1، 2.‏ بپتسمہ لین توں بعد سانوں کیہڑیاں برکتاں مِلدیاں نیں؟‏

 جدوں اَسی بپتسمہ لینے آں تے اَسی یہوواہ دے خاندان دا حصہ بن جانے آں تے سانوں بڑی خوشی ہوندی اے۔ جیہڑے لوک بپتسمہ لے چُکے نیں اوہ داؤد ورگے جذبات رکھدے نیں، جنہے کہیا:‏ خوش اے اوہ انسان جنہوں یہوواہ چُن دا اے تے اپنے نیڑے لیاندا اے تاکہ اوہ اوہدے گھر دے ویہڑیاں چ وَسے۔—‏زبور 65:‏4‏۔‏

² یہوواہ ہر کسے نُوں اپنے خاندان چ شامل نئیں کردا۔ جیویں کہ اَسی پچھلے مضمون چ سکھیا سی کہ یہوواہ صرف اوہناں دے نیڑے جاندا اے جیہڑے ثابت کردے نیں کہ اوہ اوہدے دوست بننا چاہندے نیں۔ (‏یعقوب 4:‏8‏)‏ ہُن تُسی اپنی زندگی یہوواہ دے ناں کر کے بپتسمہ لے لیا اے ایس لئی تواڈا اوہدے نال اِک خاص رشتہ بن گیا اے۔ تُسی ایہہ یقین رکھ سکدے او کہ یہوواہ تواڈے اُتے اینیاں برکتاں ورسائے گا کہ توانوں کسے چیز دی کمی نئیں ہوئے گی۔—‏ملاکی 3:‏10؛‏ یرمیاہ 17:‏7، 8‏۔‏

3‏.‏ بپتسمہ لین توں بعد تواڈی کیہہ ذمے‌داری اے؟ (‏واعظ 5:‏4، 5‏)‏

³ بپتسمہ تے بس شروعات اے۔ بپتسمہ لین توں بعد تواڈے دل چ ایہہ خواہش پیدا ہوئے گی کہ تُسی اپنی زندگی یہوواہ دے ناں کرن دے وعدے تے پورا اُترو، اوس ویلے وی جدوں توانوں مشکلاں یاں غلط کم کرن دی ازمیش دا سامنا کرنا پیندا اے۔ ‏(‏واعظ 5:‏4، 5 نُوں پڑھو۔)‏ یسوع دے شاگرداں دے طور تے توانوں اوہدی مثال تے اوہدے حکماں تے جِنّاں زیادہ ہو سکے، عمل کرنا اے۔ (‏متی 28:‏19، 20؛‏ 1-‏پطرس 2:‏21‏)‏ ایہہ مضمون اِنج کرن چ تواڈی مدد کرے گا۔‏

 مشکلاں تے ازمیشاں دے باوجود یسوع دے پچھے چلدے رہوو

4.‏ یسوع دے شاگرد کیس لحاظ نال اپنی سُولی چُک دے نیں؟ (‏لُوقا 9:‏23‏)‏

⁴ بپتسمہ لین توں بعد تواڈی زندگی چ مشکلاں آنا بند نئیں ہو جان گیاں سگوں یسوع نے تے صاف صاف دَسیا سی کہ اوہدے شاگرداں نُوں ہر روز اپنی سُولی چُکنی پووے گی۔ ‏(‏لُوقا 9:‏23 نُوں پڑھو۔)‏ کیہہ یسوع دی گل دا ایہہ مطلب سی کہ اوہدے شاگرداں نُوں ہر ویلے مشکلاں دا سامنا کرنا پووے گا؟ جی نئیں۔ ایہدی بجائے یسوع ایہہ کہہ رہیا سی کہ اوہناں نُوں برکتاں مِلن دے نال نال کجھ مشکلاں دا وی سامنا کرنا پووے گا۔ ایہناں وچوں کجھ مشکلاں تے شاید بڑیاں ای تکلیف‌دہ ہون۔—‏2-‏تیمُتھیُس 3:‏12‏۔‏

5.‏ یسوع نے اوہناں لوکاں نال کیہہ وعدہ کیتا جیہڑے یہوواہ دی خدمت کرن لئی قربانیاں دیندے نیں؟‏

⁵ شاید تُسی پہلے توں ای اپنے گھر والیاں دی مخالفت دا سامنا کر رہے او۔ یاں شاید تُسی خدا دی بادشاہی نُوں اپنی زندگی چ سب توں زیادہ اہمیت دین لئی زیادہ پیسے کمان دے موقعیاں تے اسائشاں نُوں قربان کر دِتا اے۔ (‏متی 6:‏33‏)‏ جے تُسی اِنج کیتا اے تے تُسی پورا یقین رکھ سکدے او کہ یہوواہ تواڈیاں ایہناں قربانیاں دی بڑی قدر کردا اے۔ (‏عبرانیوں 6:‏10‏)‏ شاید تُسی وی یسوع دی ایس گل دا تجربہ کیتا ہوئے:‏ ”‏جنہے وی میری خاطر تے خوش‌خبری دی خاطر گھر یاں زمیناں یاں بھراواں یاں بھیناں یاں ماں یاں پیو یاں بچیاں نُوں چھڈیا اے اوہنوں ایس زمانے چ سو گُنا زیادہ ملے گا۔ اوہنوں گھر، بھرا، بھیناں، مانواں، بچے تے زمیناں مِلن گیاں۔ پر ایہدے نال نال اوہدے تے ظلم وی ہوئے گا۔ نالے آن والے زمانے چ اوہنوں ہمیشاں دی زندگی ملے گی۔“‏ (‏مرقس 10:‏29، 30‏)‏ یقیناً تُسی جیہڑیاں قربانیاں دِتیاں نیں، اوہناں دے بدلے توانوں کِتے زیادہ برکتاں وی مِلیاں نیں۔—‏زبور 37:‏4‏۔‏

6.‏ بپتسمہ لین توں بعد وی توانوں جسم دِیاں خواہشاں نال لڑن دی لوڑ کیوں ہوئے گی؟‏

⁶ عیب‌دار ہون دی وجہ توں توانوں بپتسمے توں بعد وی جسم دِیاں خواہشاں نال لڑنا پئے گا۔ (‏1-‏یوحنا 2:‏16‏)‏ شاید تُسی کدی کدار پولُس وانگوں محسوس کرو، جنہے کہیا:‏ مَیں دل توں تے خدا دی شریعت نُوں بڑا پسند کرنا واں۔ پر میرے جسم چ اِک ہور شریعت اے جیہڑی میرے ذہن دی شریعت نال جنگ لڑدی اے۔ ایہہ مینوں اوس گُناہ دی شریعت دا غلام بنا دیندی اے جیہڑی میرے جسم دے اندر اے۔ (‏رومیوں 7:‏22، 23‏)‏ شاید تُسی ایس گل توں بے‌حوصلہ ہو جاؤ کہ توانوں وار وار اپنیاں غلط خواہشاں نال لڑنا پیندا اے۔ پر جدوں تُسی یہوواہ نال کیتے اپنے وعدے بارے سوچو گے تے غلط خواہشاں نال لڑن دا تواڈا عزم مضبوط ہو جائے گا۔ سچ تے ایہہ وے کہ جدوں توانوں غلط کم کرن دی ازمیش دا سامنا کرنا پیندا اے تے یہوواہ نال کیتا وعدہ تواڈی زندگی نُوں اسان بنا دیندا اے۔ پر کیویں؟‏

7.‏ اپنی زندگی یہوواہ دے ناں کرن نال توانوں ایہہ مدد کیویں ملے گی کہ تُسی اوہدے وفادار رہوو؟‏

⁷ جدوں تُسی اپنی زندگی یہوواہ دے ناں کر دیندے او تے تُسی اپنے لئی جینا چھڈ دیندے او۔ ایہدا مطلب اے کہ تُسی ایہو جہے کماں تے ایہو جہیاں خواہشاں نُوں رَد کر دیندے او جنہاں توں یہوواہ ناراض ہو سکدا اے۔ (‏متی 16:‏24‏)‏ ایس لئی جدوں توانوں کسے غلط کم نُوں کرن دی ازمیش دا سامنا ہوئے گا تے توانوں سوچنا نئیں پئے گا کہ ہُن توانوں کیہہ کرن دی لوڑ اے کیونکہ تُسی پہلے ای سارے غلط کم کرن دے دروازے بند کر لئے نیں۔ نالے تُسی پکا ارادہ کر لیا اے کہ تُسی ہر حال چ یہوواہ دے وفادار رہوو گے۔ اِنج تواڈا ایہہ عزم مضبوط رہوے گا کہ تُسی یہوواہ نُوں خوش کرو۔ ایس لحاظ نال تُسی ایوب وانگوں ہووو گے۔ اوہنے سخت توں سخت مشکلاں دا سامنا کردے ویلے وی کہیا:‏ مَیں اپنی وفاداری نئیں چھڈاں گا۔—‏ایوب 27:‏5‏۔‏

8.‏ یہوواہ نال کیتے اپنے وعدے تے غور کرن نال توانوں غلط کماں توں بچن چ مدد کیویں ملے گی؟‏

⁸ یہوواہ نال کیتے اپنے وعدے تے غور کرن نال توانوں غلط کماں توں بچن دی ہمت ملے گی۔ مثال لئی، کیہہ تُسی کسے شادی‌شُدہ بندے نال دل‌لگی کرو گے؟ بالکل نئیں کیونکہ تُسی پہلاں توں ای یہوواہ نال ایہہ وعدہ کیتا اے کہ تُسی اِنج دے کم نئیں کرو گے۔ تُسی اپنے دل چ غلط خواہشاں  آن ای نئیں دَوو گے، ایس لئی توانوں بعد چوں ایہناں نال لڑن دی وی لوڑ نئیں پووے گی۔ اِنج تُسی بھیڑے لوکاں دی راہ توں اپنا مُونہہ موڑ لوو گے تے بوہت ساریاں پریشانیاں توں بچ جاؤ گے۔—‏اَمثال 4:‏14، 15‏۔‏

9.‏ یہوواہ نال کیتے اپنے وعدے تے غور کر کے توانوں ایہہ مدد کیویں ملے گی کہ تُسی اوہدی خدمت نُوں سب توں زیادہ اہمیت دَوو؟‏

⁹ جے توانوں کوئی ایہو جہی نوکری مِل رہی ہووے جدی وجہ توں تواڈے لئی عبادتاں تے جانا مشکل ہو جائے گا تے تُسی کیہہ کرو گے؟ تُسی پہلے ای ایہہ فیصلہ کر چُکے او کہ تُسی ایہو جہی کوئی نوکری نئیں کرو گے جدی وجہ توں تواڈے لئی یہوواہ دی خدمت کرنا مشکل ہوئے۔ ایس لئی توانوں ایہہ سوچنا نئیں پووے گا کہ تُسی ایس نوکری دے نال نال یہوواہ دی خدمت نُوں سب توں زیادہ اہمیت کیویں دے سکدے او۔ یسوع دی مثال تے غور کرن نال وی توانوں بوہت مدد ملے گی۔ اوہنے پکا عزم کیتا ہویا سی کہ اوہ اپنے باپ دا دل خوش کرے گا۔ اوہدے وانگوں اَسی وی ہر ایہو جہی چیز نُوں فوراً رَد کر دینے آں جدی وجہ توں یہوواہ ناراض ہو سکدا اے۔—‏متی 4:‏10؛‏ یوحنا 8:‏29‏۔‏

10.‏ یہوواہ تواڈی مدد کیویں کرے گا کہ تُسی بپتسمے دے بعد وی یسوع دے پچھے چلدے رہوو؟‏

¹⁰ جدوں تواڈے تے مشکلاں تے ازمیشاں آندیاں نیں تے توانوں ایہہ ثابت کرن دا موقع مِلدا اے کہ تُسی یسوع دے پچھے پچھے چلنا چاہندے او۔ تُسی پورا یقین رکھ سکدے او کہ اِنج کرن چ یہوواہ تواڈی مدد کرے گا۔ بائبل چ دَسیا گیا اے:‏ خدا وعدے دا پکا اے، اوہ توانوں کسے ایہو جہی ازمیش چ نئیں پین دَوے گا جیہڑی تواڈی برداشت توں باہر ہوئے سگوں اوہ ازمیش دے نال نال کوئی نہ کوئی راہ وی کڈھے گا تاکہ تُسی ایہدا مقابلہ کر سکو۔—‏1-‏کُرنتھیوں 10:‏13‏۔‏

تُسی یسوع دے پچھے پچھے کیویں چل سکدے او؟‏

11.‏ یسوع دے پچھے چلن دا سب توں ودھیا طریقہ کیہہ اے؟ (‏تصویر نُوں وی ویکھو۔)‏

¹¹ یسوع نے پورے دل نال یہوواہ دی خدمت کیتی تے اوہ اوہدے نیڑے رہن لئی دُعا کردا رہیا۔ (‏لُوقا 6:‏12‏)‏ بپتسمہ لین توں بعد یسوع دے پچھے پچھے چلن دا اِک ودھیا طریقہ ایہہ وے کہ تُسی اوہ سارے کم کردے  رہوو جنہاں دے ذریعے تُسی یہوواہ دے نیڑے رہ سکدے او۔ بائبل چ دَسیا گیا اے:‏ اَسی جِنّی وی ترقی کیتی اے، آؤ اَگے ودھدے رہیے۔ (‏فِلپّیوں 3:‏16‏)‏ تُسی اکثر ایہو جہے بھین بھراواں دے تجربے سُنو گے جنہاں نے یہوواہ دی ہور زیادہ خدمت کرن دا فیصلہ کیتا۔ شاید اوہ بادشاہی دے مُناداں لئی سکول چ گئے یاں ایہو جہے علاقیاں چ چلے گئے جتھے زیادہ مبشراں دی لوڑ سی۔ جے تُسی وی ایہو جہے منصوبے بنا سکدے او تے ضرور بناؤ کیونکہ یہوواہ دے بندے اوہدی زیادہ توں زیادہ خدمت کرن دی خواہش رکھدے نیں۔ (‏اعمال 16:‏9‏)‏ پر جے تُسی حالے ایہہ سب نئیں کر سکدے تے فیر ایہہ نہ سوچو کہ تُسی اوہناں بھین بھراواں نالوں گھٹ او۔ زیادہ ضروری ایہہ وے کہ تُسی اپنی دوڑ جاری رکھو یعنی اپنے ایمان تے ڈٹے رہوو۔ (‏متی 10:‏22‏)‏ کدی نہ بھلو کہ جے تُسی اپنے حالات مطابق یہوواہ دی خدمت چ اوہ سب کجھ کردے او، جو تُسی کر سکدے او تے یہوواہ ایہدے توں بڑا خوش ہوندا اے۔ تے ایہہ بپتسمہ لین توں بعد یسوع دے پچھے چلن دا اِک بڑا اہم طریقہ اے۔—‏زبور 26:‏1‏۔‏

12، 13.‏ جے توانوں لگدا اے کہ یہوواہ دی خدمت چ تواڈا جوش ٹھنڈا پے گیا اے تے تُسی کیہہ کر سکدے او؟ (‏1-‏کُرنتھیوں 9:‏16، 17‏)‏ (‏ایس بکس نُوں وی ویکھو:‏ ‏”‏ دوڑ چ دوڑدے رہوو۔‏‏“‏‏)‏

¹² جے توانوں لگدا اے کہ ہُن تُسی دلوں دُعا نئیں کردے یاں توانوں مُنادی کرن چ پہلے جِنّاں مزہ نئیں آندا یاں بائبل پڑھن توں پہلے جِنّی خوشی نئیں مِلدی تے تُسی کیہہ کر سکدے او؟ جے توانوں بپتسمے توں بعد ایہناں وچوں کسے صورتحال دا سامنا ہوندا اے تے توانوں ایہہ نئیں سوچنا چاہی دا کہ ہُن یہوواہ توانوں پاک روح نئیں دے رہیا۔ عیب‌دار ہون دی وجہ توں اِک مسیحی دا جوش گھٹ ودھ ہو سکدا اے۔ جے توانوں محسوس ہوندا اے کہ تواڈا جوش ٹھنڈا پے رہیا اے تے پولُس رسول دی مثال تے غور کرو۔ بھانویں کہ اوہ وی یسوع دی مثال تے عمل کرن دی پوری کوشش کردا سی پر کدی کدار اوہدا اوہ کم کرن تے دل نئیں کردا سی جیہڑے ضروری نیں۔ ‏(‏1-‏کُرنتھیوں 9:‏16، 17 نُوں پڑھو۔)‏ اوہنے کہیا:‏ جے ایہہ کم مَیں اپنی مرضی دے خلاف وی کرنا واں تے فیر وی مینوں ایہہ کم کرن دی ذمے‌داری دِتی گئی اے۔ ایہدا مطلب اے کہ بھانویں کہ پولُس نُوں وقتی  طور تے لگدا سی کہ اوہدا جوش ٹھنڈا پے گیا اے پر فیر وی اوہنے اپنی خدمت نُوں پورا کیتا۔‏

¹³ ایسے طرحاں اپنے جذبات دی بنیاد تے ایہہ نہ سوچ لوو کہ ہُن تُسی یہوواہ دی خدمت نئیں کر سکدے۔ سگوں پکا عزم کرو کہ بھانویں توانوں لگے وی کہ تواڈا جوش ٹھنڈا پے گیا اے پر فیر وی تُسی صحی کم کردے رہوو گے۔ ایس لئی ذاتی مطالعیا کردے رہوو، باقاعدگی نال دُعا کرو، عبادتاں تے جاندے رہوو تے مُنادی کردے رہوو۔ جدوں تُسی ایہہ کم کردے رہوو گے تے تواڈا جوش وی پہلے نالوں ودھ جائے گا۔ اِنج توانوں بپتسمہ لین توں بعد یسوع دے پچھے چلن چ مدد ملے گی تے توانوں ویکھ کے تواڈے ہم‌ایماناں نُوں وی حوصلہ ملے گا۔—‏1-‏تھسلُنیکیوں 5:‏11‏۔‏

اپنا جائزہ لیندے رہوو تے اپنے آپ نُوں پرکھدے رہوو

14.‏ توانوں کیہڑی گل دا جائزہ لیندے رہنا چاہی دا اے تے کیوں؟ (‏2-‏کُرنتھیوں 13:‏5‏)‏

¹⁴ بپتسمے توں بعد باقاعدگی نال اپنا جائزہ لین نال توانوں بڑا فائدہ ہوئے گا۔ ‏(‏2-‏کُرنتھیوں 13:‏5 نُوں پڑھو۔)‏ تھوڑے تھوڑے عرصے بعد ایس گل دا جائزہ لیندے رہوو کہ کیہہ تُسی ہر روز دُعا کردے او، بائبل پڑھدے تے ایہدے تے سوچ وچار کردے او، باقاعدگی نال عبادتاں تے جاندے او تے مُنادی چ حصہ لیندے او۔ ایہو جہے طریقے سوچو جنہاں توں توانوں ایہناں کماں توں زیادہ مزہ آئے۔ مثال لئی، تُسی اپنے آپ کولوں پچھ سکدے او:‏ ”‏کیہہ مَیں دُوجیاں نُوں بائبل دِیاں بنیادی سچائیاں سمجھا سکنا واں؟ مَیں کیہہ کر سکنا واں تاکہ مینوں مُنادی کرن چ زیادہ مزہ آوے؟ مَیں اپنیاں دُعاواں نُوں کیویں بہتر بنا سکنا واں تے کیہہ میریاں دُعاواں توں ایہہ ظاہر ہوندا اے کہ مَیں یہوواہ تے پورا بھروسا کرنا واں؟ کیہہ مَیں باقاعدگی نال عبادتاں تے جانا واں؟ مَیں کیہہ کر سکنا واں تاکہ مَیں عبادتاں نُوں زیادہ دھیان نال سُناں تے ایہناں چ ہور زیادہ حصہ لواں؟“‏

15، 16.‏ تُسی غلط کم کرن توں بچن بارے اِک بھرا دے تجربے توں کیہہ سکھیا اے؟‏

¹⁵ ایہہ وی بوہت ضروری اے کہ تُسی ایمانداری نال اپنا جائزہ لوو کہ تواڈے اندر کیہڑیاں کمزوریاں نیں۔ ایہہ گل بھرا رابرٹ دی مثال توں بڑی چنگی طرحاں سمجھی جا سکدی اے۔ اوہ کہندا اے:‏ ”‏جدوں مَیں 20 سال دا ساں تے اِک دن میرے نال کم کرن والی اِک کُڑی نے مینوں اپنے گھر آن لئی کہیا۔ اوہنے کہیا کہ ”‏مَیں گھر کلّی ہوواں گی تے اَسی جو مرضی کراں گے۔“‏ شروع شروع چ مَیں چھوٹے موٹے بہانے بنا کے اوہنوں ٹالیا۔ پر اخیر مَیں اوہنوں صاف صاف منع کیتا تے ایہدی وجہ وی دَسی۔“‏ ایہہ بڑی چنگی گل اے کہ بھرا رابرٹ نے غلط کم نئیں کیتا۔ بعد چوں اوہنے سوچیا کہ اوہ اوس صورتحال نال ہور بہتر طریقے نال نبڑ سکدا سی۔ اوہنے کہیا:‏ ”‏مَیں اوس کُڑی نُوں اینی چھیتی تے اینی سختی نال اِنکار نئیں کیتا جیویں یوسف نے فوطیفار دی بیوی نُوں کیتا سی۔ (‏پیدائش 39:‏7-‏9‏)‏ سگوں مَیں تے ایس گل توں بڑا حیران ساں کہ مینوں اوس کُڑی نُوں انکار کرنا ایناں مشکل کیوں لگ رہیا سی۔ ایس واقعے توں مَیں ایہہ گل سمجھ گیا کہ مینوں یہوواہ نال اپنی دوستی نُوں ہور زیادہ مضبوط کرن دی لوڑ اے۔“‏

¹⁶ بھرا رابرٹ وانگوں توانوں وی اپنا جائزہ لین نال بڑا فائدہ ہوئے  گا۔ بھانویں کہ تُسی غلط کم کرن توں بچ وی جاندے او تے فیر وی اپنے آپ کولوں پچھو:‏ ”‏مینوں ایہدے توں اِنکار کرن چ کِنّاں وقت لگیا؟“‏ جے توانوں محسوس ہوندا اے کہ توانوں اپنے اندر بہتری لیان دی لوڑ اے تے مایوس نہ ہووو سگوں خوش ہووو کہ توانوں اپنی کمزوری دا پتہ لگ گیا اے۔ فیر ایس معاملے بارے دُعا کرو تے اپنے ایس عزم نُوں ہور زیادہ مضبوط کرو کہ تُسی یہوواہ دے معیاراں مطابق زندگی گزارو گے۔—‏زبور 139:‏23، 24‏۔‏

17.‏ رابرٹ دے وفادار رہن دی وجہ توں یہوواہ دے ناں دی وڈیائی کیویں ہوئی؟‏

¹⁷ اَسی بھرا رابرٹ دے تجربے توں اِک ہور گل وی سکھنے آں۔ بھرا رابرٹ نے کہیا:‏ ”‏جدوں مَیں اوس کُڑی دے نال جان توں اِنکار کر دِتا تے اوہنے کہیا:‏ ”‏تُوں پاس ہو گیا ایں!‏“‏ مَیں اوہنوں پچھیا کہ ایہدا کیہہ مطلب اے۔ اوہنے کہیا:‏ ”‏میرا اِک دوست جیہڑا کدی یہوواہ دا گواہ ہوندا سی، اوہنے مینوں دَسیا سی کہ سارے نوجوان یہوواہ دے گواہ کلیسیا چ کجھ ہور ہوندے نیں تے باہر کجھ ہور۔ جیویں ای اوہناں نُوں کوئی غلط کم کرن دا موقع مِلدا اے، اوہ ایہنوں ہتھوں جان نئیں دیندے۔“‏ اوس کُڑی نے اپنے دوست نُوں کہیا سی کہ اوہ ازمائے گی کہ کیہہ مَیں وی اُنج دا ای آں۔ اوس دن مینوں ایہہ جان کے بڑی خوشی ہوئی کہ میری وجہ توں یہوواہ دے ناں دی وڈیائی ہوئی اے۔“‏

18.‏ تُسی بپتسمہ لین توں بعد کیہہ کرن دا عزم کیتا اے؟ (‏ایس بکس نُوں وی ویکھو:‏ ‏”‏ نوجواناں لئی فائدہ‌مند مضمون۔‏‏“‏‏)‏

¹⁸ جدوں تُسی اپنی زندگی یہوواہ دے ناں کر کے بپتسمہ لیندے او تے تُسی ظاہر کردے او کہ تُسی ہر قیمت تے اوہدے ناں دی وڈیائی کرنا چاہندے او۔ تُسی ایس گل دا یقین رکھ سکدے او کہ یہوواہ نُوں پتہ اے کہ تُسی کیہڑیاں مشکلاں تے ازمیشاں دا سامنا کر رہے او۔ اوہ وفادار رہن چ تواڈی مدد ضرور کرے گا تے توانوں اپنی پاک روح دَوے گا۔ (‏لُوقا 11:‏11-‏13‏)‏ یہوواہ دی مدد نال تُسی بپتسمہ لین توں بعد وی یسوع دے پچھے پچھے چل سکدے او۔‏