1.‏ پطرس نے اپنی موت توں کجھ عرصہ پہلاں پاک روح دی رہنمائی چ کیہہ کیتا؟‏

 پطرس رسول جان‌دا سی کہ اوہدی زندگی چھیتی ختم ہون والی اے۔ اوہ کئی سالاں توں وفاداری نال یہوواہ دی خدمت کردا آیا سی۔ اوہنے یسوع نال مِل کے مُنادی کیتی، غیریہودیاں چ مُنادی دا کم شروع کیتا تے بعد چوں گورننگ باڈی دے ممبر دے طور تے وی خدمت کیتی۔ پر اوہدی زندگی دے آخری سالاں چ یہوواہ نے اوہنوں اِک خاص کم دِتا۔ تقریباً 62 توں 64 عیسوی دے دوران پطرس رسول نے یہوواہ دی پاک روح دی رہنمائی چ دو خط لکھے جیہڑے پہلا تے دُوجا پطرس دے ناں توں بائبل چ شامل نیں۔ پطرس نُوں امید سی کہ اوہدی موت توں بعد وی اوہدے ہم‌ایماناں نُوں اوہدے ایہناں خطاں توں فائدہ ہوئے گا۔—‏2-‏پطرس 1:‏12-‏15‏۔‏

2.‏ پطرس دے خط اوس وقت دے مسیحیاں دی ضرورت مطابق کیوں سن؟‏

² پطرس نے جدوں ایہہ دو خط لکھے اوس ویلے اوہدے ہم‌ایماناں نُوں فرق فرق مشکلاں دا سامنا کرنا پے رہیا سی۔ (‏1-‏پطرس 1:‏6‏)‏ کجھ بھیڑے بندے کلیسیا چ جھوٹھی تلیم پھیلا رہے سن تے دُوجیاں نُوں گندے کم کرن دی ہلاشیری دے رہے سن۔ (‏2-‏پطرس 2:‏1، 2،‏ 14‏)‏ ایہدے علاوہ یروشلیم دے مسیحیاں تے بڑی اوکھی گھڑی آن والی سی کیونکہ رومی فوجاں یروشلیم تے ہیکل نُوں تباہ کرن والیاں سن۔ (‏1-‏پطرس 4:‏7‏)‏ بے‌شک پطرس دے خطاں توں ایہناں مسیحیاں نُوں بوہت مدد ملی ہوئے گی تاکہ اوہ اوس ویلے وی مشکلاں نُوں برداشت کر سکن تے آن والیاں مشکلاں لئی وی تیار رہن۔‏ b

3.‏ سانوں پطرس دے خطاں تے کیوں غور کرنا چاہی دا اے؟‏

³ ایہہ سچ اے کہ پطرس نے ایہہ خط پہلی صدی دے مسیحیاں لئی لکھے سن۔ پر یہوواہ نے ایہناں  نُوں اپنے کلام چ شامل کیتا اے تاکہ ایہناں توں سانوں وی فائدہ ہوئے۔ (‏رومیوں 15:‏4‏)‏ ساڈے آلے دَوالے لوک بڑے بھیڑے کم کردے نیں تے دُوجیاں نُوں وی اِنج کرن دی ہلاشیری دیندے نیں۔ نالے سانوں ایہو جہیاں مشکلاں دا سامنا وی کرنا پیندا اے جنہاں دی وجہ توں ساڈے لئی یہوواہ دی خدمت کرنا مشکل ہو سکدا اے۔ ایہدے علاوہ بوہت چھیتی سانوں وڈی مصیبت دا وی سامنا کرنا پووے گا جیہڑی کہ یروشلیم چ آن والی تباہی نالوں کِتے زیادہ وڈی ہوئے گی۔ پطرس دے دونواں خطاں چ مسیحیاں لئی بڑیاں اہم گلاں نیں۔ ایہناں تے عمل کر کے اَسی یہوواہ دے دن لئی تیار ہو سکاں گے، انساناں دے ڈر تے قابو پا سکاں گے تے اِک دُوجے لئی گُوڑھا پیار پیدا کر سکاں گے۔ نالے بزرگاں نُوں وی مدد ملے گی تاکہ اوہ ایمان تے قائم رہن چ کلیسیا دے بھین بھراواں دی مدد کر سکن۔‏

4.‏ 2-‏پطرس 3:‏3، 4 دے مطابق ساڈا ایمان کیس وجہ توں ڈول سکدا اے؟‏

⁴ ساڈے آلے دَوالے بوہت سارے ایہو جہے لوک نیں جیہڑے بائبل چ لکھیاں پیشین‌گوئیاں تے ایمان نئیں رکھدے۔ ہو سکدا اے کہ ساڈی مخالفت کرن والے ساڈا مخول اُڈان کیونکہ اَسی کئی سالاں توں ایس بھیڑی دُنیا دے خاتمے دا اِنتظار کر رہے آں۔ کجھ لوک شاید کہن کہ کوئی خاتمہ نئیں ہوئے گا۔ ‏(‏2-‏پطرس 3:‏3، 4 نُوں پڑھو۔)‏ جے مُنادی چ مِلن والے لوک، ساڈے نال کم کرن والے لوک یاں ساڈے گھر والے ایہو جہیاں گلاں کرن تے شاید ساڈا ایمان ڈولن لگ پووے۔ آؤ ویکھئے کہ ایہناں حالاتاں نال نبڑن لئی پطرس رسول نے کیہڑی نصیحت کیتی۔‏

5.‏ کیہڑی چیز ساڈی مدد کرے گی تاکہ اَسی صبر نال ایس بھیڑی دُنیا دے خاتمے دا اِنتظار کر سکئے؟ (‏2-‏پطرس 3:‏8، 9‏)‏

⁵ شاید کجھ لوکاں نُوں لگے کہ یہوواہ ایس بھیڑی دُنیا دا خاتمہ کرن چ دیر لا رہیا اے۔ پر پطرس دی لکھی گل توں سانوں صبر رکھن چ مدد مِلدی اے۔ اوہنے دَسیا کہ وقت بارے یہوواہ دا نظریہ انساناں توں بوہت فرق اے۔ ‏(‏2-‏پطرس 3:‏8، 9 نُوں پڑھو۔)‏ یہوواہ لئی ہزار سال اِک دن دے برابر نیں۔ یہوواہ بڑا صبر کرن والا خدا اے تے اوہ نئیں چاہندا کہ اِک وی انسان ہلاک ہوئے۔ پر اِک دن بالکل صحی وقت تے اوہ ایس بھیڑی دُنیا نُوں ضرور ختم کرے گا۔ پر جدوں تک یہوواہ دا دن نئیں آندا ساڈے کول ایہہ شرف اے کہ اَسی زیادہ توں زیادہ لوکاں نُوں مُنادی کریئے۔‏

6.‏ اَسی یہوواہ دے دن نُوں اپنے ذہن چ کیویں رکھ سکنے آں؟ (‏2-‏پطرس 3:‏11، 12‏)‏

⁶ پطرس رسول نے کہیا کہ سانوں یہوواہ دے دن نُوں ہمیشاں ذہن چ رکھنا چاہی دا اے۔ ‏(‏2-‏پطرس 3:‏11، 12 نُوں پڑھو۔)‏ اَسی اِنج کیویں کر سکنے آں؟ اَسی اوہناں برکتاں بارے سوچ سکنے آں جیہڑیاں سانوں نوِیں دُنیا چ مِلن گیاں۔ تصور کرو کہ تُسی نوِیں دُنیا چ تازہ ہوا چ ساہ لے رہے او، ودھیا کھانا کھا رہے او، اپنے اوہناں عزیزاں نُوں مِل رہے او جیہڑے مُردیاں چوں زندہ ہو گئے نیں تے اوہناں لوکاں نُوں تلیم دے رہے او جیہڑے بائبل دِیاں پیشین‌گوئیاں پوریاں ہون توں صدیاں پہلاں فوت ہو گئے سن۔ ایہناں گلاں تے سوچ‌وچار کرن نال تُسی یہوواہ دے دن لئی تیار رہوو گے تے تواڈا ایہہ یقین پکا ہوئے گا کہ بھیڑی دُنیا دا خاتمہ چھیتی ہون والا اے۔ مستقبل چ ہون والیاں ایہناں گلاں نُوں ذہن چ رکھن دی وجہ توں اَسی جھوٹھے اُستاداں دِیاں گلاں چ نئیں آواں گے۔—‏2-‏پطرس 3:‏17‏۔‏

7.‏ انساناں دے ڈر دا ساڈے تے کیہہ اثر ہو سکدا اے؟‏

⁷ جدوں اَسی یہوواہ دے دن نُوں ذہن چ رکھنے آں تے ساڈے دل چ خواہش پیدا ہوندی اے کہ اَسی لوکاں نُوں بادشاہی دی خوش‌خبری سُنائیے۔ پر کجھ حالاتاں چ شاید اَسی ایہہ سوچ کے ڈر جائیے کہ پتہ نئیں لوک کیہہ کہن گے یاں کیہہ کرن گے۔ پطرس نال وی اِنج ای ہویا۔ جیس رات یسوع تے مُقدمہ چلیا اوس رات پطرس ایہہ منن توں ڈر رہیا سی کہ اوہ یسوع دا شاگرد اے سگوں اوہنے تے یسوع نُوں جانن توں وار وار اِنکار کیتا۔ (‏متی 26:‏69-‏75‏)‏ پر اوہنے اپنے ڈر تے قابو پایا تے بعد چ یقین نال ایہہ گل لکھی:‏ اوہناں گلاں توں نہ ڈرو جنہاں توں لوک ڈردے نیں تے نہ ای گھبراؤ۔ (‏1-‏پطرس 3:‏14‏)‏ پطرس دی ایس گل توں سانوں یقین ہوندا اے کہ اَسی وی انساناں دے ڈر تے قابو پا سکنے آں۔‏

8.‏ کیہڑی چیز انساناں دے ڈر تے قابو پان چ ساڈی مدد کر سکدی اے؟ (‏1-‏پطرس 3:‏15‏)‏

 ⁸ انساناں دے ڈر تے قابو پان چ کیہڑی چیز ساڈی مدد کر سکدی اے؟ پطرس نے کہیا:‏ دل چ مسیح نُوں مالک تے مُقدس سمجھو۔ ‏(‏1-‏پطرس 3:‏15 نُوں پڑھو۔)‏ ایہدا مطلب اے کہ اَسی سوچئے کہ ساڈے مالک تے بادشاہ یسوع مسیح دا رُتبہ کِنّاں اُچا اے تے اوہدے کول کِنّی طاقت اے۔ جدوں تواڈے کول کسے نُوں بادشاہی دی خوش‌خبری سُنان دا موقعے ہووے پر توانوں گل کردیاں ڈر لگے تے تصور کرو کہ تواڈا بادشاہ یسوع اپنے اسمانی تخت تے بیٹھا اے تے اوہدے آلے دَوالے بے‌شمار فرشتے نیں۔ ہمیشاں یاد رکھو کہ یسوع کول ”‏اسمان تے زمین دا سارا اِختیار“‏ اے تے اوہ ”‏دُنیا دے آخری زمانے تک ہر ویلے“‏ تواڈے نال اے۔ (‏متی 28:‏18-‏20‏)‏ پطرس نے کہیا سی کہ سانوں دُوجیاں نُوں اپنے ایمان بارے دَسن لئی ہر ویلے تیار رہنا چاہی دا اے۔ کیہہ تُسی اپنے کم دی تھاں تے، سکول چ یاں کسے ہور جگہ گواہی دینا چاہندے او؟ پہلاں توں سوچو کہ توانوں اِنج کرن دا موقع کدوں مِل سکدا اے تے تُسی گل شروع کرن لئی کیہہ کہہ سکدے او۔ فیر دُعا چ یہوواہ توں دلیری منگو تے بھروسا رکھو کہ انساناں دے ڈر تے قابو پان چ اوہ تواڈی مدد ضرور کرے گا۔—‏اعمال 4:‏29‏۔‏

9.‏ اِک موقعے تے پطرس پیار وکھان چ ناکام کیویں ہویا؟ (‏تصویر نُوں وی ویکھو۔)‏

⁹ پطرس نُوں دُوجیاں لئی پیار وکھانا سکھنا پیا۔ پطرس وی اوتھے موجود سی جدوں یسوع نے کہیا:‏ مَیں توانوں اِک نواں حکم دے رہیا واں کہ تُسی  اِک دُوجے نال پیار کرو۔ جیویں مَیں تواڈے نال پیار کیتا اے، تُسی وی اِک دُوجے نال پیار کرو۔ (‏یوحنا 13:‏34‏)‏ پر ایہدے باوجود کجھ سال بعد پطرس نے یہودی مسیحیاں دے ڈر توں اوہناں بھین بھراواں نال کھانا پینا چھڈ دِتا جیہڑے غیریہودی سن۔ پولُس رسول نے پطرس نُوں کہیا کہ اوہ پاکھنڈی بن گیا اے۔ (‏گلتیوں 2:‏11-‏14‏)‏ پطرس نے پولُس دی اِصلاح نُوں قبول کیتا تے اپنے آپ نُوں بدلیا۔ اپنے دونواں خطاں چ پطرس نے ایس گل تے زور دِتا کہ سانوں کلیسیا دے بھین بھراواں لئی صرف پیار محسوس ای نئیں کرنا چاہی دا سگوں اپنے کماں دے ذریعے وکھانا وی چاہی دا اے۔‏

10.‏ اَسی ایہو جیہا پیار کیویں وکھا سکنے آں جدے چ پاکھنڈ نئیں ہوندا؟ (‏1-‏پطرس 1:‏22‏)‏

¹⁰ پطرس نے کہیا کہ سانوں اپنے بھین بھراواں لئی ایہو جیہا پیار وکھانا چاہی دا اے جدے چ پاکھنڈ نئیں ہوندا۔ ‏(‏1-‏پطرس 1:‏22 نُوں پڑھو۔)‏ اَسی ایہو جیہا پیار اوہدوں ای وکھا سکنے آں جے اَسی سچائی دی راہ تے چلنے آں۔ سچائی چ ایہہ گل شامل اے کہ خدا کسے دی طرف‌داری نئیں کردا۔ (‏اعمال 10:‏34، 35‏)‏ جے اَسی کلیسیا دے کجھ بھین بھراواں لئی پیار وکھانے آں پر کجھ لئی نئیں وکھاندے تے ایہدا مطلب اے کہ اَسی یسوع دے ایس حکم تے نئیں چل رہے کہ اَسی اِک دُوجے نال پیار کریئے۔ ایہہ سچ اے کہ کجھ بھین بھراواں نال ساڈی قریبی دوستی ہوندی اے جیویں کہ یسوع دی وی سی۔ (‏یوحنا 13:‏23؛‏ 20:‏2‏)‏ پر پطرس نے سانوں یاد دَوایا کہ سانوں پوری کوشش کرنی چاہی دی اے کہ اَسی اپنے سارے بھین بھراواں نُوں دلوں پیار کریئے کیونکہ اوہ سارے یہوواہ دے خاندان دا حصہ نیں۔—‏1-‏پطرس 2:‏17‏۔‏

11.‏ اِک دُوجے نال گُوڑھا پیار کرن دا کیہہ مطلب اے؟‏

¹¹ پطرس نے کہیا کہ اَسی اِک دُوجے نال دلوں گُوڑھا پیار کریئے۔ ایہدا مطلب اے کہ اَسی اوہدوں وی دُوجیاں نال پیار کریئے جدوں اِنج کرنا ساڈے لئی مشکل ہووے۔ مثال لئی، جے کوئی بھین یاں بھرا سانوں ناراض کردا اے یاں ساڈا دل دُکھاندا اے تے شاید ساڈا دل کرے کہ اَسی اوہدے لئی پیار وکھان دی بجائے اوہدے نال اُنج دا ای سلوک کریئے جنج دا اوہنے ساڈے نال کیتا اے۔ پر یہوواہ ایہدے توں خوش نئیں ہوندا۔ ایہہ گل پطرس نے یسوع توں سکھی سی۔ (‏یوحنا 18:‏10، 11‏)‏ ایس لئی اوہنے لکھیا:‏ نقصان دے بدلے کسے دا نقصان نہ کرو تے بے‌عزتی دے بدلے کسے دی بے‌عزتی نہ کرو سگوں نرمی نال پیش آؤ۔ (‏1-‏پطرس 3:‏9‏)‏ جے ساڈے دل چ دُوجیاں لئی گُوڑھا پیار ہوئے گا تے فیر اَسی اوہناں نال مہربانی نال پیش آواں گے تے اوہناں لوکاں لئی وی فکر ظاہر کراں گے جنہاں نے شاید سانوں دُکھی کیتا اے۔‏

12.‏ (‏الف)‏دُوجیاں لئی گُوڑھا پیار ہور کیہہ کرن چ ساڈی مدد کرے گا؟ (‏ب)‏تُسی ویڈیو ‏”‏اپنا ایکا ٹُٹن نہ دَوو“‏ دے مطابق کیہہ کرن دی کوشش کرو گے؟‏

¹² اپنے پہلے خط چ پطرس نے کہیا:‏ اِک دُوجے نال گُوڑھا پیار کرو۔ ایہو جیہا پیار صرف کجھ گُناہواں نُوں نئیں سگوں بوہت سارے گُناہواں نُوں ڈھک لیندا اے۔ (‏1-‏پطرس 4:‏8‏)‏ ایہہ گل لکھدے ویلے پطرس نُوں شاید اوہ گلاں یاد آئیاں ہون جیہڑیاں یسوع نے اوہنوں معافی بارے سکھائیاں سن۔ اوس وقت پطرس سوچ رہیا سی کہ اوہ بوہت وڈے دل والا اے کیونکہ اوہ اپنے بھرا نُوں سَت واری معاف کرن لئی تیار سی۔ پر یسوع نے اوہنوں تے سانوں ساریاں نُوں ایہہ سکھایا کہ سانوں ”‏ستتر (‏77)‏وار“‏ معاف کرنا چاہی دا اے یعنی سانوں حساب نئیں رکھنا چاہی دا کہ اَسی کسے نُوں کِنّی واری معاف کیتا اے۔ (‏متی 18:‏21، 22‏)‏ جے توانوں یسوع دی ایس گل تے عمل کرنا مشکل لگدا اے تے ہمت نہ ہارو۔ یہوواہ دے سارے بندے عیب‌دار نیں۔ ایس لئی کدی کدار سانوں ساریاں نُوں معاف کرنا مشکل لگدا اے۔ پر سب توں ضروری ایہہ وے کہ تُسی اپنے بھین یاں بھرا نُوں دلوں معاف کرن تے اوہدے نال صلح کرن لئی اوہ سب کجھ کرو، جو تُسی کر سکدے او۔‏ c

13.‏ کیہڑی وجہ توں بزرگاں لئی بھین بھراواں دی مدد کرنا مشکل ہو سکدا اے؟‏

¹³ بے‌شک پطرس اوہ گل کدی نئیں بُھلیا جیہڑی یسوع نے مُردیاں چوں زندہ ہون دے بعد اوہنوں کہی سی۔ اوہنے کہیا:‏ میریاں چھوٹیاں بھیڈاں دی دیکھ‌بھال کر۔ (‏یوحنا 21:‏16‏)‏ بزرگاں نُوں پتہ اے کہ  ایہہ ہدیت اوہناں لئی وی اے۔ پر کدی کدی بزرگاں لئی ایس خاص ذمے‌داری لئی وقت کڈھنا مشکل ہو سکدا اے۔ بزرگاں دی پہلی ذمے‌داری اپنے گھر والیاں دی دیکھ‌بھال کرنا اے۔ اوہ اوہناں دِیاں ضرورتاں نُوں پورا کردے نیں تے یہوواہ دے نیڑے رہن چ اوہناں دی مدد کردے نیں۔ ایہدے علاوہ اوہ مُنادی چ پیشوائی کردے نیں۔ نالے اوہ عبادتاں تے کنونشناں لئی حصے تیار کرن لئی بڑی محنت کردے نیں۔ کجھ بزرگ تے ہسپتال رابطہ کمیٹی یاں فیر ڈیزائن تے تعمیر دے مقامی شعبے چ وی کم کردے نیں۔ واقعی بزرگاں تے بڑیاں ذمے‌داریاں ہوندیاں نیں۔‏

14.‏ بزرگ کیہہ کر سکدے نیں تاکہ اوہناں دے دل چ بھین بھراواں دی دیکھ‌بھال کرن دی خواہش ودھے؟ (‏1-‏پطرس 5:‏1-‏4‏)‏

¹⁴ پطرس نے بزرگاں نُوں کہیا:‏ خدا دِیاں بھیڈاں دی دیکھ‌بھال کرو۔ ‏(‏1-‏پطرس 5:‏1-‏4 نُوں پڑھو۔)‏ بزرگو، سانوں پتہ اے کہ تُسی بھین بھراواں نال بوہت پیار کردے او تے تُسی اوہناں دی دیکھ‌بھال تے مدد کرنا چاہندے او۔ پر شاید کدی کدی توانوں لگے کہ تُسی اینے مصروف او یاں تھک گئے او کہ تُسی ایہہ ذمے‌داری پوری نئیں کر سکدے۔ فیر تُسی کیہہ کر سکدے او؟ دُعا چ اپنے دل دی گل یہوواہ نُوں دَسو۔ پطرس نے لکھیا:‏ جے کوئی خدمت کردا اے تے اوس طاقت دے سہارے کرے جیہڑی خدا دیندا اے۔ (‏1-‏پطرس 4:‏11‏)‏ شاید بھین بھرا ایہو جہیاں مشکلاں دا سامنا کر رہے نیں جنہاں نُوں صرف خدا دی بادشاہی حل کر سکدی اے۔ پر یاد رکھو کہ عظیم چرواہا یسوع مسیح اوہناں دی تواڈے نالوں وی زیادہ مدد کر سکدا اے۔ اوہ اَج وی اِنج کر سکدا اے تے نوِیں دُنیا چ وی کرے گا۔ یہوواہ بس ایہہ چاہندا اے کہ بزرگ بھین بھراواں نال پیار کرن، اوہناں دی دیکھ‌بھال کرن تے اوہناں لئی چنگی مثال قائم کرن۔‏

15.‏ اِک بزرگ بھین بھراواں دی دیکھ‌بھال کیویں کردا اے؟ (‏تصویر نُوں وی ویکھو۔)‏

¹⁵ بھرا ولیم کئی سالاں توں بزرگ دے طور تے خدمت کر رہیا اے تے اوہنوں پتہ اے کہ بھین بھراواں دی مدد کرنا تے اوہناں دا حوصلہ ودھانا کِنّاں ضروری اے۔ جدوں کورونا دی وبا شروع ہوئی تے بھرا ولیم تے اوہدی کلیسیا دے دُوجے بزرگاں نے فیصلہ کیتا کہ اوہ ہر ہفتے اپنے اپنے گروپ دے ہر بھین بھرا نال رابطہ کرن گے۔ اوہناں نے اِنج کرن دا فیصلہ کیوں کیتا؟ بھرا ولیم نے دَسیا:‏ ”‏بوہت سارے بھین بھرا اپنے گھراں چ کلّے سن جدی وجہ توں اوہناں لئی اپنا دھیان چنگیاں گلاں تے رکھنا مشکل ہو سکدا سی۔“‏ بھرا ولیم اوہناں بھین بھراواں دی گل بڑے دھیان نال سُن‌دا اے جیہڑے پریشانی چوں لنگھ رہے ہوندے نیں تے اوہ ایہہ جانن دی کوشش کردا اے کہ اوہناں نُوں کیہڑی چیز دی لوڑ اے۔ فیر اوہناں دی مدد کرن لئی اوہ ساڈی ویب‌سائٹ توں مضمون یاں ویڈیوز لبھدا اے۔ بھرا ولیم نے کہیا:‏ ”‏بھین بھراواں دا حوصلہ ودھانا ہُن  پہلے نالوں کِتے زیادہ ضروری اے۔ اَسی دُوجے لوکاں نُوں یہوواہ بارے سکھان لئی بڑی محنت کرنے آں۔ یہوواہ دِیاں بھیڈاں دی دیکھ‌بھال کرن لئی وی سانوں اونی ای محنت کرنی چاہی دی اے تاکہ اوہ یہوواہ دے نیڑے رہن۔“‏

16.‏ اَسی پطرس دے خطاں توں سکھیاں ہوئیاں گلاں تے کیویں عمل کر سکنے آں؟‏

¹⁶ ایس مضمون چ اَسی پطرس دے دو خطاں توں صرف کجھ گلاں تے غور کیتا اے۔ شاید توانوں محسوس ہویا ہووے کہ توانوں وی کسے معاملے چ بہتری لیان دی ضرورت اے۔ مثال لئی، کیہہ توانوں خدا دی بادشاہی چ مِلن والیاں برکتاں تے ہور زیادہ سوچ‌وچار کرن دی لوڑ اے؟ کیہہ تُسی اپنے کم دی تھاں تے، سکول چ یاں کسے ہور تھاں تے گواہی دین لئی منصوبہ بنا سکدے او؟ کیہہ تُسی ہور وی طریقیاں نال بھین بھراواں لئی گُوڑھا پیار وکھا سکدے او؟ بزرگو، کیہہ تُسی ایہہ عزم کیتا اے کہ تُسی خوشی نال تے پوری وا لا کے خدا دِیاں بھیڈاں دی دیکھ‌بھال کرو گے؟ اپنا جائزہ لین دے بعد شاید توانوں نظر آئے کہ توانوں کجھ معاملیاں چ بہتری لیان دی ضرورت اے۔ پر ہمت نہ ہارو۔ ساڈا مالک یسوع مہربان اے۔ اوہ بہتری لیان چ تواڈی مدد ضرور کرے گا۔ (‏1-‏پطرس 2:‏3‏)‏ پطرس نے یقین دَوایا اے کہ خدا چنگی طرحاں تواڈی تربیت کرے گا، اوہ توانوں مضبوط بنائے گا، اوہ توانوں طاقت بخشے گا تے اوہ توانوں قائم کرے گا۔—‏1-‏پطرس 5:‏10‏۔‏

17.‏ جے اَسی ہمت ہارے بغیر یہوواہ توں تربیت حاصل کردے رہواں گے تے سانوں کیہڑی برکت ملے گی؟‏

¹⁷ اِک وقت تے پطرس نُوں لگیا کہ اوہ خدا دے پُتر دا شاگرد ہون دے لائق نئیں۔ (‏لُوقا 5:‏8‏)‏ پر یہوواہ تے یسوع دی محبت تے مدد دی وجہ توں پطرس ہمت ہارے بغیر یسوع دے پچھے پچھے چلدا رہیا۔ ایس لئی پطرس نُوں ساڈے مالک یسوع مسیح دی ہمیشاں تک قائم رہن والی بادشاہی چ جان دا شرف ملیا۔ (‏2-‏پطرس 1:‏11‏)‏ ایہہ واقعی کِنّاں زبردست انعام سی۔ جے پطرس وانگوں تُسی وی ہمت نئیں ہارو گے تے یہوواہ توں تربیت حاصل کردے رہوو گے تے توانوں وی ہمیشاں دی زندگی دا شان‌دار انعام ملے گا۔ جی ہاں، تُسی اپنے ایمان دی منزل پاؤ گے یعنی نجات۔—‏1-‏پطرس 1:‏9‏۔‏