مطالعے دا مضمون نمبر 23
یاہ دا شعلہ بال کے رکھو
پیار دے شعلے اَگ دے شعلے نیں، ہاں یاہ دے شعلے نیں۔—غزلُالغزلات 8:6۔
گیت نمبر 131: جو رب نے جوڑیا اے
مضمون تے اِک نظر a
1. بائبل چ سچی محبت بارے کیہہ دَسیا گیا اے؟
پیار دے شعلے اَگ دے شعلے نیں، ہاں یاہ دے شعلے نیں۔ سیلاب عشق نُوں نئیں بجھا سکدے، نہ ای ندیاں ایہنوں روڑھ کے لے جا سکدیاں نیں۔ b (غزلُالغزلات 8:6، 7) سچی محبت نُوں کِنّے سوہنے لفظاں چ بیان کیتا گیا اے۔ ایہناں لفظاں توں میاں بیوی ایس گل دا یقین رکھ سکدے نیں کہ اوہناں وچ سچی محبت قائم رہ سکدی اے۔
2. میاں بیوی نُوں کیہہ کرنا چاہی دا اے تاکہ اِک دُوجے لئی اوہناں دی محبت ٹھنڈی نہ پووے؟
2 جے میاں بیوی چاہندے نیں کہ اوہناں چ زندگی بھر محبت رہوے تے ایہدے لئی اوہناں نُوں سخت کوشش کرنی پئے گی۔ ایس بارے ذرا اِک مثال تے غور کرو۔ اَگ اوہدوں تک بلدی رہندی اے جدوں تک کوئی ایہدے چ لکڑاں پاندا رہندا اے۔ پر جے اِنج نئیں ہوندا تے اَگ بجھ جاندی اے۔ ایسے طرحاں میاں بیوی وچ وی محبت اوہدوں ای قائم رہوے گی جدوں اوہ اپنے رشتے نُوں مضبوط کردے رہن گے۔ کدی کدار شاید میاں بیوی نُوں محسوس ہوسکدا اے کہ اوہناں دی محبت ٹھنڈی پے رہی اے، خاص کر اوہدوں جدوں اوہناں نُوں پیسیاں دی تنگی، صحت دے مسئلے یاں بچیاں دی پرورش دی وجہ توں مشکلاں دا سامنا کرنا پیندا اے۔ جے تُسی شادیشُدہ او تے تُسی اپنی زندگی چ یاہ دا شعلہ کیویں بال کے رکھ سکدے او؟ ایس مضمون چ تِن ایہو جہے طریقیاں تے گل کیتی جائے گی جنہاں دی مدد نال تُسی اپنے جیون ساتھی نال اپنے رشتے نُوں مضبوط کر سکدے او تے اِک خوشگوار زندگی گزار سکدے او۔ c
یہوواہ نال اپنی دوستی نُوں مضبوط کردے رہوو
3. یہوواہ نال مضبوط دوستی دی وجہ توں میاں بیوی دی اِک دُوجے لئی محبت کیویں قائم رہندی اے؟ (واعظ 4:12) (تصویر نُوں وی ویکھو۔)
3 یاہ دا شعلہ بال کے رکھن لئی میاں بیوی نُوں یہوواہ نال اپنی دوستی مضبوط کرنی چاہی دی اے۔ اِنج کرن نال اوہناں دا اِک دُوجے نال رشتہ کیویں مضبوط ہوئے گا؟ جدوں میاں بیوی یہوواہ نال اپنی دوستی دی قدر کرن گے تے اوہ اوہدیاں ہدیتاں تے عمل کرن گے۔ اِنج کرن نال اوہ ایہو جہیاں مشکلاں توں بچ جان گے یاں اوہناں تے قابو پا لین گے جنہاں دی وجہ توں اِک دُوجے لئی اوہناں دی محبت ٹھنڈی پے سکدی اے۔ (واعظ 4:12 نُوں پڑھو۔) جیہڑے لوکاں دی یہوواہ نال مضبوط دوستی ہوندی اے، اوہ اوہدی مثال تے عمل کرن دی پوری کوشش کردے نیں تے اپنے اندر ایہو جہیاں خوبیاں پیدا کردے نیں جیہڑیاں یہوواہ چ نیں جیویں کہ مہربانی، صبر تے معاف کرن دی خوبی۔ جدوں میاں بیوی ایہو جہیاں خوبیاں ظاہر کردے نیں تے اوہناں دی اِک دُوجے لئی محبت ودھدی جاندی اے۔ (اِفسیوں 4:32–5:1)اِک بھین جدا ناں لینا اے، اوہدی شادی نُوں 25 سال توں وی زیادہ عرصہ ہو گیا اے۔ اوہ کہندی اے: ”جیس بندے دی یہوواہ نال مضبوط دوستی ہوندی اے اوہدے نال محبت کرنا تے اوہدی عزت کرنا زیادہ اسان ہوندا اے۔“
4. یہوواہ نے مسیح لئی یوسف تے مریم نُوں ماں پیو دے طور تے کیوں چُنیا؟
4 ذرا بائبل توں اِک مثال تے غور کرو۔ جدوں یہوواہ نے مسیح لئی ماں پیو نُوں چُننا سی تے اوہنے داؤد دی نسل دے باقی سارے لوکاں وچوں یوسف تے مریم نُوں چُنیا۔ پر کیوں؟ کیونکہ اوہناں دونواں دی یہوواہ نال گُوڑھی دوستی سی تے یہوواہ جاندا سی کہ اوہ اپنی شادیشُدہ زندگی چ سب توں زیادہ اہمیت اوہنوں دین گے۔ شادیشُدہ جوڑے یوسف تے مریم دی مثال توں کیہہ سکھ سکدے نیں؟
5. شوہر یوسف دی مثال توں کیہہ سکھ سکدے نیں؟
5 یوسف اِک چنگا شوہر ایس لئی بن سکیا کیونکہ اوہ یہوواہ دِیاں ہدیتاں تے فوراً عمل کردا سی۔ گھٹو گھٹ تِن موقعیاں تے اوہنوں اپنے خاندان بارے یہوواہ وَلّوں ہدیتاں ملیاں۔ ہر واری اوہنے فوراً ایہناں ہدیتاں تے عمل کیتا، اوس ویلے وی جدوں اوہنوں اِنج کرن لئی بوہت وڈیاں تبدیلیاں کرنیاں پئیاں۔ (متی 1:20، 24؛ 2:13-15، 19-21) خدا وَلّوں مِلن والیاں ہدیتاں تے عمل کرن دی وجہ توں یوسف مریم دی حفاظت کر سکیا، اوہدا ساتھ دے سکیا تے اوہدیاں ضرورتاں نُوں پورا کر سکیا۔ ذرا سوچو کہ یوسف دے ایہناں کماں دی وجہ توں مریم دے دل چ اوہدے لئی محبت تے عزت کِنّی ودھ گئی ہوئے گی۔ شوہرو، تُسی وی اپنے خاندان دی دیکھ بھال کرن لئی یوسف دی مثال تے عمل کر سکدے او۔ اِنج کرن لئی تُسی بائبل دِیاں ہدیتاں تے غور کر سکدے او۔ d جدوں تُسی ایہناں ہدیتاں تے عمل کرو گے، فیر بھانویں ایہدے لئی توانوں تبدیلیاں ای کیوں نہ کرنیاں پین تے اِنج تُسی اپنی بیوی لئی محبت ظاہر کرو گے تے اپنے شادی دے بندھن نُوں مضبوط کرو گے۔ وانواٹو چ رہن والی اِک بھین دی شادی نُوں 20 سال توں وی زیادہ عرصہ ہو گیا اے۔ اوہ کہندی اے: ”جدوں میرا شوہر یہوواہ دی رہنمائی حاصل کرن دی کوشش کردا اے تے اوہدیاں ہدیتاں تے عمل کردا اے تے میرے دل چ اوہدے لئی عزت ہور زیادہ ودھ جاندی اے۔ مَیں محفوظ محسوس کرنی آں تے مینوں اوہدے فیصلیاں تے پورا بھروسا ہوندا اے۔“
6. بیویاں مریم دی مثال توں کیہہ سکھ سکدیاں نیں؟
6 مریم دا یہوواہ نال اپنا اِک رشتہ سی۔ اوہدے ایمان دی بنیاد یوسف دی یہوواہ نال دوستی نئیں سی۔سگوں اوہ آپ پاک کلام دِیاں ایتاں نُوں چنگی طرحاں سمجھدی سی۔ نالے اوہ سوچ وچار کرن لئی وی وقت کڈھدی سی۔ (لُوقا 1:46) یہوواہ نال مضبوط دوستی دی وجہ توں اوہ اِک چنگی بیوی بن سکی۔ (لُوقا 2:19، 51) اَج وی بوہت ساریاں بیویاں اوہی کم کرن دی کوشش کردیاں نیں جیہڑا مریم کردی سی۔ مثال لئی اِک بھین جدا ناں ایمیکو اے، کہندی اے: ”شادی توں پہلاں میرا اوہناں کماں دا اِک اپنا شیڈول سی جنہاں دے ذریعے مَیں یہوواہ نال اپنی دوستی مضبوط کر سکنی ساں۔ پر شادی توں بعد میرا شوہر ساڈے لئی دُعا کردا سی تے خاندانی عبادت چ پیشوائی کردا سی۔ ایس لئی مینوں محسوس ہویا کہ مَیں اپنے ایمان نُوں مضبوط کرن لئی آپ تے کجھ کر ای نئیں رہی۔ مَیں سمجھ گئی کہ یہوواہ نال دوستی مضبوط کرنا میری اپنی ذمےداری اے۔ ایس لئی ہُن مَیں آپ وی خدا نال کلّے چ وقت گزارنی آں۔ مَیں دُعا کرنی آں، بائبل پڑھنی آں تے سوچ وچار کرنی آں۔“ (گلتیوں 6:5) بیویو، جے تُسی یہوواہ نال اپنی دوستی نُوں مضبوط کردیاں رہوو گی تے تواڈا شوہر ہور گلاں دے نال نال ایس گل لئی وی تواڈی تعریف کرے گا تے توانوں پیار کرے گا۔—امثال 31:30۔
7. میاں بیوی مل کے یہوواہ دی عبادت کرن بارے یوسف تے مریم توں کیہہ سکھ سکدے نیں؟
7 یوسف تے مریم نے یہوواہ نال اپنی دوستی مضبوط کرن لئی مل کے وی کم کیتا۔ اوہ جاندے سن کہ اِک خاندان دے طور تے مل کے یہوواہ دی عبادت کرنا کِنّاں ضروری اے۔ (لُوقا 2:22-24، 41؛ 4:16) پر جدوں اوہناں دے ہور بچے ہو گئے تے اوہناں لئی اِنج کرنا مشکل ہویا ہوئے گا۔ پر اوہ اِنج کردے رہے۔ یوسف تے مریم نے میاں بیوی لئی کِنّی زبردست مثال قائم کیتی۔ جے یوسف تے مریم وانگوں تواڈے وی بچے نیں تے شاید عبادتاں تے جانا تے خاندانی عبادت لئی وقت کڈھنا تواڈے لئی مشکل ہووے تے میاں بیوی دے طور تے مل کے بائبل پڑھنا تے دُعا کرنا شاید توانوں ہور وی زیادہ مشکل لگے۔ پر یاد رکھو کہ جدوں تُسی مل کے یہوواہ دی عبادت کردے او تے تُسی یہوواہ دے تے اِک دُوجے دے ہور نیڑے ہو جاندے او۔ ایس لئی یہوواہ دی عبادت نُوں سب توں زیادہ اہمیت دَوو۔
8. جے تواڈی شادیشُدہ زندگی چ مسئلے چل رہے نیں تے تُسی خاندانی عبادت کرن توں زیادہ فائدہ کیویں حاصل کر سکدے او؟
8 جے تواڈی شادیشُدہ زندگی چ مسئلے چل رہے نیں تے تُسی کیہہ کر سکدے او؟ شاید توانوں لگے کہ خاندانی عبادت کرن نال توانوں کوئی فائدہ نئیں ہوئے گا۔ جے ایہہ گل اے تے شروع چ کسے ایہو جہے موضوع تے گل کرو جیہڑا چھوٹا تے دلچسپ ہوئے تے جدے تے گل کرن لئی تُسی دونویں راضی ہووو۔ اِنج کرن نال اِک دُوجے نال تواڈا رشتہ مضبوط ہوئے گا تے تواڈی ایہہ خواہش ودھے گی کہ تُسی میاں بیوی دے طور تے مل کے یہوواہ دی عبادت کرو۔
اِک دُوجے نال وقت گزارو
9. میاں بیوی لئی ایہہ کیوں ضروری اے کہ اوہ اِک دُوجے نال وقت گزارن؟
9 شوہرو تے بیویو، تُسی اِک دُوجے نال وقت گزار کے اپنی محبت نُوں قائم رکھ سکدے او۔ جدوں تُسی کٹھے وقت گزارو گے تے تُسی ایہہ جان سکو گے کہ تواڈا جیون ساتھی کیہہ سوچدا اے تے کیہہ محسوس کردا اے۔(پیدایش 2:24) ذرا غور کرو کہ بھین لیلیا تے بھرا رُوسلن نُوں اوہناں دی شادی دے کجھ عرصے بعد ای کیہڑی گل دا احساس ہویا۔ اوہناں دی شادی نُوں 15 سال توں وی زیادہ عرصہ ہو گیا اے۔ بھین کہندی اے: ”سانوں محسوس ہویا کہ اَسی آپس چ اوناں وقت نئیں گزار رہے جِنّاں اَسی سوچیا سی۔ اَسی پورا دن اپنی نوکری، گھر دے کم تے بچیاں دی دیکھبھال چ مصروف رہنے ساں۔ اَسی سمجھ گئے کہ جے اَسی میاں بیوی دے طور تے کٹھے وقت نئیں گزاراں گے تے ساڈے وچ دُوریاں پے جان گیاں۔“
10. میاں بیوی اِفسیوں 5:15، 16چ لکھے اصول تے کیویں عمل کر سکدے نیں؟
10 میاں بیوی اِک دُوجے نال وقت گزارن لئی کیہہ کر سکدے نیں؟ شاید توانوں اِنج کرن لئی اِک وقت طے کرنا پووے۔ (اِفسیوں 5:15، 16 نُوں پڑھو۔) نائیجیریا چ رہن والا اِک بھرا جدا ناں اوزوندو اے، کہندا اے: ”جدوں مَیں اپنے کماں دا شیڈول بنا رہیا ہُنا واں تے مَیں ایہدے چ اوہ وقت وی شامل کرنا واں جیہڑا مَیں تے میری بیوی کٹھے گزاراں گے۔ مَیں ایس وقت نُوں بڑی اہمیت دینا واں۔“ (فِلپّیوں 1:) ذرا غور کرو کہ مالڈووا چ خدمت کرن والے اِک حلقے دے نگہبان دی بیوی نے کیہہ کہیا۔ اوہدا ناں 10اینستاسیا اے۔ بھین نے دَسیا کہ اوہ اپنے وقت نُوں بہترین طریقے نال کیویں استمال کردی اے۔ اوہ کہندی اے: ”مَیں اپنے ذاتی کم اوس ویلے کرن دی کوشش کرنی آں جدوں میرا شوہر کلیسیا دے کماں چ مصروف ہوندا اے۔ ایس طرحاں بعد چ اَسی اِک دُوجے دے نال وقت گزار سکنے آں۔“ پر جے توانوں اپنے کماں دی وجہ توں اِک دُوجے لئی وقت کڈھنا مشکل لگ رہیا اے تے تُسی کیہہ کر سکدے او؟
11. اکوِلہ تے پرِسکِلّہ مل کے کیہڑے کم کردے سن؟
11 میاں بیوی اکوِلہ تے پرِسکِلّہ توں بوہت کجھ سکھ سکدے نیں۔ پہلی صدی عیسوی دے مسیحی اوہناں دی بڑی عزت کردے سن۔ (رومیوں 16:3، 4) بائبل چ اوہناں دی شادیشُدہ زندگی بارے زیادہ کجھ تے نئیں دَسیا گیا پر ایہہ ضرور دَسیا گیا اے کہ اوہ مُنادی، دُوجیاں دی مدد تے اپنے کم مل کے کردے سن۔ (اعمال 18:2، 3، 24-26) بائبل چ ہر واری اکوِلہ تے پرِسکِلّہ دا ذکر کٹھیاں ای ہویا اے۔
12. میاں بیوی اِک دُوجے نال ہور زیادہ وقت گزارن لئی کیہہ کر سکدے نیں؟ (تصویر نُوں وی ویکھو۔)
12 میاں بیوی اکوِلہ تے پرِسکِلّہ دی مثال تے کیویں عمل کر سکدے نیں؟ ذرا اوہناں کماں بارے سوچو جیہڑے توانوں تے تواڈے جیون ساتھی نُوں کرنے پیندے نیں۔ کیہہ تُسی کلّے ایہہ کم کرن دی بجائے رَل کے کر سکدے او؟ مثال لئی، اکوِلہ تے پرِسکِلّہ رَل کے مُنادی کردے سن۔ کیہہ تُسی وی اِنج کرن لئی اکثر منصوبہ بناندے او؟ اکوِلہ تے پرِسکِلّہ رَل کے کم وی کردے سن۔ شاید تُسی تے تواڈا جیون ساتھی اِک جگہ نوکری تے نئیں کردے پر کیہہ تُسی رَل کے گھر دے کم کر سکدے او؟ (واعظ 4:9) جدوں تُسی اِک دُوجے نال مل کے کم کرو گے تے توانوں اِنج لگے گا کہ تُسی اِک ٹیم او۔ نالے تواڈے کول آپس چ گل بات کرن دا وی موقع ہوئے گا۔ بھرا رابرٹ دی شادی نُوں 50 سال توں وی زیادہ عرصہ ہو گیا اے۔ اوہ کہندا اے: ”سچ کہواں تے سانوں گھمن پھرن یاں تفریح کرن دا زیادہ موقع نئیں مِلدا۔ پر جدوں میں بھانڈے دھونا واں تے میری بیوی اوہناں نُوں خشک کردی اے یاں جدوں میں باغ چ کم کر رہیا ہُنا واں تے میری بیوی میری مدد کردی اے تے مینوں بڑا اچھا لگدا اے۔ رَل کے کم کرن نال اَسی اِک دُوجے دے ہور نیڑے آ گئے آں تے ساڈی محبت ودھدی جا رہی اے۔“
13. میاں بیوی نُوں کیہہ کرن دی لوڑ اے تاکہ اوہ اِک دُوجے دے نیڑے ہو جان؟
13 یاد رکھو کہ اِک دُوجے نال رہن دا ہمیشاں ایہہ مطلب نئیں ہوندا کہ تُسی واقعی اِک دُوجے دے نیڑے او۔ برازیل چ رہن والی اِک بھین کہندی اے: ”اَج کل زندگی اینی مصروف اے کہ سانوں لگدا اے کہ جے اَسی اِک چھت تھلے رہ رہے آں تے ایہدا مطلب اے کہ اَسی اِک دُوجے نال وقت وی گزار رہے آں۔ پر مَیں سمجھ گئی آں کہ صرف کٹھے رہنا ای کافی نئیں اے سگوں ایہہ وی ضروری اے کہ مَیں اپنے جیون ساتھی نُوں اوہ توجہ دَواں جدی اوہنوں ضرورت اے۔“ ذرا غور کرو کہ بھرا برونو تے اوہدی بیوی اِک دُوجے نُوں پوری توجہ کیویں دیندے نیں۔ بھرا کہندا اے: ”جدوں اَسی اپنے کماں توں فارغ ہو جانے آں تے اَسی اپنے فون اِک سائیڈ تے رکھ دینے آں تاکہ اَسی اِک دُوجے نال وقت گزارن توں خوشی حاصل کر سکئے۔“
14. جے میاں بیوی نُوں اِک دُوجے نال وقت گزارنا ایناں پسند نئیں اے تے اوہ کیہہ کر سکدے نیں؟
14 جے توانوں تے تواڈے جیون ساتھی نُوں اِک دُوجے نال وقت گزارنا ایناں پسند نئیں اے تے تُسی کیہہ کر سکدے او؟ شاید توانوں فرق فرق کم کرنا پسند ہوئے یاں فیر ہو سکدا اے کہ تُسی اِک دُوجے دی کسے گل یاں کم دی وجہ توں چڑ جاندے او۔ ایہو جہی صورت چ تُسی کیہہ کر سکدے او؟ ذرا اَگ دی اوس مثال تے غور کرو جدا مضمون دے شروع چ ذکر کیتا گیا سی۔ اَگ اِک دم تیز نئیں ہو جاندی سگوں توانوں آہستہ آہستہ اوہدے چ لکڑاں پانیاں پیندیاں نیں۔ ایسے طرحاں تُسی وی شروع چ ہر روز اِک دُوجے نال تھوڑا وقت گزار سکدے او تے فیر ہولی ہولی ایس وقت نُوں ودھا سکدے او۔ پر ایس گل دا خیال رکھو کہ ایس وقت دے دوران تُسی کوئی ایہو جیہا کم نہ کرو جدی وجہ توں تواڈے وچ بحث ہو سکدی اے سگوں اوہ کم کرو جیہڑا توانوں دونواں نُوں پسند ہووے۔ (یعقوب 3:18) اِنج دے چھوٹے چھوٹے قدم چُکن نال تُسی ویکھو گے کہ تواڈے وچ محبت فیر توں ودھ رہی اے۔
اِک دُوجے دی عزت کرو
15. میاں بیوی نُوں اپنی محبت نُوں قائم رکھن لئی اِک دُوجے دی عزت کیوں کرنی چاہی دی اے؟
15 شادیشُدہ زندگی چ اِک دُوجے دی عزت کرنا بوہت ضروری اے۔ ایہہ اوس ہوا وانگوں اے جدی وجہ توں اَگ بلدی رہندی اے۔ جدوں اَگ نُوں ہوا نئیں مِلدی تے ایہہ بجھ جاندی اے۔ ایسے طرحاں جدوں میاں بیوی اِک دُوجے دی عزت نئیں کردے تے اوہناں دی محبت ٹھنڈی پے جاندی اے۔ پر جیہڑے میاں بیوی اِک دُوجے دی عزت کردے نیں، اوہ اِک دُوجے لئی اپنی محبت نُوں قائم رکھدے نیں۔ یاد رکھو کہ ایہہ گل اہم نئیں اے کہ توانوں لگے کہ تُسی اپنے جیون ساتھی دی عزت کردے او سگوں ایہہ گل اہم اے کہ اوہنوں وی اِنج لگنا چاہی دا اے۔ بھین پینی تے بھرا ایرٹ دی شادی نُوں 25 سال توں زیادہ عرصہ ہو گیا اے۔ بھین کہندی اے: ”اِک دُوجے دی عزت کرن دی وجہ توں ساڈے گھر دا ماحول بوہت خوشگوار رہندا اے۔ اَسی کھل کے اِک دُوجے دے سامنے اپنی رائے دا اظہار کر پانے آں کیونکہ اَسی جاننے آں کہ اَسی اِک دُوجے دی رائے دا احترام کرنے آں۔“ تے فیر تُسی کیہہ کر سکدے او تاکہ تواڈے جیون ساتھی نُوں وی ایہہ محسوس ہوئے کہ تُسی واقعی اوہدی عزت کردے او؟ آؤ، ابراہام تے سارہ دی مثال تے غور کرنے آں۔
16. شوہر ابراہام دی مثال توں کیہہ سکھ سکدے نیں؟ (1-پطرس 3:7) (تصویر نُوں وی ویکھو۔)
16 ابراہام ہمیشاں سارہ دی عزت کردا سی۔ اوہ اوہدی گل سُندا سی تے اوہدے جذبات دا خیال رکھدا سی۔ اِک واری سارہ بڑی پریشان سی تے اوہنے ابراہام نُوں دَسیا کہ اوہ کیہہ محسوس کر رہی اے۔ ایتھوں تک کہ اوہنے ایہہ وی کہیا کہ اوہدیاں مشکلاں دا ذمےدار ابراہام اے۔ کیہہ ایس وجہ توں ابراہام سارہ تے غصہ کرن لگ پیا؟ نئیں۔ اوہنوں پتہ سی کہ سارہ ہمیشاں اوہدی تابعدار رہندی اے تے اوہدا ساتھ دیندی اے۔ ایس لئی ابراہام نے اوہدی گل سُنی تے اوہدے مسئلے نُوں حل کرن دی کوشش کیتی۔ (پیدایش 16:5، 6) ایہدے توں اَسی کیہہ سکھنے آں؟ شوہرو، تواڈے کول اپنے خاندان دے فیصلے کرن دا حق اے۔ (1-کُرنتھیوں 11:3) پر ایہہ چنگا ہوئے گا کہ تُسی کوئی وی فیصلہ کرن توں پہلاں اپنی بیوی نال وی مشورہ کرو، خاص کر اوہدوں جدوں اوس فیصلے دا اثر اوہدے تے وی پووے گا۔ (1-کرنتھیوں13:4، 5) کدی کدار شاید تواڈی بیوی پریشان ہوئے تے توانوں اپنے دل دی گل دَسنا چاہوے۔ کیہہ تُسی اوہدی گل دھیان نال سُندے او؟ (1-پطرس 3:7 نُوں پڑھو۔) بھین اینجلا تے بھرا دیمیتری دی شادی نُوں تقریباً 30 سال ہو چُکے نیں۔بھین دَسدی اے کہ اوہدا شوہر اوہدے لئی عزت کیویں ظاہر کردا اے۔ اوہ کہندی اے: ”جدوں مَیں پریشان ہنی آں یاں کوئی گل کرنا چاہنی آں تے دیمیتری ہمیشاں میری گل سُنن لئی تیار ہوندے نیں۔اوہ اوس ویلے وی بڑے صبر نال پیش آندے نیں جدوں مَیں گل کردے ویلے بڑی جذباتی ہو جانی آں۔“
17. بیویاں سارہ دی مثال توں کیہہ سکھ سکدیاں نیں؟ (1-پطرس 3:5، 6)
17 سارہ نے ابراہام دے فیصلیاں چ اوہدا ساتھ دین نال اوہدے لئی عزت ظاہر کیتی۔ (پیدایش 12:5) اِک واری ابراہام کول اچانک کجھ مہمان آ گئے۔ اوہ اوہناں دی مہماننوازی کرنا چاہندا سی۔ ایس لئی اوہنے سارہ نُوں باقی سارے کم چھڈ کے ڈھیر ساریاں روٹیاں بنان لئی کہیا۔ (پیدایش 18:6) سارہ نے فوراً اوہدی گل منی تے اوہدے فیصلے چ اوہدا ساتھ دِتا۔ بیویو، اپنے شوہر دے فیصلیاں چ اوہدا ساتھ دین نال تُسی سارہ دی مثال تے عمل کر سکدیاں او۔ اِنج کرن نال تواڈا آپس چ رشتہ مضبوط ہوئے گا۔ (1-پطرس 3:5، 6 نُوں پڑھو۔) بھرا دیمیتری جدا پچھلے پیراگراف چ ذکر ہویا اے، دَسدا اے کہ اوہدی بیوی اوہدے لئی عزت کیویں ظاہر کردی اے۔ اوہ کہندا اے: ”اینجلا اوس ویلے وی میرے فیصلیاں چ میرا ساتھ دیندی اے جدوں اوہدی رائے میرے توں فرق ہوندی اے۔ جے میرے فیصلے دا نتیجہ چنگا نئیں نکلدا تے اوہ مینوں گلاں نئیں کردی۔“ ایہو جہے بندے نال محبت کرنا کِنّاں آسان ہوندا اے جیہڑا تواڈی عزت کردا اے۔
18. جدوں میاں بیوی اپنی محبت نُوں قائم رکھن لئی کوشش کردے رہندے نیں تے اوہناں نُوں کیہہ فائدہ ہوندا اے؟
18 اَج شیطان اوس محبت نُوں ختم کرنا چاہندا اے جیہڑی میاں بیوی چ ہونی چاہی دی اے۔ اوہ جاندا اے کہ جے میاں بیوی دی اِک دُوجے لئی محبت ختم ہو جائے گی تے اوہ یہوواہ توں وی دُور ہونا شروع ہو جان گے۔ پر سچی محبت کدی ختم نئیں ہو سکدی۔ دُعا اے کہ تواڈی شادی چ اوہو جہی محبت ہووے جیہو جہی غزلُالغزلات دی کتاب چ دَسی گئی اے۔ ایس گل دا عزم کرو کہ تُسی اپنی شادیشُدہ زندگی چ یہوواہ نُوں سب توں زیادہ اہمیت دَوو گے، اِک دُوجے نال وقت گزارو گے، اِک دُوجے دی عزت کرو گے تے اِک دُوجے دے جذباتاں تے ضرورتاں دا خیال رکھو گے۔ اِنج کرن نال تواڈے دونواں دی محبت زندگی بھر قائم رہوے گی تے تواڈی شادیشُدہ زندگی توں یہوواہ دی وڈیائی ہوئے گی جیہڑا سچی محبت دا چشمہ اے۔
گیت نمبر 106: سچی محبت وکھاؤ
a شادی دا بندھن یہوواہ وَلّوں انساناں لئی اِک تحفہ اے۔ ایس رشتے چ میاں بیوی اِک دُوجے لئی گُوڑھی محبت وکھا سکدے نیں۔ پر کدی کدار ایہہ محبت ٹھنڈی پے سکدی اے۔ جے تُسی شادیشُدہ او تے ایہہ مضمون تواڈی مدد کرے گا کہ تُسی اپنے جیون ساتھی لئی اپنی محبت نُوں قائم رکھو تے اپنی شادیشُدہ زندگی چ خوش رہ سکو۔
b سچی محبت جیہڑی کدی نئیں بدلدی، اوہنوں یاہ دا شعلہ کہیا گیا اے کیونکہ ایہہ محبت یہوواہ دی سب توں وڈی خوبی اے۔
c جے تواڈا جیون ساتھی یہوواہ دا گواہ نئیں وی اے تے فیر وی تُسی ایہناں مشوریاں تے عمل کرکے اوہدے نال اپنے رشتے نُوں مضبوط کر سکدے او۔—1-کُرنتھیوں 7:12-14؛ 1-پطرس 3:1، 2۔
d مثال لئی، اوہناں مشوریاں تے غور کرو جیہڑے اُردو زبان چ jw.org تے ”جےڈبلیو لائبریری“ چ سلسلہوار مضامین دے حصے ”گھریلو زندگی کو خوشگوار بنائیں“ چ دِتے گئے نیں۔