مطالعے دا مضمون نمبر 47
تواڈا ایمان کِنّاں مضبوط ہوئے گا؟
اپنے دلاں نُوں پریشان نہ ہون دَوو، خدا تے ایمان ظاہر کرو۔—یوحنا 14:1۔
گیت نمبر 119 (خوشی نال گاؤ): ایمان نال چلو
مضمون تے اِک نظر *
1. ساڈے ذہن چ کیہڑا سوال آ سکدا اے؟
کیہہ تُسی ایہہ سوچ کے پریشان ہو جاندے او کہ اَگے جا کے سانوں جھوٹھے مذہب دی تباہی، ماجوج دے جوج دے حملے تے ہر مجدو ن دا سامنا ہوئے گا؟ کیہہ تُسی ایہہ سوچدے او کہ جدوں ایہہ خوفناک واقعے ہو رہے ہون گے تے کیہہ میں یہوواہ دا وفادار رہ سکاں گا؟ جے تواڈے ذہن چ ایہو جہے خیال آندے نیں تے توانوں ایس مضمون دی مرکزی ایت توں بوہت حوصلہ مل سکدا اے۔ یسوع نے اپنے شاگرداں نُوں کہیا:اپنے دلاں نُوں پریشان نہ ہون دَوو، خدا تے ایمان ظاہر کرو۔ (یوحنا 14:1) مضبوط ایمان دی وجہ توں اَسی آن والیاں مشکلاں دا دلیری نال سامنا کر سکنے آں۔
2. (الف) اَسی اپنے ایمان نُوں کیویں مضبوط کر سکنے آں؟ (ب) ایس مضمون چ اَسی کیہڑیاں گلاں تے غور کراں گے؟
2 جے اَسی آن والیاں مشکلاں دا سامنا کرن لئی اپنے ایمان نُوں مضبوط کرنا چاہنے آں تے سانوں ایس گل تے غور کرنا چاہی دا اے کہ اَسی ہُن مشکلاں دوران کیہہ کر رہے آں۔ اِنج اَسی ویکھ سکاں گے کہ سانوں کیہڑیاں گلاں تے اپنے ایمان نُوں مضبوط کرن دی ضرورت اے۔ جدوں وی اَسی کسے مشکل دوران ثابتقدم رہنے آں تے ساڈا ایمان ہور مضبوط ہو جاندا اے تے اَسی آن والیاں مشکلاں لئی تیار ہو جانے آں۔ ایس مضمون چ اَسی چار ایہو جہیاں مشکلاں تے غور کراں گے جنہاں دوران یسوع دے شاگرداں نُوں اپنا ایمان مضبوط کرن دی لوڑ سی۔ فیر اَسی ویکھاں گے کہ اَسی ایہو جہیاں مشکلاں دا سامنا کیویں کر سکنے آں تے ایہہ سانوں آن والیاں مشکلاں لئی کیویں تیار کر سکدیاں نیں۔
ایمان رکھو کہ یہوواہ تواڈیاں ضرورتاں نُوں پورا کرے گا
شاید ساڈے کول اپنیاں بنیادی ضرورتاں پوریاں کرن لئی وی پیسے نہ ہون پر مضبوط ایمان دی وجہ توں اَسی اپنا دھیان یہوواہ دی خدمت تے رکھ سکنے آں۔ (پیراگراف نمبر 3-6 نُوں ویکھو۔)
3. متی 6:30، 33 چ یسوع مسیح نے ایمان بارے کیہڑی گل سمجھائی؟
3 ہر گھر دا سربراہ اپنے گھرانے دِیاں ضرورتاں نُوں پورا کرنا چاہندا اے جیویں کہ روٹی، کپڑ ا تے مکان۔ پر کدی کدی ایہناں بنیادی لوڑاں نُوں پورا کرنا وی بوہت مشکل ہوندا اے۔مثال لئی، ساڈے کجھ بھین بھراواں دی نوکری چھٹ گئی تے لکھاں کوششاں دے باوجود وی اوہناں نُوں کوئی ہور نوکری نئیں مِلی۔ کجھ بھین بھراواں نے ایہو جہی نوکری کرن توں منع کر دِتا جیہڑی مسیحیاں نُوں نئیں کرنی چاہی دی۔ ایہو جہے حالاتاں چ سانوں مضبوط ایمان رکھنا چاہی دا اے کہ یہوواہ کسے نہ کسے طریقے نال ساڈے گھر والیاں دِیاں لوڑاں نُوں ضرور پورا کرے گا۔ یسوع مسیح نے پہاڑی وعظ چ اپنے شاگرداں نُوں ایہہ گل صاف صاف سمجھائی۔ (متی 6:30، 33 نُوں پڑھو۔) جدوں سانوں پکا یقین ہوئے گا کہ یہوواہ سانوں کدی کلّا نئیں چھڈے گا تے اَسی اپنا پورا دھیان اوہدی خدمت تے بادشاہی تے لا سکاں گے۔ جدوں اَسی ویکھاں گے کہ یہوواہ کیویں ساڈیاں ضرورتاں نُوں پورا کر رہیا اے تے اَسی اوہدے ہور نیڑے ہو جاواں گے تے اوہدے تے ساڈا ایمان ہور مضبوط ہو جائے گا۔
4، 5. کیہڑی چیز نے اِک خاندان دی مدد کیتی تاکہ اوہ اپنی بنیادی ضرورتاں بارے حدوں ودھ پریشان نہ ہون؟
4 ذرا ملک وینزویلا چ رہن والے بھرا میگیل دے خاندان دی مثال تے غور کرو، جنہے ویکھیا کہ مشکلاں دوران یہوواہ نے اوہدیاں بنیادی ضرورتاں نُوں کیویں پورا کیتا۔ اوہناں دا اپنا اِک کھیت سی جدے ذریعے اوہ روزی روٹی کماندے سن۔ پر اوتھوں دے غنڈیاں نے ہتھیاراں دے زور تے اوہناں دی زمین تے قبضہ کر لیا تے اوہناں نُوں اوتھوں بھجا دِتا۔ بھرا میگیل نے دَسیا: ”ہُن اَسی گزارہ کرن لئی اِک چھوٹا جیہا کھیت کرائے تے لیا ہویا اے۔ ہر صبح میں یہوواہ کولوں دُعا کرنا واں کہ اوہ اَج دِیاں ساڈیاں ضرورتاں نُوں پورا کرے۔“ بھرا میگیل تے اوہدے گھر والیاں نُوں کئی مشکلاں دا سامنا کرنا پیندا اے۔ پر اوہناں نُوں پورا بھروسا اے کہ ساڈا اسمانی باپ یہوواہ اوہناں دِیاں ضرورتاں نُوں پورا کردا رہوے گا۔ اپنے پکے ایمان دی وجہ توں اوہ باقاعدگی نال عبادتاں تے مُنادی چ جاندے نیں۔ اوہ خدا دی بادشاہی نُوں اپنی زندگی چ پہلا درجہ دیندے نیں تے یہوواہ اوہناں دی ہر ضرورت نُوں پورا کردا اے۔
5 ایس اوکھے ویلے دے دوران وی بھرا میگیل تے اوہدی بیوی یورائے اپنا دھیان ایس گل تے رکھدے نیں کہ یہوواہ اوہناں دا خیال کیویں رکھ رہیا اے۔ کدی کدی یہوواہ بھین بھراواں دے ذریعے اوہناں نُوں ضرورت دِیاں چیزاں دیندا اے یاں کدی کدی اوہ کم لبھن چ بھرا میگیل دی مدد کردے نیں۔ کئی وار یہوواہ نے اوس ملک چ ساڈی برانچ دے ذریعے اوہناں لئی اِمداد دا بندوبست کیتا۔ یہوواہ نے کدی وی اوہناں نُوں کلّا نئیں چھڈیا، جدی وجہ توں اوہناں دا ایمان ہور وی مضبوط ہو گیا اے۔ بھرا میگیل دی وڈی دھی یوسلین نے اِک خاص واقعہ دَسیا جدوں یہوواہ نے اوہناں دی مدد کیتی۔ تے فیر اوہنے کہیا: ”جدوں اَسی ویکھنے آں کہ یہوواہ کیہڑے کیہڑے طریقیاں نال ساڈی مدد کر رہیا اے تے ایہدے توں سانوں بڑا حوصلہ مِلدا اے۔ یہوواہ اِک ایہو جیہا دوست اے جدے تے میں زندگی دے ہر موڑ تے بھروسا کر سکنی آں۔ ایہناں مشکلاں دی وجہ توں اَسی مستقبل چ آن والیاں وڈیاں وڈیاں مصیبتاں دا سامنا کرن لئی تیار ہو گئے آں۔“
6. تُسی اوس وقت اپنے ایمان نُوں مضبوط کیویں کر سکدے او جدوں تواڈے کول اپنیاں بنیادی ضرورتاں پوریاں کرن لئی وی پیسے نئیں ہوندے؟
6 جے توانوں پیسے دھیلے دی تنگی دا سامنا کرنا پے رہیا اے تے ایہہ بےشک تواڈے لئی بڑا اوکھا ویلا اے۔ تُسی ایس وقت دے دوران اپنا ایمان ہور پکا کر سکدے او۔ یہوواہ کولوں دُعا کرو تے متی 6:25-34 چ لکھی یسوع دی گل تے سوچ وچار کرو۔ نالے ایہو جہے تجربیاں تے غور کرو جنہاں توں پتہ چلدا اے کہ یہوواہ اپنے اوہناں بندیاں دی دیکھبھال کردا اے جیہڑے اوہدی خدمت چ لگے رہندے نیں۔ (1-کُرنتھیوں 15:58) اِنج ایس گل تے تواڈا یقین ودھے گا کہ جیویں تواڈے اسمانی باپ نے دُوجیاں دی مدد کیتی، اوہ تواڈی وی مدد ضرور کرے گا۔ یہوواہ تواڈیاں لوڑاں جان دا اے تے اوہنوں پتہ اے کہ ایہناں نُوں کیویں پورا کرنا اے۔ جدوں تُسی اپنی زندگی چ یہوواہ دا ہتھ ویکھو گے تے تواڈا ایمان ہور مضبوط ہوئے گا۔ فیر تُسی مستقبل چ آن والیاں وڈیاں مصیبتاں دوران وی ثابتقدم رہوو گے۔—حبقوق 3:17، 18۔
ایمان رکھو کہ تُسی ہر طوفان چ ثابتقدم رہوو گے
مضبوط ایمان رکھن دی وجہ توں اَسی ہر طرحاں دے طوفان دا سامنا کر سکنے آں، فیر بھانویں ایہہ اِک اصلی طوفان ہووے یاں مصیبتاں دا طوفان ہووے۔ (پیراگراف نمبر 7-11 نُوں ویکھو۔)
7. متی 8:23-26 دے مطابق اِک طوفان دے دوران یسوع دے شاگرداں دا ایمان کیویں پرکھیا گیا؟
7 اِک وار جدوں یسوع تے اوہدے شاگرد اِک جھیل پار کر رہے سن تے اِک بوہت وڈا طوفان آ گیا۔ ایس موقعے تے یسوع نے اپنے شاگرداں نُوں سمجھایا کہ اوہناں نُوں کیہڑیاں گلاں چ اپنا ایمان مضبوط کرن دی ضرورت اے۔ (متی 8:23-26 نُوں پڑھو۔) طوفان ایناں زوردار سی کہ کشتی پانی نال بھرن لگ پئی سی پر یسوع آرام نال سو رہیا سی تے شاگرد بوہت ڈر گئے سن۔ اوہناں نے یسوع نُوں جگا کے کہیا مالک سانوں بچا۔ فیر یسوع نے کہیا: ”تُسی ایناں کیوں گھبرا رہے او؟ تواڈا ایمان ایناں کمزور کیوں اے؟“ یسوع اوہناں دی سوچ درست کرنا چاہندا سی کیونکہ شاگرداں نُوں پتہ ہونا چاہی دا سی کہ یہوواہ کول یسوع تے اوہدے ساتھیاں نُوں ہر مشکل توں بچان دی طاقت اے۔ ایس واقعے توں اَسی کیہہ سکھنے آں؟ ایہہ کہ مضبوط ایمان رکھن دی وجہ توں اَسی ہر طرحاں دے طوفان دا مقابلہ کر سکنے آں، فیر بھانویں ایہہ اِک اصلی طوفان ہووے یاں فیر مصیبتاں دا طوفان ہووے۔
8، 9. بھین آنیل دا ایمان کیویں پرکھیا گیا تے کیہڑی گل نے اوہدی مدد کیتی؟
8 ذرا ملک پورٹوریکو چ رہن والی بھین آنیل دی مثال تے غور کرو۔ اوہنوں اِک وڈی مشکل دا سامنا کرنا پیا جدی وجہ توں اوہدا ایمان مضبوط ہویا۔ 2017 چ اِک سمندری طوفان دی وجہ توں بھین آنیل دا گھر تباہ ہو گیا تے اوہدی نوکری وی چھٹ گئی۔ اوہنے دَسیا: ”میں بوہت پریشان ساں پر میں یہوواہ تے پورا بھروسا رکھیا تے اوہدے کولوں وار وار دُعا کیتی۔ میں ایس طوفان دے باوجود اپنے پیراں تے کھلوتی رہی۔“
9 یہوواہ دی فرمانبردار رہ کے ای اوہ ایس مشکل دا مقابلہ کر سکی۔ اوہنے دَسیا:”تنظیم دِیاں ہدیتاں تے عمل کرن دی وجہ توں ای میرا سکون قائم رہیا۔ یہوواہ نے بھین بھراواں دے ذریعے وی میری مدد کیتی جنہاں نے میرا حوصلہ ودھایا تے مینوں ضرورت دِیاں چیزاں دِتیاں۔ یہوواہ نے میری سوچ توں وی ودھ کے میری مدد کیتی جدی وجہ توں میرا ایمان ہور مضبوط ہویا۔“
10. جے توانوں کسے طوفان ورگی مشکل دا سامنا کرنا پووے تے تُسی کیہہ کر سکدے او؟
10 کیہہ تُسی کسے طوفان ورگی مشکل دا سامنا کر رہے او؟ شاید تُسی کسے قدرتی آفت یاں خطرناک بیماری دی وجہ توں اینے پریشان او کہ توانوں سمجھ نئیں آ رہیا کہ تُسی کیہہ کرو گے۔مشکلاں دی وجہ توں انسان کدی کدی بوہت ای بےحوصلہ ہو سکدا اے۔ پر اپنی پریشانی نُوں اپنے اُتے ایناں حاوی نہ ہون دَوو کہ تُسی یہوواہ تے بھروسا کرنا چھڈ دَوو۔ (زبور 77:11، 12) یہوواہ دے قریب رہن لئی دل کھول کے اوہدے کولوں دُعا کرو۔ اپنا ایمان مضبوط کرن لئی ایس گل تے غور کرو کہ یہوواہ نے ماضی چ کیہڑے طریقیاں نال تواڈی مدد کیتی۔ایس گل دا پورا یقین رکھو کہ یہوواہ توانوں کدی کلّا نئیں چھڈے گا تے ہر قدم تے تواڈا ساتھ دَوے گا۔
11. سانوں پیشوائی کرن والے بھراواں دے فرمانبردار کیوں رہنا چاہی دا اے؟
11 ہور کیہڑی گل مشکلاں چ ثابتقدم رہن چ تواڈی مدد کر سکدی اے؟ فرمانبرداری۔ اوہناں بھراواں تے بھروسا کرو جنہاں تے یہوواہ خدا تے یسوع مسیح بھروسا کردے نیں۔ ہو سکدا اے کہ کدی کدی ایہہ بھرا سانوں کوئی ایہو جہی ہدیت دین جیہڑی سانوں سمجھ نہ آئے۔پر یاد رکھو کہ جے اَسی اوہناں دی گل مناں گے تے یہوواہ سانوں برکتاں دے گا۔ خدا دے کلام تے اوہدے بندیاں دے تجربیاں توں پتہ چلدا اے کہ فرمانبردار رہ کے اَسی اپنی جان بچا سکنے آں۔ ایس لئی ایہو جہیاں مثالاں تے سوچ وچار کرو جنہاں توں ایہہ گل ثابت ہوندی اے۔ (خروج 14:1-4؛ 2-تواریخ 20:17) اِنج تواڈا ایہہ ارادہ پکا ہوئے گا کہ تُسی ہُن وی تنظیم دِیاں ہدیتاں نُوں منو گے تے آن والے وقت چ وی۔ (عبرانیوں 13:17) فیر تُسی اوس خوفناک طوفان یعنی وڈی مصیبت دا سامنا کردے ویلے نئیں ڈرو گے جیہڑی بوہت چھیتی آن والی اے۔—امثال 3:25۔
ایمان رکھو کہ تُسی ناانصافی نُوں برداشت کر سکو گے
جے اَسی یہوواہ کولوں دُعا کردے رہواں گے تے ساڈا ایمان ہور مضبوط ہو جائے گا۔ (پیراگراف نمبر 12 نُوں ویکھو۔)
12. لُوقا 18:1-8 دے مطابق ناانصافی برداشت کرن لئی ایمان رکھنا ضروری کیوں اے؟
12 یسوع مسیح جان دا سی کہ ناانصافی سہندے ہوئے اوہدے شاگرداں دے ایمان دا اِمتحان ہوئے گا۔ ایس اِمتحان چ کامیاب ہون لئی یسوع نے اپنے شاگرداں نُوں اِک مثال دِتی جیہڑی لُوقا دی اِنجیل چ لکھی اے۔ یسوع نے اوہناں نُوں اِک بیوہ دی کہانی سنائی جیہڑی اِک بھیڑے جج کولوں انصاف منگدی رہی۔اوس بیوہ نُوں پکا یقین سی کہ جے اوہ ہمت نئیں ہارے گی تے اوہ جج اِک نہ اِک دن اوہدی گل ضرور سنے گا تے اِنج ای ہویا۔ اِک وقت آیا کہ اوس جج نے اوہدی منت سن لئی۔ ایہدے توں اَسی کیہہ سکھنے آں؟ یہوواہ اوس بھیڑے جج وانگوں نئیں اے۔ ایسے لئی یسوع مسیح نے کہیا: تے فیر کیہہ خدا اپنے لوکاں نُوں انصاف نئیں دَوائے گا جیہڑے دن رات اوہدے کولوں فریاد کردے نیں؟ (لُوقا 18:1-8 نُوں پڑھو۔) غور کرو کہ یسوع نے کہیا: ”جدوں انسان دا پُتر آئے گا تے کیہہ اوہ زمین تے ایہو جیہا ایمان پائے گا؟“ جدوں سانوں ناانصافی دا سامنا کرنا پیندا اے تے سانوں صبر رکھنا چاہی دا اے تے ہمت نئیں ہارنی چاہی دی۔ایس طرحاں اَسی ثابت کراں گے کہ اوس بیوہ وانگوں ساڈا ایمان وی مضبوط اے۔ مضبوط ایمان دی وجہ توں اَسی پورا یقین رکھاں گے کہ اِک نہ اِک دن یہوواہ ساڈی مدد ضرور کرے گا۔ نالے ایس گل تے وی یقین رکھو کہ دُعا چ بڑی طاقت اے۔ کئی وار یہوواہ ساڈیاں دُعاواں دے جواب اوس طریقے نال دیندا اے جدے بارے اَسی کدی سوچیا وی نئیں ہوندا۔
13. مثال دے کے دَسو کہ دُعا چ کِنّی طاقت اے۔
13 ذرا عوامی جمہوریہ کانگو چ رہن والی بھین وکٹوریہ دی مثال تے غور کرو۔ اوہدا شوہر یہوواہ دا گواہ نئیں اے تے اوہناں دی دھی 15 سال دی اے۔ اِک دن کجھ فوجیاں نے اوہناں دے پِنڈ تے حملہ کر دِتا جدی وجہ توں اوہناں نُوں اپنا گھر بار چھڈ کے بھجنا پیا۔ پر رستے چ فوجیاں نے اوہناں نُوں روک لیا تے اوہناں نُوں جانوں مارن دی دھمکی دِتی۔ ڈر دے مارے بھین وکٹوریہ رون لگ پئی۔ ایس لئی اوہنوں دلاسہ دین لئی اوہدی دھی نے یہوواہ دا ناں لے کے اُچی اُچی دُعا کیتی۔ جدوں اوہدی دُعا ختم ہوئی تے فوجیاں دے کمانڈر نے اوہنوں پچھیا:”پُتر، تینوں دُعا کرنا کنہے سکھایا اے؟“ اوہنے جواب دِتا: ”میری امی نے۔ اوہناں نے مینوں اوس طریقے مطابق دُعا کرنا سکھایا اے جیہڑا متی 6:9-13 چ لکھیا اے۔“ اوس کمانڈر نے کہیا: ”پُتر توں اپنے امی ابو نال ایتھوں جا سکنی ایں۔ یہوواہ تواڈا خدا تواڈی حفاظت کرے۔“
14. (الف) کیہڑی وجہ توں ساڈا ایمان پرکھیا جا سکدا اے؟ (ب) ثابتقدم رہن چ کیہڑی چیز ساڈی مدد کر سکدی اے؟
14 بھین وکٹوریہ تے اوہدی دھی دے تجربے توں اَسی سکھنے آں کہ سانوں کدی نئیں بھلنا چاہی دا کہ دُعا چ زبردست طاقت اے۔ پر جے سانوں اپنی دُعا دا جواب فوراً یاں کسے حیران کر دین والے طریقے نال نہ ملے تے فیر سانوں کیہہ کرنا چاہی دا اے؟ سانوں اوس بیوہ دی مثال تے عمل کرنا چاہی دا اے جدا ذکر یسوع نے کیتا۔ سانوں دُعا کردے رہنا چاہی دا اے۔ نالے پورا بھروسا رکھنا چاہی دا اے کہ یہوواہ سانوں کدی کلّا نئیں چھڈے گا تے صحی وقت تے کسے نہ کسے طریقے نال ساڈی دُعا دا جواب ضرور دَوے گا۔ وار وار دُعا چ یہوواہ کولوں پاک روح منگدے رہوو۔ (فِلپّیوں 4:13) یاد رکھو کہ بوہت چھیتی یہوواہ توانوں اینیاں برکتاں دَوے گا کہ تُسی اوہناں ساریاں تکلیفاں نُوں بُھل جاؤ گے جیہڑیاں اَج توانوں سہنیاں پے رہیاں نیں۔ جدوں تُسی یہوواہ دی مدد نال ہر مشکل چ ثابتقدم رہوو گے تے تواڈا ایمان مضبوط ہوئے گا تے تُسی آن والیاں مشکلاں لئی تیار ہو جاؤ گے۔—1-پطرس 1:6، 7۔
ایمان رکھو کہ تُسی ہر مشکل نُوں پار کر سکدے او
15. متی 17:19، 20 دے مطابق یسوع دے شاگرداں نُوں کیہڑی مشکل دا سامنا کرنا پیا؟
15 یسوع نے اپنے شاگرداں نُوں دَسیا کہ ایمان دی وجہ توں اوہ ہر طرحاں دی مشکل نُوں پار کر سکدے نیں۔ (متی 17:19، 20 نُوں پڑھو۔) یسوع دے شاگرداں نے کئی وار بُرے فرشتیاں نُوں لوکاں چوں کڈھیا سی پر اِک وار اوہ اِنج نئیں کر سکے۔ کیوں نئیں؟ یسوع نے اوہناں نُوں دَسیا کہ اوہناں نُوں اپنا ایمان ہور مضبوط کرن دی ضرورت سی۔ اوہنے کہیا کہ جے اوہ اِنج کرن گے تے اوہ پہاڑ ورگیاں مشکلاں نُوں وی پار کر سکن گے۔ سانوں وی پہاڑ ورگیاں مشکلاں دا سامنا کرنا پے سکدا اے۔
جے اَسی بڑے دُکھی آں تے فیر وی مضبوط ایمان دی وجہ توں اَسی یہوواہ دی خدمت چ لگے رہواں گے۔ (پیراگراف نمبر 16 نُوں ویکھو۔)
16. ایمان دی وجہ توں بھین گیڈی اپنے شوہر دے قتل دے باوجود ثابتقدم کیویں رہ سکی؟
16 ملک گواٹیمالا چ رہن والی بھین گیڈی دی مثال تے غور کرو۔ اِک وار جدوں اوہ تے اوہدا شوہر عبادت توں واپس آ رہے سن تے کسے نے اوہدے شوہر دا قتل کر دِتا۔ بھین گیڈی اپنے ایمان دی وجہ توں ایس صدمے نُوں کیویں برداشت کر پائی؟ اوہ کہندی اے: ”میں دُعا دے ذریعے اپنا سارا بوجھ یہوواہ تے پا دِتا۔ایہدے توں مینوں بڑی تسلی مِلی۔ یہوواہ میرے خاندان تے کلیسیا دے بھین بھراواں دے ذریعے میرا بڑا خیال رکھدا اے۔ یہوواہ دی خدمت چ مصروف رہن دی وجہ توں میرا درد گھٹ ہو جاندا اے تے میں کل بارے حدوں ودھ فکرمند نئیں ہوندی۔ ایہہ تکلیف سہن دی وجہ توں میں ایہہ ویکھیا اے کہ اَگے چل کے بھانویں میرے تے کوئی وی مشکل آئے میں یہوواہ خدا، یسوع مسیح تے ساڈی تنظیم دی وجہ توں ڈٹ کے ایہدا مقابلہ کر سکاں گی۔“
17. اَسی پہاڑ ورگیاں مشکلاں دا سامنا کیویں کر سکنے آں؟
17 کیہہ تُسی اپنے کسے عزیز دی موت دا غم سہہ رہے او؟ جے اِنج اے تے فیر بائبل چوں اوہ واقعے پڑھو جدوں مُردیاں نُوں زندہ کیتا گیا۔ اِنج تواڈا ایمان مضبوط ہوئے گا کہ مُردِیاں نُوں زندہ کیتا جائے گا۔ کیہہ تُسی ایس لئی دُکھی او کہ تواڈے کسے رشتےدار نُوں کلیسیا چوں کڈھ دِتا گیا اے؟ تے کیوں نہ پاک کلام چوں اپنے آپ نُوں یقین دَواؤ کہ یہوواہ دے اِصلاح کرن دا طریقہ ہمیشاں بالکل صحی ہوندا اے۔ جدوں وی تُسی کسے مشکل دا سامنا کرو تے ایہنوں یہوواہ تے اپنے ایمان نُوں پکا کرن دا موقع سمجھو۔ کھل کے یہوواہ نُوں اپنے دل دا حال دَسو۔ اپنے آ پ نُوں بھین بھراواں توں دُور کرن دی بجائے اوہناں دے نیڑے رہوو۔ (امثال 18:1) شاید پرانیاں یاداں دی وجہ توں تواڈیاں اَکھاں چ اتھرو آ جان پر فیر وی اوہناں کماں چ لگے رہوو جنہاں نُوں کر کے تُسی ثابت قدم رہ سکو گے۔ (زبور 126:5، 6) ہر عبادت چ جاؤ، مُنادی کردے رہوو تے بائبل پڑھدے رہوو۔ اپنا سارا دھیان اوہناں شاندار برکتاں تے رکھو جیہڑیاں مستقبل چ یہوواہ توانوں دَوے گا۔ جدوں تُسی ویکھو گے کہ یہوواہ تواڈی مدد کیویں کر رہیا اے تے اوہدے تے تواڈا ایمان مضبوط ہوندا جائے گا۔
سانوں ہور ایمان دے
18. جے توانوں لگدا اے کہ تواڈا ایمان ایناں مضبوط نئیں اے تے تُسی کیہہ کر سکدے او؟
18 جے کسے مشکل یاں ازمیش دا سامنا کردے ویلے تُسی ویکھدے او کہ تواڈا ایمان ایناں مضبوط نئیں اے تے حوصلہ نہ ہارو سگوں اپنے ایمان نُوں مضبوط کرو۔یسوع دے شاگرداں وانگوں یہوواہ کولوں ایہہ درخاست کرو: سانوں ہور ایمان دے۔ (لُوقا 17:5) اوہناں بھین بھراواں دی مثال بارے وی سوچو جنہاں دا ذکر ایس مضمون چ کیتا گیا اے۔بھرا میگیل تے بھین یورائے وانگوں اوہناں موقعیاں نُوں یاد کرو جدوں یہوواہ نے تواڈیاں ضرورتاں نُوں پورا کیتا۔ بھین وکٹوریہ دی دھی تے بھین آنیل وانگوں دل دی گہرائی نال یہوواہ کولوں دُعا کرو، خاص طور تے اوہدوں جدوں تُسی کسے مشکل دا سامنا کر رہے او۔ بھین گیڈی وانگوں یاد رکھو کہ یہوواہ شاید تواڈے گھر والیاں یاں دوستاں دے ذریعے تواڈی مدد کرے۔ جدوں تُسی ایس گل تے دھیان دَوو گے کہ ہُن مشکلاں دا سامنا کرن چ یہوواہ تواڈی مدد کیویں کر رہیا اے تے فیر ایس گل تے وی تواڈا ایمان ہور مضبوط ہو جائے گا کہ یہوواہ مستقبل چ وی مشکلاں دوران توانوں سنبھالے گا۔
19. یسوع وانگوں تُسی وی کیہڑی گل دا یقین رکھ سکدے او؟
19 یسوع نے اپنے شاگرداں نُوں دَسیا کہ اوہناں نُوں کیہڑے معاملیاں چ اپنے ایمان نُوں ہور مضبوط کرن دی ضرورت اے۔ یسوع نُوں پورا یقین سی کہ یہوواہ دی مدد نال شاگرد آن والی ہر مشکل چ ثابتقدم رہن گے۔ (یوحنا 14:1؛ 16:33) اوہنوں پتہ سی کہ اِک وڈی بِھیڑ اپنے مضبوط ایمان دی وجہ توں مستقبل چ وڈی مصیبت چوں بچ نکلے گی۔ (مکاشفہ 7:9، 14) کیہہ تُسی وی اوس وڈی بِھیڑ چ شامل ہوو گے؟ جے تُسی اَج ہر موقعے تے اپنے ایمان نُوں مضبوط کردے رہوو گے تے یہوواہ دی عظیم رحمت نال تُسی ضرور نجات پاؤ گے۔—عبرانیوں 10:39۔
گیت نمبر 118 (خوشی نال گاؤ): سانوں ہور ایمان دے
^ پیراگراف 5 اَسی سارے اوس وقت دا اِنتظار کر رہے آں جدوں ایہہ بُری دُنیا ختم ہو جائے گی۔ پر شاید کدی کدی اَسی سوچئے کہ کیہہ وڈی مصیبت دے دوران ساڈا ایمان ایناں مضبوط ہوئے گا کہ اَسی آخر تک ثابتقدم رہ سکئے۔ ایس مضمون چ اَسی خدا دے کجھ بندیاں دِیاں مثالاں تے غور کراں گے تے ویکھاں گے کہ اَسی اپنے ایمان نُوں مضبوط کرن لئی اوہناں توں کیہہ سکھ سکنے آں۔
