مطالعے دا مضمون نمبر 10
توانوں بپتسمہ کیوں لینا چاہی دا اے؟
تُسی سارے بپتسمہ لَوو۔—اعمال 2:38۔
گیت نمبر 34: وفا دی راہ تے چلو
مضمون تے اِک نظر a
1، 2. (الف) جدوں لوک بپتسمہ لے رہے ہوندے نیں تے اکثر کیہہ ہوندا اے؟ (ب) توانوں کیہڑی گل تے غور کرنا چاہی دا اے؟
کیہہ تُسی کدی بپتسمے دے امیدواراں نُوں ویکھیا اے؟ بپتسمے توں پہلاں جدوں اوہناں کولوں دو سوال پچھے جاندے نیں تے اوہ پورے یقین نال ایہناں دے جواب دیندے نیں۔ تُسی ویکھ سکدے او کہ اوہناں دے دوستاں تے گھر والیاں نُوں اوہناں تے کِنّاں فخر اے۔ جدوں بپتسمے دے امیدوار پانی توں باہر آندے نیں تے توانوں ہر پاسیوں تالیاں دی آواز سنائی دیندی اے۔ اوہناں دے چہرے تے خوشی صاف نظر آ رہی ہوندی اے۔ ہر ہفتے ہزاراں لوک اپنی زندگی یہوواہ دے ناں کر کے بپتسمہ لیندے نیں تے اوہدے گواہ بن جاندے نیں۔
2 جے تُسی وی بپتسمہ لین بارے سوچ رہے او تے شیطان دی ایس بھیڑی دُنیا چ تُسی بڑے خاص او کیونکہ توانوں یہوواہ دی تلاش اے۔ (زبور 14:1، 2) بھانویں تُسی جوان او یاں وڈیرے، جے تُسی بپتسمہ لین بارے سوچ رہے او تے ایہہ مضمون تواڈے لئی اے۔ پر اوہناں لوکاں نُوں وی یہوواہ دی خدمت کرن دے اپنے عزم نُوں مضبوط کرن دی لوڑ اے جیہڑے بپتسمہ لے چُکے نیں۔ ایس لئی آؤ، اَسی تِن ایہو جہیاں گلاں تے غور کریئے جنہاں دی وجہ توں اَسی یہوواہ دی خدمت کرنا چاہنے آں۔
توانوں سچائی تے نیکی نال محبت اے
شیطان ہزاراں سالاں توں یہوواہ دے پاک ناں نُوں بدنام کر رہیا اے۔ (پیراگراف نمبر 3، 4 نُوں ویکھو۔)
3. یہوواہ دے بندے سچائی تے نیکی نال محبت کیوں کردے نیں؟ (زبور 119:128، 163)
3 یہوواہ نے اپنے بندیاں نُوں حکم دِتا اے کہ اوہ سچائی نال پیار کرن۔ (زکریاہ 8:19) یسوع نے اپنے پیروکاراں نُوں کہیا سی کہ اوہ نیکی کرن دی خواہش رکھن۔ (متی 5:6) ایہدا مطلب اے کہ اِک بندے دے دل چ ایہو جہے کم کرن دی شدید خواہش ہونی چاہی دی اے جیہڑے یہوواہ دی نظر چ صحی، چنگے تے پاک نیں۔ کیہہ تُسی سچائی تے نیکی نال محبت کردے او؟ یقیناً تُسی اِنج کردے او۔ توانوں جھوٹھ تے ہر طرحاں دے غلط دے بھیڑے کماں توں نفرت اے۔ (زبور 119:128، 163 نُوں پڑھو۔) جدوں کوئی جھوٹھ بولدا اے تے اوہ ایس دُنیا دے حاکم شیطان ورگا بن رہیا ہوندا اے۔ (یوحنا 8:44؛ 12:31) شیطان دا اِک مقصد ایہہ وے کہ اوہ یہوواہ دے پاک ناں نُوں بدنام کرے۔ جدوں توں اوہنے باغِعدن چ یہوواہ دے خلاف بغاوت کیتی اے، اوہدوں توں ای اوہ یہوواہ بارے جھوٹھ پھیلا رہیا اے۔ اوہنے ایہہ ظاہر کرن دی کوشش کیتی اے کہ یہوواہ اِک خودغرض تے دھوکھےباز حکمران اے جیہڑا انساناں نُوں چنگیاں چیزاں توں محروم رکھدا اے۔ (پیدایش 3:1، 4، 5) شیطان دے جھوٹھ اَج وی لوکاں دے دل تے دماغ چ زہر گھول رہے نیں۔ جدوں لوک سچائی نال پیار نئیں کردے تے شیطان اوہناں نُوں ہر طرحاں دی بُرائی تے بھیڑے کماں وَل لے جاندا اے۔—رومیوں 1:25-31۔
4. یہوواہ نے کیویں ثابت کیتا اے کہ اوہ سچائی دا خدا اے؟ (تصویر نُوں وی ویکھو۔)
4 یہوواہ سچائی دا خدا اے تے اوہ کُھلے دل نال اوہناں ساریاں نُوں سچائی سکھاندا اے جیہڑے اوہدے نال محبت کردے نیں۔ (زبور 31:5) اِنج کرن نال اوہ لوکاں دی مدد کردا اے کہ اوہ شیطان دے جھوٹھاں توں آزاد ہو جان۔ ایہدے علاوہ، یہوواہ اپنے بندیاں نُوں سکھاندا اے کہ اوہ ایماندار تے نیک بنن۔ ایس وجہ توں اوہناں دی اپنی نظر چ عزت ودھدی اے تے اوہناں نُوں دلی سکون مِلدا اے۔ (امثال 13:5، 6) بائبل کورس کردے ویلے کیہہ یہوواہ نے تواڈے لئی وی اِنج ای کیتا اے؟ تُسی سکھ لیا اے کہ یہوواہ دِیاں دَسیاں ہوئیاں راہواں تے چلن نال سب انساناں دا تے ذاتی طور تے تواڈا وی بھلا ہو سکدا اے۔ (زبور 77:13) ایس لئی تُسی اوہ سب کجھ کرنا چاہندے او جو یہوواہ دی نظر چ صحی اے۔ (متی 6:33) تُسی ساریاں نُوں دَسنا چاہندے او کہ سچائی کیہہ اے تے ثابت کرنا چاہندے او کہ شیطان نے یہوواہ تے جیہڑے اِلزام لائے نیں اوہ جھوٹھے نیں۔ پر تُسی اِنج کیویں کر سکدے او؟
5. اَسی سچائی تے نیکی دی حمایت کیویں کر سکنے آں؟
5 تُسی اپنی زندگی توں ثابت کر سکدے او کہ تُسی شیطان دے جھوٹھاں نُوں نئیں مندے تے سچائی دی حمایت کردے او۔ تُسی ایہہ وی ثابت کر سکدے او کہ تُسی یہوواہ نُوں اپنا حکمران مندے او تے اوہی کم کرنا چاہندے او جیہڑے اوہدی نظر چ صحی نیں۔ تُسی اِنج کیویں کر سکدے او؟ دُعا چ یہوواہ نال ایہہ وعدہ کرو کہ تُسی ہمیشاں تک اوہدی عبادت کردے رہوو گے تے فیر بپتسمہ لے کے دُوجیاں دے سامنے ایس گل دا اِظہار کرو کہ تُسی اپنی زندگی یہوواہ دے ناں کر دِتی اے۔ سچائی تے نیکی نال محبت، بپتسمہ لین دی اِک بوہت وڈی وجہ اے۔
تُسی یسوع نال پیار کردے او
6. زبور 45:4 دے مطابق اَسی کیہڑیاں گلاں دی وجہ توں یسوع نُوں پیار کرنے آں؟
6 تُسی یسوع نال پیار کیوں کردے او؟ ذرا غور کرو کہ زبور 45:4 چ ایہدی کیہہ وجہ دَسی گئی اے۔ (ایس ایت نُوں پڑھو۔) یسوع نُوں سچائی، خاکساری تے نیکی نال محبت اے۔ جے توانوں وی سچائی تے نیکی نال محبت اے تے ظاہری جہی گل اے کہ توانوں یسوع نال وی محبت ہوئے گی۔ ذرا سوچو کہ یسوع نے کِنّی دلیری نال سچائی تے صحی گلاں دی حمایت کیتی۔ (یوحنا 18:37) پر یسوع نے ایہہ کیویں ثابت کیتا کہ خاکساری وی بوہت اہم اے؟
7. توانوں یسوع دی خاکساری بارے کیہڑی گل سب توں چنگی لگدی اے؟
7 یسوع نے اپنی مثال توں ثابت کیتا کہ خاکساری بوہت اہم اے۔ مثال لئی، یسوع نے کدی وی اپنی نئیں سگوں اپنے باپ دی وڈیائی کیتی۔ (مرقس 10:17، 18؛ یوحنا 5:19) یسوع دی خاکساری بارے سوچ کے توانوں کیہو جیہا لگدا اے؟ یقیناً ایہہ سوچ کے ساڈے دل چ ایہہ خواہش پیدا ہوندی اے کہ اَسی خدا دے پُتر نال محبت کریئے تے اوہدی مثال تے عمل کریئے۔ یسوع کیس وجہ توں خاکسار اے؟ کیونکہ اوہ اپنے اسمانی باپ نال محبت کردا اے تے اوہدی مثال تے عمل کردا اے جیہڑا کہ آپ بڑا فروتن اے۔ (زبور 18:35؛ عبرانیوں 1:3) کیہہ تواڈے دل چ یسوع لئی محبت پیدا ہوندی اے جیہڑا بالکل اپنے باپ ورگیاں خوبیاں ظاہر کردا اے؟
8. اَسی ایس گل توں خوش کیوں آں کہ یسوع ساڈا بادشاہ اے؟
8 اَسی ایس گل توں بوہت خوش آں کہ یسوع ساڈا بادشاہ اے کیونکہ اوہ سب توں اچھا حکمران اے۔ یہوواہ نے آپ اپنے پُتر نُوں ٹریننگ دِتی اے تے اوہنوں ساڈا حکمران مقرر کیتا اے۔ (یسعیاہ 50:4، 5) ذرا اوس محبت بارے وی سوچو جیہڑی یسوع نے اپنی جان قربان کر کے ساڈے لئی ظاہر کیتی۔ (یوحنا 13:1) ساڈے بادشاہ دے طور تے یسوع ایس گل دا پورا حق رکھدا اے کہ اَسی اوہنوں محبت کریئے۔ اوہنے دَسیا اے کہ جیہڑے لوک اوہنوں محبت کرن گے، اوہ اوہدے حکماں تے عمل کرن گے تے یسوع اوہناں نُوں اپنا دوست کہوے گا۔ (یوحنا 14:15؛ 15:14، 15) واقعی ایہہ ساڈے لئی کِنّے مان دی گل اے کہ اَسی یہوواہ دے پُتر دے دوست آں۔
9. یسوع تے اوہدے پیروکاراں دے بپتسمے چ کیہڑیاں گلاں رَلدیاں مِلدیاں نیں؟
9 یسوع دا اِک حکم ایہہ وے کہ اوہدے پیروکار بپتسمہ لین۔ (متی 28:19، 20) اوہنے آپ وی بپتسمہ لیا سی۔کجھ لحاظ نال یسوع دا بپتسمہ اوہدے پیروکاراں دے بپتسمے توں فرق اے۔ (بکس ” یسوع تے اوہدے پیروکاراں دے بپتسمے چ کیہہ فرق اے؟“ نُوں ویکھو۔) پر ایہدے چ کجھ گلاں رَلدیاں مِلدیاں وی نیں۔ بپتسمہ لین توں یسوع نے ایہہ ثابت کیتا کہ اوہ اپنے باپ دی مرضی نُوں پورا کرن لئی اپنے آپ نُوں پیش کر رہیا اے۔ (عبرانیوں 10:7) ایسے طرحاں جدوں یسوع دے پیروکار بپتسمہ لیندے نیں تے اوہ دُوجیاں دے سامنے ایس گل دا اِظہار کردے نیں کہ اوہناں نے اپنی زندگی یہوواہ دے ناں کر دِتی اے۔ ہُن اوہناں دی زندگی دا مقصد ایہہ وے کہ اوہ اپنی نئیں سگوں یہوواہ دی مرضی نُوں پورا کرن۔ ایس طرحاں اوہ اپنے مالک یسوع دی مثال تے عمل کردے نیں۔
10. تُسی یسوع نُوں کیوں پیار کردے او تے ایس پیار دی وجہ توں تواڈے اندر کیہڑی خواہش پیدا ہونی چاہی دی اے؟
10 تُسی ایہہ مندے او کہ یسوع، یہوواہ دا اِکلوتا پُتر اے تے یہوواہ نے اوہنوں ساڈا بادشاہ بنایا اے۔ تُسی ایہہ جاندے او کہ یسوع خاکسار اے تے اوہ بالکل اپنے باپ ورگیاں خوبیاں ظاہر کردا اے۔ تُسی سکھیا اے کہ اوہنے لوکاں نُوں کھانا کھوایا، بےحوصلہ لوکاں دا حوصلہ ودھایا، ایتھوں تک کہ بیماراں نُوں وی ٹھیک کیتا۔ (متی 14:14-21) تُسی ویکھیا اے کہ اَج اوہ کلیسیاواں دی رہنمائی کیویں کر رہیا اے۔ (متی 23:10) تُسی ایہہ وی جاندے او کہ آن والے وقت چ خدا دی بادشاہی دے بادشاہ دے طور تے اوہ ساڈے لئی ہور وی بوہت کجھ کرے گا۔ پر تُسی ایہہ کیویں ثابت کر سکدے او کہ تُسی یسوع نال محبت کردے او؟ اوہدی مثال تے عمل کرن نال۔ (یوحنا 14:21) اِنج کرن لئی تُسی سب توں پہلے اپنے زندگی یہوواہ دے ناں کر سکدے او تے بپتسمہ لے سکدے او۔
تُسی یہوواہ نال پیار کردے او
11. تواڈے خیال چ بپتسمہ لین دی سب توں وڈی وجہ کیہڑی اے؟
11 بپتسمہ لین دی سب توں وڈی وجہ کیہڑی اے؟ یسوع نے دَسیا کہ یہوواہ دے حکماں چوں سب توں وڈا حکم کیہڑا اے۔ اوہنے کہیا: یہوواہ اپنے خدا نال اپنے سارے دل، اپنی ساری جان، اپنی ساری عقل تے اپنی ساری طاقت نال محبت کرو۔ (مرقس 12:30) کیہہ تُسی وی یہوواہ نال ایہو جہی محبت کردے او؟
یہوواہ نے سانوں اوہ ساریاں چیزاں دِتیاں نیں جنہاں توں اَسی خوشی حاصل کرنے آں تے ہمیشاں کردے رہواں گے۔ (پیراگراف نمبر 12، 13 نُوں ویکھو۔)
12. تُسی یہوواہ نال کیوں محبت کردے او؟ (تصویر نُوں وی ویکھو۔)
12 ایہو جہیاں بوہت ساریاں گلاں نیں جنہاں دی وجہ توں اَسی یہوواہ نال محبت کرنے آں۔ مثال لئی، اَسی ایہہ سمجھ گئے آں کہ اوہ زندگی دا چشمہ اے تے ہر چنگی نعمت تے ہر کامل بخشش اوہدے وَلّوں مِلدی اے۔ (زبور 36:9؛ یعقوب 1:17) سانوں جنیاں وی نعمتاں ملیاں نیں اوہ ساڈے پیار کرن والے باپ یہوواہ نے سانوں دِتیاں نیں۔
13. فدیہ اینی شاندار نعمت کیوں اے؟
13 فدیہ یہوواہ دی اِک بوہت ای شاندار نعمت اے۔ اَسی اِنج کیوں کہہ سکنے آں؟ ذرا سوچو کہ یہوواہ تے یسوع دا آپس چ کِنّاں مضبوط رشتہ سی۔ یسوع نے کہیا: باپ مینوں پیار کردا اے تے مَیں باپ نُوں پیار کرنا واں۔ (یوحنا 10:17؛ 14:31) یہوواہ تے یسوع نے کروڑاں سال کٹھے گزارے سن جدی وجہ توں اوہناں دی دوستی ہور وی گُوڑھی ہو گئی سی۔ (امثال 8:22، 23، 30) ہُن ذرا سوچو کہ جدوں یہوواہ نے اپنے پُتر نُوں تکلیف سہن دِتی تے سُولی اُتے مرن دِتا تے اوہنوں کِنّاں دُکھ ہویا ہوئے گا۔ پر یہوواہ توانوں تے سارے انساناں نُوں ایناں پیار کردا اے کہ اوہنے اپنے پیارے پُتر نُوں تواڈے لئی قربان کر دِتا تاکہ تُسی تے سارے انسان ہمیشاں تک زندہ رہ سکو۔ (یوحنا 3:16؛ گلتیوں 2:20) یہوواہ نال محبت کرن دی ایس توں وڈی وجہ ہور کوئی ہو ای نئیں سکدی۔
14. زندگی دا سب توں چنگا مقصد کیہہ ہو سکدا اے؟
14 تُسی یہوواہ بارے بوہت ساریاں گلاں سکھ لئیاں نیں ایس لئی تواڈے دل چ اوہدے لئی محبت ودھ گئی اے۔ تُسی ضرور ایہہ چاہوو گے کہ تُسی ہُن تے ہمیشاں لئی اوہدے دوست بن جاؤ۔ تے تُسی اِنج کر سکدے او۔ یہوواہ بڑے پیار نال توانوں کہندا اے کہ تُسی اوہدا دل خوش کرو۔ (امثال 23:15، 16) ایہہ تُسی صرف اپنیاں گلاں توں ای نئیں سگوں اپنے کماں توں وی کر سکدے او۔ جیویں تُسی اپنی زندگی گزاردے او، اوہدے توں ایہہ ثابت ہوئے گا کہ تُسی دلوں یہوواہ نُوں محبت کردے او۔ (1-یوحنا 5:3) ساڈی زندگی دا ایس توں چنگا مقصد ہور کوئی ہو ای نئیں سکدا۔
15. تُسی یہوواہ لئی اپنی محبت کیویں ثابت کر سکدے او؟
15 تُسی یہوواہ لئی اپنی محبت کیویں ثابت کر سکدے او؟ سب توں پہلاں توانوں دُعا چ اپنی زندگی یہوواہ دے ناں کرنی چاہی دی اے۔ (زبور 40:8) فیر توانوں بپتسمہ لے کے دُوجیاں سامنے ایس گل دا اِظہار کرنا چاہی دا اے۔ جیویں اَسی ایس مضمون دے شروع چ ویکھیا، بپتسمہ تواڈی زندگی دا اِک بڑا ای اہم موڑ ہوندا اے۔ اوس دن توں بعد تُسی اِک نوِیں زندگی شروع کردے او جیہڑی تُسی اپنی مرضی مطابق نئیں سگوں یہوواہ دی مرضی دے مطابق جیندے او۔ (رومیوں 14:8؛ 1-پطرس 4:1، 2) ایہہ گل سچ اے کہ ایہہ تواڈی زندگی دا بوہت وڈا فیصلہ ہوندا اے۔ پر بپتسمہ لین نال تُسی ودھیا زندگی وَل قدم ودھا رہے ہوندے او۔ پر اوہ کیویں؟
16. زبور 41:12 دے مطابق یہوواہ اوہناں لوکاں نُوں کیہہ انعام دَوے گا جیہڑے اپنی زندگی اوہدے ناں کردے نیں؟
16 یہوواہ دا دل بوہت وڈا اے۔ تُسی اوہنوں جو وی دَوو گے، اوہ توانوں اوہدے توں کِتے زیادہ دَوے گا۔ (مرقس 10:29، 30) اوہ توانوں ایس بھیڑی دُنیا چ وی اِک ایہو جہی زندگی دَوے گا جیہڑی بوہت چنگی تے خوشیاں نال بھری ہوئے گی۔ بپتسمہ لین نال تواڈی زندگی دا جیہڑا شاندار سفر شروع ہوئے گا، اوہ کدی ختم نئیں ہوئے گا۔ تُسی ہمیشاں تک اپنے اسمانی باپ دی خدمت کر سکو گے تے اوہدے تے تواڈے وچ محبت ودھدی جائے گی۔ نالے تُسی اوہدوں تک زندہ رہوو گے جدوں تک اوہ اے یعنی ہمیشاں تک۔—زبور 41:12 نُوں پڑھو۔
17. بھانویں کہ یہوواہ کول سب کجھ اے پر فیر وی اَسی اوہنوں کیہہ دے سکنے آں؟
17 جدوں تُسی اپنی زندگی یہوواہ دے ناں کردے او تے بپتسمہ لیندے او تے تواڈے کول اوہنوں اِک ایہو جہی چیز دین دا اعزاز ہوندا اے جیہڑی اوہدے لئی بڑی خاص اے۔ یہوواہ نے سانوں ہر اوہ شے دِتی اے جدے توں سانوں خوشی مِلدی اے۔ بھانویں کہ سب کجھ ایس کائنات دے خالق تے مالک یہوواہ دا ای اے، پر اوہدیاں نعمتاں دے بدلے اَسی اوہنوں اِک ایہو جہی چیز دے سکنے آں جیہڑی اوہدے کول نئیں اے تے اوہ وے ساڈی وفاداری۔ (ایوب 1:8؛ 41:11؛ امثال 27:11) زندگی گزارن دا ایس توں ودھیا طریقہ ہور کوئی نئیں اے۔ واقعی، یہوواہ لئی ساڈی محبت ای بپتسمہ لین دی سب توں خاص وجہ اے۔
کیہہ تُسی بپتسمہ لین لئی تیار او؟
18. تُسی اپنے آپ کولوں کیہڑے سوال پچھ سکدے او؟
18 فیر تُسی ایس سوال دا کیہہ جواب دَوو گے: ”کیہہ مَیں بپتسمہ لوَاں گا؟“ ایس سوال دا جواب صرف تُسی دے سکدے او۔ شاید تُسی اپنے آپ کولوں پچھ سکدے او کہ ”مَیں بپتسمہ لین چ دیر کیوں کر رہیا واں؟“ (اعمال 8:36) بپتسمہ لین لئی اوہناں تِن گلاں نُوں یاد رکھو جنہاں تے اَسی ایس مضمون چ گل کیتی اے۔ پہلی گل ایہہ وے کہ تُسی سچائی تے نیکی نال محبت کردے او۔ اپنے آپ کولوں پچھو: ”کیہہ مَیں اوہ دن ویکھنا چاہنا واں جدوں سارے لوک سچ بولن گے تے اوہی کم کرن گے جیہڑے صحی نیں؟“ دُوجی گل ایہہ وے کہ تُسی یسوع نال محبت کردے او۔ اپنے آپ کولوں پچھو: ”کیہہ مَیں چاہنا واں کہ خدا دا پُتر میرا بادشاہ ہووے تے مَیں اوہدی مثال تے عمل کراں؟“ تیجی تے سب توں اہم گل ایہہ وے کہ تُسی یہوواہ نال محبت کردے او۔ اپنے آپ کولوں پچھو: ”کیہہ مَیں یہوواہ دی خدمت کر کے اوہدا دل خوش کرنا چاہنا واں؟“ جے تُسی ایہناں سوالاں دے جواب ہاں چ دِتے نیں تے فیر بپتسمہ لین چ دیر نہ کرو۔—اعمال 16:33۔
19. توانوں بپتسمہ لین توں کیوں نئیں جھکنا چاہی دا؟ اِک مثال دَوو۔ (یوحنا 4:34)
19 جے تُسی بپتسمہ لین توں جھک رہے او تے اوس مثال تے غور کرو جیہڑی یسوع نے دِتی۔ (یوحنا 4:34 نُوں پڑھو۔) یسوع نے کہیا کہ اوہدے لئی اپنے باپ دی مرضی تے چلنا کھانا کھان وانگوں اے۔ پر کیوں؟ کھانا کھانا ساڈے لئی بڑا فائدہمند اے۔ یسوع جاندا سی کہ یہوواہ سانوں جو کجھ وی کرن لئی کہندا اے، اوہ ساڈے لئی بڑا فائدہمند ہوندا اے۔ یہوواہ نئیں چاہندا کہ اَسی کوئی ایہو جیہا کم کریئے جدی وجہ توں سانوں نقصان ہووے۔ کیہہ یہوواہ ایہہ چاہندا اے کہ اَسی بپتسمہ لئیے؟ جی بالکل۔ (اعمال 2:38) فیر تُسی ایس گل دا یقین رکھ سکدے او کہ یہوواہ دا ایہہ حکم من کے وی توانوں فائدہ ہوئے گا۔ جے تُسی چنگے توں چنگا کھانا کھان توں نئیں جھکدے تے فیر توانوں بپتسمہ لین توں وی نئیں جھکنا چاہی دا۔
20. اگلے مضمون چ اَسی کیس بارے گل کراں گے؟
20 کجھ لوک بپتسمہ لین چ دیر کیوں کردے نیں؟ شاید اوہ کہن کہ ”مَیں حالے ایہہ قدم چُکن لئی تیار نئیں آں۔“ سچ اے کہ اپنی زندگی یہوواہ دے ناں کرنا تے بپتسمہ لینا تواڈی زندگی دا سب توں اہم فیصلہ اے۔ ایہدے علاوہ بپتسمہ لین دے لائق بنن چ وقت لگدا اے، ایہدے لئی سوچ وچار کرنی پیندی اے نالے محنت وی کرنی پیندی اے۔ پر جے تُسی دلوں ایہہ قدم چُکنا چاہندے او تے تُسی ہُن توں ای اپنے آپ نُوں کیویں تیار کر سکدے او؟ ایس سوال دا جواب سانوں اگلے مضمون چ ملے گا۔
گیت نمبر 52: اَسی یہوواہ دے آں
a بپتسمہ لینا بائبل کورس کرن والے ہر بندے لئی بڑا اہم قدم اے۔ پر کیہڑی چیز اوہناں دے دل چ ایہہ خواہش پیدا کر سکدی اے کہ اوہ ایہہ قدم چُکن؟ اوہ چیز محبت اے۔ پر سوال ایہہ پیدا ہوندا اے کہ اوہناں نُوں کیہڑی چیز نال تے کیہڑی ہستی نال محبت کرنی چاہی دی اے؟ ایس مضمون چ اَسی ایہناں سوالاں دے جواب حاصل کراں گے تے ویکھاں گے کہ بپتسمہ لین توں بعد ساڈی زندگی کیہو جہی ہوئے گی۔
