1.‏ پرانے زمانے چ روٹی لوکاں لئی کِنّی اہم ہوندی سی؟‏

 پرانے زمانے چ روٹی لوکاں دی اہم خوراک سی۔ (‏پیدائش 14:‏18؛‏ لُوقا 4:‏4‏)‏ لوک ایہنوں ایناں اہم سمجھدے سن کہ بائبل چ اکثر کھانے لئی لفظ ”‏روٹی“‏ استمال ہویا اے۔ (‏متی 6:‏11؛‏ اعمال 20:‏7‏)‏ ایہدے علاوہ یسوع دے معجزیاں وچوں دو مشہور معجزے اوہ سن جدوں اوہنے لوکاں نُوں روٹی کھوائی۔ (‏متی 16:‏9، 10‏)‏ ایہناں وچوں اِک معجزے دا ذکر یوحنا 6 باب چ ہویا اے۔ ایس معجزے تے غور کردے ویلے ویکھو کہ تُسی ایہدے توں کیہڑے سبق سکھ سکدے او۔‏

2.‏ کیہڑے موقعے تے لوکاں دے کھان پین دا اِنتظام کرن دی لوڑ پئی؟‏

² جدوں یسوع تے اوہدے رسول مُنادی توں واپس آئے تے اوہ آرام کرن لئی اِک کشتی چ بہہ کے گلیل دی جھیل دے دُوجے پاسے اِک علاقے چ چلے گئے۔ (‏مرقس 6:‏7،‏ 30-‏32؛‏ لُوقا 9:‏10‏)‏ ایہہ شہر بیت صیدا دا اِک سنسان علاقہ سی۔ پر چھیتی ای لوکاں نُوں ایس بارے پتہ چل گیا تے ہزاراں لوک یسوع نُوں مِلن گئے۔ یسوع نے لوکاں نُوں نظرانداز نئیں کیتا سگوں اوہنے خوشی نال اوہناں نُوں بادشاہی بارے تلیم دِتی تے بیماراں نُوں شفا دِتی۔ جیویں جیویں شام ہوئی، شاگرداں نُوں لوکاں دے کھان پین دی فکر ہون لگ پئی۔ اوہناں وچوں شاید کجھ لوکاں کول اپنے لئی تھوڑا بوہت کھانا ہے سی پر زیادہ‌تر لوکاں نُوں پنڈاں چ جا کے اپنے لئی کھانا خریدنا پینا سی۔ (‏متی 14:‏15؛‏ یوحنا 6:‏4، 5‏)‏ یسوع نے کیہہ کیتا؟‏

یسوع نے معجزہ کر کے لوکاں نُوں روٹی کھوائی

3.‏ یسوع نے اپنے شاگرداں نُوں کیہہ کرن لئی کہیا؟ (‏ تصویر نُوں وی ویکھو۔)‏

³ یسوع نے اپنے رسولاں نُوں کہیا:‏ ”‏اوہناں نُوں کِتے بھیجن دی لوڑ نئیں۔ تُسی اوہناں نُوں کجھ کھان لئی دَوو۔“‏ (‏متی 14:‏16‏)‏ پر مسئلہ ایہہ سی کہ اوتھے تقریباً 5 ہزار آدمی سن۔ تے جے عورتاں تے بچیاں  نُوں وی گنیا جائے تے اوتھے تقریباً 15 ہزار لوک سن۔ (‏متی 14:‏21‏)‏ یسوع دے شاگرد اندریاس نے کہیا:‏ ”‏ایتھے اِک مُنڈے کول جَو دِیاں پنج روٹیاں تے دو چھوٹیاں مچھیاں نیں۔ پر اوہناں نال اینے سارے لوکاں دا ٹیڈھ کیویں بھرے گا؟“‏ (‏یوحنا 6:‏9‏)‏ اوس زمانے چ عام طور تے غریب لوک تے ہور دُوجے لوک جَو دی روٹی کھاندے سن تے اوس مُنڈے کول جیہڑیاں دو چھوٹیاں مچھیاں سن شاید اوہناں نُوں نمک لا کے خشک کیتا گیا سی۔ بھلا اینے جہے کھانے نال اینے سارے لوکاں دا ٹیڈھ کیویں بھر سکدا سی؟‏

4.‏ اَسی یوحنا 6:‏11-‏13 توں کیہہ سکھ سکنے آں؟ (‏تصویراں نُوں وی ویکھو۔)‏

⁴ یسوع لوکاں لئی مہمان‌نوازی وکھانا چاہندا سی ایس لئی اوہنے اوہناں نُوں کہیا کہ اوہ ٹولیاں بنا کے گھاہ تے بہہ جان۔ (‏مرقس 6:‏39، 40؛‏ یوحنا 6:‏11-‏13 نُوں پڑھو۔)‏ یسوع کول جیہڑیاں روٹیاں تے مچھیاں سن، اوہدے لئی اوہنے دُعا چ اپنے باپ دا شکر ادا کیتا۔ اِنج کرنا بالکل مناسب سی کیونکہ کھانا دین والا یہوواہ ای اے۔ یسوع نے ساڈے لئی کِنّی چنگی مثال قائم کیتی اے۔ ایس لئی سانوں اوہدے وانگوں کھانا کھان توں پہلاں یہوواہ کولوں دُعا کرنی چاہی دی اے، فیر بھانویں اَسی کلّے ہوئیے یاں دُوجے لوکاں دے نال۔ فیر یسوع نے اپنے شاگرداں نُوں لوکاں چ کھانا وَنڈن لئی کہیا تے سارے لوکاں نے رَج کے کھادا۔ اوہنے تے لوکاں نُوں ایناں زیادہ کھانا دِتا کہ کجھ بچ وی گیا۔ یسوع ایہنوں ضائع نئیں کرنا چاہندا سی۔ ایس لئی اوہنے اپنے شاگرداں نُوں کہیا کہ اوہ بچیا ہویا کھانا جمع کر لین تاکہ ایہنوں بعد چوں کھادا جا سکے۔ ایہدے توں اَسی سکھنے آں کہ سانوں وی چیزاں نُوں سمجھداری نال استمال کرنا چاہی دا اے تے ایہناں نُوں ضائع نئیں کرنا چاہی دا۔ جے تواڈے بچے نیں تے کیوں نہ تُسی ایہہ واقعہ اپنے بچیاں نال مِل کے پڑھو تے اوہناں نال ایس بارے گل کرو کہ اَسی یسوع دی مثال توں دُعا کرن، مہمان‌نوازی وکھان تے کُھلے دل نال دُوجیاں نُوں دین بارے کیہہ سکھنے آں۔‏

5.‏ (‏الف)‏یسوع دے شاندار معجزے ویکھ کے لوک کیہہ کرنا چاہندے سن؟ (‏ب)‏یسوع نے کیہہ کیتا؟‏

 ⁵ لوک یسوع دے معجزیاں تے اوہدی تلیم توں بڑے حیران سن۔ اوہ جان دے سن کہ موسیٰ نے وعدہ کیتا سی کہ خدا اِک خاص نبی گھلے گا۔ ایس لئی شاید اوہ سوچ رہے ہون گے کہ کیہہ یسوع ای اوہ نبی اے۔ (‏اِستثنا 18:‏15-‏18‏)‏ جے ایہہ گل اے تے شاید اوہناں نُوں ایہہ وی لگیا ہوئے گا کہ یسوع اوہناں لئی بڑا زبردست حکمران ثابت ہو سکدا اے تے اوہ اوہناں دی پوری قوم دِیاں کھان پین دِیاں ضرورتاں نُوں پورا کر سکدا اے۔ ایسے لئی لوک یسوع نُوں ”‏زبردستی بادشاہ بنانا چاہندے“‏ سن۔ (‏یوحنا 6:‏14، 15‏)‏ جے یسوع بادشاہ بن جاندا تے اِک لحاظ نال اوہ سیاسی معاملیاں چ یہودیاں دی طرف‌داری کر رہیا ہوندا جیہڑے رومی حکومت دے تحت سن۔ پر کیہہ یسوع نے لوکاں دے کہن تے اِنج کیتا؟ بائبل چ دَسیا گیا اے کہ یسوع کلّا پہاڑ تے چلا گیا۔ بھانویں کہ لوکاں نے یسوع تے بوہت دباؤ پایا پر اوہ سیاسی معاملیاں چ نئیں پیا۔ اوہنے ساڈے لئی واقعی بڑی چنگی مثال قائم کیتی اے۔‏

6.‏ اَسی یسوع دی مثال تے کیویں عمل کر سکنے آں؟ (‏تصویر نُوں وی ویکھو۔)‏

⁶ ظاہری جہی گل اے کہ اَج سانوں لوک ایہہ نئیں کہن گے کہ اَسی کوئی معجزہ کر کے اوہناں نُوں کھانا دَئیے یاں کسے بیمار نُوں ٹھیک کرئیے تے نہ ای اوہ سانوں کوئی بادشاہ یاں حکمران بنانا چاہن گے۔ پر ہو سکدا اے کہ اوہ ساڈے تے دباؤ پان کہ اَسی کسے سیاسی پارٹی نُوں ووٹ دَئیے یاں کسے ایہو جہے بندے دی حمایت کرئیے جیہڑا اوہناں لئی چنگا حکمران ثابت ہو سکدا اے۔ پر یسوع نے ساڈے لئی اِک بڑی ودھیا مثال قائم کیتی۔ اوہنے ہر قسم دے سیاسی کم چ حصہ لین توں اِنکار کر دِتا۔ ایتھوں تک کہ  اوہنے بعد چوں ایہہ وی کہیا کہ ”‏میری بادشاہی ایس دُنیا دی نئیں اے۔“‏ (‏یوحنا 17:‏14؛‏ 18:‏36‏)‏ مسیحیاں دے طور تے اَج سانوں وی یسوع ورگی سوچ رکھنی چاہی دی اے تے اوہدے وانگوں سیاسی معاملیاں چ حصہ نئیں لینا چاہی دا۔ اَسی صرف خدا دی بادشاہی دی حمایت کرنے آں، ایہدے بارے دُوجیاں نُوں وی دَسنے آں تے ایہدے آن لئی دُعا کرنے آں۔ (‏متی 6:‏10‏)‏ آؤ فیر توں اوس واقعے تے غور کرئیے جدے چ معجزہ کر کے یسوع نے لوکاں نُوں روٹی کھوائی۔ اَسی ویکھاں گے کہ ایس واقعے توں اَسی ہور کیہہ کجھ سکھ سکنے آں۔‏

روٹیاں والے معجزے دا مطلب

7.‏ یسوع نے کیہڑا معجزہ کیتا تے ایہنوں ویکھ کے شاگرداں نے کیہہ کہیا؟ (‏یوحنا 6:‏16-‏20‏)‏

⁷ لوکاں نُوں روٹی کھوان توں بعد یسوع نے اپنے شاگرداں نُوں کفرنحوم جان لئی کہیا تے آپ یسوع پہاڑ تے ٹُر گیا کیونکہ اوہ نئیں چاہندا سی کہ لوک اوہنوں بادشاہ بنان۔ ‏(‏یوحنا 6:‏16-‏20 نُوں پڑھو۔)‏ جدوں رسول کشتی چ سفر کر رہے سن تے طوفان آ گیا۔ لہراں بوہت اُچیاں سن تے بڑی تیز نھیری چل رہی سی۔ فیر یسوع پانی تے چل کے اوہناں دے کول جان لگ پیا تے اوہنے پطرس نُوں وی پانی تے چل کے اپنے کول آن لئی کہیا۔ (‏متی 14:‏22-‏31‏)‏ جیویں ای یسوع کشتی چ بیٹھا، طوفان رُک گیا۔ ایس وجہ توں شاگرد بوہت حیران ہوئے تے اوہنوں کہن لگ پئے:‏ ”‏تُوں واقعی خدا دا پُتر ایں۔“‏ a (‏متی 14:‏33‏)‏ دلچسپی دی گل اے کہ شاگرداں نے اوہدوں ایہہ گل نئیں کہی جدوں یسوع نے معجزہ کر کے لوکاں نُوں روٹی کھوائی سگوں اوہدوں کہی جدوں اوہناں نے یسوع نُوں پانی تے ٹُردیاں ویکھیا۔ ایسے واقعے بارے مرقس نے دَسیا:‏ ”‏شاگرد ایہہ ویکھ کے بڑے حیران ہوئے کیونکہ اوہ روٹیاں والے معجزے دا مطلب نئیں سمجھے سن سگوں اوہناں دی سمجھ اُتے حالے وی پردہ پیا ہویا سی۔“‏ (‏مرقس 6:‏50-‏52‏)‏ اصل چ شاگرد ایہہ نئیں سمجھ سکے سن کہ یہوواہ نے یسوع نُوں معجزے کرن لئی کِنّی طاقت دِتی ہوئی اے۔ پر چھیتی ای یسوع نے روٹیاں والے معجزے بارے فیر توں گل کیتی جدے توں اَسی اِک ہور سبق سکھنے آں۔‏

8، 9.‏ لوکاں دی بِھیڑ یسوع نُوں کیوں لبھ رہی سی؟ (‏یوحنا 6:‏26، 27‏)‏

⁸ اگلے ای دن لوکاں دی بِھیڑ فیر اوس جگہ گئی جتھے یسوع نے اوہناں نُوں کھانا کھوایا سی۔ پر اوہناں نُوں یسوع تے اوہدے رسول اوتھے نئیں ملے۔ ایس لئی اوہ کشتی چ بہہ کے یسوع نُوں لبھن لئی کفرنحوم چلے گئے۔ (‏یوحنا 6:‏22-‏24‏)‏ کیہہ اوہ ایس لئی یسوع نُوں لبھ رہے سن تاکہ اوہ بادشاہی بارے ہور زیادہ سکھ سکن؟ نئیں۔ اوہ صرف ایہہ چاہندے سن کہ یسوع اوہناں نُوں فیر توں روٹی کھوائے۔ اوہناں دا دھیان صرف اپنیاں ضرورتاں تے خواہشاں پوریاں کرن تے سی۔ اَسی ایہہ گل کیویں جاننے آں؟‏

⁹ جدوں یسوع لوکاں نُوں مِل گیا تے اوہنے صاف لفظاں چ اوہناں نُوں کہیا کہ اوہ اوہنوں ایس لئی لبھ رہے نیں تاکہ اوہ اوہناں نُوں فیر توں کھانا کھوائے۔ یسوع جان دا سی کہ جیہڑی روٹی اوہنے اوہناں نُوں کھوائی سی تے اوہناں نے ‏”‏رَج کے“‏ کھادی سی، اوہدا فائدہ زیادہ دیر تک نئیں رہندا۔ ایس لئی اوہنے لوکاں نُوں کہیا کہ اوہ ”‏اوس کھانے لئی محنت“‏ کرن جیہڑا ”‏ہمیشاں دی زندگی دیندا اے۔“‏ ‏(‏یوحنا 6:‏26، 27 نُوں پڑھو۔)‏ یسوع نے دَسیا کہ ایہہ کھانا اوہدا اسمانی باپ دیندا اے۔ یقیناً ایہہ سُن کے لوک بڑے حیران ہوئے ہون گے کہ اِک ایہو جیہا کھانا وی اے جیہڑا ہمیشاں دی زندگی دے سکدا اے۔ پر ایہہ کیہڑا کھانا سی تے لوک ایہنوں کیویں حاصل کر سکدے سن؟‏

10.‏ لوکاں نُوں ہمیشاں دی زندگی پان لئی کیہہ کرن دی لوڑ سی؟‏

¹⁰ اِنج لگدا اے کہ لوک ایہہ سوچ رہے سن کہ اوہناں نُوں ایہو جہے کم کرنے چاہی دے نیں جنہاں توں اوہ ایہہ کھانا حاصل کر سکن۔ شاید اوہناں دے ذہن چ اوہ کم سن جنہاں دا حکم موسیٰ دی شریعت چ دِتا گیا سی۔ پر یسوع نے اوہناں نُوں دَسیا کہ ”‏خدا دی منظوری پان لئی ایہہ ضروری اے کہ تُسی اوہدے تے ایمان ظاہر کرو جنہوں اوہنے گھلیا اے۔“‏ (‏یوحنا 6:‏28، 29‏)‏ یسوع خدا دا نمائندہ سی تے لوکاں نُوں ”‏ہمیشاں دی زندگی“‏ پان لئی اوہدے تے ایمان ظاہر کرن دی لوڑ سی۔ ایہہ  گل یسوع اوہناں نُوں پہلے وی دَس چُکیا سی۔ (‏یوحنا 3:‏16-‏18،‏ 36‏)‏ تے ایہدے بارے اوہنے ہور وی کئی موقعیاں تے دَسیا۔—‏یوحنا 17:‏3‏۔‏

11.‏ یہودیاں نے ایہہ کیویں ظاہر کیتا کہ اوہناں دا دھیان صرف اپنا ٹیڈھ بھرن تے سی؟ (‏زبور 78:‏24، 25‏)‏

¹¹ اوہ یہودی ایس گل نُوں قبول نئیں کر رہے سن کہ اوہناں نُوں یسوع تے ایمان ظاہر کرن دی لوڑ اے۔ اوہناں نے اوہنوں پچھیا:‏ ”‏تُوں کیہڑا معجزہ کریں گا جنہوں ویکھ کے اَسی تیرے اُتے ایمان لے آئیے؟“‏ (‏یوحنا 6:‏30‏)‏ فیر اوہناں نے کہیا کہ موسیٰ دے زمانے چ اوہناں دے پیو دادیاں نے من کھادا سی جیہڑا اوہناں لئی روٹی وانگوں سی۔ (‏نحمیاہ 9:‏15؛‏ زبور 78:‏24، 25 نُوں پڑھو۔)‏ ایہدے توں صاف پتہ چلدا اے کہ حالے وی اوہناں دے ذہن چ ایہی گل چل رہی سی کہ اوہناں نُوں کھان لئی روٹی ملے۔ فیر جدوں یسوع نے ایس بارے گل کیتی کہ میرا باپ توانوں ”‏اسمانوں اصلی روٹی“‏ دیندا اے تے لوکاں نے ایہہ جانن دی بالکل وی کوشش نئیں کیتی کہ یسوع دی ایس گل دا کیہہ مطلب سی۔ (‏یوحنا 6:‏32‏)‏ ایہناں لوکاں دا دھیان صرف اپنا ٹیڈھ بھرن تے سی۔ ایس لئی اوہناں نے اوہناں سچائیاں تے بالکل وی دھیان نئیں دِتا جیہڑیاں یسوع اوہناں نُوں سکھان دی کوشش کر رہیا سی۔ اَسی ایہدے توں کیہہ سکھ سکنے آں؟‏

ساڈی زندگی چ سب توں اہم کیہہ ہونا چاہی دا اے؟‏

12.‏ یسوع مسیح نے ایہہ کیویں واضح کیتا کہ ساڈے لئی کیہڑی گل سب توں اہم ہونی چاہی دی اے؟‏

¹² یوحنا 6 باب توں اَسی سکھنے آں کہ خدا دے حکم مننا تے اوہدے نال دوستی کرنا ساڈے لئی سب توں اہم ہونا چاہی دا اے۔ ایہہ گل یسوع نے اوس ویلے وی واضح کیتی جدوں شیطان نے اوہنوں اَزمایا سی۔ (‏متی 4:‏3، 4‏)‏ جدوں اوہنے پہاڑ تے تقریر دِتی تے اوہدوں وی اوہنے ایس گل تے زور دِتا کہ سانوں خدا دی رہنمائی حاصل کرنی چاہی دی اے۔ (‏متی 5:‏3‏)‏ ایس لئی اَسی اپنے آپ کولوں پچھ سکنے آں:‏ ”‏مَیں جیویں زندگی گزار رہیا واں، کیہہ اوہدے توں ایہہ ظاہر ہوندا اے کہ میرے لئی خدا نال اپنا رشتہ مضبوط کرنا اپنیاں خواہشاں پوریاں کرن توں زیادہ اہم اے؟“‏

13.‏ (‏الف)‏کھان پین توں خوشی حاصل کرنا غلط کیوں نئیں اے؟ (‏ب)‏پولُس رسول نے کیہڑی گل توں خبردار کیتا؟ (‏1-‏کُرنتھیوں 10:‏6، 7،‏ 11‏)‏

¹³ اپنیاں ضرورت دِیاں شیواں لئی دُعا کرنا تے اوہناں توں خوشی حاصل کرنا غلط نئیں اے۔ (‏لُوقا 11:‏3‏)‏ بائبل چ دَسیا گیا اے کہ انسان لئی ایس توں بہتر کجھ وی نئیں کہ اوہ کھائے پیئے تے اپنی محنت توں خوشی حاصل کرے کیونکہ ایہہ سچے خدا دی دین اے۔ (‏واعظ 2:‏24؛‏ 8:‏15؛‏ یعقوب 1:‏17‏)‏ پر سانوں ایہناں چیزاں نُوں اپنی زندگی چ سب توں زیادہ اہمیت نئیں دینی چاہی دی۔ ایہی گل پولُس رسول نے اوس ویلے واضح کیتی جدوں اوہنے اپنے ہم‌ایماناں نُوں خط لکھیا۔ خط چ اوہنے بنی‌اِسرائیل دے اوہناں بھیڑے کماں دا ذکر کیتا جیہڑے اوہناں نے ویرانے چ تے سینا دے پہاڑ دے نیڑے کیتے سن۔ اوہنے مسیحیاں نُوں خبردار کیتا کہ اوہ بنی‌اِسرائیل وانگوں بھیڑیاں چیزاں دی خواہش نہ کرن۔ ‏(‏1-‏کُرنتھیوں 10:‏6، 7،‏ 11 نُوں پڑھو۔)‏ یہوواہ خدا معجزہ کر کے بنی‌اِسرائیل نُوں کھانا دے رہیا سی۔ پر اوہ کھانے دے اینے لالچی سن کہ ایہہ اوہناں لئی نقصان‌دہ ثابت ہویا۔ (‏گنتی 11:‏4-‏6،‏ 31-‏34‏)‏ ذرا اوس واقعے تے وی غور کرو جدوں اوہناں نے سونے دا بچھڑا بنایا سی۔ اوس ویلے وی اِسرائیلیاں نے ظاہر کیتا کہ اوہناں لئی یہوواہ دی گل منن توں زیادہ اہم کھانا پینا تے موج مستی سی۔ (‏خروج 32:‏4-‏6‏)‏ پولُس رسول نے مسیحیاں نُوں خبردار کرن لئی ایہہ مثالاں ایس لئی دِتیاں کیونکہ اوہ مسیحی ایہو جہے زمانے چ رہ رہے سن جدوں یروشلم تے ہیکل تباہ ہون والی سی۔ اَج اَسی وی اِک ایہو جہے دَور چ رہ رہے آں جدوں دُنیا دا خاتمہ بوہت نیڑے وے۔ ایس لئی سانوں وی پولُس دی ایس نصیحت تے دھیان دینا چاہی دا اے۔‏

14.‏ کھان پین دِیاں شیواں بارے بائبل چ کیہہ وعدہ کیتا گیا اے؟‏

¹⁴ جدوں یسوع نے دُعا سکھاندے ویلے کہیا کہ اَسی یہوواہ کولوں درخاست کرئیے کہ اوہ ”‏سانوں اَج دی ضرورت مطابق روٹی“‏ دَوے تے ایہدے نال نال اوہنے ایہہ وی سکھایا کہ اَسی ایہہ درخاست وی کرئیے کہ ”‏تیری مرضی جیویں اسمان تے پوری ہوندی اے، اونویں ای زمین تے وی ہوئے۔“‏ (‏متی 6:‏9-‏11‏)‏ جدوں زمین تے خدا دی مرضی پوری ہوئے گی تے اوہدوں ایہہ کیہو جہی ہوئے گی؟ بائبل چ دَسیا گیا  اے کہ زمین تے خدا دی مرضی پوری ہون چ ایہہ وی شامل اے کہ سانوں اچھی خوراک ملے۔ یسعیاہ 25:‏6-‏8 توں پتہ چلدا اے کہ اوہدوں مزیدار کھان پین دِیاں شیواں دی کوئی تھوڑ نئیں ہوئے گی۔ زبور 72:‏16 چ ایہہ پیشین‌گوئی کیتی گئی اے:‏ زمین تے اناج بے‌حساب ہوئے گا۔ پہاڑاں دِیاں چوٹیاں تے وادھو اناج ہوئے گا۔ کیہہ تُسی اوس وقت دا اِنتظار کر رہے او جدوں تُسی ایس اناج توں اپنا پسندیدہ کھانا بناؤ گے یاں ایہدے نال ہور نویں نویں کھانے بنان دی کوشش کرو گے؟ ایہدے نال نال تُسی اپنے باغ لاؤ گے تے اوہناں دا پھل کھاؤ گے۔ (‏یسعیاہ 65:‏21، 22‏)‏ اوس ویلے ہر کوئی ایہناں نعمتاں توں فائدہ چُکے گا۔‏

15.‏ نوِیں دُنیا چ جدوں مُردے زندہ کیتے جان گے تے اوہناں نُوں کیہہ کجھ سکھن دی لوڑ ہوئے گی؟ (‏یوحنا 6:‏35‏)‏

¹⁵ یوحنا 6:‏35 نُوں پڑھو۔‏ ذرا فیر توں اوہناں لوکاں بارے سوچو جنہاں نُوں یسوع نے روٹی تے مچھی کھوائی سی۔ جدوں نوِیں دُنیا چ مُردیاں نُوں زندہ کیتا جائے گا تے شاید اَسی اوہناں وچوں کجھ لوکاں نُوں ملئے۔ بھانویں اوہناں نے ماضی چ یسوع تے ایمان ظاہر نئیں کیتا سی۔ پر فیر وی ہو سکدا اے کہ اوہناں وچوں بوہت سارے لوکاں نُوں زندہ کیتا جائے۔ (‏یوحنا 5:‏28، 29‏)‏ اوس ویلے اوہناں نُوں یسوع دی ایس گل دا مطلب سمجھن دی لوڑ ہوئے گی:‏ ”‏زندگی دی روٹی مَیں آں۔ جیہڑا میرے کول آندا اے، اوہنوں کدی وی بُھکھ نئیں لگے گی۔“‏ اوہناں لوکاں نُوں ایس گل تے وی ایمان ظاہر کرنا ہوئے گا کہ یسوع نے اوہناں لئی اپنی جان فدیے دے طور تے دِتی۔ اوس ویلے اوہناں سارے لوکاں نُوں تلیم دین دا بندوبست کیتا جائے گا جیہڑے مُردیاں چوں زندہ ہون گے یاں جیہڑے نوِیں دُنیا چ پیدا ہون گے۔ ذرا سوچو کہ اوس ویلے سانوں لوکاں نُوں یہوواہ بارے سکھا کے کِنّی خوشی ملے گی۔ ایہہ خوشی اوس خوشی توں کِتے زیادہ ہوئے گی جیہڑی کھان پین دِیاں شیواں توں مِلدی اے۔ نوِیں دُنیا چ یہوواہ تے اوہدے مقصد نال تعلق رکھن والیاں گلاں زیادہ اہم ہون گیاں۔‏

16.‏ اگلے مضمون چ اَسی کیس بارے گل کراں گے؟‏

¹⁶ اَسی یوحنا 6 باب چ لکھیاں کجھ گلاں تے غور کیتا اے۔ پر یسوع نے ”‏ہمیشاں دی زندگی“‏ بارے ہور وی بوہت کجھ سکھایا۔ اوہناں گلاں تے جِنّاں دھیان اوس زمانے دے لوکاں نُوں دین دی لوڑ سی اوناں ای دھیان اَج سانوں وی دین دی لوڑ اے۔ اگلے مضمون چ وی اَسی یوحنا 6 باب تے ای غور کراں گے۔‏