کیہہ توانوں یاد اے؟
تُسی ضرور ایس سال دے ”مینارِنگہبانی“ رسالیاں نُوں دھیان نال پڑھیا ہوئے گا۔ کیہہ تُسی ایہناں سوالاں دے جواب دے سکدے او؟
اپنی سوچ دا رُخ موڑن چ کیہہ کجھ شامل اے؟ (رومیوں 12:2)
ایہدے چ چنگے کم کرن دے علاوہ ایہہ وی شامل اے کہ اَسی اپنا جائزہ لئیے کہ اَسی اندروں کیہو جہے انسان آں تے اپنے آپ چ بہتری لیا کے اُنج دے انسان بنئے جنج دے یہوواہ چاہندا اے۔—م23.01 ص. 8، 9۔
اَسی دُنیا چ ہون والے واقعیاں تے غور کردے ویلے سمجھداری نال کم کیویں لے سکنے آں؟
اَسی جاننا چاہنے آں کہ دُنیا چ ہون والے واقعیاں توں بائبل دِیاں پیشینگوئیاں کیویں پوریاں ہو رہیاں نیں۔ پر ایہناں بارے دُوجیاں نال گل کردے ویلے سانوں اپنے کولوں اندازے نئیں لانے چاہی دے کیونکہ اِنج کلیسیا دا اتحاد خراب ہو جائے گا۔ سگوں سانوں اوس معلومات دے مطابق گل کرنی چاہی دی اے جیہڑی یہوواہ دی تنظیم نے سانوں دِتی اے۔ (1-کُرنتھیوں 1:10)—م23.02 ص. 16۔
یسوع تے اوہدے پیروکاراں دے بپتسمے چ کیہہ فرق اے؟
یسوع یہوواہ دی چُنی ہوئی قوم چ پیدا ہویا سی، ایس لئی اوہنوں ساڈے وانگوں اپنی زندگی یہوواہ دے ناں کرن دی لوڑ نئیں سی۔ ایہدے علاوہ اوہ بےعیب سی، ایس لئی اوہنوں اپنے گُناہواں توں توبہ کرن دی وی لوڑ نئیں سی۔—م23.03 ص. 5۔
اَسی کیہہ کر سکنے آں تاکہ دُوجے وی عبادتاں تے جواب دے سکن؟
اَسی چھوٹے جواب دے سکنے آں تاکہ دُوجیاں نُوں وی جواب دین دا موقع ملے۔ نالے اَسی کوشش کر سکنے آں کہ اَسی پیراگراف چ دَسے سارے نکتیاں تے گل نہ کریئے تاکہ دُوجے نکتیاں تے ہور بھین بھرا گل کر سکن۔—م23.04 ص. 23۔
اوہ مُقدس راہ کیہہ اے جدا یسعیاہ 35:8 چ ذکر ہویا اے؟
پرانے زمانے چ ایہہ مُقدس راہ اوس راہ وَل اشارہ کردی سی جدے تے سفر کر کے یہودی بابل توں اپنے ملک واپس آئے سن۔ پر اَج ایہہ مُقدس راہ کیہہ اے؟ 1919 توں کئی صدیاں پہلاں ایس راہ نُوں تیار کرن دا کم کیتا گیا جدے چ بائبل دا ترجمہ، ایہدی چھپائی تے ہور دُوجے کم شامل سن۔ خدا دے بندے ایس مُقدس راہ تے چل کے خدا دی بادشاہی چ جان گے جتھے اوہناں نُوں بوہت ساریاں برکتاں مِلن گیاں۔—م23.05 ص. 15-19۔
امثال 9 باب چ کیہڑیاں دو عورتاں دا ذکر کیتا گیا اے؟
امثال دی کتاب چ اِک بےوقوف عورت دا ذکر اے جدی دعوت نُوں قبول کرن دا نتیجہ قبر یعنی موت اے۔ تے دُوجی عورت حکمت اے جدی دعوت نُوں قبول کر کے اِک بندہ زندگی تے سمجھداری دی راہ تے ٹُرن لگ پیندا اے۔ (امثال 9:1، 6، 13، 18)—م23.06 ص. 22-24۔
یہوواہ لُوط نال جیویں پیش آیا اوہدے توں ایہہ کیویں ظاہر ہوندا اے کہ اوہ لچکدار تے فروتن اے؟
یہوواہ نے لُوط نُوں کہیا کہ اوہ سدوم توں بھج کے پہاڑی علاقے وَل چلا جائے۔ پر لُوط نے یہوواہ کولوں شہر ضغر جان دی درخاست کیتی تے یہوواہ نے اوہدی درخاست من لئی۔—م23.07 ص. 21۔
جے کسے بھین دا شوہر گندیاں تصویراں تے فلماں ویکھدا اے تے اوہ کیہہ کر سکدی اے؟
اوہنوں ایہدے لئی اپنے آ پ نُوں اِلزام نئیں دینا چاہی دا۔ اوہنوں یہوواہ نال اپنا رشتہ مضبوط کرنا چاہی دا اے تے بائبل چوں اوہناں عورتاں دی مثال تے غور کرنا چاہی دا اے جنہاں نُوں یہوواہ وَلّوں تسلی ملی سی۔ اوہ اپنے شوہر دی ایہو جہی صورتحال توں بچن چ مدد کر سکدی اے جدے چ اوہ گندیاں تصویراں تے فلماں ویکھن دے خطرے چ پے سکدا اے۔—م23.08 ص. 14-17۔
جدوں کوئی ساڈے عقیدیاں بارے سوال پچھدا اے تے اَسی اوہنوں نرممزاجی نال جواب کیویں دے سکنے آں؟
سانوں سوچنا چاہی دا اے کہ اوہدے سوال توں سانوں اوہدی سوچ نُوں جانن دا موقع مل رہیا اے۔ اِنج اَسی اوہنوں نرممزاجی نال جواب دے سکاں گے۔—م23.09 ص. 17۔
اَسی یہوواہ توں ہمت تے طاقت حاصل کرن بارے مریم توں کیہہ سکھنے آں؟
جدوں مریم نُوں پتہ چلیا کہ یہوواہ نے اوہنوں مسیح دی ماں دے طور تے چُنیا اے تے اوہنے دُوجیاں کولوں ہمت تے طاقت حاصل کیتی۔ مثال لئی، جبرائیل تے الیشبع نے اوہدا حوصلہ ودھایا۔ سانوں وی اپنے ہمایماناں توں ہمت تے طاقت مل سکدی اے۔—م23.10 ص. 15۔
یہوواہ ساڈیاں دُعاواں دا جواب کیویں دیندا اے؟
یہوواہ نے وعدہ کیتا اے کہ اوہ ساڈیاں دُعاواں سنے گا۔ اوہ غور کردا اے کہ ساڈیاں دُعاواں دا اوہدے مقصد نال کیہہ تعلق اے۔ (یرمیاہ 29:12) اوہ اِکو جہیاں دُعاواں دا جواب فرق طریقیاں نال دے سکدا اے۔ پر اَسی یقین رکھ سکنے آں کہ اوہ ہمیشاں ساڈی مدد کرے گا۔—م23.11 ص. 21، 22۔
رومیوں 5:2 چ امید بارے دَسیا گیا اے پر 4 ایت چ دُبارہ ایہدا ذکر کیوں ہویا اے؟
جدوں اِک بندہ بادشاہی دی خوشخبری نُوں سُندا اے تے اوہنوں زمین تے ہمیشاں دی زندگی پان دی امید مِلدی اے۔ پر اوہدی ایہہ امید اوس ویلے ہور مضبوط ہو جاندی اے جدوں اوہ مصیبتاں چ ثابتقدم رہندا اے تے فیر محسوس کردا اے کہ اوہنوں خدا دی خوشنودی ملی اے۔—م23.12 ص. 12، 13۔
