مطالعے دا مضمون نمبر 11
تُسی بپتسمہ لین لئی کیویں تیار ہو سکدے او؟
ہُن مینوں بپتسمہ لین توں کیہڑی گل روکدی اے؟—اعمال 8:36۔
گیت نمبر 40: تواڈا مالک کون اے؟
مضمون تے اِک نظر a
پوری دُنیا چ جوان تے وڈیرے لوک اپنی زندگی چ تبدیلیاں لیا کے بپتسمہ لے رہے نیں۔ (پیراگراف نمبر 1، 2 نُوں ویکھو۔)
1، 2. جے تُسی حالے بپتسمہ لین لئی تیار نئیں او تے توانوں مایوس کیوں نئیں ہونا چاہی دا؟ (پہلے صفحے دی تصویر نُوں ویکھو۔)
جے تُسی بپتسمہ لینا چاہندے او تے تُسی اپنے لئی اِک بوہت ای چنگا منصوبہ بنایا اے۔ پر کیہہ تُسی حالے بپتسمہ لین لئی تیار او؟ جے توانوں تے تواڈی کلیسیا دے بزرگاں نُوں لگدا اے کہ تُسی بپتسمہ لین لئی تیار او تے ایہہ قدم چُکن چ دیر نہ کرو۔ جے تُسی اِنج کرو گے تے توانوں یہوواہ دی خدمت چ بوہت ساریاں برکتاں مِلن گیاں۔
2 پر کیہہ توانوں ایہہ دَسیا گیا اے کہ حالے توانوں اپنے اندر ہور بہتری لیان دی لوڑ اے تاکہ تُسی بپتسمہ لے سکو؟ یاں کیہہ توانوں اپنے بارے آپ ایہہ گل محسوس ہوندی اے؟ جے ایہہ گل اے تے مایوس نہ ہووو۔ بھانویں تُسی جوان او یاں وڈیرے، تُسی اپنے اندر بہتری لیا کے بپتسمہ لے سکدے او۔
مینوں بپتسمہ لین توں کیہڑی گل روکدی اے؟
3. حبشی خوجے نے فِلپّس نُوں کیہہ پچھیا تے ایہدے توں کیہڑا سوال پیدا ہوندا اے؟ (اعمال 8:36، 38)
3 اعمال 8:36، 38 نُوں پڑھو۔ حبشی خوجے نے فِلپّس نُوں پچھیا: ہُن مینوں بپتسمہ لین توں کیہڑی گل روکدی اے؟ سچ اے کہ حبشی خوجہ بپتسمہ لین دی شدید خواہش رکھدا سی۔ پر سوال ایہہ پیدا ہوندا اے کہ کیہہ اوہ بپتسمہ لین لئی واقعی تیار سی؟
حبشی خوجے دی خواہش سی کہ اوہ یہوواہ بارے سکھدا رہوے۔ (پیراگراف نمبر 4 نُوں ویکھو۔)
4. حبشی خوجے نے ایہہ کیویں ثابت کیتا کہ اوہ ہور زیادہ سکھنا چاہندا سی؟
4 حبشی خوجہ عبادت کرن لئی یروشلیم گیا سی۔ (اعمال 8:27) ایس لئی ہو سکدا اے کہ اوہنے یہودی مذہب نُوں اپنا لیا سی۔ ضرور اوہنے عبرانی صحیفیاں توں یہوواہ بارے سکھیا ہوئے گا۔ پر فیر وی اوہنوں ہور زیادہ سکھن دا شوق سی۔ غور کرو کہ جدوں فِلپّس اوہنوں راہ چ ملیا سی تے اوہدوں اوہ کیہہ کر رہیا سی؟ اوہ یسعیاہ نبی دی کتاب پڑھ رہیا سی۔ (اعمال 8:28) ایس کتاب چ پاک کلام دِیاں گوڑھیاں سچائیاں سن۔ ایس گل توں پتہ چلدا اے کہ حبشی خوجہ پاک کلام دِیاں بنیادی سچائیاں نُوں ای سکھ کے مطمئن نئیں ہو گیا سی سگوں اوہ ہور زیادہ سکھنا چاہندا سی۔
5. حبشی خوجے نے پاک کلام دِیاں سچائیاں سکھ کے کیہہ کیتا؟
5 حبشی خوجہ ایتھوپیا دی ملکہ کنداکے دا اِک وڈا افسر سی تے اوہدے سارے خزانے دا مختار سی۔ (اعمال 8:27) ایہدا مطلب اے کہ اوہ ضرور بوہت مصروف ہوئے گا کیونکہ اوہدے کول بوہت ساریاں ذمےداریاں سن۔ فیر وی اوہنے یہوواہ دی عبادت کرن لئی وقت کڈھیا۔ اوہنے پاک کلام دِیاں سچائیاں نُوں صرف سکھیا ای نئیں سگوں اوہناں تے عمل وی کیتا۔ ایسے لئی تے اوہ اِک لما سفر کر کے ایتھوپیا توں یروشلیم گیا سی تاکہ اوہ ہیکل چ یہوواہ دی عبادت کر سکے۔ ایس سفر چ بوہت وقت تے پیسہ لگیا ہوئے گا۔ پر اوہ بندہ یہوواہ دی عبادت کرن لئی کجھ وی کرن نُوں تیار سی۔
6، 7. حبشی خوجے دے دل چ یہوواہ لئی محبت کیویں ودھدی گئی؟
6 حبشی خوجے نے فِلپّس کولوں کجھ ہور اہم سچائیاں سکھیاں جنہاں چ ایہہ سچائی وی شامل سی کہ یسوع ای مسیح اے۔ (اعمال 8:34، 35) ایس گل نے ضرور اوس افسر دے دل نُوں چُھو لیا ہوئے گا کہ یسوع نے اوہدے لئی کیہہ کجھ کیتا اے۔ ایہہ گلاں سکھن توں بعد اوہنے کیہہ کیتا؟ اوہ چاہندا تے اوہ اِک عزتدار یہودی دے طور تے ای زندگی گزاردا رہندا۔ پر اوہدے دل چ یہوواہ تے یسوع لئی محبت اینی ودھ گئی کہ اوہنے بپتسمہ لے کے یسوع دا شاگرد بنن دا فیصلہ کیتا۔ فِلپّس نے ویکھیا کہ حبشی خوجہ بپتسمہ لین لئی تیار اے۔ ایس لئی اوہنے اوہنوں بپتسمہ دِتا۔
7 حبشی خوجے دی مثال تے عمل کر کے تُسی وی بپتسمے لئی تیار ہو سکدے او۔ فیر تُسی اوہدے وانگوں پورے یقین نال کہہ سکو گے کہ ہُن مینوں بپتسمہ لین توں کیہڑی گل روکدی اے؟ آؤ ویکھئے کہ تُسی وی اوہ کم کیویں کر سکدے او جیہڑے حبشی خوجے نے کیتے سن: اوہ سکھدا رہیا، سکھیاں ہوئیاں گلاں دے مطابق عمل کردا رہیا تے اپنے دل چ یہوواہ لئی محبت نُوں ودھاندا رہیا۔
سکھدے رہوو
8. یوحنا 17:3 دے مطابق سانوں کیہہ کردے رہنا چاہی دا اے؟
8 یوحنا 17:3 نُوں پڑھو۔ ساڈے وچوں کئیاں نے ایس ایت نُوں پڑھ کے ایہہ فیصلہ کیتا سی کہ اَسی بائبل کورس کراں گے۔ پر کیہہ ایس ایت چ لکھی یسوع دی گل توں سانوں ایہہ وی پتہ چلدا اے کہ سانوں سکھدے رہنا چاہی دا اے؟ جی بالکل۔ کیونکہ سچے خدا نُوں جانن دا سلسلہ کدی ختم نئیں ہوئے گا۔ (واعظ 3:11) اَسی اوہدے بارے ہمیشاں تک سکھدے رہواں گے۔ جِنّاں زیادہ اَسی یہوواہ بارے سکھدے جاواں گے، اوناں ای زیادہ اَسی اوہدے نیڑے ہوندے جاواں گے۔—زبور 73:28۔
9. بائبل دِیاں بنیادی سچائیاں نُوں سکھن توں بعد سانوں کیہہ کرنا چاہی دا اے؟
9 یہوواہ بارے سکھن دی شروعات بنیادی سچائیاں توں ہوندی اے۔ پولُس رسول نے عبرانیوں دے ناں اپنے خط چ ایہناں سچائیاں نُوں بنیادی گلاں کہیا۔ پر اوہ ایہہ نئیں کہہ رہیا سی کہ ایہہ گلاں اینیاں اہم نئیں نیں۔ سگوں اوہ تے ایہہ کہہ رہیا سی کہ ایہہ گلاں دودھ وانگوں نیں جیہڑا اِک چھوٹے بچے دے ودھن پُھلن لئی ضروری ہوندا اے۔ (عبرانیوں 5:12؛ 6:1) پر ایہدے نال نال اوہنے مسیحیاں نُوں ایہہ وی کہیا کہ اوہ ایہناں بنیادی گلاں توں اَگے ودھن تے خدا دے کلام دِیاں گوڑھیاں سچائیاں نُوں سکھن۔ کیہہ تواڈے دل چ بائبل دِیاں گوڑھیاں سچائیاں نُوں سکھن دی خواہش ہے وے؟ کیہہ تُسی یہوواہ تے اوہدے مقصد بارے ہور زیادہ سکھن لئی تیار او؟
10. کجھ لوکاں نُوں پڑھنا تے تحقیق کرنا مشکل کیوں لگدا اے؟
10 ساڈے وچوں کئیاں نُوں پڑھنا تے تحقیق کرنا مشکل لگدا اے۔ کیہہ توانوں وی اِنج کرنا مشکل لگدا اے؟ کیہہ تُسی سکول چ چنگی طرحاں پڑھنا تے تحقیق کرنا سکھیا سی؟ کیہہ توانوں اِنج کرن چ مزہ آندا سی تے ایہہ محسوس ہوندا سی کہ تُسی کافی کجھ سکھیا اے؟ یاں کیہہ تُسی ایہہ سوچ لیا سی کہ تواڈے لئی کتاباں نُوں پڑھنا تے ایہناں توں سکھنا مشکل اے؟ جے ہاں تے تُسی کلّے نئیں او سگوں بوہت سارے لوکاں نُوں اِنج ای لگدا اے۔ پر یہوواہ تواڈی مدد کر سکدا اے کیونکہ اوہ بہترین اُستاد اے۔
11. یہوواہ نے ایہہ کیویں ثابت کیتا اے کہ اوہ سب توں عظیم اُستاد اے؟
11 یہوواہ نے اپنے بارے پاک کلام چ ایہہ دَسیا اے کہ اوہ سب توں عظیم اُستاد اے۔ (یسعیاہ 30:20، 21) اوہ اِک ایہو جیہا اُستاد اے جیہڑا مہربان اے، صبر نال کم لیندا اے تے ساڈے احساسات نُوں سمجھدا اے۔ اوہ ساڈیاں اچھیاں گلاں تے دھیان دیندا اے۔ (زبور 130:3) اوہ کدی وی ساڈے توں کوئی ایہو جیہا کم کرن دی توقع نئیں کردا جیہڑا ساڈے وس چ نہ ہووے۔ یاد رکھو کہ ساڈا دماغ یہوواہ دی اِک شاندار نعمت اے۔ (زبور 139:14) تے اوہنے ساڈے اندر نوِیاں چیزاں نُوں سکھن دی خواہش پائی اے۔ ساڈا خالق چاہندا اے کہ اَسی ہمیشاں تک سکھدے رہیے تے اِنج کرن چ سانوں مزہ آوے۔ ایس لئی ایہہ چنگا ہوئے گا کہ اَسی ہُن توں ای اپنے اندر بائبل دِیاں سچائیاں نُوں جانن دی طلب پیدا کریئے۔ (1-پطرس 2:2) اِنج کرن لئی ایہو جہے منصوبے بناؤ جنہاں نُوں تُسی پورا کر سکو تے باقاعدگی نال بائبل نُوں پڑھو تے تحقیق کرو۔ (یشوع 1:8) جدوں تُسی بائبل پڑھو گے تے یہوواہ بارے سکھو گے تے اوہ وی تواڈی مدد کرے گا کہ توانوں اِنج کرن چ مزہ آوے۔
12. سانوں اپنے ذاتی مطالعے چ یسوع دی زندگی تے اوہدی خدمت بارے سوچ وچار کیوں کرنی چاہی دی اے؟
12 باقاعدگی نال یسوع دی زندگی تے اوہدی خدمت بارے سوچ وچار کرو۔ جے اَسی چاہنے آں کہ اَسی ایس مشکل دَور چ یہوواہ دی خدمت کردے رہیے تے فیر ایہہ بوہت ضروری اے کہ اَسی یسوع دی مثال تے عمل کریئے۔ (1-پطرس 2:21) یسوع نے کُھل کے اپنے پیروکاراں نُوں دَسیا سی کہ اوہناں نُوں مشکلاں سہنیاں پین گیاں۔ (لُوقا 14:27، 28) پر اوہنوں پورا یقین سی کہ اوہدے وانگوں اوہدے پیروکار وی مشکل وقت چ یہوواہ دے وفادار رہ سکن گے۔ (یوحنا 16:33) یسوع مسیح دی زندگی دا گہرائی نال مطالعیا کرو تے ایہہ منصوبہ بناؤ کہ تُسی ہر روز یسوع دی مثال تے عمل کرو گے۔
13. توانوں یہوواہ کولوں کیہہ منگدے رہنا چاہی دا اے تے کیوں؟
13 صرف علم حاصل کرنا ای کافی نئیں اے۔ علم حاصل کرن دا مقصد ایہہ ہونا چاہی دا اے کہ اَسی یہوواہ بارے ہور زیادہ سکھیے تے اپنے اندر خوبیاں پیدا کریئے، جیویں کہ اپنے دل چ یہوواہ لئی محبت پیدا کریئے تے اوہدے تے اپنے ایمان نُوں مضبوط کریئے۔ (1-کُرنتھیوں 8:1-3) جدوں تُسی یہوواہ بارے سکھ رہے ہوندے او تے اوہدے کولوں دُعا کرو کہ اوہ توانوں ہور ایمان دَوے۔ (لُوقا 17:5) اوہ کُھلے دل نال ایہو جہیاں دُعاواں دا جواب دیندا اے۔ جدوں تُسی خدا بارے صحی علم حاصل کرو گے تے تواڈا ایمان مضبوط ہوئے گا۔ ایہہ مضبوط ایمان تواڈی مدد کرے گا کہ تُسی ہور وی ضروری قدم چکو۔—یعقوب 2:26۔
تُسی جو کجھ سکھدے او، اوہدے تے عمل کردے رہوو
طوفان توں پہلاں نوح تے اوہدے خاندان نے اوہناں گلاں تے عمل کیتا جیہڑیاں اوہناں نے یہوواہ کولوں سکھیاں سن۔ (پیراگراف نمبر 14 نُوں ویکھو۔)
14. پطرس رسول نے ایس گل دی اہمیت نُوں کیویں واضح کیتا کہ اَسی جو کجھ سکھیے، اوہدے تے عمل کریئے؟ (تصویر نُوں وی ویکھو۔)
14 پطرس رسول نے ایس گل دی اہمیت نُوں واضح کیتا کہ مسیح دے پیروکاراں نُوں اوہناں گلاں تے عمل کرنا چاہی دا اے جیہڑیاں اوہ بائبل توں سکھدے نیں۔ اوہنے نوح دے واقعے دا ذکر کیتا۔ یہوواہ نے نوح نُوں دَسیا سی کہ اوہ اِک طوفان لیا کے اوس زمانے دے بھیڑے لوکاں نُوں ختم کر دَوے گا۔ اپنیاں جاناں بچان لئی نوح تے اوہدے گھر والیاں لئی صرف ایہہ جاننا ای کافی نئیں سی کہ یہوواہ اِک طوفان لیان والا اے۔ غور کرو کہ پطرس نے طوفان توں پہلے والے دَور دا ذکر کیتا یعنی اوہ دَور جدوں کشتی بنائی جا رہی سی۔ (1-پطرس 3:20) نوح تے اوہدے خاندان نے کشتی بنان بارے یہوواہ کولوں جو کجھ سکھیا سی، اوہناں نے اوہدے تے عمل وی کیتا۔ (عبرانیوں 11:7) پطرس رسول نے دَسیا کہ بپتسمہ اوس کم وانگوں اے جیہڑا نوح نے کیتا سی۔ اوہنے کہیا: بپتسمہ وی ایسے طرحاں اے تے توانوں بچا رہیا اے۔ (1-پطرس 3:21) اِک لحاظ نال تُسی بپتسمہ لین لئی جیہڑا کم کر رہے او، اوہ اوس کم وانگوں اے جیہڑا نوح تے اوہدے خاندان نے کشتی بنان لئی کئی سالاں تک کیتا سی۔ توانوں بپتسمہ لین دے لائق بنن لئی کیہہ کرن دی لوڑ اے؟
15. تُسی ایہہ کیویں ثابت کر سکدے او کہ تُسی دلوں توبہ کر لئی اے؟
15 سب توں پہلا کم جیہڑا اَسی کر سکنے آں، اوہ ایہہ وے کہ اَسی اپنے گُناہواں توں دلوں توبہ کریئے۔ (اعمال 2:37، 38) جدوں اَسی دلوں توبہ کرنے آں تے اَسی اپنے اندر تبدیلیاں لیانے آں۔ کیہہ تُسی ایہو جہے کم کرنے چھڈ دِتے نیں جیہڑے یہوواہ نُوں پسند نئیں نیں جیویں کہ بدکار زندگی گزارنا، سگریٹ پینا، گندی زبان استمال کرنا یاں گالاں کڈھنا؟ (1-کُرنتھیوں 6:9، 10؛ 2-کُرنتھیوں 7:1؛ اِفسیوں 4:29) جے تُسی حالے تک اپنے اندر ایہہ تبدیلیاں نئیں لیائے تے اِنج کرن دی کوشش کردے رہوو۔ اوس بھین بھرا نال گل کرو جیہڑا توانوں بائبل کورس کرا رہیا اے یاں اپنی کلیسیا دے بزرگاں کولوں مدد لوَو۔ جے تُسی حالے چھوٹے او تے اپنے امیابو نال گل کرو تاکہ توانوں ایہو جہیاں بھیڑیاں عادتاں نُوں چھڈن چ مدد ملے جیہڑیاں بپتسمہ لین چ رُکاوٹ بن سکدیاں نیں۔
16. ہر روز یہوواہ دی عبادت کرن چ کیہہ کجھ شامل اے؟
16 ایہہ بوہت ضروری اے کہ اَسی ہر روز یہوواہ دی عبادت کریئے۔ ایہدے چ ایہہ شامل اے کہ اَسی عبادتاں تے جائیے تے ایہناں چ حصہ لئیے۔ (عبرانیوں 10:24، 25) جدوں توانوں مُنادی کرن دی اجازت مل جائے تے باقاعدگی نال اِنج کرو۔ جِنّاں زیادہ تُسی زندگی بچان والے ایس کم چ حصہ لوَو گے، اوناں ای زیادہ توانوں ایس کم چ مزہ آوے گا۔ (2-تیمُتھیُس 4:5) جے تُسی حالے چھوٹے او تے اپنے آپ کولوں پچھو: ”کیہہ میرے امیابو نُوں مینوں یاد کرانا پیندا اے کہ مَیں عبادتاں تے جانا اے تے مُنادی کرنی اے یاں کیہہ مَیں آپ اِنج کرنا واں؟“ جدوں تُسی آپ ایہہ کم کرو گے تے تُسی ثابت کرو گے کہ تواڈا ایمان مضبوط اے، تُسی یہوواہ نال محبت کردے او تے جیہڑیاں چیزاں اوہنے توانوں دِتیاں نیں اوہناں لئی تُسی اوہدے شکرگزار او۔ ایہہ سارے کم خدا دی بندگی کرن چ شامل نیں تے یہوواہ ایہناں دی بڑی قدر کردا اے۔ (2-پطرس 3:11؛ عبرانیوں 13:15) جدوں اَسی اپنی مرضی تے خوشی نال یہوواہ نُوں کجھ دینے آں تے ایہدے توں اوہ بوہت خوش ہوندا اے۔ (2-کُرنتھیوں 9:7 تے غور کرو۔) تے اِنج کرن نال سانوں وی خوشی مِلدی اے۔
اپنے دل چ یہوواہ لئی محبت نُوں ودھاندے رہوو
17، 18. بپتسمہ لین دے لائق بنن لئی کیہڑی خوبی دا ہونا ضروری اے تے کیوں؟ (امثال 3:3-6)
17 جدوں تُسی بپتسمہ لین لئی اپنے آپ نُوں تیار کر رہے ہوندے او تے شاید توانوں بوہت ساریاں مشکلاں دا سامنا ہوئے۔ ہو سکدا اے کہ کجھ لوک تواڈے ایمان دی وجہ توں تواڈا مذاق اُڈان ایتھوں تک کہ تواڈی مخالفت کرن۔ (2-تیمُتھیُس 3:12) جدوں تُسی کسے بھیڑی عادت نُوں چھڈن دی کوشش کر رہے ہوندے او تے ہو سکدا اے کہ نہ چاہندیاں ہوئیاں وی تُسی اوس کم نُوں دُبارہ کر بیٹھو۔ یاں شاید تُسی ایہہ سوچ کے تنگ پے جاؤ کہ توانوں اپنے منصوبیاں نُوں پورا کرن چ بوہت وقت لگ رہیا اے۔ کیہڑی چیز تواڈی مدد کر سکدی اے کہ تُسی ہمت نہ ہارو؟ یہوواہ لئی تواڈی محبت۔
18 یہوواہ لئی تواڈی محبت کسے وی ہور خوبی توں زیادہ اہم اے۔ (امثال 3:3-6 نُوں پڑھو۔) ایس محبت دی وجہ توں تُسی زندگی دِیاں مشکلاں دا مقابلہ کامیابی نال کر سکو گے۔ بائبل توں پتہ چلدا اے کہ یہوواہ اپنے بندیاں نال اٹل محبت کردا اے۔ ایس محبت دی وجہ توں اوہ کدی وی اپنے بندیاں نُوں نئیں چھڈدا۔ (زبور 100:5) تُسی یہوواہ دی صورت تے بنے او۔ (پیدایش 1:26) تُسی اِنج دی محبت کیویں ظاہر کر سکدے او؟
تُسی ہر روز یہوواہ نُوں دَس سکدے او کہ تُسی اوہدے بڑے شکرگزار او۔ (پیراگراف نمبر 19 نُوں ویکھو۔) b
19. یہوواہ نے تواڈے لئی جو کجھ کیتا اے، تُسی اوہدے لئی شکرگزاری کیویں ظاہر کر سکدے او؟ (گلتیوں 2:20)
19 یہوواہ ورگی محبت ظاہر کرن دا اِک طریقہ ایہہ وے کہ اَسی اوہدے شکرگزار ہوئیے۔ (1-تھسلُنیکیوں 5:18) ہر روز اپنے آپ کولوں پچھو: ”یہوواہ نے میرے لئی محبت کیویں ظاہر کیتی اے؟“ فیر دُعا چ اوہناں کماں لئی یہوواہ نُوں شکریہ کہوو جیہڑے اوہنے تواڈے لئی کیتے نیں۔ اوہناں کماں تے غور کرو جنہاں توں ظاہر ہوندا اے کہ یہوواہ نے خاص طور تے تواڈے لئی محبت کیویں وکھائی اے۔ پولُس رسول وی ایس گل نُوں محسوس کردا سی۔ (گلتیوں 2:20 نُوں پڑھو۔) اپنے آپ کولوں پچھو: ”کیہہ مَیں بدلے چ یہوواہ لئی محبت ظاہر کرنا چاہنا واں؟“ یہوواہ لئی محبت تواڈی مدد کرے گی کہ تُسی ازمیشاں تے مشکلاں دا مقابلہ کامیابی نال کر سکو۔ ایہہ محبت تواڈے دل چ ایہہ خواہش پیدا کرے گی کہ تُسی باقاعدگی نال یہوواہ دی عبادت کرو تے ہر روز ایہہ ثابت کرو کہ تُسی اپنے اسمانی باپ نال محبت کردے او۔
20. اپنی زندگی یہوواہ دے ناں کرن لئی توانوں کیہہ کرنا پووے گا تے ایہہ ایناں اہم فیصلہ کیوں اے؟
20 وقت دے نال نال تواڈے دل چ یہوواہ لئی محبت اینی ودھ جائے گی کہ تُسی اِک خاص دُعا کرو گے جدے چ تُسی اپنی زندگی یہوواہ دے ناں کرو گے۔ یاد رکھو کہ جدوں تُسی اپنی زندگی یہوواہ دے ناں کردے او تے توانوں اِک بڑی شاندار امید مِلدی اے۔ تُسی ہمیشاں لئی یہوواہ دے ہو جاندے او۔ جدوں تُسی اپنی زندگی یہوواہ دے ناں کردے او تے تُسی اوہدے نال ایہہ وعدہ کردے او کہ تُسی ہر چنگے بھیڑے وقت چ اوہدی عبادت کرو گے۔ ایہہ وعدہ اِک ای وار کیتا جاندا اے۔ سچ اے کہ جدوں اَسی اپنی زندگی یہوواہ دے ناں کرنے آں تے اَسی اِک بوہت ای وڈا فیصلہ کر رہے ہُنے آں۔ پر ذرا ایس بارے سوچو کہ تُسی اپنی زندگی چ بوہت سارے فیصلے کرو گے۔ ایہناں وچوں کجھ بوہت اچھے ہون گے۔ پر اپنی زندگی یہوواہ دے ناں کرن توں بہتر فیصلہ ہور کوئی نئیں ہو سکدا۔ (زبور 50:14) شیطان پوری کوشش کرے گا کہ یہوواہ لئی تواڈی محبت ٹھنڈی پے جائے تے تُسی اوہدے نال بےوفائی کرو۔ شیطان نُوں جتن نہ دَوو۔ (ایوب 27:5) یہوواہ لئی محبت تواڈی مدد کرے گی کہ تُسی اوہدے نال کیتے ہوئے وعدے نُوں نبھاؤ تے اپنے اسمانی باپ دے نیڑے ہوندے جاؤ۔
21. اَسی کیوں کہہ سکنے آں کہ بپتسمہ اِک نویں سفر دی شروعات اے؟
21 جدوں تُسی اپنی زندگی یہوواہ دے ناں کر دیندے او تے اپنی کلیسیا دے بزرگاں نال بپتسمہ لین بارے گل کرو۔ یاد رکھو کہ بپتسمہ کوئی آخری قدم نئیں اے سگوں ایہدے توں تواڈی زندگی دے اِک ایہو جہے سفر دی شروعات ہوئے گی جدے چ تُسی ہمیشاں تک یہوواہ دی خدمت کردے رہوو گے۔ ایس لئی ہُن توں ای اپنے دل چ یہوواہ لئی محبت نُوں ودھاؤ۔ اپنے لئی کجھ منصوبے بناؤ تاکہ تواڈے دل چ اوہدے لئی محبت ودھدی جائے۔ یہوواہ لئی تواڈی محبت تواڈے دل چ ایہہ خواہش پیدا کرے گی کہ تُسی بپتسمہ لوَو۔ اوہ تواڈی زندگی دا یادگار دن ہوئے گا۔ پر ایہہ تے صرف شروعات اے۔ دُعا اے کہ تواڈے دل چ یہوواہ تے اوہدے پُتر لئی محبت ہمیشاں ودھدی جائے!
گیت نمبر 84: خدمت لئی ہر پل تیار
a جے اَسی بپتسمہ لینا چاہنے آں تے سانوں صحی نیت نال ایہدے وَل قدم ودھانا چاہی دا اے۔ ایہدے علاوہ سانوں اوہ کم وی کرنے چاہی دے نیں جیہڑے بپتسمہ لین لئی ضروری نیں۔ ایس مضمون چ اَسی حبشی خوجے دی مثال تے غور کر کے ایہہ ویکھاں گے کہ بائبل کورس کرن والے بندے نُوں بپتسمے دے لائق بنن لئی کیہڑے قدم چُکن دی لوڑ اے۔
b تصویر دی وضاحت: اِک جوان بھین دُعا چ یہوواہ نُوں دَس رہی اے کہ یہوواہ نے اوہدے لئی جو کجھ کیتا اے، اوہ اوہدے لئی بڑی شکرگزار اے۔