1، 2.‏ انسان کیس لحاظ نال اوس جوان بندے وانگوں نیں جدا ذکر پیراگراف نمبر 1 چ ہویا اے؟‏

 ذرا اِک ایہو جہے جوان بندے بارے سوچو جدا تعلق اِک امیر گھرانے نال اے۔ اِک دن اوہنوں اِک بڑی بھیڑی خبر سنن نُوں مِلدی اے۔ اوہنوں پتہ چلدا اے کہ اوہدے ماں پیو اِک حادثے چ فوت ہو گئے نیں۔ ایہہ سُن کے اوہ بالکل ٹُٹ جاندا اے۔ حالے اوہ ایس مشکل چوں نِکلیا ای نئیں سی کہ اوہدے تے اِک ہور وڈی مشکل آ جاندی اے۔ اوہنوں پتہ چلدا اے کہ اوہدے ماں پیو قرضے چ ڈُبے ہوئے سن۔ اوہ اوہدے لئی دولت چھڈن دی بجائے اِک وڈا قرضہ چھڈ گئے نیں تے ہُن قرضہ لین والے اوہدے پچھے پئے ہوئے نیں۔ قرضہ ایناں زیادہ اے کہ اوہ اپنی ساری زندگی ایہنوں لا نئیں سکدا۔‏

² اِک لحاظ نال ساڈی صورتحال وی اوس جوان بندے ورگی اے۔ ساڈے ماں پیو آدم تے حوا بے‌عیب سن تے بڑے سوہنے باغ چ رہندے سن۔ (‏پیدائش 1:‏27؛‏ 2:‏7-‏9‏)‏ اوہناں کول موقع سی کہ اوہ زمین تے ہمیشاں تک خوشیاں بھری زندگی گزارن۔ پر فیر سب کجھ بدل گیا۔ آدم تے حوا نے گُناہ کیتا جدی وجہ توں اوہناں نُوں عدن دے باغ چوں کڈھ دِتا گیا تے اوہناں نے ہمیشاں تک زندہ رہن دا موقع وی گنوا دِتا۔ اوہناں نے اپنے بچیاں لئی ورثے چ کیہہ چھڈیا؟ بائبل چ دَسیا گیا اے:‏ اِک آدمی یعنی آدم دے ذریعے گُناہ دُنیا چ آیا تے گُناہ دے ذریعے موت آئی تے موت سارے انساناں وچ پھیل گئی کیونکہ سب نے گُناہ کیتا۔ (‏رومیوں 5:‏12‏)‏ آدم نے اپنی اولاد نُوں ورثے چ گُناہ دِتا جدا نتیجہ موت اے۔ سانوں آدم کولوں ورثے چ جیہڑا گُناہ مِلیا اے، اوہ اِک بوہت وڈے قرضے وانگوں اے جنہوں ساڈے وچوں کوئی وی ادا نئیں کر سکدا۔—‏زبور 49:‏8‏۔‏

3.‏ بائبل چ گُناہ نُوں ”‏قرضے“‏ وانگوں کیوں کہیا گیا اے؟‏

³ بائبل چ کہیا گیا اے کہ گُناہ قرضے وانگوں اے۔ (‏متی 6:‏12؛‏ لُوقا 11:‏4‏)‏ جدوں اَسی گُناہ کرنے  آں تے اِک لحاظ نال اَسی یہوواہ دے قرض‌دار بن جانے آں تے سانوں ایہہ قرضہ چُکانا پیندا اے۔ ایہہ قرضہ اوہدوں ای ختم ہوندا اے جدوں اَسی مر جانے آں۔—‏رومیوں 6:‏7،‏ 23‏۔‏

4.‏ (‏الف)‏جے یہوواہ مدد نہ کردا تے گُناہ‌گار انساناں نال کیہہ ہونا سی؟ (‏زبور 49:‏7-‏9‏)‏ (‏ب)‏بائبل چ لفظ ”‏گُناہ“‏ کیہڑیاں گلاں وَل اشارہ کردا اے؟ (‏ایس بکس نُوں وی ویکھو:‏ ‏”‏ گُناہ۔‏‏“‏‏)‏

⁴ اَسی آپ اوہناں ساریاں چیزاں نُوں واپس حاصل نئیں کر سکدے جیہڑیاں آدم تے حوا نے گنوا دِتیاں نیں۔ ‏(‏زبور 49:‏7-‏9 نُوں پڑھو۔)‏ جے یہوواہ ساڈی مدد نہ کردا تے ساڈے کول نہ تے چنگے مستقبل دی تے نہ ای مُردیاں چوں زندہ ہون دی امید ہوندی۔ اصل چ ساڈا حال جانوراں وانگوں ہونا سی جنہاں کول مرن توں بعد دُبارہ زندہ ہون دی کوئی امید نئیں ہوندی۔—‏واعظ 3:‏19؛‏ 2-‏پطرس 2:‏12‏۔‏

5.‏ ساڈے پیار کرن والے اسمانی باپ نے گُناہواں دا قرضہ لان چ ساڈی مدد کیویں کیتی اے؟ (‏تصویر نُوں ویکھو۔)‏

⁵ آؤ فیر توں اوس جوان بندے بارے گل کرنے آں جدا ذکر مضمون دے شروع چ ہویا سی۔ ذرا سوچو کہ جے اِک امیر بندہ اوہنوں کہوے کہ اوہ اوہدا سارا قرضہ لا دَوے گا تے اوس جوان بندے نُوں کیہو جیہا لگے گا؟ یقیناً اوہ اوس امیر آدمی دی مدد لئی بڑا شکرگزار ہوئے گا۔ ساڈا پیار کرن والا اسمانی باپ یہوواہ وی اوس امیر بندے وانگوں اے۔ اوہنے سانوں کُھلے دل نال اِک ایہو جہی نعمت دِتی اے جدی وجہ توں ساڈے گُناہواں دا اوہ قرضہ لتھ جاندا اے جیہڑا سانوں آدم توں ورثے چ مِلیا اے۔ یسوع مسیح نے ایس بارے کہیا:‏ ”‏خدا نُوں دُنیا نال اینی محبت اے کہ اوہنے اپنا اکلوتا پُتر دے دِتا تاکہ جیہڑا وی اوہدے تے ایمان ظاہر کرے، اوہ ہلاک نہ ہوئے سگوں ہمیشاں دی زندگی پائے۔“‏ (‏یوحنا 3:‏16‏)‏ یہوواہ دی ایس نعمت دی وجہ توں ساڈے لئی اوہدے نال دوستی کرنا وی ممکن ہو گیا اے۔‏

6.‏ ایس مضمون چ اَسی بائبل دِیاں کیہڑیاں اِصطلا‌حواں تے غور کراں گے تے کیوں؟‏

⁶ اَسی یہوواہ دی اوس شاندار نعمت توں کیویں فائدہ حاصل کر سکنے آں جیہڑی اوہنے ساڈے گُناہواں نُوں معاف کرن لئی دِتی اے؟ ایس سوال دا جواب حاصل کرن لئی اَسی بائبل چ استمال ہون والیاں کجھ اِصطلا‌حواں دے مطلب تے غور کراں گے جیویں کہ خدا نال صلح، گُناہواں دا کفارہ، فدیہ، چھڈانا تے نیک ٹھہرائے جانا۔‏ ایس مضمون چ ایہناں ساریاں اِصطلا‌حواں دی وضاحت کیتی جائے گی۔ ایہناں تے غور کرن نال ساڈے دل چ ایس گل لئی قدر ہور زیادہ ودھ جائے گی کہ یہوواہ نے ساڈے گُناہواں نُوں معاف کرن لئی کِنّاں کجھ کیتا اے۔‏

مقصد:‏ خدا نال صلح

7.‏ (‏الف)‏آدم تے حوا نے ہور کیہہ گنوا دِتا سی؟ (‏ب)‏آدم تے حوا دی اولاد ہون دی وجہ توں سانوں کیہڑی چیز دی سخت ضرورت اے؟ (‏رومیوں 5:‏10، 11‏)‏

⁷ جدوں آدم تے حوا نے گُناہ کیتا تے اوہناں نے صرف ہمیشاں تک زندہ رہن دا موقع ای نئیں گنوایا سگوں اوہناں دا اپنے اسمانی باپ یہوواہ نال رشتہ وی ٹُٹ گیا۔ گُناہ کرن توں پہلاں اوہ خدا دے خاندان دا حصہ سن۔ (‏لُوقا 3:‏38‏)‏ پر جدوں اوہناں نے یہوواہ دی نافرمانی کیتی تے اوہ  یہوواہ دے خاندان دا حصہ نہ رہے۔ اوہدوں تک آدم تے حوا دے بچے نئیں سن۔ (‏پیدائش 3:‏23، 24؛‏ 4:‏1‏)‏ آدم تے حوا دی اولاد ہون دی وجہ توں ساڈے وچوں کوئی وی یہوواہ دے خاندان دا حصہ نئیں بن سکدا سی۔ ایس لئی سانوں یہوواہ نال صلح کرن دی لوڑ سی تاکہ اَسی اوہدے دوست بن سکئے۔ ‏(‏رومیوں 5:‏10، 11 نُوں پڑھو۔)‏ ایس حوالے نال یونانی صحیفیاں دی وضاحت کرن والی اِک کتاب چ دَسیا گیا اے کہ جیہڑے یونانی لفظ دا ترجمہ ”‏صلح“‏ کیتا گیا اے، اوہدا مطلب ”‏دُشمن نُوں دوست بنانا“‏ ہو سکدا اے۔ ایہہ کِنّی زبردست گل اے نا کہ یہوواہ نے ساڈے نال دوستی کرن چ پہل کیتی اے۔ اوہنے اِنج کیویں کیتا؟‏

بندوبست:‏ گُناہواں دا کفارہ

8.‏ گُناہواں دا کفارہ کیہہ اے؟‏

⁸ گُناہواں دا کفارہ یہوواہ وَلّوں اوہ بندوبست اے جدی بِنا تے عیب‌دار انسان اوہدے نال صلح کر کے دوستی دا رشتہ قائم کر سکدے نیں۔ ایس بندوبست چ برابر دی قیمت ادا کرنا وی شامل اے۔ ایس طرحاں اوہ سب کجھ واپس حاصل کیتا جا سکدا سی جو آدم نے گنوا دِتا سی۔ یونانی صحیفیاں چ وی گُناہواں دے کفارے بارے گل کیتی گئی اے۔ (‏رومیوں 3:‏25‏)‏ ایہدی بِنا تے عیب‌دار انساناں لئی یہوواہ نال دوستی کرنا ممکن ہوندا اے۔‏

9.‏ یہوواہ خدا نے اِسرائیلیاں دے گُناہواں نُوں معاف کرن لئی کیہڑا عارضی بندوبست کیتا؟‏

⁹ پرانے زمانے چ یہوواہ نے اِک ایہو جیہا عارضی بندوبست کیتا جدی بِنا تے اِسرائیلیاں دے گُناہ معاف ہو سکدے سن تے اوہ یہوواہ نال دوستی کر سکدے سن۔ اِسرائیلی سال چ اِک وار اِک خاص عید مناندے سن جنہوں کفارے دا دن کہیا جاندا سی۔ اوس دن اعلیٰ کاہن سارے لوکاں وَلّوں یہوواہ دے اَگے اِک جانور دی قربانی پیش کردا سی۔ ظاہری گل اے کہ جانوراں دی قربانی اِسرائیلیاں دے گُناہواں نُوں پوری طرحاں نئیں مٹا سکدی سی کیونکہ جانوراں دی اہمیت انساناں نالوں گھٹ اے۔ پر یہوواہ اوہناں اِسرائیلیاں نُوں معاف کرن لئی تیار سی جیہڑے اپنے گُناہواں توں توبہ کرن لئی یہوواہ دے حکم دے مطابق اوہدے حضور جانوراں دی قربانی پیش کردے سن۔ (‏عبرانیوں 10:‏1-‏4‏)‏ ایہدے علاوہ اِسرائیلی کفارے دے دن تے باقی دِناں چ اپنے گُناہواں لئی جیہڑیاں قربانیاں چڑھاندے سن، اوہناں دی وجہ توں اوہناں نُوں یاد رہندا سی کہ اوہ گُناہ‌گار نیں تے اوہناں نُوں اِک ایہو جہی قربانی دی لوڑ اے جدے ذریعے اوہناں دے گُناہ پوری طرحاں مِٹ جان۔‏

10.‏ یہوواہ خدا نے انساناں دے گُناہواں نُوں مکمل طور تے معاف کرن لئی کیہڑا بندوبست کیتا؟‏

¹⁰ یہوواہ خدا نے کیہہ کیتا تاکہ انساناں دے گُناہ مکمل طور تے معاف کیتے جا سکن؟ اوہنے اپنے پیارے پُتر نُوں اِکو ای وار بوہت سارے لوکاں دے گُناہواں لئی قربان کر دِتا۔ (‏عبرانیوں 9:‏28‏)‏ یسوع مسیح نے ”‏بوہت سارے لوکاں لئی اپنی جان فدیے دے طور تے“‏ دے دِتی۔ (‏متی 20:‏28‏)‏ پر فدیہ کیہہ اے؟‏

قیمت:‏ فدیہ

11.‏ (‏الف)‏بائبل دے مطابق فدیہ کیہہ اے؟ (‏ب)‏ایہہ فدیہ صرف کون ادا کر سکدا سی؟‏

¹¹ بائبل دے مطابق فدیہ اوہ قیمت اے جیہڑی ساڈے گُناہواں دی معافی لئی تے یہوواہ نال ساڈی صلح کران لئی ادا کیتی گئی۔ یہوواہ دی نظر چ فدیہ ای اوہ قیمت سی جدے ذریعے اوہ سب کجھ حاصل کیتا جا سکدا سی جو آدم نے گنوا دِتا سی۔ پر کیویں؟ یاد کرو کہ آدم تے حوا نے بے‌عیب انساناں دے طور تے ہمیشاں تک زندہ رہن دا موقع گنوا دِتا سی۔ ایس لئی ایہہ ضروری سی کہ فدیے دی قیمت اوہناں ساریاں چیزاں دے برابر ہوئے جیہڑیاں آدم نے گنوا دِتیاں سن۔ (‏1-‏تیمُتھیُس 2:‏6‏)‏ تے ایہہ قیمت صرف اوہی آدمی ادا کر سکدا سی جیہڑا (‏1)‏بے‌عیب ہوندا، (‏2)‏زمین تے ہمیشاں تک زندہ رہ سکدا تے (‏3)‏خوشی نال ساڈے لئی اپنی جان قربان کرن لئی تیار ہوندا۔ صرف ایہو جہے آدمی دی زندگی دی قیمت ای اوس قیمت دے برابر ہو سکدی سی جیہڑی آدم نے گنوا دِتی سی۔‏

12.‏ یسوع مسیح ساڈے لئی فدیہ کیوں ادا کر سکدا سی؟‏

¹² آؤ تِن ایہو جہیاں گلاں تے غور کرئیے جنہاں دی بِنا تے یسوع ساڈے لئی فدیہ ادا کر سکدا سی۔ (‏1)‏اوہ بے‌عیب سی تے اوہنے کوئی گُناہ  نئیں کیتا۔ (‏1-‏پطرس 2:‏22‏)‏ (‏2)‏بے‌عیب ہون دی وجہ توں اوہ زمین تے ہمیشاں تک زندہ رہ سکدا سی۔ (‏3)‏اوہ ساڈے لئی اپنی جان قربان کرن لئی تیار سی۔ (‏عبرانیوں 10:‏9، 10‏)‏ یسوع بے‌عیب سی جیویں آدم گُناہ کرن توں پہلاں سی۔ (‏1-‏کُرنتھیوں 15:‏45‏)‏ اِک بے‌عیب انسان دے طور تے اپنی زندگی قربان کر کے یسوع نے اوس زندگی لئی برابر دی قیمت ادا کر دِتی جیہڑی آدم نے گنوا دِتی سی۔ (‏رومیوں 5:‏19‏)‏ ایس طرحاں یسوع آخری آدم بن گیا۔ اوہدے بعد ہور کسے بے‌عیب انسان دی ضرورت نئیں رہی جیہڑا آ کے فدیہ ادا کرے۔ یسوع مسیح نے اپنی جان قربان کر کے اِکو وار ہمیشاں لئی ایہہ قیمت ادا کر دِتی۔—‏عبرانیوں 7:‏27؛‏ 10:‏12‏۔‏

13.‏ کفارے تے فدیے چ کیہہ فرق اے؟‏

¹³ کفارے تے فدیے چ کیہہ فرق اے؟ کفارہ اوہ بندوبست اے جیہڑا یہوواہ نے اپنے تے انساناں وچ دوستی نُوں فیر توں قائم کرن لئی کیتا اے جد کہ فدیہ اوہ قیمت اے جدی بِنا تے گُناہ‌گار انساناں لئی ایہہ بندوبست کرنا ممکن ہویا۔ ایہہ قیمت یسوع نے ساڈی خاطر اپنا قیمتی خون بہا کے دِتی۔—‏اِفسیوں 1:‏7؛‏ عبرانیوں 9:‏14‏۔‏

نتیجہ:‏ گُناہ تے موت توں چھٹکارا تے نیک ٹھہرایا جانا

14.‏ ہُن اَسی کیہڑی گل تے غور کراں گے تے کیوں؟‏

¹⁴ یہوواہ نے سانوں معاف کرن لئی کفارے دا جیہڑا بندوبست کیتا اے، اوہدے کیہڑے چنگے نتیجے نکلے نیں؟ ایہدے بارے جانن لئی اَسی بائبل چوں کجھ اِصطلا‌حواں تے غور کراں گے تے ویکھاں گے کہ ایہناں دا کیہہ مطلب اے۔ ہر اِصطلا‌ح دا مطلب آپس چ مِلدا جلدا اے۔ پر کفارے دے بندوبست چ ہر اِصطلا‌ح دا اِک خاص مطلب اے۔ ایہناں تے غور کردے ویلے اَسی ایہہ وی ویکھاں گے کہ ایہناں دا ساڈی زندگی تے کیہہ اثر ہوندا اے۔‏

15، 16.‏ (‏الف)‏بائبل چ لفظ ”‏چھڈانا“‏ کیہڑی گل وَل اشارہ کردا اے؟ (‏ب)‏توانوں ایہہ جان کے کیہو جیہا لگدا اے کہ توانوں گُناہ تے موت توں چھٹکارا مِل سکدا اے؟‏

¹⁵ بائبل چ دَسیا گیا اے کہ فدیے دی وجہ توں سانوں چھڈایا یعنی آزاد کرایا گیا اے۔ پطرس رسول نے کہیا:‏ ”‏تُسی جان دے او کہ توانوں اپنے پیو دادے دِیاں فضول رویتاں توں آزادی سونے یاں چاندی دے ذریعے نئیں مِلی جیہڑے خراب ہو جاندے نیں سگوں تُسی اِک بے‌داغ تے بے‌عیب میمنے یعنی مسیح دے قیمتی خون دے ذریعے آزاد ہوئے او۔“‏—‏1-‏پطرس 1:‏18، 19‏۔‏

¹⁶ فدیے دی وجہ توں اَسی گُناہ تے موت دی غلامی توں آزاد ہو گئے آں۔ (‏رومیوں 5:‏21‏)‏ ایہہ ایس لئی ممکن ہویا کیونکہ یسوع نے ساڈے لئی اپنا قیمتی خون بہایا۔ اَسی ایہدے لئی دل دِیاں گہرائیاں توں یہوواہ تے یسوع دے شکر گزار آں۔—‏1-‏کُرنتھیوں 15:‏22‏۔‏

17، 18.‏ (‏الف)‏نیک ٹھہرائے جان دا کیہہ مطلب اے؟ (‏ب)‏ایہدے توں سانوں کیہڑے فائدے ہوندے نیں؟‏

¹⁷ بائبل چ دَسیا گیا اے کہ یہوواہ اپنے بندیاں نُوں نیک ٹھہراندا اے۔ ایہدا مطلب اے کہ یہوواہ اپنے بندیاں کولوں ایہہ توقع نئیں کردا کہ اوہ اپنے گُناہواں دا قرضہ لان۔ یہوواہ اوہناں دے گُناہواں نُوں مٹا دیندا اے۔ پر اِنج کرن نال اوہ اپنے اِنصاف دے معیاراں نُوں نئیں توڑدا۔ یہوواہ سانوں ایس لئی نیک نئیں ٹھہراندا کہ اَسی ایہدے لائق آں یاں ساڈے گُناہ اوہدی نظر چ جائز نیں۔ سگوں اوہ سانوں ایس لئی نیک ٹھہراندا اے کیونکہ اَسی کفارے دے بندوبست تے فدیے تے ایمان رکھنے آں۔ ایس ایمان دی بِنا تے یہوواہ ساڈے گُناہواں نُوں معاف کر دیندا اے۔—‏رومیوں 3:‏24؛‏ گلتیوں 2:‏16‏۔‏

¹⁸ جدوں یہوواہ سانوں نیک ٹھہراندا اے تے ایہدے توں سانوں کیہڑے فائدے ہوندے نیں؟ جنہاں لوکاں نُوں یسوع مسیح دے نال اسمان تے حکمرانی کرن لئی چُنیا گیا اے، اوہناں نُوں خدا دے بچیاں دے طور تے نیک ٹھہرایا گیا اے۔ (‏طِطُس 3:‏7؛‏ 1-‏یوحنا 3:‏1‏)‏ یہوواہ نے اوہناں دے گُناہ معاف کر دِتے نیں۔ ایہہ اِنج ای اے جیویں اوہناں نے کدی اوہ گُناہ کیتے ای نئیں سن۔ ایس طرحاں ایہہ لوک اسمان تے حکمرانی کرن دے لائق ٹھہردے نیں۔ (‏رومیوں 8:‏1، 2،‏ 30‏)‏ پر جیہڑے لوک زمین تے ہمیشاں دی زندگی پان دی امید رکھدے نیں، اوہناں نُوں خدا دے دوستاں دے طور تے نیک ٹھہرایا گیا اے تے  اوہناں دے گُناہ معاف ہو گئے نیں۔ (‏یعقوب 2:‏21-‏23‏)‏ وڈی بِھیڑ چ شامل اوہ لوک جیہڑے ہرمجدون توں بچ کے نکل آن گے، اوہناں کول امید ہوئے گی کہ اوہ کدی نئیں مرن گے۔ (‏یوحنا 11:‏26‏)‏ ایہدے علاوہ خدا نیک تے بُرے لوکاں نُوں دُبارہ توں زندہ کرے گا۔ (‏اعمال 24:‏15؛‏ یوحنا 5:‏28، 29‏)‏ فیر زمین تے موجود خدا دے سارے بندے خدا دی اولاد دے طور تے شاندار آزادی دا مزہ لین گے۔ (‏رومیوں 8:‏21‏)‏ ذرا سوچو کہ کفارے دے بندوبست دے ذریعے سانوں کِنّی شاندار برکت ملے گی کہ ساڈی اپنے اسمانی باپ یہوواہ نال پوری طرحاں صلح ہو جائے گی۔‏

19.‏ یہوواہ تے یسوع نے ساڈے لئی جو کجھ کیتا اے، اوہدے توں سانوں کیویں فائدہ ہوندا اے؟ (‏ایس بکس نُوں وی ویکھو:‏ ‏”‏ یہوواہ وَلّوں مِلن والی معافی۔‏‏“‏‏)‏

¹⁹ ساڈا حال اوس جوان بندے ورگا سی جدا مضمون دے شروع چ ذکر ہویا اے۔ اوہنے اپنا سب کجھ گنوا دِتا سی تے اوہدے سِر تے ایناں وڈا قرضہ سی کہ اوہ اوہنوں لا نئیں سکدا سی۔ پر اَسی یہوواہ دے بوہت شکرگزار آں کہ اوہنے ساڈی مدد کیتی۔ یہوواہ نے ساڈے لئی کفارے دا بندوبست کیتا تے یسوع نے ساڈے لئی فدیے دی قیمت دِتی۔ یسوع مسیح تے ایمان رکھن نال سانوں گُناہ تے موت توں چھٹکارا یعنی آزادی مِلدی اے۔ ایہدی وجہ توں یہوواہ ساڈے گُناہواں نُوں اِنج مٹا دیندا اے جیویں ایہہ گُناہ اَسی کدی کیتے ای نئیں سن۔ سب توں ودھ کے اَسی ہُن اپنے اسمانی باپ یہوواہ نال دوستی دا رشتہ قائم کر سکنے آں۔‏

20.‏ اگلے مضمون چ اَسی کیس بارے گل کراں گے؟‏

²⁰ جدوں اَسی ایس گل تے سوچ‌وچار کرنے آں کہ یہوواہ تے یسوع نے ساڈے لئی کیہہ کجھ کیتا اے تے ساڈے دل شکرگزاری نال بھر جاندے نیں۔ (‏2-‏کُرنتھیوں 5:‏15‏)‏ جے اوہ ساڈی مدد نہ کردے تے ساڈے کول کوئی امید نہ ہوندی۔ پر یہوواہ وَلّوں مِلن والی معافی دی وجہ توں سانوں ذاتی طور تے کیہہ فائدہ ہوندا اے؟ ایس سوال تے اَسی اگلے مضمون چ گل کراں گے۔‏