یسوع دے فدیے دی وجہ توں ای ساڈے گُناہ معاف ہو سکدے نیں۔ (‏اِفِسیوں 1:‏7‏)‏ پر بائبل چ دَسیا گیا اے:‏ خدا صبر نال اوہناں گُناہواں نُوں معاف کردا رہیا جیہڑے ماضی چ ہوئے یعنی اوہ گُناہ جیہڑے انساناں نے یسوع دے فدیہ دین توں پہلاں کیتے سن۔ (‏رومیوں 3:‏25‏)‏ یہوواہ اِنج کیویں کر سکدا سی تے ایہدے نال نال اوہ اپنے انصاف دے معیاراں تے کیویں قائم رہ سکدا سی؟‏

یہوواہ دی نظر چ فدیہ اوسے دن ادا ہو گیا سی جیس دن اوہنے وعدہ کیتا سی کہ اِک نسل آئے گی جیہڑی اوہناں انساناں نُوں بچائے گی جیہڑے اوہدے تے ایمان رکھدے نیں۔ (‏پیدائش 3:‏15؛‏ 22:‏18‏)‏ خدا نُوں پورا یقین سی کہ اوہدے مقرر کیتے ہوئے وقت تے اوہدا اِکلوتا پُتر خوشی نال فدیہ دَوے گا۔ (‏گلتیوں 4:‏4؛‏ عبرانیوں 10:‏7-‏10‏)‏ جدوں یسوع زمین تے سی تے خدا دے نمائندے دے طور تے اوہدے کول پورا حق سی کہ اوہ فدیہ دین توں پہلاں ای لوکاں دے گُناہواں نُوں معاف کر سکے۔ یسوع اِنج ایس لئی کر سکدا سی کیونکہ اوہ جان‌دا سی کہ اوہ جیہڑا فدیہ دین والا اے، اوہدی وجہ توں اوہناں لوکاں دے گُناہ معاف ہو جان گے جیہڑے اوہدے تے ایمان رکھدے نیں۔—‏متی 9:‏2-‏6‏۔‏