1.‏ کجھ لوک ہمیشاں تک زندہ رہن بارے کیہہ سوچدے نیں؟‏

 بوہت سارے لوک صحت‌مند رہن تے لمی عمر پان لئی ایہو جیہا کھانا کھاندے نیں جیہڑا صحت لئی چنگا ہوندا اے نالے اوہ ورزش وی کردے نیں۔ پر اوہ جان دے نیں کہ اِنج کرن نال اوہ ہمیشاں تک زندہ نئیں رہ سکدے۔ اوہناں نُوں لگدا اے کہ ہمیشاں تک زندہ رہنا بس اِک خواب اے تے اوہ ایہدی اینی خواہش وی نئیں رکھدے کیونکہ اوہ بڑھاپے دِیاں مشکلاں دا سامنا نئیں کرنا چاہندے۔ پر جیویں کہ یسوع نے یوحنا 3:‏16 تے 5:‏24 چ دَسیا، انسان ”‏ہمیشاں دی زندگی“‏ پا سکدے نیں۔‏

2.‏ یوحنا 6 باب چ ہمیشاں دی زندگی بارے کیہہ دَسیا گیا اے؟ (‏یوحنا 6:‏39، 40‏)‏

² یسوع نے معجزہ کر کے ہزاراں لوکاں نُوں روٹی تے مچھی کھوائی۔‏ a ایہہ بوہت ای حیران کر دین والا معجزہ سی۔ پر ایہدے توں اگلے دن جدوں لوک یسوع نُوں لبھدے ہوئے کفرنحوم چ گلیل دی جھیل دے کنارے پونچ گئے تے یسوع نے اوہناں نُوں اِک ایہو جہی گل کہی جیہڑی ہور وی زیادہ حیران کر دین والی سی۔ یسوع نے اوہناں نُوں دَسیا کہ اوہ مُردیاں نُوں زندہ کر دَوے گا تے اوہناں نُوں ہمیشاں دی زندگی دَوے گا۔ ‏(‏یوحنا 6:‏39، 40 نُوں پڑھو۔)‏ ایس گل نُوں ذہن چ رکھدے ہوئیاں ذرا اپنے اوہناں رشتے‌داراں تے دوستاں بارے سوچو جیہڑے فوت ہو گئے نیں۔ یسوع دی گل توں سانوں یقین ہو جاندا اے کہ بوہت سارے لوک جیہڑے فوت ہو گئے نیں، زندہ ہو جان گے تے اَسی تے ساڈے پیارے ہمیشاں دی زندگی حاصل کرن گے۔ پر یسوع نے یوحنا 6 باب چ اَگے جیہڑی گل کیتی،اوہنوں سمجھنا اوس ویلے وی بوہت سارے لوکاں لئی مشکل سی تے کئی لوکاں لئی اَج وی مشکل اے۔ آؤ ویکھنے آں کہ یسوع نے کیہہ کہیا۔‏

3.‏ یوحنا 6:‏51 دے مطابق یسوع نے اپنے بارے کیہہ دَسیا؟‏

 ³ کفرنحوم چ جیہڑے لوک یسوع نُوں لبھدے ہوئے آئے سن، اوہناں نُوں جدوں یسوع نے معجزہ کر کے روٹی کھوائی تے اوہناں دے ذہن چ اوہ من آیا جیہڑا یہوواہ نے معجزہ کر کے اوہناں دے پیو دادیاں نُوں دِتا سی۔ جدوں یہوواہ نے بنی‌اِسرائیل نُوں من دِتا تے ایہدے بارے پاک کلام چ لکھیا اے کہ اوہنے اوہناں نُوں ”‏اسمانوں روٹی“‏ دِتی۔ (‏زبور 105:‏40؛‏ یوحنا 6:‏31‏)‏ یسوع نے بِھیڑ نُوں ایس من دی مثال دے کے اِک بڑی اہم گل سکھائی۔ بھانویں کہ یہوواہ نے معجزہ کر کے بنی‌اِسرائیل نُوں من دِتا پر فیر وی جیہڑے لوکاں نے ایہنوں کھادا، اوہ ہمیشاں تک زندہ نئیں رہے۔ (‏یوحنا 6:‏49‏)‏ پر یسوع نے اپنے بارے دَسیا کہ اوہ ”‏خدا وَلّوں مِلن والی روٹی“‏ تے ”‏زندگی دی روٹی“‏ اے۔ (‏یوحنا 6:‏32، 33،‏ 35‏)‏ اوہنے کہیا:‏ ”‏زندگی دی روٹی جیہڑی اسمانوں آئی ا ے، اوہ مَیں آں۔ جیہڑا وی ایہہ روٹی کھائے گا، اوہ ہمیشاں زندہ رہوے گا۔“‏ (‏یوحنا 6:‏51 نُوں پڑھو۔)‏ یسوع دی ایہہ گل لوکاں نُوں بالکل سمجھ نئیں آئی۔ اوہ سوچ رہے سن کہ یسوع اپنے آپ نُوں اوہ ”‏روٹی“‏ کیویں کہہ سکدا اے جیہڑی اسمانوں آئی اے تے ایہہ ”‏روٹی“‏ اوس من نالوں کیویں بہتر ہو سکدی اے جیہڑا خدا نے اوہناں دے پیو دادیاں نُوں دِتا سی؟ فیر یسوع نے اوہناں نُوں دَسیا کہ جیہڑی روٹی مَیں دواں گا، اوہ ”‏میرا جسم اے۔“‏ یسوع دی ایس گل دا کیہہ مطلب سی؟ ساڈے لئی ایس گل نُوں جاننا بوہت ضروری اے کیونکہ ایہدے توں سانوں ایس سوال دا جواب ملے گا کہ اَسی تے ساڈے پیارے ہمیشاں دی زندگی کیویں پا سکدے نیں۔ تے فیر آؤ ویکھنے آں کہ یسوع دی ایس گل دا کیہہ مطلب سی۔‏

زندگی دی روٹی تے یسوع دا جسم

4.‏ کجھ لوک یسوع دی گل سُن کے اینے حیران کیوں ہوئے؟‏

⁴ یسوع دی ایہہ گل سُن کے لوکاں نُوں بوہت حیرانی ہوئی ہوئے گی:‏ ”‏ایہہ روٹی میرا جسم اے جیہڑا مَیں دُنیا دی خاطر قربان کراں گا تاکہ لوکاں نُوں زندگی ملے۔“‏ شاید لوکاں نُوں لگیا ہوئے کہ یسوع اصل چ اوہناں نُوں اپنا گوشت کھان لئی کہہ رہیا اے۔ (‏یوحنا 6:‏52‏)‏ پر یسوع نے اَگے اوہناں نُوں جو کجھ کہیا، اوہنوں سُن کے تے اوہناں نُوں ہور زیادہ حیرانی ہوئی ہوئے گی۔ اوہنے کہیا:‏ ”‏جے تُسی انسان دے بیٹے دا گوشت نئیں کھاؤ گے تے اوہدا خون نئیں پِیو گے، توانوں زندگی نئیں ملے گی۔“‏—‏یوحنا 6:‏53‏۔‏

5.‏ اَسی ایہہ گل کیوں کہہ سکنے آں کہ یسوع لوکاں نُوں ایہہ نئیں کہہ رہیا سی کہ اوہ اصل چ اوہدا گوشت کھان تے اوہدا خون پین؟‏

⁵ نوح دے زمانے چ یہوواہ نے انساناں نُوں خون کھان توں منع کیتا سی۔ (‏پیدائش 9:‏3، 4‏)‏ فیر اوہنے شریعت چ وی بنی‌اِسرائیل نُوں خون کھان توں منع کیتا سی۔ جیہڑا وی ایس حکم نُوں توڑدا سی، اوہنوں موت دی سزا مِلدی سی۔ (‏احبار 7:‏27‏)‏ یسوع نے یہودیاں نُوں تلیم دِتی کہ اوہ شریعت دے سارے حکماں تے عمل کرن۔ (‏متی 5:‏17-‏19‏)‏ ایس لئی ایہہ ہو ای نئیں سکدا کہ یسوع یہودیاں نُوں اصل چ اوہدا گوشت کھان تے خون پین نُوں کیہہ رہیا سی۔ پر ایس گل توں یسوع لوکاں نُوں ایہہ سکھانا چاہ رہیا سی کہ اوہ ”‏ہمیشاں دی زندگی“‏ کیویں پا سکدے نیں—‏یوحنا 6:‏54‏۔‏

6.‏ اَسی ایہہ کیوں کہہ سکنے آں کہ یسوع نے لوکاں نُوں اپنے گوشت تے اپنے خون بارے جیہڑی گل کہی، اوہ صرف اِک مثال سی؟‏

⁶ یسوع دی گل دا کیہہ مطلب سی؟ اوہ اِک مثال دے ذریعے لوکاں نُوں اپنی گل سمجھانا چاہ رہیا سی بالکل اونویں ای جیویں اوہنے کُھوہ تے اِک سامری عورت نُوں مثال دِتی سی۔ یسوع نے اوس عورت نُوں کہیا سی:‏ ”‏جیہڑا بندہ اوہ پانی پیوے گا جیہڑا مَیں اوہنوں دَواں گا، اوہنوں کدی پیاس نئیں لگے گی سگوں میرا دِتا ہویا پانی اوہدے اندر اِک چشمہ بن جائے گا جدے توں ہمیشاں دی زندگی دا پانی نکلدا رہوے گا۔“‏ (‏یوحنا 4:‏7،‏ 14‏)‏ b ظاہری جہی گل اے کہ یسوع اوس عورت نُوں ایہہ نئیں کہہ رہیا سی کہ اوہنوں ہمیشاں دی زندگی پان لئی کسے خاص کُھوہ چوں اصل چ پانی پینا پووے گا۔ ایسے طرحاں جدوں یسوع کفرنحوم چ لوکاں نال گل کر رہیا سی تے اوہ ایہہ نئیں کہہ رہیا سی کہ اوہناں لوکاں نُوں ہمیشاں تک زندہ رہن لئی اصل چ اوہدا گوشت کھانا پووے گا تے اوہدا خون پینا پووے گا۔‏

 دونواں واقعیاں چ فرق

7.‏ یسوع نے یوحنا 6:‏53 چ جیہڑی گل کہی، اوہدے بارے لوک کیہہ من دے نیں؟‏

⁷ کجھ لوک من دے نیں کہ یسوع نے یوحنا 6:‏53 چ جیہڑی گل کہی، اوہدے ذریعے اوہ ایہہ دَس رہیا سی کہ اوہدی موت دی یادگیری کیویں منائی جانی چاہی دی اے۔ اوہ ایہہ ایس لئی من دے نیں کیونکہ ایہناں دونواں موقعیاں تے یسوع نے مِلدیاں جُلدیاں گلاں کہیاں۔ (‏متی 26:‏26-‏28‏)‏ ایہہ لوک کہندے نیں کہ یسوع دی موت دی یادگیری تے جدوں ساریاں دے سامنے روٹی تے مے گزاری جاندی اے تے اوہناں ساریاں نُوں ای ایہدے وچوں کھانا پینا چاہی دا اے۔ پر کیہہ اِنج کرنا صحی ہوئے گا؟ ایس گل بارے جاننا بوہت ضروری اے کیونکہ ہر سال لکھاں لوک ایس تقریب نُوں منان لئی ساڈے نال جمع ہوندے نیں۔ آؤ ایس گل تے غور کرنے آں کہ یسوع نے یوحنا 6:‏53 چ جیہڑی گل کہی تے اپنے شاگرداں نال آخری کھانا کھاندے ویلے جیہڑی گل کہی، اوہدے چ کیہہ فرق اے۔‏

8.‏ یوحنا 6 باب چ لکھے واقعے تے یسوع نے اپنے شاگرداں نال جیہڑا آخری کھانا کھادا، اوہدے چ کیہہ فرق اے؟ (‏تصویراں نُوں وی ویکھو۔)‏

⁸ آؤ ویکھنے آں کہ ایہناں دونواں واقعیاں چ کیہہ فرق اے۔ سب توں پہلاں غور کرو کہ یسوع نے یوحنا 6:‏53-‏56 چ لکھی گل کدوں تے کتھے کہی۔ یسوع نے ایہہ گل 32 عیسوی چ گلیل چ یہودیاں دی اِک بِھیڑ نُوں کہی۔ ایہہ یروشلم چ یسوع دی موت دی یادگیری تقریب نُوں قائم کرن توں اِک سال پہلاں دی گل سی۔ دُوجی گل ایہہ وے کہ یسوع نے ایہہ گل کنہاں نُوں کہی؟ اوہنے ایہہ گل ایہو جہے لوکاں نُوں کہی جیہڑے یہوواہ تے اوہدی بادشاہی بارے سکھن توں بوہتا اپنا ٹیڈھ بھرن  چ دلچسپی رکھدے سن۔ (‏یوحنا 6:‏26‏)‏ تے جدوں یسوع نے اوہناں نُوں اِک ایہو جہی گل کہی جنہوں سمجھنا اوہناں نُوں مشکل لگیا تے اوہناں نے فوراً ای یسوع دے پچھے چلنا چھڈ دِتا۔ ایتھوں تک کہ اوہدے کجھ شاگرداں نے وی اوہنوں چھڈ دِتا۔ (‏یوحنا 6:‏14،‏ 36،‏ 42،‏ 60،‏ 64،‏ 66‏)‏ ہُن ذرا اوس واقعے تے غور کرو جیہڑا ایہدے اِک سال بعد 33 عیسوی چ ہویا جدوں یسوع نے اپنی موت دی یادگیری منان دا حکم دِتا۔ اوس ویلے اوہدے 11 وفادار رسول اوہدے نال سن جیہڑے اوہناں ساریاں گلاں نُوں پوری طرحاں نئیں سمجھدے سن جیہڑیاں یسوع اوہناں نُوں دَس رہیا سی۔ پر فیر وی یسوع دے ایہہ رسول گلیل چ جمع ہون والی بِھیڑ ورگے نئیں سن۔ اوہناں رسولاں نُوں ایس گل دا پکا یقین سی کہ یسوع خدا دا پُتر اے جنہوں خدا نے اسمان توں زمین تے گھلیا اے۔ (‏متی 16:‏16‏)‏ تے یسوع نے وی ایس گل لئی اپنے وفادار رسولاں دی تعریف کیتی تے اوہناں نُوں کہیا:‏ ”‏تُسی میریاں ازمیشاں چ میرا ساتھ دِتا اے۔“‏ (‏لُوقا 22:‏28‏)‏ ایہناں دونواں گلاں توں ای ایہہ ثابت ہو جاندا اے کہ یسوع نے یوحنا 6:‏53 چ جیہڑی گل کہی، اوہدے ذریعے اوہ ایہہ نئیں دَس رہیا سی کہ اوہدی یادگیری کیویں منائی جانی چاہی دی اے۔ ایہدے ہور وی کئی ثبوت نیں۔‏

یسوع دی کہی گل ساڈے لئی اہم کیوں اے؟‏

9.‏ یسوع نے اپنے رسولاں نال آخری کھانا کھاندے ویلے جیہڑی گل کہی، اوہ کنہاں لئی سی؟‏

⁹ جدوں یسوع نے اپنے رسولاں نال آخری کھانا کھادا تے اوہنے اوہناں نُوں بے‌خمیری روٹی دِتی تے اوہناں نُوں کہیا کہ ایہہ اوہدے جسم وَل اشارہ کردی اے۔ ایہدے بعد اوہنے اپنے رسولاں نُوں مے دِتی تے کہیا کہ ایہہ اوہدے ‏”‏عہد دے خون“‏ وَل اشارہ کردی اے‏۔‏ (‏مرقس 14:‏22-‏25؛‏ لُوقا 22:‏20؛‏ 1-‏کُرنتھیوں 11:‏24‏)‏ یسوع نے ایس عہد بارے جیہڑی گل کیتی، اوہ بڑی اہم اے۔ یسوع نے ایہنوں نواں عہد کہیا۔ نواں عہد سارے انساناں نال نئیں سگوں صرف روحانی اِسرائیل نال بنھیا گیا یعنی صرف اوہناں لوکاں نال جیہڑے اسمان تے یسوع نال حکمرانی کرن گے۔ (‏عبرانیوں 8:‏6،‏ 10؛‏ 9:‏15‏)‏ رسول ایہہ گل اوس ویلے نئیں سمجھے۔ پر چھیتی ای اوہناں نُوں پاک روح نال مسح کیتا جانا سی تے اوہناں نے نویں عہد چ شامل ہو جانا سی تاکہ اوہ یسوع نال اسمان تے رہ سکن۔—‏یوحنا 14:‏2، 3‏۔‏

10.‏ یسوع نے گلیل چ لوکاں نُوں جیہڑی گل کہی تے اپنے شاگرداں نال آخری کھانا کھاندے ویلے جیہڑی گل کیتی، اوہدے چ اِک ہور فرق کیہہ اے؟ (‏تصویر نُوں وی ویکھو۔)‏

¹⁰ یسوع نے اپنے رسولاں نال آخری کھانا کھاندے ویلے جیہڑی گل کہی، اوہ صرف ”‏چھوٹے گلے“‏ لئی سی۔ ایس چھوٹے گروہ چ سب توں پہلاں تے یسوع دے وفادار رسول شامل سن جیہڑے اوس ویلے اوس کمرے چ اوہدے نال موجود سن۔ (‏لُوقا 12:‏32‏)‏ ایہہ اوہ لوک سن جنہاں نُوں یسوع نے روٹی تے مے چوں کھان پین لئی کہیا۔ اوہناں دے بعد جدوں ہور لوک وی ایس گروہ چ شامل ہوئے تے اوہناں کولوں وی ایہہ توقع کیتی جاندی اے کہ اوہ مسیح دی یاد گیری مناندے ویلے روٹی تے مے چوں کھان پین۔ ایہی اوہ لوک نیں جنہاں نُوں اسمان تے یسوع نال رہن دا موقع ملے گا۔ یسوع نے اپنے رسولاں نال آخری کھانا کھاندے ویلے جیہڑی گل کیتی، اوہ اِک چھوٹے گروہ لئی سی جد کہ اوہنے گلیل چ لوکاں نُوں جیہڑی گل کہی، اوہ بوہت سارے لوکاں لئی سی۔‏

11.‏ یسوع نے گلیل چ جیہڑی گل کیتی، اوہدے توں کیویں پتہ چلدا اے کہ اوہ کسے خاص گروہ بارے گل نئیں کر رہیا سی؟‏

¹¹ جدوں 32 عیسوی چ یسوع گلیل چ سی تے اوہ خاص طور تے اوہناں یہودیاں نال گل کر رہیا سی جنہاں دا دھیان صرف کھان پین تے سی۔ پر یسوع نے اوہناں دی توجہ اِک ایہو جہی گل تے دَوائی جیہڑی کھان پین توں کِتے زیادہ فائدےمند سی کیونکہ ایہدے توں اوہناں نُوں ہمیشاں دی زندگی مِل سکدی سی۔ ایہدے بارے یسوع نے ایہہ وی دَسیا کہ ایہدی وجہ توں ای مستقبل چ مُردے زندہ ہون گے تے ہمیشاں دی زندگی پان گے۔ ایس موقعے تے یسوع صرف کجھ لوکاں یاں کسے خاص گروہ بارے گل نئیں کر رہیا سی جیویں کہ اوہنے بعد چوں آخری کھانا کھاندے ویلے کیتی سی۔ ایہدی بجائے اوہ گلیل چ لوکاں دی توجہ اِک  ایہو جہی برکت تے دَوا رہیا سی جیہڑی سارے لوکاں نُوں مل سکدی اے۔ اوہنے ایس برکت بارے کہیا:‏ ‏”‏جیہڑا وی ایہہ روٹی کھائے گا، اوہ ہمیشاں زندہ رہوے گا۔ .‏ .‏ .‏ ایہہ روٹی میرا جسم اے جیہڑا مَیں دُنیا دی خاطر قربان کراں گا تاکہ لوکاں نُوں زندگی ملے۔“‏—‏یوحنا 6:‏51‏۔‏ c

12.‏ ہمیشاں دی زندگی پان لئی کیہہ کرنا ضروری اے؟‏

¹² کیہہ یسوع ایہہ کہہ رہیا سی کہ اوہدے توں پہلاں جیہڑے انسان آئے تے اوہدے بعد جیہڑے آن گے، اوہناں ساریاں نُوں ہمیشاں دی زندگی ملے گی؟ نئیں، سگوں صرف اوہناں لوکاں نُوں ہمیشاں دی زندگی ملے گی جیہڑے ایس روٹی نُوں کھان گے یعنی یسوع تے ایمان ظاہر کرن گے۔ بوہت سارے لوک جیہڑے مسیحی ہون دا دعویٰ کردے نیں، اوہ ایہہ سوچدے نیں کہ نجات پان لئی یسوع تے صرف ایمان لیانا کافی اے۔ (‏یوحنا 6:‏29‏)‏ جیہڑی بِھیڑ گلیل چ کٹھی ہوئی سی، اوہناں وچوں وی کجھ لوک یسوع تے ایمان لیائے سن پر بعد چوں اوہناں نے یسوع دے پچھے چلنا چھڈ دِتا سی۔ ایہدی کیہہ وجہ سی؟‏

13.‏ یسوع دا شاگرد بنن لئی کیہہ ضروری اے؟‏

¹³ جیہڑے لوکاں نُوں یسوع نے کھانا کھوایا سی، اوہناں وچوں زیادہ‌تر لوک صرف اوس ویلے تک یسوع تے پچھے چلدے رہے جدوں تک اوہ اوہناں دِیاں ضرورتاں پوریاں کردا رہیا۔ اوہ بس چاہندے سن کہ یسوع اوہناں لئی معجزے کرے، اوہناں نُوں مُفت کھانا کھوائے تے اوہناں نُوں ایہو جہیاں گلاں دی تلیم دَوے جیہڑیاں اوہناں دی مرضی مطابق ہون۔ پر یسوع زمین تے لوکاں دِیاں خواہشاں پوریاں کرن نئیں آیا سی۔ ایس لئی اوہنے اوہناں نُوں دَسیا کہ اوہدا شاگرد بنن لئی اوہناں نُوں کیہہ کرن دی لوڑ اے۔ یسوع نے اوہناں نُوں ایہہ دعوت دِتی کہ ”‏میرے کول آؤ“‏ تے اوہناں نُوں ایس دعوت نُوں قبول کرن تے یسوع دی تلیم تے عمل کرن دی لوڑ سی۔—‏یوحنا 5:‏40؛‏ 6:‏44‏۔‏

14.‏ سانوں یسوع دے خون تے جسم توں فائدہ حاصل کرن لئی کیہہ کرن دی لوڑ اے؟‏

 ¹⁴ یسوع نے لوکاں تے ایہہ گل واضح کیتی کہ اوہناں نُوں اوہدے تے ایمان ظاہر کرن دی لوڑ اے۔ ایہدا مطلب اے کہ اوہناں نُوں ایس گل تے ایمان ظاہر کرن دی لوڑ سی کہ یسوع دے خون تے جسم توں لوکاں نُوں نجات مِل سکدی اے جیہڑا اوہ بوہت چھیتی قربان کرن والا سی۔ ایس گل تے ایمان ظاہر کرنا اوس ویلے یہودیاں لئی وی ضروری سی تے اَج ساڈے لئی وی ضروری اے۔ (‏یوحنا 6:‏40‏)‏ یوحنا 6:‏53 چ یسوع نے جیہڑی گل کیتی، اوہدا مطلب ایہہ وے کہ سانوں یسوع دے جسم تے خون توں فائدہ حاصل کرن لئی فدیے تے ایمان ظاہر کرن دی لوڑ اے۔ ایس نعمت توں ہر کوئی فائدہ حاصل کر سکدا اے۔—‏اِفسیوں 1:‏7‏۔‏

15، 16.‏ یوحنا 6 باب توں اَسی کیہڑیاں اہم گلاں سکھیاں نیں؟‏

¹⁵ یوحنا 6 باب توں اَسی ایہو جہیاں بوہت ساریاں گلاں سکھ لئیاں نیں جیہڑیاں ساڈے لئی تے ساڈے پیاریاں لئی بوہت اہم نیں۔ ایس باب چ اَسی ویکھیا کہ یسوع نُوں لوکاں دی کِنّی فکر اے۔ جدوں اوہ گلیل چ سی تے اوہنے لوکاں نُوں شفا دِتی، اوہناں نُوں خدا دی بادشاہی بارے تلیم دِتی تے اوہناں نُوں کھانا کھوایا۔ (‏لُوقا 9:‏11؛‏ یوحنا 6:‏2،‏ 11، 12‏)‏ سب توں ودھ کے اوہنے لوکاں نُوں ایہہ اہم سچائی سکھائی کہ اوہ ”‏زندگی دی روٹی“‏ اے۔—‏یوحنا 6:‏35،‏ 48‏۔‏

¹⁶ ایہہ سچ اے کہ یسوع دِیاں ”‏ہور وی بھیڈاں“‏ نُوں یادگیری چ روٹی تے مے وچوں نئیں کھانا پینا چاہی دا۔ (‏یوحنا 10:‏16‏)‏ پر اوہناں نُوں وی یسوع دے جسم تے خون توں فائدہ ہو سکدا اے۔ پر کیویں؟ یسوع دے فدیے تے ایہدے توں مِلن والیاں برکتاں تے ایمان ظاہر کرن نال۔ (‏یوحنا 6:‏53‏)‏ پر جیہڑے لوک روٹی تے مے چوں کھاندے پیندے نیں، اوہ ایہہ ظاہر کردے نیں کہ اوہ نویں عہد چ شامل نیں تے اوہ اسمان تے بادشاہ ہون گے۔ بھانویں اَسی پاک روح نال مسح ہوئے مسیحی آں یاں مسیح دِیاں ہور وی بھیڈاں واں، یوحنا 6 باب چ لکھیاں گلاں ساڈے ساریاں لئی اہم نیں کیونکہ ایہناں توں پتہ چلدا اے کہ سانوں ساریاں نُوں ای فدیے تے ایمان ظاہر کرن دی لوڑ اے تاکہ اَسی ہمیشاں دی زندگی پا سکئے۔‏