مَیں 1927 چ امریکہ دی ریاست الینوائے دے اِک چھوٹے جہے شہر چ پیدا ہویا۔ اَسی پنج بھین بھرا ساں:‏ جیتھا، ڈون، مَیں،کارل تے جوئے۔ اَسی پورے دل نال یہوواہ دی خدمت کرنا چاہنے ساں۔ میری بھین جیتھا 1943 چ گلئیڈ سکول دی دُوجی کلاس چ گئی۔ میرا بھرا ڈون 1944 چ، کارل 1947چ تے میری بھین جوئے 1951 چ بروکلن بیت‌ایل چ خدمت کرن لئی گئی۔ میرے بھین بھراواں تے میرے امی‌ابو دی چنگی مثال دا میرے تے گُوڑھا اثر پیا۔‏

میرے امی‌ابو بڑے شوق نال بائبل پڑھدے سن۔ اوہ خدا نال بوہت پیار کردے سن تے اوہناں نے سانوں وی اِنج کرنا سکھایا۔ میرے ابو نے پہلی عالمی جنگ چ اِک فوجی دے طور تے حصہ لیا۔ اوہدوں اوہناں دے دل چوں چرچ لئی عزت ختم ہو گئی۔ امی ایس گل لئی بڑے شکرگزار سن کہ ابو صحی سلامت گھر واپس آ گئے نیں۔ اوہناں نے ابو نُوں کہیا:‏ ”‏ولیم چلو اَسی چرچ چلنے آں جیویں اَسی پہلے جاندے ہُنے ساں۔“‏ ابو نے جواب دِتا:‏ ”‏مَیں تینوں اوتھے چھڈ دواں گا پر آپ نئیں جاواں گا۔“‏ امی نے پچھیا:‏ ”‏پر کیوں؟“‏ ابو نے کہیا کہ ”‏جنگ دے دوران اِک ای مذہب دے پادری اپنے اپنے ملک دی فوج لئی دُعا کردے سن۔ پر مینوں ایہہ سمجھ نئیں آندی کہ خدا کدے وَل سی؟“‏

بعد چوں جدوں امی چرچ گئے ہوئے سن تے یہوواہ دے دو گواہ ساڈے گھر آئے۔ اوہناں نے ابو نُوں دو کتاباں دِتیاں جنہاں چ مُکاشفہ دی کتاب بارے گل کیتی گئی سی۔ابو نُوں اوہ کتاباں اچھیاں لگیاں تے اوہناں نے لے لئیاں۔ جدوں امی نے اوہ کتاباں ویکھیاں تے اوہناں نے اوہناں نُوں پڑھنا شروع کر دِتا۔ فیر اِک دن امی نے اِک اخبار چ اشتہار ویکھیا جدے چ اوہناں لوکاں نُوں اِک جگہ تے آن دی دعوت دِتی گئی سی جیہڑے اوہناں کتاباں دے ذریعے بائبل دا مطالعیا کرنا چاہندے سن۔ امی نے اوتھے جان دا فیصلہ کیتا۔ جدوں اوہ اوتھے پونچے تے اِک وڈیری عورت نے دروازہ کھولیا۔ امی نے اوہ کتاب وکھا کے اوہنوں پچھیا کہ ”‏کیہہ ایہدا مطالعیا ایتھے ای ہو رہیا اے؟“‏ اوس عورت نے جواب دِتا:‏ ”‏ہاں جی بالکل، اندر آ جاؤ۔“‏ اگلے ہفتے امی سانوں وی نال لے گئے تے اوس توں بعد اَسی باقاعدگی نال اوتھے جان لگ پئے۔‏

اِک واری مطالعیا لین والے بھرا نے مینوں زبور 144:‏15 پڑھن لئی کہیا جدے چ دَسیا گیا اے کہ جیہڑے لوک یہوواہ دی عبادت کردے نیں، اوہ خوش رہندے نیں۔ ایس ایت دا میرے تے گُوڑھا اثر ہویا۔ ایہدے نال نال مینوں 1-‏تیمُتھیُس 1:‏11 تے اِفسیوں 5:‏1 وی بوہت پسند سی۔ 1-‏تیمُتھیُس 1:‏11 چ دَسیا گیا اے کہ یہوواہ خوش رہن والا خدا اے تے اِفسیوں 5:‏1 چ سانوں ہلاشیری دِتی گئی اے کہ اَسی یہوواہ دی مثال تے عمل کرئیے۔ایہناں ایتاں توں مَیں سمجھ گیا کہ مَیں اپنے خالق یہوواہ دی خدمت کرن لئی جو کجھ وی کرنا واں، مینوں اوہدے توں خوشی حاصل کرنی چاہی دی اے تے ایس اعزاز لئی شکرگزار ہونا چاہی دا اے۔ مَیں ساری زندگی ایہناں گلاں تے عمل کرن دی پوری کوشش کیتی۔‏

 جیہڑی کلیسیا ساڈے سب توں نیڑے سی، اوہ وی شکاگو چ کوئی 32 کلو میٹر دُور سی۔ ایہدے باوجود اَسی عبادتاں تے جانے ساں۔ ایس وجہ توں بائبل بارے میرا علم کافی ودھ گیا۔ مینوں یاد اے کہ اِک واری مطالعیا لین والے بھرا نے جیتھا کولوں جواب پچھیا۔ اوہدا جواب سُن دے ویلے مَیں سوچیا:‏ ”‏مینوں وی ایہہ جواب آندا سی تے مَیں وی ہتھ کھڑا کر سکنا ساں۔“‏ اوس دن توں بعد مَیں آپ جواب تیار کرن لگ پیا۔ایس توں وی ودھ کے ایہہ کہ میرے بھین بھراواں دے نال نال میرا وی یہوواہ نال رشتہ مضبوط ہون لگ پیا تے 1941 چ مَیں بپتسمہ لے لیا۔‏

مینوں 1942 دی اوہ کنونشن خاص طور تے یاد اے جیہڑی اوہائیو چ ہوئی سی۔ اوس کنونشن نُوں امریکہ دے 50 توں زیادہ علاقیاں چ بھین بھراواں نے ٹیلی فون دے ذریعے وی سنیا۔ اَسی دُوجے بھین بھراواں وانگوں کنونشن دی جگہ دے نیڑے ای خیمے لا کے رُکے ہوئے ساں۔ اوس ویلے دُوجی عالمی جنگ ہو رہی سی تے یہوواہ دے گواہواں دی بوہت مخالفت کیتی جا رہی سی۔ شام دے ویلے مَیں ویکھیا کہ کجھ بھرا اپنیاں گڈیاں نُوں خیمیاں توں دُور کھڑا کردے سن تے اوہناں دِیاں لائٹاں دا رُخ خیمے دے دُوجے پاسے رکھدے سن۔ ساریاں نے ایہہ طے کیتا سی کہ پوری رات ہر گڈی چ اِک بندہ پہرہ دَوے گا تاکہ جیویں ای کوئی خطرہ نظر آئے تے پہرہ دین والے بھرا اپنیاں گڈیاں دِیاں تیز لائٹاں حملہ کرن والیاں تے پان تے گڈی دا ہارن وجان تاکہ دُوجے چھیتی چھیتی اوہناں دی مدد کرن لئی آن۔ مَیں سوچیا کہ یہوواہ دے بندے ہر گل لئی کِنّی چنگی طرحاں تیاری کردے نیں۔ ایہہ ویکھ کے مینوں بڑا سکون مِلیا تے مَیں بغیر کسی خوف دے سوں گیا۔ پر سانوں کسے مسئلے دا سامنا نئیں ہویا۔‏

کئی سالاں بعد وی جدوں مَیں ایس کنونشن بارے سوچنا واں تے مینوں یاد آندا اے کہ اینی خطرناک صورتحال چ وی میری امی کِنّے پُرسکون رہے۔ اوہناں دے چہرے توں ذرا وی پریشانی یاں ڈر نظر نئیں آ رہیا سی۔ اوہ یہوواہ تے اوہدی تنظیم تے پورا بھروسا کردے سن تے مَیں اوہناں دی ودھیا مثال نُوں کدی نئیں بُھل سکدا۔‏

اوس کنونشن توں کجھ عرصہ پہلاں ای امی نے پہل‌کار دے طور تے خدمت کرنی شروع کیتی سی۔ ایس لئی اوہناں نے اوہ تقریراں بڑے دھیان نال سُنیاں جنہاں چ کُل‌وقتی خدمت بارے دَسیا گیا سی۔ جدوں اَسی گھر واپس جا رہے ساں تے اوہناں نے سانوں کہیا:‏ ”‏مَیں پہل‌کار دے طور تے خدمت نُوں جاری رکھنا چاہنی آں۔ پر گھر دے کماں دے نال نال اِنج کرنا مشکل اے۔“‏ فیر اوہناں نے ساڈے کولوں پچھیا کہ کیہہ اَسی اوہناں دی مدد کر سکنے آں۔ اَسی کہیا:‏ ”‏اَسی ضرور تواڈی مدد کراں گے۔“‏ ایس لئی اوہناں نے سانوں ساریاں نُوں ذمے‌داری دِتی کہ اَسی ناشتے توں پہلاں اِک یاں دو کمریاں دی صفائی کرئیے۔ فیر ساڈے سکول جان توں بعد امی ویکھدے سن کہ کیہہ پورا گھر صحی طریقے نال صاف ہویا اے تے ساریاں چیزاں اپنی جگہ تے نیں۔ فیر اوہ مُنادی تے چلے جاندے سن۔ امی بڑے مصروف رہندے سن پر فیر وی اوہ سانوں پوری توجہ دیندے سن۔ جدوں اَسی سکولوں واپس آ کے کھانا کھانے ساں تے اوہ ہمیشاں ساڈے نال ہوندے سن۔ تے سکول توں بعد کدی کدار اَسی وی اوہناں نال مُنادی تے جانے ساں جدی وجہ توں اَسی ویکھ سکے کہ پہل‌کار کیویں خدمت کردے نیں۔‏

جدوں مَیں 16 سال دا ساں تے مَیں پہل‌کار دے طور تے خدمت کرنی شروع کیتی۔ ابو اوس ویلے تک یہوواہ دے گواہ نئیں بنے سن پر فیر وی اوہ اکثر میرے کولوں پچھدے ہوندے سن کہ میری خدمت کیسی چل رہی اے۔ اِک دن مَیں اوہناں نُوں دَسیا کہ مَیں بڑی کوشش کر رہیا واں کہ مَیں کسے نُوں بائبل کورس کراواں۔ پر حالے تک مینوں کوئی ایہو جیہا بندہ نئیں مِلیا جیہڑا بائبل کورس کرنا چاہندا اے۔ فیر مَیں اوہناں کولوں پچھیا:‏ ”‏کیہہ تُسی بائبل کورس کرو گے؟“‏ ابو نے تھوڑا سوچن توں بعد کہیا:‏ ”‏ٹھیک اے، مَیں بائبل کورس کراں گا۔“‏ میرے لئی ایہہ بڑے مان دی گل اے کہ مَیں جیس انسان نُوں سب توں پہلاں بائبل کورس کرایا، اوہ میرے ابو سن۔‏

 وقت دے نال نال مینوں محسوس ہویا کہ اصل چ ابو میری مدد کر رہے نیں تاکہ مَیں بائبل نُوں آپ وی چنگی طرحاں سکھاں تے دوجیاں نُوں وی سکھانواں۔ مثال لئی، اِک دن جدوں مَیں اوہناں نُوں بائبل کورس کرا رہیا ساں تے اِک پیراگراف پڑھن توں بعد ابو نے مینوں پچھیا:‏ ”‏مینوں پتہ اے کہ کتاب چ ایہہ گل لکھی اے۔ پر تینوں کیویں پتہ اے کہ کتاب چ جیہڑی گل لکھی اے، اوہ بالکل صحی اے؟“‏ اوہناں نے اچانک ایہہ سوال پچھیا سی۔ مینوں سمجھ نئیں آ رہیا سی کہ مَیں اوہناں نُوں کیہہ جواب دواں۔ ایس لئی مَیں اوہناں نُوں کہیا:‏ ”‏مَیں حالے تے ایہدا جواب نئیں دے سکدا پر اگلی وار ضرور دَواں گا۔“‏ تے مَیں اِنج ای کیتا۔ مَیں اوہناں دے سوال دا جواب دین لئی بائبل چوں کجھ ایہو جہیاں ایتاں لبھیاں۔ ایہدے توں مَیں سکھیا کہ مَیں پہلاں توں تحقیق کراں تاکہ مَیں چنگی طرحاں بائبل کورس کرا سکاں۔ اِنج نہ صرف مَیں سگوں ابو نے وی بائبل دا چنگی طرحاں مطالعیا کرنا سکھیا۔ ابو نے اوہناں گلاں تے عمل کرنا شروع کر دِتا جیہڑیاں اوہ سکھ رہے سن تے فیر 1952 چ اوہناں نے بپتسمہ لے لیا۔‏

جدوں مَیں 17 سال دا ہویا تے مَیں خدمت لئی گھروں دُور چلا گیا۔ ایس دوران میری وڈی بھین جیتھا a مشنری دے طور تے خدمت کرن لگ پئی تے میرا وڈا بھرا ڈون بیت‌ایل چلا گیا۔ اوہ دونویں ای اپنی خدمت توں بوہت خوش سن۔ ایہدے توں میرا بڑا حوصلہ ودھیا۔ ایس لئی مَیں بیت‌ایل چ خدمت کرن لئی وی درخاست دے دِتی تے گلئیڈ سکول جان لئی وی۔ فیر مَیں معاملہ یہوواہ دے ہتھ چ چھڈ دِتا تے 1946 چ مینوں بیت‌ایل بلا لیا گیا۔‏

بیت‌ایل چ مینوں فرق فرق ذمے‌داریاں مِلیاں جدی وجہ توں مینوں بوہت ساریاں نوِیاں چیزاں سکھن دا موقع مِلیا۔ مَیں 75 سال توں بیت ایل چ آں۔ ایس دوران مَیں چھپائی دا کم، حساب کتاب کرنا، بیت ایل لئی چیزاں خریدنا تے کئی چیزاں نُوں دُوجیاں تھانواں تے گھلنا وی سکھیا۔ سب توں ودھ کے مَیں اوس تلیم توں بوہت فائدہ حاصل کیتا جیہڑی بیت‌ایل چ صبح دی عبادت تے تقریراں دے ذریعے دِتی جاندی اے۔‏

مَیں اپنے چھوٹے بھرا کارل توں وی بوہت کجھ سکھیا۔ اوہ 1947 چ بیت‌ایل چ خدمت کرن لئی آیا سی۔ اوہ نہ صرف آپ بائبل دا بڑی چنگی طرحاں مطالعیا کردا سی سگوں دُوجیاں نُوں وی بڑی چنگی طرحاں سکھاندا سی۔ اِک واری مَیں اپنی تقریر دی تیاری کرن لئی اوہدے کولوں مدد منگی۔ مَیں اوہنوں دَسیا کہ مَیں بوہت زیادہ تحقیق کیتی اے پر ہن مینوں سمجھ نئیں آ رہیا کہ مَیں ایس ساری معلومات نُوں کیویں استمال کراں۔ اوہنے میرے کولوں صرف اِک سوال پچھیا:‏ ”‏جوئیل،تواڈی تقریر دا موضوع کیہہ اے؟“‏ مَیں فوراً اوہدی گل سمجھ گیا۔ مینوں صرف اوہ معلومات استمال کرنی سی جیہڑی تقریر دے موضوع مطابق سی۔ مَیں ایہہ اہم سبق کدی نئیں بُھلیا۔‏

بیت‌ایل چ خوشی نال خدمت کرن لئی ایہہ بوہت ضروری اے کہ اَسی ودھ چڑھ کے مُنادی دے کم چ حصہ لئیے۔ جے اَسی اِنج کراں گے تے سانوں ایہو جہے بوہت سارے تجربے ہون گے جنہاں توں ساڈا حوصلہ ودھے گا۔ ایہو جیہا اِک واقعہ مینوں اَج وی یاد اے۔ مَیں تے اِک ہور بھرا شہر نیویارک دے علاقے برونکس چ مُنادی کر رہے ساں۔  اَسی اِک عورت نُوں مِلن گئے جنہے ساڈے کولوں پچھلی وار ‏”‏مینارِنگہبانی“‏ تے ‏”‏جاگو!‏“‏ رسالے لئے سن۔ اَسی اوہنوں کہیا:‏ ”‏اَج اَسی لوکاں نُوں بائبل چوں کجھ ایہو جہیاں گلاں دَس رہے آں جنہاں توں اوہناں نُوں تسلی ملے۔“‏ اوس عورت نے کہیا:‏ ”‏جے تُسی بائبل بارے گل کرنا چاہندے او تے اندر آ جاؤ۔“‏ اَسی اوہدے نال خدا دی بادشاہی تے نوِیں دُنیا بارے بوہت ساریاں ایتاں پڑھیاں تے اوہناں تے گل بات کیتی۔ اوہناں ایتاں دا اوس عورت دے دل تے بڑا گُوڑھا اثر ہویا۔ جدوں اگلے ہفتے اَسی اوہنوں دوبارہ مِلن گئے تے اوہنے اپنے کجھ دوستاں نُوں وی گھر بلا‌یا ہویا سی۔ بعد چوں اوہ عورت تے اوہدا شوہر یہوواہ دے گواہ بن گئے۔‏

مَیں شادی کرن دا فیصلہ کیتا۔ پر تقریباً دس سال تک مینوں کوئی چنگا جیون ساتھی نئیں لبھیا۔ فیر میری ملاقات اِک بڑی چنگی کُڑی نال ہوئی۔ مَیں اِک اچھا جیون ساتھی لبھن لئی یہوواہ کولوں دُعا کرنا ساں تے ایس بارے سوچ وچار کرنا ساں کہ شادی دے بعد مَیں اپنی بیوی نال مِل کے زندگی چ کیہہ کجھ کرنا چاہنا واں۔‏

1953 چ مَیں اِک کنونشن تے گیا جیہڑی یانکی سٹیڈیم چ ہوئی سی۔ اوتھے میری ملاقات مے‌ری نال ہوئی۔ اوہ میری بھین جیتھا نال گلئیڈ سکول دی دُوجی کلاس چ سی تے اوہدے نال مِل کے مشنری دے طور تے خدمت کر رہی سی۔ اوہ کئی سالاں توں کیریبیئن چ خدمت کر رہی سی۔ اوہ بڑے جوش نال مینوں دَسدی سی کہ اوہدی خدمت کِنّی چنگی چل رہی اے۔ اوہ اوہناں لوکاں بارے وی مینوں دَسدی سی جنہاں نُوں اوہ بائبل کورس کراندی سی۔ جیویں جیویں اَسی اِک دُوجے نُوں چنگی طرحاں جان دے گئے، سانوں احساس ہویا کہ یہوواہ دی خدمت چ ساڈے منصوبے اِکو جہے نیں۔ ساڈے دل چ اِک دُوجے لئی محبت ودھن لگ پئی تے اپریل 1955 چ اَسی شادی کر لئی۔ مے‌ری کئی معاملیاں چ میرے لئی یہوواہ وَلّوں اِک تحفہ تے اِک بڑی ودھیا مثال ثابت ہوئی۔ اوہنوں جیہڑی وی ذمے‌داری مِلدی سی، اوہ اوہنوں خوشی نال پورا کردی سی۔ اوہ بڑی محنتی سی تے دِلوں دُوجیاں دا خیال رکھدی سی تے ہمیشاں یہوواہ دی بادشاہی نُوں اپنی زندگی چ سب توں زیادہ اہمیت دیندی سی۔ (‏متی 6:‏33‏)‏ مَیں تِن سال تک حلقے دی نگہبان دے طور تے خدمت کیتی جدے چ مے‌ری نے میرا پورا ساتھ دِتا تے فیر 1958 چ سانوں دونواں نُوں بیت‌ایل چ خدمت کرن لئی بلا‌یا گیا۔‏

مَیں مے‌ری کولوں بوہت کجھ سکھیا۔ مثال لئی، جدوں ساڈی شادی ہوئی تے اَسی دونواں نے مِل کے بائبل پڑھنا شروع کیتا۔ اَسی سوچیا کہ اَسی ہر واری 15ایتاں پڑھاں گے۔ ساڈے وچوں کوئی اِک ایتاں پڑھدا سی تے ایہدے بعد اَسی اوہناں ایتاں تے گل بات کرنے ساں تے سوچنے ساں کہ اَسی ایہناں تے کیویں عمل کرسکنے آں۔ مے‌ری اکثر مینوں اوہ گلاں دَسدی سی جیہڑیاں اوہنے گلئیڈ سکول چوں تے مشنری دے طور تے خدمت کردیاں ہوئیاں سکھیاں سن۔ اوہدی ایس طرحاں دی گل بات توں مینوں بڑی مدد مِلی۔ مَیں اپنیاں تقریراں نُوں ہور بہتر بنانا سکھ گیا تے ایہہ وی سکھ گیا کہ مَیں ہور چنگی طرحاں بھیناں دا حوصلہ کیویں ودھا سکنا واں۔—‏اَمثال 25:‏11‏۔‏

2013 چ میری پیاری بیوی فوت ہو گئی۔ مینوں اوس وقت دا بڑا اِنتظار اے جدوں مَیں اوہنوں ملاں گا۔ پر اوس ویلے تک میرا عزم اے کہ مَیں یہوواہ کولوں سکھدا رہواں گا تے پورے دل نال اوہدے تے بھروسا کراں گا۔ (‏اَمثال 3:‏5، 6‏)‏ جدوں مَیں سوچنا واں کہ نوِیں دُنیا چ یہوواہ دے بندے کیہہ کجھ کرن گے تے مینوں بڑی تسلی تے خوشی مِلدی اے۔ ایہدے چ کوئی شک نئیں کہ اوس ویلے اَسی اپنے سب توں عظیم اُستاد یہوواہ کولوں بوہت کجھ سکھاں گے تے اوہدے بارے ہور بوہت ساریاں گلاں جان سکاں گے۔ یہوواہ نے ہن تک مینوں جو کجھ وی سکھایا اے تے جیہڑیاں وی برکتاں دِتیاں نیں، اوہناں لئی مَیں اوہدا جِنّاں وی شکر کراں اوہ گھٹ اے۔‏