اہم سوال
بوعز نے جیس قرابتی دا ذکر کیتا سی، اوہنے ایہہ کیوں کہیا کہ رُوت نال ویاہ کرکے اوہدی اپنی میراث خراب ہو جائے گی؟ (رُوت 4:1، 6)
پرانے زمانے چ جدوں کوئی شادیشُدہ آدمی بےاولاد مر جاندا سی تے کجھ مسئلے پیدا ہو جاندے سن، جیویں کہ اوہدی جائیداد دا کیہہ بنے گا؟ کیہہ اوہدا ناں ہمیشاں لئی مٹ جائے گا؟ ایہو جہے معاملے حل کرن لئی شریعت چ کجھ ہدیتاں دِتیاں گئیاں سن۔
جدوں کوئی بندہ مر جاندا سی یاں غریبی دی وجہ توں اپنی زمین ویچ دیندا سی تے اوس بندے دا بھرا یاں کوئی قریبی رشتےدار اوہدی زمین نُوں خرید کے چھڈا سکدا سی۔ اِنج اوہ زمین خاندان وچ ای رہندی سی۔—احبار 25:23-28؛ گنتی 27:8-11۔
جدوں کوئی بندہ بےاولاد مر جاندا سی تے اوہدا بھرا اوہدی بیوہ نال ویاہ کر کے اوہدے ناں نُوں قائم رکھدا سی۔ رُوت دے معاملے چ وی اِنج ای ہویا۔ اوہ بندہ ایس لئی اپنے بھرا دی بیوہ نال ویاہ کردا سی تاکہ جدوں اوہناں دا پُتر ہوئے تے اوہ اوہدے بھرا دے ناں توں کہلائے تے اوہدی جائیداد دا وارث بنے۔ ایس بندوبست دے ذریعے اوس عورت دی وی دیکھبھال ہوندی سی۔—اِستثنا 25:5-7؛ متی 22:23-28۔
ہُن نعومی دے معاملے تے غور کرو۔ اوہدا ویاہ الیملک نال ہویا سی۔ جدوں الیملک تے اوہدے دونویں پُتر مر گئے تے اوہناں دے گھر کوئی وی ایہو جیہا بندہ نئیں سی جیہڑا نعومی دِیاں ضرورتاں نُوں پورا کردا۔ (رُوت 1:1-5) یہوداہ واپس آن توں بعد نعومی نے اپنی نُونہہ رُوت نُوں کہیا کہ اوہ بوعز نال گل کرے کہ اوہ اوہناں دی خاندانی زمین نُوں چھڈائے کیونکہ اوہ الیملک دا قریبی رشتےدار سی۔ (رُوت 2:1، 19، 20؛ 3:1-4) پر بوعز نُوں پتہ سی کہ الیملک دا اِک ہور وی رشتےدار اے جیہڑا اوہدے نالوں بوہتا قریبی اے تے پہلے اوہدا حق بن دا اے کہ اوہ اوہناں دی زمین نُوں چھڈائے۔—رُوت 3:9، 12، 13۔
اوہ قرابتی شروع چ مدد کرن لئی تیار سی۔ (رُوت 4:1-4) اوہ جاندا سی کہ زمین نُوں خریدن لئی تھوڑا بوہت خرچہ تے ہوئے گا پر اوہنوں پتہ سی کہ نعومی اولاد پیدا کرن جوگی نئیں رہی۔ ایس لئی اوہناں دا کوئی پُتر نئیں ہو سکدا جیہڑا الیملک دی زمین دا وارث بنے۔ اِنج اوہ زمین اوس قرابتی نُوں مِل جانی سی۔ ایس لئی اوہنوں ایس سودے چ اپنا فائدہ نظر آیا ہوئے گا۔
پر جدوں اوہنوں پتہ لگیا کہ اوہنے رُوت نال ویاہ کرنا اے تے اوہنے اپنا ارادہ بدل لیا۔ اوہنے کہیا: مَیں ایہنوں نئیں چھڈا سکدا کِتے ایہہ نہ ہوئے کہ مَیں اپنی میراث ای خراب کر دَواں۔ (رُوت 4:5، 6) پر اوہنے اپنا ارادہ کیوں بدلیا؟
جے اوہ قرابتی یاں کوئی ہور بندہ رُوت نال ویاہ کردا تے اوہناں توں پیدا ہون والے پُتر نُوں الیملک دی زمین ملنی سی۔ پر اوس بندے نے ایہہ کیوں کہیا کہ اِنج اوہدی اپنی میراث نہ خراب ہو جاوے؟ بائبل چ ایہدے بارے کجھ نئیں دَسیا گیا۔ پر ایہدی وجہ ایہناں وچوں کوئی وی ہو سکدی اے:
پہلی، زمین خریدن لئی اوس بندے دا پیسہ ضائع ہو جانا سی کیونکہ الیملک دی زمین رُوت دے ہون والے پُتر نُوں ملنی سی۔
دُوجی، اوہدے اُتے نعومی تے رُوت دِیاں ضرورتاں نُوں پورا کرن دی ذمےداری آ جانی سی۔
تیجی، جے اوس بندے دے پہلاں وی بچے سن تے رُوت توں پیدا ہون والے بچیاں نے اوہدے پہلے بچیاں نال اوہدی جائیداد چ حصےدار بن جانا سی۔
چوتھی، جے اوس بندے دا پہلاں کوئی بچے نئیں سن تے رُوت توں پیدا ہون والا مُنڈا الیملک دے نال نال اوہدی جائیداد دا وارث وی بن جانا سی۔ اِنج اوہدی جائیداد اِک ایہو جہے بچے نُوں مل جانی سی جیہڑا الیملک دے ناں توں کہلاندا سی نہ کہ اوہدے ناں توں۔ ایس لئی اوس بندے نے بوعز نُوں ایہہ حق دے دِتا کہ اوہ الیملک دی زمین نُوں چھڈائے۔ بوعز نے ایس ذمےداری نُوں قبول کیتا تاکہ الیملک دا ناں اوہدی میراث چ قائم رہ سکے۔—رُوت 4:10۔
لگدا اے کہ اوس خودغرض قرابتی نُوں اپنے ناں تے اپنی جائیداد نُوں قائم رکھن دی بوہتی فکر سی۔ پر اوہدا ناں تریخ چوں بالکل ای مٹ گیا۔ اوہنے مسیح دے پیو دادیاں چ شامل ہون دے اعزاز نُوں وی گنوا دِتا جیہڑا بوعز نُوں ملیا۔ اوس بندے نے رُوت تے نعومی دی مدد کرن دی بجائے صرف اپنے بارے سوچیا۔ پر اوہنوں اپنی خودغرضی دا بڑا نقصان ہویا۔—متی 1:5؛ لُوقا 3:23، 32۔
