1، 2.‏ کیہڑیاں گلاں دی وجہ توں ساڈیاں اَکھاں چ آنسو آندے نیں؟‏

 یقیناً ساڈے ساریاں دِیاں اَکھاں چ کدی نہ کدی آنسو ضرور آئے ہون گے۔ جدوں ساڈی زندگی چ کجھ اچھا ہوندا اے تے ساڈیاں اَکھاں چ خوشی دے آنسو آندے نیں۔ مثال لئی، جدوں تُسی ماں پیو بنے، توانوں کوئی چنگی گل یاد آئی یاں فیر تُسی اپنے کسے دوست نُوں کئی سالاں بعد ملے تے شاید تواڈیاں اَکھاں خوشی نال بھر آئیاں ہون۔‏

² پر ساڈیاں اَکھاں چ زیادہ‌تر اوہدوں آنسو آندے نیں جدوں اَسی بڑے دُکھی ہنے آں۔ مثال لئی جدوں کوئی ساڈے نال بھیڑا سلوک کردا اے یاں ساڈا دل دُکھاندا اے، اَسی کسے وڈی بیماری دا سامنا کر رہے ہنے آں یاں ساڈا کوئی عزیز موت دی وجہ توں ساڈے توں وِچھڑ جاندا اے۔ اوس ویلے شاید اَسی وی اوہو جیہا محسوس کرئیے جیہو جیہا یرمیاہ نبی نے اوس ویلے محسوس کیتا جدوں بابلیاں نے یروشلم نُوں تباہ کر دِتا۔ اوہنے کہیا:‏ میریاں اَکھاں چوں آنسوواں دا دریا وَگ رہیا اے۔ میرے آنسو رُکن دا ناں نئیں لین گے۔ ایہہ وَگدے رہن گے۔—‏نوحہ 3:‏48، 49‏۔‏

3.‏ اپنے بندیاں نُوں تکلیف چ ویکھ کے یہوواہ نُوں کیہو جیہا محسوس ہوندا اے؟ (‏یسعیاہ 63:‏9‏)‏

³ جدوں اَسی مشکلاں چوں لنگھ رہے ہنے آں تے یہوواہ چنگی طرحاں جان دا اے کہ اَسی کِنّے آنسو بہائے نیں۔ اوہدے کلام چ سانوں یقین دَوایا گیا اے کہ اوہ اپنے بندیاں دِیاں تکلیفاں نُوں چنگی طرحاں جان دا اے تے جدوں اوہ مدد لئی اوہنوں پکاردے نیں تے اوہ اوہناں دی سُن دا اے۔ (‏زبور 34:‏15‏)‏پر یہوواہ صرف ایناں ای نئیں کردا سگوں اِک پیار کرن والے باپ وانگوں اوہ اوس ویلے بڑا دُکھی ہو جاندا اے جدوں اوہ اپنے بچیاں نُوں تکلیف چ ویکھدا اے۔ ایس لئی اوہ اوہناں دی مدد کرنا چاہندا اے۔‏‏—‏یسعیاہ 63:‏9 نُوں پڑھو۔‏

4.‏ اَسی یہوواہ دے کیہڑے بندیاں دِیاں مثالاں تے غور کراں گے تے ایہدے توں اَسی یہوواہ بارے کیہہ سکھاں گے؟‏

⁴ یہوواہ نے اپنے کلام چ سانوں دَسیا اے کہ اوہنوں اوہدوں کیہو جیہا لگیا جدوں اوہنے اپنے کجھ بندیاں دِیاں اَکھاں چ اتھرو ویکھے جیویں کہ حنّہ، داؤد تے بادشاہ حزقیاہ۔ آؤ ویکھنے آں کہ یہوواہ دے ایہہ  بندے کیس وجہ توں روئے۔ جدوں اوہناں نے یہوواہ نُوں مدد لئی پکاریا تے اوہنے اوہناں دی مدد کیویں کیتی؟ تے اوہناں دی مثال تے غور کرن نال سانوں اوس ویلے تسلی کیویں مِلدی اے جدوں اَسی دُکھی ہنے آں، کوئی سانوں دھوکھا دیندا اے یاں اَسی مایوس ہو جانے آں؟‏

جدوں اَسی دُکھی ہنے آں

5.‏ حنّہ جیہڑے حالاتاں چوں لنگھ رہی سی، اوہناں دی وجہ توں اوہ کیہو جیہا محسوس کردی سی؟‏

⁵ حنّہ نُوں کئی مسئلیاں دا سامنا سی جدی وجہ توں اوہ اکثر روندی سی۔ اِک مسئلہ ایہہ سی کہ اوہدی سوکن فِنِنّہ اوہدے توں نفرت کردی سی۔ ایہدے نال نال حنّہ نُوں اِک ہور دُکھ وی سی۔ اوہ بے‌اولاد سی جد کہ فِنِنّہ دے بچے سن۔ حنّہ دی اولاد نہ ہون دی وجہ توں فِنِنّہ اوہنوں طعنے ماردی رہندی سی۔ (‏1-‏سموئیل 1:‏1، 2‏)‏ جے تُسی حنّہ دی جگہ ہوندے تے تُسی کیہو جیہا محسوس کردے؟ حنّہ اینی دُکھی رہندی سی کہ اوہ روندی سی تے کجھ نئیں کھاندی سی۔—‏1-‏سموئیل 1:‏6، 7،‏ 10‏۔‏

6.‏ حنّہ نے تسلی پان لئی کیہہ کیتا؟‏

⁶ حنّہ نُوں تسلی کیویں مِلی؟ اِک گل جدے توں اوہنوں بڑی مدد مِلی اوہ ایہہ سی کہ اوہ یہوواہ دے خیمے چ اوہدی عبادت کرن لئی گئی۔ اوتھے اوہ شاید خیمے دے دروازے دے کول ای کھلو کے یہوواہ کولوں دُعا کرن لگ پئی تے پُھٹ پُھٹ کے رون لگ پئی۔ فیر اوہنے یہوواہ کولوں ایہہ اِلتجا کیتی:‏ اَے یہوواہ، اپنی بندی دی تکلیف نُوں ویکھ تے مینوں یاد کر۔ (‏1-‏سموئیل 1:‏10، 11‏)‏ حنّہ نے یہوواہ دے سامنے اپنے دل دا حال کھول دِتا۔ ذرا سوچو کہ اپنی ایس پیاری دھی نُوں روندیاں ہوئیاں ویکھ کے یہوواہ نُوں کِنّاں دُکھ ہویا ہوئے گا۔‏

7.‏ حنّہ نے جدوں دُعا چ یہوواہ نُوں اپنے دل دا حال دَسیا تے اوہنوں تسلی کیویں مِلی؟‏

⁷ جدوں حنّہ نے دل کھول کے یہوواہ نُوں اپنیاں ساریاں مشکلاں دَسیاں تے وڈے کاہن عیلی نے اوہنوں تسلی دِتی تے ایہدے بعد حنّہ نُوں کیہو جیہا محسوس ہویا؟ بائبل چ لکھیا اے:‏ ایس توں بعد حنّہ اوتھوں چلی گئی تے اوہنے کھانا کھادا تے اوہدا چہرہ اُداس نہ رہیا۔ (‏1-‏سموئیل 1:‏17، 18‏)‏ بھانویں کہ اوہدے حالات نئیں بدلے سن پر اوہدے دل نُوں سکون مِل گیا سی۔ حنّہ نے اپنیاں پریشانیاں دا بوجھ یہوواہ تے پا دِتا۔ یہوواہ نے حنّہ دی تکلیف نُوں ویکھیا، اوہدی فریاد سُنی تے بعد چوں اوہنوں پُتر وی دِتا۔—‏1-‏سموئیل 1:‏19، 20؛‏ 2:‏21‏۔‏

8، 9.‏ مشکل حالاتاں چوں لنگھدے ویلے وی سانوں عبادتاں تے جان دی پوری کوشش کیوں کرنی چاہی دی اے؟ (‏عبرانیوں 10:‏24، 25‏)‏ (‏تصویر نُوں وی ویکھو۔)‏

⁸ اَسی کیہہ سکھنے آں؟‏ کیہہ تُسی وی کسے ایہو جہی تکلیف چوں لنگھ رہے او جدی وجہ توں تواڈے آنسو نئیں رُکدے؟ شاید تواڈے گھر دا کوئی جی یاں تواڈا کوئی دوست فوت ہو گیا اے تے ایس وجہ توں تُسی بڑے دُکھی او۔ سچ اے کہ جدوں اِنج ہوندا اے تے شاید ساڈا کلّے رہن نُوں دل کرے۔ پر جیویں حنّہ نُوں یہوواہ دے خیمے چ جا کے تسلی تے حوصلہ مِلیا اوسے طرحاں توانوں وی عبادتاں تے جاکے تسلی مِل سکدی اے۔ توانوں اوہدوں وی حوصلہ مِل سکدا اے جدوں غم دی وجہ توں تواڈا عبادت تے جان نُوں دل نئیں کر رہیا ہوندا۔ ‏(‏عبرانیوں 10:‏24، 25 نُوں پڑھو۔)‏ جدوں اَسی عبادت چ تسلی دین والیاں ایتاں سننے آں تے ایہناں دے ذریعے یہوواہ ساڈی مدد کر رہیا ہوندا  اے کہ اَسی اپنا دھیان اپنے غم توں ہٹا کے چنگیاں گلاں تے لا سکئے۔ اِنج اَسی بہتر محسوس کرنے آں، فیر بھانویں ساڈے حالات فوراً نہ بدلن۔‏

⁹ جدوں اَسی عبادت تے جانے آں تے اوہدوں اَسی اپنے بھین بھراواں نال ہنے آں۔ اوہناں دِیاں گلاں تے محبت دی وجہ توں ساڈے دُکھی دل نُوں تسلی مِلدی اے۔ (‏1-‏تھسلُنیکیوں 5:‏11،‏ 14‏)‏ ذرا اِک خصوصی پہل‌کار بھرا دے تجربے تے غور کرو جدی بیوی فوت ہو گئی اے۔ اوہنے کہیا:‏ ”‏حالے وی جدوں مَیں اپنی بیوی نُوں یاد کرنا واں تے میریاں اَکھاں چ اتھرو آ جاندے نیں۔ کدی کدار تے مَیں کونے چ بہہ کے روندا ای رہنا واں۔ پر مینوں عبادتاں تے جا کے بوہت حوصلہ تے تسلی مِلدی اے۔ اپنے بھین بھراواں دِیاں محبت بھریاں گلاں سُن کے میرے دل نُوں بڑا سکون مِلدا اے۔ بھانویں کہ عبادت تے جان توں پہلاں مَیں کِنّاں ای پریشان تے اُداس کیوں نہ ہونواں، اوتھے جا کے مینوں ہمیشاں اچھا لگدا اے۔“‏ جدوں اَسی عبادتاں تے جانے آں تے یہوواہ بھین بھراواں دے ذریعے ساڈی مدد کردا اے۔‏

10.‏ جدوں اَسی دُکھی ہنے آں تے اَسی حنّہ دی مثال تے کیویں عمل کر سکنے آں؟‏

¹⁰ جدوں حنّہ نے اپنے دل دا حال کُھل کے یہوواہ سامنے بیان کیتا تے اوہنوں بڑی تسلی مِلی۔ تُسی وی اپنیاں ساریاں پریشانیاں یہوواہ تے پا سکدے او تے ایس گل دا یقین رکھ سکدے او کہ اوہ تواڈی سُنے گا۔ (‏1-‏پطرس 5:‏7‏)‏ ذرا اِک بھین دے تجربے تے غور کرو جدے شوہر نُوں کجھ ڈاکوؤاں نے قتل کر دِتا۔ اوہنے کہیا:‏ ”‏مینوں اِنج لگیا جیویں کسے نے میرے دل دے ٹکڑے ٹکڑے کر دِتے نیں تے ہُن ایہہ کدی نئیں جڑ سکے گا۔ پر جدوں مَیں اپنے اسمانی باپ یہوواہ کولوں دُعا کرنی ساں تے مینوں بڑی تسلی مِلدی سی۔ کدی کدار تے مَیں اپنے جذباتاں بارے صحی طریقے نال یہوواہ نُوں دَس وی نئیں پانی ساں۔ پر یہوواہ فیر وی ایہناں نُوں سمجھدا سی۔ جدوں میرا دل بڑا ای پریشان ہوندا سی تے مَیں یہوواہ کولوں دُعا کرنی ساں۔ مینوں فوراً ای محسوس ہوندا سی کہ جیویں میرے دل نُوں سکون مِل گیا اے تے مَیں ایس قابل ہو جانی ساں کہ مَیں اپنے کم کر سکاں۔“‏ جدوں تُسی اپنے دُکھی دل نُوں یہوواہ سامنے کھول دیندے او تے توانوں دُکھی ویکھ کے اوہنوں وی دُکھ ہوندا اے تے اوہ تواڈی تکلیف نُوں پوری طرحاں سمجھدا اے۔ بھانویں کہ تواڈیاں مشکلاں ختم نئیں ہو جاندیاں پر یہوواہ تواڈے دُکھی دل تے مرہم لا دیندا اے تے توانوں اِطمینان دیندا اے۔ (‏زبور 94:‏19؛‏ فِلپّیوں 4:‏6، 7‏)‏ اوہ ویکھ رہیا اے کہ تُسی اوہدے وفادار رہن لئی کِنّی کوشش کر رہے او تے اوہ توانوں ایہدا انعام ضرور دَوے گا۔—‏عبرانیوں 11:‏6‏۔‏

جدوں کوئی سانوں دھوکھا دیندا اے

11.‏ داؤد اپنے مخالفاں دی وجہ توں کیہو جیہا محسوس کردا سی؟‏

¹¹ داؤد نُوں اپنی زندگی چ ایہو جہیاں بوہت ساریاں مشکلاں دا سامنا کرنا پیا جدی وجہ توں اوہ کئی وار رویا۔ اوہنوں کئی لوکاں دی نفرت سہنی پئی، ایتھوں تک کہ اوہدے کجھ اپنیاں نے وی اوہنوں دھوکھا دِتا تے اوہنوں نقصان پونچان دی کوشش کیتی۔ (‏1-‏سموئیل 19:‏10، 11؛‏ 2-‏سموئیل 15:‏10-‏14،‏ 30‏)‏ اِک وقت آیا جدوں داؤد نے کہیا:‏ مَیں ہونکے بھر بھر کے تھک گیا واں۔ پوری پوری رات رون دی وجہ توں میرا بستر ا آنسوواں نال بھج جاندا اے۔ میرا پلنگ آنسوواں دے سیلاب چ ڈُب جاندا اے۔ داؤد اِنج کیوں محسوس کر رہیا سی؟ اوہناں لوکاں دی وجہ توں جیہڑے اوہنوں ستا رہے سن۔ (‏زبور 6:‏6، 7‏)‏ داؤد دے مخالفاں نے اوہنوں ایناں ستایا کہ اوہدے آنسو نئیں رُکدے سن۔‏

12.‏ زبور 56:‏8 دے مطابق داؤد نُوں کیس گل دا یقین سی؟‏

¹² بھانویں کہ داؤد دی زندگی مشکلاں نال بھری ہوئی سی پر اوہنوں ایس گل دا پکا یقین سی کہ یہوواہ اوہنوں پیار کردا اے۔ اوہنے لکھیا:‏ یہوواہ میرے رون دی آواز ضرور سُنے گا۔ (‏زبور 6:‏8‏)‏ اِک ہور موقعے تے داؤد نے بڑے خوب‌صورت انداز چ یہوواہ دی محبت نُوں بیان کیتا۔ اوہدی ایہہ گل زبور 56:‏8 چ لکھی اے۔ ‏(‏ایس ایت نُوں پڑھو۔)‏ ایس ایت نُوں پڑھ کے سانوں محسوس ہوندا اے کہ یہوواہ سانوں کِنّاں پیار کردا اے تے اوہنوں ساڈی کِنّی فکر اے۔ داؤد محسوس کردا سی کہ یہوواہ اوہدے آنسوواں نُوں اپنی مشک چ جمع کردا اے یاں اپنی کتاب چ لکھ لیندا اے۔ داؤد نُوں یقین سی کہ یہوواہ اوہدی تکلیف نُوں ویکھ رہیا اے تے ایہنوں کدی وی نئیں بُھلے گا۔ اوہنوں ایس گل دا وی پکا یقین سی کہ اوہدا اسمانی باپ نہ صرف اوہدی مشکل نُوں ویکھ رہیا اے سگوں ایہہ وی ویکھ رہیا اے کہ ایس مشکل دا اوہدے تے کیہہ اثر ہو رہیا اے۔‏

13.‏ جے کوئی سانوں مایوس کردا اے یاں سانوں دھوکھا دیندا اے تے سانوں کیہڑی گل یاد رکھنی چاہی دی اے؟ (‏تصویر نُوں وی ویکھو۔)‏

 ¹³ اَسی کیہہ سکھنے آں؟‏ کیہہ تُسی ایس وجہ توں بوہت مایوس تے دُکھی او کیونکہ تواڈے کسے بوہت قریبی نے توانوں دھوکھا دِتا اے؟ ہو سکدا اے کہ تواڈے کسے عزیز نے یہوواہ دی عبادت کرنی چھڈ دِتی ہوئے۔ یاں جیہڑے بندے نُوں تُسی شادی دے ارادے نال جانن دی کوشش کر رہے سو، اوہنے یاں تواڈے جیون ساتھی نے توانوں چھڈ دِتا اے۔ غور کرو کہ اِک بھرا نُوں اوہدوں کیہو جیہا محسوس ہویا جدوں اوہدی بیوی نے زناکاری کیتی تے اوہنوں چھڈ دِتا۔ اوہنے کہیا:‏ ”‏مینوں یقین نئیں آ رہیا سی کہ میرے نال ایہہ کیہہ ہو گیا اے۔ مَیں اپنے آپ نُوں بے‌کار سمجھن لگ پیا، اُداس رہن لگ پیا تے مینوں بڑا غصہ آندا سی۔“‏ جے کسے نے توانوں دھوکھا دِتا اے یاں توانوں بوہت زیادہ مایوس کیتا اے تے توانوں ایس گل توں تسلی مِل سکدی اے کہ یہوواہ توانوں کدی نئیں چھڈے گا۔ اوس بھرا نے کہیا:‏ ”‏مینوں احساس ہویا کہ انسان بدل جاندے نیں۔ پر یہوواہ کدی وی نئیں بدلدا۔ اوہ ساڈی چٹان اے۔ بھانویں کجھ وی ہو جائے، اوہ ساڈی مدد ضرور کردا اے۔ اوہ اپنے وفادار بندیاں نال ہمیشاں وفاداری نبھاندا اے۔“‏ (‏زبور 37:‏28‏)‏ ایہہ وی یاد رکھو کہ یہوواہ توانوں کسے وی انسان نالوں بوہتا پیار کردا اے۔ سچ اے کہ جدوں کوئی سانوں دھوکھا دیندا اے تے سانوں بڑی تکلیف ہوندی اے تے سانوں لگدا اے کہ ساڈی کوئی اہمیت نئیں اے۔ پر یہوواہ ساڈی فکر کرنا نئیں چھڈدا۔ (‏رومیوں 8:‏38، 39‏)‏ ایس لئی سانوں یاد رکھنا چاہی دا اے کہ انسان بھانویں ساڈے نال جو وی کرن، ساڈا اسمانی باپ سانوں پیار کرنا نئیں چھڈدا۔‏

14.‏ زبور 34:‏18 توں سانوں کیس گل دا یقین ہو جاندا اے؟‏

¹⁴ جے کسے نے توانوں دھوکھا دِتا اے تے توانوں زبور 34:‏18 توں بڑی تسلی مِل سکدی اے۔ ‏(‏ایس ایت نُوں پڑھو‏۔‏‏)‏ ایس ایت چ اوہناں لوکاں دا ذکر ہویا اے جنہاں دا حوصلہ ٹُٹ چُکیا اے۔ اِک کتاب دے مطابق ایہہ لوک اوہناں لوکاں وَل اشارہ کردے نیں جنہاں کول کسے چنگی گل دی امید نئیں رہندی۔ جے اَسی وی اِنج ای محسوس کرنے آں تے یہوواہ ساڈی مدد کیویں کردا اے؟ اوہ ساڈے نیڑے آندا اے بالکل اونویں ای جیویں اِک ماں یاں پیو اپنے روندے ہوئے بچے نُوں گود چ لیندا اے تے اوہنوں تسلی دیندا اے۔ جدوں کوئی سانوں دھوکھا دیندا اے تے یہوواہ ساڈی تکلیف نُوں محسوس کردا اے تے فوراً ساڈی مدد کرن لئی اپنا ہتھ اَگے ودھاندا اے۔ اوہ ساڈے دل تے لگے زخماں تے مرہم لانا چاہندا اے۔ نالے اوہنے سانوں بوہت ساریاں چنگیاں گلاں دی امید وی دِتی اے تے ایہہ امید ساڈی مدد کردی اے تاکہ اَسی اپنیاں مشکلاں نُوں برداشت کر سکئے۔—‏یسعیاہ 65:‏17‏۔‏

جدوں اَسی مایوس ہو جانے آں

15.‏ حِزقیاہ کیس وجہ توں رویا؟‏

¹⁵ جدوں یہوداہ دا بادشاہ حِزقیاہ 39 سال دا سی تے اوہنوں پتہ لگیا کہ اوہنوں اِک جان‌لیوا بیماری اے۔ یہوواہ دے نبی یسعیاہ نے اوہنوں دَسیا کہ اوہ اپنی ایس بیماری دی وجہ توں مر جائے گا۔ (‏2-‏سلاطین 20:‏1‏)‏ حِزقیاہ نُوں بچن دی کوئی امید نظر نئیں آ رہی سی۔ اوہنوں اپنی موت دی خبر سُن  کے ایناں صدمہ لگیا کہ اوہ پُھٹ پُھٹ کے رون لگ پیا۔ ایس لئی اوہنے پورے دل نال یہوواہ اَگے اِلتجا کیتی۔—‏2-‏سلاطین 20:‏2، 3‏۔‏

16.‏ حِزقیاہ نے رو رو کے یہوواہ اَگے جیہڑیاں اِلتجاواں کیتیاں، یہوواہ نے اوہناں دا جواب کیویں دِتا؟‏

¹⁶ جدوں یہوواہ نے حِزقیاہ دے آنسو ویکھے تے اوہدیاں اِلتجاواں سُنیاں تے اوہنے اوہدے درد نُوں محسوس کیتا تے اوہنوں کہیا:‏ مَیں تیری دُعا سُنی اے۔ مَیں تیرے آنسو ویکھے نیں۔ مَیں تیری بیماری دُور کر دَواں گا۔ یہوواہ نے حِزقیاہ تے رحم کیتا تے اپنے نبی یسعیاہ دے ذریعے اوہدے نال وعدہ کیتا کہ اوہ اوہدی عمر ودھائے گا تے یروشلم نُوں اسوریاں دے ہتھوں بچان لئی اوہدی مدد وی کرے گا۔—‏2-‏سلاطین 20:‏4-‏6‏۔‏

17.‏ جدوں سانوں کسے وڈی بیماری دا سامنا ہوندا اے تے یہوواہ سانوں کیویں سنبھالدا اے؟ (‏زبور 41:‏3‏)‏ (‏تصویر نُوں وی ویکھو۔)‏

¹⁷ اَسی کیہہ سکھنے آں؟‏ کیہہ تُسی کسے ایہو جہی بیماری دا سامنا کر رہے او جدے ٹھیک ہون دی کوئی امید نئیں اے؟ جے ایہہ گل اے تے دل کھول کے یہوواہ کولوں دُعا کرو تے جے ایس دوران توانوں رونا وی آندا اے تے فیر وی اوہنوں اپنے جذباتاں بارے دَسن توں نہ جھکو۔ بائبل چ سانوں یقین دَوایا گیا اے کہ یہوواہ عظیم رحمتاں دا باپ اے تے بڑی تسلی بخشدا اے۔ (‏2-‏کُرنتھیوں 1:‏3، 4‏)‏ سچ اے کہ اَسی اَج ایس گل دی توقع نئیں کر سکدے کہ یہوواہ معجزہ کر کے ساڈیاں ساریاں تکلیفاں نُوں دُور کر دَوے گا۔ پر اَسی تسلی پان لئی اوہدے تے آس ضرور لا سکنے آں۔ ‏(‏زبور 41:‏3 نُوں پڑھو۔)‏ یہوواہ اپنی پاک روح دے ذریعے سانوں مشکلاں نال لڑن دی طاقت، سمجھ تے اِطمینان دیندا اے۔ (‏اَمثال 18:‏14؛‏ فِلپّیوں 4:‏13‏)‏ اوہنے اپنے کلام دے ذریعے سانوں ایہہ امید وی دِتی اے کہ مستقبل چ ہر بیماری ختم ہو جائے گی۔—‏یسعیاہ 33:‏24‏۔‏

18.‏ جدوں تُسی کسے سخت مشکل دا سامنا کر رہے ہوندے او تے توانوں بائبل دی کیہڑی ایت توں تسلی مِلدی اے؟ (‏ایس بکس نُوں ویکھو:‏ ‏”‏ اوہ ایتاں جیہڑیاں ساڈے زخماں تے مرہم وانگوں نیں۔‏‏“‏‏)‏

¹⁸ یہوواہ نے حِزقیاہ نُوں جو کجھ دَسیا، اوہدے توں اوہنوں بڑی تسلی مِلی۔ اَج سانوں وی بائبل چ لکھیاں یہوواہ دِیاں گلاں توں بڑی تسلی مِل سکدی اے۔ یہوواہ نے اپنے کلام چ ایہو جہیاں بوہت ساریاں گلاں لکھوائیاں نیں جنہاں توں اوس ویلے ساڈا حوصلہ ودھ سکدا اے جدوں اَسی کسے مشکل چوں لنگھ رہے ہنے آں۔ (‏رومیوں 15:‏4‏)‏ جدوں مغربی افریقہ چ رہن والی اِک بھین نُوں پتہ چلیا کہ اوہنوں کینسر اے تے اوہ بڑا روندی سی۔ اوہنے کہیا:‏ ”‏اِک ایت جدے توں مینوں بڑی تسلی مِلی، اوہ یسعیاہ 26:‏3 سی۔ سچ اے کہ اَسی اپنیاں مشکلاں نُوں ختم تے نئیں کر سکدے پر ایس ایت توں مینوں یقین ہو جاندا اے کہ یہوواہ سانوں ایہو جیہا اِطمینان دیندا اے جدے توں اَسی مشکل بارے اپنی سوچ نُوں ضرور بدل سکنے آں۔“‏ کیہہ تواڈے ذہن چ وی بائبل دی کوئی ایہو جہی ایت ہے وے جنہوں پڑھ کے توانوں اوس ویلے بڑا حوصلہ مِلدا اے جدوں تُسی کسے سخت مشکل دا سامنا کر رہے ہوندے او، ایتھوں تک کہ ایہو جہی مشکل دا جدے ٹھیک ہون دی کوئی امید نظر نئیں آندی؟‏

19.‏ اَسی کیہو جہے مستقبل دی امید رکھ سکنے آں؟‏

¹⁹ اَسی آخری زمانے دے بالکل آخری دِناں چ رہ رہے آں۔ ایس لئی اَسی توقع کر سکنے آں کہ سانوں ایہو جہیاں بوہت ساریاں مشکلاں دا سامنا ہوئے گا جنہاں دی وجہ توں ساڈیاں اَکھاں چ ہور زیادہ آنسو آن گے۔ پر جیویں کہ اَسی حنّہ، داؤد تے بادشاہ حِزقیاہ دی مثال توں سکھیا،  یہوواہ ساڈے آنسو ویکھدا اے تے ایہناں دی وجہ توں بڑا دُکھی ہو جاندا اے۔ اوہدی نظر چ ساڈے آنسو بڑے قیمتی نیں تے اوہ ایہناں نُوں یاد رکھدا اے۔ ایس لئی جدوں اَسی کسے مشکل چوں لنگھ رہے ہنے آں تے سانوں یہوواہ دے سامنے اپنے دل دا حال کھولنا چاہی دا اے تے اپنے آپ نُوں کلیسیا دے بھین بھراواں توں دُور نئیں کرنا چاہی دا۔ ایہدے علاوہ سانوں بائبل نُوں وی پڑھدے رہنا چاہی دا اے تاکہ اَسی یہوواہ کولوں تسلی پا سکئے۔ جے اَسی اِنج کراں گے تے اَسی ایس گل دا پکا یقین رکھ سکنے آں کہ اَسی مشکل ویلے چ یہوواہ دے وفادار رہواں گے تے اوہ سانوں ایہدا انعام دَوے گا۔ ایس انعام چ یہوواہ دا ایہہ شاندار وعدہ وی شامل اے کہ اوہ ساڈے اوہ سارے اتھرو پونجھ دَوے گا جیہڑے اوس ویلے ساڈیاں اَکھاں چ آندے نیں جدوں اَسی دُکھی ہنے آں، کوئی سانوں دھوکھا دیندا اے یاں اَسی مایوس ہنے آں۔ (‏مُکاشفہ 21:‏4‏)‏ مستقبل چ جے ساڈیاں اَکھاں چ آنسو آن گے تے اوہ صرف خوشی دے آنسو ہون گے۔‏