مطالعے دا مضمون نمبر 21
مکاشفہ دی کتاب چ ساڈے مستقبل بارے کیہہ دَسیا گیا اے؟
آمین! آؤ، مالک یسوع۔—مکاشفہ 22:20۔
گیت نمبر 144: انعام تے نظر رکھو!
مضمون تے اِک نظر *
1. سارے انساناں نُوں کیہڑا اہم فیصلہ کرنا پئے گا؟
اَج سارے انساناں نے اِک اہم فیصلہ کرنا اے۔ کیہہ اوہ یہوواہ نُوں کائنات دا حاکم منن گے یاں کیہہ اوہ اوہدے دُشمن شیطان اِبلیس دا ساتھ دین گے؟ اوہ ایہہ نئیں کہہ سکدے کہ اوہ یہوواہ یاں شیطان وچوں کسے وَل نئیں ہون گے۔ اوہناں نُوں ایہناں دونواں وچوں کسے اِک نُوں ضرور چُننا پئے گا۔ اوہ جیہڑا وی فیصلہ کرن گے، اوہدی بِنا تے ایہہ طے ہوئے گا کہ اوہ ہمیشاں تک زندہ رہن گے یاں نئیں۔ (متی 25:31-33، 46) وڈی مصیبت دے دوران اوہناں تے ایہہ نشان لا دِتا جائے گا کہ اوہ بچ جان گے یاں اوہناں نُوں مار دِتا جائے گا۔—مکاشفہ 7:14؛ 14:9-11؛ حزقی ایل 9:4، 6۔
2. (الف) عبرانیوں 10:35-39 چ سانوں کیہہ کرن لئی کہیا گیا اے؟ (ب) مکاشفہ دی کتاب کیس حوالے نال ساڈی مدد کر سکدی اے؟
2 عبرانیوں 10:35-39 نُوں پڑھو۔ جے تُسی یہوواہ دی حکمرانی دی حمایت کرن دا فیصلہ کیتا اے تے تواڈا ایہہ فیصلہ بوہت چنگا اے۔ ہُن تُسی ضرور دُوجیاں دی وی مدد کرنا چاہندے او تاکہ اوہ وی ایہہ فیصلہ کرن۔ ایس کم چ مکاشفہ دی کتاب چ لکھیاں گلاں تواڈی بوہت مدد کر سکدیاں نیں۔ ایس کتاب چ دَسیا گیا اے کہ اوہناں لوکاں دا کیہہ انجام ہوئے گا جیہڑے یہوواہ دی مخالفت کر دے نیں۔ پر ایہدے چ ایہہ وی دَسیا گیا اے کہ اوہناں لوکاں نُوں کیہڑیاں برکتاں مِلن گیاں جیہڑے یہوواہ دی حکمرانی دی حمایت کر دے نیں۔ ساڈے لئے ایہناں گلاں تے دھیان دینا بوہت ضروری اے۔ اِنج کرن نال ساڈا ایہہ ارادہ ہور پکا ہو جائے گا کہ اَسی یہوواہ دے وفادار رہواں گے۔ ایہدے علاوہ جو کجھ اَسی سکھیا اے، اوہدے ذریعے اَسی دُوجیاں دی وی مدد کر سکاں گے تاکہ اوہ یہوواہ دی عبادت کرن دا فیصلہ کرن تے ہمیشاں اوہدے وفادار رہن۔
3. ایس مضمون چ اَسی کیہڑے سوالاں تے غور کراں گے؟
3 ایس مضمون چ اَسی ایہناں سوالاں تے غور کراں گے: اوہناں لوکاں نُوں کیہڑیاں برکتاں مِلن گیاں جیہڑے یہوواہ دی حکمرانی دی حمایت کردے نیں؟ تے اوہناں لوکاں دا انجام کیہہ ہوئے گا جیہڑے اوس گُوڑھے لال رنگ والے وحشی درندے دا ساتھ دین دا فیصلہ کردے نیں جدا ذکر مکاشفہ دی کتاب چ ہویا اے؟
اوہناں لوکاں دے نال کیہہ ہوئے گا جیہڑے خدا دے وفادار نیں؟
4. یوحنا رسول نے اسمان تے یسوع دے نال کس گروہ نُوں ویکھیا؟
4 اِک رویا چ یوحنا رسول نے دو گروپاں نُوں ویکھیا جیہڑے یہوواہ دی حکمرانی دی حمایت کردے نیں تے جنہاں نُوں ہمیشاں دی زندگی انعام چ ملے گی۔ پہلے گروہ دے لوکاں دی تعداد 1 لکھ 44 ہزار اے۔ (مکاشفہ 7:4) یہوواہ نے اوہناں نُوں زمین توں چُنیا تاکہ اوہ بادشاہواں دے طور تے اسمان تے یسوع مسیح دے نال مل کے زمین تے حکمرانی کرن۔ (مکاشفہ 5:9، 10؛ 14:3، 4) یوحنا نے رویا چ ویکھیا کہ ایہہ لوک اسمان تے یسوع دے نال کوہِصیون تے کھلوتے نیں۔—مکاشفہ 14:1۔
5. پاک روح نال مسح کیتے ہوئے جیہڑے مسیحی ہُن زمین تے موجود نیں، اوہناں نال کیہہ ہوئے گا؟
5 رسولاں دے زمانے توں لے کے ہُن تک یہوواہ نے ہزاراں لوکاں نُوں چُنیا اے تاکہ اوہ پاک روح نال مسح کیتے ہوئے 1 لکھ 44 ہزار مسیحیاں دے گروہ چ شامل ہون۔ (لُوقا 12:32؛ رومیوں 8:17) پر یوحنا نے دَسیا کہ آخری زمانے چ پاک روح نال مسح کیتے ہوئے صرف کجھ ای مسیحی زمین تے موجود ہون گے۔ ایہناں مسیحیاں تے یہوواہ خدا وڈی مصیبت شروع ہون توں پہلاں آخری مُہر کر دَوے گا۔ (مکاشفہ 7:2، 3؛12:17) فیر وڈی مصیبت دے دوران کسے وی ویلے ایہناں مسیحیاں نُوں اسمان تے چُک لیا جائے گا جتھے اوہ پاک روح نال مسح کیتے ہوئے اوہناں مسیحیاں نال ہون گے جیہڑے مردے دم تک یہوواہ دے وفادار رہے سن۔ فیر 1 لکھ 44 ہزار دے گروہ چ شامل سارے مسیحی یسوع دے نال مِل کے خدا دی بادشاہی چ حکمرانی کرن گے۔—متی 24:31؛ مکاشفہ 5:9، 10۔
6، 7. (الف) یوحنا رسول نے رویا چ ہور کیہڑا گروہ ویکھیا تے ایس گروہ بارے کیہہ دَسیا گیا اے؟ (ب) مکاشفہ 7 باب زمین تے موجود پاک روح نال مسح کیتے ہوئے مسیحیاں تے وڈی بِھیڑ لئی اہم کیوں اے؟
6 یوحنا نے 1 لکھ 44 ہزار دے گروہ نُوں ویکھن دے بعد اِک وڈی بِھیڑ نُوں ویکھیا۔ایس بِھیڑ چ اینے زیادہ لوک سن کہ کوئی وی اوہناں نُوں گن نئیں سی سکدا۔ (مکاشفہ 7:9، 10) ایہدے بارے یوحنا نے دَسیا: ایہہ اوہ لوک نیں جیہڑے وڈی مصیبت چوں نکل آئے نیں۔ اوہناں نے اپنے چوغیاں نُوں میمنے دےخون نال دھو کے چٹا کر لیا اے۔ (مکاشفہ 7:14) وڈی مصیبت چوں بچن دے بعد ایہہ وڈی بِھیڑ زمین تے رہوے گی تے یہوواہ ایہنوں ڈھیر ساریاں برکتاں دَوے گا۔—زبور 37:9-11، 27-29؛ امثال 2:21، 22؛ مکاشفہ 7:16، 17۔
7 بھانویں یہوواہ نے سانوں اسمان تے جان لئی چُنیا ہووے یاں زمین تے رہن لئی، اَسی ایس گل تے پکا یقین رکھ سکنے آں کہ اَسی مکاشفہ 7 باب چ لکھیاں گلاں نُوں پورا ہوندیاں ضرور ویکھاں گے۔ ذرا سوچو کہ جدوں ایہہ گلاں پوریاں ہون گیاں تے پاک روح نال مسح کیتے ہوئے مسیحیاں تے وڈی بِھیڑ لئی ایہہ کِنّاں خوشی دا وقت ہوئے گا! سانوں ایہہ سوچ کے بڑی خوشی ہوئے گی کہ اَسی یہوواہ دی حکمرانی دی حمایت کرن دا فیصلہ کیتا اے۔ مکاشفہ دی کتاب چ وڈی مصیبت بارے ہور کیہہ دَسیا گیا اے؟—متی 24:21۔
اوہناں لوکاں نال کیہہ ہوئے گا جیہڑے خدا دی مخالفت کردے نیں؟
8. (الف) وڈی مصیبت کیویں شروع ہوئے گی؟ (ب) اوس ویلے زیادہتر لوک کیہہ کرن گے؟
8 جیویں کہ اَسی پچھلے مضمون چ ویکھیا سی، بوہت چھیتی ایس دُنیا دِیاں حکومتاں وڈے بابل یعنی جھوٹھے مذہب تے حملہ کر دین گیاں۔(مکاشفہ 17:16، 17) اِنج وڈی مصیبت شروع ہوئے گی۔ کیہہ ایس وجہ توں بوہت سارے لوک یہوواہ دی عبادت کرنا شروع کر دین گے؟ جی نئیں۔ مکاشفہ 6 باب چ دَسیا گیا اے کہ جیہڑے لوک یہوواہ دی عبادت نئیں کردے، اوہ اوس ویلے دُنیا دے سیاسی تے کاروباری نظام چ پناہ حاصل کرن دی کوشش کرن گے جنہاں نُوں ایس باب چ پہاڑ کہیا گیا اے۔ کیونکہ ایہہ لوک خدا دی بادشاہی دا ساتھ نئیں دین گے ایسے لئی یہوواہ اوہناں نُوں اپنا مخالف سمجھے گا۔—لُوقا 11:23؛ مکاشفہ 6:15-17۔
9. وڈی مصیبت دے دوران یہوواہ دے بندے دُوجیاں توں فرق کیوں نظر آن گے تے ایہدا کیہہ نتیجہ نکلے گا؟
9 وڈی مصیبت دے دوران یہوواہ دے بندے دُوجیاں توں فرق نظر آن گے۔ اوس ویلے زمین تے صرف ایہی لوک اپنے خدا دی عبادت کر رہے ہون گے تے وحشی درندے دی حمایت کرن توں اِنکار کر دین گے۔ (مکاشفہ 13:14-17) کیونکہ ایہہ لوک یہوواہ دے وفادار رہن گے ایس لئی یہوواہ دے مخالفاں نُوں ایہناں تے بڑا غصہ آئے گا۔ ایس وجہ توں قوماں دا گروہ مِل کے پوری دُنیا چ خدا دے بندیاں تے حملہ کرے گا۔ اوہناں دے ایس حملے نُوں اِک پیشینگوئی چ ماجوج دے جوج دا حملہ کہیا گیا اے۔—حزقی ایل 38:14-16۔
10. جدوں دُشمن یہوواہ دے بندیاں تے حملہ کرن گے تے مکاشفہ 19:19-21 دے مطابق یہوواہ کیہہ کرے گا؟
10 جدوں دُشمن یہوواہ دے بندیاں تے حملہ کرن گے تے یہوواہ کیہہ کرے گا؟ اوہنے کہیا اے کہ میرا غصہ میرے موُنہہ توں ظاہر ہوئے گا۔ (حزقی ایل 38:18، 21-23) مکاشفہ 19 باب چ دَسیا گیا اے کہ ایہدے بعد کیہہ ہوئے گا۔ یہوواہ اپنے پُتر نُوں بھیجے گا تاکہ اوہ اوہدے بندیاں نُوں بچالے تے اوہناں دے دُشمناں نُوں ختم کر دَوے۔ یسوع مسیح نال اسمان دِیاں فوجاں یعنی فرشتے تے پاک روح نال مسح کیتے ہوئے 1 لکھ 44 ہزار مسیحی ہون گے۔ (مکاشفہ 17:14؛ 19:11-15) ایس جنگ دا کیہہ نتیجہ نکلے گا؟ اوہ سارے انسان تے تنظیماں ختم ہو جان گیاں جیہڑیاں یہوواہ دی مخالفت کردیاں نیں۔—مکاشفہ 19:19-21 نُوں پڑھو۔
جنگ دے بعد اِک شادی
11. مکاشفہ دی کتاب چ کیہڑا واقعہ سب توں اہم اے؟
11 ذرا سوچو کہ جدوں خدا دے سارے دُشمن ختم ہو جان گے تے زمین تے اوہدے بندے کِنّے خوش ہون گے! وڈے بابل دی تباہی دی وجہ توں اسمان تے بوہت زیادہ خوشی منائی جائے گی۔ اوتھے اِک ہور واقعہ وی ہوئے گا جدی وجہ توں اِک وڈا جشن منایا جائے گا۔ (مکاشفہ 19:1-3) اوتھے میمنے دی شادی ہوئے گی۔ ایہہ مکاشفہ دی کتاب دا سب توں اہم واقعہ اے۔—مکاشفہ 19:6-9۔
12. مکاشفہ 21:1، 2 دے مطابق میمنے دی شادی کدوں ہوئے گی؟
12 میمنے دی شادی کدوں ہوئے گی؟ ہر مجدون دی جنگ شروع ہون توں کجھ دیر پہلاں 1 لکھ 44 ہزار چ شامل سارے مسیحی اسمان تے موجود ہون گے۔ پر میمنے دی شادی اوہدوں نئیں ہوئے گی۔ (مکاشفہ 21:1، 2 نُوں پڑھو۔) ایہہ شادی ہرمجدون دی جنگ دے بعد ہوئے گی جدوں خدا دے سارے دُشمناں نُوں ختم کر دِتا جائے گا۔—زبور 45:3، 4، 13-17۔
13. میمنے دی شادی تے کیہہ ہوئے گا؟
13 جیویں شادی دُلہا دُلہن نُوں اِک رشتے چ جوڑ دیندی اے اوسے طرحاں میمنے دی شادی بادشاہ یسوع مسیح تے اوہدی ”دُلہن“ یعنی 1 لکھ 44 ہزار مسح کیتے ہوئے مسیحیاں نُوں اِک رشتے چ جوڑ دَوے گی۔ ایس موقعے تے اِک نوِیں حکومت بنے گی جیہڑی زمین تے اِک ہزار سال تک حکمرانی کرے گی۔—مکاشفہ 20:6۔
اِک شاندار شہر تے تواڈا مستقبل
14، 15. مکاشفہ 21 باب چ 1 لکھ 44 ہزار مسیحیاں نُوں کیہہ کہیا گیا اے؟ (پہلے صفحے دی تصویر نُوں ویکھو۔)
14 مکاشفہ 21 باب چ 1 لکھ 44 ہزار مسیحیاں نُوں نواں یروشلیم کہیا گیا اے جیہڑا کہ بوہت ای خوبصورت شہر اے۔ (مکاشفہ 21:2، 9) یوحنا رسول نے ویکھیا کہ ایس شہر دی دیوار دے 12 بنیادی پتھر نیں جنہاں اُتے میمنے دے 12 رسولاں دے 12 ناں لکھے ہوئے سن۔ یوحنا نُوں ایہہ منظر دلچسپ کیوں لگیا ہوئے گا؟ کیونکہ اوہناں وچوں اِک پتھر تے اوہدا اپنا ناں وی لکھیا ہویا سی۔ ایہہ اوہدے لئی بڑے مان دی گل سی!—مکاشفہ 21:10-14؛ اِفسیوں 2:20۔
15 نواں یروشلیم ایناں شاندار اے کہ ایہدا مقابلہ کسے ہور شہر نال نئیں کیتا جا سکدا۔ ایہدی وڈی سڑک خالص سونے دی بنی ہوئی سی، ایہدے 12 دروازے 12 موتی سن، ایہدیاں دیواراں تے بنیاداں ہر طرحاں دے قیمتی پتھراں نال سجائیاں گئیاں سن تے ایس شہر دی لمبائی، چوڑائی تے اونچائی برابر سی۔ (مکاشفہ 21:15-21) پر یوحنا نے ویکھیا کہ ایہدے چ اِک چیز دی کمی اے۔ اوہنے کہیا: مینوں ایہدے چ کوئی ہیکل نظر نئیں آئی کیونکہ بےپناہ قدرت دا مالک یہوواہ خدا اوہدی ہیکل اے تے میمنا وی اوہدی ہیکل اے تے شہر نُوں سورج یاں چن دی روشنی دی لوڑ نئیں سی کیونکہ اوہ خدا دی شان نال روشن سی تے میمنا اوہدا چراغ سی۔ (مکاشفہ 21:22، 23) جیہڑے لوک نویں یروشلیم دا حصہ ہون گے، اوہناں نُوں ہیکل دی ضرورت نئیں ہوئے گی کیونکہ یہوواہ اوہناں دے نال ہوئے گا۔ (عبرانیوں 7:27؛ مکاشفہ 22:3، 4) ایس شہر چ یہوواہ تے یسوع ای ہیکل ہون گے۔
16. مسیح دی ہزار سالہ حکمرانی دے دوران انساناں نال کیہہ ہوئے گا؟
16 جدوں پاک روح نال مسح کیتے ہوئے مسیحی نویں یروشلیم بارے سوچدے نیں تے اوہناں نُوں بڑی خوشی ہوندی اے۔ پر جیہڑے لوک زمین تے ہمیشاں دی زندگی دی امید رکھدے نیں، اوہناں لئی وی ایہہ شہر بوہت اہم اے۔ مسیح دی ہزار سالہ حکمرانی چ نویں یروشلیم دے ذریعے زمین تے رہن والیاں نُوں ڈھیر ساریاں برکتاں مِلن گیاں۔ یوحنا نے ویکھیا کہ ایہہ برکتاں اِنج ای نیں جیویں زندگی دے پانی دا دریا وَگ رہیا ہووے۔ ایس دریا دے دونواں پاسے درخت سن جنہاں دے پتیاں دے ذریعے قوماں نُوں شفا ملنی سی۔ (مکاشفہ 22:1، 2) ایہدے توں پتہ چلدا اے کہ اوس ویلے زمین تے موجود سارے انساناں کول ایہہ موقع ہوئے گا کہ اوہ ایہناں نعمتاں توں فائدہ حاصل کرن۔ فیر ہولی ہولی اوہناں سارے لوکاں نُوں بےعیب بنا دِتا جائے گا جیہڑے یہوواہ دی گل منن گے۔ اوس ویلے کوئی وی بیمار نئیں ہوئے گا، کسے تکلیف چوں نئیں لنگھے گا تے نہ ای کسے دُکھ دی وجہ توں روئے گا۔—مکاشفہ 21:3-5۔
17. مکاشفہ 20:11-13 دے مطابق مسیح دی ہزار سالہ حکمرانی دے دوران کِنہاں نُوں فائدہ ہوئے گا؟
17 مسیح دی ہزار سالہ حکمرانی دے دوران جیہڑیاں برکتاں مِلن گیاں اوہناں توں کِنہاں نُوں فائدہ ہوئے گا؟ ایہناں برکتاں توں سب توں پہلاں تے اوہناں لوکاں نُوں فائدہ ہوئے گا جیہڑے ہرمجِدّون چوں بچ جان گے۔ ایہدے علاوہ اوہناں بچیاں نُوں وی فائدہ ہوئے گا جیہڑے شاید نوِیں دُنیا چ پیدا ہون گے۔ مکاشفہ 20 باب چ ایہہ وعدہ کیتا گیا اے کہ مُردیاں نُوں زندہ کر دِتا جائے گا۔ (مکاشفہ 20:11-13 نُوں پڑھو۔) خدا نیک تے بُرے دونویں طرحاں دے لوکاں نُوں زندہ کرے گا۔ نیک توں مُراد خدا دے اوہ بندے نیں جیہڑے فوت ہو گئے تے بُرے توں مُراد اوہ لوک نیں جنہاں نُوں مرن توں پہلاں خدا بارے سکھن دا موقع نئیں ملیا۔ (اعمال 24:15؛ یوحنا 5:28، 29) کیہہ ایہدا مطلب ایہہ وے کہ مسیح دی ہزار سالہ حکمرانی دے دوران زمین تے سارے لوکاں نُوں زندہ کر دِتا جائے گا؟ جی نئیں۔ جیہڑے لوکاں نے اپنی موت توں پہلاں یہوواہ دی عبادت کرن دا موقع ٹھکرا دِتا سی اوہناں نُوں زندہ نئیں کیتا جائے گا کیونکہ اوہناں نے ثابت کر دِتا کہ اوہ زمین تے فردوس چ رہن دے لائق نئیں نیں۔—متی 25:46؛ 2-تھسلُنیکیوں 1:9؛ مکاشفہ 17:8؛ 20:15۔
آخری اِمتحان
18. ہزار سال دے آخر تے زمین تے کیہہ صورتحال ہوئے گی؟
18 ہزار سال دے آخر تک زمین تے موجود سارے انسان بے عیب ہو جان گے۔ کسے وی انسان دے اندر اوس گُناہ دا کوئی وی اثر نئیں رہ جائے گا جیہڑا سانوں آدم توں ورثے چ ملیا اے۔ (رومیوں 5:12) آدم دے گُناہ دی وجہ توں انساناں تے جیہڑی لعنت آئی اوہ ہمیشاں لئی ختم ہو جائے گی۔ اِنج ہزار سال دے آخر چ زمین تے رہن والے سارے لوک اِک لحاظ نال زندہ ہو جان گے یعنی اوہ بے عیب ہو جان گے۔—مکاشفہ 20:5۔
19. اِک آخری اِمتحان دی لوڑ کیوں ہوئے گی؟
19 جدوں شیطان نے یسوع مسیح نُوں ازمایا تے یسوع یہوواہ دا وفادار رہیا۔ پر سوال ایہہ وے کہ کیہہ سارے بےعیب انسان وی اوہدوں یہوواہ دے وفادار رہن گے جدوں شیطان نُوں موقع دِتا جائے گا کہ اوہ اوہناں نُوں ازمائے؟ ہر بےعیب انسان نُوں اوس ویلے ایس سوال دا جواب دین دا موقع ملے گا جدوں شیطان نُوں ہزار سال دے آخر چ اتھاہ گڑھے چوں کڈھیا جائے گا۔ (مکاشفہ 20:7) جیہڑے لوک ایس اِمتحان چ یہوواہ دے وفادار رہن گے، اوہناں نُوں ہمیشاں دی زندگی تے سچی آزادی ملے گی۔ (رومیوں 8:21) جیہڑے لوک شیطان دا ساتھ دین گے تے یہوواہ دے خلاف بغاوت کرن گے اوہناں نُوں شیطان تے بُرے فرشتیاں نال ہمیشاں لئی ختم کر دِتا جائے گا۔—مکاشفہ 20:8-10۔
20. توانوں مکاشفہ دی کتاب چ لکھیاں زبردست پیشینگوئیاں تے غور کر کے کیہو جیہا لگیا اے؟
20 مکاشفہ دی کتاب تے غور کر کے توانوں کیہو جیہا لگیا اے؟ کیہہ توانوں ایہہ جان کے خوشی ہو رہی اے کہ تُسی وی ایس کتاب چ لکھیاں پیشینگوئیاں دا حصہ او؟ ایہدے توں یقیناً تواڈے دل چ ایہہ خواہش ودھی ہوئے گی کہ تُسی دُوجے لوکاں نُوں وی کہوو کہ اوہ تواڈے نال مِل کے سچے خدا یہوواہ دی عبادت کرن۔ (مکاشفہ 22:17) مکاشفہ دی کتاب چ مستقبل بارے جیہڑیاں گلاں دَسیاں گیاں نیں، اوہناں نُوں جانن دے بعد ساڈے دل چ وی اوہی گل کہن دی خواہش پیدا ہوئی اے جیہڑی یوحنا رسول نے کہی سی: آمین! آؤ، مالک یسوع!—مکاشفہ 22:20۔
گیت نمبر 25: اِک خاص ملکیت
^ ایہہ مکاشفہ دی کتاب بارے مضموناں دی لڑی دا آخری مضمون اے۔ ایس مضمون چ اَسی ویکھاں گے کہ جیہڑے لوک خدا دے وفادار رہن گے، اوہناں دا مستقبل بوہت شاندار ہوئے گا تے خدا دی حکمرانی دی مخالفت کرن والیاں دا انجام بوہت بھیڑا ہوئے گا۔