مطالعے دا مضمون نمبر 23
ماپیو—اپنے بچیاں دے دل چ یہوواہ لئی محبت پیدا کرو
یہوواہ اپنے خدا نال اپنے سارے دل، اپنی ساری جان تے اپنی ساری عقل نال پیار رکھو۔—متی 22:37۔
گیت نمبر 134: بچے خدا دی امانت نیں
مضمون تے اِک نظر *
1، 2. جدوں ساڈی زندگی چ کوئی تبدیلی آندی اے تے ساڈے لئی کجھ ایتاں دی اہمیت ودھ کیوں جاندی اے؟
اپنی شادی والے دن دُلہا تے دُلہن اپنی شادی دی تقریر نُوں بڑے دھیان نال سُن دے نیں۔ ایس تقریر چ بائبل دے جیہڑے اصول دَسے جاندے نیں،اوہ اوہناں نے پہلاں وی سُنے ہوندے نیں۔پر ایس دن دے بعد اوہناں لئی ایہناں اصولاں دی اہمیت ہور وی زیادہ ودھ جاندی اے۔ پر کیوں؟ کیونکہ ہُن اوہ اِک میاں بیوی دے طور تے مِل کے ایہناں اصولاں تے عمل کرن گے۔
2 اوہدوں وی اِنج ای ہوندا اے جدوں اوہناں دے بچے پیدا ہوندے نیں۔ شاید پہلاں اوہناں نے بچیاں دی پرورش کرن بارے بوہت ساریاں تقریراں سُنیاں ہون۔ پر ہُن ماں پیو بنن دے بعد ایہناں تقریراں چ دَسے گئے اصولاں دی اہمیت اوہناں لئی ہور ودھ جاندی اے۔کیونکہ ہُن اوہناں دا اِک بچہ ہوندا اے جنہوں پالنا پوسنا اوہناں دی ذمےداری ہوندی اے۔ ایہہ اِک بوہت وڈی تے اہم ذمےداری اے۔ ایہدے چ کوئی شک نئیں کہ جدوں ساڈی زندگی چ کجھ تبدیلیاں آندیاں نیں تے بائبل دے کجھ اصول ساڈے لئی ہور وی زیادہ اہم بن جاندے نیں۔ ایس لئی یہوواہ دے بندے اوہدے کلام نُوں پڑھدے تے بنیاِسرائیل دے بادشاہواں وانگوں اپنی ساری زندگی ایہناں تے سوچوچار کردے نیں۔—اِستثنا 17:19۔
3. ایس مضمون چ اَسی کیہڑیاں گلاں تے غور کراں گے؟
3 ماں پیو لئی ایہہ بڑے مان دی گل اے کہ اوہناں نُوں اپنے بچیاں نُوں یہوواہ بارے سکھان دی ذمےداری ملی اے۔ پر ایناں ای کافی نئیں اے کہ تُسی اوہناں نُوں بس یہوواہ بارے دَسو۔ توانوں اپنے بچیاں دی مدد کرنی چاہیدی اے تاکہ اوہ یہوواہ نُوں دلوں پیار کرن۔ تُسی اِنج کیویں کر سکدے او؟ ایس مضمون چ اَسی ایس بارے بائبل چوں چار اصولاں تے غور کراں گے۔ (2-تیمُتھیُس 3:16) اَسی ایہہ وی ویکھاں گے کہ بائبل دے اصولاں تے عمل کرن نال ماں پیو نُوں کیہہ فائدہ ہوندا اے۔
چار اصول جیہڑے ماں پیو دے کم آ سکدے نیں
4. اوہ اِک اصول کیہڑا اے جدے نال ماں پیو اپنے بچیاں دے دل چ یہوواہ لئی محبت پیدا کر سکدے نیں؟ (یعقوب 1:5)
4 پہلا اصول: یہوواہ توں رہنمائی منگو۔ یہوواہ توں دُعا کرو کہ اوہ توانوں عقل تے سمجھ دَوے تاکہ تُسی اپنے بچیاں دے دل چ اوہدے لئی محبت پیدا کر سکو۔ (یعقوب 1:5 نُوں پڑھو۔) یہوواہ نالوں چنگا مشورہ توانوں کوئی ہور نئیں دے سکدا۔ اَسی ایہہ گل کیوں کہہ سکنے آں؟ آؤ دو گلاں تے غور کریئے۔ پہلی گل ایہہ اے کہ اِک باپ دے طور تے یہوواہ کول سب توں زیادہ تجربہ اے۔ (زبور 36:9) تے دُوجی گل ایہہ وے کہ اوہ جیہڑا وی مشورہ دیندا اے، اوہدے تے عمل کرن نال ہمیشاں چنگا نتیجہ نکل دا اے۔—یسعیاہ 48:17۔
5. (الف) یہوواہ دی تنظیم ماں پیو دی مدد کیویں کردی اے؟ (ب) تُسی بھرا ابیلیو تے بھین اُولا دی ویڈیو ویکھن دے بعد بچیاں دی پرورش کرن بارے اوہناں دی مثال توں کیہہ سکھیا اے؟
5 یہوواہ اپنے کلام تے اپنی تنظیم دے ذریعے ماں پیو نُوں ایہو جہی معلومات دیندا اے جدے نال اوہ اپنے بچیاں نُوں یہوواہ نال پیار کرنا سکھا سکدے نیں۔ (متی 24:45) مثال دے طور تے اُردو زبان چ سلسلہوار مضمون ”گھریلو زندگی کو خوشگوار بنائیں“ چ ماں پیو نُوں بچیاں دی پرورش کرن بارے بڑے ودھیا مشورے دِتے گئے نیں۔ ایہہ سلسلہوار مضمون پہلاں ”جاگو!“ رسالے چ چھپ دا ہوندا سی پر ہُن ایہہ ساڈی ویبسائٹ تے موجود اے۔ ایہدے علاوہ ویبسائٹ jw.org تے بوہت سارے ایہو جہے اِنٹرویوز تے ویڈیوز نیں جنہاں دی مدد نال ماں پیو یہوواہ دے اصولاں تے عمل کردے ہوئیاں اپنے بچیاں دی پرورش کر سکدے نیں۔ *—امثال 2:4-6۔
6. اِک ماں پیو یہوواہ دی تنظیم وَلّوں مِلن والی رہنمائی بارے کیہو جیہا محسوس کردا اے؟
6 بوہت سارے ماں پیو نے کہیا اے کہ جیس طرحاں یہوواہ اپنی تنظیم دے ذریعے اوہناں دی مدد کردا اے، اوہ اوہدے لئی بڑے شکرگزار نیں۔ اِک پیو نے کہیا: ”ساڈے تِن بچے نیں تے اوہناں ساریاں دے دل چ یہوواہ لئی محبت پیدا کرنا ایناں سوکھا نئیں اے۔ میں تے میری بیوی دُعا چ ہمیشاں یہوواہ کولوں مدد منگنے آں تے اَسی ویکھیا اے کہ اکثر ساڈی اوسے صورتحال بارے کوئی مضمون یاں ویڈیو آ جاندی اے جدے چوں اَسی لنگھ رہے ہنے آں۔ اَسی ہر قدم تے یہوواہ کولوں رہنمائی منگنے آں۔“ ایس بھرا تے اوہدی بیوی نے ویکھیا اے کہ ایہناں مضموناں تے ویڈیوز دے ذریعے اوہ یہوواہ دے نیڑے ہوندے جا رہے نیں۔
7. ایہہ کیوں ضروری اے کہ ماں پیو اپنے بچیاں لئی چنگی مثال قائم کرن؟ (رومیوں 2:21)
7 دُوجا اصول: چنگی مثال قائم کرو۔ ساڈے بچے ساڈے ہر کم نُوں نوٹ کردے نیں تے زیادہتر اوہ اوہی کم کردے نیں جیہڑے سانوں کردیاں ویکھدے نیں۔ ایہہ سچ اے کہ ماں پیو کولوں غلطیاں ہوندیاں نیں۔ (رومیوں 3:23) پر فیر وی ماں پیو نُوں چاہی دا اے کہ اپنے بچیاں لئی چنگی مثال قائم کرن دی پوری کوشش کرن۔ (رومیوں 2:21 نُوں پڑھو۔) بچیاں بارے گل کردے ہوئیاں اِک پیو کہندا اے: ”بچے فوم وانگوں ہوندے نیں جیہڑا اپنے اندر ہر چیز نُوں جذب کر لیندا اے۔“ اوہ اَگے کہندا اے: ”جے اَسی اوہناں نُوں کوئی ایہو جیہا کم کرن نُوں کہنے آں جیہڑا اَسی آپ نئیں کردے تے اوہ سانوں ایس گل دا احساس دَوا دیندے نیں۔“ جے اَسی چاہنے آں کہ ساڈے بچے یہوواہ نال محبت کرن تے پہلاں سانوں اپنے کماں توں وکھانا چاہی دا اے کہ اَسی یہوواہ نال بوہت محبت کرنے آں۔
8، 9. بھرا اینڈریو تے بھین ایما نے جو کہیا اوہدے توں تُسی کیہہ سکھیا اے؟
8 ماں پیو بوہت سارے طریقیاں نال اپنے بچیاں نُوں یہوواہ نال پیار کرنا سکھا سکدے نیں۔ غور کرو کہ 17 سال دا اِک بھرا جدا ناں اینڈریو اے، کہندا اے: ”میرے امی ابو نے مینوں سکھایا کہ دُعا کرنا کِنّاں ضروری اے۔ جے میں اپنی دُعا کر وی لینا ساں تے فیر وی ابو ہر رات نُوں میرے نال مِل کے دُعا کردے سن۔ امی ابو مینوں تے میری بھین نُوں ہمیشاں ایہہ کہندے سن کہ ”تُسی جِنّی واری چاہوو، یہوواہ نال گل کر سکدے او۔“ ایس وجہ توں دُعا میری زندگی دا بوہت ای اہم حصہ بن گئی۔ ہُن میرے لئی دُعا کرنا تے ایہہ محسوس کرنا اسان ہو گیا اے کہ یہوواہ میرا روحانی باپ اے تے اوہ مینوں بوہت پیار کردا اے۔“ ما پیو، ایس گل نُوں ہمیشاں یاد رکھو کہ جے تواڈے بچے ایہہ ویکھن گے کہ تُسی یہوواہ نال کِنّاں پیار کردے او تے اِنج اوہ وی اوہدے نال پیار کرن گے۔
9 ذرا بھین ایما دی مثال تے غور کرو۔ اوہدے ابو نے اوہنوں،اوہدی بھین تے امی نُوں چھڈ دِتا۔ اوس ویلے اوہناں دے ابو دے سِر تے بوہت زیادہ قرضہ سی تے ایہہ قرضہ بعد چ اوہناں دی امی نُوں لانا پیا۔ بھین ایما کہندی اے: ”کئی واری اِنج ہوندا سی کہ امی کول پیسے نئیں ہوندے سن۔ پر اوہ ہمیشاں ایس بارے گل کردی سی کہ یہوواہ کیویں اپنے بندیاں دِیاں لوڑاں نُوں پورا کردا اے تے اوہناں دا خیال رکھدا اے۔ امی جیس طرحاں زندگی گزار دی سی، اوہدے توں پتہ چلدا سی کہ اوہنوں ایس گل تے بوہت ای بھروسا اے۔ اوہ جیہڑیاں وی گلاں سانوں سکھا رہی سی، اوہناں تے آپ وی عمل کردی سی۔“ ماں پیو ایہدے توں کیہہ سکھدے نیں؟ ایہہ کہ اوہ مشکل حالاتاں چ وی اپنے بچیاں لئی چنگی مثال قائم کر سکدے نیں تے اوہناں نُوں بوہت کجھ سکھا سکھدے نیں۔—گلتیوں 6:9۔
10. اِسرائیلی ماں پیو کول اپنے بچیاں نُوں یہوواہ بارے سکھان لئی کیہڑے کیہڑے موقعے ہوندے سن؟ (اِستثنا 6:6، 7)
10 تیجا اُصول: اپنے بچیاں نال باقاعدگی نال گل کرو۔ یہوواہ نےاِسرائیلیاں نُوں حکم دِتا کہ اوہ اپنے بچیاں نُوں باقاعدگی نال اوہدے بارے سکھان۔ (اِستثنا 6:6، 7 نُوں پڑھو۔) اِسرائیلیاں کول دن دے ویلے بوہت سارے موقعے ہوندے سن جدوں اوہ اپنے بچیاں نال گل کر سکدے سن تے اوہناں دے دل چ یہوواہ لئی محبت پیدا کر سکدے سن۔ مثال دے طور تے اِک چھوٹا اِسرائیلی منڈا بیہ بون تے فصل وڈھن چ اپنے پیو دی مدد کردا سی۔ اوہدی بھین دن چ کئی گھنٹے گھر دا کمکار کرن تے سلائی کڈھائی کرن چ اپنی ماں دا ساتھ دیندی سی۔ جدوں ماں پیو اپنے بچیاں نال مِل کے کمکار کردے سن تے اوہناں کول موقع ہوندا سی کہ اوہ اپنے بچیاں نُوں اہم گلاں بارے دَس سکن۔ مثال دے طور تے اوہ ایس بارے گل کر سکدے سن کہ یہوواہ کِنّاں چنگا اے تے اوہ گھر دے سارے جیاں دی کیس طرحاں مدد کر رہیا اے۔
11. اِک موقع کیہڑا اے جدے تے ماں پیو اپنے بچیاں نال گل کر سکدے نیں؟
11 ہُن پہلاں ورگا دَور نئیں رہیا۔ بوہت سارے مُلکاں چ ماں پیو تے بچے دن دے ویلے اِک دُوجے نال زیادہ وقت نئیں گزار پاندے۔ کیونکہ دن دے ویلے ماں پیو کم کر رہے ہوندے نیں تے بچے سکول گئے ہوندے نیں۔ ایس لئی ماں پیو نُوں اپنے بچیاں نال گل کرن لئی وقت ضرور کڈھنا چاہی دا اے۔ (اِفسیوں 5:15، 16؛ فِلپّیوں 1:10) اِنج کرن لئی خاندانی عبادت اِک بوہت ای ودھیا موقع ہوندا اے۔ الیگزینڈر ناں دا اِک نوجوان بھرا کہندا اے: ”میرے ابو ایس گل دا خیال رکھدے نیں کہ اَسی باقاعدگی نال خاندانی عبادت کرئیے تے اوہ کسے وی چیز نُوں ایس گل دی اجازت نئیں دیندے کہ اوہ سانوں اِنج کرن توں روکے۔ خاندانی عبادت توں بعد اَسی سارے اِک دُوجے نال گلبات کرنے آں۔“
12. خاندانی عبادت دے دوران گھر دے سربراہ نُوں کیہڑی گل یاد رکھنی چاہی دی اے؟
12 جے تُسی گھر دے سربراہ او تے تُسی کیہہ کر سکدے او تاکہ تواڈے بچیاں نُوں خاندانی عبادت کرن چ مزہ آئے؟ تُسی خاندانی عبادت چ ساڈی نوِیں کتاب ”خوشیاں بھری زندگی پاؤ—ہُن تے ہمیشاں تک“ نُوں استمال کر سکدے او۔ ایہدے ذریعے سارے گھر والیاں لئی گل کرنا اسان ہوئے گا۔ ایہہ سچ اے کہ تُسی چاہندے او کہ تواڈے بچے کُھل کے ایس بارے گل کرن کہ اوہ کیہہ سوچ رہے نیں تے کیہہ محسوس کر رہے نیں۔ ایس لئی خاندانی عبادت دے دوران اوہناں دِیاں غلطیاں تے گل نہ کرو تے نہ ای اوہناں نُوں جھڑکو۔ جے اوہ کجھ ایہو جیہا کہہ وی دیندے نیں جو بائبل دے اصولاں مطابق نئیں اے تے غصے چ نہ آؤ۔ ایہدی بجائے ایس گل تے خوش ہووو کہ اوہناں نے کُھل کے توانوں دَسیا اے کہ اوہ کیہہ سوچدے نیں تے کیہہ محسوس کردے نیں تے اوہناں نُوں کہوو کہ اوہ اِنج کردے رہن۔ تُسی اوہدوں ای اپنے بچیاں دی چنگی طرحاں مدد کر سکو گے جدوں توانوں پتہ ہوئے گا کہ اوہناں دے دل چ کیہہ اے۔
13. ہور کیہڑے موقعے ہوندے نیں جدوں ماں پیو یہوواہ دے نیڑے جان چ اپنے بچیاں دی مدد کر سکدے نیں؟
13 ماپیو، پورے دن چ ایہو جہے موقعیاں دی تلاش چ رہوو جدوں تُسی یہوواہ دے نیڑے جان چ اپنے بچیاں دی مدد کر سکدے او۔ ایس گل دا اِنتظار نہ کرو کہ تُسی اوہناں نُوں اوہدوں ای اپنے اسمانی باپ بارے سکھاؤ گے جدوں تُسی اوہناں نُوں بائبل کورس کراؤ گے۔ لیزا ناں دی اِک بھین کہندی اے: ”ساڈے آلے دوالے یہوواہ دِیاں بنائیاں ہوئیاں جیہڑیاں چیزاں نیں، اَسی اوہناں دے ذریعے اپنے بچیاں نُوں یہوواہ بارے سکھانے آں۔ مثال دے طور تے جدوں ساڈے کتےُ دیاں کجھ حرکتاں نُوں ویکھ کے بچے ہسدے نیں تے اَسی اوہناں نُوں سکھانے آں کہ یہوواہ نُوں ہاسا مذاق پسند اے تے اوہ چاہندا اے کہ اَسی خوش رہیے۔“
14. ایہہ ضروری کیوں اے کہ ماں پیو چنگے دوست بنان چ اپنے بچیاں دی مدد کرن؟ (امثال 13:20)
14 چوتھا اصول: چنگے دوست بنان چ اپنے بچیاں دی مدد کرو۔ خدا دے کلام چ صاف دَسیا گیا اے کہ ساڈے دوستاں دا ساڈے تے یاں تے چنگا اثر پیندا اے یاں فیر بھیڑا۔ (امثال 13:20 نُوں پڑھو۔) ما پیو کیہہ تُسی اپنے بچیاں دے دوستاں نُوں جان دے او؟ کیہہ تُسی اوہناں نُوں ملے او؟ کیہہ تُسی اوہناں نال وقت گزاریا اے؟ تُسی اپنے بچیاں دی مدد کیویں کر سکدے او تاکہ اوہ اِنج دے لوکاں نال دوستی کرن جیہڑے یہوواہ نُوں پیار کردے نیں؟ (1-کُرنتھیوں 15:33) تُسی اپنے گھر ایہو جہے بھین بھراواں نُوں بلا سکدے او جنہاں دی یہوواہ نال بوہت گُوڑھی دوستی اے تے تُسی اوہناں نال مِل کے فرق فرق کم کر سکدے او۔—زبور 119:63۔
15. ماںپیو کیہہ کر سکدے نیں تاکہ اوہناں دے بچے چنگے لوکاں نال دوستی کرن؟
15 ذرا بھرا ٹونی دی مثال تے غور کرو۔ اوہ دَسدا اے کہ اوہنے تے اوہدی بیوی نے اپنے بچیاں دی مدد کیویں کیتی تاکہ اوہ چنگے لوکاں نال دوستی کرن۔ اوہ کہندا اے: ”کئی سالاں توں میں تے میری بیوی فرق فرق عمراں دے بھین بھراواں نُوں اپنے گھر بلا رہے آں۔ اَسی اوہناں نال کھانا کھانے آں تے خاندانی عبادت کرنے آں۔ ایس طرحاں اَسی ایہو جہے بھین بھراواں نُوں جان پائے آں جیہڑے یہوواہ نُوں بڑا پیار کردے نیں تے اوہدی خدمت کرکے بڑے خوش نیں۔ ساڈے گھر چ حلقے دے نگہبان، مشنری تے کئی ہور بھین بھرا آ کے رُکے۔ اوہناں دے تجربے، جوش تے قربانی دے جذبے نُوں ویکھ کے ساڈے بچیاں تے بڑا گُوڑھا اثر ہویا تے اوہ یہوواہ دے نیڑے ہو گئے نیں۔“ ماپیو، پکا ارادہ کرو کہ تُسی اپنے بچیاں دی مدد کرو گے تاکہ اوہ چنگے دوست بنان۔
اُمید دا دامن نہ چھڈو
16. جے اِک بچہ کہندا اے کہ اوہ یہوواہ دی خدمت نئیں کرنا چاہندا تے ماںپیو کیہہ کر سکدے نیں؟
16 ہو سکدا اے کہ تواڈیاں لکھاں کوششاں دے باوجود وی تواڈا بچہ یہوواہ دی عبادت نہ کرنا چاہوے۔ ایہو جہی صورت چ تُسی کیہہ کر سکدے او؟ ایہہ نہ سوچو کہ تُسی اپنے بچے دی چنگی پرورش نئیں کیتی۔ یہوواہ نے تواڈے نال نال تواڈے بچیاں نُوں وی ایہہ فیصلہ کرن دی آزادی دِتی اے کہ اوہ اوہدی عبادت کرن گے یاں نئیں۔ جے تواڈے بچے نے یہوواہ نُوں چھڈن دا فیصلہ کیتا اے تے ایہہ امید نہ چھڈو کہ اوہ اِک دن اوہدے کول واپس آئے گا۔ بھٹکے ہوئے پُتر دی مثال نُوں یاد رکھو۔ (لُوقا 15:11-19، 22-24) اوہ سدھی راہ توں بھٹک گیا سی۔ پر آخر کار اوہ اپنے باپ کول واپس آ گیا سی۔ شاید کجھ لوک کہن: ”ایہہ تے بس کہانی سی۔ کیہہ اصل زندگی چ وی اِنج ہو سکدا اے؟“ جی بالکل۔ کجھ ایہو جیہا واقعہ ایلی ناں دے بھرا نال ہویا سی۔
17. توانوں بھرا ایلی دی مثال توں کیہہ حوصلہ ملیا اے؟
17 بھرا ایلی نے اپنے امی ابو بارے کہیا: ”اوہناں نے میرے دل چ یہوواہ خدا تے اوہدے کلام بائبل لئی محبت پیدا کرن دی پوری کوشش کیتی۔ پر جدوں میں جوان ہویا تے میں سدھی راہ توں بھٹک گیا۔“ ایلی نے چھپ کے بھیڑے کم کرنے شروع کر دِتے۔ اوہدے ماںپیو نے بوہت پیار تے صبر نال اوہدی مدد کرن دی کوشش کیتی۔ پر اوہنے اوہناں دی اِک نہ سنی۔ جدوں اوہ اپنے ماںپیو توں الگ رہن لگ پیا تے اوہ بوہت بھیڑے کماں چ پے گیا۔ پر کدیکدار اوہ اپنے دوست نال بائبل بارے گلبات کردا سی۔ بھرا ایلی دَسدا اے: ”جِنّاں زیادہ میں اپنے دوست نُوں یہوواہ بارے دَسنا ساں اوناں ای زیادہ میں یہوواہ بارے سوچن لگ پینا ساں۔ ہولی ہولی میرے دل چ پاک کلام دِیاں سچائیاں دے اوہ بیہ ودھنے شروع ہو گئے جیہڑے میرے ماںپیو نے بوئے سن۔“ فیر اِک ویلا آیا جدوں بھرا ایلی یہوواہ کول واپس آ گیا۔ * ذرا سوچو کہ جدوں بھرا ایلی یہوواہ وَل واپس آ گیا تے اوہدے ماںپیو نُوں ایہہ سوچ کے کِنّی خوشی ہوئی ہوئے گی کہ اوہناں نے بچپن توں ای بھرا ایلی دے دل چ یہوواہ لئی محبت پیدا کرن دی کوشش کیتی سی۔—2-تیمتھیس 3:14، 15۔
18. جیہڑے ماںپیو اپنے بچیاں دے دل چ یہوواہ لئی محبت پیدا کرن دی سخت کوشش کردے نیں، تُسی اوہناں بارے کیہہ محسوس کردے او؟
18 ماپیو، یہوواہ نے توانوں ایہہ شاندار شرف دِتا اے کہ تُسی اوہدے بندیاں دی اِک نوِیں نسل دی پرورش کرو۔ (زبور 78:4-6) ایہہ کوئی اسان کم نئیں اے۔ تُسی اپنے بچیاں دی مدد کرن لئی جیہڑی سخت محنت کر رہے او، اوہدے لئی اَسی توانوں شاباش دینے آں۔ جے تُسی اپنے بچیاں دے دل چ یہوواہ لئی محبت پیدا کرن دی کوشش کردے رہوو گے تے یہوواہ وَلّوں اوہناں دی تربیت تے رہنمائی کردے رہوو گے تے فیر ایس گل تے پکا یقین رکھو کہ تواڈا اسمانی باپ تواڈے توں بوہت خوش ہوئے گا۔—اِفسیوں 6:4۔
گیت نمبر 133: جوانی وچ یہوواہ دی سیوا کرو
^ یہوواہ دی عبادت کرن والے لوک اپنے بچیاں نُوں بوہت پیار کردے نیں۔ اوہ اوہناں دِیاں لوڑاں پوریاں کرن تے اوہناں نُوں خوش رکھن لئی سخت محنت کردے نیں۔ پر ماں پیو سب توں ضروری کم ایہہ کردے نیں کہ اوہ اپنے بچیاں دے دل چ یہوواہ لئی محبت پیدا کرن دی پوری کوشش کردے نیں۔ ایس مضمون چ اَسی بائبل چوں چار ایہو جہے اصولاں تے گل کراں گے جیہڑے ایس اہم کم نُوں کرن چ ماں پیو دی مدد کر سکدے نیں۔
^ ویبسائٹ jw.org تے ویڈیو یہوواہ نے سانوں اپنے بچیاں دی تربیت تے دیکھبھال کرنا سکھایا نُوں ویکھو۔
^ ہور جانن لئی اُردو زبان چ مضمون ”پاک کلام کی تعلیم زندگی سنوارتی ہے—مجھے یہوواہ کی طرف لوٹنے کی ضرورت تھی“ نُوں ویکھو۔ ایہدے لئی jw.org تے تلاش دے خانے چ ایہہ عنوان لکھو تے فیر تلاش دا بٹن دباؤ۔
^ تصویر دی وضاحت: اِک پیو اپنے پُتر تے اوہدے دوست نال باسکٹ بال کھیڈ رہیا اے تاکہ اوہ اپنے پُتر دے دوست نُوں جان سکے۔