مطالعے دا مضمون نمبر 20
مکاشفہ دی کتاب چ خدا دے دُشمناں بارے کیہہ دَسیا گیا اے؟
اوہناں نے اوہناں بادشاہواں نُوں اوس تھاں تے جمع کیتا جنہوں عبرانی چ ہرمجِدّون کہندے نیں۔—مکاشفہ 16:16۔
گیت نمبر 150: نجات پان لئی یہوواہ تے آس لگاؤ
مضمون تے اِک نظر *
1. مکاشفہ دی کتاب چ خدا دے بندیاں بارے کیہہ دَسیا گیا؟
مکاشفہ دی کتاب توں پتہ چلدا اے کہ خدا دی بادشاہی اسمان تے قائم ہو گئی اے تے شیطان نُوں اسمان چوں کڈھ دِتا گیا اے۔ (مکاشفہ 12:1-9) ایہدی وجہ توں ہُن اسمان تے سکون اے پر زمین تے ساڈے لئی بوہت مسئلے کھڑے ہو گئے نیں۔ پر کیوں؟ کیونکہ شیطان بڑے غصے چ وے تے اوہ خاص طور تے اوہناں لوکاں نُوں نقصان پونچانا چاہندا اے جیہڑے زمین تے یہوواہ دی عبادت کر دے نیں۔—مکاشفہ 12:12، 15، 17۔
2. کیہڑی چیز یہوواہ دا وفادار رہن چ ساڈی مدد کرے گی؟
2 اَسی شیطان دے حملیاں دے باوجود ثابتقدم تے یہوواہ دے وفادار کیویں رہ سکنے آں؟ (مکاشفہ 13:10) ایہدے بارے اِک چیز جیہڑی ساڈی مدد کر سکدی اے،اوہ ایہہ وے کہ سانوں پتہ ہوئے کہ مستقبل چ کیہہ ہون والا اے۔ مثال لئی، مکاشفہ دی کتاب چ یوحنا رسول نے کجھ برکتاں بارے دَسیا جیہڑیاں بوہت چھیتی خدا دے بندیاں نُوں مِلن گیاں۔ ایہناں وچوں اِک برکت ایہہ ہوئے گی کہ خدا دے دُشمناں نُوں ختم کر دِتا جائے گا۔ آؤ، ویکھئے کہ مکاشفہ دی کتاب چ خدا دے دُشمناں بارے کیہہ دَسیا گیا اے تے اوہناں دے نال کیہہ ہوئے گا۔
خدا دے دُشمناں دِیاں نشانیاں
3. مکاشفہ دی کتاب چ کیہڑیاں نشانیاں دے ذریعے خدا دے دُشمناں بارے دَسیا گیا اے؟
3 مکاشفہ دی کتاب دی پہلی ایت وچ ای دَسیا گیا اے کہ ایس کتاب چ اَسی جیہڑیاں گلاں پڑھاں گے اوہ نشانیاں تے علامتاں چ بیان کیتیاں گئیاں نیں۔ (مکاشفہ 1:1) ایس کتاب چ اَگے جا کے کئی وحشی درندیاں دا ذکر مِلدا اے جیہڑے خدا دے دُشمناں وَل اشارہ کر دے نیں۔ مثال لئی، اَسی اِک ایہو جہے وحشی درندے بارے پڑھنے آں جیہڑا سمندر وچوں باہر آیا۔اوہدے دَس سینگ تے سَت سر سن۔ (مکاشفہ 13:1) اوہدے بعد اِک ہور وحشی درندہ زمین چوں نکلیا جیہڑا اژدہے وانگوں بولدا تے اسمان توں زمین اُتے اَگ ورساندا اے۔ (مکاشفہ 13:11-13) ایہدے بعد اِک گُوڑھے لال رنگ والے وحشی درندے بارے گل کیتی گئی اے جدے تے اِک طوائف بیٹھی ہوئی اے۔ ایہہ تینوں وحشی درندے خدا دے دُشمناں وَل اشارہ کر دے نیں جیہڑے اِک لمے عرصے توں یہوواہ خدا تے اوہدی بادشاہی دے خلاف لڑ رہے نیں۔ایس لئی ایہہ بوہت ضروری اے کہ سانوں پتہ ہوئے کہ ایہہ دُشمن کون نیں۔—مکاشفہ 17:1، 3۔
چار وڈے درندے
اوہ سمندر وچوں نکلے۔ (دانیایل 7:1-8، 15-17) ایہہ اوہناں عالمی طاقتاں وَل اشارہ کردے نیں جنہاں نے دانیایل دے زمانے توں لے کے ہُن تک خدا دے بندیاں تے یاں تے حکمرانی کیتی یاں فیر اوہناں دی زندگی تے بوہت گُوڑھا اثر پایا اے۔ (پیراگراف نمبر 4، 7 نُوں ویکھو۔)
4، 5. دانیایل 7:15-17 چ جو کجھ لکھیا اے، اوہدے توں اَسی اوہناں وحشی درندیاں بارے کیہہ سمجھ جانے آں؟
4 ایہہ ویکھن توں پہلاں کہ خدا دے دُشمناں کون نیں، سانوں ایہہ سمجھن دی ضرورت اے کہ وحشی درندے تے طوائف کدے وَل اشارہ کر دے نیں۔ ایہدا جواب سانوں بائبل چوں ای مِلدا اے۔ مکاشفہ دی کتاب چ جیہڑیاں نشانیاں دِتیاں گئیاں نیں، اوہناں چوں کئیاں دی وضاحت بائبل دِیاں کجھ ہور کتاباں چ پہلاں توں ای کر دِتی گی سی۔ مثال لئی، دانیایل نبی نے اِک خواب چ ویکھیا کہ سمندر وچوں چار وڈے درندے نکلے۔ (دانیایل 7:1-3) دانیایل نے دَسیا کہ اوہ چار درندے چار بادشاہواں یاں حکومتاں وَل اشارہ کر دے نیں۔ (دانیایل 7:15-17 نُوں پڑھو۔) ایہدے توں صاف پتہ چلدا اے کہ مکاشفہ دی کتاب چ جیہڑے وحشی درندیاں دا ذکر ہویا اے، اوہ وی حکومتاں وَل اشارہ کر دے نیں۔
5 آؤ ہُن مکاشفہ دی کتاب چ دَسیاں گئیاں کجھ نشانیاں بارے گل کریئے تے ویکھئے کہ بائبل توں ایہہ کیویں پتہ چلدا اے کہ ایہہ نشانیاں کِنہاں وَل اشارہ کردیاں نیں۔ شروع چ اَسی غور کراں گے کہ مکاشفہ دی کتاب چ واری واری کیہڑے وحشی درندیاں دا ذکر ہویا اے۔ پہلے اَسی ایہہ ویکھاں گے کہ ایہہ درندے کِنہاں وَل اشارہ کر دے نیں۔ فیر اَسی ویکھاں گے کہ ایہناں درندیاں نال کیہہ ہوئے گا۔ آخر چ اَسی ویکھاں گے کہ ایہناں گلاں دا ساڈے اُتے کیہہ اثر ہوندا اے۔
خدا دے دُشمناں دی پچھان
سَت سراں والا وحشی درندہ
ایہہ درندہ سمندر وچوں نکلیا۔ ایہدے دَس سینگ تے سَت سر سن تے ایہدے سینگاں تے دَس تاج سن۔ (مکاشفہ 13:1-4) ایہہ درندہ اوہناں ساریاں سیاسی طاقتاں وَل اشارہ کردا اے جنہاں نے انساناں تے حکومت کیتی اے۔ سَت سر سَت عالمی طاقتاں وَل اشارہ کردے نیں جنہاں نے خدا دے بندیاں تے یاں تے حکمرانی کیتی یاں فیر اوہناں دی زندگی تے بوہت گُوڑھا اثر پایا اے۔ (پیراگراف نمبر 6-8 نُوں ویکھو۔)
6. مکاشفہ 13:1-4 چ جیہڑے سَت سراں والے وحشی درندے دا ذکر ہویا اے، اوہ کون اے؟
6 سَت سراں والا وحشی درندہ کون اے؟ (مکاشفہ 13:1-4 نُوں پڑھو۔) ایہہ وحشی درندہ تیندوے ورگا سی پر اوہدے پیر ریچھ ورگے سن، اوہدا موُنہہ شیر ورگا سی تے اوہدے دَس سینگ سن۔ دانیایل 7 باب چ شیر، ریچھ، تیندوے تے دَس سینگاں والے درندے دا ذکر ہویا اے تے ایہناں دا ذکر چار الگ الگ درندیاں دے طور تے کیتا گیا اے۔ پر مکاشفہ 13:1-4 چ اِک ای درندے دا ذکر ہویا اے جدے چ ایہناں چاراں درندیاں دِیاں صفتاں نیں۔ ایس لئی ایہہ وحشی درندہ کسے اِک حکومت وَل اشارہ نئیں کردا۔ ایہدے علاوہ یوحنا رسول نے کہیا کہ ایس درندے نُوں ہر قبیلے، نسل، زبان تے قوم تے اِختیار دِتا گیا۔ ایس لئی ایہہ درندہ کوئی اِک حکومت نئیں ہو سکدا۔ (مکاشفہ 13:7) ایہدی بجائے ایہہ درندہ اوہناں ساریاں حکومتاں وَل اشارہ کردا اے جنہاں نے انساناں تے حکمرانی کیتی اے۔ *—واعظ 8:9۔
7. سَت سراں والے وحشی درندے دا ہر سر کدے وَل اشارہ کر دا اے؟
7 سَت سراں وچوں ہر سر کدے وَل اشارہ کر دا اے؟ ایہدا جواب سانوں مکاشفہ 17 باب چوں مِل سکدا اے کیونکہ ایہدے چ سَت سراں والے اوس درندے دے بُت بارے دَسیا گیا اے جدا ذکر مکاشفہ 13 باب چ ہویا اے۔ مکاشفہ 17:10 چ اَسی پڑھنے آں: ایہہ سَت بادشاہ نیں جنہاں وچوں پنج جا چُکے نیں، اِک حالے موجود اے تے اِک حالے آیا نئیں پر جدوں اوہ آئے گا تے تھوڑی دیر لئی رہوے گا۔ شیطان نے جنیاں وی سیاسی طاقتاں نُوں استمال کیتا اے، اوہناں وچوں سَت طاقتاں سراں وانگوں نمایاں سن کیونکہ اوہناں کول بڑی طاقت سی۔ ایہہ اصل چ سَت عالمی طاقتاں سن جنہاں نے یاں تے خدا دے بندیاں تے حکمرانی کیتی یاں فیر اوہناں دی زندگی تے بڑا گُوڑھا اثر پایا۔ جدوں یوحنا رسول زندہ سی اوس ویلے تک پنج عالمی طاقتاں حکمرانی کر چُکیاں سن۔اوہ پنج عالمی طاقتاں ایہہ سن: مصر، اسور، بابل، مادی فارس تے یونان۔ چھیویں عالمی طاقت روم سی جیہڑی اوس ویلے حکومت کر رہی سی جدوں یوحنا نُوں خدا وَلّوں مکاشفہ ملیا۔ ستویں تے آخری عالمی طاقت کیہڑی سی؟
8. وحشی درندے دا ستواں سر کون اے؟
8 دانیایل دی کتاب چ لکھیاں پیشینگوئیاں توں اَسی ایہہ جان سکنے آں کہ وحشی درندے دا ستواں تے آخری سر کون اے۔ آخری زمانے یعنی مالک دے دن دے دوران کیہڑی عالمی طاقت حکمرانی کر رہی اے؟ (مکاشفہ 1:10) ایہہ طاقت برطانیہ تے امریکہ دِیاں حکومتاں نال مِل کے بنی اے جیہڑی کٹھی کم کر دی اے تے بڑی طاقتور اے۔ ایس لئی اَسی کہہ سکنے آں کہ ایہہ عالمی طاقت مکاشفہ 13:1-4 چ دَسے گئے وحشی درندے دا ستواں سر اے۔
میمنے ورگے دو سینگاں والا درندہ
ایہہ درندہ زمین چوں نکلیا تے اژدہے وانگوں بولن لگ پیا۔ ایہہ اسمان توں زمین تے اَگ ورساندا اے تے جھوٹھے نبی دے طور تے وڈے وڈے معجزے وی کردا اے۔ (مکاشفہ 13:11-15؛ 16:13؛ 19:20) میمنے ورگے دو سینگاں والا درندہ برطانیہ تے امریکہ دی عالمی طاقت وَل اشارہ کردا اے۔ ایہنوں جھوٹھا نبی وی کہیا گیا اے کیونکہ ایہہ زمین دے لوکاں نُوں وحشی درندے دا بُت بنان لئی کہندا اے جدے سَت سر تے دَس سینگ نیں۔ (پیراگراف نمبر 9 نُوں ویکھو۔)
9. اوہ وحشی درندہ کون اے جدے میمنے ورگے دو سینگ نیں؟
9 مکاشفہ 13 باب توں پتہ چلدا اے کہ ستواں سر یعنی برطانیہ تے امریکہ دی عالمی طاقت اوس وحشی درندے ورگی وی اے جدے میمنے ورگے دو سینگ سن پر اوہ اژدہے وانگوں بولن لگ پیا۔ ایہہ وحشی درندہ وڈے وڈے معجزے وکھاندا اے ایتھوں تک کہ اوہ انساناں دے سامنے اسمان توں زمین تے اَگ ورساندا اے۔ (مکاشفہ 13:11-15) مکاشفہ 16 تے 19 باب چ ایس وحشی درندے نُوں جھوٹھا نبی وی کہیا گیا اے۔ (مکاشفہ 16:13؛ 19:20) دانیایل دی کتاب توں پتہ چلدا اے کہ برطانیہ تے امریکہ دی عالمی طاقت بوہت زیادہ بربادی کرے گی۔ (دانیایل 8:19، 23، 24) دُوجی عالمی جنگ چ بالکل اِنج ای ہویا۔ جیہڑے دو اٹیمی بماں دی وجہ توں بحراُلکاہل چ جنگ ختم ہوئی، اوہ برطانیہ تے امریکہ دے سائنسداناں نے ای بنائے سن۔ ایہہ اِنج ای سی جیویں برطانیہ تے امریکہ اسمان توں زمین تے اَگ ورسا رہے ہون۔
گُوڑھے لال رنگ والا وحشی درندہ
ایس درندے اُتے اِک طوائف یعنی وڈا بابل بیٹھیا ہویا اے۔ ایس درندے نُوں اَٹھواں بادشاہ کہیا گیا اے۔ (مکاشفہ 17:3-6، 8، 11) پہلے طوائف وحشی درندے نُوں اپنے قابو چ رکھدی اے پر بعد چ ایہہ درندہ اوہنوں ختم کر دَوے گا۔ ایہہ طوائف پوری دُنیا دے جھوٹھے مذہباں وَل اشارہ کردی اے۔ تے درندہ اقوامِمتحدہ وَل اشارہ کردا اے جیہڑی دُنیا دے سیاسی نظام دا ساتھ دیندی اے۔ (پیراگراف نمبر 10، 14-17 نُوں ویکھو۔)
10. وحشی درندے دا بُت کون اے؟ (مکاشفہ 13:14، 15؛ 17:3، 8، 11)
10 مکاشفہ دی کتاب چ اَگے اِک ہور وحشی درندے دا ذکر کیتا گیا اے۔ ایہہ درندہ ویکھن چ سَت سراں والے وحشی درندے وانگوں لگدا اے۔ پر فرق صرف ایہہ اے کہ ایہدا رنگ گُوڑھا لال اے۔ ایہنوں اَٹھواں بادشاہ کہیا گیا اے۔ * (مکاشفہ 13:14، 15؛ 17:3، 8، 11 نُوں پڑھو۔) ایس بادشاہ بارے دَسیا گیا اے کہ ایہہ پہلے موجود سی پر فیر چلا گیا تے فیر واپس آ گیا۔ اقوامِمتحدہ دے نال وی بالکل اِنج ای ہویا جیہڑی ایس دُنیا دِیاں حکومتاں دا ساتھ دیندی اے۔ پہلے ایہدا ناں انجمنِاقوام سی۔ فیر دُوجی عالمی جنگ چ ایہہ ختم ہو گئی تے بعد چ اقوامِمتحدہ دے ناں توں فیر بن گئی۔
11. وحشی درندے کیہہ کر دے نیں تے سانوں اوہناں کولوں ڈرن دی لوڑ کیویں نئیں اے؟
11 وحشی درندے یعنی حکومتاں لوکاں نُوں بھڑکاندیاں نیں کہ اوہ یہوواہ تے اوہدے بندیاں دی مخالفت کرن۔ یوحنا نے کہیا کہ ایہہ اِنج ای اے جیویں اوہ پوری زمین دے بادشاہواں نُوں بےپناہ طاقت والے خدا دے عظیم دن دی جنگ لئی جمع کر رہیاں نیں۔ (مکاشفہ 16:13، 14، 16) پر سانوں ڈرن دی لوڑ نئیں اے۔ ساڈا خدا یہوواہ اوہناں ساریاں لوکاں نُوں بچان لئی فوراً قدم چُکے گا جیہڑے اوہدی حکمرانی دی حمایت کر دے نیں۔—حزقی ایل 38:21-23۔
12. سارے وحشی درندیاں نال کیہہ ہوئے گا؟
12 سارے وحشی درندیاں نال کیہہ ہوئے گا؟ ایہدا جواب مکاشفہ 19:20 چ دِتا گیا اے۔ ایس ایت چ لکھیا اے: وحشی درندہ پھڑیا گیا تے اوہدے نال جھوٹھا نبی وی پھڑیا گیا جنہے وحشی درندے دے سامنے معجزے وکھا کے اوہناں لوکاں نُوں گمراہ کیتا سی جنہاں نے وحشی درندے دا نشان لوایا ہویا سی تے جیہڑے اوہدے بُت دی پوجا کردے سن۔ اوہ دونویں حالے زندہ ای سن کہ اوہناں نُوں گندھک نال بلن والی اَگ دی جھیل چ سُٹ دِتا گیا۔ ایہدا مطلب اے کہ ایہہ حکومتاں حالے حکمرانی کر ای رہیاں ہون گیاں کہ خدا اوہناں نُوں ہمیشاں ہمیشاں لئی ختم کر دَوے گا۔
13. حکومتاں دی وجہ توں سچے مسیحیاں نُوں کیہڑی مشکل دا سامنا کرنا پیندا اے؟
13 ایہناں گلاں دا سچے مسیحیاں تے کیہہ اثر ہوندا اے؟ مسیحیاں دے طور تے سانوں یہوواہ تے اوہدی بادشاہی دے وفادار رہنا چاہی دا اے۔ (یوحنا 18:36) اِنج کرن لئی ضروری اے کہ اَسی سیاسی معاملیاں چ کسے دی طرفداری نہ کریئے۔ پر اِنج کرنا مشکل ہو سکدا اے کیونکہ حکومتاں چاہندیاں نیں کہ اَسی اپنیاں گلاں تے کماں توں پوری طرحاں اوہناں دی حمایت کریئے۔ جیہڑے لوک حکومتاں دے دباؤ چ آ جاندے نیں، اوہ اپنے سجے ہتھ تے یاں متھے اُتے وحشی درندے دا نشان لوا لیندے نیں۔ (مکاشفہ 13:16، 17) جیہڑے لوک ایہہ نشان لواندے نیں یہوواہ اوہناں توں خوش نئیں ہوئے گا تے اوہناں نُوں ہمیشاں دی زندگی نئیں دے گا۔ (مکاشفہ 14:9، 10؛ 20:4) ایس لئی بھانویں ساڈے تے جِنّاں مرضی دباؤ پایا جائے سانوں سیاسی معاملیاں چ کسے دی طرفداری نئیں کرنی چاہی دی۔
عظیم طوائف دا شرمناک انجام
14. یوحنا رسول نے اَگے جو ویکھیا، اوہ اوہدی وجہ توں حیران کیوں ہویا؟ (مکاشفہ 17:3-5)
14 یوحنا رسول نے دَسیا کہ اوہنے اَگے جو کجھ ویکھیا، اوہدی وجہ توں اوہ بڑا حیران ہویا۔ اوہنے ویکھیا کہ اِک عورت ایس خوفناک درندے اُتے بیٹھی ہوئی اے۔ (مکاشفہ 17:1، 2، 6) ایہہ عورت اِک عظیم طوائف وانگوں اے تے ایہنوں وڈا بابل کہیا گیا اے۔ اوہ زمین دے بادشاہواں نال حرامکاری کر دی اے۔—مکاشفہ 17:3-5 نُوں پڑھو۔
15، 16. وڈا بابل کون اے تے سانوں ایہہ کیویں پتہ اے؟
15 وڈا بابل کون اے؟ ایہہ عورت کوئی حکومت نئیں ہو سکدی کیونکہ مکاشفہ دی کتاب چ دَسیا گیا اے کہ ایہہ دُنیا دے حکمراناں نال حرامکاری کردی اے۔ (مکاشفہ 18:9) ایہہ وحشی درندے اُتے بیٹھی ہوئی اے جدے توں پتہ چلدا اے کہ ایہہ حکمراناں نُوں قابو چ رکھن دی کوشش کردی اے۔ ایہدے علاوہ ایہہ شیطان دی دُنیا دا کاروباری نظام وی نئیں ہو سکدی کیونکہ کاروباری نظام بارے الگ توں دَسیا گیا اے کہ ایہہ زمین دے تاجر نیں۔—مکاشفہ 18:11، 15، 16۔
16 جدوں بائبل چ لفظ طوائف آندا اے تے ایہدا اشارہ اوہناں لوکاں وَل ہو سکدا اے جیہڑے خدا دی عبادت کرن دا دعویٰ تے کردے نیں پر کسے نہ کسے طریقے نال بُتپرستی کر دے نیں یاں فیر ایس دُنیا دے دوست بن جاندے نیں۔ (1-تواریخ 5:25؛ یعقوب 4:4) ایہدی بجائے جیہڑے لوک یہوواہ دی عبادت کردے نیں تے اوہدے وفادار رہندے نیں بائبل چ اوہناں نُوں پاکیزہ یاں کنوارے کہیا گیا اے۔ (2-کُرنتھیوں 11:2؛ مکاشفہ 14:4) پرانے زمانے چ شہر بابل جھوٹھے مذہب دا گڑھ سی۔ ایس لئی وڈا بابل وی سارے جھوٹھے مذہباں وَل اشارہ کردا اے۔—مکاشفہ 17:5، 18۔
17. وڈے بابل نال کیہہ ہوئے گا؟
17 وڈے بابل نال کیہہ ہوئے گا؟ ایس سوال دا جواب مکاشفہ 17:16، 17 چ دِتا گیا اے۔ ایہناں ایتاں چ لکھیا اے: ”وحشی درندہ تے اوہ دَس سینگ جیہڑے تُوں ویکھے، طوائف نال نفرت کرن گے تے اوہنوں برباد تے ننگا کرن گے تے اوہدا گوشت کھان گے تے اوہنوں اَگ وچ ساڑ کے سواہ کر دین گے کیونکہ خدا اوہناں دے دل چ ایہہ خیال پائے گا کہ اوہ اوہدے ارادے نُوں جیہڑا اوہناں دا اپنا ارادہ وی اے، پورا کرن لئی اپنی بادشاہی اوس ویلے تک وحشی درندے دے حوالے کر دین جدوں تک خدا دِیاں گلاں پوریاں نئیں ہو جاندیاں۔“ یہوواہ خدا ساریاں قوماں دے دل چ ایہہ خیال پائے گا کہ اوہ گُوڑھے لال رنگ والے درندے یعنی اقوامِمتحدہ دے ذریعے جھوٹھے مذہب تے حملہ کرن تے ایہنوں پوری طرحاں ختم کر دین۔—مکاشفہ 18:21-24۔
18. اَسی کیہہ کر سکنے آں تاکہ اَسی کسے وی طرحاں وڈے بابل دا حصہ نہ بنئے؟
18 ایہناں گلاں دا سچے مسیحیاں تے کیہہ اثر ہوندا اے؟ سانوں اوسے طریقے نال یہوواہ دی عبادت کردے رہنا چاہی دا اے جیہڑا اوہدی نظر چ پاک اے۔ (یعقوب 1:27) سانوں کدی وی وڈے بابل دی جھوٹھی تلیم تے ایہدے گھٹیا معیاراں نُوں اپنے آپ اُتے اثر نئیں کرن دینا چاہی دا تے نہ ای سانوں ایہدے تہواراں تے جادوگری نال تعلق رکھن والے کماں چ حصہ لینا چاہی دا اے۔ ایہدے علاوہ سانوں دُوجیاں نُوں وی ایہدے توں خبردار کردے رہنا چاہی دا اے تے اوہناں نُوں دَسنا چاہی دا اے کہ اوہ ایہدے وچوں نکل آن تاکہ اوہ ایہدے گناہواں چ شریک نہ ہون۔—مکاشفہ 18:4۔
خدا دے سب توں وڈے دُشمن نُوں سزا
لال سُرخ اژدہا
شیطان وحشی درندے نُوں اِختیار دیندا اے۔ (مکاشفہ 12:3، 9، 13؛ 13:4؛ 20:2، 10) شیطان یہوواہ خدا دا سب توں وڈا دُشمن اے۔ اوہنوں 1000 سال لئی اتھاہ گڑھے چ پا دِتا جائے گا۔ ایہدے بعد اوہنوں اَگ تے گندھک نال بلن والی جھیل وچ سُٹ دِتا جائے گا۔ (پیراگراف نمبر 19، 20 نُوں ویکھو۔)
19. وڈا جیہا لال سُرخ اژدہا کون اے؟
19 مکاشفہ دی کتاب چ اِک وڈے جہے لال سُرخ اژدہے بارے وی دَسیا گیا اے۔ (مکاشفہ 12:3) ایس اژدہے نے یسوع تے اوہدے فرشتیاں نال لڑائی کیتی۔ (مکاشفہ 12:7-9) اوہنے خدا دے بندیاں تے حملہ کیتا تے وحشی درندیاں یعنی حکومتاں نُوں طاقت دِتی۔ (مکاشفہ 12:17؛ 13:4) ایہہ اژدہا کون اے؟ ایہہ اوہ پرانا سپ اے جنہوں اِبلیس تے شیطان کہیا جاندا اے۔ (مکاشفہ 12:9؛ 20:2) خدا دے سارے دُشمناں دی حمایت شیطان ای کر رہیا اے۔
20. اژدہے نال کیہہ ہوئے گا؟
20 اژدہے نال کیہہ ہوئے گا؟ مکاشفہ 20:1-3 توں پتہ چلدا اے کہ اِک فرشتہ شیطان نُوں اتھاہ گڑھے چ سُٹ دَوے گا جیہڑا کہ شیطان لئی قید وانگوں ہوئے گا۔ جدوں شیطان ایس قید چ ہوئے گا تے اوہ 1000 سال پورے ہو جان تک قوماں نُوں گمراہ نئیں کر سکے گا۔ ایہدے بعد شیطان تے بُرے فرشتیاں نُوں اَگ تے گندھک دی جھیل چ سُٹ دِتا جائے گا جدا مطلب ایہہ وے کہ اوہناں نُوں ہمیشاں ہمیشاں لئی ختم کر دِتا جائے گا۔ (مکاشفہ 20:10) ذرا سوچو کہ جدوں شیطان تے بُرے فرشتے نئیں ہون گے تے اوہ کِنّاں چنگا وقت ہوئے گا۔
21. اَسی مکاشفہ دی کتاب چ جو کجھ پڑھیا اے، اوہدے توں اَسی خوش کیوں ہو سکنے آں؟
21 مکاشفہ دی کتاب چ جیہڑیاں نشانیاں دِتیاں گئیاں نیں، اوہناں دا مطلب سمجھ کے سانوں واقعی بڑی خوشی ہوئی اے۔ اَسی نہ صرف خدا دے دُشمناں نُوں پچھان لیا اے سگوں ایہہ وی ویکھ لیا اے کہ اوہناں نال کیہہ ہوئے گا۔ مکاشفہ چ لکھی ایہہ گل بالکل سچ اے: اوہ شخص خوش رہندا اے جیہڑا ایس کتاب چ لکھے پیغام نُوں اُچی آواز چ پڑھدا اے تے اوہ لوک خوش رہندے نیں جیہڑے ایہدے چ دَسیاں ہوئیاں گلاں نُوں سُن دے نیں۔ (مکاشفہ 1:3) پر جدوں خدا دے سارے دُشمن ختم ہو جان گے تے خدا دے بندیاں نُوں کیہڑیاں برکتاں مِلن گیاں؟ مضموناں دی ایس لڑی دے آخری مضمون چ اَسی ایہدے بارے ای گل کراں گے۔
گیت نمبر 23: یہوواہ دا راج شروع ہو گیا
^ مکاشفہ دی کتاب چ نشانیاں دے ذریعے دَسیا گیا اے کہ خدا دے دُشمن کون نیں۔ دانیایل دی کتاب توں اَسی سمجھ سکنے آں کہ ایہہ نشانیاں کِنہاں وَل اشارہ کردیاں نیں۔ ایس مضمون چ اَسی مکاشفہ دی کتاب چوں اوہناں پیشینگوئیاں تے غور کراں گے جنہاں نال مِلدیاں جلدیاں پیشینگوئیاں دانیایل دی کتاب چ وی ہے نیں۔ اِنج اَسی خدا دے دُشمناں نُوں پچھان سکاں گے۔ فیر اَسی ایہہ ویکھاں گے کہ خدا دے دُشمناں نال کیہہ ہوئے گا۔
^ اِک ہور گل جدی وجہ توں اَسی ایہہ کہہ سکنے آں کہ سَت سراں والا درندہ ساریاں سیاسی طاقتاں وَل اشارہ کردا اے، اوہ ایہہ وے کہ ایہدے دَس سینگ نیں تے بائبل چ نمبر 10 اکثر کسے چیز دے مکمل ہون وَل اشارہ کردا اے۔
^ سَت سراں والے وحشی درندے دے سینگاں اُتے تاج نیں پر اوہدے بُت دے سینگاں اُتے تاج نئیں نیں۔ (مکاشفہ 13:1) ایہدی وجہ ایہہ وے کہ ایہہ سَت بادشاہواں وچوں نکلیا اے تے اوہ بادشاہ ایہنوں اِختیار دیندے نیں۔
