مطالعے دا مضمون نمبر 19
مکاشفہ دی کتاب ساڈے لئی اہم کیوں اے؟
اوہ بندہ خوش رہندا اے جیہڑا ایس کتاب چ لکھے پیغام نُوں اُچی آواز چ پڑھدا اے۔—مکاشفہ 1:3۔
گیت نمبر 20: انمول بیٹے دی قربانی
مضمون تے اِک نظر *
1، 2. مکاشفہ دی کتاب تے دھیان دین دی اِک وجہ کیہہ اے؟
شاید کدی کسے نیں توانوں اپنیاں تصویراں دا البم وکھایا ہووے۔ ہو سکدا اے کہ البم چ تُسی بوہت سارے ایہو جہے لوکاں دِیاں تصویراں ویکھیاں ہون جنہاں نُوں تُسی نئیں جان دے سو۔ پر فیر تواڈے سامنے اِک ایہو جہی تصویر آئی جنہوں ویکھ کے تُسی رُک گئے تے اوہنوں بڑے غور نال ویکھن لگ پئے۔ پر کیوں؟ کیونکہ اوس تصویر چ تُسی آپ سو۔ تُسی ایہہ سوچن لگ پئے کہ ایہہ تصویر کدوں تے کتھے کھچی گئی سی۔ فیر تُسی تصویر چ دُوجے لوکاں نُوں پچھانن دی کوشش کیتی۔ اوہ تصویر تواڈے لئی واقعی بڑی خاص سی۔
2 مکاشفہ دی کتاب وی اوس تصویر وانگوں اے۔ اَسی دو گلاں دی وجہ توں ایہہ کہہ سکنے آں۔ پہلی گل ایہہ وے کہ ایہہ کتاب ساڈے لئی لکھی گئی اے۔ ایہدی پہلی ایت چ لکھیا اے کہ یسوع مسیح وَلّوں مکاشفہ جیہڑا خدا نے اوہنوں دِتا تاکہ اوہ خدا دے بندیاں نُوں اوہ گلاں وکھائے جیہڑیاں چھیتی ہون والیاں نیں۔ (مکاشفہ 1:1) ایہدا مطلب اے کہ مکاشفہ چ لکھیاں گلاں سارے لوکاں لئی نئیں سگوں خدا دے بندیاں لئی نیں۔ ایہدے چ حیرانی دی کوئی گل نئیں کہ خدا دے بندیاں دے طور تے اَسی وی ایس کتاب چ لکھیاں پیشینگوئیاں دے پورا ہون چ اپنا کردار نبھا رہے آں۔ ایہہ بالکل اِنج ای اے جیویں اَسی اِک ایہو جہی تصویر ویکھ رہے آں جدے چ اَسی آپ وی آں۔
3، 4. مکاشفہ دی کتاب دے مطابق ایہدے چ لکھیاں پیشینگوئیاں نے کدوں پورا ہونا سی؟ تے ایہدی وجہ توں سانوں کیہہ کرنا چاہی دا اے؟
3 مکاشفہ دی کتاب چ لکھیاں پیشینگوئیاں تے دھیان دین دی دُوجی وجہ ایہناں پیشینگوئیاں دے پورا ہون دا وقت اے۔یوحنا رسول نے دَسیا کہ ایہناں پیشینگوئیاں نے کدوں پورا ہونا سی۔ اوہنے کہیا کہ میں پا ک روح دے اثر چ مالک دے دن چ پونچ گیا۔ (مکاشفہ 1:10) یوحنا نے ایہہ گل تقریباً 96 عیسوی چ لکھی۔ اوہدوں مالک دا دن شروع ہون چ کافی دیر سی۔ (متی 25:14، 19؛ لُوقا 19:12) بائبل دی پیشینگوئی دے مطابق ایہہ دن 1914 چ شروع ہویا جدوں یسوع اسمان تے بادشاہ بنیا۔ اوہدوں توں مکاشفہ چ لکھیاں پیشینگوئیاں جنہاں دا تعلق خدا دے بندیاں نال اے پوریاں ہونیاں شروع ہو گئیاں۔ ایہدے توں پتہ چلدا اے کہ اَسی مالک دے دن چ رہ رہے آں۔
4 کیونکہ اَسی ایس خاص دَور چ رہ رہے آں ایس لئی سانوں مکاشفہ 1:3 چ لکھی ایس گل تے ہور وی دھیان دین دی لوڑ اے: اوہ شخص خوش رہندا اے جیہڑا ایس کتاب چ لکھے پیغام نُوں اُچی آواز چ پڑھدا اے تے اوہ لوک خوش رہندے نیں جیہڑے ایہدے چ دَسیاں ہوئیاں گلاں نُوں سُن دے تے ایہدے تے عمل کر دے نیں کیونکہ طے کیتا ہویا ویلا نیڑے وے۔ ایہدے چ کوئی شک نئیں کہ سانوں ایس کتاب چ لکھے پیغام نُوں اُچی آواز چ پڑھن، ایہدے چ دَسیاں گلاں نُوں سُنن تے ایہناں تے عمل کرن دی ضرورت اے۔ آؤ، ایہناں چوں کجھ گلاں تے غور کریئے جنہاں تے سانوں عمل کرنا چاہی دا اے۔
یہوواہ دی عبادت اُنج ای کرو جِنج اوہ چاہندا اے
5. مکاشفہ دی کتاب چ ایس گل تے کیویں زور دِتا گیا اے کہ سانوں یہوواہ دی عبادت اُنج ای کرنی چاہی دی اے جِنج اوہ چاہندا اے؟
5 مکاشفہ دی کتاب دے پہلے باب توں ای پتہ چلدا اے کہ یسوع مسیح ایہہ چنگی طرحاں جان دا اے کہ کلیسیاواں چ کیہہ ہو رہیا اے۔ (مکاشفہ 1:12-16، 20؛ 2:1) ایہدا ثبوت اوہ پیغام نیں جیہڑے یسوع نے صوبہ آسیہ دِیاں سَت کلیسیاواں نُوں گھلے۔ ایہناں چ یسوع نے پہلی صدی دے مسیحیاں نُوں واضح ہدیتاں دِتیاں تاکہ اوہ یہوواہ دی اُنج ای عبادت کرن جِنج اوہ چاہندا اے۔ ایہہ ہدیتاں اَج ساڈے لئی وی نیں۔ ایہدے توں سانوں کیہہ پتہ چلدا اے؟ ایہہ کہ ساڈا پیشوا یسوع مسیح چنگی طرحاں جان دا اے کہ یہوواہ نال ساڈی دوستی کیہو جہی اے۔ یسوع مسیح ساڈی رہنمائی تے حفاظت کر رہیا اے تے اوہدی نظر توں کوئی گل چھپی نئیں۔ اوہ جان دا اے کہ یہوواہ دے نیڑے رہن لئی سانوں کیس چیز دی لوڑ اے۔ اوہنے کیہڑی ہدیت دِتی سی جدے تے اَج سانوں عمل کرنا چاہی دا اے؟
6. (الف) مکاشفہ 2:3، 4 چ لکھی یسوع دی گل دے مطابق اِفسس دی کلیسیا چ کیہڑا مسئلہ سی؟(ب) اَسی ایہدے توں کیہہ سکھنے آں؟
6 مکاشفہ 2:3، 4 نُوں پڑھو۔ سانوں اپنے دل چوں اوہ محبت گھٹ نئیں ہون دینی چاہی دی جیہڑی اَسی شروع چ یہوواہ نال کر نے ساں۔ یسوع نے اِفسس دی کلیسیا نُوں جیہڑا پیغام گھلیا اوہدے توں پتہ چلدا اے کہ اوتھوں دے مسیح بوہت ساریاں مشکلاں دے باوجود ثابت قدم رہے تے یہوواہ دی عبادت کردے رہے۔ پر اوہناں دے دل چ یہوواہ لئی اوہ محبت نہ رہی جیہڑی اوہ شروع چ اوہدے نال کردے سن۔ اوہناں نُوں اوس محبت نُوں فیر توں جگان دی لوڑ سی، نئیں تے یہوواہ نے اوہناں دی عبادت نُوں قبول نئیں کرنا سی۔ ایسے طرحاں اَج سانوں وی مشکلاں چ ثابت قدم رہن دے علاوہ کجھ ہور وی کرنا چاہی دا اے۔ مشکلاں چ ثابت قدم رہن دے پچھے وجہ وی صحی ہونی چاہی دی اے۔ یہوواہ صرف ایہہ نئیں ویکھدا کہ اَسی کیہہ کر رہے آں سگوں اوہ ایہہ وی ویکھدا اے کہ اَسی ایہہ کیس نیت نال کر رہے آں۔اوہدی نظر چ ایہہ گل بوہت اہم اے۔ اوہ چاہندا اے کہ اَسی اوہدی عبادت ایس لئی کریئے کیونکہ اَسی اوہدے نال محبت کرنے آں تے اوہدے شکرگزار آں۔—امثال 16:2؛ مرقس 12:29، 30۔
7. (الف) مکاشفہ 3:1-3 چ لکھی یسوع دی گل دے مطابق سردیس دی کلیسیا چ کیہڑا مسئلہ سی؟ (ب) اَسی ایہدے توں کیہہ سکھنے آں؟
7 مکاشفہ 3:1-3 نُوں پڑھو۔ سانوں جاگدے رہنا چاہی دا اے۔ سردیس دی کلیسیا چ اِک فرق مسئلہ سی۔ اوتھوں دے مسیحی پہلے بڑے جوش نال یہوواہ دی عبادت کردے سن، پر فیر اوہ ہولی ہولی ایہدے چ ڈِھلے پے گے۔ ایس لئی یسوع مسیح نے اوہناں نُوں کہیا کہ اوہ جاگ جان۔ ایہدے توں سانوں کیہہ پتہ چلدا اے؟ ایہہ کہ یہوواہ ساڈی اوس محنت نُوں نئیں بھلے گا جیہڑی اَسی اوہدی خدمت چ کیتی اے۔ (عبرانیوں 6:10) پر سانوں ایہہ نئیں سوچنا چاہی دا کہ اَسی یہوواہ دی بڑی خدمت کر لئی اے تے ہُن سانوں اوہدی خدمت کرن دی لوڑ نئیں اے۔ شاید ساڈے حالات اجازت نہ دین کہ اَسی پہلے وانگوں ای اوہدی خدمت کریئے۔پر فیر وی سانوں مالک دی خدمت چ مصروف رہنا چاہی دا اے تے آخر تک چوکس تے جاگدے رہنا چاہی دا اے۔—1-کُرنتھیوں 15:58؛ متی 24:13؛ مرقس 13:33۔
8. مکاشفہ 3:15-17 چ یسوع مسیح نے لودیکیہ دی کلیسیا نُوں جیہڑی گل کہی اوہدے توں اَسی کیہہ سکھنے آں؟
8 مکاشفہ 3:15-17 نُوں پڑھو۔ سانوں پورے جوش نال تے دلوں یہوواہ دی عبادت کرنی چاہی دی اے۔ لودیکیہ دی کلیسیا چ اِک فرق مسئلہ سی۔ اوتھوں دے مسیحی یہوواہ دی عبادت چ نہ تے گرم سن تے نہ ای ٹھنڈے۔ کیونکہ اوہ پورے دل نال یہوواہ دی عبادت نئیں کر رہے سن ایس لئی یسوع مسیح نے اوہناں کہیا کہ اوہ مصیبت دے مارے تے ترس دے لائق نیں۔ (مکاشفہ 3:19) اوہناں نُوں چاہی دا سی کہ اوہ جوش نال یہوواہ دی عبادت کرن۔ (مکاشفہ 3:18) ایہدے توں اَسی کیہہ سکھنے آں؟ جے یہوواہ دی عبادت لئی ساڈا جوش پہلے ورگا نئیں رہیا تے سانوں اپنے دل چ اوہناں چیزاں لئی قدر ودھانی چاہی دی اے جیہڑیاں یہوواہ تے اوہدی تنظیم وَلّوں سانوں مِل رہیاں نیں۔ سانوں عیش تے آرام دی زندگی گزارن لئی اینی محنت نئیں کرنی چاہی دی کہ یہوواہ دی عبادت ساڈی زندگی چ اینی اہم ای نہ رہوے۔
9. یسوع مسیح نے پرگمن تے تھواتیرہ دِیاں کلیسیاواں نُوں جیہڑا پیغام دِتا اوہدے مطابق سانوں کیس خطرے توں بچنا چاہی دا اے؟
9 سانوں اوہناں لوکاں دی تلیم توں دُور رہنا چاہی دا اے جیہڑے یہوواہ توں برگشتہ ہو گئے نیں۔ یسوع مسیح نے پرگمن دی کلیسیا دے اوہناں مسیحیاں دی سختی نال درستی کیتی جیہڑے کلیسیا چ پھٹ پان دی کوشش کر رہے سن۔ (مکاشفہ 2:14-16) یسوع مسیح نے تھواتیرہ دے اوہناں مسیحیاں دی تعریف کیتی جیہڑے شیطان دی جھوٹھی تلیم توں بچے رہے۔ یسوع مسیح نے اوہناں نُوں کہیا کہ اوہ سچائی نُوں گھوٹ کے پھڑی رکھن۔ (مکاشفہ 2:24-26) جیہڑے مسیحیاں نے شیطان دی تلیم دے مطابق چلنا شروع کر دِتا سی اوہناں نُوں توبہ کرن دی لوڑ سی۔ ایہدے توں اَسی کیہہ سکھنے آں؟ سانوں ہر اوس تلیم توں دُور رہنا چاہی دا اے جیہڑی یہوواہ دی تلیم دے خلاف اے۔ خدا توں برگشتہ ہون والے لوک شاید ویکھن چ تے بڑے خدا پرست لگن پر اوہناں دے طور طریقے خدا دے حکماں مطابق نئیں ہوندے۔ (2-تیمُتھیُس 3:5) جے اَسی گہرائی نال خدا دے کلام دا مطالعیا کراں گے تے ساڈے لئی جھوٹھی تلیم نُوں پچھاننا تے اوہدے توں دُور رہنا اسان ہوئے گا۔—2-تیمُتھیُس 3:14-17؛ یہوداہ 3، 4۔
10. یسوع مسیح نے پرگمن تے تھواتیرہ دِیاں کلیسیاواں نُوں جو کجھ کہیا اوہدے توں اَسی ہور کیہہ سکھنے آں؟
10 سانوں حرامکاری نئیں کرنی چاہی دی تے کسے وی طرحاں دی بدچلنی نُوں برداشت نئیں کرنا چاہی دا۔ پرگمن تے تھواتیرہ دِیاں کلیسیاواں چ اِک ہور مسئلہ وی سی۔ یسوع مسیح نے اوتھوں دے اوہناں مسیحیاں دی سختی نال درستی کیتی جیہڑے بدچلنی نئیں چھڈ رہے سن۔ (مکاشفہ 2:14، 20) ایہدے توں اَسی کیہہ سکھنے آں؟ ایہہ کہ جے اَسی بڑے سالاں توں یہوواہ دی خدمت کر رہے آں تے حالے وی ساڈے کول بوہت ساریاں ذمےداریاں نیں تے سانوں ایہہ نئیں سوچنا چاہی دا کہ جے اَسی بدچلنی کراں گے تے یہوواہ ایہنوں برداشت کر لوے گا۔ (1-سموئیل 15:22؛ 1-پطرس 2:16) بھانویں کہ ایس دُنیا دے معیار ڈِگ دے جا رہے نیں پر یہوواہ چاہندا کہ اَسی اوہدے معیاراں مطابق زندگی گزاردے رہیے۔—اِفسیوں 6:11-13۔
11. اَسی ہُن تک کیہہ سکھیا اے؟ (بکس ” اَسی کیہہ سکھیا اے؟“ نُوں وی ویکھو۔)
11 اَسی سکھیا اے کہ سانوں یہوواہ دی عبادت اوس طرحاں ای کرنی چاہی دی اے جیویں اوہ چاہندا اے۔ جے اَسی کوئی غلط کم کر رہے آں تے سانوں فوراً اوہ کم چھڈ دینا چاہی دا اے تاکہ یہوواہ ساڈی عبادت نُوں قبول کرے۔ (مکاشفہ 2:5، 16؛ 3:3، 16) پر یسوع مسیح نے کلیسیاواں دے ناں اپنے پیغام چ اِک ہور گل تے وی زور دِتا۔اوہ گل کیہڑی سی؟
اذیت برداشت کرن لئی تیار رہوو
جدوں شیطان نُوں اسمان چوں کڈھ دِتا گیا تے اوہنے خدا دے بندیاں تے کیویں حملہ کیتا؟ (پیراگراف نمبر 12-16 نُوں ویکھو۔)
12. یسوع مسیح نے سمرنہ تے فِلدلفیہ دِیاں کلیسیاواں نُوں جو کجھ کہیا، اوہدے توں اَسی کیہہ سکھنے آں؟ (مکاشفہ 2:10)
12 آؤ اوس پیغام تے دھیان دَئیے جیہڑا یسوع مسیح نے سمرنہ تے فِلدلفیہ دِیاں کلیسیاواں نُوں دِتا سی۔ یسوع مسیح نے اوہناں مسیحیاں نُوں کہیا کہ اوہناں نُوں اذیت توں ڈرن دی ضرورت نئیں اے کیونکہ یہوواہ اوہناں نُوں اوہناں دی وفاداری دا اَجر دَوے گا۔ (مکاشفہ 2:10 نُوں پڑھو؛ 3:10) ایہدے توں اَسی کیہہ سکھنے آں؟ سانوں ایہہ یاد رکھنا چاہی دا اے کہ سانوں اذیت دِتی جائے گی۔ ایس لئی سانوں ایہنوں برداشت کرن لئی تیار رہنا چاہی دا اے۔ (متی 24:9، 13؛ 2-کُرنتھیوں 12:10) پر سانوں ایہہ گل کیوں یاد رکھنی چاہی دی اے؟
13، 14. مکاشفہ 12 باب چ جیہڑیاں گلاں لکھیاں نیں اوہناں دے مطابق خدا دے بندیاں نال کیہہ ہونا سی؟
13 مکاشفہ دی کتاب چ دَسیا گیا اے کہ مالک دے دن چ خدا دے بندیاں نُوں اذیت دِتی جائے گی۔ مکاشفہ 12 باب توں پتہ چلدا اے کہ جیویں ای خدا دی بادشاہی قائم ہوئی تے اسمان تے اِک جنگ ہوئی۔ میکائیل یعنی یسوع مسیح تے اوہدے فرشتیاں نے شیطان تے اوہدے بھیڑے فرشتیاں نال جنگ کیتی۔ (مکاشفہ 12:7، 8) ایس جنگ چ شیطان تے بھیڑے فرشتے ہار گئے تے اوہناں نُوں اسمان توں زمین تے سُٹ دِتا گیا۔ اوس ویلے توں انساناں نُوں بوہت زیادہ تکلیفاں سہنیاں پے رہیاں نیں۔ (مکاشفہ 12:9، 12) پر ایہدا خدا دے بندیاں تے کیہہ اثر پیا؟
14 مکاشفہ دی کتاب چ اَگے دَسیا گیا اے کہ شیطان نے کیہہ کیتا۔ ہُن اوہ اسمان تے نئیں جا سکدا ایس لئی اوہ زمین تے موجود پاک روح نال مسح کیتے ہوئے مسیحیاں تے حملہ کردا اے جیہڑے خدا دی بادشاہی دے نمائندے نیں تے جنہاں نُوں یسوع بارے گواہی دین دا کم دِتا گیا اے۔ (مکاشفہ 12:17؛ 2-کُرنتھیوں 5:20؛ اِفسیوں 6:19، 20) ایہہ پیشینگوئی کیویں پوری ہوئی؟
15. مکاشفہ 11 باب چ جنہاں دو گواہواں دا ذکر ہویا اے، اوہ کون نیں تے اوہناں دے نال کیہہ ہویا اے؟
15 شیطان نے خدا دے دُشمناں دے ذریعے پاک روح نال مسح کیتے ہوئے اوہناں بھراواں تے حملہ کیتا جیہڑے مُنادی دے کم دی نگرانی کر رہے سن۔ ایہہ بھرا اوہ دو گواہ ثابت ہوئے جنہاں دا مکاشفہ دی کتاب چ ذکر ہویا اے تے جنہاں نُوں مار دِتا جاندا اے۔ * (مکاشفہ 11:3، 7-11) 1918 چ مُنادی دے کم دی نگرانی کرن والے بھراواں وچوں اَٹھ بھراواں تے جھوٹھے اِلزام لائے گئے تے اوہناں نُوں کئی سال لئی جیل دی سزا ہو گئی۔ زیادہتر لوکاں نُوں لگیا کہ ایہہ بھرا جیہڑا کم کر رہے سن، اوہ ہُن رُک گیا اے۔
16. 1919 چ کیہڑی حیران کر دین والی گل ہوئی؟ پر شیطان اوہدوں توں کیہہ کر رہیا اے؟
16 مکاشفہ 11 باب چ ایہہ پیشینگوئی وی کیتی گئی سی کہ کجھ عرصے بعد دو گواہواں نُوں فیر توں زندہ کر دِتا جائے گا۔ جدوں ایہناں بھراواں نُوں جیل ہو گئی تے ایہدے اِک سال دے اندر اندر ای ایہہ پیشینگوئی بوہت ای حیران کرن دین والے طریقے نال پوری ہوئی۔ مارچ 1919 چ ایہناں بھراواں نُوں جیل توں رِہا کر دِتا گیا تے بعد چوں اوہناں تے لائے گئے اِلزام وی ہٹا دِتے گئے۔ ایہناں بھراواں نے فوراً مُنادی کرن تے تلیم دین دا کم شروع کر دِتا۔ پر شیطان نے خدا دے بندیاں تے حملہ کرنا نئیں چھڈیا۔ اوس وقت توں شیطان خدا دے بندیاں اُتے اذیت دا دریا اُگل رہیا اے۔ (مکاشفہ 12:15) ایس لئی ساڈے وچوں ہر اِک نُوں ثابت قدم رہنا پووے گا تے ایمان ظاہر کرنا پووے گا۔—مکاشفہ 13:10۔
یہوواہ نے توانوں جیہڑا کم دِتا اے، اوہنوں پوری لگن نال کر دے رہوو
17. بھانویں کہ شیطان نے خدا دے بندیاں تے حملہ کرن چ کوئی کسر نئیں چھڈی پر خدا دے بندیاں نُوں کیہڑی مدد ملی جدے بارے اوہناں نے سوچیا وی نئیں سی؟
17 مکاشفہ 12 باب چ اَگے دَسیا گیا اے کہ خدا دے بندیاں نُوں اِک ایہو جہے طریقے نال مدد ملے گی جدے بارے اوہناں نے سوچیا وی نئیں ہوئے گا۔ ایہدے چ دَسیا گیا اے کہ زمین اذیت دے دریا نُوں ہڑپ کر لوَے گی۔ (مکاشفہ 12:16) تے اِنج ای ہویا۔ کدی کدار شیطان دی دُنیا دے کجھ حصیاں جیویں کہ عدالتاں نے خدا دے بندیاں دے حق چ فیصلہ سُنایا۔ کئی وار خدا دے بندیاں نے عدالتاں چ مُقدمے جتے جدی وجہ توں اوہناں نُوں کسے حد تک آزادی نال یہوواہ دی عبادت کرن دا موقع مل گیا۔ اوہناں نے ایس آزادی دا پورا فائدہ چُکیا تے اوس کم نُوں دلوجان نال کیتا جیہڑا یہوواہ نے اوہناں نُوں دِتا اے۔ (1-کُرنتھیوں 16:9) ایس کم چ کیہہ کجھ شامل اے؟
خدا دے بندے لوکاں نُوں کیہڑے دو پیغام سُنا رہے نیں؟ (پیراگراف نمبر 18، 19 نُوں ویکھو۔)
18. ایس آخری زمانے چ ساڈا سب توں اہم کم کیہڑا اے؟
18 یسوع مسیح نے پیشینگوئی کیتی سی کہ اوہدے پیروکار خاتمے توں پہلاں بادشاہی دی خوشخبری دی مُنادی ساری دُنیا چ کرن گے۔ (متی 24:14) جدوں اوہ مُنادی کردے نیں تے اِک یاں فیر کئی فرشتے اوہناں دی مدد کر دے نیں۔ ایہناں فرشتیاں بارے بائبل چ لکھیا اے کہ اوہناں کول ابدی خوشخبری سی جیہڑی اوہناں نے زمین دے لوکاں یعنی ہر قوم تے قبیلے تے زبان تے نسل دے لوکاں نُوں سُنانی سی۔—مکاشفہ 14:6۔
19. جیہڑے لوک یہوواہ نال محبت کردے نیں،اوہناں نُوں ہور کیہڑا پیغام سُنانا چاہی دا اے؟
19 خدا دے بندیاں نے دُوجیاں نُوں بس خدا دی بادشاہی دی خوشخبری ای نئیں سُنانی سگوں اوہناں نے اوہناں فرشتیاں دے کم چ وی ساتھ دینا اے جنہاں دا ذکر مکاشفہ 8 توں 10 باب چ کیتا گیا اے۔ ایہہ فرشتے اعلان کردے نیں کہ جیہڑے لوک خدا دی بادشاہی نُوں قبول نئیں کردے اوہناں تے کیہڑے کیہڑے عذاب آن گے۔ ایس لئی یہوواہ دے گواہ لوکاں نُوں اوہ پیغام وی سُنا رہے نیں جنہوں بائبل چ اولے تے اَگ وانگوں کہیا گیا اے۔ایس پیغام توں پتہ چلدا اے کہ خدا شیطان دی دُنیا نُوں سزا دَوے گا۔ (مکاشفہ 8:7، 13) لوکاں نُوں ایہہ جانن دی لوڑ اے کہ خاتمہ نیڑے وے تاکہ اوہ اپنے آپ نُوں بدل سکن تے یہوواہ دے قہر دے دن توں بچ سکن۔ (صفنیاہ 2:3،2) پر لوکاں نُوں ایہہ پیغام چنگا نئیں لگدا ایس لئی ایہہ سُنان لئی سانوں دلیری دی لوڑ اے۔ وڈی مصیبت دے دوران تے لوکاں نُوں ایہہ پیغام سُن کے ہور وی غصہ آئے گا۔—مکاشفہ 16:21۔
مکاشفہ دی کتاب چ لکھیاں گلاں تے عمل کرو
20. اگلے دو مضموناں چ اَسی کیہڑیاں گلاں تے غور کراں گے؟
20 سانوں مکاشفہ دی کتاب چ دَسیاں گئیاں گلاں تے عمل کرنا چاہی دا اے کیونکہ ایہناں دے پورے ہون چ ساڈا وی حصہ اے۔ (مکاشفہ 1:3) کیہڑی چیز ساڈی مدد کر سکدی اے تاکہ اَسی اذیت دے باوجود یہوواہ دے وفادار رہیے تے دلیری نال دُوجیاں نُوں اوہدے پیغام سُناندے رہیے؟ ایس معاملے چ سانوں دو گلاں توں مدد مِل سکدی اے: پہلی گل اوہ جیہڑی مکاشفہ دی کتاب چ خدا دے دُشمناں بارے دَسی گئی اے۔ تے دُوجی گل اوہ جیہڑی خدا دے وفادار لوکاں نُوں مِلن والیاں برکتاں بارے دَسی گئی اے۔ اگلے دو مضموناں چ اَسی ایہناں دو گلاں تے ای غور کراں گے۔
گیت نمبر 32: یہوواہ وَل ہووو
^ اَسی اِک بوہت ای اہم دَور چ رہ رہے آں۔ مکاشفہ دی کتاب چ لکھیاں پیشینگوئیاں ساڈے ای دَور چ پوریاں ہو رہیاں نیں۔ ایس مضمون چ تے اگلے دو مضموناں چ اَسی مکاشفہ دی کتاب چوں کجھ گلاں تے غور کراں گے۔ اَسی ویکھاں گے کہ ایس کتاب چ لکھیاں گلاں تے عمل کر کے اَسی یہوواہ دی مرضی دے مطابق اوہدی عبادت کرنا کیویں جاری رکھ سکنے آں۔
^ اُردو زبان چ ”مینارِنگہبانی“ 15 نومبر 2014 چ صفحہ نمبر 28 تے ”قارئین کے سوال“ نُوں ویکھو۔
