1.‏ یہوواہ دی تنظیم دا حصہ ہون دی وجہ توں سانوں کیہڑیاں برکتاں مِلیاں نیں؟‏

 ساڈے لئی ایہہ بڑے مان دی گل اے کہ اَسی ایس آخری زمانے چ یہوواہ دی تنظیم دا حصہ واں۔ ایس دُنیا دے حالات وِگڑدے جا رہے نیں پر یہوواہ نے سانوں اِک ایہو جیہا خاندان دِتا اے جیہڑا اِک مُٹھ اے۔ (‏زبور 133:‏1‏)‏ یہوواہ ساڈی مدد کردا اے تاکہ اَسی اپنے گھر والیاں دے نال اپنا رشتہ مضبوط رکھ سکئے۔ (‏اِفِسیوں 5:‏33–‏6:‏1‏)‏ نالے اوہ سانوں سمجھ‌داری دیندا اے تاکہ اَسی مشکلاں دا مقابلہ چنگی طرحاں کر سکئے تے خوش رہ سکئے۔‏

2.‏ سانوں کیہہ کرن دی لوڑ اے تے کیوں؟‏

² سانوں وفاداری نال یہوواہ دی خدمت کردے رہن لئی محنت کرن دی لوڑ اے۔ پر کیوں؟ کیونکہ ہو سکدا اے کہ کدی کدار سانوں دُوجیاں دا کوئی کم یاں گل چنگی نہ لگے۔ ایہہ وی ہو سکدا اے کہ اَسی اپنیاں خامیاں دی وجہ توں مایوس ہو جائیے، خاص کر اوس ویلے جدوں اَسی اِکو ای غلطی وار وار کرنے آں۔ پر سانوں اوس ویلے وی ہمت ہارے بغیر یہوواہ دی خدمت کردے رہنا چاہی دا اے جدوں (‏1)‏ساڈا کوئی ہم‌ایمان ساڈا دل دُکھاندا اے، (‏2)‏سانوں اپنے جیون ساتھی دے کماں یاں گلاں دی وجہ توں مایوسی ہوندی اے تے (‏3)‏ساڈیاں اپنیاں غلطیاں دی وجہ توں اَسی مایوس ہو جانے آں۔ ایس مضمون چ اَسی ایہناں تِناں معاملیاں تے گل کراں گے تے ویکھاں گے کہ ایس بارے اَسی بائبل چ دَسے گئے یہوواہ دے وفادار بندیاں دی مثال توں کیہہ سکھنے آں۔‏

جدوں تواڈا کوئی ہم‌ایمان تواڈا دل دُکھاندا اے

3.‏ یہوواہ دے کجھ بندیاں نُوں کیہڑی مشکل دا سامنا کرنا پیندا اے؟‏

³ مشکل۔‏ ہو سکدا اے کہ اَسی اپنے ہم‌ایماناں دِیاں کجھ عادتاں توں چڑ کھائیے۔ کجھ شاید اپنے کماں یاں گلاں توں سانوں مایوس کر دین یاں ساڈے نال بُری طرحاں پیش آن۔ شاید کلیسیا چ پیشوائی کرن والے بھراواں توں وی غلطیاں ہون۔ ایہناں گلاں دی وجہ توں کجھ بھین بھرا ایس گل تے شک کرن لگ پیندے نیں کہ ایہہ یہوواہ دی تنظیم اے۔ ایس وجہ توں اوہ بھین بھراواں نال موڈھے نال موڈھا جوڑ کے  یہوواہ دی خدمت کرن دی بجائے اوہناں بھین بھراواں نال ملنا جلنا چھڈ دیندے نیں جنہاں نے اوہناں دا دل دُکھایا ہوندا اے، ایتھوں تک کہ شاید اوہ عبادتاں تے وی جانا چھڈ دین۔ (‏صِفَنیاہ 3:‏9‏)‏ کیہہ اِنج کرنا صحی اے؟ آؤ ایس بارے بائبل چوں اِک بندے دی مثال توں سکھنے آں۔‏

4.‏ پولُس رسول نُوں کیہڑیاں مشکلاں دا سامنا کرنا پیا؟‏

⁴ بائبل چوں مثال۔‏ پولُس رسول جان‌دا سی کہ اوہدے ہم‌ایمان عیب‌دار نیں۔ مثال لئی، کجھ بھین بھراواں نُوں ایس گل تے یقین کرنا مشکل لگ رہیا سی کہ پولُس یسوع دا شاگرد بن گیا اے۔ (‏اعمال 9:‏26‏)‏ بعد چوں کجھ لوکاں نے اوہنوں بدنام کرن لئی اوہدے خلاف جھوٹھیاں گلاں پھیلائیاں۔ (‏2-‏کُرنتھیوں 10:‏10‏)‏ ایہدے علاوہ پولُس نے ویکھیا کہ کلیسیا چ پیشوائی کرن والے اِک بھرا نے غلط فیصلہ کیتا اے جدی وجہ توں شاید دُوجیاں نُوں ٹھوکر لگی اے۔ (‏گلتیوں 2:‏11، 12‏)‏ نالے پولُس دے دوست مرقس نے وی اوہنوں بڑا ای مایوس کیتا۔ (‏اعمال 15:‏37، 38‏)‏ اوہ اوہناں بھین بھراواں نُوں ملنا جلنا چھڈ سکدا سی جنہاں نے اوہنوں مایوس کیتا سی۔ پر اوہنے اِنج نئیں کیتا سگوں اوہنے بھین بھراواں بارے صحی سوچ رکھی تے اوہ جوش نال یہوواہ دی خدمت کردا رہیا۔ اِنج کرن چ کیہڑی چیز نے اوہدی مدد کیتی؟‏

5.‏ کیہڑی چیز نے اپنے ہم‌ایماناں نال مضبوط رشتہ رکھن چ پولُس دی مدد کیتی؟ (‏کُلسّیوں 3:‏13، 14‏)‏ (‏تصویر نُوں وی ویکھو۔)‏

⁵ پولُس بھین بھراواں نال بڑا پیار کردا سی۔ ایس پیار دی وجہ توں اوہ اپنا دھیان اوہناں دِیاں خامیاں تے نئیں سگوں اوہناں دِیاں خوبیاں تے رکھدا سی۔ ایسے پیار نے پولُس نُوں ہلاشیری دِتی کہ اوہ آپ وی اوہ کم کرے جیہڑا اوہنے کُلسّیوں 3:‏13، 14 چ دُوجیاں نُوں کرن لئی کہیا سی۔ ‏(‏ایہناں ایتاں نُوں پڑھو۔)‏ مثال لئی، اوہدے پہلے مشنری دورے دے دوران مرقس اوہنوں چھڈ کے چلا گیا سی۔ پر پولُس ایس گل تے ناراض نئیں رہیا سگوں اوہنے مرقس نُوں معاف کر دِتا۔ بعد چوں جدوں اوہنے کُلسّے دی کلیسیا نُوں خط لکھیا تے اوہنے مرقس دی تعریف کردے ہوئیاں اوہنوں اپنا ہم‌خدمت کہیا تے دَسیا کہ اوہدی وجہ توں اوہنوں بڑی تسلی ملی اے۔ (‏کُلسّیوں 4:‏10، 11‏)‏ جدوں پولُس روم چ قید سی تے اوہنے مدد لئی خاص طور تے مرقس نُوں بلا‌یا۔ (‏2-‏تیمُتھیُس 4:‏11‏)‏ ایہناں گلاں توں صاف پتہ چلدا اے کہ پولُس اپنے بھین بھراواں توں مایوس نئیں رہیا سگوں اوہنے اوہناں نال اپنا رشتہ مضبوط رکھیا۔ اَسی اوہدی مثال توں کیہہ سکھ سکنے آں؟‏

6، 7.‏ کیہڑی چیز ساڈی مدد کر سکدی اے کہ اَسی بھین بھراواں دِیاں غلطیاں دے باوجود اوہناں لئی پیار وکھاندے رہیے؟ (‏1-‏یوحنا 4:‏7‏)‏

⁶ اَسی کیہہ سکھنے آں؟‏ یہوواہ چاہندا اے کہ اَسی بھین بھراواں لئی محبت وکھاندے رہیے۔ ‏(‏1-‏یوحنا 4:‏7 نُوں پڑھو۔)‏ جے کوئی بھین بھرا ساڈے نال چنگی طرحاں پیش نئیں آندا تے اوہدوں وی سانوں یقین رکھنا چاہی دا اے کہ اوہ بائبل دے اصولاں تے عمل کرنا چاہندا اے تے اوہدا مقصد سانوں دُکھ پونچانا نئیں سی۔ (‏اَمثال 12:‏18‏)‏ خدا وی اپنے بندیاں دِیاں غلطیاں دے باوجود اوہناں نال پیار کردا اے۔ جدوں ساڈے کولوں کوئی غلطی ہو جاندی اے تے اوہ ساڈے نال دوستی نئیں توڑدا تے نہ ای ساڈے توں ناراض رہندا اے۔ (‏زبور 103:‏9‏)‏ ایہہ بوہت ضروری اے کہ اَسی وی  اپنے اسمانی باپ وانگوں دُوجیاں نُوں معاف کردے رہیے۔—‏اِفِسیوں 4:‏32–‏5:‏1‏۔‏

⁷ ایہہ گل وی یاد رکھو کہ دُنیا دا خاتمہ جِنّاں نیڑے آ رہیا اے، سانوں اپنے بھین بھراواں دے نیڑے رہن دی اونی زیادہ لوڑ اے۔ ہو سکدا اے کہ اَگے چل کے سانوں ہور زیادہ ظلم دا سامنا کرنا پووے۔ شاید سانوں اپنے‌ایمان دی وجہ توں جیل چ پا دِتا جائے۔ جے اِنج ہویا تے سانوں بھین بھراواں دی بڑی لوڑ ہوئے گی۔ (‏اَمثال 17:‏17‏)‏ غور کرو کہ بھرا جوزف a نال کیہہ ہویا جیہڑا سپین دی اِک کلیسیا چ بزرگ اے۔ اوہنوں تے کجھ ہور بھراواں نُوں اپنے ایمان دی وجہ توں جیل چ پا دِتا گیا۔ بھرا جوزف نے کہیا:‏ ”‏جیل چ اَسی سارے کٹھے رہنے ساں، ایس لئی کدی کدار اَسی اِک دُوجے دی کسے گل یاں کم دی وجہ توں چڑ جانے ساں۔ پر اَسی اِک دُوجے دی برداشت کیتی تے اِک دُوجے نُوں معاف کیتا۔ اِنج کرن نال اَسی اِک مُٹھ تے محفوظ رہ سکے۔ ساڈے آلے دَوالے باقی قیدی یہوواہ دی عبادت نئیں کردے سن۔ اِک واری میری بانہہ ٹُٹ گئی جدی وجہ توں مَیں ایہدے نال کوئی کم نئیں کر سکنا ساں۔ پر اِک بھرا نے میرے کپڑے دھوتے تے ہور طریقیاں نال وی میرا خیال رکھیا۔ مَیں سچی محبت نُوں ٹھیک اوس ویلے محسوس کیتا جدوں مینوں واقعی ایہدی بڑی لوڑ سی۔“‏ ایہناں گلاں توں پتہ چلدا اے کہ ایہہ بوہت ضروری اے کہ اَسی ہُن ای بھین بھراواں نال مسئلیاں نُوں حل کر لئیے۔‏

جدوں تواڈا جیون ساتھی توانوں مایوس کردا اے

8.‏ میاں بیوی نُوں کیہڑی مشکل دا سامنا کرنا پیندا اے؟‏

⁸ مشکل۔‏ بائبل چ دَسیا گیا اے کہ ہر شادی‌شُدہ جوڑے نُوں مسئلیاں دا سامنا کرنا پووے گا۔ (‏1-‏کُرنتھیوں 7:‏28‏)‏ پر کیوں؟ کیونکہ میاں بیوی دونویں عیب‌دار ہوندے نیں تے اوہناں دی پسند نا پسند تے عادتاں اِک دُوجے توں فرق ہوندیاں نیں۔ نالے اوہ فرق فرق ماحول چ جمے پلے ہوندے نیں۔ شاید وقت دے نال نال اوہناں نُوں اِک دُوجے دِیاں ایہو جہیاں عادتاں نظر آن لگ پین جیہڑیاں شادی توں پہلاں اوہناں نُوں نئیں پتہ سن۔ ایہناں گلاں دی وجہ توں شادی‌شُدہ زندگی چ مسئلے کھڑے ہو سکدے نیں۔ پر ہو سکدا اے کہ میاں بیوی اپنی غلطی نُوں تسلیم کرن تے مسئلے نُوں حل کرن دی بجائے اِک دُوجے تے اِلزام لانا شروع کر دین۔ شاید اوہ ایہہ سوچن لگ پین کہ علیٰحدگی یاں طلاق ای اوہناں دے مسئلیاں دا حل اے۔ پر کیہہ ایہہ صحی ہوئے گا؟‏ b آؤ بائبل چوں اِک ایہو جہی عورت دی مثال توں سکھنے آں جدی شادی‌شُدہ زندگی چ بڑے مسئلے سن۔‏

9.‏ ابیجیل نُوں کیہڑی مشکل دا سامنا سی؟‏

⁹ بائبل چوں مثال۔‏ ابیجیل دی شادی نابال نال ہوئی سی۔ بائبل چ دَسیا گیا اے کہ نابال بڑا سخت بندہ سی تے دُوجیاں نال بھیڑا سلوک کردا سی۔ (‏1-‏سموئیل 25:‏3‏)‏ یقیناً ابیجیل لئی ایہو جہے بندے نال زندگی گزارنا اسان نئیں سی۔ کیہہ اوہنوں ایہناں حالاتاں توں نجات پان دا موقع ملیا سی؟ جی بالکل۔ اِنج اوس ویلے ہویا جدوں نابال نے بنی‌اِسرائیل دے ہون والے بادشاہ داؤد تے اوہدے ساتھیاں دی بے عزتی کیتی سی۔ ایس لئی داؤد اوہنوں قتل کرن لئی آ رہیا سی۔ (‏1-‏سموئیل 25:‏9-‏13‏)‏ ابیجیل چاہندی تے ایس معاملے توں دُور رہندی تے داؤد نُوں اپنا کم پورا کرن دیندی۔ پر اوہنے اِنج نئیں کیتا سگوں اوہنے داؤد کولوں درخاست کیتی کہ اوہ نابال د ی جان بخش دَوے۔ (‏1-‏سموئیل 25:‏23-‏27‏)‏ ابیجیل نے اِنج کیوں کیتا؟‏

10.‏ ایس گل دی کیہہ وجہ ہو سکدی اے کہ ابیجیل نے اپنی شادی دے بندھن نُوں نئیں توڑیا؟‏

¹⁰ ابیجیل یہوواہ نال پیار کردی سی تے شادی بارے اوہدے معیاراں دی دلوں قدر کردی سی۔ ابیجیل نُوں پتہ سی کہ یہوواہ دی نظر چ شادی اِک پاک بندھن اے تے جدوں اوہنے آدم تے حوا نُوں ایس بندھن چ بنھیا سی تے اوہناں نُوں کیہہ کہیا سی۔ (‏پیدائش 2:‏24‏)‏ ابیجیل یہوواہ نُوں خوش کرنا چاہندی سی۔ ایسے وجہ توں اوہنے اپنے گھرانے تے شوہر نُوں بچان لئی اوہ سب کجھ کیتا، جو اوہ کر سکدی سی۔ اوہنے فوراً قدم چُکیا تاکہ داؤد نُوں نابال دا قتل کرن توں روک سکے۔ اوہنے تے اوس غلطی لئی وی معافی منگی جیہڑی  اوہنے کیتی ای نئیں سی۔ ایسے لئی یہوواہ وی ابیجیل نُوں بوہت پیار کردا سی کیونکہ اوہ بڑی دلیر سی تے دُوجیاں دے فائدے دا سوچدی سی۔ میاں بیوی ابیجیل توں کیہہ سکھ سکدے نیں؟‏

11.‏ (‏الف)‏یہوواہ شادی‌شُدہ لوکاں کولوں کیہہ چاہندا اے؟ (‏اِفِسیوں 5:‏33‏)‏ (‏ب)‏بھین کارمن توں اَسی کیہہ سکھ سکنے آں؟ (‏تصویر نُوں وی ویکھو۔)‏

¹¹ اَسی کیہہ سکھنے آں؟‏ یہوواہ چاہندا اے کہ میاں بیوی اوس ویلے وی کٹھے رہن جدوں اوہناں نُوں اپنے جیون ساتھی نال زندگی گزارنا اسان نئیں لگدا۔ یہوواہ ایہہ ویکھ کے بڑا خوش ہوندا اے جدوں میاں بیوی مِل کے مسئلیاں نُوں حل کرن دی کوشش کردے نیں تے اِک دُوجے لئی محبت تے احترام وکھاندے نیں۔ ‏(‏اِفِسیوں 5:‏33 نُوں پڑھو۔)‏ ذرا بھین کارمن دی مثال تے غور کرو۔ اوہنے شادی دے چھ سال بعد یہوواہ دے گواہواں کولوں بائبل کورس کرنا شروع کیتا تے بعد چوں بپتسمہ لے لیا۔ بھین نے کہیا:‏ ”‏میرے شوہر نُوں ایہہ فیصلہ بالکل وی چنگا نئیں لگیا۔ اوہنوں ایس گل تے غصہ آن لگ پیا کہ مَیں اوہدے نالوں زیادہ اہمیت یہوواہ نُوں دینی آں۔ اوہ میری بڑی بے‌عزتی کردا سی تے مینوں دھمکی دیندا سی کہ اوہ مینوں چھڈ دَوے گا۔“‏ پر فیر وی بھین نے اپنی شادی دا بندھن نئیں توڑیا۔ اوہ 50 سال تک اپنے شوہر لئی محبت تے احترام وکھان دی پوری کوشش کردی رہی۔ اوہنے کہیا:‏ ”‏وقت دے نال نال مَیں اپنے شوہر دے جذبات سمجھ گئی تے ایہہ وی سکھ گئی کہ مَیں اوہدے نال ہور زیادہ نرمی تے پیار نال کیویں گل کر سکنی آں۔ مینوں پتہ سی کہ یہوواہ دی نظر چ شادی دا بندھن پاک اے۔ ایس لئی مَیں ایہنوں بچان لئی جو کجھ وی کر سکنی ساں، اوہ کیتا۔ مَیں یہوواہ نال بڑا پیار کرنی آں۔ ایس لئی مَیں کدی وی اپنے شوہر نُوں چھڈن بارے نئیں سوچیا۔“‏ c جے تواڈی شادی‌شُدہ زندگی چ مسئلے نیں تے بھروسا رکھو کہ یہوواہ ایہناں نال نبڑن تے اوہدا وفادار رہن چ تواڈی مدد کرے گا۔‏

جدوں تُسی اپنے کسے گُناہ دی وجہ توں مایوس ہو جاؤ

12.‏ جے ساڈے کولوں کوئی وڈا گُناہ ہو جاندا اے تے سانوں کیہڑی مشکل دا سامنا کرنا پے سکدا اے؟‏

¹² مشکل۔‏ جے ساڈے کولوں کوئی وڈا گُناہ ہو جاندا اے تے شاید اَسی مایوس ہو جائیے۔ بائبل چ دَسیا گیا اے کہ ساڈے گُناہواں دی وجہ توں ساڈا دل ٹُٹ سکدا اے۔ (‏زبور 51:‏17‏)‏ ذرا بھرا رابرٹ دی مثال تے غور کرو۔ اوہنے کلیسیا چ خادم بنن لئی کئی سالاں تک بڑی محنت کیتی۔ پر اوہدے کولوں اِک وڈا گُناہ ہو گیا جدی وجہ توں اوہنوں احساس ہویا کہ اوہنے یہوواہ نال بے‌وفائی کیتی اے۔ بھرا رابرٹ نے کہیا:‏ ”‏میرا ضمیر مینوں تنگ کردا رہندا سی۔ مَیں شرمندگی دے بوجھ تھلے دبدا جا رہیاں ساں۔ مَیں رونا ساں تے یہوواہ کولوں دُعا کرنا ساں۔ مَیں سوچنا ساں کہ ہُن یہوواہ میری دُعا کدی وی نئیں سُنے گا تے اوہ میری دُعا سُنے وی کیوں، مَیں تے اوہنوں بڑا دُکھ دِتا اے۔“‏ جے ساڈے کولوں کوئی وڈا گُناہ ہو جاندا اے تے شاید ساڈا دل ایناں ٹُٹ جائے کہ سانوں لگے کہ یہوواہ نے سانوں چھڈ دِتا اے تے ہُن اوہدی خدمت کرن دا کوئی فائدہ نئیں۔ (‏زبور 38:‏4‏)‏ جے تُسی وی اِنج ای محسوس کردے او تے بائبل چوں اِک ایہو جہے بندے دی مثال تے غور کرو جنہے اِک وڈا گُناہ کرن توں بعد وی یہوواہ دی خدمت کرنی نئیں چھڈی۔‏

13.‏ پطرس نے کیہڑا وڈا گُناہ کیتا تے ایہدے توں پہلاں اوہدے کولوں کیہڑیاں غلطیاں ہوئیاں؟‏

¹³ بائبل چوں مثال۔‏ جیس رات یسوع نُوں گِرفتار کیتا گیا، اوس رات پطرس کولوں ایہو جہیاں بوہت ساریاں غلطیاں ہوئیاں جنہاں دی وجہ توں اوہ اِک وڈا گُناہ کر بیٹھا۔ سب توں پہلی غلطی ایہہ سی کہ اوہنے اپنے اُتے کجھ زیادہ ای بھروسا کیتا۔ اوہنے ایہہ شیخی ماری کہ بھانویں دُوجے رسول یسوع دا ساتھ چھڈ دین پر اوہ اِنج کدی نئیں کرے گا۔ (‏مرقس 14:‏27-‏29‏)‏ ایس توں بعد گتسمنی دے باغ چ یسوع نے کئی وار شاگرداں نُوں چوکس رہن لئی کہیا پر پطرس چوکس نئیں رہ سکیا۔ (‏مرقس 14:‏32،‏ 37-‏41‏)‏ فیر جدوں اِک بِھیڑ یسوع نُوں پھڑن آئی تے اوہ یسوع نُوں چھڈ کے بھج گیا۔ (‏مرقس 14:‏50‏)‏ اخیر اوہنے تِن وار یسوع نُوں جانن توں اِنکار کیتا، ایتھوں تک کہ اوہنے جھوٹھی قسم وی کھادی کہ اوہ یسوع نُوں نئیں جان‌دا۔ (‏مرقس 14:‏66-‏71‏)‏ جدوں پطرس نُوں احساس ہویا کہ اوہنے کِنّاں وڈا گُناہ کیتا اے تے اوہنے کیہہ کیتا؟ اوہ پُھٹ پُھٹ کے رون لگ پیا۔ شاید اوہ سوچ رہیا ہوئے گا کہ اوہ کِنّاں بھیڑا انسان اے۔ (‏مرقس 14:‏72‏)‏ ذرا سوچو کہ ایہدے کجھ گھنٹیاں بعد جدوں یسوع نُوں سُولی دِتی گئی تے پطرس نُوں کیہو جیہا محسوس ہویا ہوئے گا۔ اوہنوں اپنے اُتے بڑی شرم آ رہی ہوئے گی۔‏

14.‏ کیہڑی چیز نے پطرس دی مدد کیتی کہ اوہ یہوواہ دی خدمت کردا رہوے؟ (‏تصویر نُوں ویکھو۔)‏

¹⁴ ایہو جہیاں کئی ساریاں گلاں سن جنہاں توں پطرس نُوں مدد ملی کہ اوہ یہوواہ دی خدمت کردا رہوے۔ مثال لئی، اوہنے اپنے آپ نُوں دُوجے شاگرداں توں وکھرا نئیں کیتا۔ سگوں اوہ اوہناں نُوں مِلن گیا تے اوہناں نے ضرور اوہنوں تسلی دِتی ہوئے گی۔ (‏لُوقا 24:‏33‏)‏ ایہدے علاوہ زندہ ہون توں بعد یسوع پطرس نُوں مِلیا تے اوہنے وی اوہدا حوصلہ ودھایا ہوئے گا۔ (‏لُوقا 24:‏34؛‏ 1-‏کُرنتھیوں 15:‏5‏)‏ یسوع نے اوہنوں اوہدیاں غلطیاں یاد دَوان دی بجائے اوہنوں دَسیا کہ اوہنوں مستقبل چ وڈیاں وڈیاں ذمے‌داریاں مِلن گیاں۔ (‏یوحنا 21:‏15-‏17‏)‏ پطرس جان‌دا سی کہ اوہدے کولوں بڑا وڈا گُناہ ہویا اے پر اوہنے صحی کم کرن چ ہمت نئیں ہاری۔ پر کیوں؟ کیونکہ اوہنوں پکا یقین سی کہ اوہدا مالک یسوع ہُن وی اوہدے نال محبت کردا اے۔ نالے دُوجے شاگرداں نے وی اوہدا ساتھ دینا نئیں چھڈیا۔ اَسی پطرس دی مثال توں کیہہ سکھ سکنے آں؟‏

15.‏ یہوواہ ساڈے کولوں کیہہ چاہندا اے؟ (‏زبور 86:‏5؛‏ رومیوں 8:‏38، 39‏)‏ (‏تصویر نُوں وی ویکھو۔)‏

¹⁵ اَسی کیہہ سکھنے آں؟‏ یہوواہ چاہندا اے کہ اَسی پکا یقین رکھئے کہ اوہ سانوں پیار کردا اے تے سانوں معاف کرن لئی تیار اے۔ ‏(‏زبور 86:‏5؛‏ رومیوں 8:‏38، 39 نُوں پڑھو۔)‏ جدوں ساڈے کولوں کوئی گُناہ ہو جاندا اے تے سانوں بڑی شرمندگی ہوندی اے۔ اِنج محسوس کرنا صحی اے۔ پر سانوں ایہہ نئیں سوچ لینا چاہی دا کہ ہُن یہوواہ سانوں پیار نئیں کردا تے سانوں کدی معاف نئیں کرے گا۔ ایہدی بجائے سانوں فوراً بزرگاں کولوں مدد لینی چاہی دی اے۔ بھرا رابرٹ جدا پہلے وی ذکر ہویا اے، اوہنے کہیا:‏ ”‏میرے کولوں ایس لئی گُناہ ہویا کیونکہ مَیں اِک ازمیش دا مقابلہ کرن لئی  اپنے اُتے بھروسا کیتا سی۔“‏ بھرا رابرٹ نُوں احساس ہویا کہ اوہنوں بزرگاں کولوں مدد لین دی لوڑ اے۔ اوہ کہندا اے:‏ ”‏جدوں مَیں بزرگاں نال گل کیتی تے مَیں محسوس کیتا کہ یہوواہ اوہناں دے ذریعے میرے لئی محبت وکھا رہیا اے۔ مَیں ایہہ وی محسوس کیتا کہ بزرگ وی مینوں بڑا پیار کردے نیں۔ اوہناں نے مینوں یقین دَوایا کہ یہوواہ نے مینوں نئیں چھڈیا۔“‏ اَسی وی ایس گل دا یقین رکھ سکنے آں کہ جدوں اَسی اپنے گُناہواں توں توبہ کراں گے، بزرگاں کولوں مدد لواں گے تے پوری کوشش کراں گے کہ اَسی اپنیاں غلطیاں نُوں نہ دہرائیے تے یہوواہ سانوں معاف کرے گا نالے سانوں پیار کردا رہوے گا۔ (‏1-‏یوحنا 1:‏8، 9‏)‏ جدوں سانوں پورا یقین ہوئے گا کہ یہوواہ سانوں پیار کردا اے تے سانوں معاف کرن لئی تیار اے تے اَسی اوہدوں وی اوہدی خدمت کرنا نئیں چھڈاں گے جدوں ساڈے کولوں کوئی غلطی ہو جائے گی۔‏

16.‏ تُسی ایہہ عزم کیوں کیتا اے کہ تُسی ہر حال چ یہوواہ دی خدمت کردے رہوو گے؟‏

¹⁶ اَسی ایس مشکل دَور چ یہوواہ دی خدمت کرن لئی جیہڑیاں کوششاں کرنے آں، یہوواہ اوہناں دی بڑی قدر کردا اے۔ یہوواہ دی مدد نال اَسی اوس ویلے اوہدی خدمت نُوں جاری رکھ سکنے آں جدوں اَسی اپنیاں غلطیاں دی وجہ توں یاں دُوجیاں دی وجہ توں مایوس ہُنے آں۔ اَسی اپنے دل چ بھین بھراواں لئی محبت پیدا کر سکنے آں تے اوہدوں وی اوہناں نُوں معاف کر سکنے آں جدوں اوہ ساڈا دل دُکھاندے نیں۔ اَسی اپنی شادی‌شُدہ زندگی چ کھڑے ہون والے مسئلیاں نُوں حل کرن لئی پوری کوشش کر سکنے آں۔ اِنج ظاہر ہوئے گا کہ اَسی یہوواہ نال پیار کرنے آں تے اوہدے بنائے شادی دے بندوبست دا احترام کرنے آں۔ ایہدے علاوہ جے ساڈے کولوں کوئی گُناہ ہو جاندا اے تے اَسی یہوواہ کولوں مدد منگ سکنے آں نالے ایہہ یاد رکھ سکنے آں کہ اوہ سانوں پیار کردا اے تے سانوں معاف کرن لئی تیار اے۔ اِنج اَسی اوہدی خدمت جاری رکھ سکاں گے۔ اَسی پورا یقین رکھ سکنے آں کہ جے اَسی چنگے کم کرن چ ہمت نئیں ہاراں گے تے یہوواہ سانوں بڑیاں برکتاں دَوے گا۔—‏گلتیوں 6:‏9‏۔‏