1.‏ یسوع نے اپنے شاگرداں نُوں خاتمے دے وقت بارے کیہہ دَسیا نالے اوہناں نُوں کیہہ نصیحت کیتی؟‏

 یسوع دی موت توں کجھ دن پہلاں اوہدے شاگرداں وچوں چار نے اوہنوں پچھیا:‏ ”‏دُنیا دے آخری زمانے دی نشانی کیہہ ہوئے گی؟“‏ (‏متی 24:‏3‏)‏ شاید شاگرد ایہہ جاننا چاہ رہے سن کہ اوہناں نُوں ایہہ کیویں پتہ چل سکدا اے کہ یروشلیم تے ہیکل کدوں تباہ ہون گے۔ یسوع نے نہ صرف اوہناں نُوں یروشلیم تے ہیکل دی تباہی بارے دَسیا سگوں آخری زمانے دی نشانی بارے وی دَسیا یعنی اوس زمانے بارے جدے وچ اَج اَسی رہ رہے آں۔ دُنیا دے خاتمے بارے گل کر‌دے ہوئے یسوع نے کہیا:‏ اوس دن یاں گھڑی بارے کوئی نئیں جان دا۔ نہ اسمان دے فرشتے، نہ پُتر سگوں صرف باپ جان دا اے۔ فیر اوہنے شاگرداں نُوں نصیحت کیتی کہ اوہ اپنے ہوش قائم رکھن تے چوکس رہن۔—‏مرقس 13:‏32-‏37‏۔‏

2.‏ پہلی صدی دے مسیحیاں لئی چوکس رہنا کیوں ضروری سی؟‏

² پہلی صدی دے مسیحیاں لئی چوکس رہنا بوہت ضروری سی کیونکہ ایہدی وجہ توں ای اوہ اپنی جان بچا سکدے سن۔ یسوع مسیح نے اپنے پیروکاراں نُوں دَسیا سی کہ اوہ ایہہ اندازہ کیویں لا سکدے نیں کہ یروشلیم دی تباہی دا ویلا نیڑے آگیا اے۔ یسوع نے کہیا:‏ جدوں تُسی ویکھو کہ فوجاں نے یروشلیم نُوں گھیر لیا اے تے سمجھ جانا کہ اوہدی تباہی دا وقت نزدیک اے۔ اوس ویلے مسیحیاں لئی ضروری سی کہ اوہ یسوع دی نصیحت تے عمل کر‌دے تے پہاڑاں وَل بھج جاندے۔ (‏لُوقا 21:‏20، 21‏)‏ جیہڑے مسیحیاں نے یسوع دی ہدیت تے عمل کیتا، اوہ اوس ویلے بچ گئے جدوں رومی فوجاں نے یروشلیم نُوں تباہ کر دِتا۔‏

3.‏ ایس مضمون چ اَسی کیس بارے گل کر‌اں گے؟‏

³ اَج اَسی جیہڑی بُری دُنیا چ رہ رہے آں، اوہ بوہت چھیتی ختم ہون والی اے۔ ایس لئی سانوں اپنے  ہوش قائم رکھن تے چوکس رہن دی لوڑ اے۔ ایس مضمون چ اَسی ایس بارے گل کر‌اں گے کہ جدوں اَسی ویکھنے آں کہ ساڈے آلے دوالے دُنیا چ کیہہ کجھ ہو رہیا اے تے اَسی چوکس کیویں رہ سکنے آں۔ ایہدے علاوہ اَسی ایس بارے وی گل کر‌اں گے کہ اَسی اپنے طورطریقے تے چال‌چلن تے کیویں دھیان دے سکنے آں تے دُنیا دے خاتمے توں پہلاں اپنے وقت نُوں چنگی طرحاں کیویں استمال کر سکنے آں۔‏

4.‏ سانوں ایس گل تے غور کیوں کر‌نا چاہی دا اے کہ دُنیا چ ہون والے واقعیاں توں بائبل دِیاں پیشین‌گوئیاں کیویں پوریاں ہو رہیاں نیں؟‏

⁴ ایہو جہیاں بوہت ساریاں گلاں نیں جنہاں دی وجہ توں اَسی جاننا چاہنے آں کہ دُنیا چ ہون والے واقعیاں توں بائبل دِیاں پیشین‌گوئیاں کیویں پوریاں ہو رہیاں نیں۔ مثال لئی، یسوع نے سانوں کجھ خاص واقعیاں بارے دَسیا جیہڑے شیطان دی دُنیا دے ختم ہون توں پہلاں ہون گے۔ (‏متی 24:‏3-‏14‏)‏ پطرس رسول نے سانوں ہلاشیری دِتی کہ اَسی ایس گل تے دھیان دَئیے کہ پاک کلام دِیاں پیشین‌گوئیاں کیویں پوریاں ہو رہیاں نیں تاکہ ساڈا ایمان مضبوط ہوئے۔ (‏2-‏پطرس 1:‏19-‏21‏)‏ بائبل دی آخری کتاب ایہناں لفظاں نال شروع ہوندی اے:‏ یسوع مسیح وَلوں اِک مکاشفہ جیہڑا خدا نے اوہنوں دِتا تاکہ اوہ اپنے غلاماں نُوں اوہ گلاں وکھائے جیہڑیاں چھیتی ہون والیاں نیں۔ (‏مکاشفہ 1:‏1‏)‏ ایہناں گلاں دی وجہ توں اَسی جاننا چاہنے آں کہ دُنیا چ اَج کل کیہہ ہو رہیا اے تے ایہدے توں بائبل دِیاں پیشین‌گوئیاں کیویں پوریاں ہو رہیاں نیں۔ نالے ہوسکدا اے کہ ساڈا دل کر‌ے کہ اَسی دُوجیاں نال وی ایہناں بارے گل کر‌یئے۔‏

5.‏ سانوں کیہہ کر‌ن توں بچنا چاہی دا اے تے کیہہ کر‌نا چاہی دا اے؟ (‏تصویراں نُوں وی ویکھو۔)‏

⁵ جدوں اَسی بائبل دِیاں پیشین‌گوئیاں بارے گل کر رہے ہُنے آں تے سانوں اپنے کولوں ایہہ اندازے نئیں لانے چاہی دے کہ اَگے کیہہ ہوئے گا۔ پر کیوں؟ کیونکہ اَسی کوئی وی ایہو جہی گل نئیں کر‌نا چاہندے جدی وجہ توں کلیسیا چ تفرقے پیدا ہو جان۔ مثال لئی، شاید اَسی دُنیا دے سیاسی لیڈراں نُوں ایہہ کہندے سنئے کہ اوہ کسے مسئلے نُوں کیویں حل کر‌ن گے تے امن تے سلامتی کیویں لیان گے۔ اوہناں دِیاں ایہہ گلاں سُن کے سانوں ایہہ تکے نئیں لانے چاہی دے کہ ایہناں توں 1-‏تھسلُنیکیوں 5:‏3 چ لکھی پیشین‌گوئی پوری ہوندی اے۔ ایہدی بجائے سانوں ہر اوس نوِیں معلومات تے دھیان دینا چاہی دا اے جیہڑی یہوواہ دی تنظیم سانوں دیندی اے۔ جدوں اَسی ایس معلومات دے مطابق بھین بھراواں نال گل بات کر‌اں گے تے اِنج ساریاں دی سوچ تے رائے اِکو جہی رہوے گی تے اَسی اِک مُٹھ رہن چ کلیسیا دی مدد کر رہے ہونواں گے۔—‏1-‏کُرنتھیوں 1:‏10؛‏ 4:‏6‏۔‏

6.‏ 2-‏پطرس 3:‏11-‏13 توں اَسی کیہہ سکھنے آں؟‏

⁶ 2-‏پطرس 3:‏11-‏13 نُوں پڑھو۔‏ پطرس رسول نے ایہہ سمجھن چ ساڈی مدد کیتی کہ اَسی بائبل دِیاں پیشین‌گوئیاں تے غور کر‌دے ویلے سمجھداری نال کم کیویں لے سکنے آں۔ اوہنے کہیا کہ اَسی یہوواہ دے دن نُوں اُڈیکدے رہیے۔ پر سانوں اِنج کیوں کر‌نا چاہی دا اے؟ سانوں اِنج ایس لئی نئیں کر‌نا چاہی دا تاکہ اَسی اوس ”‏دن یاں گھڑی“‏ دا پتہ لا سکئے جدوں ہرمجِدّون شروع ہوئے گی سگوں سانوں ایس لئی اِنج کر‌نا چاہی دا اے تاکہ اَسی ہرمجِدّون دے آن توں پہلاں اپنے وقت نُوں چنگی طرحاں استمال کر‌دے ہوئے اپنا چال‌چلن پاک رکھئے تے خدا دی بندگی کر‌یئے۔ (‏متی 24:‏36؛‏ لُوقا 12:‏40‏)‏ دُوجے لفظاں چ اَسی کہہ سکنے آں کہ سانوں اپنا چال‌چلن پاک رکھنا چاہی دا اے تے اَسی یہوواہ دی خدمت چ جو کجھ کر‌نے آں، اوہدے توں ظاہر کر‌نا چاہی دا اے کہ اَسی اوہدے نال محبت کر‌نے آں۔ اِنج کر‌ن لئی ضروری اے کہ اَسی اپنے طورطریقے تے چال‌چلن تے دھیان دَئیے۔‏

7.‏ اَسی ایہہ کیویں ظاہر کر سکنے آں کہ اَسی اپنے طورطریقے تے چال‌چلن تے دھیان دے رہے آں؟ (‏لُوقا 21:‏34‏)‏

⁷ یسوع نے اپنے شاگرداں نُوں کہیا سی کہ اوہ نہ صرف دُنیا چ ہون والے واقعیاں تے سگوں اپنے طورطریقے تے چال‌چلن تے وی دھیان  دین۔ ایہہ گل اوس آگاہی توں صاف پتہ چلدی اے جیہڑی اوہنے لُوقا 21:‏34 چ اپنے شاگرداں نُوں دِتی سی۔ ‏(‏ایس ایت نُوں پڑھو۔)‏ غور کر‌و کہ یسوع نے کہیا:‏ ‏”‏دھیان دیندے رہوو۔“‏ جیہڑا بندہ اپنے چال‌چلن تے دھیان دیندا اے، اوہ اوہناں خطریاں توں خبردار رہندا اے جنہاں دی وجہ توں یہوواہ نال اوہدی دوستی ٹُٹ سکدی اے۔ اوہ ایہناں خطریاں توں بچن لئی قدم وی چُک دا اے۔ اِنج اوہ یہوواہ دی محبت چ قائم رہندا اے۔—‏امثال 22:‏3؛‏ یہوداہ 20، 21‏۔‏

8.‏ پولس رسول نے مسیحیاں نُوں کیہہ نصیحت کیتی؟‏

⁸ پولس رسول نے مسیحیاں نُوں نصیحت کیتی کہ اوہ اپنے چال‌چلن تے دھیان دین۔ مثال لئی، اوہنے اِفسس چ رہن والے مسیحیاں نُوں کہیا:‏ اپنے چال‌چلن تے کڑی نظر رکھو تاکہ تُسی بیوقوفاں وانگوں نئیں سگوں عقل‌منداں وانگوں زندگی گزارو۔ (‏اِفسیوں 5:‏15، 16‏)‏ شیطان یہوواہ نال ساڈی دوستی نُوں توڑن دی لگاتار کوشش کر رہیا اے۔ ایس لئی بائبل چ سانوں نصیحت کیتی گئی اے کہ اَسی یہوواہ دی مرضی نُوں سمجھن دی کوشش کر‌یئے تاکہ اَسی شیطان دے حملیاں توں اپنے آپ نُوں بچا سکئے۔—‏اِفسیوں 5:‏17‏۔‏

9.‏ اَسی یہوواہ دی مرضی نُوں کیویں سمجھ سکنے آں؟‏

⁹ بائبل چ سانوں ہر اوس خطرے بارے نئیں دَسیا گیا جدی وجہ توں یہوواہ نال ساڈی دوستی ٹُٹ سکدی اے۔ سانوں اکثر ایہو جہے معاملیاں بارے فیصلے کر‌نے پیندے نیں جنہاں بارے پاک کلام چ کوئی وی حکم صاف صاف نئیں دِتا گیا۔ ایس لئی چنگے فیصلے کر‌ن لئی ضروری ہوندا اے کہ اَسی یہوواہ دی مرضی نُوں سمجھئے۔ اِنج کر‌ن لئی سانوں ہر روز خدا دے کلام نُوں پڑھنا چاہی دا اے تے ایہدے تے سوچ‌وچار کر‌نی چاہی دی اے۔ جِنّاں زیادہ اَسی یہوواہ دی مرضی نُوں سمجھاں گے تے مسیح ورگی سوچ رکھاں گے، اوناں ای زیادہ اَسی عقل‌منداں وانگوں زندگی گزاراں گے۔ تے اوہدوں وی چنگے فیصلے کر سکاں گے جدوں سانوں بائبل چوں کسے معاملے بارے کوئی صاف حکم نئیں مِلدا۔ (‏1-‏کُرنتھیوں 2:‏14-‏16‏)‏ کجھ خطرے تے سانوں صاف صاف نظر آ جاندے نیں پر کجھ نُوں پچھاننا آسان نئیں ہوندا۔‏

10.‏ سانوں کیہڑے خطریاں توں بچنا چاہی دا اے؟‏

¹⁰ کجھ خطرے جنہاں توں سانوں بچنا چاہی دا اے اوہ ایہہ نیں:‏ دل‌لگی کر‌نا، حدوں ودھ شراب پینا یاں کھانا کھانا، دل دُکھان والیاں گلاں کر‌نا، مار کٹائی والیاں فلماں ویکھنا، گندیاں تصویراں تے ویڈیوز ویکھنا تے ایہو جہے ہور وی بوہت سارے کم۔ (‏زبور 101:‏3‏)‏ ساڈا دُشمن شیطان یہوواہ نال ساڈی دوستی نُوں توڑن دے موقعے لبھ رہیا اے۔ (‏1-‏پطرس 5:‏8‏)‏ جے اَسی خبردار نئیں رہواں گے تے اوہ ساڈے دل تے دماغ چ حسد، بےایمانی، لالچ، نفرت، غرور تے ناراضگی دے بیہہ بو دَوے گا۔ (‏گلتیوں 5:‏19-‏21‏)‏ شروع شروع چ شاید ایہہ گلاں ساڈے اندر اینیاں زیادہ نہ ہون۔ پر جے اَسی ایہناں نُوں اپنے دل چوں کڈھن لئی فوری قدم نئیں چُکاں گے تے ایہہ گلاں اِک زہریلے پودے وانگوں ودھدیاں جان گیاں تے سانوں نقصان پونچان گیاں۔—‏یعقوب 1:‏14، 15‏۔‏

11.‏ سانوں کیہڑے خطرے توں بچنا چاہی دا اے تے کیوں؟‏

¹¹ اِک ہور خطرہ اے بھیڑے لوکاں نال وقت گزارنا۔ ذرا ایس صورتحال بارے سوچو۔ تُسی اِک ایہو جہے بندے نال کم کر‌دے او جیہڑا یہوواہ دا گواہ نئیں اے۔ تُسی چاہندے او کہ اوہ یہوواہ دے گواہواں بارے چنگا سوچے۔ ایس لئی تُسی اوہدے نال مہربانی نال پیش آندے او تے اوہدی مدد کر‌دے او۔ شاید تُسی کدی کدار اوہدے نال وقفے دے دوران کھانا وی کھا لیندے او۔ فیر تُسی اکثر اِنج کر‌ن لگ پیندے او۔ اوہ بندہ کدی کدار گندیاں گلاں کر‌ن لگ پیندا اے۔ شروع شروع چ تے توانوں اوہدیاں گلاں بُریاں لگدیاں نیں۔ پر وقت دے نال نال تُسی ایہناں گلاں دے اینے عادی ہو جاندے او کہ اوہ توانوں بُریاں نئیں لگدیاں۔ فیر اِک دن اوہ بندہ کم دے بعد توانوں اپنے نال چاہ پین لئی کہندا اے تے تُسی اوہدی گل من لیندے او۔ اخیر تواڈی سوچ وی اوہدے ورگی ہو جاندی اے۔ ذرا سوچو کہ ہُن توانوں اوہدے ورگے کم کر‌ن چ کِنّاں کوُ وقت لگے گا؟ سچ اے کہ سانوں ہر بندے نال مہربانی تے عزت نال پیش آنا چاہی دا اے۔ پر سانوں ایہہ وی یاد رکھنا چاہی دا اے کہ جیہڑے لوکاں نال اَسی وقت گزارنے آں، اوہ ساڈے تے گُوڑھا اثر پاندے نیں۔ (‏1-‏کُرنتھیوں 15:‏33‏)‏ جے اَسی یسوع دی نصیحت دے مطابق اپنے طورطریقے تے چال‌چلن تے دھیان  دیندے رہواں گے تے اَسی فالتو چ ایہو جہے لوکاں نال وقت نئیں گزاراں گے جیہڑے یہوواہ دے معیاراں دے مطابق زندگی نئیں گزاردے۔ (‏2-‏کُرنتھیوں 6:‏15‏)‏ اَسی خطرے نُوں ویکھ کے ایہدے توں بچاں گے۔‏

12.‏ یسوع دے شاگرداں نُوں خاتمے دے آن تک کیہہ کر‌ن دی لوڑ سی؟‏

¹² یسوع چاہندا سی کہ اوہدے شاگرد اوس ویلے تک اِک خاص کم چ مصروف رہن جدوں تک خاتمہ نئیں آ جاندا۔ ایس لئی یسوع نے اوہناں نُوں حکم دِتا کہ اوہ یروشلیم، سارے یہودیہ تے سامریہ وچ تے زمین دے کونے کونے تک بادشاہی دی خوش‌خبری دی مُنادی کر‌ن۔ (‏اعمال 1:‏6-‏8‏)‏ شاگرداں نُوں بوہت زیادہ کم کر‌نا سی۔ اوہناں نے جی‌جان نال مُنادی دا کم کر کے اپنے وقت نُوں چنگی طرحاں استمال کیتا۔‏

13.‏ اپنے وقت نُوں چنگی طرحاں استمال کر‌نا کیوں ضروری اے؟ (‏کُلسّیوں 4:‏5‏)‏

¹³ کُلسّیوں 4:‏5 نُوں پڑھو۔‏ اپنے طورطریقے تے چال‌چلن تے دھیان دین لئی ضروری اے کہ اَسی ایس گل تے غور کر‌ئیے کہ اَسی اپنے وقت نُوں کیویں استمال کر‌نے آں کیونکہ کدی وی تے کسے نال وی حادثہ ہوسکدا اے۔ (‏واعظ 9:‏11‏)‏ ساڈی زندگی کسے وی ویلے ختم ہو سکدی اے۔‏

14، 15.‏ اَسی اپنے وقت نُوں چنگی طرحاں کیویں استمال کر سکنے آں؟ (‏عبرانیوں 6:‏11، 12‏)‏ (‏تصویر نُوں وی ویکھو۔)‏

¹⁴ اپنے وقت دا چنگا استمال ایہہ وے کہ اَسی ایہنوں یہوواہ دی مرضی تے چلن تے اوہدے نال اپنی دوستی نُوں مضبوط کر‌ن لئی استمال کر‌ئیے۔ (‏یوحنا 14:‏21‏)‏ سانوں چاہی دا اے کہ اَسی ثابت‌قدم تے ڈٹے رہیے تے  مالک دی خدمت چ مصروف رہیے۔ (‏1-‏کُرنتھیوں 15:‏58‏)‏ جدوں اَسی پورے دل تے جان نال یہوواہ دی خدمت کر‌اں گے تے فیر بھانویں ساڈی زندگی ختم وی ہو جائے یاں ایس دُنیا دا خاتمہ آ جائے، سانوں ایہہ پچھتاوا نئیں ہوئے گا کہ اَسی یہوواہ دی خدمت چ زیادہ کجھ نئیں کر سکے۔—‏متی 24:‏13؛‏ رومیوں 14:‏8‏۔‏

¹⁵ اَج وی جدوں یسوع دے شاگرد پوری دُنیا چ بادشاہی دی خوش‌خبری دی مُنادی کر‌دے نیں تے یسوع اوہناں دی رہنمائی کر‌دا اے۔ اوہنے اپنا ایہہ وعدہ پورا کیتا اے کہ اوہ ”‏ساڈے نال رہوے گا۔“‏ تنظیم دے ذریعے یسوع سانوں مُنادی کر‌نا سکھا رہیا اے تے سانوں اوہ ساریاں چیزاں دے رہیا اے جیہڑیاں بادشاہی دی خوش‌خبری نُوں پھیلان لئی ضروری نیں۔ (‏متی 28:‏18-‏20‏)‏ جدوں اَسی مُنادی کر‌اں گے، دُوجیاں نُوں تلیم دَواں گے تے اَسی یسوع دی کہی گل تے عمل کر رہے ہوواں گے۔ نالے عبرانیوں 6:‏11، 12 چ دِتی نصیحت تے عمل کر‌ن نال اَسی اخیر تک اپنی امید تے قائم رہواں گے۔‏‏—‏ایہناں ایتاں نُوں پڑھو۔‏

16.‏ سانوں کیہہ عزم کر‌نا چاہی دا اے؟‏

¹⁶ یہوواہ نے ایہہ فیصلہ کر لیا اے کہ اوہ کدوں شیطان دی ایس بھیڑی دُنیا نُوں ختم کر‌ے گا۔ اوس ویلے یہوواہ اپنے کلام چ لکھی ہر پیشین‌گوئی نُوں پورا کر‌ے گا۔ ہو سکدا اے کہ کدی کدار سانوں لگے کہ اوس دن دے آن چ دیر ہو رہی اے۔ پر یہوواہ دا دن، آن چ دیر نئیں کر‌ے گا۔ (‏حبقوق 2:‏3‏)‏ ایس لئی آؤ ایہہ عزم کر‌ئیے کہ اَسی یہوواہ دی راہ ویکھاں گے تے اپنے نجات دین والے خدادا اِنتظار کر‌اں گے۔—‏میکاہ 7:‏7‏۔‏