1، 2.‏ سمسون دی مثال تے غور کرن نال سانوں کیہہ فائدہ ہوئے گا؟‏

 جدوں تُسی سمسون دا ناں سُن‌دے او تے تواڈے ذہن چ کیہہ آندا اے؟ شاید تواڈے ذہن چ اِک بوہت طاقت‌ور انسان آئے۔ ایہہ گل سچ اے کہ سمسون بوہت طاقت‌ور سی پر اوہنے اپنی زندگی چ کجھ غلط فیصلے کیتے جدے بڑے بھیڑے نتیجے نکلے۔ پر فیر وی یہوواہ نے ایس گل تے دھیان دِتا کہ سمسون کِنّی وفاداری نال اوہدے نال چلدا رہیا اے۔ ایس لئی اوہنے اوہدی مثال نُوں بائبل چ لکھوایا تاکہ اَسی اوہدے تے غور کر کے فائدہ حاصل کر سکئے۔‏

² یہوواہ نے اپنی قوم اِسرائیل دی مدد کرن لئی سمسون دے ذریعے بڑے زبردست کم کیتے۔ سمسون دے مرن توں کئی صدیاں بعد یہوواہ نے پولُس رسول دے ذریعے اوہدا ناں اوہناں لوکاں چ لکھوایا جیہڑے ایمان دی ودھیا مثال نیں۔ (‏عبرانیوں 11:‏32-‏34‏)‏ سمسون دی مثال توں ساڈا حوصلہ ودھدا اے۔ اوہنے مشکل حالاتاں چ وی یہوواہ تے بھروسا رکھیا۔ ایس مضمون چ اَسی غور کراں گے کہ اَسی سمسون توں کیہہ سکھنے آں تے اوہدی مثال تے غور کرن نال سانوں کیویں حوصلہ مِلدا اے۔‏

3.‏ سمسون نُوں کیہڑی ذمے‌داری ملی سی؟‏

³ جدوں سمسون پیدا ہویا تے فلستی اِسرائیلیاں تے حکومت کر رہے سن تے اوہناں تے ظلم ڈھا رہے سن۔ (‏قضاۃ 13:‏1‏)‏ ایس وجہ توں اِسرائیلی بڑی تکلیف چ سن۔ یہوواہ نے سمسون نُوں چُنیا تاکہ اوہ اِسرائیلیاں نُوں فلستیاں دے ہتھوں چھڈائے۔ (‏قضاۃ 13:‏5‏)‏ ایہہ کافی مشکل ذمے‌داری سی۔ ایہنوں پورا کرن لئی سمسون نُوں یہوواہ تے بھروسا کرن دی لوڑ سی۔‏

4.‏ فلستیاں توں آزاد ہون چ یہوواہ نے سمسون دی مدد کیویں کیتی؟ (‏قضاۃ 15:‏14-‏16‏)‏

 ⁴ آؤ اِک واقعے تے غور کرنے آں جدے توں پتہ چلدا اے کہ سمسون نے مدد تے طاقت لئی یہوواہ تے بھروسا کیتا۔ اِک واری فلستی فوج سمسون نُوں پھڑن لئی لحی آئی جیہڑا شاید یہوداہ چ سی۔ یہوداہ دے لوک بوہت ڈر گئے ایس لئی اوہناں نے فیصلہ کیتا کہ اوہ سمسون نُوں فلستیاں دے حوالے کر دین گے۔ سمسون دے اپنے لوکاں نے اوہنوں دو نوِیاں رسیاں نال بنھ دِتا تے اوہنوں فلستیاں دے کول لے گئے۔ (‏قضاۃ 15:‏9-‏13‏)‏ پر یہوواہ دی روح نے سمسون نُوں زور بخشیا تے اوہدیاں رسیاں کُھل گئیاں۔ فیر اوہنوں کھوتے دے جبڑے دی اِک تازی ہڈی لبھی۔ اوہنے ایس ہڈی نُوں چُکیا تے ایہدے نال 1000 فلستیاں نُوں مار دِتا۔‏‏—‏قضاۃ 15:‏14-‏16 نُوں پڑھو۔‏

5.‏ سمسون نے کیویں ظاہر کیتاکہ اوہ یہوواہ تے بھروسا کردا سی؟‏

⁵ سمسون نے کھوتے دے جبڑے دی ہڈی کیوں استمال کیتی؟ ایہہ کوئی جنگی ہتھیار نئیں سی۔ ایہدے چ کوئی شک نئیں کہ اوہ جان‌دا سی کہ اوہنوں کسے جنگی ہتھیار توں نئیں سگوں یہوواہ دی مدد نال کامیابی مل سکدی اے۔ اوہنوں جو ملیا، اوہنے اوہنوں یہوواہ دی مرضی نُوں پورا کرن لئی استمال کیتا۔ ایہہ گل صاف نظر آندی اے کہ یہوواہ تے بھروسا کرن دی وجہ توں ای سمسون نُوں کامیابی ملی۔‏

6.‏ تنظیم چ اپنیاں ذمے‌داریاں نُوں پورا کردے ویلے اَسی سمسون دی مثال توں کیہہ سکھ سکنے آں؟‏

⁶ یہوواہ سانوں وی ایہو جہیاں ذمے‌داریاں نُوں پورا کرن لئی طاقت دے سکدا اے جنہاں نُوں پورا کرنا شاید سانوں ناممکن لگ رہیا ہووے۔ اوہ ایہو جہے طریقیاں نال ساڈی مدد کر سکدا اے جنہاں نُوں ویکھ کے شاید اَسی حیران ہو جائیے۔ ایس گل دا یقین رکھو کہ جیویں یہوواہ نے سمسون نُوں طاقت دِتی سی، اونویں ای اوہ تواڈی وی مدد کرے گا تاکہ تُسی اوہدی مرضی دے مطابق کم کر سکو۔ پر ایہدے لئی ضروری اے کہ تُسی اوہدے تے بھروسا کردے رہوو۔—‏امثال 16:‏3‏۔‏

7.‏ کیہڑی مثال توں پتہ چلدا اے کہ یہوواہ کولوں رہنمائی منگنا بوہت اہم اے؟‏

⁷ تعمیر دے کم چ حصہ لین والے بوہت سارے بھین بھراواں نے یہوواہ تے اپنا بھروسا ظاہر کیتا اے۔ ماضی چ بھرا نوِیاں عبادت‌گاہواں تے تنظیم دِیاں دوجیاں عمارتاں لئی ڈیزائن تیار کردے سن تے ایہناں نُوں شروع توں بناندے سن۔ پر کیونکہ بوہت سارے نویں لوک بپتسمہ لے کے ساڈیاں کلیسیاواں چ شامل ہو رہے نیں ایس لئی کجھ تبدیلیاں  دی لوڑ سی۔ جیہڑے بھرا ایس کم چ پیشوائی کر رہے سن، اوہناں نے یہوواہ کولوں رہنمائی منگی تے فیر نویں طریقے اپنائے، جیویں کہ بنیاں بنائیاں عمارتاں نُوں خریدنا تے فیر ایہناں چ کجھ تبدیلی تے مرمت کر کے ایہناں نُوں عبادت لئی تیار کرنا۔ بھرا رابرٹ نے پوری دُنیا چ تنظیم دِیاں عمارتاں نُوں بنان دے کم چ حصہ لیا اے۔ اوہ کہندا اے:‏ ”‏شروع شروع چ کجھ بھراواں نُوں ایس طریقے مطابق کم کرنا مشکل لگ رہیا سی کیونکہ اَسی کئی سالاں توں فرق طریقے نال کم کر رہے ساں۔ پر بھرا اپنے آپ نُوں نوِیں تبدیلی مطابق ڈھالن لئی تیار سن۔ تے ہولی ہولی ایہہ گل ثابت ہو گئی کہ یہوواہ ایس نویں طریقے تے برکت پا رہیا اے۔“‏ ایہہ تے ایس گل دی حالے اِک مثال اے کہ کیویں یہوواہ اپنے بندیاں دی رہنمائی کر رہیا اے تاکہ اوہ اوہدی مرضی نُوں پورا کرن۔ سانوں ساریاں نُوں اپنے آپ کولوں پچھدے رہنا چاہی دا اے کہ ”‏کیہہ مَیں یہوواہ کولوں رہنمائی منگنا واں تے اوہدی خدمت کرن لئی اپنے آپ چ تبدیلیاں لیان لئی تیار رہنا واں؟“‏

8.‏ اِک واری جدوں سمسون نُوں بڑی سخت پیاس لگی تے اوہنے کیہہ کیتا؟‏

⁸ شاید توانوں بوہت سارے ایہو جہے واقعے یاد ہون جنہاں چ سمسون نے بڑے حیران کر دین والے کم کیتے۔ اوہنے کلّے ای اِک شیر نُوں تے بعد چ شہر اسقلون چ 30 فلستیاں نُوں مار دِتا۔ (‏قضاۃ 14:‏5، 6،‏ 19‏)‏ سمسون جان‌دا سی کہ اوہ ایہہ کم یہوواہ دی مدد توں بغیر نئیں کر سکدا۔ ایہہ گل اوس واقعے توں صاف نظر آئی جدوں 1000 فلستیاں نُوں مارن توں بعد سمسون نُوں بڑی پیاس لگی۔ فیر اوہنے کیہہ کیتا؟ اوہنے پانی لبھن لئی اپنے اُتے بھروسا نئیں کیتا سگوں مدد لئی یہوواہ نُوں پکاریا۔—‏قضاۃ 15:‏18‏۔‏

9.‏ یہوواہ نے سمسون دی دُعا سُن کے کیہہ کیتا؟ (‏قضاۃ 15:‏19‏)‏

⁹ یہوواہ نے سمسون دی اِلتجا سنی تے اِک معجزہ کر کے پانی دا ا نتظام کیتا۔ جدوں سمسون نے ایہہ پانی پیتا تے اوہدی جان چ جان آئی تے اوہ تازہ‌دم ہو گیا۔ ‏(‏قضاۃ 15:‏19 نُوں پڑھو۔)‏ ہو سکدا اے کہ پانی دا ایہہ چشمہ اوس ویلے تک وی موجود سی جدوں کئی سالاں بعد سموئیل نبی نے یہوواہ دے الہام نال قضاۃ دی کتاب لکھی۔ جدوں بنی‌اِسرائیل پانی دے ایس چشمے نُوں ویکھدے ہون گے تے اوہناں دے ذہن چ آندا ہوئے گا کہ جے اوہ یہوواہ تے بھروسا رکھن گے تے اوہ اوہناں دی مدد کرے گا۔‏

10.‏ یہوواہ کولوں مدد حاصل کرن لئی سانوں کیہہ کرنا چاہی دا اے؟ (‏تصویر نُوں وی ویکھو۔)‏

¹⁰ سانوں وی یہوواہ کولوں مدد منگنی چاہی دی اے، فیر بھانویں ساڈے چ کِنّیاں ای صلاحیتاں کیوں نہ ہون یاں اَسی اوہدی خدمت چ کِنّاں کجھ کر لیا ہووے۔ سانوں خاکساری نال ایس گل نُوں مننا چاہی دا اے کہ سانوں کامیابی صرف اوس ویلے مل سکدی اے جدوں اَسی یہوواہ تے بھروسا رکھاں گے۔جدوں سمسون نے اوہ پانی پیتا جیہڑا یہوواہ نے اوہنوں معجزہ کر کے دِتا سی تے اوہنوں طاقت ملی۔ جے سمسون وانگوں سانوں وی وفادار رہن لئی ہمت تے طاقت دی ضرورت اے تے سانوں اوہناں سہولتاں توں فائدہ حاصل کرنا چاہی دا اے جیہڑیاں یہوواہ سانوں دیندا اے۔—‏متی 11:‏28‏۔‏

11.‏ اَسی مدد لئی یہوواہ تے بھروسا کیویں ظاہر کر سکنے آں؟ اِک مثال دَوو۔‏

¹¹ ذرا روس چ رہن والے بھرا الیکسی دی مثال تے غور کرو جیہڑا بڑی سخت اذیت سہہ رہیا اے۔ ایہناں مشکل حالاتاں دا سامنا کرن چ کیہڑی چیز نے اوہدی مدد کیتی اے؟ الیکسی تے اوہدی بیوی باقاعدگی نال بائبل پڑھدے نیں تے یہوواہ دی عبادت کردے نیں۔ اوہ کہندا اے:‏ ”‏مَیں پوری کوشش کرنا واں کہ مَیں باقاعدگی نال ذاتی مطالعیا کراں تے ہر روز بائبل نُوں پڑھاں۔ ہر سویرے مَیں تے میری بیوی روزانہ دی ایت تے گل کرنے آں تے مل کے دُعا کرنے آں۔“‏ایس مثال توں اَسی کیہہ سکھنے آں؟ سانوں اپنے آپ تے بھروسا کرن دی بجائے یہوواہ تے بھروسا کرنا چاہی دا اے۔ اَسی اِنج کیویں کر سکنے آں؟ اَسی ہر روز ایہو جہے کم کر سکنے آں جنہاں توں ساڈا ایمان مضبوط ہووے، جیویں کہ بائبل دا مطالعیا کرنا، دُعا کرنا، عبادتاں تے مُنادی تے جانا۔ جدوں اَسی اِنج کراں گے تے یہوواہ ساڈی مدد کرے گا تاکہ اَسی اوہدی خدمت  کردے رہیے۔ جیویں یہوواہ نے سمسون نُوں ہمت دِتی، اوہ سانوں وی ہمت دَوے گا۔‏

12.‏ سمسون نے کیہڑا غلط فیصلہ کیتا تے اوہدا ایہہ فیصلہ اوہدے پہلے فیصلیاں توں فرق کیویں سی؟‏

¹² سمسون وی ساڈے وانگوں عیب‌دار سی ایس لئی کجھ موقعیاں تے اوہنے غلط فیصلے کیتے۔ اوہدے اِک فیصلے دے تے بڑے ای بھیڑے نتیجے نکلے۔ قاضی بنن دے کجھ عرصے بعد اوہنوں سورق دی وادی چ رہن والی اِک عورت نال پیار ہو گیا جدا ناں دلیلہ سی۔ (‏قضاۃ 16:‏4‏)‏ ایہدے توں پہلاں سمسون اِک فلستی عورت نال ویاہ کرنا چاہندا سی۔ پر اوہدا ایہہ فیصلہ یہوواہ وَلّوں سی کیونکہ یہوواہ فلستیاں نال لڑن دا موقع لبھ رہیا سی۔ بعد چ سمسون فلستیاں دے اِک شہر غزہ چ اِک طوائف دے گھر رُکیا۔ اوس ویلے وی یہوواہ نے سمسون نُوں طاقت دِتی تے اوہنے شہر دا دروازہ اُکھاڑ لیا۔ (‏قضاۃ 14:‏1-‏4؛‏ 16:‏1-‏3‏)‏ پر دلیلہ دا معاملہ فرق سی کیونکہ شاید اوہ اِک اِسرائیلی سی تے اوہدے نال رشتہ جوڑ کے سمسون نُوں فلستیاں دے خلاف لڑن دا موقع نئیں ملنا سی۔‏

13.‏ دلیلہ نے سمسون نال کیہڑی چال چلی؟‏

¹³ دلیلہ نے سمسون نُوں دھوکھا دین لئی فلستیاں کولوں اِک وڈی رقم لئی۔ کیہہ سمسون دلیلہ دے پیار چ ایناں پاگل ہو گیاسی کہ اوہنوں ایہہ سمجھ ای نئیں آیا کہ دلیلہ کیہہ کرنا چاہ رہی اے؟ وجہ بھانویں جو وی سی، پر اوہنے وار وار اوہدے کولوں اوہدی طاقت دا راز پچھ پچھ کے اوہدی نک چ دم کر دِتا سی۔ اخیر سمسون نے تنگ آ کے اوہنوں دَس ای دِتا۔ افسوس دی گل اے کہ سمسون نے اپنے آپ نُوں اِک ایہو جہی صورتحال چ پا دِتا جدی وجہ توں اوہ کجھ دیر لئی اپنی طاقت تے یہوواہ دی خوشنودی گنوا بیٹھیا۔—‏قضاۃ 16:‏16-‏20‏۔‏

14.‏ دلیلہ تے بھروسا کرن دی وجہ توں سمسون نُوں کیہڑے نتیجے بھگتنے پئے؟‏

¹⁴ سمسون نُوں یہوواہ دی بجائے دلیلہ تے بھروسا کرن دی وجہ توں بڑے بھیڑے نتیجے بُھگتنے پئے۔ فلستیاں نے اوہنوں پھڑ لیا تے  اوہدیاں اَکھاں کڈھ دِتیاں۔ اوہناں نے اوہنوں شہر غزہ چ قید کر دِتا۔ ایہہ اوہی شہر سی جدے دروازے اِک واری سمسون اُکھاڑ چُکیا سی۔ غزہ دے لوکاں نے سمسون نُوں غلام بنا لیا تے اوہدے کولوں چکی پسوائی۔ فیر اوہناں نے اپنے اِک جشن چ اوہدی بڑی بے‌عزتی کیتی۔ فلستیاں نے ایس جشن چ اپنے دیوتا دجون لئی اِک بڑی وڈی قربانی چڑھائی کیونکہ اوہناں نُوں ایہہ لگ رہیا سی کہ اوہناں دے دیوتا دی وجہ توں ای سمسون اوہناں دے ہتھ آیا اے۔ فیر اوہناں نے سمسون نُوں جشن چ بلا‌یا تاکہ اوہ اوہدا مذاق اُڈان۔—‏قضاۃ 16:‏21-‏25‏۔‏

15.‏ سمسون نے دُبارہ توں یہوواہ تے بھروسا کیویں ظاہر کیتا؟ (‏قضاۃ 16:‏28-‏30‏)‏ (‏پہلے صفحے دی تصویر نُوں ویکھو۔)‏

¹⁵ سمسون کولوں بوہت وڈی غلطی ہوئی پر اوہ یہوواہ دا کم کرن توں پچھے نئیں ہٹیا۔ اوہ اوس کم نُوں کرن دا موقع لبھ رہیا سی جیہڑا یہوواہ نے اوہنوں دِتا سی۔ ‏(‏قضاۃ 16:‏28-‏30 نُوں پڑھو۔)‏ ایس لئی اوہنے یہوواہ کولوں اِلتجا کیتی کہ اوہ اوہنوں طاقت دَوے تاکہ اوہ فلستیاں کولوں بدلہ لے سکے۔ یہوواہ خدا نے اوہدی دُعا دا جواب دِتا تے فیر توں اوہنوں طاقت دِتی۔ ایس وجہ توں سمسون نے اینے فلستی مارے جِنّے ایس توں پہلاں اوہنے کدی نئیں مارے سن۔‏

16.‏ اَسی سمسون دی غلطی توں کیہہ سکھنے آں؟‏

¹⁶ سمسون نُوں اپنی غلطی دی وجہ توں بڑی تکلیف چُکنی پئی۔ پر اوہنے یہوواہ دی مرضی دے مطابق کم کرنا نئیں چھڈیا۔ جے ساڈے کولوں کوئی ایہو جہی غلطی ہو جاندی اے جدی وجہ توں ساڈی اصلاح کیتی جاندی اے یاں ساڈے کولوں کوئی ذمے‌داری لے لئی جاندی اے تے سانوں ہمت نئیں ہارنی چاہی دی۔ یاد رکھو، یہوواہ سانوں ہمیشاں معاف کرن لئی تیار رہندا اے۔ (‏زبور 103:‏8-‏10‏)‏ سمسون وانگوں یہوواہ ساڈیاں غلطیاں دے باوجود سانوں طاقت دیندا اے تاکہ اَسی اوہدی مرضی تے چل سکئے۔‏

17، 18.‏ مائیکل دی مثال توں سانوں کیہہ حوصلہ مِلدا اے؟ (‏تصویر نُوں وی ویکھو۔)‏

¹⁷ ذرا اِک جوان بھرا دی مثال تے غور کرو جدا ناں مائیکل اے۔اوہ یہوواہ دی خدمت چ بڑا مصروف سی۔ اوہ کلیسیا چ اِک خادم تے پہل‌کار دے طور تے خدمت کر رہیا سی۔ پر افسوس دی گل اے کہ اوہدے کولوں اِک ایہو جہی غلطی ہو گئی جدی وجہ توں اوہدے کولوں ایہہ ذمے‌داریاں لے لئیاں گئیاں۔ اوہ کہندا اے:‏ ”‏ایس توں پہلاں مَیں یہوواہ دی خدمت چ بوہت کجھ کر رہیا ساں۔ فیر اچانک مینوں لگن لگ پیا کہ مَیں کسے کم دا نئیں آں۔ مَیں ایہہ تے کدی نئیں سوچیا کہ یہوواہ مینوں چھڈ دَوے گا پر مَیں ایہہ ضرور سوچنا ساں کہ کیہہ یہوواہ نال میرا رشتہ پہلے جِنّاں مضبوط ہو سکے گایاں کیہہ مَیں کلیسیا چ اُنج ای خدمت کر سکاں گا جیویں مَیں پہلے کرنا ساں۔“‏

 ¹⁸ خوشی دی گل اے کہ مائیکل نے ہمت نئیں ہاری۔ اوہ کہندا اے:‏ ”‏مَیں ایس گل تے دھیان دِتا کہ مَیں فیر توں یہوواہ نال اپنے رشتے نُوں کیویں مضبوط کر سکنا واں۔ اِنج کرن لئی مَیں دل کھول کے یہوواہ کولوں دُعا کرنا ساں نالے مطالعیا تے سوچ وچار کرنا ساں۔“‏ کجھ عرصے بعد مائیکل نُوں کلیسیا چ اپنیاں ذمے‌داریاں واپس مل گئیاں۔ ہُن اوہ بزرگ تے پہل‌کار دے طور تے خدمت کر رہیا اے۔ اوہ کہندا اے:‏ ”‏مینوں خاص طور تے بزرگاں وَلّوں جیہڑ ی مدد تے حوصلہ ملیا، اوہدی وجہ توں مَیں سمجھ پایا کہ یہوواہ ہُن وی مینوں پیار کردا اے۔ ہُن مَیں فیر توں صاف ضمیر نال کلیسیا چ خدمت کر سکنا واں۔ میرے نال جو کجھ ہویا اوہدے توں مَیں ایہہ سکھیا اے کہ یہوواہ ہر اوس بندے نُوں معاف کردا اے جیہڑا دلوں توبہ کردا اے۔“‏ اَسی ایس گل دا یقین رکھ سکنے آں کہ جے اَسی اپنیاں غلطیاں نُوں سدھاراں گے تے یہوواہ تے بھروسا کردے رہواں گے تے اوہ سانوں اپنی خدمت چ استمال کردا رہوے گا۔—‏زبور 86:‏5؛‏ امثال 28:‏13‏۔‏

19.‏ توانوں سمسون دی مثال توں کیہہ حوصلہ ملیا اے؟‏

¹⁹ ایس مضمون چ اَسی سمسون دی زندگی دے کجھ خاص واقعیاں تے غور کیتا۔ عیب دار ہون دے باوجود وی سمسون نے یہوواہ دی خدمت چ ہمت نئیں ہاری۔ بھانویں کہ اوہنے دلیلہ نال رشتہ جوڑ کے غلطی کیتی سی پر فیر وی اوہ یہوواہ نُوں خوش کرن دی کوشش کردا رہیا تے یہوواہ نے وی اوہدا ساتھ نئیں چھڈیا۔ یہوواہ نے اِک واری فیر اوہنوں بڑے زبردست طریقے نال استمال کیتا۔اوہدی نظر چ سمسون حالے‌وی اِک ایہو جیہا انسان سی جدا ایمان بڑا مضبوط سی۔ ایس لئی اوہنے عبرانیوں 11 باب چ اپنے وفادار بندیاں دی لسٹ چ اوہدا ناں وی لکھوایا۔ سانوں ایہہ جان کے کِنّی تسلی مِلدی اے کہ اَسی اپنے اسمانی باپ یہوواہ دی خدمت کرنے آں جیہڑا سانوں بڑا پیار کردا اے تے سانوں طاقت دین دی خواہش رکھدا اے؛ خاص کر اوہدوں، جدوں اَسی مشکلاں دی وجہ توں ٹُٹیا ہویا محسوس کرنے آں۔ آؤ، سمسون وانگوں اَسی وی یہوواہ کولوں اِلتجا کریئے کہ اَے یہوواہ، مینوں یاد کر تے مینوں زور بخش۔—‏قضاۃ 16:‏28‏۔‏