1.‏ یہوواہ اپنے بندیاں نُوں کیہہ کر‌ن دی دعوت دیندا اے؟ (‏تصویر نُوں وی ویکھو۔)‏

 اَسی تسلی تے رہنمائی کدے کولوں منگ سکنے آں؟ ایس سوال دا جواب سانوں ساریاں نُوں پتہ اے کہ ایہدے لئی اَسی یہوواہ کولوں دُعا کر سکنے آں۔ اوہ سانوں اِنج کر‌ن دی دعوت دیندا اے۔ بائبل چ کہیا گیا اے کہ ہر ویلے دُعا کر‌و۔ (‏1-‏تھسلُنیکیوں 5:‏17‏)‏ اَسی دُعا چ کُھل کے یہوواہ نال گل کر سکنے آں تے زند‌گی دے ہر معاملے چ اوہدے کولوں رہنمائی منگ سکنے آں۔ (‏امثال 3:‏5، 6‏)‏ یہوواہ دا دل بوہت وڈا اے۔ ایس لئی اوہ سانوں کہندا اے کہ جِنّی وار ساڈا دل کر‌ے، اَسی اوہدے کولوں دُعا کر‌یئے۔‏

2.‏ اَسی ایس مضمون چ کیس بارے گل کر‌اں گے؟‏

² اَسی یہوواہ دے بڑے شکرگزار آں کہ اوہنے سانوں دُعا کر‌ن دا اعزاز دِتا اے۔ پر ساڈی زند‌گی بڑی مصروف اے۔ ایس لئی ہو سکدا اے کہ سانوں دُعا کر‌ن لئی وقت کڈھنا مشکل لگے۔ ایہہ وی ہوسکدا اے کہ سانوں ایہہ محسوس ہوئے کہ سانوں اپنیاں دُعاواں نُوں ہور بہتر کر‌ن دی ضرورت اے۔ ایس حوالے نال پاک کلام چ بڑے چنگے مشورے دِتے گئے نیں۔ ایس مضمون چ اَسی یسوع دی مثال تے غور کر‌دیاں ہوئیاں ویکھاں گے کہ اَسی دُعا کر‌ن لئی وقت کیویں کڈھ سکنے آں۔ اَسی پنج ایہو جہیاں گلاں تے وی غور کر‌اں گے جنہاں نُوں اپنیاں دُعاواں چ شامل کر کے اَسی ایہناں نُوں ہور بہتر بنا سکنے آں۔‏

3.‏ یسوع دُعا بارے کیہڑی گل جان‌دا سی؟‏

³ یسوع جان‌دا سی کہ یہوواہ ساڈیاں دُعاواں دی بڑی قدر کر‌دا اے۔ زمین تے آن توں کئی سال پہلاں یسوع نے ویکھیا سی کہ اوہدا اسمانی باپ اپنے وفادار بندیاں دِیاں دُعاواں دا جواب دیندا  اے۔ مثال لئی جدوں یہوواہ نے حنّہ، داؤد، ایلیاہ تے اپنے کجھ ہور وفادار بندیاں دِیاں دُعاواں دا جواب دِتا تے اوس ویلے یسوع اپنے باپ دے نال سی۔ (‏1-‏سموئیل 1:‏10، 11،‏ 20؛‏ 1-‏سلاطین 19:‏4-‏6؛‏ زبور 32:‏5‏)‏ ایہی وجہ سی کہ اوہنے اپنے شاگرداں نُوں سکھایا کہ اوہ پورے یقین نال تے وار وار دُعا کر‌ن۔—‏متی 7:‏7-‏11‏۔‏

4.‏ اَسی یسوع دِیاں دُعاواں توں کیہہ سکھنے آں؟‏

⁴ یہوواہ کولوں دُعا کر‌ن دے سلسلے چ یسوع نے اپنے پیروکاراں لئی بڑی چنگی مثال قائم کیتی۔ زمین تے یہوواہ دی خدمت کر‌دیاں ہوئیاں یسوع نے وار وار دُعا کیتی۔ اوہنوں دُعا کر‌ن لئی وقت کڈھنا پیندا سی کیونکہ اوہ بڑا مصروف ہوند‌ا سی تے اوہدے آلے دوالے ہر ویلے لوک ہوند‌ے سن۔ (‏مرقس 6:‏31،‏ 45، 46‏)‏ ایس لئی اوہ ستی سویرے اُٹھدا سی تاکہ اوہ کلّے چ یہوواہ کولوں دُعا کر سکے۔ (‏مرقس 1:‏35‏)‏ اِک واری اِک خاص فیصلہ لین توں پہلاں یسوع نے پوری رات دُعا کیتی۔ (‏لُوقا 6:‏12، 13‏)‏ اپنی موت توں پہلی والی رات اوہنے وار وار یہوواہ کولوں دُعا کیتی کیونکہ اوہ زمین تے اوہدی زند‌گی دا سب توں اوکھا ویلا سی۔—‏متی 26:‏39،‏ 42،‏ 44‏۔‏

5.‏ اَسی یسوع دی مثال تے کیویں عمل کر سکنے آں؟‏

⁵ اَسی یسوع کولوں سکھنے آں کہ بھانویں اَسی کِنّے ای مصروف کیوں نہ ہوئیے، سانوں دُعا کر‌ن لئی وقت کڈھنا چاہی دا اے۔ یسوع وانگوں شاید سانوں وی دُعا کر‌ن لئی کوئی وقت طے کر‌نا پووے۔ ہوسکدا اے کہ ایہدے لئی سانوں سویرے چھیتی اُٹھنا پووے یاں رات نُوں تھوڑی دیر نال سونا پووے۔ جدوں اَسی اِنج کر‌اں گے تے اَسی ایہہ ثابت کر‌اں گے کہ اَسی دُعا نُوں اِک بوہت وڈا اعزاز سمجھنے آں۔ اِک بھین نے دَسیا کہ اوہنوں حالے وی یاد اے کہ جدوں اوہنوں پہلی واری پتہ چلیا کہ دُعا ساڈے لئی کِنّاں وڈا اعزاز اے تے اوہدا دل شکرگزاری نال بھر گیا۔ اوہ کہندی اے کہ ”‏جدوں مینوں پتہ چلیا کہ مَیں یہوواہ نال کسے وی ویلے گل کر سکنی آں تے مَیں اوہنوں اپنا قریبی دوست سمجھن لگ پئی۔ تے میرے دل چ ایہہ خواہش پیدا ہوئی کہ مَیں اپنیاں دُعاواں نُوں ہور بہتر بناواں۔“‏ ایہدے چ کوئی شک نئیں کہ ساڈے چوں زیادہ‌تر اِنج ای محسوس کر‌دے نیں۔ آؤ فیر پنج ایہو جہیاں گلاں تے غور کر‌نے آں جنہاں نُوں اَسی اپنیاں دُعاواں چ شامل کر سکنے آں۔‏

6.‏ مکاشفہ 4:‏10، 11 دے مطابق یہوواہ کیس چیز دا حق رکھدا اے؟‏

⁶ یہوواہ دی وڈیائی کرو۔‏ اِک رویا چ یوحنا رسول نے 24 بزرگاں نُوں ویکھیا جیہڑے اسمان تے یہوواہ دی عبادت کر رہے سن۔ اوہ یہوواہ دی وڈیائی کر رہے سن تے ایہہ کہہ رہے سن کہ اوہ عظمت تے عزت تے طاقت دا حقدار اے۔ ‏(‏مکاشفہ 4:‏10، 11 نُوں پڑھو۔)‏ ایہو جہیاں بوہت ساریاں گلاں نیں جنہاں دی وجہ توں وفادار فرشتے وی یہوواہ دی  وڈیائی کر‌دے نیں۔ اوہ اسمان تے اوہدے نال نیں تے اوہنوں بڑی چنگی طرحاں جاند‌ے نیں۔ اوہ اوہدے کماں توں اوہدیاں خوبیاں بارے سکھدے نیں تے ایس وجہ توں اوہناں نُوں اوہدی وڈیائی کر‌ن دی ہلاشیری مِلدی اے۔—‏ایوب 38:‏4-‏7‏۔‏

7.‏ اَسی کیہڑیاں گلاں لئی یہوواہ دی وڈیائی کر سکنے آں؟‏

⁷ سانوں وی اپنیاں دُعاواں چ یہوواہ دی وڈیائی کر‌نی چاہی دی اے۔ اِنج کر‌ن لئی اَسی اوہنوں دَس سکنے آں کہ سانوں اوہدی کیہڑی گل پسند اے تے اَسی اوہدا احترام کیوں کر‌نے آں۔ بائبل پڑھدے تے ایہدے تے سوچ وچار کر‌دے ویلے یہوواہ دِیاں ایہو جہیاں خوبیاں نُوں ویکھن دی کوشش کر‌و جیہڑیاں خاص طور تے توانوں بوہت پسند نیں۔ (‏ایوب 37:‏23؛‏ رومیوں 11:‏33‏)‏ فیر اوہنوں دَسو کہ تُسی ایہناں خوبیاں بارے کیہو جیہا محسوس کر‌دے او۔ اَسی ایس گل لئی وی یہوواہ دی وڈیائی کر سکنے آں کہ اوہ ساڈی تے ساڈے بھین بھراواں دی مدد کر‌دا اے۔ اوہ ہمیشاں توں ساڈی حفاظت تے مدد کر‌دا آ رہیا اے۔—‏1-‏سموئیل 1:‏27؛‏ 2:‏1، 2‏۔‏

8.‏ اَسی کیہڑیاں گلاں لئی یہوواہ دا شکریہ ادا کر سکنے آں؟ (‏1-‏تھسلُنیکیوں 5:‏18‏)‏

⁸ یہوواہ دا شکریہ ادا کرو۔‏ اَسی کئی گلاں لئی دُعا چ یہوواہ دا شکریہ ادا کر سکنے آں۔ ‏(‏1-‏تھسلُنیکیوں 5:‏18 نُوں پڑھو۔)‏ ساڈے کول جنیاں وی چنگیاں چیزاں نیں، اَسی اوہناں لئی یہوواہ دا شکریہ ادا کر سکنے آں کیونکہ ہر چنگی نعمت اوہدے وَلّوں مِلدی اے۔ (‏یعقوب 1:‏17‏)‏ مثال لئی، اَسی ایس خوب صورت زمین تے اوہناں شاند‌ار چیزاں لئی یہوواہ دا شکریہ ادا کر سکنے آں جیہڑیاں اوہنے بنائیاں نیں۔ اَسی اپنی زند‌گی، اپنے خاند‌ان، اپنے دوستاں تے اپنی امید لئی وی یہوواہ نُوں شکریہ کہہ سکنے آں۔ اَسی ایس گل لئی وی اوہنوں شکریہ کہہ سکنے آں کہ اوہنے سانوں اپنا دوست بنن دا اعزاز دِتا اے۔‏

9.‏ سانوں اپنے دل چ یہوواہ لئی شکرگزاری نُوں کیوں ودھاند‌ے رہنا چاہی دا اے؟‏

⁹ شاید سانوں اوہناں گلاں بارے سوچ وچار کر‌ن لئی خاص طور تے کوشش کر‌نی پووے جنہاں لئی اَسی یہوواہ دے بڑے شکرگزار آں۔ اَسی اِک ایہو جہی دُنیا چ رہ رہے آں جتھے زیادہ‌تر لوک ناشکرے نیں۔ اکثر لوکاں دا دھیان ایس گل تے نئیں ہوند‌ا کہ اوہناں کول جیہڑیاں شیواں ہے نیں، اوہ اوہناں لئی شکرگزار کیویں ہو سکدے نیں۔ سگوں اوہناں دا دھیان بس ایس گل تے ہوند‌ا اے کہ اوہناں نُوں ہور کیہہ کجھ چاہی دا اے۔ جے ساڈی سوچ وی ایہو جہی ہوئے گی تے ساڈیاں دُعاواں چ صرف درخاستاں ای درخاستاں ہون گیاں۔ جے اَسی چاہنے آں کہ اِنج نہ ہووے تے سانوں اپنے دل چ یہوواہ دے اوہناں کماں لئی قدر ودھان دی لوڑ اے جیہڑے اوہ ساڈے لئی کر‌دا اے۔—‏لُوقا 6:‏45‏۔‏

10.‏ شکرگزاری دے جذبے نے اِک بھین دی مدد کیویں کیتی کہ اوہ مشکلاں چ ہمت نہ ہارے؟ (‏تصویر نُوں وی ویکھو۔)‏

¹⁰ شکرگزاری دے جذبے دی وجہ توں اَسی مشکلاں چ وی ہمت نئیں ہاردے۔ ایس حوالے نال ذرا اِک بھین دے تجربے تے غور کر‌و جدا ناں کیونگ سُوک اے۔ بھین دا تجربہ اُردو زبان دے ‏”‏مینارِنگہبانی“‏ 15 جنوری 2015 چ آیا سی۔ اوہنوں پتہ چلیا کہ اوہنوں پھیپھڑیاں دا کینسر اے۔ اوہ کہندی اے:‏ ”‏جدوں مینوں میری بیماری بارے پتہ چلیا تے میرے پیراں تھلوں زمین نکل گئی۔ مینوں لگیا کہ میرے کول کجھ نئیں بچیا۔ مینوں بوہت ڈر لگ رہیا سی۔“‏ ایس  مشکل وقت چ ہمت نہ ہارن چ کیہڑی چیز نے بھین دی مدد کیتی؟ اوہنے کہیا کہ ”‏مَیں ہر رات سون توں پہلاں اپنے گھر دی چھت تے جاند‌ی ساں تے اُچی آواز چ یہوواہ کولوں دُعا کر‌نی ساں۔“‏ اوہ دُعا چ اوہناں پنج برکتاں لئی یہوواہ دا شکریہ ادا کر‌دی سی جیہڑیاں اوہنوں اوس دن چ ملیاں ہوند‌یاں سن۔ ایس وجہ توں اوہ زیادہ پریشان نئیں ہوند‌ی سی۔ اوہدے دل چ ایہہ خواہش پیدا ہوند‌ی سی کہ اوہ یہوواہ لئی اپنی محبت دا اظہار کر‌ے۔ اوہنے ویکھیا اے کہ جدوں یہوواہ دے بندے مشکلاں چوں لنگھ رہے ہوند‌ے نیں تے اوہ اوہناں دی مدد کیویں کر‌دا اے۔ اوہ سمجھ گئی سی کہ ایہہ مشکلاں اوہناں برکتاں اَگے کجھ وی نئیں نیں جیہڑیاں یہوواہ سانوں دے رہیا اے۔ بھین کیونگ سُوک وانگوں جدوں اَسی وی مشکلاں چوں لنگھ رہے ہُنے آں تے ایہو جہیاں کئی چیزاں ہو سکدیاں نیں جنہاں لئی اَسی یہوواہ دا شکریہ ادا کر سکنے آں۔ دُعا چ شکرگزاری دا اظہار کر‌ن نال سانوں مدد مِلدی اے کہ اَسی مشکلاں چ ہمت نہ ہاریئے تے مطمئن رہ سکئے۔‏

11.‏ یسوع دے اسمان تے جان توں بعد اوہدے شاگرداں نُوں دلیری دی لوڑ کیوں سی؟‏

¹¹ مُنادی کرن لئی یہوواہ کولوں دلیری منگو۔‏ اسمان تے جان توں پہلاں یسوع نے اپنے شاگرداں نُوں یاد دَوایا کہ اوہناں دی ایہہ ذمےداری اے کہ اوہ یروشلیم، سارے یہودیہ تے سامریہ وچ تے زمین دے کونے کونے تک بادشاہی دی خوشخبری سُنان۔ (‏اعمال 1:‏8؛‏ لُوقا 24:‏46-‏48‏)‏ ایہدے کجھ چِر بعد ای یہودی مذہبی رہنماواں نے پطرس تے یوحنا رسول نُوں گرفتار کر لیا تے اوہناں نُوں وڈی عدالت چ لے گئے۔ اوہناں نے ایہناں رسولاں نُوں حکم دِتا کہ اوہ مُنادی کر‌نا بند کر دین، ایتھوں تک کہ اوہناں نُوں ڈرایا دھمکایا وی گیا۔ (‏اعمال 4:‏18،‏ 21‏)‏ ایہدے تے پطرس تے یوحنا نے کیہہ کیتا؟‏

12.‏ اعمال 4:‏29،‏ 31 دے مطابق شاگرداں نے کیہہ کیتا؟‏

¹² یہودی مذہبی رہنماواں دِیاں دھمکیاں دے باوجود پطرس تے یوحنا نے کہیا:‏ تُسی آپ سوچو کیہہ خدا دی نظر چ ایہہ صحی ہوئے گا کہ اَسی اوہدی گل سُنن دی بجائے تواڈی گل سنیے؟ اَسی جو کجھ ویکھیا تے سُنیا اے، اوہدے بارے گل کر‌نا اَسی نئیں چھڈ سکدے۔ (‏اعمال 4:‏19، 20‏)‏ جدوں پطرس تے یوحنا نُوں رہا کر دِتا گیا تے سارے شاگرداں نے مل کے یہوواہ کولوں دُعا کیتی تاکہ اوہ اوہدی مرضی نُوں پورا کر سکن۔ اوہناں نے دُعا چ یہوواہ نُوں ایہہ کہیا:‏ اپنے غلاماں نُوں توفیق دے کہ دلیری نال تیرا کلام سناند‌ے رہن۔ یہوواہ نے اوہناں دی ایس دُعا دا جواب دِتا۔‏‏—‏اعمال 4:‏29،‏ 31 نُوں پڑھو۔‏

13.‏ اَسی بھرا جن‌یوک توں کیہہ سکھ سکنے آں؟‏

¹³ جدوں حکومت سانوں مُنادی کر‌ن توں منع کر‌دی اے تے اَسی شاگرداں دی مثال تے عمل کر‌دے ہوئیاں مُنادی کر‌نا نئیں چھڈدے۔ ذرا اِک بھرا دی مثال تے غور کر‌و جدا ناں جن‌یوک اے۔ اوہنوں فوج چ بھرتی نہ ہون دی وجہ توں جیل چ پا دِتا گیا۔ اوتھے اوہنوں ایہہ ذمےداری دِتی گئی کہ اوہ اوہناں قیدیاں نُوں کھانا تے دُوجیاں چیزاں دَوے جنہاں نُوں علیٰحدہ اِک کال کوٹھڑی چ رکھیا جاند‌ا اے۔ پر اوہنوں ایہہ اجازت نئیں سی کہ اوہ اپنے کم توں ہٹ کے اوہناں نال کوئی گل کر‌ے۔ ایس لئی اوہ اوہناں نال بائبل بارے وی کوئی گل نئیں کر سکدا سی۔ اوہنے دُعا چ یہوواہ کولوں دلیری تے سمجھداری منگی تاکہ اوہ گواہی دین دا کوئی وی موقع ہتھوں جان نہ دَوے۔ (‏اعمال 5:‏29‏)‏ اوہ کہندا اے:‏ ”‏یہوواہ نے مینوں دلیری تے سمجھداری دین نال میری دُعا دا جواب دِتا تے مَیں بوہت سارے قیدیاں نُوں پنج پنج منٹ دا بائبل کورس شروع کر‌ا سکیا۔ رات نُوں مَیں خط لکھنا ساں جیہڑے مَیں اگلے دن دُوجے قیدیاں نُوں دینا ساں۔“‏ اَسی وی ایس گل دا یقین رکھ سکنے آں کہ یہوواہ مُنادی کر‌ن چ ساڈی مدد ضرور کر‌ے گا۔ بھرا جن‌یوک وانگوں اَسی مُنادی کر‌ن لئی دُعا چ یہوواہ کولوں دلیری تے سمجھداری منگ سکنے آں۔‏

14.‏ مشکلاں چوں لنگھ‌دے ویلے کیہڑی چیز ساڈی مدد کر سکدی اے؟ (‏زبور 37:‏3،‏ 5‏)‏

¹⁴ مشکلاں نُوں برداشت کرن لئی یہوواہ کولوں مدد منگو۔‏ ساڈے وچوں بوہت سارے کسے بیماری، شدید پریشانی، کسے عزیز دی موت، خاند‌ان دی کوئی مشکل، ظلم یاں کسے ہور مسئلے دا سامنا  کر رہے نیں۔ وباواں تے جنگاں دی وجہ توں ایہہ مشکلاں ہور وی ودھ سکدیاں نیں۔ جدوں اِنج ہوند‌ا اے تے دل کھول کے یہوواہ کولوں دُعا کر‌و۔ اوہنوں اپنی صورتحال بارے بالکل اُنج ای دَسو جیویں تُسی اپنے کسے قریبی دوست نُوں دَسدے او۔ تے ایس گل دا یقین رکھو کہ اوہ تواڈی مدد کر‌ن لئی سب کجھ کر‌ے گا۔‏‏—‏زبور 37:‏3،‏ 5 نُوں پڑھو۔‏

15.‏ مصیبتاں چ ثابت‌قدم رہن لئی دُعا ساڈی مدد کیویں کر سکدی اے؟ اِک مثال دَوو۔‏

¹⁵ جے اَسی دُعا کر‌ن چ لگے رہواں گے تے اَسی مصیبتاں چ ثابت‌قدم رہ سکاں گے۔ (‏رومیوں 12:‏12‏)‏ یہوواہ جاند‌ا اے کہ اوہدے بندے کیہہ کجھ سہہ رہے نیں تے اوہ اوہناں دی فریاد سُن‌دا اے۔ (‏زبور 145:‏18، 19‏)‏ 29 سال دی اِک پہل‌کار بھین نے وی ایس گل دا تجربہ کیتا اے۔ اوہدا ناں کر‌سٹی اے۔ بھین کر‌سٹی نُوں اچانک صحت دے مسئلے شروع ہو گئے تے ایہدی وجہ توں اوہ ڈپریشن چ چلی گئی۔ بعد چ اوہنوں پتہ چلیا کہ اوہدی امی نُوں اِک ایہو جہی بیماری اے جدی وجہ توں اوہ بس کجھ دِناں دی مہمان اے۔ بھین نے کہیا:‏”‏مَیں شدت نال یہوواہ کولوں دُعا کیتی کہ اوہ ہر روز مینوں ہمت دَوے۔ یہوواہ دے نیڑے رہن لئی مَیں باقاعدگی نال عبادتاں تے جانی ساں تے ذاتی مطالعیا کر‌نی ساں۔“‏ بھین نے ایہہ وی کہیا:‏ ”‏ایس مشکل دا سامنا کر‌ن چ دُعا نے میری بڑی مدد کیتی۔ مَیں جاننی ساں کہ یہوواہ ہمیشاں میرے نال اے تے ایس وجہ توں مینوں بڑی تسلی مِلدی سی۔ سچ اے کہ میری صحت دے مسئلے فوراً تے حل نئیں ہوئے پر یہوواہ نے میری دُعا دا جواب دین لئی مینوں ذہنی سکون دِتا۔“‏ سانوں ایہہ کدی نئیں بھلنا چاہی دا کہ یہوواہ اپنے بندیاں نُوں ازمیش ویلے بچاند‌ا اے۔—‏2-‏پطرس 2:‏9‏۔‏

16.‏ ازمیشاں دا مقابلہ کر‌ن لئی سانوں یہوواہ دی مدد دی ضرورت کیوں اے؟‏

¹⁶ ازمیشاں دا مقابلہ کرن لئی یہوواہ کولوں مدد منگو۔‏ عیب دار ہون دی وجہ توں سانوں ہر روز غلط کم کر‌ن دی ازمیش دا مقابلہ کر‌نا پیندا اے۔ شیطان پوری کوشش کر رہیا اے کہ اوہ ساڈے لئی ازمیشاں دا مقابلہ کر‌نا مشکل توں مشکل بنا دَوے۔ اوہ غلط تفریح دے ذریعے ساڈی سوچ نُوں خراب کر‌دا اے۔ ایہہ تفریح ساڈے ذہن نُوں گندے خیالاں نال بھر سکدی اے۔ ایہناں خیالاں دی وجہ توں اَسی یہوواہ دی نظر  چ ناپاک ہو سکنے آں تے کسے وڈے گُناہ چ وی پے سکنے آں۔—‏مرقس 7:‏21-‏23؛‏ یعقوب 1:‏14، 15‏۔‏

17.‏ جدوں اَسی کسے ازمیش توں بچن لئی دُعا کر‌نے آں تے ایہدے مطابق سانوں کیہہ کر‌نا چاہی دا اے؟ (‏تصویر نُوں وی ویکھو۔)‏

¹⁷ غلط کم کر‌ن دی ازمیش توں بچن لئی سانوں یہوواہ دی مدد دی لوڑ اے۔ ایس گل دا ذکر یسوع نے اوس دُعا چ وی کیتا جیہڑی اوہنے اپنے پیروکاراں نُوں سکھائی اے۔ اوہنے کہیا:‏ ”‏سانوں ازمیش چ کمزور نہ پین دے سگوں شیطان توں بچا۔“‏ (‏متی 6:‏13‏)‏ یہوواہ ساڈی مدد کر‌ن لئی تیار کھلوتا اے۔ پر ایہہ بوہت ضروری اے کہ اَسی اوہدے کولوں مدد منگئے۔ یہوواہ کولوں دُعا کر‌ن توں بعد سانوں اوس دُعا دے مطابق عمل وی کر‌نا چاہی دا اے۔ اِنج کر‌ن لئی اَسی پوری کوشش کر سکنے آں کہ اَسی ایہو جہیاں غلط گلاں نُوں نہ تے پڑھئے تے نہ ای سنئے جیہڑیاں شیطان دی دُنیا چ بوہت عام نیں۔ (‏زبور 97:‏10‏)‏ اَسی بائبل پڑھن تے ایہدے تے سوچ وچار کر‌ن نال اپنے ذہن نُوں چنگیاں گلاں نال بھر سکنے آں۔ نالے جدوں اَسی عبادتاں تے جانے آں تے مُنادی کر‌نے آں تے ساڈی سوچ غلط گلاں توں محفوظ رہندی اے۔ یہوواہ نے وعدہ کیتا اے کہ اوہ سانوں کدی وی کسے ایہو جہی ازمیش چ نئیں پین دَوے گا جیہڑی ساڈی برداشت توں باہر ہووے۔—‏1-‏کُرنتھیوں 10:‏12، 13‏۔‏

18.‏ دُعا دے حوالے نال سانوں ساریاں نُوں کیہہ کر‌ن دی لوڑ اے؟‏

¹⁸ ایس آخری زمانے چ یہوواہ دا وفادار رہن لئی سانوں پہلے توں وی زیادہ دُعا کر‌ن دی لوڑ اے۔ ہر روز یہوواہ کولوں دُعا کر‌ن لئی وقت کڈھو۔ اوہ چاہندا اے کہ اَسی اپنے دل دا حال اوہدے سامنے کھول دَئیے۔ (‏زبور 62:‏8‏)‏ یہوواہ دی وڈیائی کر‌و تے جو کجھ اوہ تواڈے لئی کر‌دا اے، اوہدے لئی اوہدا شکریہ کر‌و۔ اوہدے کولوں مدد منگو تاکہ تُسی دلیری نال مُنادی کر سکو۔ مشکلاں توں نبڑن تے ازمیشاں توں بچن لئی اوہدے کولوں مدد دی اِلتجا کر‌و۔ کسے وی چیز یاں بندے دی وجہ توں دُعا کر‌نا نہ چھڈو۔ ہُن سوال ایہہ پیدا ہوند‌ا اے کہ یہوواہ ساڈیاں دُعاواں دا جواب کیویں دیندا اے؟ ایہدا جواب سانوں اگلے مضمون چ ملے گا۔‏