1.‏ یہوواہ دے کجھ بندیاں نُوں کیہڑی گل تے یقین کرنا مشکل لگدا اے؟‏

 سانوں ایس گل توں بڑا حوصلہ مِلدا اے کہ یہوواہ اپنے بندیاں توں خوش اے۔ بائبل چ دَسیا گیا اے:‏ یہوواہ اپنے لوکاں توں خوش ہوندا اے۔ (‏زبور 149:‏4‏)‏ پر شاید کدی کدار اَسی اینے مایوس ہو جائیے کہ اَسی سوچن لگ پئیے کہ ”‏کیہہ یہوواہ میرے توں خوش اے؟“‏ بائبل چ وی ایہو جہے کئی لوکاں بارے دَسیا گیا اے جنہاں نُوں کدی کدار ایس گل تے یقین کرنا مشکل لگدا سی۔—‏1-‏سموئیل 1:‏6-‏10؛‏ ایوب 29:‏2،‏ 4؛‏ زبور 51:‏11‏۔‏

2.‏ یہوواہ کیہڑے لوکاں توں خوش ہوندا اے؟‏

² بائبل چ صاف صاف دَسیا گیا اے کہ عیب‌دار انسان یہوواہ نُوں خوش کر سکدے نیں۔ پر ایہدے لئی ضروری اے کہ اَسی یسوع مسیح تے ایمان ظاہر کرئیے تے بپتسمہ لئیے۔ (‏یوحنا 3:‏16‏)‏ بپتسمہ لے کے اَسی ساریاں سامنے ایہہ ظاہر کرنے آں کہ اَسی اپنے گُناہواں توں توبہ کر لئی اے تے خدا نال وعدہ کیتا اے کہ اَسی اوہدی مرضی تے چلاں گے۔ (‏اعمال 2:‏38؛‏ 3:‏19‏)‏ جدوں اَسی یہوواہ دے نیڑے جان لئی ایہہ قدم چُکنے آں تے اوہ بڑا خوش ہوندا اے۔ جے اَسی پوری کوشش کراں گے کہ اَسی یہوواہ نال کیتے اپنے وعدے دے مطابق چلدے رہیے تے اوہ ساڈے توں خوش ہوئے گا تے ساڈے نال دوستی قائم رکھے گا۔—‏زبور 25:‏14‏۔‏

3.‏ ایس مضمون چ اَسی کیہڑے سوالاں تے غور کراں گے؟‏

³ کجھ لوکاں نُوں کدی کدی ایہہ کیوں لگدا اے کہ یہوواہ اوہناں توں خوش نئیں اے؟ یہوواہ ایہہ کیویں ظاہر کردا اے کہ اوہ ساڈے توں خوش اے؟ اِک مسیحی ایس گل تے اپنا بھروسا کیویں ودھا سکدا اے کہ یہوواہ اوہدے توں خوش اے؟‏

کجھ لوکاں نُوں ایہہ کیوں لگدا اے کہ یہوواہ اوہناں توں خوش نئیں اے؟‏

4، 5.‏ جے سانوں لگدا اے کہ ساڈی کوئی اہمیت نئیں اے تے فیر وی سانوں کیہڑی گل دا یقین رکھنا چاہی دا اے؟‏

⁴ ساڈے وچوں کئی بھین بھراواں نُوں بچپن توں ای ایہہ لگدا اے کہ اوہناں دی کوئی اہمیت نئیں اے۔ (‏زبور 88:‏15‏)‏ بھرا ایڈرین نے کہیا:‏ ”‏مینوں شروع توں ای لگدا سی کہ مَیں بے‌کار آں۔ مینوں یاد اے کہ بچپن چ مَیں ایہہ دُعا کرنا ہُنا ساں کہ میرے گھر والے نوِیں دُنیا چ جان۔ پر مینوں یقین سی کہ مَیں  نوِیں دُنیا چ جان دے لائق نئیں آں۔“‏ بھرا ٹونی اک ایہو جہے گھر چ جمیا پلیا جیہڑا یہوواہ دا گواہ نئیں سی۔ اوہ کہندا اے:‏ ”‏میرے ماں پیو نے مینوں کدی نئیں کہیا کہ اوہ مینوں پیار کردے نیں یاں میرے تے فخر کردے نیں۔ ایس لئی مینوں ہمیشاں لگدا سی کہ مَیں اوہناں نُوں کدی خوش نئیں کر سکاں گا۔“‏

⁵ جے کدی کدار سانوں لگدا اے کہ ساڈی کوئی اہمیت نئیں اے یاں اَسی بے‌کار آں تے اَسی یاد رکھ سکنے آں کہ یہوواہ آپ سانوں اپنے کول لیایا اے۔ (‏یوحنا 6:‏44‏)‏ اوہ ساڈیاں اوہناں خوبیاں تے دھیان دیندا اے جیہڑیاں سانوں آپ نظر نئیں آندیاں تے اوہنوں پتہ اے کہ اَسی اندروں کیہو جہے انسان آں۔ (‏1-‏سموئیل 16:‏7؛‏ 2-‏تواریخ 6:‏30‏)‏ ایس لئی جدوں اوہ سانوں کہندا اے کہ اَسی اوہدے لئی خاص آں تے اَسی اوہدی ایس گل تے پورا یقین کر سکنے آں۔—‏1-‏یوحنا 3:‏19، 20‏۔‏

6.‏ پولُس رسول نے مسیحی بنن توں پہلاں جیہڑے گُناہ کیتے سن، اوہناں دی وجہ توں اوہ کیہو جیہا محسوس کردا سی؟‏

⁶ سچائی سکھن توں پہلاں ساڈے چوں کجھ نے ایہو جہے گُناہ کیتے سن جنہاں دی وجہ توں شاید اَسی اَج وی شرمندگی محسوس کرنے آں۔ (‏1-‏پطرس 4:‏3‏)‏ ایتھوں تک کہ جیہڑے مسیحی وفاداری نال یہوواہ دی خدمت کر رہے نیں، اوہناں نُوں وی گُناہ کرن دی ازمیش نال لڑنا پیندا اے۔ جے ایہہ گلاں تواڈے بارے وی سچ نیں تے کیہہ توانوں اِنج لگدا اے کہ یہوواہ توانوں کدی معاف نئیں کر سکدا؟ جے ہاں تے توانوں ایس گل توں تسلی مِل سکدی اے کہ یہوواہ دے کئی وفادار بندے وی اِنج ای محسوس کردے سن۔ مثال لئی، جدوں پولُس رسول اپنیاں خامیاں تے غور کردا سی تے اوہ بڑا بے‌بس محسوس کردا سی۔ (‏رومیوں 7:‏24‏)‏ ظاہر اے کہ پولُس رسول نے اپنے گُناہواں توں توبہ کر لئی سی تے بپتسمہ وی لیا سی۔ پر فیر وی اوہ اپنے بارے کہندا سی کہ مَیں سارے رسولاں وچوں چھوٹا رسول آں تے سب توں وڈا گُناہ‌گار آں۔—‏1-‏کُرنتھیوں 15:‏9؛‏ 1-‏تیمُتھیُس 1:‏15‏۔‏

7.‏ اَسی ماضی چ جیہڑے گُناہ کیتے سن، اوہناں بارے سانوں کیہڑی گل یاد رکھنی چاہی دی اے؟‏

⁷ ساڈے اسمانی باپ یہوواہ نے وعدہ کیتا اے کہ جے اَسی اپنے گُناہواں توں دلوں توبہ کراں گے تے اوہ سانوں معاف کرے گا۔ (‏زبور 86:‏5‏)‏ ایس لئی جے اَسی اپنے اوہناں گُناہواں تے دلوں شرمندہ واں جیہڑے اَسی ماضی چ کیتے سن تے اَسی ایس گل دا یقین رکھ سکنے آں کہ یہوواہ نے سانوں معاف کر دِتا اے۔—‏کُلسّیوں 2:‏13‏۔‏

8، 9.‏ اَسی ایس سوچ تے قابو پان لئی کیہہ کر سکنے آں کہ یہوواہ ساڈی خدمت توں خوش نئیں؟‏

⁸ اَسی سارے ودھ چڑھ کے یہوواہ دی خدمت کرنا چاہنے آں۔ پر شاید کجھ بھین بھرا سوچن کہ اوہ کدی وی یہوواہ دی خدمت چ اوناں نئیں کر سکن گے جدے توں اوہ خوش ہوئے۔ بھین امینڈا کہندی اے:‏ ”‏مَیں سوچنی ساں کہ بہترین طریقے نال یہوواہ دی خدمت کرن دا مطلب ایہہ وے کہ مَیں جو کجھ کر رہی آں، اوس توں زیادہ کراں۔ ایس لئی مَیں اکثر یہوواہ دی خدمت چ اوس توں زیادہ کرن دی کوشش کرنی ساں جِنّاں مَیں کر سکنی آں۔ تے فیر جدوں مَیں اِنج کرن چ ناکام ہو جانی ساں تے مَیں سوچنی ساں کہ جِنّی مَیں اپنے آپ توں مایوس ہوئی آں، یہوواہ وی اوناں ای مایوس ہویا ہوئے گا۔“‏

⁹ اَسی ایس سوچ تے قابو پان لئی کیہہ کر سکنے آں کہ اَسی یہوواہ دی خدمت چ جو کجھ کر رہے آں، اوہ اوہدے لئی کافی نئیں اے؟ سب توں پہلے تے یاد رکھو کہ یہوواہ سخت نئیں اے۔ اوہ کدی وی ساڈے کولوں اوہ کرن دی توقع نئیں کردا جنہوں کرنا ساڈے وَس چ ای نئیں اے۔ ایہدی بجائے اَسی اپنے پورے دل تے جان نال اوہدی خدمت چ جو کجھ وی کرنے آں، اوہ اوہدی بڑی قدر کردا اے۔ ایہدے علاوہ بائبل چوں وی اوہناں لوکاں دِیاں مثالاں تے غور کرو جنہاں نے پورے دل تے جان نال اوہدی خدمت کیتی۔ ذرا پولُس رسول بارے سوچو۔ اوہنے کئی سالاں تک بڑے جوش نال یہوواہ دی خدمت کیتی۔ اوہنے ہزاراں میل سفر کیتا تے کئی کلیسیاواں بنان چ مدد کیتی۔ پر جدوں اوہ اپنے حالات دی وجہ توں مُنادی دے کم چ زیادہ حصہ لین دے قابل نئیں رہیا تے کیہہ یہوواہ اوہدے توں خوش نئیں سی؟ ایہہ گل نئیں اے۔ پولُس اوہ کم کردا رہیا، جو اوہ کر سکدا سی تے یہوواہ وی اوہنوں برکتاں دیندا رہیا۔ (‏اعمال 28:‏30، 31‏)‏ ایسے طرحاں ہو سکدا اے کہ کدی کدار اَسی یہوواہ دی خدمت چ اوناں نہ کر سکئے جِنّاں اَسی کرنا چاہنے آں۔ پر یہوواہ دی نظر چ ایہہ گل زیادہ اہم اے کہ اَسی جو کجھ کرنے آں، کیہڑے جذبے نال کرنے آں۔ آؤ ہُن غور کرنے آں کہ یہوواہ کیہڑے طریقیاں نال ظاہر کردا اے کہ اوہ ساڈے توں خوش اے۔‏

 یہوواہ کیویں ظاہر کردا اے کہ اوہ ساڈے توں خوش اے؟‏

10.‏ سانوں ایہہ کیویں پتہ چل سکدا اے کہ یہوواہ ساڈے توں خوش اے؟ (‏یوحنا 16:‏27‏)‏

¹⁰ بائبل دے ذریعے۔‏ یہوواہ جیہڑے لوکاں نُوں پیار کردا اے، اوہ اوہناں نُوں ایہہ دَسن دے موقعے لبھدا رہندا اے کہ اوہ اوہناں توں خوش اے۔ پاک کلام چ دو ایہو جہے واقعیاں دا ذکر کیتا گیا اے جدوں یہوواہ نے یسوع نُوں دَسیا کہ اوہ اوہدا پیارا پُتر اے تے اوہ اوہدے توں خوش اے۔ (‏متی 3:‏17؛‏ 17:‏5‏)‏ جے یہوواہ ایہہ گل توانوں وی کہوے تے توانوں کیہو جیہا لگے گا؟ اَسی یہوواہ دی آواز تے نئیں سُن سکدے پر اوہ اپنے کلام دے ذریعے ساڈے نال گل کردا اے۔ جدوں اَسی اِنجیلاں چ یسوع دِیاں گلاں پڑھ رہے ہُنے آں تے اک لحاظ نال اَسی یہوواہ دی آواز سُن رہے ہُنے آں۔ ‏(‏یوحنا 16:‏27 نُوں پڑھو۔)‏ یسوع نے پوری طرحاں اپنے باپ دِیاں خوبیاں ظاہر کیتیاں۔ ایس لئی جدوں اَسی بائبل چ پڑھنے آں کہ یسوع نے اپنے عیب‌دار پر وفادار شاگرداں نُوں ایہہ دَسیا کہ اوہ اوہناں نُوں پیار کردا اے تے اوہناں توں خوش اے تے اَسی ایہہ سوچ سکنے آں کہ یہوواہ ایہہ ساریاں گلاں سانوں کہہ رہیا اے۔—‏یوحنا 15:‏9،‏ 15‏۔‏

11.‏ مشکلاں سہن دا ایہہ مطلب کیوں نئیں ہوندا کہ یہوواہ ساڈے توں خوش نئیں اے؟ (‏یعقوب 1:‏12‏)‏

¹¹ ساڈی مدد کرن نال۔‏ یہوواہ ساڈی مدد کرنا چاہندا اے جیویں کہ اوہ ساڈیاں ضرورتاں پوریاں کرنا چاہندا اے۔ پر کدی کدار اوہ ساڈے تے آن والیاں کجھ مشکلاں نُوں نئیں روکدا جیویں اوہنے ایوب تے آن والیاں مشکلاں نُوں نئیں روکیا۔ (‏ایوب 1:‏8-‏11‏)‏ پر جدوں ساڈے اُتے مشکلاں آندیاں نیں تے ایہدا مطلب ایہہ نئیں ہوندا کہ یہوواہ ساڈے توں خوش نئیں اے۔ سگوں اوس ویلے سانوں ایہہ ظاہر کرن دا موقع مِلدا اے کہ اَسی یہوواہ نُوں کِنّاں پیار کرنے آں تے اوہدے تے کِنّاں بھروسا کرنے آں۔ ‏(‏یعقوب 1:‏12 نُوں پڑھو۔)‏ یہوواہ وی مشکل ویلے چ ساڈا ساتھ دیندا اے تے ایہنوں برداشت کرن چ ساڈی مدد کردا اے۔‏

12.‏ اَسی بھرا دیمیتری دے تجربے توں کیہہ سکھ سکنے آں؟‏

¹² ذرا ایشیا چ رہن والے اک بھرا دیمیتری دی مثال تے غور کرو۔ اوہدی نوکری چھٹ گئی تے کئی مہینیاں تک اوہنوں کوئی کم نئیں مِلیا۔ ایس لئی اوہنے فیصلہ کیتا کہ اوہ مُنادی دے کم چ زیادہ حصہ لوے گا تے اِنج ظاہر کرے گا کہ اوہ یہوواہ تے بھروسا رکھدا اے۔ فیر کئی مہینے لنگھن دے بعد وی بھرا نُوں کوئی نوکری نہ ملی۔ ایس توں بعد اوہدی صحت خراب ہونی شروع ہو گئی تے اوہ ایناں بیمار ہو گیا کہ اوہ بسترے تے پے گیا۔ اوہ سوچن لگ پیا کہ اوہ اک چنگا شوہر تے چنگا باپ نئیں اے تے یہوواہ اوہدے توں خوش نئیں اے۔ فیر اک دن اوہدی دھی اوہدے کول اک کاغذ لے کے آئی تے اوہنوں کہیا:‏ ”‏ابو، جدوں وی تُسی پریشان ہووو تے ایس ایت نُوں پڑھ لینا۔“‏ اوہ اوس کاغذ تے یسعیاہ 30:‏15 لکھ کے لیائی سی جتھے یہوواہ کہندا اے:‏  ‏”‏اِطمینان تے بھروسا رکھن نال توانوں طاقت ملے گی۔“‏ بھرا دیمیتری نُوں احساس ہویا کہ اوہنوں یہوواہ دا شکر کرنا چاہی دا اے کہ اوہدے گھر والیاں کول حالے وی کھان پین دِیاں شیواں، کپڑے تے رہن لئی گھر ہے وے۔ اوہنے کہیا:‏ ”‏مینوں پریشان ہون دی بجائے خدا تے بھروسا رکھن دی لوڑ سی۔“‏ جے تُسی وی کسے ایہو جہی مشکل دا سامنا کر رہے او تے بھروسا رکھو کہ یہوواہ نُوں تواڈی فکر اے تے اوہ ایس مشکل نُوں برداشت کرن چ تواڈی مدد کرے گا۔‏

13.‏ یہوواہ کنہاں دے ذریعے سانوں دَسدا اے کہ اوہ ساڈے توں خوش اے؟‏

¹³ ساڈے ہم‌ایماناں دے ذریعے۔‏ یہوواہ ساڈے ہم‌ایماناں دے ذریعے سانوں دَسدا اے کہ اوہ ساڈے توں خوش اے۔ مثال لئی، اوہ اوہناں دے دل چ ایہہ گل پا سکدا اے کہ اوہ ٹھیک اوس ویلے سانوں کوئی حوصلہ ودھان والی گل کہن جدوں سانوں ایہدی سخت ضرورت ہوندی اے۔ ایشیا چ رہن والی اِک بھین نے وی ایسے گل دا تجربہ کیتا۔ اوہدی نوکری چھٹ گئی سی تے اوہ بڑی بیمار ہو گئی سی۔ فیر اوہدے شوہر نے اِک وڈا گُناہ کیتا تے اوہنوں بزرگ توں ہٹا دِتا گیا۔ اوہ دَسدی اے:‏ ”‏مینوں سمجھ نئیں آ رہی سی کہ ایہہ سب کجھ کیوں ہو رہیا اے۔ مینوں لگیا کہ شاید میری کسے غلطی دی وجہ توں یہوواہ میرے توں ناراض ہو گیا اے۔“‏ بھین نے یہوواہ کولوں اِلتجا کیتی کہ اوہ اوہنوں ایس گل دا یقین دَوائے کہ اوہ اوہدے توں خوش اے۔ یہوواہ نے اوہنوں ایس گل دا یقین کیویں دَوایا؟ اوہ کہندی اے:‏ ”‏کلیسیا دے بزرگاں نے میرے نال گل کیتی تے مینوں یقین دَوایا کہ یہوواہ مینوں پیار کردا اے۔“‏ بعد چوں اوہنے دُبارہ یہوواہ کولوں ایہی اِلتجا کیتی تے اوسے دن اوہنوں کجھ بھین بھراواں وَلّوں اک خط مِلیا۔ اوہ دَسدی اے:‏ ”‏جدوں مَیں اوس خط چ بھین بھراواں دِیاں تسلی دین والیاں گلاں پڑھیاں تے مینوں محسوس ہویا کہ یہوواہ نے میری دُعا دا جواب دِتا اے۔“‏ واقعی ساڈے بھین بھراواں دِیاں حوصلہ ودھان والیاں گلاں دے ذریعے یہوواہ سانوں ایہہ دَسدا اے کہ اوہ ساڈے توں خوش اے۔—‏زبور 10:‏17‏۔‏

14.‏ یہوواہ ہور کیہڑے طریقے نال ظاہر کردا اے کہ اوہ ساڈے توں خوش اے؟‏

¹⁴ جدوں یہوواہ ساڈے ہم‌ایماناں دے ذریعے ساڈی درستی کردا اے تے اِنج وی اوہ ظاہر کردا اے کہ اوہ ساڈے توں خوش اے۔ مثال لئی، اوہنے پہلی صدی چ پولُس رسول دے ذریعے 14 خط لکھوائے۔ ایہناں  خطاں چ پولُس نے یہوواہ دے الہام توں پیار نال پر صاف صاف لفظاں چ ایہو جہیاں گلاں لکھیاں جنہاں توں اوہدے ہم‌ایماناں دی درستی ہوئی۔ یہوواہ نے پولُس رسول کولوں ایہہ گلاں کیوں لکھوائیاں؟ کیونکہ یہوواہ اِک چنگا باپ اے تے اپنے اوہناں بچیاں دی درستی کردا اے جنہاں توں اوہ خوش ہوندا اے۔ (‏اَمثال 3:‏11، 12‏)‏ ایہدے توں پتہ چلدا اے کہ جدوں کوئی بائبل چوں ساڈی درستی کردا اے تے ایہدا ایہہ مطلب نئیں ہوندا کہ یہوواہ ساڈے توں ناراض اے سگوں ایہدے توں ظاہر ہوندا اے کہ اوہ ساڈے توں خوش اے۔ (‏عبرانیوں 12:‏6‏)‏ ہور کیہڑیاں گلاں توں پتہ چلدا اے کہ یہوواہ ساڈے توں خوش اے؟‏

ہور کیہڑیاں گلاں توں پتہ چلدا اے کہ یہوواہ ساڈے توں خوش اے؟‏

15.‏ یہوواہ کنہاں نُوں اپنی پاک روح دیندا اے تے ایہدے توں سانوں کیہڑی گل دا یقین ہو جاندا اے؟‏

¹⁵ یہوواہ اوہناں لوکاں نُوں اپنی پاک روح دیندا اے جنہاں توں اوہ خوش اے۔ (‏متی 12:‏18‏)‏ اَسی اپنے آپ کولوں پچھ سکنے آں:‏ ”‏کیہہ مَیں اپنی زندگی چ اوہناں خوبیاں نُوں ظاہر کر رہیا واں جیہڑیاں پاک روح دے پھل چ شامل نیں؟“‏ کیہہ تُسی غور کیتا اے کہ ہُن تُسی اوس وقت دے مقابلے چ زیادہ صبر وکھاندے او جدوں تُسی یہوواہ نُوں نئیں جان دے سو؟ اصل چ جِنّاں زیادہ تُسی اپنے اندر اوہناں خوبیاں نُوں پیدا کرو گے جیہڑیاں پاک روح دے پھل چ شامل نیں، اوناں زیادہ توانوں ایس گل دا یقین ہوئے گا کہ یہوواہ تواڈے توں خوش اے۔—‏ایس بکس نُوں ویکھو:‏ ‏”‏ پاک روح دا پھل۔‏‏“‏

16.‏ یہوواہ کیہڑے لوکاں نُوں خوش‌خبری دی مُنادی کرن لئی استمال کردا اے تے ایس بارے جان کے توانوں کیہو جیہا محسوس ہوندا اے؟ (‏1-‏تھسلُنیکیوں 2:‏4‏)‏

¹⁶ یہوواہ نے اوہناں لوکاں نُوں بادشاہی دی خوش‌خبری سُنان دی ذمے‌داری دِتی اے جنہاں توں اوہ خوش اے۔ ‏(‏1-‏تھسلُنیکیوں 2:‏4 نُوں پڑھو۔)‏ ذرا غور کرو کہ بھین جوسلین نُوں مُنادی کرن نال کیہہ فائدہ ہویا۔ اِک دن جدوں اوہ سویرے اُٹھی تے اوہ بڑی اُداس سی۔ اوہ کہندی اے:‏ ”‏مینوں اِنج محسوس ہو رہیا سی جیویں مَیں یہوواہ دی خدمت چ کجھ نئیں کر رہی۔ پر مَیں پہل‌کار ساں تے اوس دن وی مَیں مُنادی تے جانا سی۔ ایس لئی مَیں دُعا کیتی تے مُنادی تے چلی گئی۔“‏ اوسے دن بھین جوسلین دی ملاقات اک عورت نال ہوئی جیہڑی بائبل کورس کرن لئی تیار ہو گئی۔ کجھ مہینیاں بعد اوس عورت نے بھین جوسلین نُوں دَسیا کہ جیس دن اوہ اوہدے گھر آئی، اوس دن اوہ خدا کولوں مدد لئی دُعا کر رہی سی۔ ایس تجربے نُوں یاد کردے ہوئے بھین جوسلین کہندی اے:‏ ”‏مینوں اِنج محسوس ہویا جیویں یہوواہ مینوں دَس رہیا ہوئے کہ مَیں تیرے توں خوش آں۔“‏ سچ اے کہ ہر کوئی ساڈے پیغام نُوں قبول نئیں کردا۔ پر اَسی ایہہ پورا یقین رکھ سکنے آں کہ جدوں اَسی پورے دل تے جان نال مُنادی دے کم چ حصہ لینے آں تے یہوواہ ایہدے توں بوہت خوش ہوندا اے۔‏

17.‏ بھین وکٹوریہ نے فدیے بارے جو کجھ کہیا، اوہدے توں تُسی کیہہ سکھیا اے؟ (‏زبور 5:‏12‏)‏

 ¹⁷ یہوواہ اوہناں سارے لوکاں نُوں اپنے پُتر دے فدیے توں فائدہ دینا چاہندا اے جنہاں توں اوہ خوش اے۔ (‏1-‏تیمُتھیُس 2:‏5، 6‏)‏ پر فدیے تے ایمان رکھن تے بپتسمہ لین دے باوجود جے سانوں محسوس ہوندا اے کہ یہوواہ ساڈے توں خوش نئیں اے تے اَسی کیہہ کر سکنے آں؟ یاد رکھو کہ ساڈی سوچ غلط ہو سکدی اے پر یہوواہ غلط نئیں ہو سکدا۔ جیہڑے لوک اوہدے پُتر دے فدیے تے ایمان رکھدے نیں، اوہ اوہدی نظر چ نیک ہوندے نیں تے اوہ اوہناں نُوں برکتاں دین دا وعدہ کردا اے۔ ‏(‏زبور 5:‏12 نُوں پڑھو؛‏ رومیوں 3:‏26‏)‏ فدیے تے غور کرن نال بھین وکٹوریہ نُوں وی بڑا فائدہ ہویا۔ اِک دن فدیے تے سوچ‌وچار کردے ویلے اوہنوں جیہڑی گل دا احساس ہویا، اوہدے بارے اوہنے کہیا:‏ ”‏یہوواہ بڑے لمے عرصے توں میرے نال صبر نال پیش آ رہیا سی۔ پر مَیں اوہنوں کہہ رہی ساں کہ تُوں میرے ورگے انسان نُوں پیار نئیں کر سکدا۔ تیرے پُتر دا فدیہ میرے گُناہواں نُوں معاف کرن لئی کافی نئیں اے۔“‏ جدوں بھین نے فدیے دی نعمت تے سوچ‌وچار کیتا تے اوہنے ایس گل نُوں محسوس کرنا شروع کر دِتا کہ یہوواہ اوہنوں پیار کردا اے۔ جدوں اَسی وی اِنج کراں گے تے سانوں وی محسوس ہوئے گا کہ یہوواہ سانوں پیار کردا اے تے ساڈے توں خوش اے۔‏

18.‏ جے اَسی اپنے اسمانی باپ یہوواہ نال پیار کردے رہواں گے تے اَسی کیہڑی گل دا یقین رکھ سکاں گے؟‏

¹⁸ شاید اَسی ایس مضمون چ دَسے گئے مشوریاں تے عمل کرن دی سخت کوشش کرئیے۔ پر ایہدے باوجود ہو سکدا اے کہ کدی کدار اَسی مایوس ہو جائیے تے سوچن لگ پئیے کہ یہوواہ ساڈے توں خوش نئیں اے۔ جے توانوں کدی اِنج لگدا اے تے یاد رکھو کہ یہوواہ اوہناں لوکاں توں خوش ہوندا اے جیہڑے اوہدے نال محبت کردے نیں۔ (‏یعقوب 1:‏12‏)‏ ایس لئی یہوواہ دے نیڑے ہوندے جاؤ تے اوہناں طریقیاں تے غور کردے رہوو جنہاں دے ذریعے اوہ توانوں دَسدا اے کہ اوہ تواڈے توں خوش اے۔ ایہہ گل ہمیشاں یاد رکھو کہ یہوواہ ساڈے وچوں کسے توں وی دُور نئیں اے۔—‏اعمال 17:‏27‏۔‏