بدھ 18 جنوری 2023 نُوں jw.org تے اِک خاص اعلان چ ایہہ دَسیا گیا کہ بھرا گیج فلیگل تے بھرا جیفری وِنڈر نُوں یہوواہ دے گواہواں دی گورننگ باڈی دے ممبراں دے طور تے مقرر کیتا گیا اے۔ ایہہ دونویں بھرا اِک لمے عرصے توں یہوواہ دی خدمت کر رہے نیں۔‏

بھرا گیج فلیگل امریکہ دے اِک علاقے مغربی پینسلوانیا چ جمیا پلیا۔ اوہدے ماں پیو یہوواہ دے گواہ سن تے اوہناں نے ای بھرا نُوں سچائی سکھائی۔ جدوں بھرا گیج نوجوان ای سی تے اوہدا خاندان اِک چھوٹے جہے پِنڈ چ چلا گیا جتھے زیادہ مبشراں دی لوڑ سی۔ ایہدے کجھ عرصے بعد ای 20 نومبر 1988 نُوں بھرا گیج نے بپتسمہ لے لیا۔‏

بھرا گیج دے ماں پیو شروع توں اوہنوں کُل وقتی خدمت کرن دی ہلاشیری دیندے سن۔ اوہ اکثر اپنے گھر حلقے دے نگہباناں تے بیت‌ایل چ کم کرن والے بھین بھراواں نُوں بلا‌ندے سن تے بھرا گیج ایہہ ویکھدا سی کہ اوہ بھین بھرا کِنّے خوش نیں۔ بپتسمہ لین دے کجھ دیر بعد ای اوہنے 1 ستمبر 1989 نُوں پہل‌کار دے طور تے خدمت کرنی شروع کر دِتی۔ دو سال بعد بیت‌ایل جان دا اوہدا اوہ خواب پورا ہو گیا جیہڑا اوہنے 12 سال دی عمر چ ویکھیا سی۔ بھرا نے اکتوبر 1991 چ بروکلن بیت‌ایل چ خدمت شروع کیتی۔‏

بیت‌ایل چ بھرا گیج فلیگل نے 8 سال تک کتاباں تے جلداں کرن دا کم کیتا۔ ایہدے بعد اوہنوں خدمتی شعبے چ کم کرن لئی کہیا گیا۔ ایس عرصے دے دوران اوہنے کجھ سالاں تک رُوسی زبان بولن والی کلیسیا چ خدمت کیتی۔ 2006 چ اوہدی شادی بھین نادیہ نال ہو گئی۔ فیر اوہ دونویں مل کے بیت‌ایل چ خدمت کرن لگ پئے۔ اوہناں دونواں نے مِل کے پُرتگالی زبان والی کلیسیا چ وی خدمت کیتی تے 10 سال تک سپینش زبان والی کلیسیا چ وی۔ کئی سالاں تک خدمتی شعبے چ خدمت کرن توں بعد بھرا گیج فلیگل نُوں کہیا گیا کہ اوہ تلیمی کمیٹی دے دفتر چ خدمت کرے تے بعد چوں اوہنوں خدمتی کمیٹی دے دفتر چ کم کرن دی ذمے‌داری ملی۔ مارچ 2022 چ اوہنوں گورننگ باڈی دی خدمتی کمیٹی دے مددگار تے طور تے مقرر کیتا گیا۔‏

 بھرا جیفری وِنڈر امریکہ دی ریاست کیلیفورنیا دے علاقے مریٹا چ جمیا پلیا۔ اوہنے اپنے ماں پیو توں سچائی سکھی تے 29 مارچ 1986 نُوں بپتسمہ لے لیا۔ ایس توں اگلے ای مہینے اوہنے مددگار پہل‌کار دے طور تے خدمت شروع کر دِتی۔ اوہنوں ایہدے چ ایناں مزہ آن لگ پیا کہ اوہ چاہندا سی کہ اوہ ایہہ خدمت کردا رہوے۔ مسلسل کجھ مہینے مددگار پہل‌کار دے طور تے خدمت کرن توں بعد اوہنے 1 اکتوبر 1986 چ پہل‌کار دے طور تے خدمت شروع کر دِتی۔‏

بھرا جیفری وِنڈر دے وڈے بھرا بیت‌ایل چ خدمت کردے سن۔ تے جدوں اوہ نوجوان ای سی تے اوہ اوہناں نُوں مِلن لئی بیت‌ایل گیا۔ اوتھے جان توں بعد بھرا دے دل چ ایہہ خواہش پیدا ہوئی کہ اوہ وی مستقبل چ بیت‌ایل چ خدمت کرے۔ فیر مئی 1990 چ اوہنوں والکل بیت‌ایل چ خدمت کرن لئی بلا‌یا گیا۔‏

بھرا جیفری وِنڈر نے بیت‌ایل چ کئی شعبیاں چ خدمت کیتی، جیویں کہ صفائی دا شعبہ، کھیتی‌باڑی دا شعبہ تے بیت‌ایل دا دفتر۔ 1997 چ اوہدی شادی بھین اینجلا نال ہوئی تے اوس ویلے توں اوہ دونویں مِل کے بیت‌ایل چ خدمت کر رہے نیں۔ 2014 چ اوہ دونویں واروِک چلے گئے جتھے بھرا نے ساڈے ہیڈ کوارٹر نُوں تعمیر کرن دے کم چ مدد کیتی۔ 2016 چ اوہ پیٹرسن چ ساڈے تلیمی مرکز چلے گئے جتھے بھرا جیفری وِنڈر نے آڈیو ویڈیو دے شعبے چ کم کیتا۔ چار سال بعد اوہ دونویں فیر واروِک چلے گئے تے بھرا نُوں عملے دی کمیٹی دے دفتر چ خدمت کرن دی ذمے‌داری دِتی گئی۔ مارچ 2022 چ اوہنوں گورننگ باڈی دے عملے دی کمیٹی دے مددگار تے طور تے مقرر کیتا گیا۔‏

ایہہ دونویں بھرا آدمیاں دے روپ چ نعمتاں نیں۔ تے ساڈی دُعا اے کہ جدوں ایہہ بھرا بادشاہی دا کم کرن لئی محنت کردے نیں تے یہوواہ ایہناں نُوں برکت دَوے۔—‏اِفِسیوں 4:‏8۔‏