1.‏ ساڈے کم دی تھاں تے یاں سکول چ ساڈے کولوں کیہو جہے سوال پچھے جا سکدے نیں؟‏

 جدوں کم دی تھاں تے یاں تواڈے سکول چ تواڈے کولوں تواڈے عقیدیاں بارے سوال کیتا جاندا اے تے توانوں کیہو جیہا لگدا اے؟ کیہہ تُسی گھبرا جاندے او؟ ساڈے وچوں زیادہ‌تر دے نال اِنج ای ہوندا اے۔ پر ایہو جہے سوالاں دی وجہ توں سانوں ایہہ پتہ لگدا اے کہ دُوجیاں دی سوچ تے عقیدے کیہہ نیں تے اِنج سانوں اوہناں نُوں خوشخبری دا پیغام سُنان دا موقع مِلدا اے۔ کدی کدار کوئی بندہ ساڈے کولوں ایس لئی سوال پچھدا اے کیونکہ اوہ ساڈے نال بحث کرنا چاہندا اے۔ اِنج اکثر ایس لئی ہوندا اے کیونکہ لوکاں نے ساڈے عقیدیاں بارے جھوٹھیاں گلاں سُنیاں ہوندیاں نیں۔ (‏اعمال 28:‏22‏)‏ ایہدے علاوہ اَسی آخری زمانے چ رہ رہے آں جدے چ زیادہ‌تر لوک ضدی، ایتھوں تک کہ وحشی نیں۔—‏2-‏تیمُتھیُس 3:‏1،‏ 3‏۔‏

2.‏ سانوں نرم‌مزاج کیوں بننا چاہی دا اے؟‏

² شاید تُسی سوچو کہ ”‏مَیں اوس ویلے وی پر سکون کیویں رہ سکنا واں تے سمجھداری نال کم کیویں لے سکنا واں جدوں لوک میرے عقیدیاں دی وجہ توں میرے نال بحث کرن دی کوشش کردے نیں؟“‏ اِنج کرن چ کیہڑی چیز تواڈی مدد کرے گی؟ نرم‌مزاجی۔ جیہڑا بندہ نرم‌مزاج ہوندا اے، اوہ فوراً غصے چ نئیں آندا سگوں اوہ اوس ویلے وی پر سکون رہندا اے جدوں لوک اوہنوں غصہ دَواندے نیں یاں اوہنوں نئیں پتہ ہوندا کہ اوہ دُوجیاں دے سوالاں دا جواب کیویں دے سکدا اے۔ (‏امثال 16:‏32‏)‏ شاید تُسی سوچو کہ اِنج کہنا تے بڑا اسان اے پر کرنا مشکل۔ تے فیر تُسی اپنے اندر نرم‌مزاجی دی خوبی کیویں پیدا کر سکدے او؟ تُسی اوس ویلے دُوجیاں نُوں نرمی نال جواب کیویں دے سکدے او جدوں اوہ تواڈے عقیدیاں دی وجہ توں تواڈے نال بحث کرن دی کوشش کردے نیں؟ جے تُسی ماں پیو او تے تُسی اپنے بچیاں دی ایہہ سکھن چ کیویں مدد کر سکدے او کہ اوہ اوہناں سوالاں دا جواب نرمی نال دین جیہڑے اوہناں دے عقیدیاں بارے پچھے جاندے نیں؟ آؤ، ایہناں سوالاں تے غور کرنے آں۔‏

3.‏ ایہہ کیوں کہیا جا سکدا اے کہ نرم‌مزاجی کوئی کمزوری نئیں سگوں طاقت اے؟ (‏2-‏تیمُتھیُس 2:‏24، 25‏)‏

³ نرم‌مزاجی کمزوری نئیں سگوں طاقت اے۔ مشکل صورتحال چ پر سکون رہن لئی بڑی ہمت دی لوڑ  ہوندی اے۔ نرم‌مزاجی دی خوبی روح دے پھل چ شامل اے۔ (‏گلتیوں 5:‏22، 23‏)‏ جیہڑے یونانی لفظ دا ترجمہ ”‏نرم‌مزاجی“‏ کیتا گیا اے، اوہ کدی کدار کسے ایہو جہے جنگلی گھوڑے لئی وی استمال ہوندا اے جنہوں قابو چ کر کے پالتو بنایا جاندا اے۔ ذرا اِک جنگلی گھوڑے بارے سوچو جیہڑا پہلے بے قابو ہوندا سی پر پالتو بنن توں بعد اوہ بڑا پر سکون ہو جاندا اے۔ اِنج کرن نال اوہدی طاقت چ کوئی کمی نئیں آندی۔ ایسے طرحاں اَسی اپنے اندر نرم‌مزاجی دی خوبی نُوں پیدا کرن دے نال نال مضبوط کیویں بنے رہ سکنے آں؟ ایہہ کم اَسی اپنی طاقت نال نئیں کر سکدے سگوں ایہدے لئی سانوں دُعا چ یہوواہ کولوں اوہدی پاک روح منگن دی لوڑ اے۔ نرم‌مزاج بننا ممکن اے کیونکہ بوہت سارے لوکاں نے اپنے اندر ایس خوبی نُوں پیدا کیتا اے۔ ساڈے بوہت سارے بھین بھراواں نے اوس ویلے نرم‌مزاجی نال کم لیا جدوں لوکاں نے اوہناں دے عقیدیاں بارے اوہناں نال بحث کرن دی کوشش کیتی۔ اوہناں دی نرم‌مزاجی نُوں ویکھ کے دُوجے لوکاں دی یہوواہ دے گواہواں بارے سوچ بدل گئی۔ ‏(‏2-‏تیمُتھیُس 2:‏24، 25 نُوں پڑھو۔)‏ تُسی نرم‌مزاجی نُوں اپنی طاقت کیویں بنا سکدے او؟‏

4.‏ اَسی نرم‌مزاج بنن بارے اِضحاق توں کیہہ سکھ سکنے آں؟‏

⁴ بائبل دے کئی واقعیاں توں پتہ چلدا اے کہ نرم‌مزاجی دی خوبی کِنّی اہم اے۔ ذرا اِضحاق دی مثال تے غور کرو۔ جدوں اوہ فلستین دے علاقے جرار چ رہ رہیا سی تے اوہدے گوانڈھی اوہدے کولوں سڑن لگ پئے تے اوہناں نے اوہناں کھوواں نُوں بند کر دِتا جیہڑے اوہدے پیو دے نوکراں نے کھودے سن۔ اپنے حق لئی لڑن دی بجائے اِضحاق اپنے گھر بار سمیت کسے ہور علاقے چ چلا گیا تے اوتھے جا کے اوہنے نویں کھوہ کھدوائے۔ (‏پیدایش 26:‏12-‏18‏)‏ پر فلستی فیر ایہہ کہن لگ پئے کہ ایہناں کھوواں دا پانی وی اوہناں دا اے۔ ایہناں گلاں دے باوجود وی اِضحاق نے صلح صفائی نال کم لیا۔ (‏پیدایش 26:‏19-‏25‏)‏ کیس چیز نے نرمی نال کم لین چ اِضحاق دی مدد کیتی؟ یقیناً اوہنے اپنے ماں پیو نُوں نرم‌مزاجی نال کم لیندیاں ویکھیا ہوئے گا۔ اوہنے اپنے پیو ابراہام دی صلح‌پسندی تے اپنی ماں سارہ دے چنگے چال‌چلن تے رویے توں بوہت کجھ سکھیا ہوئے گا۔—‏1-‏پطرس 3:‏4-‏6؛‏ پیدایش 21:‏22-‏34‏۔‏

5.‏ اِک مثال دے کے دَسو کہ ماں پیو اپنے بچیاں نُوں نرم‌مزاج بننا سکھا سکدے نیں۔‏

⁵ ماں پیو، ایس گل دا یقین رکھو کہ تُسی وی اپنے بچیاں نُوں نرم‌مزاج بننا سکھا سکدے او۔ ذرا میک‌سنس دی مثال تے غور کرو جدی عمر 17 سال اے۔ اوہنوں سکول چ تے مُنادی کردے ویلے کجھ ایہو جہے لوک مِلدے سن جیہڑے بوہت غصہ کردے سن۔ میک‌سنس دے ماں پیو نے اوہنوں بڑے پیار تے صبر نال ایہہ سکھایا کہ اوہ اپنے اندر نرم‌مزاجی کیویں پیدا کر سکدا اے۔ اوہدے ماں پیو نے کہیا:‏ ”‏میک‌سنس ہُن ایہہ گل سمجھ گیا اے کہ کسے نُوں غصے نال جواب دینا بڑا اسان اے پر اصل چ بہادری ایہہ وے کہ اَسی اپنے غصے تے قابو رکھیئے۔“‏ خوشی دی گل اے کہ میک‌سنس نے ہُن نرم‌مزاجی نال کم لینا سکھ لیا اے۔‏

6.‏ نرم‌مزاجی نال کم لین چ دُعا ساڈی مدد کیویں کر سکدی اے؟‏

⁶ اَسی اوس ویلے کیہہ کر سکنے آں جدوں لوک سانوں غصہ دَوان لئی یہوواہ تے بائبل بارے بھیڑیاں گلاں کردے نیں؟ اَسی یہوواہ کولوں پاک روح تے سمجھ‌داری منگ سکنے آں تاکہ اَسی نرم‌مزاجی نال کم لے سکئے۔ پر جے بعد چ سانوں محسوس ہوندا اے کہ اَسی اونی نرمی نال جواب نئیں دِتا جیویں سانوں دینا چاہی دا سی تے اَسی کیہہ کر سکنے آں؟ اَسی فیر توں یہوواہ کولوں ایس معاملے بارے دُعا کر سکنے آں تے سوچ سکنے آں کہ اَسی اگلی وار کسے نُوں ہور نرمی نال جواب کیویں دے سکنے آں۔ فیر یہوواہ سانوں اپنی پاک روح دَوے گا تاکہ اَسی اپنے غصے نُوں قابو چ رکھ سکئے تے نرم‌مزاجی نال کم لے سکئے۔‏

7.‏ کجھ ایتاں نُوں یاد کرن نال سانوں اپنے غصے تے قابو رکھن چ کیویں مدد ملے گی؟ (‏امثال 15:‏1،‏ 18‏)‏

⁷ بائبل دِیاں کجھ ایتاں ساڈی بوہت مدد کر سکدیاں نیں تاکہ اَسی مشکل صورتحال چ نرمی نال دُوجیاں نال گل کر سکئے۔ جے اَسی ایہہ ایتاں یاد کیتیاں ہون گیاں تے ضرورت پین تے پاک روح ایہہ ایتاں سانوں یاد دَوا سکدی اے۔ (‏یوحنا 14:‏26‏)‏ مثال لئی، امثال دی کتاب چ لکھے اصول نرم‌مزاجی نال کم لین چ ساڈی بوہت مدد کر سکدے نیں۔ ‏(‏امثال 15:‏1،‏ 18 نُوں پڑھو۔)‏ ایس کتاب چ ایہہ وی دَسیا گیا اے کہ اپنے غصے تے قابو رکھن نال کیہڑے فائدے ہوندے نیں۔—‏امثال 10:‏19؛‏ 17:‏27؛‏ 21:‏23؛‏ 25:‏15‏۔‏

8.‏ سانوں ایس گل تے کیوں غور کرنا چاہی دا اے کہ کسے بندے نے کوئی سوال کیوں پچھیا اے؟‏

⁸ جدوں اَسی دُوجیاں نُوں سمجھن دی کوشش کرنے آں تے سانوں نرم‌مزاجی ظاہر کرن چ مدد مل سکدی اے۔ (‏امثال 19:‏11‏)‏ جیہڑا بندہ دُوجیاں نُوں سمجھن دی کوشش کردا اے، اوہ اوس ویلے وی اپنے جذبات تے قابو رکھدا اے جدوں دُوجے اوہدے عقیدیاں تے سوال چُک‌دے نیں۔ کدی کدار جدوں لوک ساڈے کولوں کوئی سوال پچھدے نیں تے سانوں نئیں پتہ ہوندا کہ اوہناں نے ایہہ سوال کیوں پچھیا اے۔ ایس لئی کسے بندے نُوں کوئی وی جواب دین توں پہلاں سانوں ایہہ گل یاد رکھنی چاہی دی اے کہ اَسی نئیں جان‌دے کہ اوہدے دل چ کیہہ اے۔—‏امثال 16:‏23‏۔‏

9.‏ جدعون نے اِفرائیم دے لوکاں نُوں جواب دیندے ویلے سمجھ‌داری تے نرمی کیویں وکھائی؟‏

⁹ ذرا غور کرو کہ جدعون نے اِفرائیم دے لوکاں نُوں کیویں جواب دِتا۔ اوہناں نے بڑے غصے نال جدعون نُوں پچھیا کہ جدوں اوہ بنی‌اِسرائیل دے دُشمناں نال لڑن لئی جا رہیا سی تے اوہ اوہناں نُوں اپنے نال کیوں نئیں لے کے گیا۔ اوہناں دے غصے دی کیہہ وجہ سی؟ شاید اوہناں نُوں ایہہ گل بڑی بُری لگی سی۔ وجہ بھانویں جو وی سی، جدعون نے اوہناں دے احساسات دا  خیال رکھیا تے بڑی نرمی نال اوہناں نُوں جواب دِتا۔ ایہدا کیہہ فائدہ ہویا؟ اوہناں دا غصہ ٹھنڈا ہو گیا۔—‏قضاۃ 8:‏1-‏3‏۔‏

10.‏ جدوں کوئی ساڈے عقیدیاں بارے سوال پچھدا اے تے کیہڑی چیز اوہناں نُوں نرمی نال جواب دین چ ساڈی مدد کردی اے؟ (‏1-‏پطرس 3:‏15‏)‏

¹⁰ شاید کم دی تھاں تے یاں سکول چ ساڈے کولوں کوئی ایہہ سوال پچھے کہ اَسی بائبل دے معیاراں مطابق کیوں چلنے آں۔ اَسی اوہناں نُوں ایہہ سمجھان دی پوری کوشش کرنے آں کہ ساڈی نظر چ بائبل دے معیار سب توں بہترین کیوں نیں۔ پر ایہدے نال نال اَسی اوہناں دی رائے لئی احترام وی ظاہر کرنے آں۔ ‏(‏1-‏پطرس 3:‏15 نُوں پڑھو۔)‏ جدوں کوئی بندہ ساڈے کولوں سوال پچھدا اے تے سانوں ایہہ نئیں سوچنا چاہی دا کہ اوہ ساڈے عقیدیاں تے اِعتراض کر رہیا اے سگوں سانوں ایس گل تے دھیان دینا چاہی دا اے کہ ایہدی وجہ توں سانوں اوہدی سوچ نُوں جانن دا موقع مل رہیا اے۔ بھانویں کوئی ساڈے عقیدیاں بارے کسے وی وجہ توں سوال پچھے، سانوں پوری کوشش کرنی چاہی دی اے کہ اَسی اوہنوں نرمی تے عزت نال جواب دَئیے۔ شاید ساڈے جواب دی وجہ توں اوہ سوچے کہ کیہہ اوہدا نظریہ ٹھیک اے یاں نئیں۔ جے اوس بندے دا رویہ ایناں چنگا نئیں وی ہوندا تے فیر وی سانوں اوہدے نال نرمی نال پیش آنا چاہی دا اے۔—‏رومیوں 12:‏17‏۔‏

11، 12.‏ (‏الف)‏ کسے مشکل سوال دا جواب دین توں پہلاں سانوں کیہڑیاں گلاں تے غور کرنا چاہی دا اے؟ (‏تصویر نُوں وی ویکھو۔)‏ (‏ب)‏مثال دے کے دَسو کہ جدوں کوئی بندہ ساڈے کولوں سوال پچھدا اے تے اِنج ساڈے لئی اوہدے نال گل کرنا کیویں اسان ہو جاندا اے۔‏

¹¹ جے ساڈے نال کم کرن والا کوئی بندہ سانوں پچھدا اے کہ اَسی سالگرہ کیوں نئیں مناندے تے سوچو:‏ کیہہ اوہنوں ایہہ تے نئیں لگ رہیا کہ پتہ نئیں سانوں دُوجیاں نال تفریح کرن دی اجازت ہے وے یاں نئیں؟ یاں شاید اوہ ایہہ تے نئیں سوچ رہیا کہ جے اَسی سالگرہ نئیں مناواں گے تے ساڈے کم دی تھاں تے ماحول خراب ہو جائے گا؟ سب توں پہلاں اَسی اوہدی ایس گل دی تعریف کر سکنے آں کہ اوہنوں اپنے نال کم کرن والے لوکاں دی بوہت فکر اے۔ فیر اَسی اوہنوں ایس گل دا یقین دَوا سکنے آں کہ اَسی وی ایہہ چاہنے آں کہ کم دی تھاں تے ماحول چنگا رہوے۔ اِنج اَسی اوہنوں اِک اچھے ماحول چ ایہہ دَس سکاں گے کہ بائبل توں سالگرہ بارے کیہہ پتہ چلدا اے۔‏

¹² اَسی اوس ویلے وی اِنج ای کر سکنے آں جدوں ساڈے کولوں کوئی ہور مشکل سوال پچھیا جاندا اے۔ مثال لئی، شاید سکول چ کوئی ساڈے نال بحث کرے کہ یہوواہ دے گواہواں نُوں ہم‌جنس پرستی بارے اپنی سوچ نُوں بدلن دی لوڑ اے۔ سانوں سوچنا چاہی دا اے کہ کیہہ اوہ بندہ ایس لئی اِنج کیہہ رہیا اے کیونکہ اوہنوں نئیں پتہ کہ اَسی ہم‌جنس پرستی بارے کیہہ مننے آں؟ یاں کیہہ اوہ ایس لئی تے نئیں اِنج کیہہ رہیا کیونکہ اوہدے دوستاں یاں رشتے‌داراں وچوں کوئی ہم‌جنس پرست اے؟ کیہہ اوہنوں ایہہ لگدا اے کہ اَسی ہم‌جنس پرستاں نال نفرت کرنے آں؟ شاید سانوں اوہنوں ایہہ یقین دَوانا پووے کہ اَسی سارے لوکاں نال پیار کرنے آں تے اَسی ایہہ مننے آں کہ ہر بندے نُوں اپنے لئی فیصلہ کرن دا حق اے۔‏ b (‏1-‏پطرس 2:‏17‏)‏ اِنج کرن نال شاید سانوں اوہنوں ایہہ دَسنا اسان لگے کہ بائبل دے اصولاں تے عمل کرن نال سانوں کیہہ فائدہ ہو سکدا اے۔‏

13.‏ تُسی اِک ایہو جہے بندے دی مدد کیویں کر سکدے او جیہڑا سوچدا اے کہ خدُا تے ایمان رکھنا بے‌وقوفی اے؟‏

¹³ جے کوئی بندہ اپنے عقیدیاں تے بوہت پکا اے تے کسے ہور نظریے نُوں منن لئی تیار نئیں اے تے سانوں ایہہ نئیں سوچنا چاہی دا کہ سانوں پوری طرحاں پتہ اے کہ اوہ کیہہ من دا اے۔ (‏طِطُس 3:‏2‏)‏ مثال لئی، جے تواڈے نال سکول چ پڑھن والا کوئی بچہ توانوں کہندا اے کہ خدا تے ایمان رکھنا بے‌وقوفی اے تے کیہہ توانوں ایہہ من لینا چاہی دا اے کہ اوہ اِرتقا تے ایمان رکھدا اے تے ایہدے بارے بوہت کجھ جان‌دا اے؟ ہو سکدا اے کہ اوہ تواڈے نال اوہی گلاں کر رہیا اے جیہڑیاں اوہنے دُوجیاں کولوں سُنیاں نیں۔ اوہدے نال بحث کرن دی بجائے تُسی کوئی ایہو جہی گل کہہ سکدے او جدے بارے اوہ بعد چوں سوچے۔ شاید تُسی اوہنوں jw.org تے تخلیق بارے کوئی معلومات وکھا سکدے او۔ ہو سکدا اے کہ بعد چوں اوہ کسے مضمون یاں ویڈیو تے تواڈے نال گل کرنا چاہوے۔ جدوں اَسی دُوجیاں  دے نظریے لئی احترام ظاہر کرنے آں تے شاید اوہ بائبل چوں ہور گلاں وی سکھنا چاہن۔‏

14.‏ نیل نے ساڈی ویب‌سائٹ دے ذریعے اپنی کلاس دے اِک مُنڈے دی ایہہ سمجھن چ مدد کیویں کیتی کہ لوک یہوواہ دے گواہواں بارے جو سوچدے نیں، اوہ صحی نئیں اے؟‏

¹⁴ اِک نوجوان گواہ جدا ناں نیل اے؛ اوہنے ساڈی ویب‌سائٹ دے ذریعے اپنی کلاس دے اِک مُنڈے دی ایہہ سمجھن چ مدد کیتی کہ لوک یہوواہ دے گواہواں بارے جو سوچدے نیں، اوہ صحی نئیں اے۔ اوہ کہندا اے:‏ ”‏میری کلاس چ اِک مُنڈا اکثر مینوں ایہہ کہندا سی کہ تُوں سائنس تے یقین رکھن دی بجائے بائبل تے بھروسا کرنا ایں جدے چ بس قصے کہانیاں نیں۔“‏ جدوں نیل نے اوس مُنڈے نُوں اپنے عقیدیاں بارے دَسن دی کوشش کیتی تے اوہنے اوہدی گل نئیں سُنی۔ فیر نیل نے اوہنوں ساڈی ویب‌سائٹ jw.org تے حصہ ”‏سائنس تے بائبل‏“‏ وکھایا۔ بعد چوں نیل نُوں محسوس ہویا کہ اوس مُنڈے نے اوس حصے چ دِتی گئی معلومات پڑھی سی تے ہُن اوہ ایس بارے گل کرن لئی تیار سی کہ زندگی دی شروعات کیویں ہوئی۔ جدوں تُسی ساڈی ویب‌سائٹ دا چنگا استمال کرو گے تے شاید توانوں وی ایہو جہے چنگے نتیجے ویکھن نُوں مِلن گے۔‏

15.‏ ماں پیو اپنے بچیاں نُوں اوہناں لوکاں نُوں نرمی نال جواب دینا کیویں سکھا سکدے نیں جیہڑے اوہناں دے عقیدیاں تے سوال چُک‌دے نیں؟‏

¹⁵ ماں پیو اپنے بچیاں نُوں سکھا سکدے نیں کہ اوہ کیویں اوہناں لوکاں نُوں نرمی نال جواب دے سکدے نیں جیہڑے اوہناں دے عقیدیاں تے سوال چُک‌دے نیں۔ (‏یعقوب 3:‏13‏)‏ کجھ ماں پیو خاندانی عبادت چ اپنے بچیاں نال مل کے مشق کردے نیں۔ اوہ ایہو جہے موضوع چُن‌دے نیں جنہاں بارے سکول چ سوال کیتا جا سکدا اے۔ اوہ ایہناں موضوعاں تے اپنے بچیاں نال گل بات کردے نیں تے منظر کر کے وکھاندے نیں کہ اوہ دوجیاں نُوں نرمی تے سمجھ‌داری نال جواب کیویں دے سکدے نیں۔—‏بکس ‏”‏ مشق کرنا بڑا فائدہ‌مند ہو سکدا اے‏“‏ نُوں ویکھو۔‏

16، 17.‏ مشق کرن نال بچیاں نُوں کیویں فائدہ ہوندا اے؟‏

¹⁶ مشق کرن نال بچیاں نُوں مدد مِلدی اے کہ اوہ اپنے عقیدیاں تے  اپنے ایمان نُوں ہور مضبوط کر سکن تے دُوجیاں نُوں ایہناں بارے چنگی طرحاں دَس سکن۔ jw.org تے مضموناں دے سلسلے ”‏نوجواناں دے سوال‏“‏ چ بوہت سارے ایہو جہے مضمون دِتے گئے نیں جنہاں دے ذریعے نوجوان اپنے عقیدیاں تے اپنے ایمان نُوں ہور مضبوط کر سکدے نیں تے دُوجیاں نُوں جواب دین لئی تیاری کر سکدے نیں۔ اِک خاندان دے طور تے ایہناں مضموناں تے گل بات کرن نال اَسی سارے سکھ سکنے آں کہ اَسی نرمی نال دُوجیاں نُوں اپنے عقیدیاں بارے کیویں دَس سکنے آں۔‏

¹⁷ اِک نوجوان جدا ناں میتھیو اے، اوہنے دَسیا کہ مشق کرن نال اوہنوں کیویں مدد ملی اے۔ میتھیو تے اوہدے ماں پیو خاندانی عبادت دے دوران مل کے ایہو جہے موضوعاں تے تحقیق کردے نیں جنہاں تے میتھیو دی کلاس چ گل بات کیتی جا سکدی اے۔ میتھیو نے کہیا:‏ ”‏اَسی ایہو جہے سوالاں بارے سوچن دی کوشش کرنے آں جیہڑے سکول چ میرے کولوں پچھے جا سکدے نیں۔ فیر اَسی جیہڑی تحقیق کیتی ہوندی اے، اوہدے ذریعے اَسی چنگی طرحاں جواب دین دی مشق کرنے آں۔ جدوں میرے ذہن چ ایہہ گل واضح ہو جاندی اے کہ اَسی کسے عقیدے نُوں کیوں مننے آں تے میرا اعتماد وَدھدا اے تے میرے لئی دُوجیاں نُوں نرمی نال جواب دینا زیادہ اسان ہوندا اے۔“‏

18.‏ کُلسّیوں 4:‏6 توں سانوں کیہڑی گل دی اہمیت دا پتہ چلدا اے؟‏

¹⁸ بھانویں اَسی اپنی گل نُوں جِنّی وی چنگی طرحاں سمجھائیے، پر فیر وی کجھ لوک ایہنوں قبول نئیں کرن گے۔ پر جے اَسی لوکاں نال سمجھ‌داری تے نرمی نال گل کراں گے تے ایہدا بڑا فائدہ ہوئے گا۔ ‏(‏کُلسّیوں 4:‏6 نُوں پڑھو۔)‏ دُوجیاں نال اپنے عقیدیاں بارے گل کرنا بالکل اِنج ای اے جیویں اَسی اوہناں وَل کوئی گیند سُٹ رہے ہوئیے۔ ایہہ ساڈے تے وے کہ اَسی اوہ گیند آرام نال سٹاں گے یاں زور نال۔ جے اَسی آرام نال گیند نُوں سٹاں گے تے اگلا بندہ ایہنوں اسانی نال پھڑ سکے گا تے اِنج کھیڈ چلدا رہوے گا۔ ایسے طرحاں جے اَسی سمجھ‌داری تے نرمی نال گل کراں گے تے اگلا بندہ ساڈی گل سُنن لئی تیار ہو جائے گا تے گل بات چلدی رہوے گی۔ جے کوئی بندہ ساڈے نال بحث کرنا چاہندا اے یاں ساڈے عقیدیاں دا مذاق اُڈاندا اے تے اوہدے نال گل بات جاری رکھنا ضروری نئیں۔ (‏امثال 26:‏4‏)‏ پر شاید ایہو جہے لوک توانوں گھٹ ای مِلن، زیادہ تر لوک ساڈی گل سُنن لئی تیار ہو جاندے نیں۔‏

19.‏ دُوجیاں نُوں اپنے عقیدیاں بارے جواب دیندے ویلے سانوں نرمی نال کم کیوں لینا چاہی دا اے؟‏

¹⁹ ایہہ گل صاف ظاہر اے کہ جدوں اَسی نرم‌مزاجی نال کم لینا سکھ لینے آں تے ایہدا بڑا فائدہ ہوندا اے۔ یہوواہ کولوں دُعا چ ہمت منگو تاکہ تُسی اوس ویلے نرمی نال کم لے سکو جدوں دُوجے تواڈے عقیدیاں تے سوال چُک‌دے نیں یاں تواڈے تے اعتراض کردے نیں۔ ایہہ گل یاد رکھو کہ جے تُسی نرمی نال کم لوَو گے تے گل بات بحث چ بدلن توں بچ جائے گی۔ جدوں اَسی نرمی تے عزت نال کسے نُوں جواب دَواں گے تے شاید اوہدی ساڈے بارےتے بائبل بارے سوچ بدل جائے۔ لوکاں نُوں اپنے عقیدیاں بارے جواب دین لئی ہر ویلے تیار رہوو پر اِنج کردے ویلے نرمی تے عزت وکھاؤ۔ (‏1-‏پطرس 3:‏15‏)‏ ایہہ گل واقعی سچ اے کہ نرم‌مزاجی کمزوری نئیں سگوں طاقت اے۔‏