مطالعے دا مضمون نمبر 13
یہوواہ دِیاں بنائیاں ہوئیاں چیزاں دے ذریعے اپنے بچیاں نُوں اوہدے بارے سکھاؤ
ایہناں چیزاں دا خالق کون اے؟—یسعیاہ 40:26۔
گیت نمبر 11: تخلیق کردی خالق دی تمجید
مضمون تے اِک نظر a
1. ماں پیو دی کیہہ خواہش ہوندی اے؟
ماپیو، سانوں پتہ اے کہ تُسی چاہندے او کہ تواڈے بچے یہوواہ نُوں جانن تے اوہنوں پیار کرن۔ پر انسان خدا نُوں ویکھ نئیں سکدے تے فیر تُسی اپنے بچیاں نُوں ایہہ یقین کیویں دَوا سکدے او کہ اوہ واقعی ہے وے؟ نالے تُسی اوہدے نیڑے جان چ اوہناں دی مدد کیویں کر سکدے او؟—یعقوب 4:8۔
2. ماں پیو اپنے بچیاں نُوں یہوواہ دِیاں خوبیاں بارے کیویں سکھا سکدے نیں؟
2 تُسی اپنے بچیاں نُوں بائبل چوں تلیم دے کے اوہناں دی مدد کر سکدے او تاکہ اوہ یہوواہ دے نیڑے جان۔ (2-تیمُتھیُس 3:14-17) پر بائبل چ بچیاں نُوں یہوواہ بارے سکھان دا اِک ہور طریقہ وی دَسیا گیا اے۔ امثال دی کتاب چ اِک پیو نے اپنے پُتر نُوں نصیحت کیتی کہ اوہ یہوواہ دِیاں خوبیاں نُوں ہمیشاں یاد رکھے جیہڑیاں اوہدیاں بنائیاں ہوئیاں چیزاں توں نظر آندیاں نیں۔ (امثال 3:19-21) ایس مضمون چ اَسی غور کراں گے کہ ماں پیو کیہڑے طریقیاں نال اپنے بچیاں دی مدد کر سکدے نیں تاکہ اوہ یہوواہ دِیاں بنائیاں ہوئیاں چیزاں دے ذریعے اوہدیاں خوبیاں بارے سکھن۔
تُسی اپنے بچیاں نُوں کیویں سکھا سکدے او؟
3. ماں پیو کیہہ کر سکدے نیں؟
3 بائبل چ دَسیا گیا اے کہ بھانویں اَسی خدا نُوں نئیں ویکھ سکدے پر اوہدیاں خوبیاں اوہدیاں بنائیاں ہوئیاں چیزاں توں صاف صاف نظر آندیاں نیں۔ (رومیوں 1:20) ماپیو، توانوں اپنے بچیاں نال سیر کرنا ضرور پسند ہوئے گا۔ ایس وقت نُوں چنگی طرحاں استمال کرن لئی اپنے بچیاں دی ایہہ ویکھن چ مدد کرو کہ یہوواہ دِیاں بنائیاں ہوئیاں چیزاں توں اوہدیاں خوبیاں کیویں نظر آندیاں نیں۔ آؤ ویکھئے کہ ماں پیو ایس بارے یسوع دی مثال توں کیہہ سکھ سکدے نیں۔
4. یسوع نے خدا دِیاں بنائیاں ہوئیاں چیزاں دے ذریعے اپنے شاگرداں نُوں کیویں سکھایا؟ (لُوقا 12:24، 27-30)
4 اِک موقعے تے یسوع نے اپنے شاگرداں نُوں کہیا کہ اوہ کانواں تے جنگلی پُھلاں تے غور کرن۔ (لُوقا 12:24، 27-30 نُوں پڑھو۔) یسوع کسے وی جانور یاں پودے دا ذکر کر سکدا سی۔ پر اوہنے اوس پرندے تے پُھل دا ذکر کیتا جدے بارے اوہدے شاگرد جان دے سن۔ شاید یسوع گل کردے ہوئیاں ایہناں چیزاں وَل اشارہ کر رہیا سی جدی وجہ توں ہو سکدا اے کہ اوسے ویلے شاگرداں نے اسمان تے کانواں نُوں اُڈدے یاں زمین تے پُھلاں نُوں ویکھیا ہوئے۔ ایہہ مثالاں دین توں بعد یسوع نے کیہہ کیتا؟ اوہنے اپنے شاگرداں نُوں اِک زبردست گل دَسی کہ اوہدا اسمانی باپ کِنّاں مہربان تے وڈے دل والا اے۔ اوہنے کہیا کہ جیویں یہوواہ کانواں نُوں کھواندا اے تے پُھلاں نُوں سوہنے طریقے نال سجاندا اے اوسے طرحاں اوہ اپنے بندیاں دِیاں وی کھان پین تے کپڑے لتے دِیاں لوڑاں نُوں پورا کردا اے۔
5. ماں پیو اپنے بچیاں نُوں یہوواہ بارے سکھان لئی کیہڑیاں چیزاں دی مثال دے سکدے نیں؟
5 ماپیو، تُسی اپنے بچیاں نُوں یہوواہ بارے سکھان لئی یسوع دی مثال تے کیویں عمل کر سکدے او؟ تُسی اپنے بچیاں نُوں دَس سکدے او کہ توانوں یہوواہ دِیاں بنائیاں ہوئیاں چیزاں وچوں کیہہ پسند اے جیویں کہ کوئی جانور یاں پُھل۔ نالے اوہناں نُوں ایہہ وی دَسو کہ ایہناں توں اَسی یہوواہ بارے کیہہ سکھنے آں۔ تُسی اپنے بچیاں نُوں پچھ سکدے او کہ اوہناں نُوں کیہڑا جانور یاں پُھل پسند اے۔ جدوں تُسی اوہناں دی پسند دے جانور یاں پُھل نُوں استمال کر کے یہوواہ دِیاں خوبیاں بارے سکھاؤ گے تے فیر اوہ تواڈی گل دھیان نال سنن گے۔
6. اَسی بھرا کرسٹوفر دی امی توں کیہہ سکھ سکنے آں؟
6 کیہہ ماں پیو نُوں اپنے بچیاں نال گل کرن توں پہلاں اوس جانور یاں پُھل بارے بوہت کجھ پتا ہونا چاہی دا اے؟ نئیں، ایہہ ضروری نئیں اے۔ جدوں یسوع اپنے شاگرداں نال گل کر رہیا سی تے اوہنے ایس بارے بڑی لمی چوڑی گل نئیں کیتی کہ کاں کیویں کھاندے نیں تے جنگلی پُھل کیویں اُگدے نیں۔ ہو سکدا اے کہ تواڈے بچیاں نُوں یہوواہ دِیاں بنائیاں ہوئیاں چیزاں بارے گہرائی نال سکھن دا بڑا شوق ہووے پر فیر وی کدی کدار کوئی سادہ جہی گل یاں اِک جھوٹا جیہا سوال وی اوہناں نُوں کوئی گل سمجھان لئی کافی ہوندا اے۔ ذرا بھرا کرسٹوفر دی گل تے غور کرو۔ اوہنے اپنے بچپن بارے دَسیا: ”میری امی کسے سادہ جہی گل دے ذریعے میری تے میرے بھراواں دی مدد کردی سی تاکہ اَسی یہوواہ دِیاں بنائیاں ہوئیاں چیزاں دی ہور زیادہ قدر کریئے۔ مثال لئی، جدوں اَسی کسے پہاڑی علاقے چ جاندے ساں تے اوہ کہندی سی: ”ویکھو! ایہہ پہاڑ کِنّے اُچے تے سوہنے نیں! یہوواہ نے ایہناں نُوں کِنّے زبردست طریقے نال بنایا اے!“ یاں جدوں اَسی سمندر دے کنارے جانے ساں تے اوہ کہندی سی: ”ایہہ چھلاں کِنّیاں طاقتور نیں!تے فیر سوچو کہ یہوواہ کِنّاں طاقتور اے!““ بھرا کرسٹوفر نے ایہہ وی کہیا: ”ایہہ گلاں بڑیاں سادہ سن پر ایہناں دا ساڈے دل تے بڑا گُوڑھا اثر ہویا۔“
7. تُسی اپنے بچیاں نُوں کیویں سکھا سکدے او کہ اوہ یہوواہ دِیاں بنائیاں ہوئیاں چیزاں بارے سوچوچار کرن؟
7 جیویں جیویں تواڈے بچے وڈے ہوندے جاندے نیں تُسی اوہناں نُوں سکھا سکدے او کہ اوہ یہوواہ دِیاں بنائیاں ہوئیاں چیزاں بارے ہور زیادہ سوچن کہ ایہناں توں اوہ یہوواہ بارے کیہہ سکھ سکدے نیں۔تُسی کسے اِک چیز بارے گل کر کے اپنے بچیاں نُوں پچھ سکدے او کہ ”ایہدے توں تُسی یہوواہ بارے کیہہ سکھیا اے؟“ شاید تُسی ایہہ سُن کے حیران تے خوش ہووو کہ اوہ یہوواہ بارے کیہہ سوچدے نیں۔—متی 21:16۔
تُسی اپنے بچیاں نُوں کدوں سکھا سکدے او؟
8. سفر کردے ویلے اِسرائیلی ماں پیو کول کیہہ کرن دا موقع ہوندا سی؟
8 یہوواہ نے اِسرائیلی ماں پیو نُوں حکم دِتا سی کہ اوہ راہ ٹُردے اپنے بچیاں نُوں اوہدے قانوناں بارے سکھان۔ (اِستثنا 11:19) اِسرائیل چ سڑکاں دے آلے دوالے پِنڈ ہوندے سن تے اوتھوں لنگھدے ویلے لوکاں نُوں فرق فرق جانور، پرندے تے پُھل نظر آندے سن۔ ایس لئی سفر کردے ویلے ماں پیو کول اپنے بچیاں نُوں یہوواہ دِیاں بنائیاں ہوئیاں چیزاں بارے سکھان دا موقع ہوندا سی۔ شاید تواڈے کول وی اپنے بچیاں نال یہوواہ دِیاں بنائیاں ہوئیاں چیزاں بارے گل بات کرن دے ایہو جہے موقعے ہون۔ آؤ، غور کریئے کہ کجھ ماں پیو نے ایہو جہے موقعیاں توں کیویں فائدہ چُکیا اے۔
9. تُسی بھین پونیتھا تے بھین کاتیا توں کیہہ سکھیا اے؟
9 اِنڈیا دے اِک وڈے شہر چ رہن والی بھین پونیتھا نے کہیا: ”جدوں اَسی اپنے رشتےداراں نُوں مِلن پِنڈ جانے ساں تے اوہدوں ساڈے کول اپنے بچیاں نُوں یہوواہ دِیاں بنائیاں ہوئیاں چیزاں بارے سکھان دا بڑا ودھیا موقع ہوندا سی۔ مینوں لگدا اے کہ جدوں میرے بچے شہر دے شور شرابے والی زندگی تے ٹریفک توں دُور ہوندے نیں تے اوہدوں اوہ یہوواہ دِیاں بنائیاں ہوئیاں چیزاں تے زیادہ چنگی طرحاں غور کر پاندے نیں۔“ ماپیو، شاید تواڈے بچے اوہ ویلا کدی نہ بُھلن جیہڑا اوہناں نے تواڈے نال کسے خوبصورت جگہ تے گزاریا سی۔ مالڈووا چ رہن والی بھین کاتیا نے کہیا: ”مینوں اپنے بچپن دا اوہ وقت حالے تک یاد اے جدوں میں اپنے ماں پیو نال پِنڈ جانی ساں۔ مَیں اوہناں دی بڑی شکرگزار آں کہ اوہناں نے مینوں چھوٹی عمر توں ای ایہہ سکھایا اے کہ میں تھوڑی دیر رُک کے یہوواہ دِیاں بنائیاں ہوئیاں چیزاں تے غور کراں تے ویکھاں کہ مَیں ایہناں توں یہوواہ بارے کیہہ سکھنی آں۔“
شہر چ رہندے ہوئیاں وی تُسی اپنے بچیاں نُوں یہوواہ دِیاں بنائیاں ہوئیاں چیزاں دے ذریعے اوہدے بارے سکھا سکدے او۔ (پیراگراف نمبر 10 نُوں ویکھو۔)
10. جے ماں پیو لئی اپنے بچیاں نُوں کسے پِنڈ وغیرہ کھڑنا مشکل اے تے اوہ کیہہ کر سکدے نیں؟ (بکس ” ماںپیو لئی مشورے“ نُوں ویکھو۔)
10 جے تواڈے لئی کسے پِنڈ جانا ممکن نئیں اے تے تُسی کیہہ کر سکدے او؟ اِنڈیا چ رہن والے اِک بھرا امول نے کہیا: ”مَیں جیہڑی جگہ تے رہنا واں، اوتھے ماں پیو نُوں کئی کئی گھنٹے کم کرن پیندا اے تے کسے پِنڈ جان چ بڑا خرچہ ہوندا اے۔ پر کسے چھوٹے جہے پارک چ جا کے یاں اپنے گھر دی چھت تے جا کے وی تُسی یہوواہ دِیاں بنائیاں ہوئیاں بوہت ساریاں چیزاں نُوں ویکھ سکدے او تے اوہدیاں خوبیاں تے گل بات کر سکدے او۔“ جے تُسی غور کرو تے تواڈے گھر دے آلے دوالے ای یہوواہ دِیاں بنائیاں ہوئیاں بوہت ساریاں چیزاں نیں جیہڑیاں تُسی اپنے بچیاں نُوں وکھا سکدے او۔ (زبور 104:24) شاید توانوں پرندے، کیڑے مکوڑے، پُھل یاں کوئی ہور چیز نظر آئے۔ جرمنی چ رہن والی اِک بھین کرینہ نے کہیا: ”میری امی نُوں پُھل بڑے پسند نیں۔ جدوں مَیں چھوٹی ساں تے اوہدے نال کِتے جا رہی ہنی ساں تے اوہ اکثر مینوں سوہنے سوہنے پُھل وکھاندی ہوندی سی۔“ ماپیو، ساڈی تنظیم دِیاں ویڈیوز، کتاباں تے رسالیاں دے ذریعے وی تُسی اپنے بچیاں نُوں یہوواہ دِیاں بنائیاں ہوئیاں چیزاں بارے سکھا سکدے او۔ بھانویں تواڈے حالات جیہو جہے وی ہون، تُسی اپنے بچیاں دی مدد کر سکدے او۔ آؤ، یہوواہ دی کجھ ایہو جہیاں خوبیاں تے گل کریئے جنہاں بارے تُسی اپنے بچیاں نُوں دَس سکدے او۔
یہوواہ دِیاں خوبیاں صاف صاف نظر آندیاں نیں
11. یہوواہ دی محبت بارے دَسن لئی ماں پیو کیہہ کر سکدے نیں؟
11 تُسی اپنے بچیاں دا دھیان جانوراں تے دَوا سکدے او کہ اوہ اپنے بچیاں دی دیکھبھال کِنّے پیار نال کردے نیں۔ اِنج تواڈے بچے یہوواہ دی محبت نُوں محسوس کر سکن گے۔ (متی 23:37) تُسی اوہناں نُوں ایہہ وی دَسو کہ یہوواہ نے کِنّیاں فرق فرق چیزاں بنائیاں نیں تاکہ اَسی خوش رہیے۔ بھین کرینہ نے ایہہ وی کہیا: ”جدوں اَسی سیر کرن جانے ساں تے میری امی مینوں کہندی سی کہ مَیں تھوڑی دیر رُک کے غور کراں کہ یہوواہ نے ہر پُھل نُوں کِنّاں سوہنا بنایا اے تے ایہدے توں یہوواہ دی محبت نظر آندی اے۔ ایس گل نُوں کئی سال ہو گئے پر اَج وی جدوں مَیں پُھلاں نُوں ویکھنی آں تے مَیں ایس گل تے غور کرنی آں کہ کِنّے فرق فرق پُھل نیں تے ایہناں دے رنگ کِنّے سوہنے نیں۔ ایہناں نُوں ویکھ کے میرا یقین ودھدا اے کہ یہوواہ سانوں کِنّاں پیار کردا اے۔“
اپنے بچیاں نُوں یہوواہ دی حکمت بارے سکھان لئی تُسی اوہناں نُوں دَس سکدے او کہ یہوواہ نے انساناں دے جسم نُوں کِنّے زبردست طریقے نال بنایا اے۔ (پیراگراف نمبر 12 نُوں ویکھو۔)
12. یہوواہ دی حکمت بارے دَسن لئی ماں پیو کیہہ کر سکدے نیں؟ (زبور 139:14) (تصویر نُوں وی ویکھو۔)
12 یہوواہ ساڈے نالوں کِتے زیادہ حکمت والا اے۔ اپنے بچیاں دی مدد کرو تاکہ اوہ یہوواہ دِیاں بنائیاں ہوئیاں چیزاں چ اوہدی حکمت نُوں ویکھ سکن۔ (رومیوں 11:33) مثال لئی، تُسی اپنے بچیاں نُوں دَس سکدے او کہ پانی کیویں بھاپ بن کے اُڈ جاندا اے تے ایہدے نال بدّل بن دے نیں تے فیر ایہہ بدّل پانی نُوں اِک جگہ توں دُوجی جگہ لے جاندے نیں۔ (ایوب 38:36، 37) تُسی اوہناں نُوں ایہہ وی دَس سکدے او کہ یہوواہ نے ساڈے جسم نُوں کِنّے حیران کر دین والے طریقے نال بنایا اے۔ (زبور 139:14 نُوں پڑھو۔) ایس سلسلے چ اِک بھرا دی گل تے غور کرو جدا ناں ولادمیر اے۔ اوہ کہندا اے: ”اِک دن میرا پُتر اپنی سائیکل توں ڈِگ پیا تے اوہنوں سٹ لگ گئی۔ کجھ دِناں بعد اوہدی سٹ اپنے آپ ٹھیک ہو گئی۔ مَیں تے میری بیوی نے اوہنوں دَسیا کہ یہوواہ نے ساڈے جسم چ ایہہ صلاحیت رکھی اے کہ ساڈے زخم اپنے آپ بھر جاندے نیں۔ اَسی اوہدا دھیان ایس گل تے دَوایا کہ انساناں دی بنائی ہوئی کسے وی چیز چ ایہہ صلاحیت نئیں اے۔ مثال لئی، جدوں کسے گڈی دا ایکسیڈنٹ ہوندا اے تے اوہ اپنے آپ ٹھیک نئیں ہوندی۔ ایس گل توں ساڈا پُتر ایہہ سمجھ گیا کہ یہوواہ کِنّاں حکمت والا اے۔“
13. یہوواہ دی طاقت بارے دَسن لئی ماں پیو کیہہ کر سکدے نیں؟ (یسعیاہ 40:26)
13 یہوواہ چاہندا اے کہ اَسی اسمان وَل ویکھ کے اوہدی زبردست طاقت بارے سوچئے کیونکہ اوہنے پوری کائنات نُوں اپنی جگہ تے قائم رکھیا ہویا اے۔ (یسعیاہ 40:26 نُوں پڑھو۔) تُسی اپنے بچیاں نُوں کہہ سکدے او کہ اوہ اسمان وَل ویکھ کے یہوواہ دی طاقت بارے سوچن۔ تائیوان چ رہن والی اِک بھین نے اپنے بچپن بارے کہیا: ”اِک وار میری امی مینوں شہر توں دُور پکنک تے لے گئی تے رات نُوں اَسی تاریاں نال بھرے ہوئے اسمان نُوں ویکھیا۔ اوہدوں مَیں بڑی پریشان ساں کیونکہ سکول دے بچے مینوں غلط کم کرن تے مجبور کر رہے سن۔ ایس لئی مینوں ڈر سی کہ پتہ نئیں مَیں یہوواہ دی وفادار رہ سکاں گی یاں نئیں۔ میری امی نے مینوں کہیا کہ مَیں ایس بارے سوچاں کہ یہوواہ نے کِنّی طاقت نال ایہناں تاریاں نُوں بنایا اے تے یاد رکھاں کہ یہوواہ مینوں وی ہر ازمیش دا سامنا کرن دی طاقت دے سکدا اے۔ اوس موقعے تے یہوواہ دِیاں بنائیاں ہوئیاں چیزاں تے غور کرن نال مَیں یہوواہ نُوں ہور چنگی طرحاں جان پائی تے میرا ایہہ ارادہ ہور مضبوط ہویا کہ مَیں ہمیشاں اوہدی وفادار رہواں گی۔“
14. ماں پیو اپنے بچیاں دی مدد کیویں کر سکدے نیں تاکہ اوہ ویکھ سکن کہ یہوواہ خوشدل خدا اے؟
14 یہوواہ دِیاں بنائیاں ہوئیاں چیزاں توں صاف صاف پتہ چلدا اے کہ اوہ خوشدل خدا اے۔ سائنسداناں نے ویکھیا اے کہ بوہت سارے جانور، پرندے تے مچھیاں کھیڈنا پسند کردے نیں۔ (ایوب 40:20) کیہہ تواڈے بچے جانوراں نُوں کھیڈدیاں ویکھ کے ہسدے نیں؟ شاید اوہناں نے کتے یاں بلی دے بچیاں نُوں کسے گیند نال کھیڈ دے یاں آپس چ مستیاں کردے ہوئیاں ویکھیا ہووے۔ اگلی وار جدوں تُسی اپنے بچیاں نُوں جانوراں دِیاں ایہو جہیاں حرکتاں تے ہسدیاں ویکھو تے اوہناں نُوں ایہہ یاد دَوانا کہ اَسی جیس خدا دی عبادت کرنے آں، اوہ خوش رہن والا خدا اے۔—1-تیمُتھیُس 1:11۔
خاندان دے طور تے یہوواہ دِیاں بنائیاں ہوئیاں چیزاں توں خوشی حاصل کرو
جدوں تُسی اپنے بچیاں نال کِتے باہر جاندے او تے اوہناں لئی تواڈے نال کُھل کے گل کرنا اسان ہوندا اے۔ (پیراگراف نمبر 15 نُوں ویکھو۔)
15. بچیاں دے دل دی گل جانن لئی ماں پیو کیہہ کر سکدے نیں؟ (امثال 20:5) (تصویر نُوں وی ویکھو۔)
15 کدی کدار ماں پیو لئی اپنے بچیاں نال مسئلیاں تے گل کرنا مشکل ہو سکدا اے۔ جے تواڈے نال اِنج اے تے سوال پچھ کے اپنے بچیاں دے دل دی گل جانن دی کوشش کرو۔ (امثال 20:5 نُوں پڑھو۔) کجھ ماں پیو نُوں ایہو جہے ماحول چ اپنے بچیاں نال گل کرنا آسان لگدا اے جدوں اوہ کِتے باہر ہوندے نیں کیونکہ اوہناں دا دھیان نئیں بھٹک دا۔ ایہدی اِک ہور وجہ تائیوان چ رہن والے اِک پیو نے دَسی۔ اوہنے کہیا: ”ساڈے بچے بڑے خوش ہوندے نیں جدوں اَسی اوہناں نال سیر کرن لئی پہاڑی علاقے یاں سمندر تے جانے آں۔ ایہو جہے ماحول چ ساڈے لئی ایہہ جاننا زیادہ آسان ہوندا اے کہ اوہناں دے ذہن چ کیہہ چل رہیا اے۔“ بھین کاتیا جدا پہلاں وی ذکر ہویا اے، کہندی اے: ”سکول دی چھٹی ہون توں بعد میری امی مینوں اِک بوہت ای سوہنے باغ چ لے کے جاندی سی۔ اوتھے بڑا سکون ہوندا سی ایس لئی میں آسانی نال اوہناں نُوں دَس سکنی ساں کہ مینوں سکول چ کیہڑے مسئلیاں دا سامنا ہو رہیا اے۔“
16. اِک خاندان کیہہ کر سکدا اے تاکہ اوہنوں یہوواہ دِیاں بنائیاں ہوئیاں چیزاں توں خوشی ملے تے مزہ آئے؟
16 جدوں اِک خاندان مِل کے یہوواہ دِیاں بنائیاں ہوئیاں چیزاں تے غور کردا اے تے اوہناں نُوں خوشی مِلدی اے تے مزہ وی آندا اے۔ نالے اِنج آپس چ اوہناں دی محبت وی ودھدی اے۔ بائبل چ دَسیا گیا اے کہ ہسن دا اِک وقت اے تے نچن دا اِک وقت اے۔ (واعظ 3:1، 4) یہوواہ نے زمین تے ایہو جہیاں کئی سوہنیاں سوہنیاں تھانواں بنائیاں نیں جتھے جا کے سانوں مزہ آندا اے۔ کجھ خانداناں نُوں پِنڈاں، پہاڑی علاقیاں یاں سمندر تے جانا چنگا لگدا اے۔ کجھ بچیاں نُوں پارک چ کھیڈنا، جانوراں نُوں ویکھنا یاں نہر چ یاں سمندر چ نہانا پسند ہوندا اے۔ اَسی یہوواہ دے بڑے شکرگزار آں کہ اوہنے ایہو جہیاں چیزاں بنائیاں نیں جنہاں توں ساڈا دل خوش ہوندا اے۔
17. ماں پیو نُوں اپنے بچیاں دی مدد کیوں کرنی چاہی دی اے تاکہ اوہ یہوواہ دی کاریگری توں خوشی حاصل کرن؟
17 نوِیں دُنیا چ ماں پیو تے بچیاں کول خدا دِیاں بنائیاں ہوئیاں چیزاں توں فائدہ حاصل کرن دے بڑے موقعے ہون گے۔ اوس ویلے نہ سانوں جانوراں توں ڈر لگے گا تے نہ ای اوہ ساڈے توں ڈرن گے۔ (یسعیاہ 11:6-9) یہوواہ دِیاں بنائیاں ہوئیاں چیزاں توں خوشی حاصل کرن لئی ساڈے کول بڑا وقت ہوئے گا۔ (زبور 22:26) پر ماپیو، اوس وقت دے اِنتظار چ بیٹھے نہ رہوو۔ جے تُسی ہُن توں ای ایہناں چیزاں دے ذریعے اپنے بچیاں نُوں یہوواہ بارے سکھاؤ گے تے اوہ وی اوہی گل کہہ سکن گے جیہڑی بادشاہ داؤد نے کہی: اَے یہوواہ، تیری کاریگری بےمثال اے۔—زبور 86:8۔
گیت نمبر 134: بچے خدا دی امانت نیں
a بوہت سارے بھین بھرا اوس وقت نُوں بڑی خوشی نال یاد کردے نیں جدوں اوہ اپنے امیابو نال یہوواہ دِیاں بنائیاں ہوئیاں چیزاں تے غور کردے سن۔ اوہناں نُوں حالے تک یاد اے کہ کیویں اوہناں دے امیابو فرق فرق موقعیاں تے اوہناں نُوں یہوواہ بارے سکھاندے سن۔ جے تُسی ماں پیو او تے تُسی اپنے بچیاں نُوں یہوواہ دِیاں بنائیاں ہوئیاں چیزاں دے ذریعے اوہدیاں خوبیاں بارے کیویں سکھا سکدے او؟ ایس مضمون چ ایسے سوال تے گل کیتی جائے گی۔