1، 2.‏ اِک شخص نُوں بپتسمہ لین توں پہلاں کیہہ کرنا چاہی دا اے؟‏

 پچھلے 5 سالاں دے دوران 10 لکھ توں زیادہ لوک بپتسمہ لے کے یہوواہ دے گواہ بن گئے نیں۔ ایہناں چوں بوہت ساریاں نُوں تیمُتھیُس وانگوں بچپن توں ای سچائی دی تلیم مِلی اے۔ (‏2-‏تیمُتھیُس 3:‏14، 15‏)‏ کئیاں نُوں جوانی چ یہوواہ بارے سکھن دا موقع مِلیا تے کجھ لوکاں نُوں وڈی عمر چ جا کے۔ کجھ چِر پہلاں ای اِک عورت جیہڑی یہوواہ دے گواہواں کولوں بائبل کورس کردی سی، اوہنے 97 سال دی عمر چ بپتسمہ لیا۔‏

² جے تُسی یہوواہ دے گواہواں کولوں بائبل کورس کر رہے او یاں فیر تواڈے ماں پیو نے توانوں یہوواہ بارے سکھایا اے تے کیہہ تُسی بپتسمہ لین بارے سوچ رہے او؟ جے تُسی اِنج سوچ رہے او تے ایہہ اِک بڑا ودھیا منصوبہ اے۔ پر بپتسمہ لین توں پہلاں توانوں دُعا چ اپنی زندگی یہوواہ دے ناں کرن دی لوڑ اے۔ ایس مضمون چ دَسیا جائے گا کہ اپنی زندگی یہوواہ دے ناں کرن چ کیہہ کجھ شامل اے۔ ایہدے نال نال ایہہ وی دَسیا جائے گا کہ جے اَسی اپنی زندگی یہوواہ دے ناں کرن تے بپتسمہ لین لئی تیار آں تے فیر سانوں کسے وی وجہ توں ایہہ قدم چُکن توں پچھے نئیں ہٹنا چاہی دا۔‏

اپنی زندگی یہوواہ دے ناں کرن دا کیہہ مطلب اے؟‏

3‏.‏ بائبل چوں کجھ ایہو جہے لوکاں دِیاں مثالاں دَوو جنہاں نے اپنی زندگی یہوواہ دے ناں کیتی سی۔‏

³ بائبل دے مطابق اپنی زندگی یہوواہ دے ناں کرن دا مطلب اے، یہوواہ دی مرضی پوری کرن لئی اپنے آپ نُوں الگ کر لینا۔ مثال لئی، بنی‌اِسرائیل یہوواہ دی چُنی ہوئی قوم سن۔ پر اوہناں وچوں وی کجھ لوکاں نُوں یہوواہ نے اِک خاص مقصد لئی علیٰحدہ کیتا سی جیویں کہ ہارون نُوں۔ اوہ اپنی پگڑی تے سونے دی اِک چمک‌دار پتری لاندا سی جدے توں ظاہر ہوندا سی کہ اوہنوں اِک خاص کم لئی الگ کیتا گیا اے یعنی کہ وڈے کاہن دے طور تے خدمت کرن لئی۔ (‏احبار 8:‏9‏)‏ ایسے طرحاں نذیر وی اپنی  زندگی یہوواہ دے ناں کردے سن۔ نذیر لئی عبرانی زبان چ جیہڑا لفظ استمال ہویا اے، اوہدا مطلب اے ”‏چُنیا ہویا“‏ تے ”‏کسے خاص خدمت لئی الگ کیتا ہویا۔“‏ نذیراں نُوں اوہناں حکماں تے عمل کرنا پیندا سی جیہڑے موسیٰ دی شریعت چ اوہناں لئی دِتے گئے سن۔—‏گنتی 6:‏2-‏8‏۔‏

4.‏ (‏الف)‏جدوں تُسی اپنی زندگی یہوواہ دے ناں کردے او تے کیہڑی چیز تواڈی زندگی دا خاص مقصد بن جاندی اے؟ (‏ب)‏ایس گل دا کیہہ مطلب اے کہ ”‏اپنے لئی جینا چھڈ“‏ دَوو؟ (‏تصویر نُوں وی ویکھو۔)‏

⁴ جدوں تُسی اپنی زندگی یہوواہ دے ناں کردے او تے تُسی یسوع دے شاگرد بنن دا فیصلہ کردے او۔ ایہدے نال نال تُسی ایہہ فیصلہ وی کردے او کہ تُسی اپنی زندگی چ یہوواہ دی مرضی نُوں سب توں زیادہ اہمیت دَوو گے۔ اِک مسیحی دے طور تے اپنی زندگی یہوواہ دے ناں کرن چ کیہہ کجھ شامل اے؟ یسوع نے کہیا:‏ ”‏جے کوئی میرا شاگرد بننا چاہندا اے تے اوہ اپنے لئی جینا چھڈ دَوے۔“‏ (‏متی 16:‏24‏)‏ ایہدا مطلب اے کہ جے تُسی اپنی زندگی یہوواہ دے ناں کردے او تے توانوں ہر اوس چیز نُوں چھڈنا پووے گا جیہڑی یہوواہ دی مرضی دے خلاف اے۔ (‏2-‏کُرنتھیوں 5:‏14، 15‏)‏ ایہدے چ جسم دے کماں توں دُور رہنا وی شامل اے، جیویں کہ جنسی بدکاری۔ (‏گلتیوں 5:‏19-‏21؛‏ 1-‏کُرنتھیوں 6:‏18‏)‏ کیہہ ایہناں حکماں تے عمل کرن نال تواڈی زندگی مشکل ہو جائے گی؟ جے تُسی یہوواہ نال پیار کردے او تے ایس گل تے یقین رکھدے او کہ اوہدے حکم تواڈے بھلے لئی نیں تے توانوں اوہدے حکم بوجھ نئیں لگن گے۔ (‏زبور 119:‏97؛‏ یسعیاہ 48:‏17، 18‏)‏ اک بھرا جدا ناں نکولس اے، اوہنے کہیا:‏ ”‏یہوواہ دے معیار تواڈے لئی جیل دِیاں سلاخاں وانگوں ہو سکدے نیں جنہاں دی وجہ توں تُسی اپنی مرضی نئیں کر سکدے یاں شیر دے پنجرے دِیاں سلاخاں وانگوں ہو سکدے نیں جیہڑیاں توانوں خطرے توں محفوظ رکھدیاں نیں۔“‏

5.‏ (‏الف)‏تُسی کیویں اپنی زندگی یہوواہ دے ناں کر سکدے او؟ (‏ب)‏اپنی زندگی یہوواہ دے ناں کرن تے بپتسمہ لین چ کیہہ فرق اے؟ (‏تصویر نُوں وی ویکھو۔)‏

⁵ اِک بندہ اپنی زندگی یہوواہ دے ناں کیویں کردا اے؟ اوہ اپنی ذاتی دُعا چ اوہدے نال ایہہ وعدہ کردا اے کہ اوہ صرف اوہدی عبادت کرے  گا تے اوہدی مرضی نُوں اپنی زندگی چ سب توں زیادہ اہمیت دَوے گا۔ اِنج کرن نال اوہ ایہہ وعدہ کر رہیا ہوندا اے کہ اوہ یہوواہ نال ”‏اپنے سارے دل،اپنی ساری جان،اپنی ساری عقل تے اپنی ساری طاقت نال پیار“‏ کردا رہوے گا۔ (‏مرقس 12:‏30‏)‏ جدوں تُسی دُعا چ اپنی زندگی یہوواہ دے ناں کردے او تے ایہہ گل صرف توانوں تے یہوواہ نُوں پتہ ہوندی اے۔ پر بپتسمہ لین نال تُسی ساریاں دے سامنے ایس گل دا اظہار کردے او۔ ایہہ بڑا خاص وعدہ اے تے توانوں پکا ارادہ کرنا چاہی دا اے کہ تُسی ایس وعدے نُوں پورا کرو گے۔ یہوواہ وی تواڈے کولوں ایہی توقع کردا اے۔—‏واعظ 5:‏4، 5‏۔‏

توانوں کیس وجہ توں اپنی زندگی یہوواہ دے ناں کرنی چاہی دی اے؟‏

6.‏ اِک بندہ اپنی زندگی یہوواہ دے ناں کرن دا فیصلہ کیوں کردا اے؟‏

⁶ اپنی زندگی یہوواہ دے ناں کرن دی سب توں وڈی وجہ ایہہ وے کہ تُسی اوہنوں پیار کردے او۔ تواڈے ایس پیار دی بنیاد صرف تواڈے جذبات نئیں نیں سگوں یہوواہ بارے صحی علم وی اے۔ ایہدا مطلب ایہہ وے کہ جدوں تُسی یہوواہ تے اوہدے مقصد بارے سکھیا تے تواڈے دل چ اوہدے لئی محبت ودھ گئی۔ (‏کُلسّیوں 1:‏9‏)‏ خدا دے کلام دا مطالعیا کرن نال توانوں یقین ہو گیا اے کہ (‏1)‏یہوواہ اِک حقیقی ہستی اے، (‏2)‏بائبل اوہدا کلام اے تے (‏3)‏اوہ اپنے مقصد نُوں پورا کرن لئی اپنی تنظیم نُوں استمال کر رہیا اے۔‏

7.‏ اِک شخص نُوں اپنی زندگی یہوواہ دے ناں کرن توں پہلاں کیہہ کرنا چاہی دا اے؟‏

⁷ جیہڑے لوک اپنی زندگی یہوواہ دے ناں کردے نیں، اوہناں نُوں پاک کلام دِیاں بنیادی سچائیاں دا پتہ ہونا چاہی دا اے تے اوہناں نُوں یہوواہ دے معیاراں مطابق زندگی گزارنی چاہی دی اے۔ اوہ اوہناں گلاں بارے دُوجیاں نُوں وی دَسن دی پوری کوشش کردے نیں جیہڑیاں اوہناں نے سکھیاں نیں۔ (‏متی 28:‏19، 20‏)‏ اوہناں دے دل چ یہوواہ لئی محبت ودھدی اے تے ایہہ خواہش پیدا ہوندی اے کہ اوہ صرف اوہدی  عبادت کرن گے۔ کیہہ ایہہ گل تواڈے بارے وی سچ اے؟ جے تواڈے دل چ وی یہوواہ لئی ایہو جہی محبت اے تے تُسی بپتسمہ لین دا فیصلہ نہ تے اپنے دوستاں دے ویکھا ویکھی کرو گے تے نہ ای اپنے ماں پیو یاں بائبل کورس کران والے بھین بھرا نُوں خوش کرن لئی۔‏

8.‏ شکرگزاری دا جذبہ تواڈی مدد کیویں کرے گا کہ تُسی اپنی زندگی یہوواہ دے ناں کرو؟ (‏زبور 116:‏12-‏14‏)‏

⁸ جدوں تُسی سوچو گے کہ یہوواہ نے تواڈے لئی کیہہ کجھ کیتا اے تے تواڈے دل چ اوہدے لئی شکرگزاری ودھے گی تے ایہہ خواہش پیدا ہوئے گی کہ تُسی اپنی زندگی اوہدے ناں کرو۔ ‏(‏زبور 116:‏12-‏14 نُوں پڑھو۔)‏ بائبل چ دَسیا گیا اے کہ ہر چنگی نعمت تے ہر ودھیا تحفہ یہوواہ وَلّوں مِلدا اے۔ (‏یعقوب 1:‏17‏)‏ ایہناں وچوں سب توں وڈا تحفہ اوہدے پُتر یسوع دی قربانی اے۔ ذرا سوچو کہ فدیے دی وجہ توں ای تُسی یہوواہ دے نیڑے جا سکے او تے توانوں ہمیشاں دی زندگی دی امید مِلی اے۔ (‏1-‏یوحنا 4:‏9، 10،‏ 19‏)‏ اپنی زندگی یہوواہ دے ناں کر کے تُسی ظاہر کرو گے کہ تُسی فدیے لئی تے یہوواہ دِیاں باقی ساریاں نعمتاں لئی دِلوں شکرگزار او۔ (‏اِستثنا 16:‏17؛‏ 2-‏کُرنتھیوں 5:‏15‏)‏ شکرگزاری دے ایس جذبے بارے ہور جانن لئی کتاب ‏”‏خوشیاں بھری زندگی پاؤ—‏ہُن تے ہمیشاں تک“‏ دے سبق نمبر 46 دے نکتہ نمبر 4 نُوں ویکھو۔ ایہدے چ 3 منٹ دی اِک ویڈیو وی شامل اے جدا عنوان اے ‏”‏اَسی خدا نُوں کیہہ دے سکنے آں؟‏‏“‏

کیہہ تُسی اپنی زندگی یہوواہ دے ناں کرن تے بپتسمہ لین لئی تیار او؟‏

9.‏ اِک بندے نُوں دباؤ چ آ کے اپنی زندگی یہوواہ دے ناں کیوں نئیں کرنی چاہی دی؟‏

⁹ شاید توانوں ایہہ محسوس ہوئے کہ تُسی حالے اپنی زندگی یہوواہ دے ناں کرن تے بپتسمہ لین لئی تیار نئیں او۔ یاں فیر شاید توانوں لگے کہ خدا دے معیاراں مطابق زندگی گزارن لئی حالے وی توانوں کجھ تبدیلیاں لیان دی لوڑ اے۔ یاں ہو سکدا اے کہ تُسی ایہہ سوچ رہے ہووو کہ توانوں اپنے ایمان نُوں مضبوط کرن لئی تھوڑا ہور وقت چاہی دا اے۔ (‏کُلسّیوں 2:‏6، 7‏)‏ یاد رکھو کہ کجھ لوک چھیتی یہوواہ دی خدمت کرن دا فیصلہ کردے نیں تے کجھ نُوں تھوڑا وقت لگدا اے۔ سارے نوجوان وی اِکو ای عمر چ اپنی زندگی یہوواہ دے ناں کر کے بپتسمہ نئیں لیندے۔ ایس لئی غور کرو کہ توانوں کیہڑی چیز چ بہتری لیان دی لوڑ اے تے اِنج کردے ویلے اپنا مقابلہ دُوجیاں نال نہ کرو۔—‏گلتیوں 6:‏4، 5‏۔‏

10.‏ جے توانوں لگدا اے کہ تُسی حالے اپنی زندگی یہوواہ دے ناں کرن تے بپتسمہ لین لئی تیار نئیں او تے تُسی کیہہ کر سکدے او؟ (‏ایس بکس نُوں وی ویکھو:‏ ‏”‏ اوہناں نوجواناں لئی جنہاں نے اپنے ماں پیو کولوں سچائی سکھی اے۔‏‏“‏‏)‏

¹⁰ جے توانوں لگدا اے کہ تُسی حالے اپنی زندگی یہوواہ دے ناں کرن لئی تیار نئیں او تے فیر وی اِنج کرن دی کوشش کردے رہوو۔ دُعا چ یہوواہ کولوں مدد منگو تاکہ تُسی ایس منصوبے نُوں پورا کرن لئی اپنی زندگی چ ضروری تبدیلیاں لیا سکو۔ (‏فِلپّیوں 2:‏13؛‏ 3:‏16‏)‏ تُسی ایس گل دا پکا یقین رکھ سکدے او کہ یہوواہ تواڈی دُعا ضرور سُنے گا تے تواڈی مدد کرے گا۔—‏1-‏یوحنا 5:‏14‏۔‏

کجھ لوک بپتسمہ لین توں کیوں جھجک دے نیں؟‏

11.‏ یہوواہ ساڈی مدد کیویں کرے گا تاکہ اَسی اوہدے وفادار رہ سکئے؟‏

¹¹ کجھ لوک اپنی زندگی یہوواہ دے ناں کرن تے بپتسمہ لین لئی تیار نیں پر اوہ فیر وی ایہہ قدم نئیں چُک دے۔ شاید اوہ ایس گلوں پریشان ہون کہ بپتسمہ لین توں بعد کِتے اوہناں کولوں کوئی وڈا گُناہ نہ ہو جائے تے اوہناں نُوں کلیسیا چوں خارج نہ کر دِتا جائے۔ جے توانوں وی ایس گل دا ڈر اے تے یقین رکھو کہ یہوواہ تواڈی مدد کرے گا تاکہ تُسی اوہدے معیاراں تے چل کے پوری طرحاں اوہنوں خوش کر سکو۔ (‏کُلسّیوں 1:‏10‏)‏ اوہ توانوں صحی کم کرن دی طاقت دَوے گا۔ اوہنے دُوجیاں دی وی اِنج کرن چ مدد کیتی اے۔ (‏1-‏کُرنتھیوں 10:‏13‏)‏ ایہی وجہ اے کہ کلیسیاواں توں گھٹ ای لوک خارج ہوندے نیں تے زیادہ تر لوک یہوواہ دے وفادار رہندے نیں۔‏

12.‏ اَسی کوئی وڈا گُناہ کرن توں کیویں بچ سکنے آں؟‏

¹² عیب‌دار ہون دی وجہ توں کسے وی انسان دے دل چ غلط خواہشاں آ سکدیاں نیں۔ (‏یعقوب 1:‏14‏)‏ پر فیصلہ تواڈا اے کہ تُسی اوہناں نُوں پورا کرو گے یاں نئیں۔‏ ایہدا مطلب اے کہ ایہہ تواڈے ہتھ چ وے کہ  تُسی کیہو جہی زندگی گزارو گے۔ پر کجھ لوک کہندے نیں کہ ساڈیاں خواہشاں ساڈے تے حاوی ہو جاندیاں نیں ایس لئی ساڈا اپنے اُتے وَس نئیں چلدا۔ پر سچ تے ایہہ وے کہ تُسی اپنیاں غلط خواہشاں نُوں قابو چ رکھنا سکھ سکدے او۔ جے تواڈے دل چ غلط خواہشاں سِر چُک دِیاں وی نیں تے تُسی اوہناں تے عمل نہ کرن دا فیصلہ کر سکدے او۔ گُناہ توں بچن لئی کجھ ہور کم وی کرو جیویں کہ ہر روز دُعا کرو، باقاعدگی نال بائبل دا مطالعیا کرو، عبادتاں تے جاؤ تے دُوجیاں نُوں اپنے ایمان بارے دَسو۔ جدوں تُسی ایہہ کم کردے رہوو گے تے تُسی یہوواہ نال کیتے اپنے وعدے تے قائم رہ سکو گے۔ نالے کدی نہ بھلو کہ یہوواہ ایہہ سارے کم کرن چ تواڈی مدد کرے گا۔—‏گلتیوں 5:‏16‏۔‏

13.‏ یوسف نے کیہو جہی مثال قائم کیتی؟‏

¹³ جدوں تُسی پہلاں توں سوچو گے کہ تُسی ازمیش دا سامنا کردے ویلے کیہہ کرو گے تے تواڈے لئی یہوواہ دا وفادار رہنا زیادہ اسان ہوئے گا۔ بائبل چ سانوں بوہت سارے ایہو جہے لوکاں بارے دَسیا گیا اے جنہاں نے اِنج ای کیتا سی۔ بھانویں کہ اوہ ساڈے وانگوں عیب دار سن پر فیر وی اوہ یہوواہ دے وفادار رہے۔ مثال لئی، فوطیفار دی بیوی یوسف تے ایہہ دباؤ پاندی رہی کہ اوہ اوہدے نال غلط کم کرے۔ پر یوسف نُوں پہلے توں ای پتہ سی کہ اوہ کیہہ کرے گا۔ بائبل چ دَسیا گیا اے کہ یوسف نے اِنج کرن توں منع کر دِتا تے اوہنوں کہیا:‏ مَیں ایناں بھیڑا کم کر کے خدا دے خلاف گُناہ کیوں کراں؟ (‏پیدائش 39:‏8-‏10‏)‏ ایس گل توں صاف ظاہر ہوندا اے کہ فوطیفار دی بیوی دے اُکسان توں پہلاں ای یوسف نُوں پتہ سی کہ اوہ کیہہ کرے گا۔ ایس لئی اِنکار کرنا وی اوہدے لئی زیادہ اسان سی۔‏

14.‏ اَسی گُناہ کرن دی ازمیش توں بچنا کیویں سکھ سکنے آں؟‏

¹⁴ تُسی یوسف دی مثال تے کیویں عمل کر سکدے او؟ تُسی ہُن توں ای فیصلہ کر سکدے او کہ جدوں توانوں کوئی گُناہ کرن دی ازمیش دا سامنا ہوئے گا تے تُسی کیہہ کرو گے۔ اوہناں کماں نُوں فوراً رَد کرنا سکھو جنہاں توں یہوواہ نفرت کردا اے، ایتھوں تک کہ اوہناں بارے سوچو وی نہ۔ (‏زبور 97:‏10؛‏ 119:‏165‏)‏ اِنج تُسی گُناہ کرن توں بچ جاؤ گے کیونکہ توانوں پہلاں توں ای پتہ ہوئے گا کہ تُسی کیہہ کرنا اے۔‏

15.‏ اِک بندہ کیویں ظاہر کر سکدا اے کہ اوہ لگن نال یہوواہ دی خدمت کرنا چاہندا اے؟ (‏عبرانیوں 11:‏6‏)‏

¹⁵ شاید توانوں یقین ہو گیا اے کہ توانوں سچائی مِل گئی اے تے تُسی پورے دل نال یہوواہ دی خدمت کرنا چاہندے او۔ پر فیر وی کوئی چیز توانوں اپنی زندگی یہوواہ دے ناں کرن تے بپتسمہ لین توں روک رہی اے۔ تے کیوں نہ تُسی بادشاہ داؤد دی مثال تے غور کرو تے اوہدے وانگوں دُعا چ یہوواہ نُوں کہوو:‏ تُوں مینوں جانچ تے میرے دل نُوں پچھان۔ مینوں پرکھ تے میرے خیالاں نُوں جان لے۔ ویکھ کہ میرے چ کوئی ایہو جہی چیز تے نئیں جیہڑی مینوں بُری راہ تے لے جائے، تُوں مینوں ہمیشاں دی زندگی دی راہ تے لے چل۔ (‏زبور 139:‏23، 24‏)‏ یہوواہ اوہناں لوکاں نُوں برکتاں دیندا اے جیہڑے لگن نال اوہدی خدمت کرنا چاہندے نیں۔  جدوں تُسی اپنی زندگی یہوواہ دے ناں کرن تے بپتسمہ لین لئی اَگے ودھدے او تے تُسی ظاہر کردے او کہ تُسی وی لگن نال اوہدی خدمت کرنا چاہندے او۔‏‏—‏عبرانیوں 11:‏6 نُوں پڑھو۔‏

یہوواہ دے نیڑے ہوندے جاؤ

16، 17.‏ جیہڑے لوک بچپن توں ای سچائی سکھ رہے نیں، یہوواہ اوہناں نُوں اپنے وَل کیویں کھچدا اے؟ (‏یوحنا 6:‏44‏)‏

¹⁶ یسوع نے کہیا کہ جیہڑے لوک اوہدے شاگرد بن دے نیں، اوہناں نُوں یہوواہ اوہدے کول لیاندا اے۔ ‏(‏یوحنا 6:‏44 نُوں پڑھو۔)‏ سوچو کہ ایہہ شاندار گل تواڈے تے کیویں لاگو ہوندی اے۔ یہوواہ صرف اوس بندے نُوں اپنے وَل کھچدا اے جدے چ اوہ کجھ اچھا ویکھدا اے۔ یہوواہ دی نظر چ اوہ بندہ اوہدی خاص ملکیت ہوندا اے۔ (‏اِستثنا 7:‏6‏)‏ یہوواہ تواڈے بارے وی اِنج ای سوچدا اے۔‏

¹⁷ شاید تُسی اپنے ماں پیو کولوں سچائی سکھی اے تے توانوں لگدا اے کہ یہوواہ توانوں اپنے کول نئیں لیایا سگوں تُسی بس اپنے ماں پیو دی وجہ توں اوہدی خدمت کر رہے او۔ پر یاد رکھو کہ بائبل چ دَسیا گیا اے:‏ خدا دے نیڑے جاؤ تے اوہ تواڈے نیڑے آئے گا۔ (‏یعقوب 4:‏8؛‏ 1-‏تواریخ 28:‏9‏)‏ جدوں تُسی یہوواہ دے نیڑے جان چ پہل کردے او تے بدلے چ اوہ وی تواڈے نیڑے آندا اے۔ یہوواہ توانوں صرف ایس لئی نئیں پیار کردا کہ تُسی اِک ایہو جہے خاندان دے ممبر او جیہڑا اوہدی خدمت کردا اے سگوں اوہ اپنے ہر بندے نُوں چنگی طرحاں جان دا اے۔ اوہ ہر بندے نُوں ذاتی طور تے اپنے وَل کھچدا اے تے ایہناں چ اوہ لوک وی شامل نیں جنہاں نے بچپن توں ای اپنے ماں پیو کولوں سچائی سکھی سی۔ جدوں ایہو جہے لوک یہوواہ دے نیڑے جان چ پہل کردے نیں تے یعقوب 4:‏8 دے مطابق یہوواہ وی اوہناں دے نیڑے جاندا اے۔—‏2-‏تھسلُنیکیوں 2:‏13 تے غور کرو۔‏

18.‏ اگلے مضمون چ اَسی کیس بارے گل کراں گے؟ (‏زبور 40:‏8‏)‏

¹⁸ جدوں تُسی اپنی زندگی یہوواہ دے ناں کر کے بپتسمہ لیندے او تے تُسی یسوع دی مثال تے عمل کر رہے ہوندے او۔ اوہنے اپنے باپ دی مرضی نُوں پورا کرن لئی خوشی نال اپنے آپ نُوں پیش کیتا۔ ‏(‏زبور 40:‏8 نُوں پڑھو؛‏ عبرانیوں 10:‏7‏)‏ اگلے مضمون چ اَسی ایس بارے گل کراں گے کہ کیہڑی چیز تواڈی مدد کرے گی کہ تُسی بپتسمے دے بعد وفاداری نال یہوواہ دی خدمت کردے رہوو۔‏