میرے امی‌ابو کٹر کیتھولک سن۔ پر جدوں اوہناں نے بائبل چوں سکھیا کہ خدا دا ناں یہوواہ اے تے اوہ دونویں یہوواہ دے گواہ بن گئے تے جی جان نال اوہدی خدمت کرن لگ پئے۔ ابو ترکھان سن تے گواہ بنن توں پہلاں یسوع دِیاں مُورتیاں بناندے سن۔ بعد چوں اوہناں نے اپنی ایس مہارت نُوں استمال کر کے گھر دے اِک حصے نُوں عبادت‌گاہ بنا دِتا۔ ساڈا گھر فلپائن دے دارالحکومت منیلا دے کول اِک شہر سان یوآن ڈیل مونٹے چ سی۔‏

مَیں 1952 چ پیدا ہویا۔ میرے چار وڈے بھرا تے تِن وڈیاں بھیناں سن۔ امی‌ابو بچپن توں ای مینوں یہوواہ بارے سکھان لگ پئے جیویں اوہ میرے وڈے بھین بھراواں نُوں سکھاندے سن۔ فیر جدوں مَیں تھوڑا وڈا ہویا تے ابو نے مینوں ہلاشیری دِتی کہ مَیں ہر روز بائبل دا اِک باب پڑھاں۔ اوہ میرے نال مِل کے تنظیم دِیاں ہور وی بوہت ساریاں کتاباں پڑھدے سن۔ کدی کدار امی‌ابو حلقے دے نگہباناں تے برانچ دے نمائندیاں نُوں گھر ٹھہراندے سن۔ جدوں اوہ بھرا سانوں اپنے تجربے دَسدے سن تے سانوں ساریاں نُوں بڑی خوشی ہوندی سی تے ساڈا بڑا حوصلہ ودھدا سی۔ ایہدی وجہ توں ساڈے دل چ وی ایہہ خواہش ودھی کہ اَسی یہوواہ دی خدمت نُوں اپنی زندگی چ سب توں زیادہ اہمیت دَئیے۔‏

میرے امی‌ابو بڑی وفاداری نال یہوواہ دی خدمت کردے سن تے مَیں اوہناں توں بوہت کجھ سکھیا۔ پر فیر اِک وقت آیا جدوں امی بوہت زیادہ بیمار ہون دی وجہ توں فوت ہو گئے۔ اوہناں دے فوت ہون توں بعد مَیں تے میرے ابو نے 1971 چ پہل‌کار دے طور تے خدمت کرنی شروع کر دِتی۔ پر فیر 1973 چ جدوں مَیں 20 سال دا ساں تے میرے ابو وی فوت ہو گئے۔ امی‌ابو دے فوت ہو جان توں بعد مَیں بوہت کلّا محسوس کرنا لگ پیا۔ پر بائبل چ یہوواہ نے سانوں جیہڑی امید دِتی اے، اوہ واقعی پکی تے مضبوط اے کیونکہ ایہدی وجہ توں ای مَیں قائم رہ سکیا، اپنے آپ نُوں سنبھال سکیا تے یہوواہ دے نیڑے وی رہ سکیا۔ (‏عبرانیوں 6:‏19‏)‏ ابو دے فوت ہون دے کجھ چِر بعد ای مَیں خاص پہل‌کار بن کے صوبہ پالاوان دے جزیرے کورون چلا گیا۔‏

جدوں مَیں کورون گیا تے اوس ویلے مَیں 21 سال دا ساں۔ مَیں شروع توں ای شہر چ رہیا ساں۔ ایس لئی جدوں مَیں ویکھیا کہ ایس جزیرے تے بجلی تے پانی دی کِنّی  کمی اے تے گھٹ ای گڈیاں تے موٹر سائیکلاں نیں تے مَیں بڑا حیران ہویا۔ بھانویں کہ ایس جزیرے تے ساڈے کجھ بھین بھرا ہے سن پر ایتھے کوئی ہور پہل‌کار نئیں سی جدے نال مَیں مِل کے مُنادی کردا۔ کدی کدار مینوں کلّے ای مُنادی کرنی پیندی سی۔ پہلے مہینے چ تے مینوں اپنے گھر والے تے دوست بوہت ای زیادہ یاد آئے۔ رات نُوں جدوں مَیں تاریاں نال بھرے اسمان نُوں ویکھنا ساں تے میریاں اَکھاں چ آنسو آ جاندے سن۔ میرا دل کردا سی کہ مَیں اپنی خدمت چھڈ کے بس گھر واپس چلا جاواں۔‏

جدوں مینوں کلّا پن محسوس ہوندا سی تے مَیں یہوواہ کولوں دل کھول کے دُعا کرنا ساں۔ مینوں اَج وی اوہ گلاں یاد نیں جیہڑیاں مَیں اوس ویلے خدا دے کلام تے تنظیم دِیاں کتاباں چ پڑھنا ساں۔ مینوں اوہناں توں بڑا حوصلہ مِلدا سی۔ مَیں اکثر زبور 19:‏14 بارے سوچنا ساں۔ ایس ایت تے غور کرن نال مینوں محسوس ہویا کہ جے مَیں اوہناں گلاں بارے سوچاں گا جیہڑیاں یہوواہ نُوں پسند نیں، جیویں کہ اوہدے کماں تے اوہدیاں خوبیاں بارے تے اوہ میری چٹان تے میرا چھڑان والا ثابت ہوئے گا۔ مینوں اِک ”‏واچ‌ٹاور“‏ رسالے چ اِک مضمون پڑھ کے وی بڑا حوصلہ مِلیا جدے چ دَسیا گیا سی کہ اَسی کدی وی کلّے نئیں ہوندے۔ ایس مضمون نُوں مَیں وار وار پڑھیا۔ مینوں محسوس ہویا کہ جدوں مَیں کلّا ہنا واں تے اوس ویلے یہوواہ میرے نال ہوندا اے کیونکہ ایس دوران مینوں اوہدے کولوں دُعا کرن، اوہدے کلام نُوں پڑھن تے اوہدے تے سوچ‌وچار کرن دے بوہت سارے موقعے مِلدے نیں۔‏

مینوں کورون چ رہندے ہوئے حالے تھوڑا ای چِر ہویا سی کہ مینوں کلیسیا دے بزرگ دے طور تے مقرر کیتا گیا۔ اوتھے مَیں کلّا بزرگ ساں۔ ایس لئی مَیں مسیحی خدمتی سکول، خدمتی اجلاس، کلیسیا دے طور تے بائبل دا مطالعیا تے ”‏مینارِنگہبانی“‏ دا مطالعیا کرانا ساں۔ ایہدے علاوہ مَیں ہر ہفتے عوامی تقریر وی دینا ساں۔ مَیں ایناں مصروف ہو گیا کہ میرے کول کلّا پن محسوس کرن دا وی وقت نئیں سی۔‏

مینوں کورون چ مُنادی کر کے بوہت اچھا لگ رہیا سی نالے ایہدے بڑے چنگے نتیجے نکل رہے سن۔ جیہڑے لوکاں نُوں مَیں بائبل کورس کرا رہیا ساں، اوہناں وچوں کجھ نے تے بپتسمہ وی لے لیا سی۔ پر مینوں کجھ مشکلاں دا وی سامنا کرنا پیا۔ مثال لئی، کدی کدار مینوں کسے علاقے چ جان چ اَدھا دن لگ جاندا سی۔ مینوں ایہہ وی نئیں پتہ ہوندا سی کہ جدوں مَیں اوتھے پونچاں گا تے مَیں رات کتھے رُکاں گا۔ ساڈے مُنادی دے علاقے چ کئی چھوٹے چھوٹے جزیرے وی سن۔ مَیں اکثر موٹر والی کشتی تے سمندر دِیاں طوفانی لہراں نُوں پار کر کے اوہناں جزیریاں تے پونچنا ساں۔ مینوں تے تیرنا وی نئیں آندا سی۔ ایہناں ساریاں مشکلاں چ یہوواہ میری حفاظت تے مدد کردا رہیا۔ بعد چوں مینوں محسوس ہویا کہ اصل چ یہوواہ مینوں ہور مشکلاں لئی تیار کر رہیا سی جنہاں دا سامنا میری اگلی ذمے‌داری چ مینوں ہونا سی۔‏

1978 چ مینوں آسٹریلیا دے شمال چ اِک ملک پاپوا نیو گنی گھلیا گیا۔ ایس ملک چ بوہت سارے پہاڑ نیں تے ایہہ سپین جِنّاں وڈا اے۔ مَیں ایہہ جان کے حیران رہ گیا کہ ایتھے رہن والے 30 لکھ لوک 800 توں وی زیادہ زباناں بولدے نیں۔ پر اچھی گل ایہہ سی کہ زیادہ‌تر لوک میلانیشیا پیسین زبان جان دے سن جنہوں عام طور تے ٹوک پیسین کہیا جاندا اے۔‏

مینوں کجھ وقت لئی انگریزی زبان والی کلیسیا چ گھلیا گیا جیہڑی دارالحکومت پورٹ مورسبی چ سی۔ پر فیر مینوں ٹوک پیسین زبان والی کلیسیا چ گھلیا گیا جتھے مَیں ایہہ زبان سکھن لئی کلاساں لئیاں۔ جیہڑے جملے مَیں کلاس چ سکھنا ساں، اوہناں نُوں مَیں مُنادی کردے ویلے استمال کرنا ساں۔ ایس طرحاں مَیں ایہہ زبان چھیتی سکھ گیا تے تھوڑے ای عرصے چ مَیں ٹوک پیسین زبان والی کلیسیا چ عوامی تقریراں دین لگ پیا۔ مینوں پاپوا نیو گنی چ رہندے ہوئے اِک سال وی نئیں ہویا سی کہ مینوں ٹوک پیسین بولن والیاں کلیسیاواں چ حلقے دے نگہبان دے طور تے گھلیا گیا جدی وجہ توں مَیں بوہت حیران ہویا۔ ٹوک پیسین بولن والیاں کلیسیاواں کئی وڈے وڈے صوبیاں چ سن۔‏

 ایہہ کلیسیاواں اِک دُوجے توں بوہت زیادہ دُور سن۔ ایس لئی مینوں کئی اِک روزہ یاں دو روزہ کنونشناں دا بندوبست کرنا پیندا سی تے بوہت زیادہ سفر وی کرنا پیندا سی۔ شروع شروع چ تے مَیں نویں ملک، نوِیں زبان تے نوِیں ثقافت دی وجہ توں بوہت کلّا پن محسوس کرنا ساں۔ پہاڑی علاقیاں تے اُچے نیویں رستیاں دی وجہ توں مَیں کسے گڈی یاں ٹرین وغیرہ چ سفر نئیں کر سکنا ساں۔ ایس لئی مینوں تقریباً ہر ہفتے جہاز تے سفر کرنا پیندا سی۔ کدی کدار تے اِک چھوٹے تے ٹُٹے پھٹے جہاز چ مَیں کلّا سفر کر رہیا ہنا ساں۔ جہاز چ سفر کر کے وی مینوں اونی ای گھبراہٹ ہوندی سی جِنّی کشتی چ ہوندی سی۔‏

جنہاں کلیسیاواں چ مَیں جانا ساں، اوتھے کجھ ای بھین بھراواں کول فون سی۔ ایس لئی مَیں خطاں دے ذریعے کلیسیاواں نال رابطہ کرنا ساں۔ اکثر مَیں اپنے خطاں توں پہلاں ای اوتھے پونچ جانا ساں تے فیر مینوں اوتھوں دے بھین بھراواں نُوں لبھنا پیندا سی۔ پر ہر واری جدوں مینوں بھین بھرا مِل جاندے سن تے اوہ مینوں بڑے پیار تے خوشی نال مِلدے سن۔ ایہدے توں مَیں ایہہ یاد رکھ پانا ساں کہ مَیں کیوں اینیاں کوششاں کر کے ایتھے آیا واں۔ مَیں کئی طریقیاں نال یہوواہ دی مدد نُوں محسوس کیتا۔ ایس وجہ توں مَیں اوہدے ہور نیڑے ہوندا گیا۔‏

جدوں مَیں پہلی وار جزیرہ بوگاینویل چ عبادت تے گیا تے اِک میاں بیوی مسکراندے ہوئے میرے کول آئے تے مینوں کہیا:‏ ”‏تُسی سانوں پچھانیا؟“‏ مینوں یاد آیا کہ جدوں مَیں پہلی وار پورٹ مورسبی آیا ساں تے مَیں اوس میاں بیوی نُوں گواہی دِتی سی۔ مَیں اوہناں نُوں بائبل کورس کرانا شروع کیتا سی پر فیر بعد چ مَیں اوس علاقے چ رہن والے اِک بھرا نُوں کہیا سی کہ اوہ اوہناں نُوں بائبل کورس کرائے۔ ہُن ایہہ میاں بیوی یہوواہ دے گواہ بن گئے سن۔ ایہہ اوہناں برکتاں وچوں اِک سی جیہڑیاں مینوں پاپوا نیو گنی چ تِن سال خدمت کرن دے دوران مِلیاں سن۔‏

مَیں 1978 چ کورون توں چلا گیا۔ پر جان توں پہلاں میری ملاقات اِک بھین نال ہوئی جدا ناں اڈیل سی۔ اوہ بوہت اچھی سی تے یہوواہ نال بوہت پیار کردی سی۔ اوہ اپنے دو بچیاں سموئیل تے شرلی دی دیکھ‌بھال کرن دے نال نال پہل‌کار دے طور تے وی خدمت کر رہی سی۔ ایہدے علاوہ اوہ اپنی وڈیری ماں دا وی خیال رکھدی سی۔ مَیں مئی 1981 چ اڈیل نال شادی کرن لئی واپس فلپائن آیا۔ شادی توں بعد اَسی دونواں نے مِل کے پہل‌کار دے طور تے خدمت کیتی تے اپنے خاندان دا خیال رکھیا۔‏

بھانویں کہ ہُن میرے بیوی بچے سن پر فیر وی 1983 چ مینوں فیر توں خاص پہل‌کار بنا دِتا گیا تے سانوں پالاوان دے صوبے چ لیناپاکان جزیرے تے خدمت کرن لئی گھلیا گیا۔ میرا پورا خاندان ایس جزیرے تے آ کے رہن لگ پیا۔ اوتھے کوئی یہوواہ دا گواہ نئیں سی۔ ایہدے تقریباً اِک سال بعد اڈیل دی امی فوت ہو گئی۔ ایہدے باوجود اَسی مُنادی کرن چ لگے رہے جدی وجہ توں اَسی اوہناں دی موت دا غم برداشت کر پائے۔ چھیتی ای اَسی لیناپاکان جزیرے تے بوہت سارے لوکاں نُوں بائبل کورس کران لگ پئے۔ اوہناں لوکاں نُوں عبادت تے آن دا ایناں شوق سی کہ سانوں چھیتی ای اِک چھوٹی عبادت گاہ دی ضرورت پے گئی۔ ایس لئی اَسی آپ اِک عبادت‌گاہ بنا لئی۔ سانوں ایتھے آئے حالے تِن سال ہوئے سن پر فیر وی مسیح دی موت دی یاد گیری تے 110 لوک آئے جنہاں نُوں ویکھ کے اَسی بوہت خوش ہوئے۔ ساڈے جان توں بعد ایہناں چوں بوہت سارے لوک یہوواہ دے گواہ بن گئے۔‏

1986چ مینوں کولیون جزیرے تے خدمت کرن لئی گھلیا گیا جتھے کوڑھ دے مریضاں دی اِک کالونی سی۔ ایتھے آن توں بعد اڈیل نُوں وی خاص پہل‌کار بنا دِتا گیا۔ شروع شروع چ اَسی ایس گل توں گھبرائے ہوئے ساں کہ سانوں اوہناں لوکاں چ مُنادی کرنی پئے گی جیہڑے کوڑھ دی بیماری دی وجہ توں بڑی بھیڑی حالت چ نیں۔ پر اوتھوں دے بھین بھراواں نے سانوں تسلی دِتی کہ ایہناں لوکاں نے اپنا علاج کرایا  اے۔ ایس لئی ایس بیماری دے لگن دا خطرہ بوہت گھٹ اے۔ کوڑھ دے کجھ مریض تے ساڈی اِک بھین دے گھر عبادت تے وی آندے سن۔ چھیتی ای اَسی گھبرائے بغیر ایہناں لوکاں چ مُنادی کرن لگ پئے۔ سانوں ایس گل توں بڑی خوشی مِلدی سی کہ اَسی ایہو جہے لوکاں نُوں بائبل توں امید دے رہے آں جنہاں نُوں لگدا اے کہ خدا تے انساناں دونواں نے ای اوہناں نُوں چھڈ دِتا اے۔ جدوں ایہناں لوکاں نُوں پتہ چلدا سی کہ اِک دن اوہ بالکل ٹھیک ہو جان گے تے اوہناں دے چہرے خوشی نال کِھڑ جاندے سن۔ اوہناں دی خوشی ویکھ کے ساڈا دل وی خوشی نال بھر جاندا سی۔—‏لُوقا 5:‏12، 13‏۔‏

مَیں تے اڈیل نے کورون توں دو جوان بھیناں نُوں کولیون آن دی دعوت دِتی تاکہ ساڈے بچے اپنے دوستاں نال وقت گزار سکن۔ سموئیل، شرلی تے اوہ دو بھیناں مِل کے مُنادی کردیاں سن۔ اوہ اوہناں بچیاں نُوں بائبل کورس کراندے سن جنہاں دے ماں پیو نُوں اَسی بائبل کورس کرانے ساں۔ اِک وقت آیا جدوں اَسی 11 خانداناں نُوں بائبل کورس کرا رہے ساں۔ چھیتی ای اَسی اینے لوکاں نُوں بائبل کورس کرانا شروع کر دِتا کہ اوتھے اِک کلیسیا بن گئی۔‏

شروع شروع چ اوس علاقے چ میرے علاوہ کوئی ہور بزرگ نئیں سی۔ ایس لئی برانچ دے بھراواں نے مینوں کہیا کہ مَیں کولیون چ 8 مبشراں لئی ہر ہفتے عبادتاں کراواں تے ماریلی پِنڈ چ 9 مبشراں لئی وی عبادتاں کراواں۔ ایس پِنڈ چ پونچن لئی سانوں کشتی چ تِن گھنٹے سفر کرنا پیندا سی۔ عبادت توں بعد مَیں تے میرا خاندان کئی گھنٹے پیدل پہاڑی علاقیاں چوں لنگھ کے ہالسی ناں دے پِنڈ چ بائبل کورس کران جانے ساں۔‏

فیر ماریلی تے ہالسی چ اینے لوک یہوواہ دی عبادت کرن لگ پئے کہ سانوں ایہناں دونواں پِنڈاں چ ای عبادت‌گاہ بنانی پئی۔ لیناپاکان چ رہن والے بھین بھراواں نے تے اوہناں لوکاں نے وی جیہڑے بائبل چ دلچسپی رکھدے سن، عبادت‌گاہ نُوں بنان لئی سامان دِتا تے ایہنوں بنان چ مدد کیتی۔ ماریلی دی عبادت‌گاہ چ تقریباً 200 لوک بہہ سکدے سن تے ایہنوں اسانی نال وڈا وی کیتا جا سکدا سی تاکہ اوتھے کنونشناں ہو سکن۔‏

جدوں ساڈے بچے وڈے ہو گئے تے مَیں 1993 چ فلپائن چ حلقے دے نگہبان دے طور تے خدمت کرنی شروع کر دِتی۔ فیر مَیں 2000 چ منسٹریل ٹریننگ سکول چ گیا جتھے مینوں ایس سکول چ تربیت دین لئی ٹریننگ دِتی گئی۔ مینوں لگدا سی کہ مَیں ایس کم دے لائق نئیں آں پر اڈیل ہمیشاں میرا حوصلہ ودھاندی سی۔ اوہنے مینوں ایہہ گل یاد دَوائی کہ یہوواہ مینوں ایس نوِیں ذمے‌داری نُوں پورا کرن لئی طاقت ضرور دَوے گا۔ (‏فِلپّیوں 4:‏13‏)‏ اڈیل ایہہ گل پورے یقین نال کہہ سکدی سی کیونکہ اوہ وی صحت دے مسئلیاں دے باوجود لگن نال یہوواہ دی خدمت کر رہی سی۔‏

 2006 چ سانوں پتہ چلیا کہ اڈیل نُوں رعشہ دی بیماری اے۔ (‏ایس بیماری چ کسے انسان دے دماغ دے اوس حصے چ خرابی پیدا ہو جاندی اے جدی وجہ توں جسم حرکت کردا اے۔)‏ سانوں ایہہ سُن کے بڑا صدمہ لگیا۔ مَیں اوس ویلے وی منسٹریل ٹریننگ سکول چ تربیت دے رہیا ساں۔ مَیں اڈیل نُوں کہیا کہ اَسی اپنی خدمت چھڈ دینے آں تاکہ مَیں تیرا خیال رکھ سکاں۔ اڈیل نے کہیا:‏ ”‏تُسی کسے ایہو جہے ڈاکٹر نُوں لبھو جیہڑا میری بیماری دا علاج کر سکے۔ مینوں پتہ اے کہ یہوواہ ساڈی مدد کرے گا تاکہ اَسی اوہدی خدمت نُوں جاری رکھ سکئے۔“‏ اگلے چھ سالاں تک اڈیل شکایت کیتے بغیر یہوواہ دی خدمت کردی رہی۔ جدوں اوہ چلن پھرن دے قابل نئیں رہی تے اوہدوں وی اوہ ویل‌چیئر تے مُنادی کردی سی۔ تے جدوں اوہنوں بولنا مشکل لگدا سی تے اوہ عبادتاں چ صرف اِک یاں دو لفظاں چ جواب دیندی سی۔ بوہت سارے بھین بھرا اڈیل نُوں میسج کردے سن تے اوہدی چنگی مثال لئی اوہدی تعریف کردے سن۔ میری پیاری بیوی 2013 چ فوت ہو گئی۔ مَیں اوہدے نال اپنی زندگی دے 30 توں زیادہ سال گزارے سن۔ پر اوہدے جان توں بعد مَیں اِک واری فیر توں کلّا ہو گیا تے غم دے بوجھ تھلے دب گیا۔‏

اڈیل ہمیشاں چاہندی سی کہ مَیں اپنی خدمت کدی نہ چھڈاں تے مَیں اِنج ای کیتا۔ مَیں اپنے آپ نُوں یہوواہ دی خدمت چ مصروف رکھیا تے اِنج مَیں اپنے کلّے پن تے قابو پا سکیا۔ 2014 توں 2017 تک مَیں اوہناں مُلکاں چ ٹاگالوگ زبان والیاں کلیسیاواں دا دورہ کیتا جتھے ساڈے کم تے پابندی سی۔ ایہدے بعد مَیں تائیوان، امریکہ تے کینیڈا چ ٹاگالوگ کلیسیاواں دا دورہ کیتا۔ 2019 چ مَیں بھارت تے تھائی‌لینڈ چ بادشاہی دے مُناداں لئی سکول چ جان والے بھین بھراواں نُوں انگریزی سکھائی۔ مینوں ایہناں ساریاں ذمے‌داریاں نُوں پورا کر کے بڑی خوشی مِلی۔ جدوں مَیں یہوواہ دی خدمت چ مصروف رہنا واں تے مَیں خوش رہنا واں۔‏

اپنی ہر ذمے‌داری چ مَیں جیہڑے جیہڑے بھین بھراواں نُوں مِلیا، مینوں اوہناں نال پیار ہو گیا۔ میرے لئی اوہناں نُوں چھڈ کے جانا کدی وی اسان نئیں ہوندا سی۔ پر ایس دوران مَیں یہوواہ تے پورا بھروسا کرنا سکھیا۔ مَیں ہمیشاں اوہدی مدد نُوں محسوس کیتا اے جدی وجہ توں مَیں نویں حالاتاں تے نوِیاں تبدیلیاں دے مطابق ڈھل سکیا۔ ہُن مَیں فلپائن چ خاص پہل‌کار دے طور تے خدمت کر رہیا واں۔ مَیں نوِیں کلیسیا دے بھین بھراواں نال رَل مِل گیا واں جیہڑے میرے لئی میرے خاندان وانگوں نیں۔ اوہ میرا بڑا خیال رکھدے نیں۔ مینوں سموئیل تے شرلی نُوں ویکھ کے وی بڑی خوشی ہوندی اے جیہڑے اپنی ماں دی چنگی مثال تے عمل کر رہے نیں۔—‏3-‏یوحنا 4‏۔‏

مَیں اپنی زندگی چ بڑیاں مشکلاں دا سامنا کیتا اے جنہاں وچوں اِک ایہہ وے کہ مَیں اپنی بیوی دی بیماری تے موت ویکھی۔ مینوں کئی وار اپنے آپ نُوں نویں حالاتاں مطابق ڈھالنا پیا۔ پر مَیں ویکھیا اے کہ یہوواہ ساڈے وچوں کسے توں وی دُور نئیں۔ (‏اعمال 17:‏27‏)‏ یہوواہ دا ہتھ ایناں چھوٹا نئیں اے کہ اوہ اپنے بندیاں نُوں مدد تے طاقت نہ دے سکے، فیر بھانویں اوہ دُنیا دے کسے وی کونے چ رہندے ہون۔ (‏یسعیاہ 59:‏1‏)‏ یہوواہ میری چٹان اے تے اوہ پوری زندگی میرے نال رہیا اے تے ایہدے لئی مَیں اوہدا بڑا شکرگزار آں۔ ایس گل چ کوئی شک نئیں کہ مَیں کدی وی کلّا نئیں ساں۔‏