1، 2.‏ جدوں بچے بائبل تے یہوواہ بارے سوال کردے نیں تے ماں پیو نُوں کیہہ کرنا چاہی دا اے؟‏

 بوہت سارے لوک من دے نیں کہ بچیاں دی تربیت کرن لئی بڑی محنت کرنی پیندی اے۔ جے تواڈے بچے حالے چھوٹے نیں تے یقیناً تُسی اوہناں دے ایمان نُوں مضبوط کرن لئی بڑی محنت کر رہے ہووو گے۔ ایس لئی تُسی واقعی تعریف دے لائق او۔ (‏اِستثنا 6:‏6، 7‏)‏ پر جیویں جیویں تواڈے بچے وڈے ہوندے نیں تے شاید اوہ تواڈے کولوں پچھن کہ یہوواہ نے فلانا حکم کیوں دِتا اے تے فلانے کم توں کیوں منع کیتا اے۔‏

² ہو سکدا اے کہ شروع شروع چ تُسی اپنے بچیاں دے سوال سُن کے پریشان ہو جاؤ۔ شاید تُسی ایہہ وی سوچو کہ تواڈے بچے دا ایمان کمزور ہون لگ پیا اے۔ پر سچ تے ایہہ وے کہ جیویں جیویں بچے وڈے ہوندے نیں، اوہناں نُوں اپنے ایمان نُوں مضبوط کرن لئی سوال پچھنے چاہی دے نیں۔ (‏1-‏کُرنتھیوں 13:‏11‏)‏ ایس لئی توانوں پریشان ہون دی لوڑ نئیں اے۔ سگوں جدوں اوہ سوال پچھدے نیں تے اوہناں دی مدد کرو تاکہ اوہ اپنی سوچن سمجھن دی صلاحیت نُوں ودھان تے اپنے ایمان نُوں مضبوط کر سکن۔‏

3.‏ ایس مضمون چ اَسی کیہڑیاں گلاں تے غور کراں گے؟‏

³ ایس مضمون چ اَسی ایس گل تے غور کراں گے کہ ماں پیو اپنے بچیاں دی مدد کیویں کر سکدے نیں تاکہ اوہ (‏1)‏یہوواہ تے اپنے ایمان نُوں مضبوط کرن، (‏2)‏بائبل دے اصولاں لئی اپنے دل چ قدر ودھان تے (‏3)‏اپنے عقیدیاں بارے دُوجیاں نُوں وی دَسن۔ اَسی ایس گل تے وی غور کراں گے کہ بچیاں دا سوال پچھنا چنگی گل کیوں اے تے ماں پیو اپنے بچیاں نال اپنے عقیدیاں بارے گل کرن لئی کیہہ کجھ کر سکدے نیں۔‏

اپنے بچیاں دی مدد کرو تاکہ اوہ اپنے ایمان نُوں مضبوط کرن

4.‏ اِک بچے دے ذہن چ کیہو جہے سوال آ سکدے نیں تے کیوں؟‏

⁴ ماپیو، جے تُسی خدا تے ایمان رکھدے او تے ضروری نئیں اے کہ تواڈے بچے وی خدا تے ایمان رکھدے ہون۔ تُسی وی پیدائشی طور تے یہوواہ تے ایمان نئیں رکھدے سو تے ایہہ گل تواڈے بچیاں بارے  وی سچ اے۔ وقت دے نال نال شاید تواڈے بچے دے ذہن چ ایہو جہے سوال آن:‏ ”‏کیہہ واقعی خدا ہے وے؟ کیہہ بائبل چ لکھے حکم صحی نیں؟“‏ بائبل چ دَسیا گیا اے کہ سانوں اپنی سوچن سمجھن دی صلاحیت نُوں استمال کرنا چاہی دا اے تے ساریاں گلاں نُوں پَرکھنا چاہی دا اے۔ (‏رومیوں 12:‏1؛‏ 1-‏تھسلُنیکیوں 5:‏21‏)‏ تُسی اپنے بچیاں دی مدد کیویں کر سکدے او تاکہ اوہ اپنے ایمان نُوں مضبوط کرن؟‏

5.‏ ماں پیو اپنے بچیاں دی مدد کیویں کر سکدے نیں تاکہ اوہ بائبل تے اپنے ایمان نُوں مضبوط کرن؟ (‏رومیوں 12:‏2‏)‏

⁵ اپنے بچے دا حوصلہ ودھاؤ کہ اوہ ایس گل دے ثبوت لبھے کہ بائبل چ لکھیاں گلاں صحی نیں۔‏ (‏رومیوں 12:‏2 نُوں پڑھو۔)‏ جدوں تواڈا بچہ کوئی سوال پچھدا اے تے اوہدی مدد کرو کہ اوہ اپنے سوالاں دے جواب لبھن لئی تحقیق کرن دِیاں سہولتاں نُوں استمال کرے جیویں کہ اُردو زبان چ کتاب ‏”‏یہوواہ کے گواہوں کے لئے مطالعے کے حوالے“‏ نُوں۔ ایس کتاب چ اوہ موضوع ”‏بائبل‏“‏ چ جا کے حصہ ”‏خدا کے الہام“‏ چ دِتے گئے مضموناں نُوں ویکھ سکدا اے تے ایس گل دے ثبوت لبھ سکدا اے کہ بائبل انساناں دی لکھی کتاب نئیں اے سگوں خدا دا کلام اے۔ (‏1-‏تھسلُنیکیوں 2:‏13‏)‏ مثال لئی، اوہ اسوریاں دے شہر نینوہ بارے تحقیق کر سکدا اے۔ ماضی چ کجھ عالم کہندے سن کہ بائبل چ جیہڑے اسوری شہر نینوہ دا ذکر ہویا اے، اوہ اصل چ ہے ای نئیں سی۔ پر تقریباً 1850 چ شہر نینوہ دے کھنڈر ملے جنہاں توں پتہ چلیا کہ بائبل چ ایس شہر بارے جو کجھ دَسیا گیا اے، اوہ بالکل صحی اے۔ (‏صِفَنیاہ 2:‏13-‏15‏)‏ جے تواڈا بچہ جاننا چاہندا اے کہ شہر نینوہ دی تباہی توں بائبل دی پیشین‌گوئی کیویں پوری ہوئی تے اوہ نومبر 2021 دے ‏”‏مینارِنگہبانی“‏ چ ایس مضمون نُوں ویکھ سکدا اے:‏ ”‏کیہہ توانوں پتہ اے؟‏‏“‏ اپنے بچے نُوں ہلاشیری دَوو کہ اوہ تنظیم دِیاں کتاباں رسالیاں چوں جیہڑیاں چیزاں سکھدا اے، اوہناں بارے اوہ ویکھے کہ دُوجیاں کتاباں چ کیہہ دَسیا گیا اے۔ اِنج اوہدا ایمان مضبوط ہوئے گا کہ بائبل چ لکھیاں گلاں بالکل صحی نیں۔‏

6.‏ ماں پیو اپنے بچیاں دی مدد کیویں کر سکدے نیں تاکہ اوہ اپنی سوچن سمجھن دی صلاحیت نُوں استمال کرن؟ مثال دَوو۔ (‏تصویر نُوں وی ویکھو۔)‏

⁶ اپنے بچے دی مدد کرو تاکہ اوہ اپنی سوچن سمجھن دی صلاحیت نُوں استمال کرے۔‏ ماں پیو فرق فرق موقعیاں تے اپنے بچیاں نال بائبل تے خدا بارے گل کر سکدے نیں، جیویں کہ اوس ویلے جدوں اوہ اوہناں نال کسے میوزیم، کسے پارک یاں ساڈی کسے برانچ چ کوئی نمائش ویکھن جاندے نیں۔ جدوں تُسی اپنے بچیاں نُوں میوزیم لے کے جاندے او یاں گھر بیٹھے ای اوہدے نال مِل کے انٹرنیٹ تے کسے میوزیم دی ویڈیو ویکھدے او تے تُسی اوہناں دی توجہ ایہو جہے پرانے واقعیاں تے چیزاں تے دَوا سکدے او جنہاں توں اوہناں دا بائبل تے ایمان مضبوط ہوئے۔ کیہہ تواڈے بچے نُوں پتہ اے کہ خدا دا ناں اِک موآبی پتھر تے لکھیا اے جیہڑا 3000 سال پرانا اے؟ ایہہ موآبی پتھر فرانس دے اِک میوزیم چ رکھیا گیا اے۔ موآبی پتھر دی اِک نقل واروِک چ ساڈے ہیڈ کوارٹر چ بائبل دی اِک نمائش چ وی پئی ہوئی اے۔ ایس پتھر توں پتہ چلدا اے کہ موآب دے بادشاہ میسا نے اِسرائیل دے خلاف بغاوت کیتی تے ایہہ واقعہ بائبل چ وی اِنج ای لکھیا اے۔ (‏2-‏سلاطین 3:‏4، 5‏)‏ جدوں تواڈا بچہ اپنے اَکھیں ایس گل دے ثبوت ویکھے گا کہ بائبل چ لکھیاں گلاں  بالکل صحی تے سچیاں نیں تے اوہدا ایمان مضبوط ہوئے گا۔—‏2-‏تواریخ 9:‏6 تے غور کرو۔‏

7، 8.‏ (‏الف)‏اَسی کائنات چ جیہڑے ڈیزائن ویکھنے آں، اوہناں توں اَسی کیہہ سکھ سکنے آں؟ مثال دَوو۔ (‏تصویر نُوں وی ویکھو۔)‏ (‏ب)‏کیہڑے سوالاں تے غور کرن نال تواڈا بچہ ایس گل تے اپنے ایمان نُوں مضبوط کر سکے گا کہ یہوواہ نے ای سب کجھ بنایا اے؟‏

⁷ اپنے بچے نُوں ہلاشیری دَوو کہ اوہ یہوواہ دِیاں بنائیاں ہوئیاں چیزاں تے سوچ وچار کرے۔‏ جدوں تُسی اپنے بچیاں نال سیر کرن پارک جاندے او یاں اپنے گھر چ ای اوہناں نال مِل کے پودیاں دی دیکھ‌بھال کر رہے ہوندے او تے اوہناں دا دھیان ایس گل تے دَواؤ کہ یہوواہ نے کِنّے زبردست ڈیزائن والیاں چیزاں بنائیاں نیں۔ اِنج تُسی اوہناں نُوں ایہہ دَس سکو گے کہ یہوواہ چ کِنّی حکمت اے۔ مثال لئی، ذرا کائنات چ موجود اوہناں چیزاں تے غور کرو جنہاں چ گول دائرے والے ڈیزائن ہوندے نیں۔ اِک سائنس‌دان نے دَسیا کہ جے تُسی ایہناں ڈیزائناں چ گول دائریاں نُوں گنو گے تے توانوں پتہ چلے گا کہ ایہناں دائریاں دی اِک خاص تعداد ہوندی اے تے ایہہ اِک خاص ترتیب نال بنے ہوندے نیں۔ ایہہ ڈیزائن بوہت ساریاں چیزاں چ نظر آندے نیں جیویں کہ کہکشاواں، کجھ سپیاں دے خولاں چ، پتیاں چ تے سورج مکھی دے پُھل چ۔‏

⁸ ہو سکدا اے کہ تواڈا بچہ سکول چ ہور وی ڈیزائناں بارے سکھے۔ مثال لئی، شاید اوہ درختاں دی بناوٹ بارے سکھے۔ درختاں دے تنے ہوندے نیں، ٹاہنیاں ہوندیاں نیں تے ٹاہنیاں تے پتے لگے ہوندے نیں۔ پر کنہے درختاں نُوں ایس طریقے نال بنایا اے؟ جِنّاں زیادہ تواڈا بچہ اِنج دے سوالاں تے غور کرے گا، اوناں زیادہ اوہدا ایس گل تے ایمان مضبوط ہوئے گا کہ خدا نے ای ساریاں چیزاں بنائیاں نیں۔ (‏عبرانیوں 3:‏4‏)‏ جدوں تواڈا بچہ وڈا ہو جاندا اے تے تُسی اوہدے کولوں ایہہ سوال پچھ سکدے او:‏ ”‏جے خدا نے سانوں بنایا اے تے تیرے خیال چ کیہہ اوہنوں ای پتہ نئیں ہوئے گا کہ اَسی خوش کیویں رہ سکنے آں؟“‏ فیر تُسی اوہنوں ایہہ دَس سکدے او کہ یہوواہ نے سانوں بائبل دے ذریعے رہنمائی دِتی اے تاکہ اَسی خوش رہ سکئے۔‏

اپنے بچیاں دی مدد کرو تاکہ اوہ بائبل دے اصولاں دی قدر کرن

9.‏ تواڈا بچے شاید کیس وجہ توں بائبل دے حکماں یاں اصولاں بارے سوال پچھ سکدا اے؟‏

⁹ کدی کدار ہو سکدا اے کہ تواڈا بچہ اوہناں کماں بارے سوال کرے جنہاں توں بائبل چ منع کیتا گیا اے۔ سب توں پہلاں تے ایہہ جانن دی کوشش کرو کہ اوہ ایہہ سوال کیوں پچھ رہیا اے۔ کیہہ اوہنوں اوہ حکم صحی نئیں لگ رہے یاں فیر مسئلہ ایہہ وے کہ اوہنوں اوہناں سوالاں بارے دُوجیاں نُوں دَسنا مشکل لگدا اے؟ اوہدے سوال دی وجہ بھانویں جو وی ہوئے، تُسی اوہدی مدد کر سکدے او کہ اوہ کتاب ‏”‏خوشیاں بھری زندگی پاؤ“‏ نُوں پڑھے تاکہ اوہ اپنے دل چ بائبل دے اصولاں لئی قدر نُوں ودھا سکے۔‏ a

10.‏ تُسی اپنے بچیاں دی مدد کیویں کر سکدے او تاکہ اوہ یہوواہ نال اپنی دوستی دی قدر کرن؟‏

¹⁰ اپنے بچے دی مدد کرو تاکہ اوہ یہوواہ نال اپنی  دوستی دی قدر کرے۔‏ جدوں تُسی اپنے بچے نال مِل کے کتاب ‏”‏خوشیاں بھری زندگی پاؤ“‏ دا مطالعیا کردے او تے کتاب چ دِتے گئے سوالاں تے مثالاں دے ذریعے ایہہ جانن دی کوشش کرو کہ تواڈا بچہ اوہناں گلاں بارے کیہہ سوچدا اے جیہڑیاں اوہ سکھ رہیا اے۔ (‏اَمثال 20:‏5‏)‏ مثال لئی، سبق نمبر 8 چ دَسیا گیا اے کہ یہوواہ اِک چنگے دوست وانگوں اے جیہڑا ساڈی بھلائی چاہندا اے تے سانوں ایہو جہیاں گلاں دَسدا اے جنہاں دی وجہ توں اَسی نقصان توں بچ سکنے آں۔ فیر تُسی اوہدے نال 1-‏یوحنا 5:‏3 پڑھ سکدے او تے اوہدے کولوں پچھ سکدے او کہ ”‏جے سانوں پتہ اے کہ یہوواہ ساڈا چنگا دوست اے تے سانوں اوہدے حکماں بارے کیہو جہی سوچ رکھنی چاہی دی اے؟“‏ ایہہ بڑا سادہ جیہا سوال اے۔ پر ایس سوال تے غور کرن نال تواڈا بچہ ایہہ سمجھ جائے گا کہ یہوواہ نے سانوں حکم ایس لئی دِتے نیں کیونکہ اوہ سانوں پیار کردا اے۔—‏یسعیاہ 48:‏17، 18‏۔‏

11.‏ تُسی اپنے بچیاں دی مدد کیویں کر سکدے او تاکہ اوہناں دے دل چ بائبل دے اصولاں لئی قدر ودھے؟ (‏اَمثال 2:‏10، 11‏)‏

¹¹ اپنے بچے نال ایس بارے گل کرو کہ بائبل دے اصولاں تے عمل کرن نال سانوں کیہہ فائدہ ہوندا اے۔‏ جدوں تُسی بچیاں نال مِل کے بائبل یاں روزانہ دی ایت پڑھدے او تے اوہناں نال ایس بارے گل بات کرو کہ بائبل دے اصولاں تے عمل کرن نال تواڈے خاندان نُوں کیویں فائدہ ہویا اے۔ مثال لئی، کیہہ تواڈے بچے نے ویکھیا اے کہ ایمان‌دار تے محنتی ہون دے کیہڑے فائدے ہوندے نیں؟ (‏عبرانیوں 13:‏18‏)‏ ایہدے علاوہ، تُسی اپنے بچیاں نُوں دَس سکدے او کہ بائبل دے اصولاں تے عمل کرن نال ساڈی صحت وی چنگی رہندی اے تے اَسی خوش رہنے آں۔ (‏اَمثال 14:‏29، 30‏)‏ جدوں تُسی اپنے بچے نال بائبل دے اصولاں بارے گل کرو گے تے اوہدے دل چ ایہناں لئی قدر ودھے گی تے اوہ ایہناں تے عمل وی کرے گا۔‏‏—‏اَمثال 2:‏10، 11 نُوں پڑھو۔‏

12.‏ اِک بھرا اپنے نوجوان پُتر دی ایہہ سمجھن چ مدد کیویں کردا اے کہ بائبل دے اصولاں تے عمل کرن نال سانوں فائدہ ہوندا اے؟‏

¹² بھرا سٹیو جیہڑا فرانس چ رہندا اے، اوہ تے اوہدی بیوی اپنے نوجوان پُتر ایتھن دی ایہہ سمجھن چ مدد کردے نیں کہ یہوواہ نے سانوں ایس لئی حکم دِتے نیں کیونکہ اوہ سانوں پیار کردا اے۔ اوہناں نے دَسیا:‏ ”‏اَسی اوہدے کولوں ایہو جہے سوال پچھنے آں:‏ ”‏یہوواہ کیوں چاہندا اے کہ اَسی ایس حکم تے عمل کرئیے؟ ایس حکم توں کیویں پتہ چلدا اے کہ یہوواہ سانوں پیار کردا اے؟ جے تُوں ایس حکم تے عمل نئیں کریں گا تے کیہہ ہوئے گا؟“‏“‏ ایس طرحاں دی گل بات دی وجہ توں ایتھن نُوں پورا یقین ہو گیا کہ یہوواہ جو کہندا اے، صحی کہندا اے۔ بھرا سٹیو نے ایہہ وی کہیا:‏ ”‏اَسی چاہنے آں کہ ایتھن ایہہ سمجھ سکے کہ بائبل دے اصول انسانی سمجھ نالوں کِتے ودھ کے نیں۔“‏

13.‏ ماں پیو اپنے بچیاں نُوں بائبل دے اصولاں تے عمل کرنا کیویں سکھا سکدے نیں؟ اِک مثال دَوو۔‏

¹³ اپنے بچے نُوں بائبل دے اصولاں تے عمل کرنا سکھاؤ۔‏ توانوں اِنج کرن دا موقع اوہدوں مِل سکدا اے جدوں تواڈے بچے دے ٹیچر اوہنوں کہندے نیں کہ اوہنے سکول دی کوئی کتاب پڑھنی اے۔ اوس کتاب چ شاید ایہہ دَسیا جائے کہ سانوں اوہناں لوکاں دی نقل کرنی چاہی دی اے جیہڑے گندے کم یاں مار کُٹائی کردے نیں۔ پر تُسی بچے کولوں پچھ سکدے او کہ ایہناں کماں بارے یہوواہ کیہہ سوچدا اے تے ایس بارے بائبل چ کیہڑے اصول دِتے گئے نیں۔ (‏اَمثال 22:‏24، 25؛‏ 1-‏کُرنتھیوں 15:‏33؛‏ فِلپّیوں 4:‏8‏)‏ فیر جدوں اوس کتاب چ دَسیاں گئیاں گلاں بارے کلاس چ گل بات ہوئے گی تے تواڈا بچہ اپنے ٹیچر تے کلاس دے دُوجے بچیاں نُوں اپنے عقیدیاں بارے دَسن لئی تیار ہوئے گا۔‏

اپنے بچے دی مدد کرو تاکہ اوہ اپنے عقیدیاں بارے دَسن لئی تیار رہوے

14.‏ اپنے عقیدیاں بارے دَسنا بچیاں نُوں کدوں مشکل لگ سکدا اے تے کیوں؟‏

¹⁴ کدی کدار بچیاں نُوں اپنے عقیدیاں بارے دَسنا مشکل لگدا اے۔ مثال لئی، جدوں کلاس چ ایس نظریے بارے گل ہوندی اے کہ ساریاں چیزاں اپنے آپ بنیاں نیں تے شاید بچیاں نُوں دُوجیاں نُوں ایہہ دَسن چ ڈر لگے کہ اوہ کیہہ من دے نیں۔ پر کیوں؟ کیونکہ ہو سکدا اے کہ اوہناں دے ٹیچر ایس نظریے نُوں اِنج پیش کرن جیویں ایہہ بالکل سچ اے۔ ماپیو، تُسی اپنے بچے دی مدد کیویں کر سکدے او تاکہ اوہ پورے اعتماد نال دُوجیاں نُوں اپنے عقیدیاں بارے دَسے؟‏

15.‏ کیہڑی چیز اِک نوجوان مسیحی دی مدد کرے گی تاکہ اوہ اوہناں گلاں تے شرمندگی محسوس نہ کرے جیہڑیاں اوہ من دا اے؟‏

 ¹⁵ اپنے بچے دی مدد کرو تاکہ اوہ اپنے عقیدیاں تے شرمندگی محسوس نہ کرے۔‏ تواڈا بچہ ایس گل تے ایمان رکھدا اے کہ ساریاں چیزاں خدا نے بنائیاں نیں تے اوہنوں ایس گل تے شرمندہ ہون دی لوڑ نئیں اے۔ (‏2-‏تیمُتھیُس 1:‏8‏)‏ سچ تے ایہہ وے کہ بوہت سارے سائنس‌دان وی ایہہ سمجھدے نیں کہ زندگی اپنے آپ وجود چ نئیں آئی۔ اوہ من دے نیں کہ جان‌دار جِنّے پیچیدہ طریقے نال بنے نیں، اوہدے توں پتہ چلدا اے کہ کوئی نہ کوئی ضرور ایہناں نُوں بنان والا ہے وے۔ ایس لئی اوہ اوس نظریے نُوں نئیں من دے جیہڑا پوری دُنیا دے سکولاں چ پڑھایا جاندا اے۔ جدوں تواڈا بچے ایس گل تے سوچ وچار کرے گا کہ دُوجے بھین بھراواں نُوں کیس وجہ توں ایس گل دا یقین ہو گیا کہ سب کجھ خدا نے بنایا اے تے اوہدا ایمان مضبوط ہوئے گا۔‏ b

16.‏ ماں پیو اپنے بچیاں دی مدد کیویں کر سکدے نیں تاکہ اوہ دُوجیاں نُوں دَس سکن کہ اوہ خدا تے ایمان کیوں رکھدے نیں؟ (‏1-‏پطرس 3:‏15‏)‏ (‏تصویر نُوں وی ویکھو۔)‏

¹⁶ اپنے بچے دی مدد کرو تاکہ اوہ دُوجیاں نُوں دَس سکے کہ اوہ خدا تے ایمان کیوں رکھدا اے۔‏ (‏1-‏پطرس 3:‏15 نُوں پڑھو۔)‏ تُسی اپنے بچے نال اوہ مضمون پڑھ سکدے او جیہڑے اُردو زبان چ ساڈی ویب‌سائٹ تے حصہ ”‏سائنس اور بائبل“‏ چ ”‏اِرتقا اور تخلیق کا موازنہ“‏ چ دِتے گئے نیں۔ فیر اوہ اوہناں مضموناں چ دِتیاں گئیاں وضاحتاں وچوں کسے اِک نُوں چُن سکدا اے جدے ذریعے اوہ اسانی نال دُوجیاں نُوں دَس سکے کہ ساریاں چیزاں خدا نے بنائیاں نیں۔ اوس وضاحت بارے اپنے بچے نال گل بات کرو۔ اوہنوں ایہہ وی یاد دَواؤ کہ اوہنوں اپنی کلاس دے بچیاں نال بحث کرن دی لوڑ نئیں اے۔ اوہنوں حوصلہ دَوو کہ جے کوئی بچہ اوہدے نال ایس موضوع تے گل کرنا چاہندا اے تے اوہ اوہنوں سادیاں مثالاں دے کے اپنی گل سمجھائے۔ مثال لئی، شاید اوہدے سکول دا کوئی بچہ اوہنوں کہوے کہ ”‏مَیں صرف اوہناں چیزاں تے ایمان رکھنا واں جنہاں نُوں مَیں ویکھ سکنا واں تے مَیں خدا نُوں کدی نئیں ویکھیا۔“‏ ایہدے جواب چ اِک مسیحی نوجوان ایہہ کہہ سکدا اے:‏ ”‏ذرا سوچ کہ تُوں دُور کسے جنگل چ جانا ایں جتھے تینوں کوئی انسان نظر نئیں آندا۔ پر تُوں اوتھے اِک پانی دا کُھوہ ویکھنا ایں۔ اوہنوں ویکھ کے تُوں کیہہ سوچیں گا؟ تُوں ضرور ایہہ سوچیں گا کہ ایہنوں کسے انسان نے بنایا اے۔ ایسے طرحاں کائنات نُوں ویکھ کے تیرے ذہن چ ایہہ نئیں آندا کہ ایہنوں وی کسے نے بنایا اے۔“‏

17.‏ ماں پیو اپنے بچیاں دی مدد کیویں کر سکدے نیں تاکہ اوہ بائبل دِیاں سچائیاں دَسن دے موقعے لبھن؟ مثال دَوو۔‏

¹⁷ اپنے بچے نُوں ہلاشیری دَوو کہ اوہ دُوجیاں نُوں بائبل دِیاں سچائیاں دَسن دے موقعے لبھے۔‏ (‏رومیوں 10:‏10‏)‏ تُسی اوہنوں ساز وجان دی مثال دے سکدے او۔ جدوں کوئی بندہ کوئی ساز وجانا سکھدا اے تے شروع شروع چ اوہ اسان دُھناں سکھدا اے۔ پر وقت دے نال نال اوہ مشکل دُھناں وی سکھ لیندا اے۔ ایسے طرحاں اِک نوجوان  مسیحی دُوجیاں نُوں اپنے ایمان بارے دَسن لئی شروع چ سادی جہی گل بات کر سکدا اے۔ مثال لئی، اوہ اپنی کلاس دے کسے بچے نُوں پچھ سکدا اے:‏ ”‏کیہہ تینوں پتہ اے کہ سائنس‌دان فرق فرق چیزاں بنان لئی قدرتی شیواں دے ڈیزائناں دی نقل کردے نیں؟ مَیں تینوں ایہدے بارے اِک دلچسپ ویڈیو وکھانا واں۔“‏ فیر اوہ اوہنوں ساڈی ویب‌سائٹ چوں سلسلہ وار ویڈیوز ”‏کیہہ ایہہ خالق دی کاریگری اے‏“‏ چوں کوئی ویڈیو وکھا سکدا اے۔ فیر اوہ اوہنوں کہہ سکدا اے:‏ ”‏جے سائنس‌داناں دی تعریف ہوندی اے تے کیہہ اوہدی تعریف نئیں ہونی چاہی دی جنہے اصل چ ایہہ ڈیزائن بنائے نیں؟“‏ ایس سادی جہی گل بات توں اوس بچے دی دلچسپی ودھ سکدی اے تے شاید اوہ ایس بارے ہور وی سکھنا چاہوے۔‏

اپنے بچیاں دے ایمان نُوں مضبوط کرن لئی اوہناں دی مدد کردے رہوو

18.‏ خدا تے اپنے بچیاں دے ایمان نُوں مضبوط کرن لئی ماں پیو نُوں کیہہ کردے رہنا چاہی دا اے؟‏

¹⁸ اَسی اِک ایہو جہی دُنیا چ رہنے آں جدے چ زیادہ‌تر لوک یہوواہ تے ایمان نئیں رکھدے۔ (‏2-‏پطرس 3:‏3‏)‏ ایس لئی ماپیو، تُسی اپنے بچیاں نال بائبل پڑھدے ویلے اوہناں نُوں ہلاشیری دَوو کہ اوہ ایہو جہے موضوعاں بارے ہور جانن جنہاں توں خدا دے کلام تے اوہناں دا ایمان مضبوط ہوئے تے اوہناں نُوں یقین ہو جائے کہ خدا دے حکم ساڈے بھلے لئی نیں۔ سوچن سمجھن دی صلاحیت نُوں ودھان چ اوہناں دی مدد کرو۔ اِنج کرن لئی اوہناں دا دھیان یہوواہ دِیاں بنائیاں ہوئیاں چیزاں تے دَواؤ۔ اوہناں دی مدد کرو تاکہ اوہ بائبل دِیاں اوہناں پیشین‌گوئیاں تے سوچ‌وچار کرن جیہڑیاں پوریاں ہو چُکیاں نیں۔ سب توں ودھ کے اپنے بچیاں لئی دُعا کرو تے اوہناں نال مِل کے وی دُعا کرو۔ تُسی پورا یقین رکھ سکدے او کہ جدوں تُسی اپنے بچے دا ایمان مضبوط کرن لئی ایہہ سارے کم کرو گے تے یہوواہ تواڈیاں کوششاں تے برکت پائے گا۔—‏2-‏تواریخ 15:‏7‏۔‏