پولُس رسول نے تیمُتھیُس نُوں خط چ ایہہ لکھیا:‏ مَیں تینوں خدا، مسیح یسوع تے چُنے ہوئے فرشتیاں سامنے سنجیدگی نال حکم دینا واں کہ ایہناں ہدیتاں تے طرف‌داری تے تعصب کیتے بغیر عمل کر۔—‏1-‏تیمُتھیُس 5:‏21‏۔‏

آؤ پہلاں ایس بارے گل کرنے آں کہ چُنے ہوئے فرشتیاں چ کون شامل نئیں نیں۔ ایہہ فرشتے 1لکھ 44 ہزار مسیحی نئیں ہو سکدے کیونکہ جدوں پولُس نے تیمُتھیُس نُوں خط لکھیا سی تے اوہدوں تک مسح‌شُدہ مسیحیاں نُوں اسمان تے زندہ کرن دا سلسلہ نئیں شروع ہویا سی۔ ایس لئی رسول تے مسح‌شُدہ مسیحی روحانی ہستیاں نئیں بنے سن۔—‏1-‏کُرنتھیوں 15:‏50-‏54؛‏ 1-‏تھسلُنیکیوں 4:‏13-‏17؛‏ 1-‏یوحنا 3:‏2‏۔‏

ایہدے علاوہ چُنے ہوئے فرشتیاں دا اشارہ اوہناں فرشتیاں وَل وی نئیں ہو سکدا جنہاں نے نوح دے زمانے چ یہوواہ دے خلاف بغاوت کیتی سی۔ ایہناں باغی فرشتیاں نے شیطان دا ساتھ دِتا سی تے ایہہ یسوع مسیح دے مخالف سن۔ (‏پیدائش 6:‏2؛‏ لُوقا 8:‏30، 31؛‏ 2-‏پطرس 2:‏4‏)‏ مستقبل چ ایہناں نُوں 1 ہزار سال لئی اتھاہ گڑھے چ بند کر دِتا جائے گا تے بعد چوں شیطان دے نال ای ختم کر دِتا جائے گا۔—‏یہوداہ 6؛‏مُکاشفہ 20:‏1-‏3،‏ 10‏۔‏

پولُس نے جیہڑے چُنے ہوئے فرشتیاں دا ذکر کیتا، اوہ یقیناً اوہ فرشتے نیں جیہڑے اسمان تے یہوواہ خدا تے یسوع دی حمایت کردے نیں جیویں کہ ایت چ وی دَسیا گیا اے۔‏

اسمان تے یہوواہ دے لکھاں وفادار فرشتے نیں۔ (‏عبرانیوں 12:‏22، 23‏)‏ سانوں ایہہ نئیں سوچنا چاہی دا کہ یہوواہ خدا نے اوہناں وچوں ہر اِک نُوں اِکو جیہا کم دِتا اے۔ (‏مُکاشفہ 14:‏17، 18‏)‏ یاد کرو کہ اِک موقعے تے صرف اِک ای فرشتے نُوں 1 لکھ 85 ہزار اسوری فوجیاں نُوں مارن دی ذمے‌داری دِتی گئی سی۔ (‏2-‏سلاطین 19:‏35‏)‏ تے شاید بوہت سارے فرشتیاں نُوں ایہہ ذمے‌داری وی دِتی گئی اے کہ اوہ یسوع دی ”‏بادشاہی چوں اوہناں سارے لوکاں نُوں جمع کرن .‏ .‏ .‏ جیہڑے بھیڑے کم کردے نیں تے دُوجیاں نُوں گمراہ کردے نیں۔“‏ (‏متی 13:‏39-‏41‏)‏ تے کجھ ہور فرشتیاں نُوں شاید ایہہ ذمے‌داری دِتی جائے گی کہ ”‏اوہ اوہدے چُنے ہوئے لوکاں نُوں اسمان تے جمع کرن۔“‏ (‏متی 24:‏31‏)‏ ایہدے علاوہ یہوواہ نے کجھ فرشتیاں نُوں حکم دِتا اے کہ اوہ ہر قدم تے ساڈی رہنمائی کرن۔—‏زبور 91:‏11؛‏ متی 18:‏10‏؛ ایہدے علاوہ متی 4:‏11؛‏ لُوقا 22:‏43 تے غور کرو۔‏

1-‏تیمُتھیُس 5:‏21 چ جیہڑے چُنے ہوئے فرشتیاں دا ذکر کیتا گیا اے، اوہناں نُوں اوہناں کماں دی دیکھ‌بھال کرن دی ذمے‌داری دِتی گئی اے جنہاں دا تعلق خدا دے بندیاں نال اے۔ ایس ایت دِیاں اگلیاں تے پچھلیاں ایتاں چ پولُس نے کلیسیا دے بھین بھراواں نُوں کہیا کہ اوہناں نُوں بزرگاں لئی احترام وکھانا چاہی دا اے تے بزرگاں نُوں دَسیا کہ اوہناں نُوں اپنیاں ذمے‌داریاں نُوں طرف‌داری تے تعصب کیتے بغیر پورا کرنا چاہی دا اے تے کوئی وی فیصلہ کرن توں پہلاں چنگی طرحاں سوچ‌وچار کرنی چاہی دی اے۔ بزرگاں لئی ایس ہدیت تے عمل کرنا ایس لئی ضروری سی کیونکہ یہوواہ، مسیح یسوع تے چُنے ہوئے فرشتے ایہہ ویکھدے نیں کہ بزرگ کیویں کلیسیا دی دیکھ‌بھال کردے نیں۔ ایہدے توں صاف پتہ چلدا اے کہ کجھ فرشتیاں نُوں ایہہ ذمے‌داری دِتی گئی اے کہ اوہ کلیسیا چ خدا دے بندیاں دا خیال رکھن، مُنادی دے کم چ اوہناں دا ساتھ دین تے یہوواہ نُوں اوہناں کماں بارے دَسن جیہڑے اوہ کلیسیا چ ہوندے ہوئے ویکھدے نیں۔—‏متی 18:‏10؛‏ مُکاشفہ 14:‏6‏۔‏