وے کہ بیوی شوہر نالوں کمتر اے؟ جی نئیں۔ سگوں ایہہ تے بیوی لئی بڑے اعزاز دی گل اے کیونکہ غور کرو کہ بائبل چ اکثر یہوواہ نُوں وی مددگار کہیا گیا اے۔ (‏زبور 54:‏4؛‏ عبرانیوں 13:‏6‏)‏ جدوں اِک بیوی اپنے شوہر دے فیصلیاں چ اوہدا ساتھ دیندی اے تے اوہ صحی معنیاں چ اوہدی مددگار ہوندی اے۔ مثال لئی، جدوں شوہر اپنے خاندان لئی فیصلے کردا اے تے اوہ اوہدا ساتھ دیندی اے تے فیصلیاں تے عمل کرن چ اوہدی مدد کردی اے۔ کیونکہ اوہ یہوواہ نال محبت کردی اے ایس لئی اوہ دُوجیاں سامنے اپنے شوہر دی عزت ودھاندی اے۔ (‏امثال 31:‏11، 12؛‏ 1-‏تیمُتھیُس 3:‏11‏)‏ جدوں تُسی اپنے دل وچ یہوواہ دی محبت نُوں ودھاؤ گیاں تے اپنے گھر تے کلیسیا چ اِک دُوجے دی مدد کرو گیاں تے اِنج تُسی اِک چنگی بیوی بنن لئی اپنے آپ نُوں تیار کرو گیاں۔‏

20.‏ اِک ماں اپنے خاندان لئی کیہہ کجھ کر سکدی اے؟‏

²⁰ تُسی اِک چنگی ماں بن سکدیاں او۔‏ جدوں تواڈی شادی ہو جاندی اے تے شاید تُسی تے تواڈا شوہر بچے پیدا کرنا چاہوو۔ (‏زبور 127:‏3‏)‏ پر ایہہ بوہت ضروری اے کہ تُسی پہلاں توں سوچو کہ اِک چنگی ماں بنن لئی کیہہ ضروری اے۔ ایس مضمون چ اَسی جیہڑیاں خوبیاں تے مہارتاں بارے گل کیتی اے، اوہ اِک چنگی بیوی تے ماں بنن چ تواڈے بوہت کم آن گیاں۔ تواڈی محبت، مہربانی تے صبر دی وجہ توں تواڈے گھر دا ماحول چنگا ہوئے گا۔ ایہو جہے ماحول چ تواڈے بچے محسوس کرن گے کہ اوہ محفوظ نیں تے اوہناں نال محبت کیتی جاندی اے۔—‏امثال 24:‏3‏۔‏

21.‏ اَسی اپنیاں بھیناں بارے کیہہ محسوس کرنے آں تے کیوں؟ (‏پہلے صفحے دی تصویر نُوں ویکھو۔)‏

²¹ بھینو، تُسی یہوواہ تے اوہدے بندیاں لئی جو کجھ کر رہیاں او، اَسی اوہدی بڑی قدر کرنے آں۔ (‏عبرانیوں 6:‏10‏)‏ تُسی بوہت محنت کردیاں او تاکہ تُسی اپنے اندر ایہو جہیاں خوبیاں پیدا کر سکو جیہڑیاں یہوواہ نُوں پسند نیں تے ایہو جہیاں مہارتاں سکھ سکو جدے توں توانوں تے دُوجیاں نُوں فائدہ ہوئے۔ تُسی مستقبل چ آن والیاں ذمے‌داریاں لئی اپنے آپ نُوں تیار کرن لئی وی بوہت محنت کر رہیاں او۔ تُسی یہوواہ دی تنظیم لئی بوہت قیمتی او۔‏