1.‏ ساڈے وچوں زیادہ‌تر نُوں کیہڑی مشکل دا سامنا ہویا اے؟‏

 کیہہ تواڈے نال کدی اِنج ہویا اے کہ تُسی یہوواہ دے نیڑے جان لئی کوئی منصوبہ بنایا ہوئے پر ایہہ تواڈے کولوں پورا نہ ہو رہیا ہوئے؟‏ b جے ایہہ گل اے تے تُسی کلّے نئیں او۔ ساڈے وچوں زیادہ‌تر نال اِنج ای ہویا اے۔ مثال لئی، بھرا فلپ نے سوچیا سی کہ اوہ باقاعدگی نال دُعا کر‌ے گا تے اپنیاں دُعاواں نُوں ہور بہتر بنائے گا۔ پر اوہنوں دُعا کر‌ن لئی وقت کڈھنا مشکل لگ رہیا سی۔ بھین ایریکا نے منصوبہ بنایا سی کہ اوہ مُنادی دے اجلاس تے وقت تے پونچے گی۔ پر اوہ تقریباً ہر اجلاس چ ای دیر نال پونچ‌دی سی۔ بھرا ٹوماش نے کئی وار پوری بائبل ختم کر‌ن دی کوشش کیتی۔ اوہ کہندا اے:‏ ”‏مینوں بائبل پڑھن چ مزہ نئیں آند‌ا سی۔ مَیں تِن واری پوری بائبل نُوں پڑھن دی کوشش کیتی پر ہر واری مَیں صرف احبار دی کتاب تک ای پڑھ سکیا۔“‏

2.‏ جے اَسی اپنے کسے منصوبے نُوں حالے تک پورا نئیں کر سکے تے سانوں مایوس کیوں نئیں ہونا چاہی دا؟‏

² جے تُسی حالے تک اپنے کسے منصوبے نُوں پورا نئیں کر سکے تے مایوس نہ ہوو۔ کسے چھوٹے جہے منصوبے نُوں وی پورا کر‌ن چ وقت لگدا اے تے محنت کر‌نی پیندی اے۔ جے حالے وی تواڈے اند‌ر اپنے منصوبے نُوں پورا کر‌ن دی خواہش ہے وے تے ایہدا مطلب اے کہ تُسی یہوواہ نال اپنی دوستی دی قدر کر‌دے او تے اوہدے لئی ودھیا توں ودھیا کر‌نا چاہندے او۔ یہوواہ تواڈیاں کوششاں توں خوش ہوند‌ا اے۔ اوہ تواڈے کولوں اپنی طاقت توں زیادہ کر‌ن دی توقع نئیں کر‌دا۔ (‏زبور 103:‏14؛‏ میکاہ 6:‏8‏)‏ ایس لئی اوہ منصوبے بناؤ جنہاں نُوں تُسی پورا وی کر سکو۔ تُسی اپنے منصوبے کیویں پورےکر سکدے او؟ آؤ ایس بارے کجھ مشوریاں تے غور کر‌نے آں۔‏

3.‏ کسے منصوبے نُوں پورا کر‌ن لئی ایہہ کیوں ضروری اے کہ ساڈے اند‌ر اوہنوں پورا کر‌ن دی خواہش ہووے؟‏

³ ایہہ بوہت ضروری اے کہ تواڈے دل چ اپنے منصوبے نُوں پورا کر‌ن دی خواہش ہووے۔ جیہڑا بندہ اپنے منصوبے نُوں پورا کر‌نا چاہندا اے اوہ اِنج کر‌ن دی کوشش وی کر‌دا اے۔ ایہہ خواہش اوس ہوا وانگوں اے جیہڑی اِک کشتی نُوں دھرو کے اوہدی منزل وَل لے جاند‌ی اے۔ جے ہوا چلدی رہوے گی تے کشتی چلان والا اپنی منزل تک پونچ جائے گا۔ جے ہوا تیز ہوئے گی تے اوہ ہور چھیتی پونچ جائے گا۔ ایسے طرحاں منصوبے نُوں پورا کر‌ن دی خواہش جِنّی زیادہ ہوئے گی ایہہ اونی چھیتی پورا ہوئے گا۔ ایل سلواڈور چ رہن والا بھرا ڈیوڈ کہندا اے:‏ ”‏جدوں تواڈے دل چ اپنے منصوبے نُوں پورا کر‌ن دی خواہش ہوند‌ی اے تے تُسی ایہنوں پورا کر‌ن دی زیادہ کوشش کر‌دے او۔ نالے تواڈی پوری کوشش ہوند‌ی اے کہ کوئی وی چیز ایہدی راہ چ رکاوٹ نہ بنے۔“‏ تے فیر تُسی کیہہ کر سکدے او تاکہ تواڈے دل چ وی ایہہ خواہش ودھے؟‏

4.‏ اَسی کیہڑی چیز لئی دُعا کر سکنے آں؟ (‏فِلپّیوں 2:‏13‏)‏ (‏تصویر نُوں وی ویکھو۔)‏

⁴ منصوبے نُوں پورا کرن دی خواہش لئی دُعا کرو۔‏ یہوواہ اپنی پاک روح دے ذریعے تواڈے دل چ اپنے منصوبے نُوں پورا کر‌ن دی خواہش پیدا کر سکدا اے۔ ‏(‏فِلپّیوں 2:‏13 نُوں پڑھو۔)‏ ایہہ چنگی گل اے کہ کدی کدار اَسی کوئی منصوبہ ایس لئی بنانے آں کیونکہ اَسی جاننے آں کہ سانوں اِنج کر‌نا چاہی دا اے۔ پر شاید ساڈے دل چ اوہنوں پورا کر‌ن دی خواہش نہ ہوئے۔ یوگنڈا چ رہن والی اِک بھین نورینا دے نال وی اِنج ای ہویا۔ اوہنے منصوبہ بنایا سی کہ اوہ کسے نُوں بائبل کورس کر‌ائے گی۔ پر اوہدے اند‌ر ایہنوں پورا کر‌ن دی اینی زیادہ خواہش نئیں سی کیونکہ اوہنوں لگدا سی کہ اوہ دُوجیاں نُوں چنگی طرحاں نئیں سکھا سکدی۔ پر اوہ اپنے منصوبے نُوں کیویں پورا کر سکی؟ اوہ کہندی‌اے:‏ ”‏مَیں ہر روز یہوواہ کولوں دُعا کر‌ن لگ پئی کہ اوہ میرے اند‌ر بائبل کورس کر‌ان دی خواہش نُوں ودھائے۔ نالے مَیں اپنی تلیم دین دِیاں مہارتاں چ وی بہتری لیان دی کوشش کیتی۔کجھ مہینیاں بعد مینوں محسوس ہویا کہ میرے اند‌ر بائبل کورس کر‌ان دی خواہش ودھ گئی اے۔ اوسے سال مَیں دو لوکاں نُوں بائبل کورس کر‌انا شروع کر دِتا۔“‏

5.‏ کیہڑی چیز تے سوچ وچار کر‌ن نال ساڈے دل چ اپنے منصوبے نُوں پورا کر‌ن دی خواہش ودھے گی؟‏

⁵ یہوواہ نے تواڈے لئی جو کجھ کیتا اے،‏ اوہدے تے سوچ وچار کرو۔‏ (‏زبور143:‏5)‏ پولُس ایس گل تے سوچ وچار کر‌دا سی کہ یہوواہ نے اوہدے تے کِنّاں رحم کیتا اے۔ ایس وجہ توں اوہدے دل چ ایہہ خواہش پیدا ہوئی کہ اوہ ہور زیادہ محنت نال یہوواہ دی خدمت کر‌ے۔ (‏1-‏کُرنتھیوں 15:‏9، 10؛‏ 1-‏تیمُتھیُس 1:‏12-‏14‏)‏ ایسے طرحاں جِنّاں زیادہ تُسی ایس گل تے سوچ وچار کر‌و گے کہ یہوواہ نے تواڈے لئی کیہہ کجھ کیتا اے، اونی زیادہ تواڈے دل چ اپنے منصوبے نُوں پورا کر‌ن دی خواہش ودھے گی۔ (‏زبور 116:‏12‏)‏ ذرا غور کر‌و کہ ہنڈوراس چ رہن والی اِک بھین پہل‌کار بنن دے اپنے منصوبے نُوں کیویں پورا کر سکی۔ اوہ کہندی اے:‏ ”‏مَیں ایس گل بارے سوچیا کہ یہوواہ مینوں کِنّاں پیار کر‌دا اے۔ اوہنے مینوں اپنے لوکاں چ شامل کیتا اے۔اوہ میرا خیال رکھدا اے تے میری حفاظت کر‌دا اے۔ ایہناں گلاں تے سوچ وچار کر‌ن نال میرے دل چ یہوواہ لئی محبت تے اپنے منصوبے نُوں پورا کر‌ن دی خواہش ودھ گئی۔“‏

6.‏ ہور کیہڑی چیز ساڈی ایس خواہش نُوں ودھائے گی کہ اَسی اپنے منصوبیاں نُوں پورا کر‌یئے؟‏

 ⁶ اپنے منصوبے نُوں پورا کرن دے فائدیاں تے غور کرو۔‏ بھین ایریکا جدا پہلے وی ذکر ہویا اے، اوہدی کیہڑی چیز نے مدد کیتی تاکہ اوہ مُنادی دے اجلاس چ وقت تے پونچ سکے۔اوہ کہندی اے:‏ ”‏مَیں سمجھ گئی کہ جے مَیں مُنادی دے اجلاس چ چھیتی پونچاں گی تے مَیں بھین بھراواں نُوں مل سکاں گی تے اوہناں نال کجھ وقت گزار سکاں گی۔ نالے مینوں ایہدے چ چنگے مشورے وی مِلن گے جنہاں نال مَیں ہور چنگی طرحاں مُنادی کر سکاں گی تے مینوں مزہ وی آئے گا۔“‏ بھین ایریکا نے اپنے منصوبے نُوں پورا کر‌ن دے فائدیاں تے غور کیتا تے ایس لئی اوہ ایہنوں پورا وی کر سکی۔ توانوں اپنے منصوبے نُوں پورا کر‌ن نال کیہڑے فائدے ہون گے؟ جے تُسی ہر روز بائبل پڑھن یاں اپنیاں دُعاواں نُوں بہتر بنان دا منصوبہ بنایا اے تے غور کر‌و کہ اِنج کر‌ن نال یہوواہ نال تواڈی دوستی کِنّی مضبوط ہو جائے گی۔ (‏زبور 145:‏18، 19‏)‏ جے تُسی کسے خوبی نُوں نکھارن بارے سوچیا اے تے غور کر‌و کہ ایہدی وجہ توں دُوجیاں نال تواڈے تعلقات کِنّے چنگے ہو جان گے۔ (‏کُلسّیوں 3:‏14‏)‏ کیوں نہ اِک لسٹ بناؤ تے اوہدے تے لکھو کہ تُسی اپنے منصوبے نُوں کیوں پورا کر‌نا چاہندے او۔ باقاعدگی نال ایس لسٹ نُوں ویکھو۔ بھرا ٹوماش جدا پہلے وی ذکر ہویا اے، کہندا اے:‏ ”‏اپنے منصوبے نُوں پورا کر‌ن دِیاں جِنّیاں زیادہ وجہ ہوند‌یاں نیں، مَیں اوہنوں پورا کر‌ن لئی اونی زیادہ محنت کر‌نا واں۔“‏

7.‏ کیہڑی چیز نے بھرا جولیو تے اوہدی بیوی دی مدد کیتی تاکہ اوہ اپنے منصوبے نُوں پورا کر سکن؟‏

⁷ ایہو جہے لوکاں نال وقت گزارو جیہڑے توانوں اپنے منصوبے نُوں پورا کرن دی ہلاشیری دین۔‏ (‏امثال 13:‏20‏)‏ ذرا غور کر‌و کہ کیہڑی چیز نے بھرا جولیو تے اوہدی بیوی دی مدد کیتی تاکہ اوہ ہور ودھ چڑھ کے مُنادی کر‌ن دے اپنے منصوبے نُوں پورا کر سکن۔بھرا کہندا اے:‏ ”‏اَسی ایہو جہے دوست بنائے جنہاں نال اَسی اپنے منصوبیاں بارے گل کر سکنے ساں تے اوہ ساڈا حوصلہ ودھاند‌ے سن۔ اوہناں وچوں زیادہ‌تر پہلے ای اِنج دے منصوبیاں نُوں پورا کر چُکے سن۔ ایس لئی اوہ سانوں چنگے مشورے دے سکدے سن۔ اوہ ساڈے کولوں ایہہ وی پچھدے سن کہ ساڈا اپنے منصوبے نُوں پورا کر‌ن دا کم کیسا چل رہیا اے۔ اوہ لوڑ پین تے ساڈا حوصلہ وی ودھاند‌ے سن۔“‏

8.‏ جے اَسی صرف اوہدوں اپنے منصوبے نُوں پورا کر‌ن دی کوشش کر‌اں گے جدوں ساڈے اند‌ر ایہنوں پورا کر‌ن دی خواہش ہوئے گی تے کیہہ ہوسکدا اے؟ (‏تصویر نُوں وی ویکھو۔)‏

⁸ سچ اے کہ کجھ دن ایہو جہے ہوند‌ے نیں جدوں ساڈے اند‌ر اپنے منصوبے نُوں پورا کر‌ن دی زیادہ خواہش نئیں ہوند‌ی۔ پر کیہہ ایہدا ایہہ مطلب اے کہ اَسی ایہنوں پورا کر‌ن دی کوشش نئیں کر سکدے؟ ایہہ گل نئیں اے۔ ذرا ایس مثال تے غور کر‌و۔ ہوا دے چلن دی وجہ توں کشتی اپنی منزل تے پونچ سکدی اے۔ پر ضروری نئیں کہ ہر روز ہوا اِکو جہی ہوئے۔ کجھ دن تے ہوا بالکل وی نئیں چل رہی ہوند‌ی۔ پر کیہہ ایہدا ایہہ مطلب اے کہ کشتی چلان والا اپنی منزل وَل نئیں ودھ سکدا؟ نئیں، ایہہ ضروری نئیں اے۔ کجھ کشتیاں ایہو جہیاں ہوند‌یاں نیں جیہڑیاں موٹر نال چلدیاں نیں تے کجھ چپّو نال۔ کشتی چلان والا ایہناں چیزاں نُوں استمال کر کے اپنی منزل تے پونچ سکدا اے۔ اپنے منصوبے نُوں پورا کر‌ن دی خواہش وی ہوا وانگوں اے۔ ضروری نئیں کہ ایہہ ہر دن اِکو جہی ہوئے۔ کجھ دن ساڈے اند‌ر اپنے منصوبے نُوں پورا کر‌ن دی زیادہ خواہش ہوند‌ی اے تے کسے  دن بالکل وی نئیں ہوند‌ی۔ایس لئی جے اَسی صرف اوس دن اپنے منصوبے نُوں پورا کر‌ن دی کوشش کر‌نے آں جدوں ساڈے اند‌ر اِنج کر‌ن دی خواہش ہوند‌ی اے تے شاید اَسی اپنے منصوبے نُوں کدی وی پورا نئیں کر سکاں گے۔ جیویں ہوا ہوئے یاں نہ ہوئے کشتی چلان والا اپنی منزل وَل ودھدا رہندا اے اونویں ای ساڈے اند‌ر خواہش ہوئے یاں نہ ہوئے، اَسی اپنے منصوبے نُوں پورا کر‌ن لئی کوشش کر سکنے آں۔ سچ اے کہ اِنج کر‌نا آسان نئیں اے پر ایہدے بڑے چنگے نتیجے نکلدے نیں۔ پر اَسی اِنج کیویں کر سکنے آں؟ ایس بارے گل کر‌ن توں پہلاں آؤ اِک سوال تے غور کر‌نے آں۔‏

9.‏ جدوں ساڈے اند‌ر اپنے منصوبے نُوں پورا کر‌ن دی خواہش نئیں ہوند‌ی تے کیہہ سانوں ایہنوں پورا کر‌ن دی کوشش کر‌نی چاہی دی اے؟ وضاحت کر‌و۔‏

⁹ یہوواہ چاہندا اے کہ اَسی خوشی تے پورے دل نال اوہدی خدمت کر‌یئے۔ (‏زبور 100:‏2؛‏ 2-‏کُرنتھیوں 9:‏7‏)‏ پر جدوں ساڈے اند‌ر اپنے منصوبے نُوں پورا کر‌ن دی خواہش نئیں ہوند‌ی تے کیہہ سانوں ایہنوں پورا کر‌ن دی کوشش کر‌نی چاہی دی اے؟ ذرا ایس بارے پولُس رسول دی مثال تے غور کر‌و۔ اوہنے کہیا:‏ مَیں اپنے جسم نُوں مار کٹ کے اپنا غلام بنانا واں۔ (‏1-‏کُرنتھیوں 9:‏25-‏27‏)‏ پولُس اوس ویلے وی صحی کم کر‌ن دی پوری کوشش کر‌دا سی جدوں اوہدے اند‌ر ایہنوں کر‌ن دی خواہش نئیں ہوند‌ی سی۔ پر کیہہ یہوواہ اوہدے کماں توں خوش ہویا؟ جی بالکل!‏ تے یہوواہ نے اوہنوں ایہدے لئی بوہت ساریاں برکتاں وی دِتیاں۔—‏2-‏تیمُتھیُس 4:‏7، 8‏۔‏

10.‏ جدوں اَسی خواہش نہ ہون دے باوجود وی اپنے منصوبے نُوں پورا کر‌ن دی کوشش کر‌نے آں تے ایہدے کیہڑے فائدے ہوند‌ے نیں؟‏

¹⁰ یہوواہ ایہہ ویکھ کے بوہت خوش ہوند‌ا اے کہ اَسی خواہش نہ ہون دے باوجود وی اپنے منصوبے نُوں پورا کر‌ن دی کوشش کر رہے آں۔ اوہ ایس لئی خوش ہوند‌ا اے کیونکہ اوہ جان‌دا اے کہ بھانویں سانوں ایہہ کم کر‌نا چنگا نئیں لگدا پر فیر وی اَسی ایہنوں ایس لئی کر رہے آں کیونکہ اَسی اوہنوں پیار کر‌نے آں۔ جیویں یہوواہ نے پولُس نُوں برکتاں دِتیاں اوہ سانوں وی دوے گا۔ (‏زبور 126:‏5‏)‏ جدوں اَسی ایہہ ویکھاں گے کہ اوہ سانوں برکتاں دے رہیا اے تے ہو سکدا اے کہ ساڈے اند‌ر اپنے منصوبے نُوں پورا کر‌ن دی خواہش وی پیدا ہو جائے۔ پولینڈ چ رہن والی بھین لوسائنا کہندی اے:‏ ”‏کدی کدار میرا مُنادی تے جان نُوں دل نئیں کر‌دا،خاص طور تے اوہدوں جدوں مَیں بوہت تھکی ہنی آں۔ پر مُنادی تے جان توں بعد مینوں جیہڑی خوشی محسوس ہوند‌ی اے، اوہ میرے لئی اِک برکت اے۔“‏ آؤ ویکھئے کہ اَسی اوس ویلے کیہہ کر سکنے آں جدوں ساڈے اند‌ر اپنے کسے منصوبے نُوں پورا کر‌ن دی خواہش نئیں ہوند‌ی۔‏

11.‏ یہوواہ اپنی پاک روح دے ذریعے ساڈی کیہہ کر‌ن چ مدد کر سکدا اے؟‏

¹¹ دُعا چ یہوواہ کولوں پاک روح منگو۔‏ یہوواہ پاک روح دا پھل پیدا کر‌ن چ ساڈی مدد کر‌دا اے۔ ایس پھل چ شامل خوبیاں بھیڑے کماں توں باز رہن تے چنگے کماں نُوں کر‌ن چ ساڈی مدد کر‌دیاں نیں۔ ایہہ خوبیاں سانوں اوہدوں وی چنگے کم کر‌ن دے قابل بناند‌یاں نیں جدوں اوہ کم بڑا مشکل ہوند‌ا اے یاں اوہنوں کر‌ن دا ساڈا دل نئیں کر رہیا ہوند‌ا۔ ایس لئی ایہہ بوہت ضروری اے کہ اَسی یہوواہ کولوں دُعا چ پاک روح منگئے۔ (‏لُوقا 11:‏13؛‏ گلتیوں 5:‏22، 23‏)‏ بھرا ڈیوڈ جدا پہلے وی ذکر ہویا اے، اوہ باقاعدگی نال ذاتی مطالعیا کر‌نا چاہندا سی۔ اوہنے دَسیا کہ جدوں اوہنے دُعا چ یہوواہ کولوں پاک روح منگی تے اوہنوں کِنّاں فائدہ ہویا۔ اوہ کہندا اے:‏ ”‏مَیں یہوواہ کولوں دُعا کر‌نا ساں کہ اوہ میری مدد کر‌ے کہ مَیں کسے وی طرحاں اپنے منصوبے نُوں پورا کر سکاں۔ اوہدی مدد نال مَیں ذاتی مطالعے دا اِک چنگا شیڈول بنا سکیا تے فیر ایہدے مطابق کم وی کر سکیا۔“‏

12.‏ واعظ 11:‏4 چ لکھی گل اپنے منصوبے نُوں پورا کر‌ن چ ساڈی مدد کیویں کر سکدی اے؟‏

¹² صحی وقت تے حالات دا اِنتظار نہ کرو۔‏ ایس دُنیا چ حالات کدی وی ساڈی مرضی مطابق نئیں ہون گے۔ ایس لئی جے اَسی صحی وقت دا اِنتظار کر‌دے رہواں گے تے شاید اَسی اپنے منصوبے نُوں کدی وی پورا نئیں کر سکاں گے۔ ‏(‏واعظ 11:‏4 نُوں پڑھو۔)‏ بھرا ڈینئل نے کہیا:‏ ”‏حالات تے کدی وی صحی نئیں ہوند‌ے۔ ایس لئی بہتر اے کہ اَسی صحی وقت تے حالات دا اِنتظار کیتے بغیر اپنا کم شروع کر دَئیے۔“‏ بھرا پال جیہڑا یوگنڈا چ رہندا اے، اوہنے دَسیا کہ سانوں اپنے کسے منصوبے نُوں پورا کر‌ن چ ڈھل مٹھ کیوں نئیں کر‌نی چاہی دی۔ اوہ کہندا اے:‏”‏جدوں اَسی مشکل حالات دے باوجود وی اپنے منصوبے تے عمل کر‌نا شروع کر دینے آں تے یہوواہ سانوں برکت دیندا اے۔“‏—‏ملاکی 3:‏10‏۔‏

13.‏ شروع شروع چ چھوٹے منصوبے بنان دے کیہڑے فائدے ہوند‌ے نیں؟‏

 ¹³ شروع چ چھوٹے منصوبے بناؤ۔‏ کدی کدار شاید ساڈا اپنے منصوبے نُوں پورا کر‌ن نُوں دل ایس لئی نئیں کر‌دا کیونکہ سانوں لگدا اے کہ اَسی ایہنوں پورا نئیں کر سکاں گے۔ جے توانوں وی اِنج ای لگدا اے تے کیہہ تُسی شروع چ چھوٹے چھوٹے منصوبے بنا سکدے او؟ مثال لئی، جے تُسی اپنے اند‌ر کسے خوبی نُوں پیدا کر‌ن دا منصوبہ بنایا اے تے شروع چ اوس خوبی نُوں چھوٹے کماں چ ظاہر کر‌ن دی کوشش کر‌و۔ جے تُسی پوری بائبل پڑھن دا منصوبہ بنایا اے تے شروع شروع چ تھوڑی دیر لئی بائبل پڑھو تے فیر آہستہ آہستہ ایس ٹائم نُوں ودھاند‌ے جاؤ۔ بھرا ٹوماش جدا مضمون دے شروع چ ذکر ہویا سی، اوہنوں پورے سال چ بائبل ختم کر‌نا مشکل لگ رہیا سی۔ اوہ کہندا اے:‏ ”‏مَیں سمجھ گیا کہ مَیں اپنے لئی بوہت وڈا منصوبہ بنا لیا اے۔ ایس لئی مَیں فیصلہ کیتا کہ مَیں فیر توں کوشش کر‌اں گا۔ پر ایس واری مَیں اِک باب دِیاں کجھ ایتاں پڑھاں گا تے ایہناں تے سوچ وچار کر‌اں گا۔ ایس طرحاں مینوں بائبل پڑھن چ مزہ آن لگ پیا۔“‏ جیویں جیویں بھرا ٹوماش نُوں بائبل پڑھن چ مزہ آن لگ پیا، اوہ زیادہ دیر لئی بائبل پڑھن لگ پیا۔ اخیر اوہنے پوری بائبل ختم کر ای لئی۔‏

14.‏ کیہڑیاں گلاں دی وجہ توں ساڈے لئی اپنے منصوبے نُوں پورا کر‌نا مشکل ہو سکدا اے؟‏

¹⁴ ہو سکدا اے کہ ساڈے دل چ اپنے منصوبے نُوں پورا کر‌ن دی بڑی خواہش ہوئے تے اَسی ایہدے لئی محنت وی کر‌یئے۔ پر فیر وی شاید اَسی ایہنوں پورا نہ کر سکئے۔ مثال لئی،ہو سکدا اے کہ کسے حادثے یاں اچانک کسے کم دی وجہ توں ساڈے کول اپنے منصوبے نُوں پورا کر‌ن لئی وقت ای نہ بچے۔ (‏واعظ 9:‏11‏)‏ ایہہ وی ہوسکدا اے کہ کسے مشکل دی وجہ توں اَسی مایوس ہو جائیے تے ہمت ہار جائیے۔ (‏امثال 24:‏10‏)‏ عیب‌دار ہون دی وجہ توں شاید اَسی ایہو جہیاں غلطیاں کر‌یئے جنہاں دی وجہ توں سانوں اپنے منصوبے نُوں پورا کر‌نا مشکل لگے۔ (‏رومیوں 7:‏23‏)‏ یاں شاید اَسی بوہت تھکاوٹ محسوس کر‌یئے۔ (‏متی 26:‏43‏)‏ کیہڑی چیز ساڈی مدد کر سکدی اے تاکہ اَسی ہمت نہ ہار ئیے؟‏

15.‏ جے کسے وجہ توں اَسی اپنے منصوبے نُوں پورا نئیں کر پاند‌ے تے سانوں ہمت کیوں نئیں ہارنی چاہی دی؟ وضاحت کر‌و۔ (‏زبور 145:‏14‏)‏

¹⁵ منصوبہ پورا نہ ہون دی وجہ توں ایہہ نہ سوچو کہ تُسی  ناکام ہو گئے او۔‏ بائبل چ لکھیا اے کہ سانوں وار وار مشکلاں دا سامنا کر‌نا پے سکدا اے پر یہوواہ دی مدد نال اَسی فیر توں کھلو سکنے آں۔ ‏(‏زبور 145:‏14 نُوں پڑھو۔)‏ بھرا فلپ جدا پہلے وی ذکر ہویا اے، کہندا اے:‏”‏مَیں ایہہ نئیں سوچدا کہ مَیں اپنے منصوبے نُوں پورا کر‌ن چ کِنّی وار ناکام ہویا واں سگوں مَیں ایس گل تے دھیان دینا واں کہ مَیں ایہنوں پورا کر‌ن لئی کِنّی وار کوشش کیتی اے۔“‏ بھرا ڈیوڈ جدا پہلے وی ذکر ہویا اے،کہندا اے:‏”‏مَیں اپنی مشکلاں نُوں رکاوٹ نئیں سگوں یہوواہ لئی اپنی محبت نُوں ثابت کر‌ن دا اِک موقع سمجھنا واں۔“‏ جدوں اَسی مشکلاں دے باوجود وی اپنے منصوبے نُوں پورا کر‌ن دی کوشش کر‌دے رہنے آں تے اَسی ایہہ ثابت کر‌نے آں کہ اَسی یہوواہ نُوں خوش کر‌نا چاہنے آں۔ یہوواہ وی ایہہ ویکھ کے بڑا خوش ہوند‌ا اے کہ اَسی اپنے منصوبے نُوں پورا کر‌ن چ ہمت نئیں ہار رہے۔‏

16.‏ جے کسے وجہ توں اَسی اپنے منصوبے نُوں پورا نئیں کر پاند‌ے تے ایہدے توں کیہہ پتہ چلدا اے؟‏

¹⁶ اوس گل توں سکھو جدی وجہ توں تُسی اپنے منصوبے نُوں پورا نئیں کر سکے۔‏ سوچو کہ کیہڑی وجہ توں تُسی اپنے منصوبے نُوں پورا نئیں کر پا رہے۔ نالے اپنے آپ کولوں پچھو:‏ ”‏مَیں کیہہ کر سکنا واں تاکہ دوبارہ اِنج نہ ہووے؟“‏ (‏امثال 27:‏12‏)‏ کدی کدار سانوں اپنے منصوبے نُوں پورا کر‌نا ایس لئی مشکل لگ سکدا اے کیونکہ اَسی اپنی طاقت توں زیادہ کر‌ن دی کوشش کر رہے ہنے آں۔ جے تواڈے نال وی اِنج ای اے تے اپنے منصوبے تے فیر توں غور کر‌و۔ نالے ویکھو کہ کیہہ ایہنوں پورا کر‌نا تواڈے وَ س چ ہے وے۔‏ c جے تُسی کسے ایہو جہے منصوبے نُوں پورا نئیں کر سکے جنہوں پورا کر‌نا تواڈے وَس چ ای نئیں سی تے یہوواہ ایہہ نئیں سوچے گا کہ تُسی ناکام ہو گئے او۔—‏2-‏کُرنتھیوں 8:‏12‏۔‏

17.‏ اَسی ہُن تک جیہڑے منصوبے پورے کر چُکے آں سانوں اوہناں نُوں کیوں یاد رکھنا چاہی دا اے؟‏

¹⁷ تُسی ہُن تک جو کجھ کر چُکے او اوہنوں یاد رکھو۔‏ بائبل چ دَسیا گیا اے:‏ خدا بےاِنصاف نئیں اے۔ اوہ تواڈی محنت نُوں نئیں بُھلے گا۔ (‏عبرانیوں 6:‏10‏)‏ ایس لئی توانوں وی اپنی محنت نُوں نئیں بھلنا چاہی دا۔ تُسی ہُن تک جیہڑے منصوبے پورے کر چُکے او اوہناں بارے سوچو، بھانویں اوہ یہوواہ نال اپنی دوستی نُوں مضبوط کر‌نا ہووے، دُوجیاں نال اوہدے بارے گل کر‌نا ہووے یاں بپتسمہ لینا ہووے۔ جیویں تُسی ماضی چ اپنے کسے منصوبے نُوں پورا کر‌ن دے قابل ہوئے سو، اونویں ای تُسی ہُن وی اپنے منصوبیاں نُوں پورا کر سکدے او۔—‏فِلپّیوں 3:‏16‏۔‏

18.‏ اپنے منصوبے نُوں پورا کر‌ن دے سفر چ سانوں کیہہ کر‌نا چاہی دا اے؟ (‏تصویر نُوں وی ویکھو۔)‏

¹⁸ جیویں کشتی چلان والا خوشی خوشی اپنی منزل تے پونچ جاند‌ا اے، تُسی وی یہوواہ دی مدد نال اپنے منصوبے نُوں پورا کر سکدے او۔ پر یاد رکھو کہ بوہت سارے کشتی چلان والے اپنے سفر دا پورا مزہ وی لیندے نیں۔ (‏2-‏کُرنتھیوں 4:‏7‏)‏ ایسے طرحاں تُسی وی اپنی کامیابی دے سفر دا مزہ لوَو۔ اِنج کر‌ن لئی غور کر‌و کہ اپنے منصوبے نُوں پورا کر‌ن چ یہوواہ تواڈی مدد کیویں کر رہیا اے۔ جے تُسی ہمت نئیں ہارو گے تے یہوواہ توانوں بوہت ساریاں برکتاں دَوے گا۔—‏گلتیوں 6:‏9‏۔‏