1.‏ ایس گل نُوں سمجھنا اکثر مشکل کیوں ہوندا اے کہ کسے بندے نے سانوں دِلوں معاف کیتا اے یاں نئیں؟‏

 فرض کرو کہ تُسی کسے دا دل دُکھایا اے تے تُسی ایس وجہ توں بوہت شرمندہ او۔ پر اوہ بندہ توانوں کہندا اے کہ اوہنے توانوں معاف کر دِتا اے۔ کیہہ ایہہ گل سُن کے تواڈے دل توں بوجھ نئیں اُتر جائے گا؟ پر جدوں کوئی بندہ توانوں کہندا اے کہ ”‏مَیں توانوں معاف کر دِتا اے“‏ تے اصل چ اوہدی گل دا کیہہ مطلب ہوندا اے؟ کیہہ اوہدی گل دا ایہہ مطلب ہوندا اے کہ تُسی دونویں ہُن فیر توں چنگے دوست بن گئے او؟ یاں فیر کیہہ اوہ ایہہ کہنا چاہ رہیا ہوندا اے کہ مَیں ایس موضوع تے ہور گل نئیں کرنا چاہندا؟ جدوں انسان کسے نُوں معاف کردا اے تے ایس گل نُوں سمجھنا اکثر مشکل ہوندا اے کہ کیہہ اوہنے دِلوں معاف کیتا اے یاں نئیں۔‏

2.‏ یہوواہ سانوں جیس طرحاں معاف کردا اے، اوہدے بارے بائبل چ کیہہ دَسیا گیا اے؟ (‏فٹ‌نوٹ نُوں وی ویکھو۔)‏

² یہوواہ عیب دار انساناں نُوں جیویں معاف کردا اے، اوہ انساناں دے اِک دُوجے نُوں معاف کرن نالوں بوہت فرق اے۔ کوئی وی انسان کسے نُوں اوس طرحاں معاف نئیں کر سکدا جیس طرحاں یہوواہ کردا اے۔ زبور لکھن والے اِک بندے نے یہوواہ بارے کہیا:‏ تُوں دِلوں معاف کرنا ایں تاکہ تیرا گُوڑھا احترام کیتا جائے۔‏ a (‏زبور 130:‏4‏)‏ واقعی صرف یہوواہ ای صحی معنیاں چ معاف کردا اے۔ اوہنے ای ظاہر کیتا اے کہ معاف کرن دا اصل چ کیہہ مطلب ہوندا اے۔ کجھ عبرانی صحیفیاں چ یہوواہ دے معاف کرن لئی جیہڑا لفظ استمال ہویا اے، اوہ انساناں لئی کدی وی استمال نئیں ہوندا۔‏

3.‏ یہوواہ جیویں انساناں نُوں معاف کردا اے، اوہ انساناں دے اِک دُوجے نُوں معاف کرن توں کیویں فرق اے؟ (‏یسعیاہ 55:‏6، 7‏)‏

³ جدوں یہوواہ کسے انسان نُوں معاف کردا اے تے اوس انسان دے گُناہ پوری طرحاں مِٹ جاندے نیں۔ اوہدے تے یہوواہ دے درمیان پیدا ہون والی دُوری ختم ہو جاندی اے۔ اَسی دِلوں یہوواہ دے شکرگزار آں کہ اوہ ساڈے گُناہواں نُوں پوری طرحاں معاف کر دیندا اے تے اِک وار  نئیں سگوں وار وار ایہناں نُوں معاف کردا اے۔‏‏—‏یسعیاہ 55:‏6، 7 نُوں پڑھو۔‏

4.‏ یہوواہ نے ایہہ سمجھن چ ساڈی مدد کیویں کیتی اے کہ اصل چ معاف کرن دا کیہہ مطلب اے؟‏

⁴ جے یہوواہ دے معاف کرن تے ساڈے اِک دُوجے نُوں معاف کرن چ بوہت فرق اے تے اَسی عیب دار انسان ایہہ کیویں سمجھ سکنے آں کہ صحی معنیاں چ معاف کرن دا کیہہ مطلب ہوندا اے؟ یہوواہ نے سانوں ایہہ گل سمجھان لئی اپنے کلام چ شان‌دار مثالاں دِتیاں نیں۔ ایس مضمون چ اَسی ایہناں وچوں کجھ مثالاں تے غور کراں گے۔ اِنج اَسی ویکھ سکاں گے کہ جدوں یہوواہ سانوں معاف کردا اے تے اوہ ساڈے گُناہواں نُوں کیویں مٹا دیندا اے۔ ایہدے نال نال اوہ ساڈے نال اوس رشتے نُوں دُبارہ توں کیویں قائم کردا اے جیہڑا گُناہ دی وجہ توں ٹُٹ گیا سی۔ ایہناں مثالاں تے غور کرن نال ساڈے دل چ اپنے پیار کرن والے اسمانی باپ لئی محبت تے شکرگزاری ودھے گی جیہڑا سانوں کُھلے دل نال معاف کردا اے۔‏

یہوواہ ساڈے گُناہواں نُوں دُور کر دیندا اے

5.‏ جدوں یہوواہ ساڈے گُناہواں نُوں معاف کردا اے تے کیہہ ہوندا اے؟‏

⁵ بائبل چ گُناہواں بارے اکثر کہیا گیا اے کہ ایہہ بوجھ وانگوں نیں۔ بادشاہ داؤد نے اپنے گُناہواں بارے کہیا:‏ میرے گُناہواں دا ڈھیر میرے سِر توں وی اُچا ہو گیا اے۔ اوہناں دا بوجھ چُکنا میرے وَسوں باہر اے۔ (‏زبور 38:‏4‏)‏ پر یہوواہ دِلوں توبہ کرن والے بندے دے گُناہواں نُوں معاف کر دیندا اے۔ (‏زبور 25:‏18؛‏ 32:‏5‏)‏ جیہڑے عبرانی لفظ دا ترجمہ ”‏معاف“‏ کیتا گیا اے، اوہدا مطلب اے ”‏چُک لینا۔“‏ جدوں یہوواہ ساڈے گُناہواں نُوں معاف کردا اے تے اِک لحاظ نال اوہ ساڈے سِر توں گُناہواں دا بوجھ چُک کے ایہنوں ساڈے توں دُور کر دیندا اے۔‏

6.‏ یہوواہ ساڈے گُناہواں نُوں ساڈے توں کِنّاں دُور کر دیندا اے؟‏

⁶ یہوواہ ساڈے گُناہواں نُوں ساڈے توں کِنّاں دُور کر دیندا اے؟ ایہدے بارے دَسن لئی اوہنے اپنے کلام چ اِک ہور مثال لکھوائی اے۔ زبور 103:‏12 چ لکھیا اے:‏ جِنّاں مشرق مغرب توں دُور اے،‏ اوناں ای اوہنے ساڈے گُناہواں نُوں ساڈے توں دُور کر دِتا اے۔ مشرق تے مغرب اِک دُوجے توں اینی دُور نیں کہ ایہہ کدی وی مِل نئیں سکدے۔ دُوجے لفظاں چ کہوو تے یہوواہ ساڈے گُناہواں نُوں ساڈے توں ایناں دُور کر دیندا اے جدے بارے اَسی سوچ وی نئیں سکدے۔ ایہدے توں سانوں پکا یقین ہو جاندا اے کہ یہوواہ سانوں پوری طرحاں معاف کر دیندا اے۔‏

7.‏ یہوواہ ساڈے گُناہواں نال کیہہ کردا اے تے بائبل چ ایہدے بارے کیہہ دَسیا گیا اے؟ (‏میکاہ 7:‏18، 19‏)‏

⁷ جدوں یہوواہ ساڈے گُناہواں نُوں چُک کے ساڈے توں دُور کر دیندا اے تے کیہہ اوہ ایہناں نُوں اپنیاں نظراں دے سامنے رکھدا اے؟ بالکل نئیں۔ بادشاہ حزقیاہ نے یہوواہ بارے لکھیا:‏ تُوں میرے سارے گُناہواں نُوں اپنی کنڈ پچھے سُٹ دِتا اے۔ (‏یسعیاہ 38:‏9،‏ 17‏)‏ ایس مثال توں پتہ چلدا اے کہ جدوں یہوواہ توبہ کرن والے بندے دے گُناہواں نُوں معاف کر دیندا اے تے اوہ اوہناں نُوں اپنیاں نظراں توں دُور کر دیندا اے تے اوہناں نُوں دُبارہ کدی نئیں ویکھدا۔ یسعیاہ 38:‏17 دا ترجمہ ایس طرحاں وی کیتا جا سکدا اے:‏ تُوں میرے گُناہواں نُوں اِنج سمجھیا جیویں ایہہ کدی ہوئے ای نئیں سن۔ ایس گل نُوں واضح کرن لئی بائبل چ اِک ہور مثال دِتی گئی اے جدا ذکر میکاہ 7:‏18، 19 چ ہویا اے۔ ‏(‏ایہناں ایتاں نُوں پڑھو۔)‏ اوتھے دَسیا گیا اے کہ یہوواہ ساڈے گُناہواں نُوں سمندر دِیاں گہرائیاں وچ سُٹ دیندا اے۔ پرانے زمانے چ اِک بندے لئی اوس چیز نُوں حاصل کرنا ناممکن ہوندا سی جیہڑی سمندر دِیاں گہرائیاں وچ سٹی جاندی سی۔‏

8.‏ ہُن تک اَسی کیہہ سکھیا اے؟‏

⁸ ہُن تک اَسی جیہڑیاں مثالاں تے غور کیتا اے، اوہناں توں اَسی سکھیا اے کہ جدوں یہوواہ سانوں معاف کردا اے تے اوہ ساڈے گُناہواں دا بوجھ ساڈے سِر توں لا دیندا اے۔ اوہدوں اَسی وی اُنج ای محسوس کرنے آں جیویں داؤد نے محسوس کیتا۔ اوہنے کہیا:‏ اوہ بندہ خوش اے جدے بھیڑے کم معاف کر دِتے گئے نیں تے جدے گُناہ بخش دِتے گئے نیں۔ اوہ انسان خوش اے جدا گُناہ یہوواہ بالکل حساب چ نئیں لیائے گا۔ (‏رومیوں 4:‏7، 8‏)‏ ایہہ ہوندی اے سچی معافی۔‏

یہوواہ ساڈے گُناہواں نُوں مٹا دیندا اے

9.‏ یہوواہ نے کیہڑیاں مثالاں دے ذریعے ایہہ واضح کیتا اے کہ اوہ سانوں کیس حد تک معاف کردا اے؟‏

⁹ یہوواہ نے کجھ ہور مثالاں وی دِتیاں نیں جنہاں تے غور کرن نال اَسی  اپنے دل چ ایس گل لئی قدر ودھا سکنے آں کہ فدیے دے ذریعے اوہ اوہناں لوکاں دے گُناہواں نُوں مٹا دیندا اے جیہڑے دِلوں توبہ کردے نیں۔ بائبل چ دَسیا گیا اے کہ یہوواہ ساڈے گُناہواں نُوں دھو دیندا اے جدی وجہ توں اِک گُناہ‌گار انسان صاف ہو جاندا اے۔ (‏زبور 51:‏7؛‏ یسعیاہ 4:‏4؛‏ یرمیاہ 33:‏8‏)‏ ایہدے بارے یہوواہ نے آپ کہیا:‏ بھانویں تواڈے گُناہ لال سُرخ رنگ دے ہون، اوہ برف وانگوں چِٹے ہو جان گے؛ بھانویں اوہ گُوڑھے لال رنگ دے کپڑے ورگے ہون، اوہ اُون ورگے ہو جان گے۔ (‏یسعیاہ 1:‏18‏)‏ اِک کپڑے توں گہرے لال سُرخ رنگ دے داغ نُوں مٹانا بڑا مشکل ہوندا اے۔ پر ایس مثال دے ذریعے یہوواہ نے سانوں یقین دَوایا اے کہ اوہ ساڈے گُناہواں نُوں دھو کے ایناں صاف کر دیندا اے کہ گُناہ دے داغ دا نشان وی نئیں رہندا۔‏

10.‏ جیویں یہوواہ کُھلے دل نال سانوں معاف کردا اے، اوہدے بارے بائبل چ کیہہ دَسیا گیا اے؟‏

¹⁰ پچھلے مضمون چ اَسی سکھیا سی کہ ساڈے گُناہ قرضے وانگوں نیں۔ (‏متی 6:‏12؛‏ لُوقا 11:‏4‏)‏ جدوں وی اَسی یہوواہ دے خلاف گُناہ کرنے آں تے اِک لحاظ نال اَسی قرضے وچ ڈُب دے جانے آں۔ پر جدوں یہوواہ ساڈے گُناہواں نُوں معاف کر دیندا اے تے اِک لحاظ نال اوہ ساڈا قرضہ معاف کر دیندا اے۔‏ فیر اوہ ساڈے کولوں ایہہ توقع نئیں کردا کہ اَسی اپنے اوہناں گُناہواں دی قیمت ادا کرئیے جیہڑے اوہنے معاف کر دِتے نیں۔ ایس مثال توں سانوں کِنّی تسلی مِلدی اے کہ یہوواہ سانوں کُھلے دل نال معاف کردا اے۔‏

11.‏ بائبل چ لکھی ایس گل دا کیہہ مطلب اے کہ ساڈے گُناہ مٹائے جان گے؟ (‏اعمال 3:‏19‏)‏

¹¹ یہوواہ ساڈے گُناہواں دے قرضے نُوں صرف معاف ای نئیں کردا سگوں اوہ ایہناں نُوں مکمل طور تے مٹا دیندا اے۔ ‏(‏اعمال 3:‏19 نُوں پڑھو۔)‏ ایس گل نُوں سمجھن لئی فرض کرو کہ اِک بندے دا قرضہ معاف کر دِتا جاندا اے تے قرضے دے کاغذاں تے وڈا جیہا کاٹا مار دِتا جاندا اے۔ پر کاٹے دے تھلے نمبر فیر وی نظر آندے نیں۔ پر جدوں کسے چیز نُوں مٹا دِتا جاندا اے تے ایہہ کاٹا لان توں فرق ہوندا اے۔ ایس گل نُوں سمجھن لئی سانوں ایہہ یاد رکھن دی لوڑ اے کہ پرانے زمانے چ لکھن لئی جیہڑی سیاہی استمال کیتی جاندی سی، اوہنوں اِک بندہ گلے کپڑے نال مٹا سکدا سی۔ جدوں اِک بندے دا قرضہ کاغذاں چوں مٹا دِتا جاندا سی تے اوس کاغذ تے لکھائی دا نشان وی نئیں رہندا سی۔ایہہ اِنج ای سی جیویں اوس بندے تے کدی قرضہ ہے ای نئیں سی۔ کیہہ ایہہ جان کے ساڈے دل شکرگزاری نال نئیں بھر جاندے کہ یہوواہ صرف ساڈے گُناہواں نُوں معاف ای نئیں کردا سگوں ایہناں نُوں مکمل طور تے مٹا دیندا اے؟—‏زبور 51:‏9‏۔‏

12.‏ بائبل چ گُناہواں نُوں معاف کرن بارے بدّل دی جیہڑی مثال دِتی گئی اے، اوہدے توں اَسی کیہہ سکھنے آں؟‏

¹² یہوواہ نے اپنے کلام چ اِک ہور مثال دِتی اے جدے توں اَسی ایہہ سمجھ سکنے آں کہ اوہ ساڈے گُناہواں نُوں کیویں مٹاندا اے۔ اوہنے کہیا:‏ مَیں تیریاں غلطیاں نُوں اِنج مٹا دَواں گا جیویں اوہ بدّل نال ڈھک دِتیاں گئیاں ہون تے تیرے گُناہواں نُوں اِنج جیویں گاڑھے بدّل نال ڈھکے ہون۔ (‏یسعیاہ 44:‏22‏)‏ جدوں یہوواہ ساڈے گُناہواں نُوں معاف کر دیندا اے تے اِک لحاظ نال اوہ ایہناں نُوں بدّلاں چ لُکا دیندا اے تاکہ اوہ سانوں تے اوہنوں بالکل وی نظر نہ آن۔‏

13.‏ جدوں یہوواہ ساڈے گُناہ معاف کردا اے تے اَسی کیہو جیہا محسوس کرنے آں؟‏

¹³ اَسی جیہڑیاں مثالاں تے غور کیتا اے، اوہناں توں اَسی کیہہ سکھیا اے؟ جدوں یہوواہ ساڈے گُناہواں نُوں معاف کر دیندا اے تے سانوں ایہہ نئیں سوچنا چاہی دا کہ ساڈے گُناہواں دا داغ ساری زندگی ساڈے تے لگیا رہوے گا۔ یسوع مسیح نے ساڈے گُناہواں دا قرضہ لان لئی اپنا خون بہایا اے جدی وجہ توں ساڈے گُناہ پوری طرحاں معاف ہو جاندے نیں۔ تے جدوں یہوواہ ساڈے کسے گُناہ نُوں معاف کر دیندا اے تے ایہہ اِنج ای ہوندا اے جیویں اوہ گُناہ اَسی کدی کیتا ای نئیں سی۔ واقعی، جدوں اَسی دِلوں توبہ کرنے آں تے یہوواہ سانوں صحی معنیاں چ معاف کردا اے۔‏

یہوواہ سانوں فیر توں اپنا دوست بنا لیندا اے

14.‏ اَسی ایس گل تے بھروسا کیوں رکھ سکنے آں کہ یہوواہ سانوں دِلوں معاف کر دیندا اے؟ (‏تصویراں نُوں وی ویکھو۔)‏

¹⁴ جدوں یہوواہ سانوں معاف کر دیندا اے تے اوہ فیر توں سانوں اپنا دوست بنا لیندا اے۔ ایس لئی سانوں شرمندگی دے بوجھ تھلے دبے رہن دی  لوڑ نئیں اے تے نہ ای سانوں ایس گل توں ڈرن دی لوڑ اے کہ یہوواہ ساڈے توں ہُن وی ناراض اے تے اوہ کدی نہ کدی سانوں ساڈے گُناہ دی سزا ضرور دَوے گا۔ یہوواہ اِنج کدی نئیں کرے گا۔ فیر جدوں یہوواہ سانوں کہندا اے کہ اوہنے سانوں معاف کر دِتا اے تے اَسی اوہدی ایس گل تے پورا بھروسا کر سکنے آں۔ یہوواہ نے اپنے نبی یرمیاہ دے ذریعے کہیا:‏ مَیں اوہناں دی غلطی معاف کراں گا تے مَیں اوہناں دا گُناہ دُبارہ یاد نئیں کراں گا۔‏ (‏یرمیاہ 31:‏34‏)‏ پولُس رسول نے وی یہوواہ دی ایسے گل دا حوالہ دِتا۔ اوہنے کہیا:‏ مَیں اوہناں دے گُناہواں نُوں بالکل یاد نئیں کراں گا۔‏ (‏عبرانیوں 8:‏12‏)‏ پر یہوواہ دی ایس گل دا کیہہ مطلب اے؟‏

15.‏ ایس گل دا کیہہ مطلب اے کہ یہوواہ ساڈے گُناہواں نُوں یاد نئیں رکھدا؟‏

¹⁵ بائبل چ لفظ ”‏یاد کرن“‏ دا مطلب ہمیشاں ایہہ نئیں ہوندا کہ اِک بندہ ماضی چ ہون والی کسے گل نُوں یاد کر رہیا اے یاں اوہدے بارے سوچ رہیا اے۔ ایہدی بجائے ایہدا اشارہ کجھ کرن وَل وی ہو سکدا اے۔ غور کرو کہ جیہڑا مُجرم یسوع دی نال والی سولی تے سی، اوہنے اوہنوں کہیا:‏ یسوع جدوں تُوں بادشاہ بن جائیں گا تے مینوں یاد کرِیں۔ (‏لُوقا 23:‏42، 43‏)‏ اوہ مُجرم یسوع نُوں صرف ایہہ نئیں کہہ رہیا سی کہ جدوں یسوع بادشاہ بن جائے تے اوہ اوہدے بارے سوچے۔ یسوع نے اوس مُجرم نُوں جیہڑا جواب دِتا، اوہدے توں پتہ چلدا اے کہ یسوع اوس مُجرم لئی کجھ کرے گا یعنی مستقبل چ اوہنوں زمین تے زندہ کرے گا۔ تے جدوں یہوواہ سانوں کہندا اے کہ اوہ ساڈے گُناہواں نُوں بالکل یاد نئیں کرے گا تے ایہدا مطلب اے کہ اوہ ساڈے خلاف کاروائی نئیں کرے گا۔ اوہ مستقبل چ سانوں ساڈے اوہناں گُناہواں دی سزا نئیں دَوے گا جنہاں نُوں اوہ معاف کر چُکیا اے۔‏

16.‏ بائبل چ اوس بندے بارے کیہہ کہیا گیا اے جدے گُناہ معاف ہو جاندے نیں؟‏

¹⁶ جدوں یہوواہ سانوں معاف کر دیندا اے تے سانوں اپنے گُناہواں توں آزادی مِلدی اے۔ ایس گل نُوں سمجھان لئی بائبل چ اِک ہور مثال دِتی گئی اے۔ ایہدے چ دَسیا گیا اے کہ عیب‌دار ہون دی وجہ توں اَسی گُناہ دے غلام آں۔ پر اَسی یہوواہ دے بڑے شکرگزار آں کہ جدوں اوہ سانوں معاف کر دیندا اے تے اَسی گُناہ توں آزاد ہو جانے آں۔ (‏رومیوں 6:‏17، 18؛‏ مُکاشفہ 1:‏5‏)‏ جدوں اَسی ایہہ گل جان جانے آں کہ یہوواہ نے سانوں معاف کر دِتا اے تے سانوں وی اونی ای خوشی مِلدی اے جِنّی اِک غلام نُوں آزاد ہو کے مِلدی اے۔‏

17.‏ جدوں یہوواہ سانوں معاف کر دیندا اے تے سانوں کیس لحاظ نال شفا مِلدی اے؟ (‏یسعیاہ 53:‏5‏)‏

 ¹⁷ یسعیاہ 53:‏5 نُوں پڑھو۔‏ بائبل چ دَسیا گیا اے کہ عیب‌دار ہون دی وجہ توں اَسی اِک ایہو جہے بندے وانگوں آں جنہوں کوئی جان‌لیوا بیماری ہوئے۔ پر یہوواہ نے اپنے پُتر دے فدیے دے ذریعے سانوں شفا دِتی اے۔‏ (‏1-‏پطرس 2:‏24‏)‏ جدوں اَسی گُناہ کرنے آں تے اِک لحاظ نال اَسی بیمار ہو جانے آں تے یہوواہ نال ساڈی دوستی ٹُٹ جاندی اے۔ پر یسوع دے فدیے دی وجہ توں ایہہ ممکن ہویا اے کہ یہوواہ سانوں معاف کرے تے فیر توں ساڈے نال دوستی کرے۔ جدوں یہوواہ دے معاف کرن دی وجہ توں سانوں شفا مِلدی اے یعنی اَسی فیر توں اوہدے دوست بن جانے آں تے سانوں وی اونی ای خوشی ہوندی اے جِنّی اوس بندے نُوں ہوندی اے جنہوں اِک وڈی بیماری توں شفا مل جاندی اے۔‏

یہوواہ وَلّوں مِلن والی معافی دے فائدے

18.‏ اَسی یہوواہ وَلّوں مِلن والی معافی بارے جیہڑیاں مثالاں تے غور کیتا اے، اوہناں توں اَسی کیہہ سکھیا اے؟ (‏ایس بکس نُوں وی ویکھو:‏ ‏”‏یہوواہ سانوں کیس حد تک معاف کردا اے؟“‏‏)‏

¹⁸ اَسی یہوواہ وَلّوں مِلن والی معافی بارے جیہڑیاں مثالاں تے غور کیتا اے، اوہناں توں اَسی کیہہ سکھیا اے؟ یہوواہ ساڈے گُناہواں نُوں پوری طرحاں تے ہمیشاں لئی معاف کر دیندا اے۔ اِنج اَسی فیر توں اپنے اسمانی باپ دے قریبی دوست بن جانے آں۔ پر سانوں ایہہ وی یاد رکھنا چاہی دا اے کہ یہوواہ وَلّوں مِلن والی معافی ساڈے لئی نعمت اے۔ انسان ایہہ حق نئیں رکھدے کہ اوہ یہوواہ وَلّوں معافی حاصل کر سکن۔ پر یہوواہ اپنی عظیم رحمت تے محبت دی وجہ توں انساناں نُوں معاف کردا اے۔—‏رومیوں 3:‏24‏۔‏

19.‏ (‏الف)‏سانوں کیس گل لئی شکرگزار ہونا چاہی دا اے؟ (‏رومیوں 4:‏8‏)‏ (‏ب)‏اگلے مضمون چ اَسی کیہڑی گل تے غور کراں گے؟‏

¹⁹ رومیوں 4:‏8 نُوں پڑھو۔‏ سانوں ساریاں نُوں دِلوں ایس گل لئی شکرگزار ہونا چاہی دا اے کہ یہوواہ ایہو جیہا خدا اے جیہڑا دِلوں معاف کردا اے۔ (‏زبور 130:‏4‏)‏ پر یہوواہ توں معافی حاصل کرن لئی سانوں اِک بڑا اہم کم کرنا ہوئے گا۔ یسوع نے ایس بارے کہیا:‏ ”‏جے تُسی دوجیاں دِیاں غلطیاں نئیں معاف کرو گے تے تواڈا اسمانی باپ وی تواڈیاں غلطیاں نئیں معاف کرے گا۔“‏ (‏متی 6:‏14، 15‏)‏ ایہدے توں پتہ چلدا اے کہ یہوواہ وانگوں دُوجیاں نُوں معاف کرنا کِنّاں ضروری اے۔ پر اَسی اِنج کیویں کر سکنے آں؟ اگلے مضمون چ ایسے بارے گل کیتی جائے گی۔‏