مطالعے دا مضمون نمبر 22
یہوواہ وَلّوں مِلن والی دانشمندی دے فائدے
یہوواہ دانشمندی بخش دا اے۔—امثال 2:6۔
گیت نمبر 31: خدا دے نال نال چلو
مضمون تے اِک نظر *
1. سانوں ساریاں نُوں ہور زیادہ دانشمندی دی لوڑ کیوں اے؟ (امثال 4:7)
جے کدی توانوں اپنی زندگی چ کوئی اہم فیصلہ کرنا پیا اے تے تُسی اوہدے لئی یقیناً یہوواہ کولوں دانشمندی منگی ہوئے گی۔ (یعقوب 1:5) بادشاہ سلیمان نے لکھیا کہ دانشمندی بہترین شے اے۔ (امثال 4:7 نُوں پڑھو۔) بےشک سلیمان انساناں دی حکمت یاں دانشمندی دی گل نئیں کر رہیا سی۔ اوہ اوس دانشمندی دی گل کر رہیا سی جیہڑی یہوواہ دیندا اے۔ (امثال 2:6) پر کیہہ خدا وَلّوں مِلن والی دانشمندی اوہناں مشکلاں دا مقابلہ کرن چ ساڈی مدد کر سکدی اے جنہاں دا اَج سانوں سامنا کرنا پیندا اے؟ جی بالکل، ایس مضمون چ اَسی ایسے گل تے غور کراں گے۔
2. صحی معنیاں چ دانشمند بنن دا اِک طریقہ کیہہ اے؟
2 صحی معنیاں چ دانشمند بنن دا اِک طریقہ ایہہ وے کہ اَسی اوہناں دو لوکاں دِیاں گلاں تے دھیان دَیئے تے اوہناں تے عمل کریئے جیہڑے اپنی دانشمندی لئی بوہت مشہور نیں۔ پہلے اَسی سلیمان دی گل کراں گے۔ بائبل چ لکھیا اے: خدا نے سلیمان نُوں بوہت زیادہ حکمت تے سمجھ دِتی۔ (1-سلاطین 4:29) فیر اَسی یسوع مسیح بارے گل کراں گے جدے توں بوہتا دانشمند انسان دُنیا چ ہور کوئی نئیں سی۔ (متی 12:42) یسوع مسیح بارے بائبل چ ایہہ پیشینگوئی کیتی گئی سی: یہوواہ دی روح اوہدے تے ٹھہرے گی۔ حکمت تے عقلمندی دی روح۔—یسعیاہ 11:2۔
3. ایس مضمون چ اَسی کیس بارے گل کراں گے؟
3 یہوواہ خدا نے سلیمان تے یسوع نُوں بوہت زیادہ دانشمندی دِتی سی۔ ایس لئی اوہناں دونواں نے زندگی دے اہم معاملیاں بارے بوہت چنگے مشورے دِتے۔ ایس مضمون چ اَسی ایہو جہے تِن معاملیاں بارے گل کراں گے۔ اَسی ویکھاں گے کہ سانوں پیسےدھیلے، کمکار تے اپنی ذات بارے مناسب سوچ کیوں رکھنی چاہی دی اے۔
پیسےدھیلے بارے مناسب سوچ
4. سلیمان تے یسوع دے مالی حالات چ کیہہ فرق سی؟
4 سلیمان بوہت زیادہ امیر سی تے بڑے ای شاندار گھر چ رہندا سی۔ (1-سلاطین 10:7، 14، 15) پر یسوع مسیح کول بس ضرورت دِیاں ای شیواں سن تے اوہدے کول اپنا گھر وی نئیں سی۔ (متی 8:20) پر ایہہ دونویں پیسے تے چیزاں بارے مناسب سوچ رکھدے سن۔ ایہدی کیہہ وجہ سی؟ کیونکہ اوہناں دونواں نُوں یہوواہ وَلّوں دانشمندی ملی سی۔
5. ایہہ کیویں پتہ چلدا اے کہ سلیمان پیسے بارے مناسب سوچ رکھدا سی؟
5 سلیمان نے کہیا کہ پیسہ اِک پناہگاہ اے۔ (واعظ 7:12) بےشک پیسے نال اَسی اپنی زندگی دِیاں ضرورتاں پوریاں کر سکنے آں تے اپنیاں کجھ خواہشاں وی۔ سلیمان دے کول بوہت دولت سی۔ پر اوہ ایہہ جان دا سی کہ زندگی چ کجھ چیزاں پیسے توں زیادہ اہم نیں۔ مثال لئی اوہنے کہیا: نیک ناں بڑی دولت نالوں قیمتی اے۔ (امثال 22:1) سلیمان نے ایہہ وی ویکھیا کہ جیہڑے لوک پیسے نال پیار کردے نیں، اوہ اینے خوش نئیں رہندے۔ (واعظ 5:10، 11) اوہنے ایہہ وی کہیا کہ سانوں ایہہ نئیں سوچنا چاہی دا کہ پیسہ ای سب کجھ اے کیونکہ پیسہ کسے وی ویلے ساڈے ہتھوں جا سکدا اے۔—امثال 23:4، 5۔
6. ایہہ کیویں پتہ چلدا اے کہ یسوع مسیح پیسے تے چیزاں بارے مناسب سوچ رکھدا سی؟ (متی 6:31-33)
6 یسوع مسیح پیسے تے چیزاں بارے مناسب سوچ رکھدا سی۔ اوہ ودھیا کھان پین نُوں وی بُرا نئیں سمجھدا سی۔ (لُوقا 19:2، 6، 7) اِک موقعے تے اوہنے معجزہ کر کے بوہت ای ودھیا مے بنائی۔ (یوحنا 2:10، 11) تے جدوں یسوع مسیح نُوں قتل کیتا گیا، اوس ویلے اوہنے بوہت ای مہنگے کپڑے پائے ہوئے سن۔ (یوحنا 19:23، 24) پر یسوع نے کدی وی پیسے تے چیزاں نُوں اپنی زندگی چ سب توں زیادہ اہمیت نئیں دِتی سی۔ اوہنے اپنے پیروکاراں نُوں کہیا: کوئی وی بندہ دو مالکاں دی غلامی نئیں کر سکدا۔ تُسی خدا تے دولت دونواں دے غلام نئیں بن سکدے۔ (متی 6:24) یسوع مسیح نے کہیا کہ جے اَسی خدا دی بادشاہی نُوں اپنی زندگی چ پہلی تھاں دَواں گے تے یہوواہ سانوں ہر اوہ چیز دَوے گا جدی سانوں لوڑ اے۔—متی 6:31-33 نُوں پڑھو۔
7. اِک بھرا نُوں کم بارے مناسب سوچ رکھن نال کیہہ فائدہ ہویا؟
7 ساڈے بوہت سارے بھین بھراواں نُوں پیسےدھیلے بارے یہوواہ دِیاں ہدیتاں تے عمل کر کے بڑا فائدہ ہویا اے۔ اوہناں وچوں اِک بھرا ڈینیایل اے۔ اوہ کہندا اے: ”جدوں میں جوان ساں تے میں فیصلہ کیتا کہ میں یہوواہ دی عبادت نُوں اپنی زندگی چ سب توں زیادہ اہمیت دَواں گا۔“ بھرا ڈینیایل نے اپنی زندگی نُوں سادہ رکھیا جدی وجہ توں اوہ اپنے وقت تے صلاحیتاں نُوں یہوواہ دے کماں لئی استمال کر سکیا۔ اوہنے کہیا: ”مینوں اپنے فیصلے تے کوئی پچھتاوا نئیں اے۔ جے میں پیسے نُوں اپنی زندگی چ زیادہ اہمیت دِتی ہوندی تے شاید میں بوہت سارا پیسہ کما لیندا۔ پر فیر مینوں اینے چنگے دوست کدی نہ مِلدے تے نہ ای اوہ اِطمینان تے سکون مِلدا جیہڑا خدا دی بادشاہی نُوں پہلاں درجہ دین نال ملیا اے۔ یہوواہ نے مینوں جِنّی خوشی دِتی اے اونی مینوں پیسے نال نئیں مل سکدی سی۔“ ایس توں صاف پتہ چلدا اے کہ جے اَسی اپنا دھیان پیسے تے نئیں سگوں یہوواہ دی عبادت تے رکھاں گے تے ایہدے توں سانوں بوہت فائدے ہون گے۔
کمکار بارے مناسب سوچ
8. اَسی کیوں کہہ سکنے آں کہ سلیمان کمکار بارے مناسب سوچ رکھدا سی؟ (واعظ 5:18، 19)
8 سلیمان نے کہیا کہ محنت کرن نال بڑی خوشی مِلدی اے۔ اوہنے ایس خوشی نُوں خدا دی بخشش کہیا۔ (واعظ 5:18، 19 نُوں پڑھو۔) اوہنے لکھیا: ہر طرحاں دی محنت چ نفع اے۔ (امثال 14:23) سلیمان جان دا سی کہ ایہہ گل بالکل سچ اے۔ اوہ آپ وی بڑا محنتی سی۔ اوہنے گھر بنائے، تاکستان تے باغ لائے۔ تالاب بنائے، ایتھوں تک کہ شہر وی بنائے۔ (1-سلاطین 9:19؛ واعظ 2:4-6) ایس کم لئی بوہت زیادہ محنت دی لوڑ سی تے کوئی شک نئیں کہ ایہہ سب کر کے سلیمان نُوں بوہت زیادہ خوشی تے اِطمینان ملیا ہوئے گا۔ پر سلیمان جان دا سی کہ سچی خوشی حاصل کرن لئی اوہنوں کجھ ہور وی کرن دی لوڑ اے۔ ایس لئی اوہنے یہوواہ دی خدمت لئی وی بوہت سارے کم کیتے۔ مثال لئی، اوہنے یہوواہ دی عبادت لئی شاندار ہیکل بنوائی جدے چ سَت سال لگے۔ (1-سلاطین 6:38؛ 9:1) سلیمان نے یہوواہ دی خدمت لئی وی کم کیتے تے ہور وی بڑے کم کیتے جدے بعد اوہ سمجھ گیا کہ ساڈے لئی سب توں ضروری ایہہ وے کہ اَسی یہوواہ دی خدمت کریئے۔ اوہنے لکھیا: ہُن ساریاں گلاں سنائیاں گئیاں جنہاں دا نچوڑ ایہہ وے کہ خدا توں ڈرو تے اوہدے حکماں نُوں منو کیونکہ ایہی انسان دا فرض اے۔—واعظ 12:13۔
9. یسوع مسیح نے کیہہ کیتا تاکہ اوہ اپنے کاروبار نُوں حد توں زیادہ اہمیت نہ دَوے؟
9 یسوع مسیح بوہت محنتی سی۔ جدوں اوہ نوجوان سی تے اوہنے ترکھان دے طور تے کم کیتا۔ (مرقس 6:3) یسوع دا خاندان بوہت وڈا سی تے یقیناً اوہدے ماں پیو ایس گل دی بوہت قدر کردے ہون گے کہ یسوع گھر دِیاں ضرورتاں پوریاں کرن چ اوہناں دی مدد کر رہیا اے۔ یسوع بے عیب سی جدی وجہ توں اوہ ترکھان دا کم بوہت چنگی طرحاں کر دا ہوئے گا۔ ایس لئی بوہت سارے لوک اوہدے کولوں کم کروانا چاہندے ہون گے تے یقیناً یسوع جیہڑا وی کم کردا سی، اوہدے توں اوہنوں خوشی مِلدی ہوئے گی۔ بھانویں کہ اوہ اپنا کم بڑی محنت نال کردا سی پر اوہ یہوواہ دی عبادت لئی ہمیشاں وقت کڈھ دا سی۔ (یوحنا 7:15) بعد چ جدوں اوہنے سارے وقت لئی مُنادی کرنا شروع کیتی تے اوہنے لوکاں نُوں کہیا: اوس کھانے لئی محنت نہ کرو جیہڑا خراب ہوندا اے سگوں اوس کھانے لئی جیہڑا خراب نئیں ہوندا تے جدے ذریعے ہمیشاں دی زندگی مِلدی اے۔ (یوحنا 6:27) تے اپنے پہاڑی واعظ چ یسوع نے کہیا: اسمان تے خزانہ جمع کرو۔—متی 6:20۔
10. کجھ لوکاں نُوں کم دی جگہ تے کیہڑی مشکل دا سامنا ہو سکدا اے؟
10 یہوواہ دے مشوریاں تے عمل کرن نال اَسی کمکار بارے مناسب سوچ رکھ سکاں گے۔ یہوواہ چاہندا اے کہ اَسی محنت کریئے تے چنگے کم کریئے۔ (اِفسیوں 4:28) کم دی جگہ تے ساڈا باس یاں ٹھیکےدار ویکھدا اے کہ اَسی کِنّے ایماندار یاں محنتی آں تے شاید کدی کدار اوہ سانوں کہوے کہ اوہ ساڈے کم توں خوش اے تے ایہدی قدر کردا اے۔ شاید اَسی ایہہ سوچ کے ہور زیادہ گھنٹے کم کرنا شروع کر دیئے کہ ساڈا باس یہوواہ دے گواہواں بارے چنگا سوچے۔ جے اَسی اِنج کراں گے تے ہو سکدا اے کہ ساڈے کول ساڈے گھروالیاں تے یہوواہ دی خدمت کرن لئی ایناں وقت نہ بچے۔ ایس صورت چ کجھ تبدیلیاں کرنیاں پین گئیاں تاکہ اَسی سب توں اہم کم نُوں زیادہ وقت دے سکئے۔
11. اِک بھرا نے کمکار بارے مناسب سوچ رکھن دے سلسلے چ کیہہ سکھیا؟
11 اِک نوجوان بھرا جدا ناں ولیم اے، اوہ اِک بزرگ کول نوکری کردا سی۔ بھرا ولیم نے اوس بزرگ توں سکھیا کہ کمکار بارے مناسب سوچ رکھنا بوہت ضروری اے۔ اوہنے کہیا: ”ایہہ بھرا کمکار بارے مناسب سوچ رکھن دے معاملے چ اِک ودھیا مثال اے۔ ایہہ بھرا بوہت محنتی اے تے بوہت سوہنا کم کردا اے۔ ایس لئی اوہدے اپنے گاہکاں نال بوہت چنگے تعلقات نیں۔ پر جیویں ای کم دا وقت ختم ہو جاندا اے، اوہ اپنے گھر چلا جاندا اے تاکہ اوہ اپنے گھروالیاں نال وقت گزار سکے تے یہوواہ دی عبادت کر سکے۔میں ویکھیا اے کہ اوہ بھرا ایس وجہ توں بڑا خوش رہندا اے۔“
اپنی ذات بارے مناسب سوچ
12. سلیمان نے کیویں ظاہر کیتا کہ اوہ اپنی ذات بارے مناسب سوچ رکھدا اے پر فیر اوہدی سوچ کیویں بدل گئی؟
12 جدوں تک سلیمان یہوواہ دا وفادار رہیا، اوہنے اپنے بارے مناسب سوچ رکھی۔ جدوں اوہ نوجوان سی تے اوہنے منیا کہ اوہ سارے کم اپنی طاقت نال نئیں کر سکدا سگوں اوہنوں یہوواہ دی رہنمائی دی لوڑ اے۔ (1-سلاطین 3:7-9) جدوں اوہنے حکمرانی کرنا شروع کیتی تے اوہ ایہہ گل چنگی طرحاں جان دا سی کہ غرور کرنا بوہت خطرناک ہوندا اے۔ اوہنے لکھیا: ہلاکت توں پہلاں تکبر تے زوال توں پہلاں گھمنڈ اے۔ (امثال 16:18) افسوس دی گل اے کہ سلیمان بعد چوں اپنی ایہہ گل بُھل گیا۔ اپنی حکمرانی دے کجھ ای عرصے بعد اوہ مغرور بن گیا تے اوہنے یہوواہ دے حکم توڑنا شروع کر دِتے۔ مثال لئی، یہوواہ دا اِک حکم ایہہ سی کہ بنیاِسرائیل دا بادشاہ بوہت ساریاں بیویاں نہ رکھے تاکہ اوہدا دل پھر نہ جائے۔ (اِستثنا 17:17) پر سلیمان نے یہوواہ دا ایہہ حکم توڑ دِتا تے 700 بیویاں تے 300 حرماں رکھیاں۔ ایہناں چوں بوہت ساریاں عورتاں بُتپرست سن۔ (1-سلاطین 11:1-3) شاید سلیمان نُوں لگ رہیا سی کہ ایہدے چ کوئی مسئلہ نئیں اے۔ پر سلیمان نُوں یہوواہ دے حکم توڑن دی وجہ توں بوہت نقصان چُکنا پیا۔—1-سلاطین 11:9-13۔
13. یسوع مسیح دی خاکساری تے دھیان دین نال اَسی کیہہ سکھ سکنے آں؟
13 یسوع بوہت خاکسار سی تے اپنے بارے مناسب سوچ رکھدا سی۔ زمین تے آن توں پہلاں اوہنے یہوواہ دی خدمت چ بڑے شاندار کم کیتے سن۔ یسوع دے ذریعے اسمان تے زمین دِیاں ساریاں چیزاں بنائیاں گئیاں۔ (کلسیوں 1:16) جدوں یسوع نے بپتسمہ لیا تے اوہنوں اوہ سارے کم یاد آ گئے جیہڑے اوہنے اوس ویلے کیتے سن جدوں اوہ اپنے اسمانی باپ دے نال سی۔ (متی 3:16؛ یوحنا 17:5) پر ایہدی وجہ توں اوہ مغرور نئیں ہویا۔ اوہنے کدی وی اپنے آپ نُوں دُوجیاں توں وڈا نئیں بنایا۔ اوہنے اپنے شاگرداں نُوں دَسیا کہ اوہ زمین تے لوکاں کولوں خدمت کران نئیں آیا سگوں ایس لئی آیا اے کہ خدمت کرے تے بوہت سارے لوکاں لئی اپنی جان فدیے دے طور تے دَوے۔ (متی 20:28) اوہنے ایہہ وی کہیا کہ اوہ کوئی وی کم اپنے اِختیار نال نئیں کر سکدا۔ (یوحنا 5:19) یسوع واقعی بوہت خاکسار سی۔ سانوں وی اوہدے وانگوں بننا چاہی دا اے۔
14. اَسی اپنے بارے مناسب سوچ رکھن دے سلسلے چ یسوع توں کیہہ سکھ سکنے آں؟
14 یسوع نے اپنے پیروکاراں نُوں سکھایا کہ اوہ اپنے بارے مناسب سوچ رکھن۔ اِک واری تے اوہنے اوہناں نُوں کہیا: خدا نُوں تے ایہہ وی پتہ اے کہ تواڈے سر تے کِنّے وال نیں۔ (متی 10:30) ایس گل توں سانوں واقعی بوہت تسلی مِلدی اے، خاص کر کے اوہدوں جدوں اَسی اپنے بارے بُرا سوچ رہے ہنے آں۔ یسوع دی ایس گل توں پتہ چلدا اے کہ ساڈے اسمانی باپ نُوں ساڈی بوہت فکر اے تے اوہ سانوں بوہت قیمتی سمجھدا اے۔ جے یہوواہ نے سانوں اجازت دِتی اے کہ اَسی اوہدی عبادت کرئیے تے اوہنوں لگدا اے کہ اَسی اوہدی نوِیں دُنیا چ ہمیشاں تک زندہ رہن دے لائق آں تے سانوں کدی وی ایہہ نئیں سوچنا چاہی دا کہ اوہدا ایہہ فیصلہ غلط اے۔
15. (الف) اِک ”مینارِنگہبانی“ چ اپنی ذات بارے مناسب سوچ رکھن دے سلسلے چ کیہہ دَسیا گیا سی؟ (ب) جیویں کہ صفحہ نمبر 24 تے دِتی گئی تصویر چ وکھایا گیا اے، جے اَسی اپنے ای بارے سوچاں گے تے سانوں کیہڑیاں برکتاں نئیں مِلن گیاں؟
15 تقریباً 15 سال پہلے اِک ”مینارِنگہبانی“ چ سانوں کہیا گیا سی کہ اَسی اپنے بارے مناسب سوچ رکھئے۔ ایہدے چ لکھیا سی: ”دراصل سانوں اپنے آپ نُوں ایناں اہم نئیں سمجھنا چاہی دا کہ اَسی مغرور بن جائیے تے نہ ای سانوں اپنے آپ نُوں بوہت زیادہ حقیر سمجھنا چاہی دا اے۔ ایہدی بجائے سانوں اپنے بارے مناسب نظریہ رکھنا چاہی دا اے تے اپنیاں خوبیاں تے خامیاں دونواں تے دھیان دینا چاہی دا اے۔ اِک مسیحی عورت نے کہیا: ”نہ تے میں شیطان آں تے نہ ای کوئی فرشتہ۔ دُوجیاں وانگوں میرے اندر خوبیاں وی نیں تے خامیاں وی نیں۔““ * ایہدے توں پتہ چلدا اے کہ اپنے بارے مناسب سوچ رکھنا بوہت ضروری اے۔
16. یہوواہ سانوں چنگے مشورے کیوں دیندا اے؟
16 یہوواہ بوہت دانشمند اے تے اوہ اپنے کلام دے ذریعے سانوں بوہت چنگے مشورے دیندا اے۔ اوہ ساڈے نال پیار کردا اے تے چاہندا اے کہ اَسی خوش رہیے۔ (یسعیاہ 48:17، 18) جدوں اَسی ایہو جہے کم کرنے آں جنہاں توں یہوواہ خوش ہوندا اے تے سانوں سچی خوشی مِلدی اے۔ اَسی ایہو جہے مسئلیاں توں وی بچ جانے آں جنہاں دا اوہناں لوکاں نُوں سامنا کرنا پیندا اے جیہڑے پیسےدھیلے، اپنے کمکار تے اپنے آپ نُوں بوہت زیادہ اہمیت دیندے نیں۔ آؤ، ایہہ ارادہ کریئے کہ اَسی دانشمند بناں گے تے یہوواہ دا دل خوش کراں گے۔—امثال 23:15۔
گیت نمبر 48: روز یہوواہ دے سنگ سنگ چلو
^ سلیمان تے یسوع مسیح بڑے دانشمند سن۔ اوہناں نُوں ایہہ دانشمندی یہوواہ نے دِتی سی۔ ایس مضمون چ اَسی ویکھاں گے کہ سلیمان تے یسوع نے خدا دے الہام نال پیسے دھیلے، کمکار تے اپنی ذات بارے مناسب سوچ رکھن بارے کیہہ کجھ دَسیا تے اَسی ایہدے توں کیہہ سکھ سکنے آں۔ اَسی ایہہ وی ویکھاں گے کہ ساڈے بھین بھراواں نُوں ایس بارے بائبل چ لکھیاں گلاں تے عمل کرن نال کیہڑے فائدے ہوئے نیں۔
^ اُردو زبان چ ”مینارِنگہبانی“ 1 اگست 2005 چ مضمون ”بائبل حقیقی خوشی حاصل کرنے میں آپکی مدد کر سکتی ہے“ نُوں ویکھو۔
^ تصویر دی وضاحت: جیمز تے کرسٹوفر دو جوان بھرا نیں جیہڑے اِک ای کلیسیا چ نیں۔ جیمز زیادہتر وقت اپنی گڈی دا خیال رکھن چ لاندا اے جد کہ کرسٹوفر اپنی گڈی نُوں دُوجیاں نُوں مُنادی دے علاقے چ تے عبادتاں تے کھڑن لئی استمال کردا اے۔
^ تصویر دی وضاحت: جیمز اپنے باس نُوں خوش کرن لئی اوورٹائم کر رہیا اے۔ جدوں وی اوہدا باس اوہنوں اوورٹائم کرن لئی کہندا اے، اوہ ایہہ کرن لئی تیار ہو جاندا اے۔ اوسے شام کرسٹوفر جیہڑا کہ کلیسیا چ اِک خادم اے، اِک بزرگ نال اِک بھین دا حوصلہ ودھان لئی گیا اے۔ کرسٹوفر نے اپنے باس نُوں پہلاں توں ای دَس دِتا سی کہ اوہ ہفتے چ کجھ دن شام دے وقت کم نئیں کرے گا کیونکہ اوس ویلے اوہ یہوواہ دی عبادت کردا اے۔
^ تصویر دی وضاحت: جیمز صرف اپنے بارے سوچدا اے جد کہ کرسٹوفر یہوواہ نُوں اپنی زندگی چ سب توں زیادہ اہمیت دیندا اے۔ ایس وجہ توں اوہنے اِک عبادتگاہ دی مرمت کر دے ویلے بوہت چنگے دوست بنائے نیں۔