1.‏ یوآس، عُزیاہ تے یوسیاہ نُوں کیہڑی مشکل ذمے‌داری چُکنی پئی؟‏

 ذرا سوچو کہ جے توانوں چھوٹی عمر چ ای خدا دی قوم دا حکمران بنایا جاندا تے توانوں کیہو جیہا لگدا؟ تُسی اپنی طاقت تے اِختیار نُوں کیویں استمال کردے؟ بائبل چ بوہت سارے ایہو جہے لوکاں بارے دَسیا گیا اے جیہڑے بوہت چھوٹی عمر چ یہوداہ دے بادشاہ بنے۔ مثال لئی، یوآس 7 سال دی عمر چ، عُزیاہ 16 سال دی عمر چ تے یوسیاہ 8 سال دی عمر چ بادشاہ بنیا۔ سوچو کہ اوہناں نُوں ایہہ کم کِنّاں مشکل لگیا ہوئے گا۔ بھانویں کہ ایہہ بڑی وڈی ذمے‌داری سی پر یہوواہ تے دُوجے کئی لوکاں نے اوہناں دی بڑی مدد کیتی تاکہ اوہ مشکلاں نُوں پار کر سکن تے بادشاہواں دے طور تے چنگے کم کر سکن۔‏

2.‏ سانوں یوآس، عُزیاہ تے یوسیاہ دی مثال تے کیوں غور کرنا چاہی دا اے؟‏

² اَسی بادشاہ یاں ملکہ تے نئیں آں پر فیر وی اَسی یوآس، عُزیاہ تے یوسیاہ دی زندگی توں بوہت کجھ سکھ سکنے آں۔ اوہناں نے چنگے فیصلیاں دے نال نال کجھ بھیڑے فیصلے وی کیتے۔ اوہناں دی مثال تے غور کرن نال اَسی ویکھاں گے کہ ایہہ کیوں ضروری اے کہ اَسی چنگے دوست بنائیے، خاکسار رہیے تے یہوواہ دی رہنمائی تے چلدے رہیے۔‏

3.‏ بادشاہ یوآس نے وڈے کاہن یہویدع دی چنگی تربیت دی وجہ توں کیہڑے فیصلے کیتے؟‏

³ یوآس وانگوں چنگے فیصلے کرو۔‏ جدوں یوآس چھوٹا ای سی تے اوہدے سر تے باپ دا سایہ نہ رہیا۔ ایس لئی وڈے کاہن یہویدع نے اوہنوں پالیا تے اوہنوں یہوواہ بارے سکھایا۔ یہویدع نے اوہدی اپنے پُتر وانگوں تربیت کیتی۔ تے یوآس نے وی بڑا چنگا فیصلہ کیتا کہ اوہ یہویدع دِیاں ہدیتاں تے عمل کرے گا۔ اوہنے آپ وی یہوواہ دی عبادت کرن دا فیصلہ کیتا تے دُوجیاں دی وی اِنج کرن چ مدد کیتی، ایتھوں تک کہ اوہنے ہیکل دی مرمت کران دا بندوبست وی کیتا۔—‏2-‏تواریخ 24:‏1، 2،‏ 4،‏ 13، 14‏۔‏

4.‏ یہوواہ دے حکماں نُوں منن نال سانوں کیویں فائدہ ہوندا اے؟ (‏امثال 2:‏1،‏ 10-‏12‏)‏

⁴ جے تواڈے ماں پیو یاں کوئی ہور تواڈی تربیت کر رہیا اے کہ تُسی یہوواہ دے معیاراں دے مطابق زندگی گزارو تے ایہہ تواڈے لئی اِک بڑی وڈی نعمت اے۔ ‏(‏امثال 2:‏1،‏ 10-‏12 نُوں پڑھو۔)‏ تواڈے ماں  پیو توانوں کئی طریقیاں نال تربیت دے سکدے نیں۔ ذرا غور کرو کہ اِک بھین جدا ناں کاتیا اے، اوہدے ابو نے اوہدی کیویں مدد کیتی کہ اوہ چنگے فیصلے کرے۔ ہر روز جدوں اوہدا ابو اوہنوں سکول چھڈن جاندا سی تے رستے چ اوہ اوہدے نال روزانہ دی ایت تے گل کردا سی۔ بھین کہندی اے:‏ ”‏ایس گل بات دی وجہ توں مینوں مدد ملدی سی کہ مَیں اوس دن دِیاں مشکلاں دا مقابلہ کر سکاں۔“‏ ہوسکدا اے کہ تواڈے ماں پیو بائبل دے مطابق گھر چ کجھ اصول بنان تے شاید توانوں لگے کہ اوہ تواڈے کولوں تواڈی آزادی کھو رہے نیں۔ کیہڑی چیز تواڈی مدد کرے گی کہ تُسی اوہناں دی گل منو؟ بھین اینستاسیا نُوں اَج وی یاد اے کہ جدوں اوہدے امی‌ابو کوئی اصول بناندے سن تے اوہ اوہنوں اوس اصول نُوں بنان دی وجہ وی دَسدے سن۔ اوہ کہندی اے:‏ ”‏ایس وجہ توں مَیں سمجھ سکی کہ میرے امی‌ابو نے ایہہ اصول میرے تے پابندیاں لان لئی نئیں سگوں ایس لئی بنائے نیں تاکہ مَیں محفوظ رہ سکاں۔“‏

5.‏ تواڈے کماں دا یہوواہ تے تواڈے ماں پیو اُتے کیہہ اثر پیندا اے؟ (‏امثال 22:‏6؛‏ 23:‏15،‏ 24، 25‏)‏

⁵ جدوں تواڈے ماں پیو توانوں بائبل چوں کوئی مشورہ دیندے نیں تے تُسی اوہدے تے عمل کردے او تے اوہناں نُوں بڑی خوشی ہوندی اے۔ سب توں ودھ کے تُسی یہوواہ نُوں خوش کردے او تے اوہدے نال تواڈی دوستی پکی ہو جاندی اے۔ ‏(‏امثال 22:‏6؛‏ 23:‏15،‏ 24، 25 نُوں پڑھو۔)‏ جدوں یوآس چھوٹا سی تے اوہنے وی اِنج ای کیتا۔ ایس وجہ توں اوہدی مثال تے عمل کرنا کِنّی چنگی گل ہوئے گی۔‏

6.‏ یہویدع دے مرن توں بعد یوآس کنہاں دی گل منن لگ پیا تے ایہدے کیہہ نتیجے نکلے؟ (‏2-‏تواریخ 24:‏17، 18‏)‏

⁶ یوآس دے بھیڑے فیصلیاں توں سبق سکھو۔‏ یہویدع دے مرن توں بعد یوآس نے بھیڑے دوست بنا لئے۔ ‏(‏2-‏تواریخ 24:‏17، 18 نُوں پڑھو۔)‏ اوہ یہوداہ دے ایہو جہے سرداراں دی گل منن لگ پیا جیہڑے یہوواہ نُوں پیار نئیں کردے سن۔ شاید تُسی وی کہوو کہ یوآس نُوں ایہناں لوکاں توں دُور رہنا چاہی دا سی۔ (‏امثال 1:‏10‏)‏ پر اوہنے اِنج نئیں کیتا سگوں اوہنے ایہناں بھیڑے مشورے دین والیاں دی سُنی۔ ایتھوں تک کہ جدوں اوہدی پھپھی دے پتر زکریاہ نے اوہنوں سمجھان دی کوشش کیتی تے اوہنے اوہنوں مروا دِتا۔ (‏2-‏تواریخ 24:‏20، 21؛‏ متی 23:‏35‏)‏ ایہہ کِنّاں وڈا گُناہ تے بے‌وقوفی سی۔ یوآس شروع چ تے یہوواہ دے نال چلیا پر افسوس دی گل اے کہ بعد چوں اوہنے یہوواہ توں مونہہ موڑ لیا تے اِک قاتل بن گیا۔ اخیر یوآس دے اپنے نوکراں نے ای اوہنوں مار دِتا۔ (‏2-‏تواریخ 24:‏22-‏25‏)‏ جے اوہ یہوواہ تے اوہناں لوکاں دی گل من‌دا رہندا جیہڑے اوہنوں پیار کردے سن تے اوہدی زندگی کِنّی فرق ہوندی۔ تُسی یوآس توں کیہہ سبق سکھ سکدے او؟‏

7.‏ توانوں کیہو جہے لوکاں نال دوستی کرنی چاہی دی اے؟ (‏تصویر نُوں وی ویکھو۔)‏

⁷ یوآس دے بھیڑے فیصلے توں اَسی اِک گل ایہہ سکھنے آں کہ سانوں ایہو جہے لوکاں نال دوستی کرنی چاہی دی اے جیہڑے یہوواہ نال محبت کردے نیں تے اوہنوں خوش کرنا چاہندے نیں کیونکہ اوہ ساڈی وی چنگے کم کرن چ مدد کرن گے۔ سانوں صرف اپنی عمر دے لوکاں نال دوستی نئیں  کرنی چاہی دی۔ یاد رکھو کہ یوآس عمر چ یہویدع توں بوہت چھوٹا سی پر فیر وی اوہناں دی آپس چ چنگی دوستی سی۔ دوست بناندے ویلے اپنے آپ کولوں ایہہ سوال پچھو:‏ ”‏کیہہ اوہ لوک یہوواہ تے ایمان مضبوط کرن چ میری مدد کردے نیں؟ کیہہ اوہ یہوواہ دے معیاراں دا احترام کردے نیں؟ کیہہ اوہ مینوں ہلاشیری دیندے نیں کہ مَیں یہوواہ دے معیاراں تے چلاں؟ کیہہ اوہ یہوواہ تے اوہدے کلام دِیاں سچائیاں بارے گل کردے نیں؟ کیہہ اوہ مینوں اوہی گل دَسدے نیں جیہڑی مَیں سُننا چاہنا واں یاں کیہہ اوہناں چ ایہہ دَسن دی ہمت ہے وے کہ مینوں کتھے بہتری لیان دی لوڑ اے؟“‏ (‏امثال 27:‏5، 6،‏ 17‏)‏ سچ تے ایہہ وے کہ توانوں ایہو جہے دوستاں دی کوئی لوڑ نئیں جیہڑے یہوواہ نُوں پیار نئیں کردے۔ پر جے تواڈے ایہو جہے دوست ہے نیں جیہڑے یہوواہ نُوں پیار کردے نیں تے اوہناں نُوں کدی نہ چھڈو کیونکہ اوہی تواڈے لئی چنگے دوست ثابت ہون گے۔—‏امثال 13:‏20‏۔‏

8.‏ جے اَسی سوشل میڈیا استمال کرنے آں تے سانوں کیہڑیاں گلاں دا خیال رکھنا چاہی دا اے؟‏

⁸ سوشل میڈیا دے ذریعے تُسی اپنے گھر والیاں تے دوستاں نال رابطے چ رہ سکدے او۔ پر کجھ لوک ایہنوں ایس لئی استمال کردے نیں تاکہ دُوجے اوہناں دِیاں تعریفاں کرن۔ اِنج کرن لئی اوہ سوشل میڈیا تے اپنیاں تصویراں تے ویڈیوز پاندے نیں جنہاں چ اوہ شو مار رہے ہوندے نیں کہ اوہناں نے کیہہ کجھ خریدیا اے تے کیہہ کجھ کر رہے نیں۔ جے تُسی سوشل میڈیا استمال کردے او تے اپنے آپ کولوں پچھو:‏ ”‏کیہہ مَیں ایہنوں ایس لئی استمال کرنا واں کہ دُوجے میریاں تعریفاں کرن؟ کیہہ مَیں دُوجیاں نُوں کوئی چنگی گل دَسنا چاہنا واں یاں اپنی شو مارنا چاہنا واں؟ کیہہ سوشل میڈیا دے ذریعے دُوجے لوکاں دی سوچ، گلاں تے کماں دا میرے تے اثر ہو رہیا اے؟“‏ بھائی ناتھن نار جیہڑے گورننگ باڈی دے ممبر سن، اوہناں نے کہیا:‏ ”‏کسے انسان نُوں خوش کرن دی کوشش نہ کروکیونکہ آخر چ تُسی کسے نُوں وی خوش نئیں کر سکو گے۔ ایہدی بجائے یہوواہ نُوں خوش کرن دی کوشش کروکیونکہ اِنج تُسی اوہناں ساریاں لوکاں نُوں خوش کر سکو گے جیہڑے یہوواہ نال پیار کردے نیں۔“‏

9.‏ یہوواہ نے عُزیاہ دی کیہہ کرن چ مدد کیتی؟ (‏2-‏تواریخ 26:‏1-‏5‏)‏

⁹ عُزیاہ وانگوں چنگے فیصلے کرو۔‏ جدوں عُزیاہ بادشاہ نوجوان سی تے اوہ بڑا خاکسار سی۔ اوہنے یہوواہ دا خوف مننا سکھیا تے یہوواہ نے اوہنوں اوہدی 68 سال دی زندگی چ بوہت ساریاں برکتاں دِتیاں۔ ‏(‏2-‏تواریخ 26:‏1-‏5 نُوں پڑھو۔)‏ عُزیاہ نے بوہت ساریاں قوماں نُوں جنگ چ ہرایا تے یروشلیم نُوں چنگی طرحاں محفوظ رکھن لئی بوہت سارے اِنتظام کیتے۔ (‏2-‏تواریخ 26:‏6-‏15‏)‏ واقعی عُزیاہ اوہناں کماں توں بوہت خوش سی جنہاں نُوں کرن چ یہوواہ نے اوہدی مدد کیتی سی۔—‏واعظ 3:‏12، 13‏۔‏

10.‏ عُزیاہ دا کیہہ انجام ہویا؟‏

¹⁰ عُزیاہ دے بھیڑے فیصلیاں توں سبق سکھو۔‏ بادشاہ عُزیاہ نُوں دُوجیاں نُوں ہدیتاں دین دی عادت سی۔ ایس لئی شاید اوہ ایہہ سوچن لگ پیا سی کہ اوہدا جو دل چاہوے، اوہ کر سکدا اے۔ اِک دن اوہ ہیکل چ گیا تے اوہنے غرور چ آ کے قربان‌گاہ تے بخور بالن دی کوشش کیتی۔ بادشاہواں نُوں ایہہ کم کرن دی اجازت نئیں سی۔ (‏2-‏تواریخ 26:‏16-‏18‏)‏ ایس لئی وڈے کاہن عزریاہ نے اوہنوں سمجھان دی کوشش کیتی پر عُزیاہ بوہت غصے چ آ گیا۔ افسوس دی گل اے کہ اوہنے یہوواہ دی نافرمانی کیتی جدی اوہنوں ایہہ سزا ملی کہ اوہنوں کوڑھ ہو گیا۔ (‏2-‏تواریخ 26:‏19-‏21‏)‏ جے بادشاہ عُزیاہ خاکسار رہندا تے اوہدی زندگی اِنج دی نہ ہوندی۔‏

11.‏ کیہڑیاں گلاں توں پتہ چلدا اے کہ اَسی خاکسار آں؟ (‏تصویر نُوں وی ویکھو۔)‏

¹¹ جدوں عُزیاہ کول اِختیار آ گیا تے اوہ ایہہ بُھل گیا کہ اوہدی طاقت تے کامیابی دے پچھے یہوواہ دا ہتھ اے۔ ایہدے توں اَسی کیہہ سکھنے آں؟ سانوں ایہہ گل یاد رکھنی چاہی دی اے کہ سانوں اپنی زندگی چ جیہڑیاں وی برکتاں ملیاں نیں یاں خدمت چ جیہڑیاں وی ذمے‌داریاں ملیاں نیں، اوہ یہوواہ وَلّوں نیں۔ سانوں اپنیاں کامیابیاں تے شیخی مارن دی بجائے ایہناں لئی یہوواہ دی وڈیائی کرنی چاہی دی اے۔‏ b (‏1-‏کُرنتھیوں 4:‏7‏)‏ سانوں خاکساری نال ایس گل نُوں تسلیم کرنا چاہی دا اے کہ اَسی عیب‌دار آں تے  سانوں اصلاح دی لوڑ ہوندی اے۔ اِک بھرا جدی عمر 60 سال توں زیادہ اے، اوہنے کہیا:‏ ”‏مَیں سکھیا اے کہ جدوں دُوجے مینوں میریاں غلطیاں بارے دَسدے نیں تے مَیں اوہناں دی گل نُوں دل تے نہ لوَاں۔ جدوں میری اصلاح کیتی جاندی اے تے مَیں اپنیاں غلطیاں نُوں سدھارن دی کوشش کرنا واں تے یہوواہ دی خدمت کردا رہنا واں۔“‏ جے اَسی یہوواہ دی گل مننے آں نالے خاکسار رہنے آں تے ساڈی زندگی خوشیاں نال بھر سکدی اے۔—‏امثال 22:‏4‏۔‏

12.‏ جدوں یوسیاہ نوجوان سی تے اوہنے یہوواہ نُوں جانن تے اوہدی مرضی تے چلن لئی کیہہ کیتا؟ (‏2-‏تواریخ 34:‏1-‏3‏)‏

¹² یوسیاہ وانگوں چنگے فیصلے کرو۔‏ یوسیاہ اوہدوں نوجوان ای سی جدوں اوہنے یہوواہ نال اپنے رشتے نُوں مضبوط کرنا شروع کیتا۔ اوہ یہوواہ بارے جاننا چاہندا سی تے اوہدی مرضی مطابق کم کرنا چاہندا سی۔ پر اِنج کرنا ایناں سوکھا نئیں سی کیونکہ اوس ویلے لوک جھوٹھے دیوتاواں دی عبادت کر رہے سن۔ ایس لئی یوسیاہ نُوں دلیر بنن دی لوڑ سی تاکہ اوہ لوکاں نُوں اِنج کرن توں روک سکے۔ تے اوہنے اِنج کیتا وی۔ 20 سال دے ہون توں پہلاں ای اوہنے پورے ملک چوں جھوٹھے دیوتاواں دی عبادت نُوں ختم کرنا شروع کر دِتا۔‏‏—‏2-‏تواریخ 34:‏1-‏3 نُوں پڑھو۔‏

13.‏ اپنی زندگی یہوواہ دے ناں کرن نال تواڈی زندگی چ کیہہ تبدیلی آئے گی؟‏

¹³ بھانویں کہ حالے تُسی چھوٹے او، فیر وی تُسی یوسیاہ وانگوں ایہہ فیصلہ کر سکدے او کہ تُسی یہوواہ تے اوہدیاں خوبیاں بارے ہور سکھو گے۔ اِنج کرن نال تواڈا دل کرے گا کہ تُسی اپنی زندگی یہوواہ دے ناں کر دَوو۔ ایس فیصلے دی وجہ توں تواڈی زندگی چ کیہہ تبدیلی آئے گی؟ لُوک جنہے 14 سال دی عمر چ بپتسمہ لیا اے، اوہ کہندا اے:‏ ”‏مَیں فیصلہ کیتا اے کہ ہُن توں مَیں یہوواہ دی خدمت نُوں اپنی زندگی چ سب توں زیادہ اہمیت دَواں گا تے اوہنوں خوش کرن دی کوشش کراں گا۔“‏ (‏مرقس 12:‏30‏)‏ ایہہ کِنّاں چنگا ہوئے گا کہ تُسی وی لُوک وانگوں یہوواہ دی خدمت کرن دی خواہش رکھو۔‏

14.‏ کجھ نوجوان بادشاہ یوسیاہ وانگوں مشکلاں دا مقابلہ کیویں کر رہے نیں؟‏

¹⁴ نوجوانو، یہوواہ دی خدمت کردیاں ہوئیاں توانوں کیہڑیاں مشکلاں دا سامنا ہو سکدا اے؟ جوہان جدا بپتسمہ 12 سال دی عمر چ ہویا، اوہ دَسدا اے کہ اوہدی کلاس دے بچے اوہدے تے الیکٹرانک سگریٹ پین دا دباؤ پاندے نیں۔ ایس دباؤ دا ڈٹ کے مقابلہ کرن لئی جوہان اپنے آپ نُوں یاد دواندا اے کہ جے اوہ الیکٹرانک سگریٹ پیوے گا تے اوہدی صحت وی خراب ہوئے گی تے یہوواہ نال اوہدی دوستی وی ٹُٹ جائے گی۔ ریچل جدا بپتسمہ 14 سال دی عمر چ ہویا، اوہ دَسدی اے کہ کیہڑی چیز اوہدی مدد کردی اے تاکہ اوہ سکول چ آن والیاں مشکلاں دا مقابلہ کر سکے۔ اوہ کہندی اے:‏  ‏”‏مَیں جو کجھ وی سکھنی آں، اوہنوں مَیں بائبل نال جوڑن دی کوشش کرنی آں۔ مثال لئی، جدوں اَسی تریخ بارے پڑھ رہے ہُنے آں تے میرے ذہن چ فوراً بائبل دا کوئی واقعہ یاں پیشین‌گوئی آندی اے۔ یاں جدوں مَیں کسے نال کوئی گل کر رہی ہنی آں تے مَیں بائبل دی کسے ایت بارے سوچنی آں جدے بارے مَیں اوہنوں دَس سکنی آں۔“‏ شاید تواڈیاں مشکلاں یوسیاہ دِیاں مشکلاں توں فرق ہون۔ پر تُسی اوہدے وانگوں سمجھ‌دار بن سکدے او تے یہوواہ دے وفادار رہ سکدے او۔ جے تُسی جوانی چ مشکلاں دا سامنا کرنا سکھ جاؤ گے تے فیر تُسی مستقبل چ آن والیاں مشکلاں دا وی ڈٹ کے مقابلہ کر سکو گے۔‏

15.‏ کیہڑی چیز نے یوسیاہ دی مدد کیتی کہ اوہ وفاداری نال یہوواہ دی خدمت کرے؟ (‏2-‏تواریخ 34:‏14،‏ 18-‏21‏)‏

¹⁵ جدوں یوسیاہ بادشاہ 26 سالاں دا سی تے اوہنے ہیکل دی مرمت شروع کرائی۔ ایس کم دے دوران یہوواہ دی شریعت دی کتاب ملی جیہڑی موسیٰ دے ذریعے دِتی گئی سی۔ جدوں یوسیاہ دے سامنے ایہہ کتاب پڑھی گئی تے اوہنے ایہدے چ لکھیاں گلاں مطابق عمل کرن لئی فوراً قدم چُکیا۔ ‏(‏2-‏تواریخ 34:‏14،‏ 18-‏21 نُوں پڑھو۔)‏ کیہہ تُسی چاہندے او کہ تُسی روز بائبل پڑھو؟ جے تُسی پہلاں توں ای اِنج کرن دی کوشش کر رہے او تے کیہہ توانوں بائبل پڑھن چ مزہ آ رہیا اے؟ کیہہ تُسی اپنے کول ایہو جہیاں ایتاں لکھدے او جنہاں توں توانوں مدد مل سکدی اے؟ لُوک جدا پہلے وی ذکر ہویا اے، اوہ اِک ڈائری چ اوہناں خاص خاص گلاں نُوں لکھ لیندا اے جیہڑیاں اوہنوں بائبل پڑھدے ویلے چنگیاں لگدیاں نیں۔ جے تُسی وی اِنج کرو گے تے شاید توانوں وی بائبل دِیاں ایتاں یاں اوہ گلاں یاد رکھنا اسان لگے گا جیہڑیاں تُسی بائبل پڑھدے ویلے سکھدے او۔ جِنّاں زیادہ تُسی بائبل بارے سکھو گے تے ایہدے نال لگاؤ رکھو گے، اونی ای زیادہ تواڈے دل چ یہوواہ دی خدمت کرن دی خواہش ودھے گی۔ تے فیر بادشاہ یوسیاہ وانگوں تُسی وی ایہدے چ لکھیاں گلاں تے عمل کرن دی کوشش کرو گے۔‏

16.‏ یوسیاہ نے اینی وڈی غلطی کیوں کیتی تے اَسی اوہدے توں کیہہ سکھنے آں؟‏

¹⁶ یوسیاہ دے بھیڑے فیصلیاں توں سبق سکھو۔‏ 39 سال دی عمر چ یوسیاہ نے اِک ایہو جہی غلطی کیتی جدی وجہ توں اوہ اپنی جان توں ہتھ دھو بیٹھیا۔ اوہنے یہوواہ کولوں رہنمائی منگن دی بجائے اپنے اُتے بھروسا کیتا۔ (‏2-‏تواریخ 35:‏20-‏25‏)‏ ایہدے توں اَسی اِک بڑا اہم سبق سکھنے آں۔ بھانویں ساڈی عمر جِنّی وی اے یاں سانوں بائبل دِیاں سچائیاں سکھدے ہوئیاں جِنّاں وی عرصہ ہو گیا اے، سانوں یہوواہ نال اپنے  رشتے نُوں مضبوط کردے رہنا چاہی دا اے۔ ایہدے چ ایہہ شامل اے کہ اَسی باقاعدگی نال دُعا چ اوہدے کولوں رہنمائی منگئے، اوہدے کلام دا مطالعیا کریئے تے تجربہ‌کار بھین بھراواں کولوں مشورے لئیے۔ اِنج کرن نال اَسی وڈیاں وڈیاں غلطیاں کرن توں بچ جاواں گے تے خوش رہ سکاں گے۔—‏یعقوب 1:‏25‏۔‏

17.‏ اَسی یہوداہ دے تِن بادشاہواں دی مثال توں کیہہ سکھیا اے؟‏

¹⁷ نوجوانی چ تواڈے کول بڑے زبردست کم کرن دے موقعے ہوندے نیں۔ یوآس، عُزیاہ تے یوسیاہ دی مثال توں پتہ چلدا اے کہ نوجوان چنگے فیصلے کر سکدے نیں تے اپنے کماں توں یہوواہ نُوں خوش کر سکدے نیں۔ سچ اے کہ اوہناں تِناں بادشاہواں کولوں کجھ ایہو جہیاں غلطیاں ہوئیاں جنہاں دے بڑے بھیڑے نتیجے نکلے۔ پر تُسی اوہناں دِیاں غلطیاں توں سبق سکھ سکدے او تے اوہناں دے چنگے کماں دی نقل کر سکدے او۔ اِنج کرن نال تواڈی زندگی خوشیاں نال بھر جائے گی۔‏

18.‏ کیہڑے لوکاں دِیاں مثالاں توں پتہ چلدا اے کہ اَسی خوشیاں بھری زندگی گزار سکنے آں؟ (‏تصویر نُوں وی ویکھو۔)‏

¹⁸ بائبل چ ہور وی ایہو جہے نوجواناں بارے دَسیا گیا اے جنہاں نے یہوواہ نال دوستی مضبوط کیتی، اوہدی خوشنودی حاصل کیتی تے ایس وجہ توں بڑی چنگی زندگی گزاری۔ داؤد وی ایہو جہے نوجواناں وچوں اِک سی۔ چھوٹی عمر چ ای اوہنے یہوواہ دے دوست بنن دا فیصلہ کیتا تے بعد چوں اوہ بادشاہ بن گیا۔ سچ اے کہ اوہدے کولوں کجھ غلطیاں وی ہوئیاں پر یہوواہ نے اوہدیاں غلطیاں نُوں نئیں سگوں اوہدی وفاداری نُوں یاد رکھیا۔ (‏1-‏سلاطین 3:‏6؛‏ 9:‏4، 5؛‏ 14:‏8‏)‏ جدوں تُسی داؤد دی زندگی بارے پڑھو گے تے توانوں وی ایہہ حوصلہ ملے گا کہ تُسی وفاداری نال یہوواہ دی خدمت کردے رہوو۔ ایہدے علاوہ، تُسی اپنے ذاتی مطالعے چ مرقس تے تیمُتھیُس بارے وی پڑھ سکدے او۔ اوہناں نے بڑی چھوٹی عمر چ یہوواہ دی خدمت کرنی شروع کیتی تے اوہ ساری زندگی اوہدے وفادار رہے۔ اوہناں دے ایس فیصلے دی وجہ توں اوہ یہوواہ نُوں وی خوش کر سکے تے آپ وی خوش رہے۔‏

19.‏ تواڈی زندگی اَگے چل کے کیہو جہی ہو سکدی اے؟‏

¹⁹ تواڈی زندگی اَگے چل کے کیہو جہی ہوئے گی، ایہدا اندازہ ایس گل توں لایا جا سکدا اے کہ تُسی اَج کیہو جہی زندگی گزار رہے او۔ جے تُسی اپنی سمجھ تے بھروسا کرن دی بجائے یہوواہ تے بھروسا کرو گے تے اوہ تواڈے قدماں دی رہنمائی کرے گا۔ (‏امثال 20:‏24‏)‏ تواڈی زندگی خوشیاں نال بھری ہوئے گی تے توانوں بوہت ساریاں برکتاں ملن گیاں۔ یاد رکھو کہ تُسی یہوواہ لئی جو کجھ کردے او، اوہ اوہدی بڑی قدر کردا اے۔ اپنی زندگی دا ایس توں ودھیا استمال ہورکیہہ ہو سکدا اے کہ تُسی ایہدے چ اپنے اسمانی باپ یہوواہ دی خدمت کرو!‏